Lesson 250 - Junior
Memory Verse
“Kunyuñ unana mbuọtidem, edi nim ke akpanikọ (John 20:27).Notes
Ọbọñ Emi Otode Heaven
Ọbọñ Jesus Christ ekedi ke isọñ emi ndidu ye owo ndinyuñ ñkpep mmọ mbaña Heaven. Akananam owo baba kiet ikwe ebekpo Abasi ke enyin obukidem; baba owo kiet ikemeke ndiset ke mkpa nditiñ nnọ nnyin nte editiede ke uwem enye emi ama ebe. Ke ntak emi ke Jesus ekesine mbiet owo, idem emi edide obuk ye iyip, ọsuhọre ke Heaven edi ndidu ye nnyin man ekpep nnyin nte idibeñede idem ndika Ufọk oro ke enyọñ.
Ke ini Jesus okodude ke isọñ, Enye ama etiñ ọnọ mme owo ete ke Imọ idi Eyen Abasi. Ekpri ibat owo ekenim ikọ emi ke akpanikọ. Edi mmọ oro ekenimde ke akpanikọ, Jesus ama anyaña. Ke ini Peter ọkọbọrọde mbume Jesus ye ikọ emi, “Afo edi Christ, Eyen Abasi uwem” (Matthew 16:16), Jesus ama ọdọhọ enye ete ke idighe obuk ye iyip (owo obukidem) akayarade akpanikọ emi ọnọ enye, edi, edi Ete Imọ emi odude ke Heaven.
Jesus ñko ekedi ndiyak Idem Esie nnọ nte Uwa ke abaña idiọk-ñkpọ. Oro ọkọwọrọ ete ke Enye eyekpa ke ntak idiọk-ñkpọ nnyin, idighe idiọk-ñkpọ Esie, koro Enye ikenyeneke idiọk-ñkpọ, ndien Enye eyeset ke mkpa man ọsọñọ erinyaña nnyin.
Eyarade Efiọk Ete Edi Eyen Abasi
Didie ke Jesus akpakayarade owut ete Imọ idi Eyen Abasi? Enye ekedi akamba Andikpep, edi ikpọ mme andikpep ye mme andikwọrọ efen ema edu emi ekekpepde mme owo nti usuñ uwem. Jesus ọkọkpuhọde didie? Mme ini ema edu emi Abasi eketiñde ikọ oto ke Heaven ete, “Emi edi edima Eyen Mi, emi esit enemde Mi eti-eti ye Enye”; edi ibat ibat owo ekekop Uyo oro, ndien ndusuk mmọ emi ekekopde ekekere ete edi obuma.
Paul anam añwaña usuñ nte Jesus akayararede Idem Esie nte Eyen Abasi: Koro “.... eriset emi Enye esetde ke mkpa ama owut ke odudu ete Enye edi Eyen Abasi” (Ñwed Mbon Rome 1:4). Jesus ama etiñ ete, “Mmenyene odudu ndiyak uwem Mi nduọk, mmonyuñ nnyene odudu nditoñọ ntak mbọ uwem Mi nda” (John 10:18). Enye ama ayarade owut ete ke eriset Esie ke obukidem, oro edi, Enye ndiset ñwọrọ ke udi ye ikpọhidem Esie, ete ke Imọ idi Eyen Abasi.
Isọpke Ndinim ke Akpanikọ
Jesus ama eset ke mkpa, edi nte mme owo ema enim ke akpanikọ? Ama ọsoñ ye mmọ emi ekedianade Enye Idem enyuñ esañade ye Enye ndinim ke akpanikọ nte ke Jesus ama afiak odu uwem ke obukidem. Jesus ama etiñ ọnọ mmọ ediwak ini ete ke Imọ inyene ndikut ukut, nnyuñ mkpa ke ubọk mme idiọk-owo. Emi ama añwaña mbet koro ikpọ mme anditiñ ntiñ-nnim ikọ efen ema edu ke mme usen edem emi ekewotde ke ntak Ikọ Abasi. Mbet ema “efuhọ eti-eti” ke ini mmọ ekopde ete ke eti Ufan ye Ada-usuñ mmọ enyene ndikpa ke utọ usuñ oro.
Ke ini Jesus etiñde ọnọ mmọ ke abaña mkpa Esie, Enye ama adian ete, “Edi eyenam Enye eset ke ọyọhọ usen ita”. Mme ikọ enye emi ikañwañake mbet. Ini kiet, Peter, James ye John ema eneme ke idem mmọ eñwana ndikere se ikọ oro Enye eketiñde abaña Enye ndiset ñwọrọ ke otu mme akpa-mkpa ọwọrọde. Jesus ndifiak ndi ke otu mmọ ke obukidem Esie ke Enye ama akakpa ikodukke ke ekikere mmọ.
