Lesson 249 - Junior
Memory Verse
“Eyedọdiọk ọnọ owo oro adade Eyen owo ọnọ” (Mark 14:21).Notes
Owo Mbet
Ke otu mmọ emi ekemekde ndidi mbet Jesus, ama odu owo emi ekekerede Judas Iscariot. Nnyin ifiọkke baba ñkpọ kiet ibaña uwem esie mbemiso enye akabare edi owo mbet. Enyiñ ete Judas ekedi Simon (John 6:71). Ke ini Jesus okokotde mme owo ete etiene Imọ, Enye ikoyomke ndifiọk, mme, mme ete ye eka mmọ oro ekedi mbon Abasi; mme mmọ ema enyene ukpep-ñkpọ ikọ Abasi.
Ikot eke Eti-mbuk mfin edi kpasuk ntre, onyuñ enyene kpukpru owo. Idighe tutu owo oto ufọk emi ebọñde akam enyuñ enyene ifiọk Ñwed Abasi ndien enye eyere ikot Abasi. Ọbọñ okot mmọ oro minyeneke ifiọk Ñwed Abasi ye edibọñ akam ukem ye mbon emi etode mme ufọk emi efiọkde Christ. “Owo eke amade, yak edi edibọ mmọñ uwem ke ikpikpu” (Eriyarare 22:17). “Sese, ndada ke usuñ ntuak; edieke owo, okopde uyo Mi onyuñ osiode usuñ, nyeduk ntiene enye” (Eriyarare 3:20).
Usuñ nte Judas ekeyerede ikot Christ iduhe ke Ñwed Abasi. Ntak inyuñ iduhe ndikere ete ke ikot Judas ama enyene ukpuhọre ye eke mbet eken. Judas ekedi kiet ke otu mbet duopeba emi ekemekde ndidi Apostle (Enye emi esiode edọñ). Jesus ama okot mmọ osio ke otu mbet eken, “ndien mmọ edi” (Mark 3:13). Judas ama eyere ikot, ndien ema eyet enye aran ye mbet duopekiet eken, ndidu ye Jesus ndinyuñ ñka ñkọkwọrọ Eti-mbuk.
Jesus ama ọdọhọ mbet Esie ete: “Ndien kpukpru owo eyesua mbufo ke abaña enyiñ Mi: edi eyenyaña owo eke edimede ime tutu osim akpatre” (Matthew 10:22). Judas ama okop se Jesus okoyomde oto mbet Esie: “Owo ekededi eke minyuñ ibiomke krọs esie itiene Mi ke edem ikemeke ndidi owo mbet Mi” (Luke14:27). Ema ebat Judas esin ke otu mme Apostle emi ekekade ndikwọrọ ete mme owo “Ekabare esit.” Judas ekedi kiet ke otu mme Apostle emi ekebinde “ediwak demon eduọk, enyuñ eyet ediwak mbon udọñọ aran, enyuñ enam udọñọ okure mmọ” (Mark 6:12, 13).
Akama-Ekpat
Enyene mme ini emi Jesus okosiode mbet ọdọñ ekedep udia, nte ini emi Jesus ekenyenede nneme ye ñwan Samaria ke mben obube mmọñ (John 4:8). Ema eyak ekpat-okuk mme Mbet esin ke ukpeme Judas (John 13:29). Enye akada idaha emi nnyin ikotde akama-okuk. Judas ekese ñkpọ abaña ekpat, onyuñ akama okuk emi mme Apostle ekenyenede.
Judas ama okop mme ntọt emi Jesus ọkọnọde. Ke ini Apostle duopeba ekedọhọde Jesus anam ñke asuan mkpasip añwaña, ema edọhọ mmọ ke “ekikere ñkpọ eyo emi ye abiaña inyene ababa ikọ oro owot” inyuñ iyakke owo enyene mfri (Matthew 13:22). Jesus ama etiñ ọnọ mmọ abaña ndisime owo inyene emi ekekpakde ukpọñ esie ke ubọk esie mbemiso enye enyene ifet ndiduọk odudu, ndidia, ndiñwọñ, nnyuñ ndu ke inemesit. Jesus ama ọdọhọ ete: “Ntem ke etie ye owo eke ọkọde inyene ọnọ idem esie, edi minyeneke inyene ke ñkañ Abasi” (Luke 12:21).
Judas ikekpemeke item emi enye okokopde. Enye akabare edi ibuk, onyuñ afaña ke ini Mary akadade ọsọñ-urua edifuọñ aran spikenard, eke udop pound kiet eyet Jesus. Judas ama ọdọhọ ete: “Nsinam mikanyamke edifuọñ aran emi ibọ okuk ikie ita, ida inọ mme ubuene?” (John 12:4, 5). Jesus ọbọrọ ete: “Ekpọñ enye; nsinam efinade enye? enye akanam eti utom ke idem Mi. Koro mbufo emenyene mme ubuene ye mbufo kpukpru ini, ndien ini eke emama, mbufo ekeme ndifọn ido ye mmọ, edi mbufo inyeneke Mi kpukpru ini. Enye akanam se ekemede” (Mark 14:6-8).
