Lesson 252 - Junior
Memory Verse
“Mbufo eka ekenam kpukpru mme idut edi mbet Mi, enim mmọ baptism esin ke enyiñ Ete ye Eyen ye Edisana Spirit” (Matthew 28:19).Notes
Ke Galilee
Ke usen aba emi Jesus okodude ke isọñ ke Enye ama ekeset ọwọrọ ke udi, Enye ama ayarade Idem esie ediwak ini ọnọ mbet Esie. Nnyin imokot ibaña ndusuk ke otu mme ini oro. Ukpep-ñkpọ nnyin mfin abaña nneme emi Jesus ekenyenede ye mbet Esie ke ini mmọ esobode ke Galilee nte Jesus okonimde.
Jesus ama etiñ ọnọ mbet duopekiet ete ke Enye “eyebem” mmọ iso aka ke Galilee ke Enye ama ekeset ke mkpa (Matthew 26:32). Ke udi emi anade ukpọk, angel ama etiñ ọnọ iban oro ete eti mbet ete ke mmọ eyekut Jesus ke Galilee (Matthew 28:7). Mbemiso iban oro esim ebiet emi mbet ekedude, Jesus ama ebem iso okosim mmọ onyuñ ọdọhọ mmọ ete: “Ekufehe ndik: eka ekọdọhọ nditọ-ete Mi, ete, mmọ enyọñọ eka ke Galilee; mmọ edinyuñ ekut Mi do” (Matthew 28:10).
Ke mbet ekutde Jesus, mmọ etuak ibuot enọ Enye, edi ndusuk mmọ eyik. Mmọ ikenyeneke mbuọtidem emi ekemde ndiñwam mmọ enim ke akpanikọ ete ke emi edi Jesus oro mmọ ekekutde nte ekọñde edian ke krọs. Nte Jesus ikọdọhọke ite “Okure”, ke ini Enye okotukde ibuot Esie akpa? Nte kiet ke otu mbon ekọñ ikokimke Jesus ke ñkañ, ebiet emi mmọñ ye iyip eketode ewọrọ? Nte ikobukke okpo ada-usuñ mmọ ke udi emi ekenyenede Joseph ke iñwañ? Ndusuk mbet ema eyik nte Jesus oro afiak edida ke iso mmọ idahemi.
Eset Ke Mkpa
Mbet ema ekut nte Jesus akanamde mbon efen eset ke mkpa. Mmọ ema ekut Lazarus (John 11:43, 44) ye eyen ebe-akpa-ñwan ke obio Nain (Luke 7:12-15) nte Jesus akanamde eset ke mkpa. Mmọ ema efiọk ete ke eyen añwan Jairus ama akpa, edi Jesus anam enye ọtọñọ ntak odu uwem (Mark 5:35-42). Okposuk edi nte mmọ ekedide mme ntiense ebaña mme utibe-ñkpọ emi, ndusuk mmọ ikonyimeke ndinim ke akpanikọ ete ke Jesus ke Idem esie ama eset ọwọrọ ke udi. Ediset ke mkpa Jesus ekedi utibe. Mbemiso utọ ini oro edisim, mme ke utọ ini oro ama ekebe, akananam utọ ñkpọ ntre iduhe; edi Jesus Eyen Abasi, ama eset ọwọrọ ke udi oto akwa odudu Esie kpa ke utọ ini emi ekebemde iso etiñ ebaña.
Eyighe
Abasi ama ewet abaña eyighe Thomas onim ọnọ nnyin. Ke ini mbet eken edọhọde enye ete ke mme imọ ima ikut Jesus, Thomas ama ọdọhọ ete “Ndinimke ke akpanikọ ibọhọke ini ñkut nde ọkpọ-ukwak ke ubọk Esie, nnyuñ nsin nuenubọk mi ke nde okpo-ukwak, nnyuñ nsin ubọk mi ke ñkañ Esie” (John 20:25). Ke enye ama okokut Jesus, Jesus ama okonyuñ etiñ ikọ ye enye, ufọn ikoduhe aba Thomas ndisin nnuenubọk esie ke ñkañ Jesus mme ndisin nnuenubọk esie ke nde okpo-ukwak ke ubọk Jesus. Thomas ama onim ke akpanikọ. Jesus ama ọdọhọ enye ete: “Sia ama okokut Mi, omonim ke akpanikọ? ọfọfọn ọnọ mmọ emi mikekwe,edi enimde ke akpanikọ.”
