Lesson 251 - Junior
Memory Verse
“Ami ndi Mbemiso ye Akpatre ye Andidu uwem; ndien mma ñkabare ñkpa, ndien sese, ndodu uwem ke nsinsi” (Eriyarare 1:18).Notes
Efiak Eka Ukọ-iyak
Mme Apostle ema ekut Jesus nte odude uwem enyuñ etim enim ke akpanikọ ete ke Enye ama eset ọwọrọ ke udi ke ikpọhidem. Edi Enye iketiehe ye mmọ, ke ntre, nso ke mmọ ekenyene ndinam idahaemi?
Usen kiet, mme Apostle itiaba (Peter, James, John, Thomas, Nathanael ye owo iba efen) ema esobo ke mben inyañ, ndien Peter ama ọnọ ekikere ete mmọ efiak eka ukọ-iyak, kpa akani ubọk utom mmọ. Mbon eken ema eka ye enye, ndien mmọ ema ekọ ke ofuri okoneyo. Mmọ emi edidi mme “anditimere ererimbot” oto ke ukwọrọ-ikọ mmọ ke abaña ediset ke mkpa Christ; ndien mmọ ike nyeneke ini inọ ubọk utom efen. Utom mmọ ekedi nditiñ nnọ mme owo nte ke Jesus eyenyaña mmọ osio ke mme idiọk-ñkpọ mmọ. Mmọ ekenyene ndidi mme “ọkọ owo”.
Edi mmọ ikenyeneke uduọk-mmọñ Edisana Spirit kaña, ke ntre mmọ ikenyeneke odudu ndika ñkọkwọrọ ikọ. Mmọ ema esikwọrọ ikọ ke ini Jesus okodude ke otu mmọ, edi idahemi Enye ikoduhe, ndien mmọ ikenyeneke uñwam. Mmọ ikenyeneke owo eke adade mmọ usuñ.
Jesus ama ọñwọñọ ete ke ini Imọ idikpọñde mmọ inyọñ, Imọ iyedọñ Iberedem, kpa Edisana Spirit, ndida mmọ usuñ nduk ke ofuri akpanikọ; edi Iberedem ikedighe kaña.
Owo Kiet Ke Esuk
Ke eyo ekperede ndisiere, mme Mbet ekut owo kiet nte adade ke esuk obup mmọ udia. Mmọ ekenyene ndibọrọ enye ete ke mme imọ inyeneke mfọn iso. Mmọ ikomumke baba iyak kiet ke iyire ke ofuri okoneyo. Owo oro eteme mmọ ete eduọk iyire ke ñkañ nnasia ubom; ndien ke mmọ enamde mmọ emum iyak 153, kpa ke mmọñ emi mmọ ekekọde iyak ke ofuri okoneyo ndien imumke ñkpọ ndomo kiet!
Ediọñọ
Edima John ekedi akpa ndidiọñọ Owo oro nte ke edi Jesus. Owo efen iduhe eke ekemede ndinam utọ utibe-ñkpọ oro. Peter, emi ekedide akpa ndiyom ndika ọkọ, idahemi ediyom ndidi akpa ndikọkọm Andinyaña; ntre enye ọfrọ oduk mmọñ okosim mben esuk. Mme Apostle eken eda uwak iyak eke emumde edisim.
Jesus ama ọdiọñọ ete ke mmọ ekop biọñ sia ema ekanam ọkpọsọñ utom ke ofuri okoneyo, ntre Enye ama enyene ikañ emi akasakde onyuñ enyene mme iyak emi ema eketem enim enọ mmọ ndita, ye uyo ñko. Emi ekedi idiọñọ kiet efen ndiwut nte ke Jesus ama eset ke mkpa onyuñ odu uwem ke ikpọhidem Esie.