Judas eketiñ ikọ ñkari ye mbubik, oto ke esit isin-enyin. Enye ekekere ete ke ebebiat aran emi ke ndida nyet Jesus, sia ekpekenyam enye uwak okuk, edi idighe koro enye ekerede abaña ufọn mme ubuene. Judas ikekereke ñkpọ ibaña mme ubuene. Enye ikenyeneke mbọm ibaña mmọ. Enye ama akabare edi owo ibuk ye abiaña (John 12:6).
Edinyam Christ
Ikpọ oku ikakaha ke ọtọ Judas ikakpak enye ete oduk ke ediomi ye mmọ. Edi, edi Satan ekesin Judas aduak idiọk abaña Jesus onyuñ aka etiene ikpọ oku (Luke 22:3, 4). Enye ikakaha ndidi ntiense nsu mbaña Jesus, okposuk edi nte mmọ ekeyomde ikọ eke etiñde edian Christ, Judas ama anam se idiọkde ikan oro; enye ama anyam Jesus ọnọ mmọ.
Ima Okuk
Judas ikananake ñkpọ. Inyuñ idighe unana okuk ekesin Judas oduk ke ediomi ye ikpọ oku. Edi ima okuk ekesin enye atap Christ. Judas ama onyime ndida Christ nsin mmọ ke ubọk. Edi akpanikọ, Judas ama enyene idorenyin ndibọ okuk. Ñwed Abasi etiñ ọnọ nnyin ete “itọñ inyene edi oruñ kpukpru oruk mme idiọk-ñkpọ” (1 Ñwed Timothy 6:10).
Judas ama ọdọhọ ete, “Mbufo enyime ndinọ mi nso, ndien nyeda enye nnyak nnọ mbufo?” Mmọ enyime ndikpe mbak silver edip ye duop, ekọm-urua ofin nte ibet okowukde (Exodus 21:32).
Judas ama oyom okuk oro, emi ekpride akan naira edip akan nte enye okoyomde Christ. Mme owo mfin, ke ediwak ini esiyak okuk ada akpa itie ke uwem mmọ, akan nte ekpemade Christ ke ofuri esit. Mme owo ke ekpuhọ Christ ye se ikpride ikan naira edip koro mmọ eyakde Satan oduk ke esit mmọ.
Edieke afo munyeneke erinyaña, nso idu ke ufọt fo ye Christ? Nso ida akpa itie ke esit fo ke itie Christ? Anyam ukpọñ fo ọbọ nso? “Koro edidori owo nso edieke enye adiade ofuri ererimbot, ndien ada uwem esie osio isop?” (Mark 8:36).
Ndik Ke Abaña Otu Owo
Ikpọ oku, mme scribe ye mbiowo obio ebono ọtọ kiet ke okure akwa oku, ediomi nte edimumde Jesus. Mmọ eduak uduak ibak ye ñkari ebaña Jesus. Mmọ ediomi ke ñkari ndiwot Enye. Sia mmọ efehede otu owo, mmọ idomoke ndimum Enye nte ekpepde otu owo ñkpọ; ñko mmọ ikọfiọkke ebiet eke mmọ edikemede ndisobo ye Jesus ikpọñ. Mmọ ete ke mme imọ idimumke Jesus ke usen usọrọ Passover, idighe koro mmọ eteñede usen oro, mme mmọ ekponode Abasi. Edi ekekere ke abaña idem mmọ, mbak ndutime editibe ke otu mbon-obio. Mmọ ekeyom ndinem mme owo esit edi ikerede ndinem Abasi esit.
Judas ama aka etiene mmọ emi ekenyenede esit ibak ye uduak uwot-owo. Enye ama etiñ ye usuñ nte enye edidade itap Christ. Judas ama ọdiọk akan nte mmọ ekekerede. Mmọ ikenyeneke idorenyin nte ke kiet ke otu mbet Jesus ekeme ndinọ mme imọ uñwam. Mmọ ema enem esit ndidiomi ye Judas ke ini enye ọkọñwọñọde nditap Jesus nnọ mmọ “Ke ini mbio-obio miduhe”.