Afiak Odu Uwem
Ini ama edi emi ekewotde Jesus. Nso utọ erikpu ekedi emi ọnọ mbet! Ufan mmọ ama ọnyọñ, kpa ye idorenyin mmọ ke abaña edinen obio-ubọñ ke isọñ.
Ndien usen-ubọk Easter ama edi, emi ekebuñde mkpọkọbi mkpa, ndien Christ ọkpọñ udi ke obukidem. Ke ikpọkidem ubọñ, Enye asaña ọwọrọ ke itiat udi Esie, akan kpukpru odudu emi ekebọpde Enye enim. Angel ama edikpat itiat udi oro efep, man owut mme iban oro ete ke udi ana ukpọk. Nsọñ-urua ọfọñ udi ke yard ke yard emi ekedade ewañ Enye mọdo akana; ndien ọfọñ linen emi ekenimde ke ibuot Esie osuk ana do ke ebiet emi ibuot Esie akanade. Edi Idem Jesus ama ọwọrọ!
Mme oku ema enọ mbon-ekọñ ubọk-edem man mmọ etiñ ete ke mme owo ekediyip okpo Jesus ke ini ekedede idap. (Mmọ ekpedi ata idiọk mbon-ukpeme, edieke oro ekpedide ntre). Edieke owo ekpekeyipde okpo, nte enye ikpadaha ọfọñ udi ñko? Edi akpanikọ nte ke okpo ikọduhe do aba. Enye okodu ke mmọñ?
Mary Magdalene ekebem iso enyene ibọrọ emi. Jesus ama ayarade Idem Esie owut enye, onyuñ etiñ ikọ ye enye. Ekem mme iban eken ekut Enye; ọkọrọ ye Peter, ye mbet oro ke usuñ Emmaus. Enye eketie ukem-ukem nte owo ekededi. Enye ama okop odudu onyuñ enyene nsọñ-idem, ye obufa uwem ke Enye, ikedighe owo emi idem misọñke oto ke ukut ye ndutuhọ krọs ke ini Iyip Esie ọkọwọrọde. Enye ama asaña ediwak itiat ke usuñ Emmaus nte Enye atatde Ikọ Abasi emi ekewetde ke Akani Ediomi ke abaña Idem-Esie ọnọ mbet. Mmọ ema ebeñe Enye ndidañ nnyuñ ndia ñkpọ ye mmọ; ndien ke ini Enye emende uyo, onyuñ ọdioñde enye, enyin mmọ etara ndien mmọ efiọk ete edi Jesus, Jesus afiak odu uwem ke obukidem, edi enyene ikpọhidem ubọñ emi akanamde Enye ekeme ndisop mmọ ke enyin.
Ke Ufọt Mbet Duopekiet
Mmọ ema esọsọp idem efiak eka Jerusalem ke ebiet emi mme Apostle ekebohode, man etiñ eti mbuk emi enọ mmọ. Ke ini mmọ esuk etiñde ebaña utibe-ñkpọ emi akadade itie mi, Jesus ọbiọñọde ke otu mmọ, onyuñ ọdọhọ mmọ ete, “Emem osuk odu ye mbufo”. Emi ekedi kiet ke otu mme akpatre ikọ emi Jesus eketiñde ọnọ mmọ mbemiso ekọñ Enye ke krọs: “Ñkpọñ emem ye mbufo; nyak emem mi nnọ mbufo” (John 14:27). Baba owo efen ikpekemeke nditiñ utọ ikọ oro. Jesus oyom ikọt Esie edu ke inemesit, ndien Enye ọfiọk ete ke Imọ ikpọñ ikeme ndinọ emem. Owo ikemeke ndinyene emem nto ke ediwak inyene, mme nsọñ-idem, mme ke ediwọrọ etop, mme ke inemesit ererimbot. Mme angel ema etiñ ke ini emana Esie ete ke edi Enye edi Owo emi edidade emem idi. Edi ata ibat ibat owo eyom emem eto Enye!
Mme Apostle ema efehe ndik ke ini mmọ ekekutde Jesus, okposuk edi nte ema eketetiñ enọ mmọ ete ke Enye afiak odu uwem, ñko ke ndusuk owo ema ekut enyuñ efiọk Enye. Mmọ ekekere ete ke mmimọ ikut spirit mme ekpo.