Ima Emi Peter Enyenede Ọnọ Jesus
Peter, mbemiso Usen Pentecost, ama esisọp nditiñ akamba ikọ abaña se imọ inyenede ndinam, edi ubak ini enye ikenyeneke ukeme ndinam se enye eketiñde osu. Jesus idahemi osio enye onim, onyuñ obup ete, “Nte ama Mi akan mmọ emi?” Nte Peter ama ama Jesus akan iyak? Nte enye ikpọkwọrọke ikọ Jesus ikan ndifiak ñka ubọk utom esie nte ọkọ iyak? Peter ọsọsọp ọbọrọ, “Edi ntre, Ọbọñ, Afo ọmọfiọk ete mmama fi”. Jesus ete enye, “Bọk nditọ-erọñ Mi” Edi oro iketreke nneme ndika iso. Jesus ọtọñọ ntak obup Peter kpa ukem mbume oro. “Nte ama Mi?” Ndien Peter ọbọrọ kpa nte eke akpa, “Edi ntre Ọbọñ, Afo ọmọfiọk ete mmama Fi.” Jesus ete enye, “Kpeme mme erọñ Mi”.
Ndien ini kiet efen, Jesus ama obup ukem mbume emi. Peter ikọdiọñọke se ekpekerede. Nte enye iketiñke añwa-añwa ite ke imọ imama Jesus? Edi Jesus okoyom enye eneñere ọfiọk ete ke imọ imọdiọñọ se itiñde ke ifet enye emi. Jesus ikoyomke enye efre se enye etiñde mfin emi. Peter ọkọñwọñọ ndidi ọkwọrọ-ikọ emi enyenede uko nditiñ añwa-añwa nte ke Jesus edi Eyen Abasi, ndien ke ama onyuñ eset ke mkpa.
Jesus ke ini oro ama anam Peter enyene ekpri ñkukut abaña ini iso. Enye ọdọhọ enye ete ke idahemi enye edi eyenọwọñ ndien ke ekeme ndimek se enye oyomde ndinam; edi ke ini enye edisọñde, mbon efen eyenam enye anam se enye mikoyomke ndinam. Ke usuñ emi Jesus ọkọdọhọ Peter ete ke eyewot enye, ke ntak Christ, enye eyenyuñ akpa ke mbuọtidem esie utu ke nditre ndikwọrọ ete ke Jesus edi Christ.
Peter ama oyom ndidiọñọ se iditibede inọ mme Mbet eken, Jesus ama ọdọhọ enye ete aka iso ke utom eke anade ọnọ enye ndinam okufina abaña mmọ.
Emi ekedi ọyọhọ ikata nte Jesus akayarade Idem ọnọ otu mme Apostle.
Se Paul Eketiñde Abaña Ediyarare Idem Jesus
Paul etiñ ọnọ nnyin ete ke Jesus ama ayarare Idem ini kiet owut owo 500. Paul eketiñ ikọ emi ke ediwak isua ke edidọk ke enyọñ ama ekebe, edi enye ọkodọhọ ete ndusuk mmọ emi ekekutde Jesus ekesuk ededu ke uwem. Mmọ ekedi ntiense akpanikọ ete ke Jesus ama ọwọrọ ke udi.
James (emi ndusuk, ekedide eyen eka Jesus emi ke akpa mikenimke ete ke Enye edi Eyen Abasi) ekedi udiana owo ndikut Jesus; mbon efen ekedi mbet duopekiet eken ñko.
Nte ata akpatre, Paul ke idem esie ama okut Jesus. Emi ekedi ke Jesus ama ọkọdọk ke enyọñ. Paul ikonimke ukwọrọ-ikọ mme Apostle ke akpanikọ ite Jesus ekedi Eyen Abasi, ndien ke ama eset ke mkpa. Ke uteñe ye nsin ifik ke ido ukpono esie, Paul ekekere ete ke imọ inam Abasi eti ñkpọ ke ndikọbọ obufa ufọk Abasi emi ekenimde ediset ke mkpa ke akpanikọ. Enye ama esin mme owo ke ufọk ñkpọkọbi onyuñ anam ewot ediwak mmọ emi ekenimde ete ke Jesus ama eset ọwọrọ ke udi ye ikpọhidem Esie.
Ndien usen kiet ke ini Paul ama ọkọtọñọ obufa utom ukọbọ, Jesus ke Idemesie ama owut Paul idem. Paul ama okut Enye. Ọtọñọde ke ini oro Paul ọdiọñọ ete ke Jesus odu uwem ndien enye ñko, onyime ekọbọ enye onyuñ onyime ewot enye ke ntak mbuọtidem oro. Paul ama otim ọfiọk ke edinim esie ke akpanikọ ete ke Jesus ama eset ke mkpa.