Enye emi Jesus ekemekde ndidi mbet, ama onyime ndiduk ke ediomi ndiwot Jesus Christ. Enye emi ekedide owo mbet ama akabare anditap. Judas ama odomo ndidip idiọk uduak esie. Enye ikakañke Christ añwa-añwa ke akpa ifet. Enye ikọdọhọke ete ke imọ idighe aba Apostle (Enye emi esiode edọñ), edi enye aka iso ke ebuana esie ye mme Apostle. Enye ama odu ye mmọ ke ini mmọ ekenimde usọrọ Passover ye Jesus. Judas abuana ye mme Apostle eken ndinim usọrọ ukpono Abasi, kpa ke ini emi esit esie ọkọyọhọde ye ibak. Enye owut idem nte idi ufan ye owo mbet. Enye ama ọfiọk ebiet Jesus esiwakde ndida mme Apostle ñkọbọñ akam. Enye aduak ndida Jesus nwut otu owo emi editode ọtọ ikpọ oku edi, ke ndikọm Jesus ye ntim-inua. Judas ama ọnọ mmọ idiọñọ, ete, “Owo emi nditimde Enye inua edi Enye” (Mark 14:44).
Ifet Ndinam Idiọk
Ofuri ini emi enye ekekpeme ifet emi enye edidade Jesus ọnọ mmọ emi eyomde uwem Esie. Judas ama ebet ifet “eke edifọnde ndida Enye nnọ”. Satan ama ada Judas ọkpọñ Abasi aka anyan, tutu enye ikereke se edinam idiọk-ñkpọ edidade ọsọk enye. Nso enyene-ndik ñkpọ ke edi ọnọ Judas ye owo eke ededi ndiyom ifet ndinam idiọk-ñkpọ! Judas ama aduak, oyom, onyuñ otibi usuñ ndinam idiọk-ñkpọ. Kiet ke otu mme anditiñ ntiñ-nnim ikọ ama ọdọhọ ete, “Ọdọdiọk ọnọ mmọ emi ekerede idiọk ido” (Micah 2:1).
Jesus ama ọfiọk ete ke Judas koyom nditap Imọ. Ke ini usọrọ Passover; Jesus ama ọdọhọ ete; “Owo kiet ke otu mbufo eyeda Mi ọnọ”. Jesus ama ọfiọk uduak Judas onyuñ etiñ ọnọ Judas, “Wara nam se aduakde ndinam”. Judas ọwọrọ ọkpọñ itie oro, “ndien edi okoneyo”. Ekedi ekim ke spirit ye okoneyo eke obukidem ọnọ Judas, sia Satan ama oduk esit Judas Iscariot. Nso ikọ mbọm ke Jesus eketiñ ke ini Enye ọkọdọhọde ete, ọkpọfọn ye Judas edieke enye mikamanake! (Matthew 26:24).
Ke Iñwañ
Jesus ye mbet Esie ema eka iñwañ ndibọñ akam. Ekedi ebiet emi Jesus esiwakde ndida mmọ ñka, ndien Judas ama ọfiọk (John 18:1, 2). Owo ekpekere ete ke utọ ebiet oro ekedi edisana ebiet ọnọ mbet. Edi akpanikọ ete mmọ ema esibọñ akam ọtọ kiet do enyuñ eneme nneme enyene inem ebuana ye Jesus. Ke esit iñwañ emi owo ekpenyenede emem ye ifure, ke Judas akada otu owo emi ekekamade utuenikañ ye ofut aka. Judas akada mmọ emi ekemumde Jesus usuñ. Mmọ ekedi nte ñkpọ eke mmọ ekade ndimum inọ, esaña uwak owo ye ñkpọ ekọñ. Ekedi nte ñkpọ eke mmọ ekekerede ete iyenyene ntuaha ye ekọñ; ebeñe idem “ndimum Enye”. Judas ọwọrọ iso ye idiọk ntim-inua ye ikọ ñkari. Ọdọhọ ete, “Mọkọm Fi Rabbi”. Judas ọkọm Jesus ye ntim-inua emi akadade Enye ọnọ mme idiọk owo; ndien mmọ eda Jesus ewọrọ. Enye ikanyañake Idem Esie, edi onyime ndiyak Idem Esie nnọ ke Uwa idiọk-ñkpọ nnyin. Jesus ama ọdọhọ mbet Esie ete esin ofut mmọ ke efọk. Enye ama eti mmọ ke Imọ ikpenyene udim mme angel ke itie duopeba ito Heaven, edi man osu nte ewetde ke Ikọ Abasi.
Eyen Nsobo
Ke ini Judas ọkọbọde mbak silver edip ye duop, enye ikenyeneke inem ke okuk oro. Ke ini ama ekebe, ke enye ọkọfiọk ete ke imọ ima inam enyene-ndik idiọk-ñkpọ! Judas “ama okut ete ebiom Enye ikpe”. Editua mkpọfiọk ye edifiak ñkpọñ okuk nnọ, ye edinyime ete imetap “iyip eke miduehe isop” ikekwọhọkede ubiom-ikpe ke esit esie ifep. Ke mfuhọ, enye ọwọrọ aka ekeyiri idem esie owot. Udori emi enye akadiade ekedi ndikere “eyen nsobo” (John 17:12) emi ọwọrọde “eyen hell”. Oto ke idiọk-ñkpọ Judas, “enye aka ke itie esiemmọ” (Utom Mme Apostle 1:25) emi edide ata nsobo, ukut ye nsinsi mkpa.
