Lesson 260 - Senior

Memory Verse

“Enye eyekpon eyenyuñ ekere Eyen Andikoñ-ñkan; Jehovah Abasi eyenyuñ ọnọ Enye ebekpo ete Esie David” (Luke 1:32).

Cross References

I Angel Ọnọ Zacharias Ntọt

1. Eritọñọ ikọ Luke ayarare akpanikọ emi odude ke etop esie, Luke 1:1-4; 2 Timothy 3:16

2. Edinen ido ye nsin-ifik Zacharias ye Elizabeth akanam mmọ edot nte Abasi ọdọñde mmọ utom, Luke 1:5-7; 1 Timothy 6:1-16; Titus 1:5-9

3. Angel owut idem ke Edisana Ebiet ke ini Zacharias osuk ọfọpde incense, Luke 1:8-11; Exodus 30:1-9; Eriyarare 8:3; Psalm 141:2

4. Angel ọdọñ Zacharias esit onyuñ ọnọ etop emi otode Abasi, Luke 1:12-17; Daniel 8:16; 9:21-23; 10:10-12

5. Angel ama ayarade idem esie ndimen eyihe Zacharias mfep, onyuñ ọnọ enye idiọñọ ndiwut ete ke etop Abasi edi akpanikọ, Luke 1:18-20

6. Ikọ Abasi ama osu, Luke 1:21-25

II Angel Ọnọ Mary Ntọt

1. Ekemek Gabriel ndida etop Abasi nsọk Mary ñko, Luke 1:26, 27

2. Angel ama ọkọm Mary onyuñ asian enye etop oro, Luke 1:28-33

3. Mfina Mary ikedighe eyighe, edi ekedi se enye edinamde nte udeme utom esie ke mme ñkpọ emi edidade itie, Luke 1:34

4. Gabriel otim ayarade utom Edisana Spirit, ọsọñọ mbuọtidem Mary onyuñ etiñ abaña odudu Abasi, Luke 1:35-37; Job 42:2; Psalm 115:3; Matthew 19:26

5. Mary ama onyime ofuri-ofuri Abasi ndida imọ nnam utom oro, Luke 1:38, Psalm 110:3; Isaiah 1:19; 2 Ñwed Corinth 8:3

III Angel Ayarade Idem Ọnọ Joseph

1. Ekikere ama otimere Joseph koro enye ekekerede ete Mary ikanamke akpanikọ, Matthew 1:18, 19; Deuteronomy 22:22-27

2. Joseph ekedi edinen owo, ndien Abasi ama ọdọñ Angel eketiñ ọnọ enye abaña eridi Christ. Matthew 1:20-23

3. Joseph ama osuk ibuot ọnọ uyo Abasi, Matthew 1:24, 25

Notes

SE EKPEPDE EBAÑA

Mme Angel Ye Ikpọ-Angel

Nte nnyin itọñọde ndiduñọre ikpehe akani mbuk emi osuk edide obufa ke abaña emana Jesus, yak nnyin ifiak idemere ekikere nnyin ke ndusuk ñkpọ emi abañade enye.

Ama osim ñkpọ nte isua 400 tọñọ nte angel ọkọnọ akpatre ntiñ-nnim-ikọ ke Israel. Ata anyan ini ama ebe tọñọ nte Abasi akayarade Idemesie utibe-utibe ke ibuot ndimek ikọt Esie. Akpatre eriwut idem eke angel ekewutde ekedi eke Gabriel, akwa angel, emi ekewutde Daniel, anditiñ ntiñ-nnim ikọ idem ye etop emi Abasi ọkọdọñde ke abaña ntañ mfep. Gabriel ama asiak enyiñ akwa-angel efen, Michael, ke ini oro. Nnyin ifiọkke mme ikpọ-angel ifañ edu, edi Gabriel ama etiñ ete ke imọ ito iso Abasi idi; ndien ke akpatre ñwed ke Edisana Ñwed Abasi etiñ ete ke angel itiaba edu emi edade ke iso Abasi (Eriyarare 8:2). Nnyin ifiọkke mme angel itiaba emi edi mme ikpọ-Angel, mme Gabriel ye Michael edu ke otu itiaba emi. Edi nnyin imọfiọk ite ke mme isuñ-utom iba emi, emi etode Heaven edi akpan isuñ-utom emi etode Abasi emi enamde ñkpọ enọ Abasi ke utibe usuñ ye ke ndisaña nnam mme ata ikpọ utom.