Mbon efen ema edu emi ekeyikde ñko (Mark 16:11; Luke 24:11). Ekeme ndidi mmọ ikosioroke uyo itiñ nte Thomas akanamde, edi ko ke esit mmọ, ama ọsọñ mmọ idem ndinim etop ediset ke mkpa Jesus ke akpanikọ.
Nnsua-nnọ
Jesus ama asua ọnọ mbet ke abaña unana edinim ke akpanikọ ye nsọñ-esit mmọ. Baba kiet ke otu ñkpọ iba emi inyeneke ifet ndidu ke esit mme uwem anditiene Jesus. Edi ñkpọ eke ọfọnde mbuọtidem ndikabade nda itie eyighe. Owo enyene ndinyene mbuọtidem man enyaña enye (Mark 16:16). Owo enyene ndinyene mbuọtidem man aka iso ọsuhọ nte owo emi enyañade, koro edinen owo odu uwem ke mbuọtidem (Habakkuk 2:4; Mme Hebrew 10:38). Mbuọtidem miduhe, owo ikemeke ndinem Abasi esit (Mme Hebrew 11:6). Owo enyene ndinyene mbuọtidem man ọbọ ibọrọ akam esie (Mark 11:24; Matthew 21:22). Mbon emi enimde Jesus ke akpanikọ enyenyene nsinsi uwem (John 3:36; 6:47) edi mmọ emi minimke ke akpanikọ eyenyene nsinsi ufen (Mark 16:16; Eriyarare 21:8).
Jesus ama ama mbet Esie edi oduri mmọ utọñ ete edieke mmọ minimke ke akpanikọ enyuñ esọñde esit ke mmọ ikemeke ndidi mbet Imọ, mmọ ikemeke ndikwọrọ Eti-mbuk, ñko mmọ ikemeke ndida enyiñ Jesus nnam mme utibe ñkpọ.
Odudu Jesus
Ke ndisọñọ mbet idem ye ke ndiñwam mbuọtidem mmọ, Jesus ama ọdọhọ ete, “Enọ Mi ofuri odudu ke heaven ye ke isọñ” (Matthew 28:18). Nso utọ enyene-odudu Christ ke nnyin inam ñkpọ inọ! Baba odudu efen emi okponde akan odudu emi odude ke Heaven ye ke isọñ iduhe. Jesus enyene odudu eke akarade mme ñkpọ isọñ ye ikpọhidem ukem nte akarade ñkpọ heaven ye eke spirit ñko. Jesus ikadaha odudu emi inọ Idem Esie: kpukpru odudu ke Heaven ye ke isọñ edi se ekenọde-nọ Jesus, Eyen Abasi.
Jesus ñko ama enyene odudu, onyuñ odu ke idaha eke ekemede ndidọñ mbet Esie eka utom. Jesus ekedi Ada-usuñ mmọ. Enye ekedi Eyen Abasi. Enye ọkọnọ mbet Esie uyo ete mmọ enyene ndisuan Eti-mbuk. Emi ekedi utom emi edọñde mmọ. Emi ekedi uduak Esie ke abaña utom mmọ ke ini iso.
Mme Item
Ke ikọ ifan, Jesus ama etiñ ọnọ mbet Esie se ididide utom mmọ. Jesus ọkọdọhọ ete: “Mbufo eka ekenam kpukpru mme idut edi mbet Mi.” Ke ini ekedọñde mbet duopeba utom ke ini efen, ekedọñ mmọ ete eka etiene Nditọ Israel ikpọñ-ikpọñ (Matthew 10:5, 6). Ini enye emi, Jesus ọkọnọ item ete eka ke ofuri ererimbot enyuñ ekpep kpukpru mme idut. Ofuri ererimbot ekedi ebiet emi mbet enyenede ndinam utom, idighe ubak ñkañ-kiet ererimbot.