Jesus ama okop mfuhọ ke abaña utọ ekpri mbuọtidem emi mmọ ekenyenede; edi okposuk edi nte Enye akasuade ọnọ mmọ ke unana edinim ke akpanikọ, Enye ama anam kpukpru se Enye ekekemede ndiñwam mmọ ndifiọk nte ke edi Imọ ke akpanikọ ida ke iso mmọ ke obukidem. Enye ama ọdọhọ mmọ ete efiọñọ Imọ idem ese, “Koro spirit inyeneke obuk ye ọkpọ nte mbufo ekutde Ami nnyenede.” Enye owut mmọ nde okpo-ukwak oro ke ubọk ye ukot Esie. Oh, nso utọ utibe-ñkpọ nte ke Jesus mmọ ọtọñọ ntak odu uwem! Edi, mme emi ekeme ndidi ntre! Idara ama okpon eti-eti ke esit mmọ, edi kpa ye oro, mmọ ekesuk ededu ke mkpaidem. Akananam utọ ñkpọ emi itibeke. Jesus okoyom mmọ etim efiọk ete ke Imọ idodu uwem, koro emi ediyararede iwut ete ke Imọ idi Eyen Abasi. Emi ekedi itiat-idak-isọñ emi Enye ọkọbọpde ufọk Abasi Esie odori.
Idorenyin Nnyin
Ana nte nnyin iduñọre ifiọk ite ke nnyin imọfiọk ite ke Jesus ama eset ke mkpa. Odu ediwak mme okpono Abasi mfin emi, emi minimke ke akpanikọ ete ke Jesus edi Edisana Eyen Abasi. Mmọ emi etiñ ete ke Enye ikesetke ke obukidem, ete ke Enye odu uwem ke spirit ikpọñ kpasuk nte mmọ eken emi ekekpañade, Midighe, ke Enye odu uwem sia mme anditiene Enye ebuọtde idem ntre. Edi oro idighe se Ñwed Abasi ekpepde. Nnyin iyom ndifiọk se idide akpanikọ, koro edi akpanikọ anam nnyin ibọhọ: “Edieke afo adade inua fo onyime ete Jesus edi Ọbọñ, onyuñ onimde ke akpanikọ ke esit fo ete, Abasi akanam Enye eset ke mkpa, eyebọhọ” (Ñwed Mbon Rome 10:9).
Ekabare Mfuhọ Esin Ke Idara
Jesus ama afiak anam ñkpọ kiet efen man otim owut mmọ ete ke Imọ idu ke obukidem; Enye obup mme mmọ enyene udia; ndien ke iso mmọ Enye ata ekpri ọfọp-iyak ye ekpri mbukpa-ọkwọk. Nso utibe ñkpọ! Baba ekpo mme spirit ikemeke ndidia udia. Ke emi, mmọ etọñọ nditim mfiọk ndusuk ñkpọ emi Jesus eketiñde ọnọ mmọ mbemiso ekọñ Enye ke krọs. “Mmọdo mbufo edude ke mfuhọ ke emi; edi nyetọñọ ntak ñkut mbufo, esit eyenyuñ adat mbufo, ndien baba owo kiet idibọhọ mbufo idaresit mbufo” (John 16:22). Mme usen ukut ema edu ke iso enọ mme Apostle. Eyekọbọ mmọ ke ntak Jesus, enyuñ ewot mmọ; edi idaresit ye emem emi Jesus ọkọnọde mmọ eyesuk odu ke esit mmọ.
Ebiat Eyighe Thomas
Thomas ikoduhe ke akpa ifet emi Jesus akayararede idem owut mbet duop. Ke ini eketiñde se ikotibede enọ enye, enye ikonimke ke akpanikọ. Nnyin ikot enye Thomas, Owo Eyighe; edi nte enye ama enyene eyighe akan mmọ eken? Iduhe owo mmọ kiet emi okonimde ke akpanikọ ibọhọke ke ini mmọ ekekutde Jesus ke enyin mmọ.
Ke okoneyo udiana Sunday, mme Apostle efiak eboho ọtọ kiet ke ubet enyọñ eberi usuñ. Ke ini emi, Thomas ama odu ke ini Jesus ọkọbiọñọde ke ufọt mmọ. Jesus ọkọm mmọ nte Enye akanamde ke urua emi ekebede: “Emem osuk odu ye mbufo”. Ndien Enye asak iso ese Thomas onyuñ ọdọhọ enye ete: “Nyan nnuenubọk fo, se ubọk Mi; nyuñ nyanare ubọk fo sin ke ñkañ Mi”. Enye ama ọfiọk mme ikọ oro Thomas ekeitñde, kpasuk nte Enye ọfiọkde kpukpru se nnyin itiñde. Enye ama ada mme ikọ Thomas ọbọrọ eyighe esie. Ñkukure se Thomas ekekemede nditiñ, ekedi, “Ọbọñ mi ye Abasi mi”. Jesus ọdọhọ Thomas ete, “Sia ama okokut omonim ke akpanikọ? Ọfọfọn ọnọ mmọ emi mikekwe, edi enimde ke akpanikọ.”