Idorenyin Nnyin Ọkọñọ Ke Ediset Ke Mkpa
Ntak edide ata akpan nkpọ nnyin ndinim ite ke Jesus ama eset ke mkpa? Koro edieke nnyin minimke, nnyin inyeneke erinyaña ukpọñ. Jesus edi ñkukure Owo emi ekemede ndifen mme idiọk-ñkpọ; ndien Enye ekeme ndifen mme idiọk-ñkpọ koro Enye edide Eyen Abasi. Edieke Enye mikesetke ke mkpa, Enye idighe Eyen Abasi.
Ama akpa Paul idem nte mme owo minimke ite Jesus ama eset. Edieke Christ mikpekesetke, ukwọrọ-ikọ mmọ ọkọwọrọ ikpikpu, mmọ ekpesuk edi mme idiọk-owo, emi minyeneke idori-enyin. Edi edieke Enye ekesetde onyuñ odu uwem, ke ntre Enye enyene odudu ndifen mme idiọk-ñkpọ; ndien koro Enye odude uwem, nnyin emi imanade obufa iyedu uwem ñko ye Enye.
Paul ọkọdọhọ ete edieke nnyin minyeneke idorenyin ndidu ke ererimbot eke ọfọnde akan enye emi, nnyin iyenyene mbọm ikan kpukpru owo. Nsidi ntak enye ọkọbọde ufen edimia ke ikpa, edisip ubom, biọñ, tuep, ye ediwot ke ntak mbuọtidem edieke enye mikpọdiọñọke ite ke imọ iyedu uwem ke nsinsi ye Christ ke akpatre? Peter ewet: “Edi adaña nte mbufo ebuanade ke ndutuhọ Christ, ekam edara; man mbufo ekpenyuñ edat esit eti-eti ke adaña emi ediyararede ubọñ Esie” (1 Peter 4:13).
Mbuọtidem Mme Ikpọ Ete
Abraham ama onim ediset ke mkpa ke akpanikọ. Enye ekedi owo inyene,ama onyuñ ekeme ndikpemek ata eti isọñ nduñ; edi enye oduñ ke mme ufọk-ọfọñ. Esit esie ekesine ke Obio efen, “eke enyenede nsọñọ-nda, eke Andibọp ye Andinam Enye edi Abasi” (Mme Hebrew 11:10). Koro enye ye mbon efen ekenyene idorenyin ke obio eke ọfọnde akan, “mmọdo inamke Abasi but ndikere Abasi mmọ; koro Enye ama ebeñe obio ọnọ mmọ”(Mme Hebrew 11:16).
Job ekenyene ukem mbuọtidem oro. Enye ama ọdiọñọ ete ke imọ inyene ndikpa, edi enye ama onyuñ ọdiọñọ ñko ete ke iyetọñọ ntak idu uwem ñko ke ikpọhidem imọ iyekut Jesus. “Ndien ke ikpọhidem mi ama abiara ama, nyedu ke obukidem mi ñkut Abasi” (Job 19:26). Enye ama onyuñ ọfiọk ete ke Jesus eyetọñọ ntak edi ke ikpọhidem Esie, koro ekewetde ete: “Ami mmọfiọk nte ke Andifak mi odu uwem; ndien ke akpatre Enye eyedaha ada ke ntan isọñ” (Job 19:25).
Akwa Edidem David, emi ekenyenede kpukpru ñkpọ ke uwem emi, emi ọkpọyuhọde owo, ama ewet ete: “Ami nyese iso fo ke eti ido; mbiet fo eyeyuhọ mi ke ini ndemerede” (Psalm 17:15).
Isaiah ama etiñ ntiñ-nnim ikọ ete: “Mme akpa-mkpa fo eyedu uwem, mme ọkpọ mi eyebuhọre. Mbufo emi eduñde ke ntan edemere, ekwọ : koro mbara ikọñ edide mbara fo, ndien isọñ eyeman mme ekpo” (Isaiah 26:19).