Jesus ọkọdọñ kpukpru mme anditiene Enye utom emi. Ikedighe se imemde mbet duopekiet ikpọñ ndisuan Eti-mbuk ke ofuri ererimbot, edi mme anditiene-Christ ke edomo ndinam ntre. Idahemi ekabare Ñwed Abasi ye ndusuk itie ke esit esie esin ke nsio-nsio usem emi ebede 1, 100. Apostolic Faith emiñ mme ñwed ye mme ñkpri ñwed (tract) esin ke usem 50 enyuñ esuan esin ke mme idut ye mme isuo 200.
Ndikpep Ndinyuñ Ñkwọrọ
Ndisaña nduk ke kpukpru ituñ ererimbot ikemke. Jesus ọkọdọhọ mmọ ekpep enyuñ ekwọrọ. Jesus ikayakke mbet emek ke idem mmọ se mmọ enyenede ndikpep. Enye ọkọdọhọ ete: “Ekpep mmọ enam kpukpru ñkpọ eke ñketemede mbufo.” Mmọ ekenyene ndikpep Eti-mbuk, idighe ubak esie, edi kpukpru se Jesus eketemede, ofuri ikọ Abasi.
Mme Andinim Ke Akpanikọ
Idighe kpukpru owo enim Eti-mbuk Jesus ke akpanikọ. Mmọ emi minimke ke akpanikọ “ikpe eyebiom mmọ”, edi mmọ emi enimde ke akpanikọ enyuñ ekpemede, emi edide mme andinam ye mme andikop ikọ, mmọ oro eyenyene erinyana.
Edi ibiọñ-utom ye unen eke enyenede mme andinim ke akpanikọ ndina baptism ke mmọñ. Enyene ndinim mmọ baptism nsin “ke enyiñ Ete ye Eyen ye Edisana Spirit”. Jesus okonim uwut-ñkpọ, onyuñ edi Enye ọkọnọ uyo ndina baptism ke mmọñ. Jesus akana uduọk-mmọñ ke inyañ Jordan ke ubọk John Ọduọk-owo mmọñ (Mark 1:9). Ke ini Jesus anade uduọk-mmọñ, “Spirit ọsuhọre nte ibiom” edidoro Enye ke idem (Mark 1:10). Abasi onyuñ etiñ ikọ oto ke Heaven: “Emi edi edima Eyen Mi, emi esit enemde Mi eti-eti ye Enye” (Matthew 3:17)
Ndinim owo uduọk-mmọñ edi ndibuk owo ke mmọñ. Ido emi Ñwed Abasi ekpepde etiñ owut nte mme owo ekesuhọrede eduk ke mmọñ ye nte efiakde ewọrọ (Mark 1:9, 10; Utom Mme Apostle 8:38). Ke mme ñwed emi Paul ewetde, eda uduọk-mmọñ edomo ye edibuhọ ye Christ ndinyuñ nset ye Enye ke mkpa ke mmọñ (Ñwed Mbon Colossae 2:12).
Uduọk-mmọñ ke ikemeke ndiyet mme idiọk-ñkpọ owo mfep. Enye edi añwa-añwa idiọñọ ke abaña ñkpọ emi adade itie ke esit. uduọk-mmọñ ke mmọñ enyene mmọ emi enyañade ikpọñ-ikpọñ. Enyene mme andinim ke akpanikọ. (Kot Utom Mme Apostle 2:41; 8:12; 18:8; 19:5). Kpukpru mbon oro mme Apostle ekenimde baptism, ekedi mme andinim ke akpanikọ. Philip ama oyom nditim mfiọk nte ke owo eunuch oro ekedi andinim ke akpanikọ mbemiso Philip onim enye baptism. Nte mmọ ewatde ke ukpat-ñkpọ eka, Philip ọkwọrọ abaña Jesus ọnọ owo eunuch oro. Owo eunuch ọbọrọ onyuñ ọdọhọ ete: “Se mmọñ mi; nso ibiọñọ mi ndina uduọk-mmọñ?” Philip ete enye: “Edieke onimde ke akpanikọ ke ofuri esit fo, afo emekeme” (Utom Mme Apostle 8:36, 37). Ke owo eunuch ama eketiñ owut mbuọtidem esie ke Jesus nte Eyen Abasi, Philip onim enye uduọk-mmọñ. Uduọk-mmọñ ke ido nte Ñwed Abasi etemede, ada akamba edidiọñ edi. Ndina Uduọk-mmọñ ke ñkop-uyo ke item Jesus, ayarade owo oro nte kiet emi oyomde ndidu ke otu mbet Esie.