Nnyin emi inimde ke akpanikọ mfin ite ke Jesus ama eset ke mkpa imenyene edidiọñ. Nnyin ikwe Enye ke enyin nnyin, edi nnyin imọfiọk Enye koro Enye ama efen ke mme idiọk-ñkpọ nnyin, ndien nsinsi uwem ama ọtọñọ ke uwem nnyin.
Mme Ntiense Akpanikọ
Mmọ emi Jesus okosobode okonyuñ adiade ñkpọ ye mmọ ekedi Peter, James, John, Thomas ye mmọ eken emi akanade edi mme andikwọrọ ikọ ke kpukpru mme idut ke abaña mbuk Jesus. Mmọ ema esọñọ enim ke akpanikọ ete ke Jesus ama eset ke mkpa ke ikpọhidem ndien ofuri ukwọrọ-ikọ mmọ ọkọkọñọ ke oro.
Ke akpa ukwọrọ-ikọ Peter, enye ama etiñ ọnọ mme Jew, mme okpono Abasi emi ekefiọkde Ikọ Abasi ete ke Abasi ama ọñwọñọ ọnọ David ndinam owo ke ubon esie “ke obukidem” nditie ke ebekpo esie. Peter etiñ ete ke David eketiñ abaña eriset Christ ke mkpa. Enye onyuñ adian ete, “Abasi akanam Jesus emi eset ke mkpa, nte nnyin kpukpru idide mme ntiense” (Utom Mme Apostle 2:32).
Isua itiatia ama ekebe, Peter ama ọkwọrọ ikọ abaña Jesus ọnọ Cornelius ye mbon efen: “Abasi anam Enye eset ke akpa ke ọyọhọ usen ita, onyuñ ọnọ Enye ete owut Idem, idige ke enyin kpukpru owo, edi ke enyin mme ntiense emi Abasi ekebemde iso emek, oro edi nnyin, emi ikadiade inyuñ iñwọñde ñkpọ ye Enye ke Enye ama ekeset ke mkpa” (Utom Mme Apostle 10:40, 41).
Peter ye John ema enyime esin mmọ ke ufọk-ñkpọkọbi ke ntak edikwọrọ mbaña ediset ke mkpa. Ke ini eketiñde ikọ ndidighe mmọ ke abaña ukot-ukwọrọ-ikọ mmọ, mmọ ekebọrọ ete, “Nnyin mikemeke nditre nditiñ se nnyin ikokutde inyuñ ikopde” (Utom Mme Apostle 4:20).
Akpa Mbuñwum
Jesus ama ayarade owut ete ke Imọ idi Eyen Abasi, oto ke eriset Esie ke mkpa. Enye ñko ekedi “akpa mbuñwum ke otu mmọ emi edede idap” oro edi mmọ emi ema ekekpa.
Akpa mbuñwum emi etiñde ikọ ebaña ke Ñwed Leviticus ekedi mme akpa mfri ye mkpasip emi ekedatde. Ema esinyene usọrọ emi ekesinamde ke ini ntọñọ idọk nditoro Abasi ke ediwak mfọn Esie; ndien ekesiyak mme akpa mbuñwum emi enọ Abasi saña-saña. Mme mfri ye mkpasip emi ekesuhọde ekedi ukem-ukem, edi eketim mmọ enim enọ mbio-obio.
Jesus ekedi akpa andiset ke mkpa ye ikpọhidem ubọñ. Ke akpa eriset, kpukpru ndisana ikọt-Abasi eyeto ke mme udi ewọrọ. “Ndien eyemen nyin emi idude uwem, emi isuhọde, edọk ye mmọ ke ikpa-enyọñ, man isobo ye Ọbọñ ke enyọñ: ntem ke nnyin ididu ye Ọbọñ ke nsinsi-nsinsi” (1 Ñwed Thessalonica 4:17).
Questions
MME MBUME- Nso ke Jesus eketiñ ọnọ mbet abaña mkpa Esie?
- Enye ọkọdọhọ ete nso ñkpọ iditibe ke Imọ ima ikpa?
- Nso ñkpọ ikotibe inọ okpo Jesus ke ini ema ekesin Enye ke udi?
- Ini ewe ke Jesus okowut mbet duopekiet idem?
- Nso ikedi akpa ñkpọ emi Enye eketiñde ye mmọ?
- Enye akayarade didie owut ete ke Imọ idighe spirit?
- Jesus ndiset ke mkpa okowut nso?
- Nso ikedi akpan ukot ukwọrọ-ikọ mme Apostle ke Pentecost ama ekebe?
- Christ ndidi “akpa mbuñwum ke otu mmọ emi edede idap” ọwọrọ nso ọnọ nnyin?