Edieke nti mme anditiñ-ntiñ-nnim-ikọ oro ekekemede ndise ini iso nnyuñ ñkut ediset ke mkpa mbemiso Jesus akpa onyuñ eset, adaña didie ke nnyin emi ifiọkde ite ke Enye ama eset ke mkpa, ikponim ite ke eyekpuhọre nnyin enam ibiet Enye ke ikpọhidem ubọñ ke nsinsi.
Uwem Emi Otode Ke Mkpa
Ndusuk owo enim ete ke nditọ Abasi edidu ke Heaven nte spirit, edi Paul otim anam añwaña ete ke nnyin iyenyene ikpọhidem. Ediset ọwọrọ ndiwọrọ ke mkpa nduk ke uwem, ndifiak ndu uwem ke ini ema ekekpa. Ke owo akpade spirit esie aka nnen-nnen ebine Abasi emi ọkọnọde enye (Ecclesiastes 12:7). Enye ikpaha ke nsinsi. Afo ukemeke ndibuk spirit. Ke ntre, edieke ediset ke mkpa edidude, ana edi eke ikpọhidem.
Ukpuhọre odu ke ikpọhidem enye emi nnyin inyenede idahemi ye emi idinyenede ke ini ediset: “ntre ke ikpọhidem edu emi edide eke heaven, ikpọhidem enyuñ edu emi edide eke isọñ.” Ikpọhidem heaven edi ikpọhidem ubọñ emi idisinede ikara ye Jesus ke nsinsi ini. Nnyin iyenyene ukeme ndiwọrọ ñwut idem nyuñ nsop kpa nte Jesus akanamde ke ama ekeset. Kpukpru se ikpọhidem ediyomde onyuñ enyenede udoñ abaña edidi eke Heaven. Ikpọhidem eke isọñ oto isọñ emi, ọyọhọ ye ndiyom se adade odu uwem ke usen ke usen. Edi nte ededi mmọ mbiba edi ikpọhidem.
Udọñ Edifak
Enyaña nnyin esio ke idiọk, efak nnyin oto ke Iyip Jesus. Nnyin idu obufa uwem ke Christ. Edi nnyin imenyene udọñ ibaña usen oro edinamde ikpọhidem nnyin edi obufa. “Koro nnyin imọfiọk ite ofuri ekondo ke omum mmum, onyuñ odu ke ubiak uman tutu osim emi. Idige ntre ikpọñ, edi nnyin ke idem nnyin ñko-ñko, emi inyenede akpa mfri Spirit, nnyin ke idem nnyin ke imomum mmum ke esit nnyin, itie ibet ini eke edidade nnyin isin ke ubon Abasi, oro edi, ini eke edifakde ikpọhidem nnyin” (Ñwed Mbon Rome 8:22, 23)
Nditọ Abasi emi ekekpade ke Ọbọñ eyeset ye ikpọhidem ubọñ ke Jesus edide, ndien eyekpuhọre nditọ Abasi emi edude uwem, “ke idaha kiet ke eriyip enyin kiet, ke adañemi edifride akpatre ukorowo. Koro eyefri ukorowo, ndien eyenam mme akpa mkpa eset nte mmọ midikemeke ndibiara aba, eyenyuñ ekpuhọre nnyin” (I Ñwed Corinth 15:52).
Questions
MME MBUME- Ke mme Apostle duopekiet ema ekekut Christ ikaba ke uwem, mmọñ ke mmọ ekeka?
- Nso ikenyene ndidi ubọk utom mmọ ọtọñọde ke emi?
- Nso ke mme Apostle emi ekenana ke obufa utom mmọ?
- Ke mmọ ema ekenyọñọ utom okoneyo mmọedi, nso ke mmọ ekekut ke esuk?
- Nte mmọ ema enyene se emumde ke ofuri okoneyo?
- Nso ke Esenowo mmọ ọkọdọhọ mmọ ete enam?
- Didie ke mmọ ekediọñọ ete ke Esenowo mmọ ekedi Jesus?
- Tiñ baña nneme emi okodude ke ufọt Jesus ye Peter.
- Paul akasaña didie edinim Jesus ke akpanikọ?
- Inam didie idiọñọ ite ke edidi ikpọhidem nnyin ediset, ididighe spirit?