Odudu
Akwa-utom emi Jesus ọkọnọde mbet Esie ekedi ubiọñ edinam utom. Ke abaña utom emi, Enye ama ọnọ mmọ unen ye odudu ndinam enye. Jesus ama etiñ ọnọ mmọ ete ke Imọ iyedọñ eñwọñọ Ete esọk mmọ, ndien ke mmọ enyene ndibet ke Jerusalem tutu “esine mbufo odudu emi otode ke enyọñ” (Luke 24:49). Odudu emi eyeñwam mmọ ndinam mme utibe-ñkpọ ke enyiñ Jesus.
Mme idiọñọ ekenyene nditiene mmọ emi enimde ke akpanikọ. Mme idiọñọ emi Jesus eketiñde abaña ema etiene mbet Esie. “Ke enyiñ Mi ke mmọ eyebin mme demon” Paul ama anam eyen-añwan ọbọhọ edidehe spirit (Utom Mme Apostle 16:18), Peter onyuñ ọkọk mbon oro ndidehe spirit eketuhọrede (Utom Mme Apostle 5:16).
“Mmọ eyesem mbufa usem”. Mmọ ema eyọhọ ye Edisana Spirit enyuñ esem nsio-nsio usem nte Spirit ọkọnọde mmọ ukeme nditiñ ke Usen Pentecost (Utom Mme Apostle 2:4), ndien mme andinim ke akpanikọ ke nsio-nsio ini efen ema enyuñ enyene ukem ntiense emi ke ini ekenọde mmọ uduọk-mmọñ Edisana Spirit (Utom Mme Apostle 10:46; 19:6).
“Mmọ eyedori mbon udọñọ ubọk, ndien mmọ oro eyekop nsọñidem.” Owo mbuñọ ke enyin-usuñ Itie-ukpono Abasi emi ekotde Ediye ama ọbọ edikọk nte Peter ye John ekekade ndibọñ akam, ke ini Peter ọkọdọhọde ete “Ke enyiñ Jesus Christ emi otode ke Nazareth, daha, saña” (Utom Mme Apostle 3:1-8). Ediwak mbon udọñọ efen ema ebọ edikọk ke ini mme andinim ke akpanikọ ekebọñde akam ke enyiñ Jesus.
“Mmọ eyemen uruk-ikọt ke ubọk.” Paul ikokopke mfina baba kiet ke ini idiọk uruk-ikọt akawañade enye ke ubọk ke ini enye akatañde ifia esin ke ikañ (Utom Mme Apostle 28:3-6). Paul ikokohokoi inam ndidomo mbọm Abasi nse. Okotibe ubuat-ubuat, ke ntre, Abasi ama ekpeme Paul.
“Onyuñ edieke mmọ eñwọñde ñkpọ ekededi eke abiatde uwem, ididiọkke ye mmọ”. Itie iduhe ke Ñwed Abasi ndiwut nte ke ama odu andinim ke akpanikọ kiet emi “ọkọñwọñde ñkpọ eke abiatde uwem.” Imọfiọk ite ke emi ọwọrọ ete, edieke eñwọñde ke ndudue. Ke mme isua ifañ emi, etiñ ete ke Abasi ama ekpeme ikọt Esie ke ini ekeñwọñde ñkpọ eke abiatde uwem ke ndudue.