Ekeda Michael nte kiet kotu ikpọ nditọ mbọñ (Daniel 10:13), ndien edọhọ ete enye ada ọnọ nditọ oruk Daniel, emi nnyin ifiọkde ite edi mme Jew (Daniel 10:21; 12:1). Ke ntem Michael edi akpan angel emi akamade mbubehe emi abañade ndimek ikọt Abasi. Etiñ ebaña enye ke ikọ Abasi nte enye emi akamade ñkpọsọñ utom tutu osim ndiñwana ye Satan ke idemesie (Jude 9; Eriyarare 12:7).

Edi ema enọ Gabriel akakan ifet emi asaña-utom heaven kiet ekededi ekpenyenede. Iyekpep ibaña mme nsio-nsio idaha eriyarare mmọ ke ukpep-ñkpọ emi. Ñkukure ini efen, emi ewetde ke Ñwed-Abasi ete ke Gabriel ama owut idem edi ke ini ntañ-mfep, ke ini enye etienede Daniel onyuñ adade etop oto Abasi ke abaña mme ukperedem usen ye mme ñkpọ emi edidade itie mbemiso, ye ke ini Eriyarare Christ. Nnyin imekeme ndikut ndien ite ke utom Gabriel kpukpru ini abaña Jesus Christ, Ọbọñ ubọñ, nte Andinyaña ubon owo.

Gabriel Edise Zacharias

Edi se inemde ndikut nte kpukpru ñkpọ ke abaña ediwut idem mme angel odukde ekekem ye uduak Abasi. Gabriel ekebem iso owut kiet ke otu mme oku idem oro edi Zacharias emi okosuk anamde utom ke ufọk Abasi ke Jerusalem, obio emi enyenede Abasi. Oku ada ke ufọt Abasi ye owo, nte uduak Abasi asañade, ediyarare enyene ndibe ke kiet ke otu mme anam-utom oro. Fiọk ñko ete ke Gabriel ikosoboke ye Zacharias ke obio esie edi enye ekedi ke ebiet emi edide nnen-nnen itie, ke ini enye akadade utọ etop oro. Enye ekedi ke Ufọk Abasi onyuñ edisobo ye enye emi etiede ke ibuot mme owo do. Edi ke Ufọk Abasi ke nnyin itim ikop Ikọ Abasi. Edi ke edisana ebiet Esie emi eyakde enọ ukpono Abasi, ke Abasi ayarade uduak Esie ọyọhọ-ọyọhọ ọnọ ikọt Esie. Abasi anam kpukpru ñkpọ efọn. Enye ọkọdọñ nnen-nnen asaña-utom ata akpan utom emi ke nnen-nnen ini, ke nnen-nnen ebiet, ọnọ nnen-nnen owo.

Fiọk ñko ete ke ekedi ke ini akam ke ekebọ etop Abasi emi. Mi ñko, ke akamba ukpep-ñkpọ odu ọnọ nnyin kpukpru. Nnyin ikopke Uyo oro ke ini esit ye ekikere nnyin ọyọhọde ye ñkpọ uwem emi, ibọhọke Uyo oro etiñ ikọ ndikpan ndisime erinam nnyin. Nnyin imokut oto ke isañade ibe edinam nnyin ye nte enyuñ ewetde ke Ñwed Abasi ete ke Abasi asaña ekpere nnyin ke ini nnyin isañade ikpere Enye. Ke ini ebuana nnyin ye Abasi, ke akam ọdọkde osim ebekpo heaven, ini oro ikpọñ-ikpọñ, ke nnyin idorenyin ndibọ etop uduak Abasi emi Enye ọdọñde ọnọ nnyin.