Ndinyime Nnọ Idomo
Edi Judas emi ekeyere ikot Christ, okonyuñ odu ye Jesus, anam ọfọn ke ibio-ibio ini (Utom Mme Apostle 1:17). Enye ama ọtọñọ nte ọfọnde, edi enye onyime ọnọ idomo onyuñ ayak Satan oduk ke uwem esie. Ndibọ erinyaña-ukpọñ nnyuñ nkabare ndi anditiene-Christ edi utibe ifiọk, edi okpon adaña didie ndinam akpanikọ tutu utit uwem nnyin!
Koro owo ọkọbọde erinyaña ini kiet ko, iwutke ete ke enye eyedi enye emi enyañade kpukpru ini. Ibọhọke enye odu uwem ọnọ Jesus inyuñ inyimeke idiọk-ñkpọ oduk ke uwem esie, enye eyeduọk unen ndiduk ke nsinsi uwem (Ezekiel 18:26). Odudu odu ke Iyip Jesus ndinyaña, nnyuñ mmum-ñkama, edieke owo oyomde Ọbọñ omum enye akama.
Ndiñwana Ye Idomo
Judas idighe ñkukure owo emi okutde idomo. Idiọk-ñkpọ Judas ekedi ndinyime nnọ idomo. Owo ekeme ndinam nso man añwana ye idomo ke ini etienede enye? Jesus ama ọnọ nnyin uwut-ñkpọ. Satan ama añwana ndidomo Jesus, Eyen Abasi. Jesus akada Ikọ Abasi añwana ye Satan. Jesus ọkọdọhọ ete, “Ema ewet ete”, ndien etiñ nte ewetde ke Ñwed Abasi (Matthew 4:4, 7, 10). Nnyin ñko imekeme ndikan Satan oto ke Ikọ Abasi. Edieke nnyin inamde item Jesus inyuñ inimde Ikọ Esie, nnyin iyenyene idorenyin ite ke Jesus eyemum nnyin akama ke ini idomo. Nnyin imokot: “Sia ama ekekpeme uyo anyan ime Mi, Ami nyenyuñ ñkpeme fi ke ini idomo, emi ọmọñ edisim ofuri ererimbot, ndidomo mmọ emi eduñde ke isọñ” (Eriyarare 3:10).
Ọbọñ ikọñwọñọke ete ke idomo idisimke nnyin, edi Enye ama ọñwọñọ ndisiak usuñ nnọ nnyin ke idomo. “Idomo ikosimke mbufo ibọhọke se inade owo ndibiom; edi Abasi edi akpanikọ, idinyuñ iyakke edomo mbufo ebe se ukeme mbufo edide; edi enye eyesiak usuñ ubọhọ ọnọ mbufo ke ufọt idomo, man mbufo ekeme ndibiom enye” (1 Ñwed Corinth 10:13).
Ke ini Satan edide ndidomo fi, da Ikọ Abasi ñwana ye enye; beñe Abasi añwam fi; nyuñ yak idem fo nnọ “Enye emi ekemede ndikpeme mbufo, ete, ekuduọ” (Jude 24:). Ke edibọñ akam kpukpru ini ye ediyak idem, ke ndikpeme nnyuñ nnam item, nnyin iyekeme ndinam akpanikọ ke uwem nnyin nnọ Christ. Nnyin imekeme ndidu uwem ke mfọn Abasi, man nnyin ikeme nditiñ ye Paul ite, “Mma ññwana eti eñwan, mma mfehe mbuba mi mma, mma nsọñọ mmum mbuọtidem ñkama” (2 Timothy 4:7).
Questions
MME MBUME- Judas Iscariot ekedi anie?
- Apostle ifañ ke Jesus ekemek?
- Anie akakama ekpat okuk mme Apostle?
- Nso idi ntak emi Judas okoyomde ndinyam aran spikenard?
- Nso ikotibe ke ini Satan okodukde Judas ke idem?
- Nso ikedi ntak emi Judas akakade etiene ikpọ oku?
- Nso ikedi ntak emi mmọ mikekemeke ndimum Jesus ke ini Enye osuk ekpepde otu owo ñkpọ?
- Okuk ifañ ke Judas ekenyene ndibọ?
- Ke ewe usuñ ke eketap Jesus?
- Owo ekeme didie ndiñwana ye idomo?