Mme idiọñọ emi ema etiene mme andinim ke akpanikọ, ñko emekut odudu Abasi mfin ke otu mmọ oro enimde ofuri Ikọ Abasi ke akpanikọ. Mme usen utibe-ñkpọ ibehe ifep. Ke enenam mme owo ebọhọ odudu ekim. Ke ebebin idiọk-ñkpọ esio ke uwem mmọ, mbon udọñọ ke ebebọ erikọk ke ini ebọñde akam mbuọtidem ke enyiñ Jesus . Nte akanam afo omokut kiet ke otu mme idiọñọ emi Jesus ọkọdọhọde ete ke eyetiene mmọ emi enimde Enye ke akpanikọ? Nte afo ọmọdiọñọ abaña owo ekededi emi ekenyenede edikọk oto ke odudu Abasi ke ini ekeyetde enye aran enyuñ ebọñde akam enọ enye? (Kot James 5:14, 15).
Ndinyene odudu Abasi ye ndinyene mme idiọñọ eke etienede mmọ ekedi ewuhọ ye utom ukem ukem nte ndika ñkọkwọrọ Eti-mbuk. Kpukpru nnyin ikemeke ndidi mme ọkwọrọ-ikọ ke esen idut, edi nnyin imekeme ndiñwam ndinam Eti-mbuk asuana. Owo enyene nditiñ nnọ mbon idut nnyin ñko.
Edisuan Eti-mbuk
Nte odu se eyen-ọwọñ ekemede ndinam? Eyen-ọwọñ ekeme ndinam Akwa Utom emi aka iso ke ndikot mbọhọ-iduñ ye mme ufan esie edi ke ufọk Abasi ye ke Sunday School. Eyen-ọwọñ emi enyañade esio ke idiọk-ñkpọ ekeme nditiñ nte esañade enyene edinyaña ọnọ mme ufan itie-mbre esie. Eyen-ọwọñ ekeme ndidi uwut-ñkpọ, nte andinim ke akpankọ onyuñ anam uñwana esie ayama. Eyen-ọwọñ ekeme ndibọñ akam mbaña mme ọkwọrọ-ikọ emi edude ke isọñ obio ye mmọ emi edude ke esen idut. Eyen-ọwọñ ekeme ndibọñ akam mbaña mme ñwed Ikọ Abasi emi enọde eka nsio-nsio ebiet ke ofuri ererimbot. Eyen-ọwọñ ekeme ndinam ñkpọ efen ọkọrọ ye edibọñ akam; enye ekeme ndinọ enọ ñko.
“Mme nyetiñ mbuk ima ke ñkade mme ntiede-tie. Da mi tiñ, Ọbọn, o da mi.”
Nte ke inanam kpukpru se nnyin ikemede, ndinam utom Jesus aka iso? Nte nnyin imedi mbon ñkop-uyo ke ewuhọ Jesus? Man nnyin ikeme ndinam emi, nnyin inyene ndikpere Jesus kpukpru ini. Enye ọkọdọhọ ete, “esiode Mi efep, mbufo ikemeke ndinam baba ñkpọ kiet” (John 15:5). Jesus ama ọñwọñọ ndidu ye mme anditiene Enye, kpa ye nnyin mfin. Mbet duopekiet oro ikoduhe ke uwem isim utit ererimbot. Jesus eketiñ ndiwut ete Imọ iyedu ye ikọt Imọ ke kpukpru idut ye ke ofuri emana, edieke mmọ edinamde Ikọ Imọ. Jesus ọkọdọhọ ete: “Ndien sese, Ami ndodu ye mbufo kpukpru ini, tutu osim utit ererimbot.”
Questions
MME MBUME- Nso ekedi ntak emi mbet ekekade ke Galilee?
- Mmọ ekenam didie efiọk ete ke Jesus eyesobo ye mmọ do?
- Nso ekedi ntak emi Jesus akasuade ọnọ mbet?
- Nso idiọk ke eyighe edinam?
- Jesus enyene odudu adaña didie?
- Ke mmọñ ke mme anditiene Jesus enyene ndikwọrọ?
- Nso ke mmọ enyene ndikwọrọ?
- Tiñ baña edinim uduọk-mmọñ ke mmọñ.
- Nso idiọñọ enyene nditiene mme andinim ke akpanikọ?
- Anie ọkọñwọñọ ndidu ye mme andinim ke akpanikọ?