Zacharias ye ñwan esie Elizabeth ekedi mme owo emi Edisana Spirit ekekemede nditiñ utibe ikọ itoro mbaña. “Mmọ mbiba ekedi ndinen owo ke enyin Abasi, esaña ke kpukpru mbet ye mme ewuhọ Jehovah, enana ndo”. Nso utọ ikọ ke etiñ ebaña owo iba ke otu ubon owo!

Ndinen ke iso Abasi! Ebat ediwak owo nte ndinen ke iso owo, nte ekikere owo edide. Edi owo iba emi ekedi ndinen ke iso Abasi, “esana ke kpukpru mbet ye mme ewuhọ Jehovah enana ndo”. Ediwak etiene ido ukpono Abasi emi ekutde ke enyin, ye mme ndutim ibet, edi ke esuk enyenyene enyuñ enam, edi esuk enyene ndidibe idiọk-ñkpọ ke esit ye ekikere mmọ, emi miwọrọke iwut idem. Edi ndimek owo iba emi ikenyeneke ndo ke isañ mmọ. Mmọ ikenyeneke ndo, idighe ke iso owo ikpọñ-ikpọñ, edi ye ke iso Abasi!

Yak mmọ emi edọhọde ete ke mme owo emi ekeneñerede eyom Abasi ke eyo Akani Ediomi ekenyene ekpri idaha ke edisana uwem, eda odudu mmọ edomo ye idaha edinen ido ye edisana uwem isuñ-utom Abasi iba emi! Ema enyaña Zacharias ye Elizabeth esio ke idiọk-ñkpọ mmọ enyuñ enam mmọ esana!

Edi ndisana nditọ Abasi ke Abasi ọdọñ etop ọnọ. Ekeme ndidi ediwak ndisana ikọt Abasi efen ema edu ke ini emi, emi ekesuk ebetde eridi Messiah. Edi Abasi ekemek iba emi ndida nnam uduak Esie osu. Zacharias ekedi owo emi akakpañde utọñ ọnọ uyo Abasi, okposuk edi nte ntimere-esit emi okotode ntọt emi akanamde enye enyene eyighe ke esit esie. Eyighe emi okodude ke esit Zacharias ikesimke idaha emi ekpenamde ubọk Abasi etre ndinam uduak Esie. Ke ndidian ke edinen ido ye edisana uwem emi nnyin ima ibebem iso itiñ ibaña, ọyọhọ udomo mbuọtidem ke Abasi ye ke Ikọ Esie ema edu ke esit ndisana ikọt Abasi iba emi, emi ekenamde ikọ oro enyene odudu onyuñ anam ñkpọ ke mmọ.

Ke ido obio, kpukpru ndidem ema enyene mme ebemiso, emi ọdiọñde usuñ mbemiso edidem edi. Abasi ama emek ndidiọñ usuñ mbemiso Eyen Esie edi, ke ndidọñ edisana owo ndikwọrọ Eti mbuk Obio Ubọñ Abasi nnọ ndimek ikọt Esie. Nnyin imokut ite ke ñkpọ nte isua 400 ama ebe tọñọ nte akpatre andittiñ ntiñ-nnim ikọ ekemenerede uyo esie ofiori etop Abasi, ndien otim ayarade ete ke anditiñ ntiñ-nnim ikọ oro ekedi enye emi ọkọnọde nnyin ata iñwañ-iñwañ ndise anditiñ ntiñ-nnim ikọ emi editienede enye oro ekedi andibem Jesus Christ iso. (Kot ke Malachi 4:4-6; Luke 1:16, 17; ye Matthew 11:7-15).

Ekpekeme didie nditim ntiñ mbaña eridi andibem iso emi? Ke ntọt emi angel ọnọde. Anie ke ekpesin ata akpan ntọt emi otode Ebekpo Abasi ke ubọk? Akwa-angel Gabriel emi akadade ke iso Abasi. Ekenọ Enye utom edisuan etop emi ye mme etop efen emi abañade Christ Ọbọñ. Nnyin imokut idaha mmọ emi ekedọñde enye enọ, oro edi mbon akpanikọ emi ekemekde ndibọ nnyuñ nnam ikpehe uduak Abasi enye emi, osu, ọnọ uduot owo emi ema ekeduọñọ. Ndien nnyin imonyuñ ikut ñko ito Ikọ Abasi nte ekenamde uduak oro ọwọrọ osu utibe-utibe ukem nte ekewetde, ke kpukpru usen uwem andikebem-iso oro.

Gabriel Edise Mary

Kpa akwa angel oro akafiak ọbiọñọre man ada ata akpan etop emi akande kpukpru ọsọk edisana ye suñ-suñ eyen-añwan Galilee emi akayakde idem ọnọ Abasi. Enye ekedi suñ-suñ edisana eyen-añwan emi ekedade enọ owo emi ekekerede Joseph ke ndọ. Etop oro okotode Abasi ọkọdọhọ enye ete ke enye enyene akwa mfọn-iso ndien ke Abasi odu ye Enye. Enye okobup mme ñkpọ emi etiñde enọ enye edisana didie osu, idighe ke eyighe, edi man oto do enye ọfiọk se Abasi aduakde abaña enye ye se eyomde enye anam man uduak oro ọwọrọ osu. Eketiñ enọ enye ete ke Edisana Spirit eyenam se owo mikemeke ndinam ndien uduak Abasi eyewọrọ osu.

Ukpep-ñkpọ odu mi ñko ọnọ nnyin. Nnyin imọfiọk ite se Abasi ọdọñde edi se Enye ọnọde ukeme. Ke ini Abasi ọdọñde, Enye asiak usuñ. Idighe itie nnyin ndibup ntak uduak Esie mme ndiyik se Enye ọnọde nnyin ke ini nnyin inamde uduak Esie emi Enye ọnọde nnyin. Nnyin imekeme ndibup nte Mary okobupde, mme usuñ, mme ini, mme ebiet emi Abasi emekde. Edi nnyin ikemeke ndiyik mme ndifaña. Edieke nnyin ikopde uyo, edidiọñ odu ọnọ nnyin. Edieke nnyin itutde utọñ, afanikọñ eyedu.

Angel Edise Joseph

Joseph, ñko ama oyom nditim mfiọk. Akananam Abasi ikpọñke kiet ke otu ikọt Esie itre ndinọ enye ndọñ-esit mme nditiñ nsọñọ se enye oyomde. Enye odudu kpukpru ini ndiñwam, ndisọñọ idem ye ndiwut usuñ ke ini nnyin mikemeke ndifiọk ebiet eke nnyin ikpekade.

Nnyin ifiọkke enyiñ angel emi okowutde Joseph idem. Itimke idi akpan ñkpọ nnyin ndifiọk, midighe Edisana Spirit ekpetiñ ọnọ nnyin. Akpan ñkpọ emi nnyin inyenede ndifiọk edi Abasi ama ọdọñ etop emi Joseph okoyomde, ndien Enye eyenam ukem oro ọnọ nnyin, ke ini afanikọñ etienede nnyin, ndien nnyin iyom uñwam ye item. Abasi ekeme ndinam emi ke usuñ kiet ekededi emi Enye emekde, edi ke ini edikwọrọ Eti mbuk emi, Enye ada Ikọ Esie nte akpan usuñ emi Enye adade ewuhọ Esie ọsọk nnyin. Ke Edisana Ñwed Abasi nnyin ikut uñwam ye odudu emi nnyin iyomde man inam mme ewuhọ oro. Abasi nnyin ọfọn ido onyuñ enyene mbọm adaña didie!

Angel oro ada ikọ Abasi owut edinen owo oro, Joseph, ndisọñọ etop emi enye ọkọbọde oto Abasi. Ikọ mme prohpet ke abaña Jesus ama anam mme ñkpọ oro eketimerede Joseph añwaña. Nnyin imenyene ukpep-ñkpọ mi ñko. “Ebup ewuhọ ye ñwed ntiense”, enyene ndidi ikọ nda-usuñ nnyin kpukpru ini. Edieke nnyin ibọde se nnyin ikerede ite edi etop mme ewuhọ emi otode Abasi, nnyin inyene ndida Ikọ Abasi ndomo ye etop oro mme ewuhọ oro nse mme asaña ekekem ye Ikọ Abasi. Emi edi ñkukure usuñ emi nnyin ikemede ndifiọk nte nnyin ke ikop uyo Abasi, koro Abasi idikpuhọkede Ikọ Esie.

Eridi Eyen Abasi

Ke ntem ke nnyin inyene ibio-ibio mbuk ibaña eriyarare idem mme angel nnọ mme owo mbemiso emana Christ, ndien imekeme ndisioño mme ukpep-ñkpọ nto mmọ. Emi ekedi akpan ini ke mbuk Israel. Ekedi akpan ini ke mbuk ofuri ererimbot. Eyen Abasi ekenyene ndikabare ñko ndi Eyen David. Enye ekenyene ndimana man oto do Enye ekeme ndibọ ndutuhọ nyuñ mkpa nnọ nyin, man afak nnyin osio ke mme idiọk-ñkpọ. Eridi Esie ikedighe ke unana mbeñidem, mme nte ñkpọ-ntibe ke usen ke usen emi edude ke mbuk ererimbot emi. Enye ekedi akakan ñkpọ-ñtibe emi akanam adade itie, koro ke esiode emana Esie efep, mkpa usio-isop ikpoduhe. Ke mkpa Esie mikpoduhe, eriset ke mkpa ikponyuñ iduhe. Edieke Enye mikpesetke mbuọtidem nnyin ọkpọwọrọ ikpikpu nnyin ikponyuñ isuk idu ke mme idiọk-ñkpọ nnyin.

Edi ekọm enyene Abasi ke emana Christ, emi akanamde mkpa ye eriset Esie edu man etebe nnyin ikpe! Ekọm enyene Abasi emi ọnọde nnyin ọyọhọ ntiense akpanikọ ke abaña kpukpru ñkpọ-ntibe emi, emi mme anditiñ ntiñ-nnim ikọ eketiñde ebaña, oto ke odudu Edisana Spirit, onyuñ anam mmọ esu, oto ke utom ima esit ndisana iren ye iban, nte Zacharias, Elizabeth ye Mary. Ekọm enyene Abasi ke emi Enye akasiande onyuñ ọsọñọde mme ikpọ ñkpọ-ntibe ke utibe ediyarade idem mme ikpọ mme angel emi ekoñde ekan ke heaven, emi eriyarade idem mmọ ekabarede edi akpan mbuk mfin emi. Ekọm enyene Abasi emi akanamde mme ntiñ-nnim ikọ emi, eke angel ye eke mme anditiñ ntiñ-nnim ikọ esu, ke ọyọhọ idaha, ntre ke akabare edi ọyọhọ ntiense akpanikọ ọnọ uduak Abasi emi Enye anamde ọnọ nnyin.

Questions

MME MBUME

1. Nso idi ntak emi ekewetde Ñwed Luke nte emi Andiwet etiñde ke eritọñọ ufañ esie?
2. Nso ke afo ekeme nditi ke se Ikọ Abasi etiñde abaña idaha Zacharias ye Elizabeth ke ñkpọ Spirit?
3. Zacharias okodu mmọñ ke ini angel okowutde enye idem?
4. Siak mme ini emi nnyin ikopde nte Gabriel akayararede idem owut iren mme iban?
5. Nso ikedi etop emi angel ọkọnọde Zacharias? Enye okonyuñ ọbọ didie?
6. Nso etop ke Gabriel ọkọnọ Mary?
7. Nso ikedi etop emi Joseph ọkọbọde?
8. Tiñ mme akpan ukpep-ñkpọ emi afo osiode ke ukpep ñkpọ emi.
9. Nte Mary ama eyik etop Angel?
10. Tiñ Luke 1:37 ke ibuot ye mme itie efen ke Ñwed-Abasi emi etiñde ukem ikọ emi.