Lesson 256 - Junior
Memory Verse
“JEHOVAH edi edidem; yak ererimbot ebre; yak uwak isuo edat esit” (Psalm 97:1).Notes
Edinyaña Emi Ọyọhọde Ye Idara
Mme esit emi eyọhọde ye idara edi mbak akamba edinyaña emi Abasi ọnọde. Ke ini owo ọfiọkde ete ke emefen mme idiọk-ñkpọ imọ, emem odu ke isọñ esit esie; ndien idara ayama ọwọrọ owut idem ke iso esie ye inemesit emi baba ñkpọ kiet ke ererimbot emi mikemeke ndinọ enye. Ikwọ ñko eyenyuñ oto ke esit idara oro ọwọrọ.
Edinyaña Abasi inyeneke saña-saña ibat owo mme idut. Andiwet Psalm ọkọkwọ ete “Mbufo ofuri ererimbot enam idara enọ Jehovah”. Ofuri ererimbot akana nte edara ke edinyaña emi Jesus ọkọnọde mmọ emi eyomde edinyaña ke mfọn.
Apostle Peter ama ewet ete; “Ke akpanikọ mmokut nte Abasi iteñeke owo enyin: edi ke kpukpru idut Enye adadara owo ekededi eke abakde Enye onyuñ anamde nti ido” (Utom Mme Apostle 10:34, 35).
“Enam idara enọ Jehovah”. Kwọ itoro nnọ Ete, Eyen, ye Edisana Spirit. Emenere Christ emi edifakde ikọt Esie. Toro Enye emi edinyimede ndikpa mbaña mme idiọk owo. Jesus ikamanake iduk kaña ke ererimbot ke ini oro, edi ke mbuọtidem mme prophet ema ekeme ndikut Enye nte ñkpọ emi Enye ama ekededi.
“Enam ñkpọ enọ Jehovah ke idaresit”. Edinyaña Ọbọñ nnyin Jesus Christ ada idaresit oro edi. Enye emen mme idiọk-ñkpọ nnyin, mfina, ye mme ukut nnyin obiom ke Idemesie, man nnyin ibọhọ. Enye ọbọ nnyin mbiomo onyuñ ọnọ nnyin ikwọ.
Ke Ebiet Ukpono Abasi
“Eda ikwọ edi enye ke iso”. Ke ini nnyin idide ke ufọk Abasi ndituak ibuot, nnyin idi ke iso Esie. Enye omokut ido nte isinede ọfọñ, nte nnyin inamde ñkpọ, akande oro, se nnyin ikerede. Edieke nnyin idide ke iso Esie ye itoro ke esit nnyin, eyedi mmem-mem ñkpọ nnyin nditiene ye mbon efen ke ufọk Abasi ñkwọ mme ikwọ emi edidade ubọñ ọnọ Abasi. Nte nnyin ikade iso ndikwọ, ntre ke nnyin idọdiọñ inyene idaresit.
Afo emekeme ndikere mme imekeme ndikwọ ikwọ ke ini mfuhọ odude fi ke esit. Edi ntre, emekeme edieke afo edide anditiene-Christ. Jesus eyenọ fi ikwọ ke ini ukut fo. Enye eyekwọ ke esit fo ke ini afo ekerede ete ke kpukpru owo ekpọñ fi.
Kwọ ikwọ ke ini afo okopde ndik, ndien ndik fo eyesop. Kwọ ke ini ukut ndien ukut fo eyefere. Kwọ mme ikwọ emi abañade Jesus ye ima Esie. Kwọ mme ikwọ ediyak idem nnọ Abasi, biere ndiyak esit ye uwem fo nnọ Enye. Kwọ baña editọñọ ntak ndi Esie. Mme ikwọ ntre emi etode esit ewọrọ edi mme akam emi Abasi edikopde onyuñ ọbọrọ. Afo eyekop nte enyenede ebuana ye Enye, onyuñ ọfiọk ete ke Enye odu fi ke ñkañ ndiñwam fi ke kpukpru se ibañade uwem fo ke isọñ.
Abasi Kiet Ye Andibot
“Mbufo efiọk ete ke edi Jehovah edi Abasi.” Efen inyuñ iduhe. Abasi kiet kpọt odu, ndien edi Enye akanam enyọñ, ye isọñ ye kpukpru se idude ke esit. Idighe nnyin ikobot idem nnyin, nnyin ikpekemeke. Edi Enye okobot kpukpru nnyin. Nnyin idi se Ubọk Esie akanamde, ndien ibifik eke nnyin iñwekde oto Enye. Abasi emi okobotde onyuñ akarade ofuri ererimbot edi Andikpeme nnyin. Nnyin idi ufene emi Enye ọbọkde, Enye onyuñ otim ekpeme nnyin ke ima. Enye ada nnyin aka ke awawa mbiet. Nnyin idi akpan-ñkpọ inọ Enye. Enye ama nnyin kiet kiet, onyuñ ọñwọñọ ete ke idikpọñke idinyuñ ikpuhu nnyin.
Afo ọmọfiọk nte ekpri eyen erọñ ananade uñwam ke ini ekpe omumde enye osio ke otu-erọñ. Afo ọmọfiọk nte edide mmem-mem ñkpọ erọñ ndisop usuñ inyuñ ifiọkke usuñ ndifiak ñka otu-erọñ. Oro edi nte nnyin inanade uñwam ke esiode Abasi efep. Edi nnyin imenyene eti Ekpemerọñ emi ekpemede erọñ Esie. Enye ebeñe idem ndisaña ke mme ebedeñ ke okoneyo nnyuñ nyom erọñ eke osopde. Nte oro ikpedighe ntak nnyin nditoro Abasi, nnyuñ ntuak ibuot nnọ Enye emi enyenede nnyin? Se ikponde ikan oro, Eti Ekpemerọñ ama ayak uwem Esie ọnọ ke abaña mme erọñ Esie. Nso oruk itoro ke oro ekpesin ke esit nnyin? Nnyin idi erọñ Esie! Enye akakpa man nnyin idu uwem! Enye ekemen mme idiọk-ñkpọ nnyin obiom man nnyin ibọhọ!
Ekpri se nnyin ikemede ndinam ndiwut ekọm nnyin edi nnyin ndidi ke ufọk Abasi ye esit akpanikọ ndituak ibuot nnọ Enye. Nte nnyin ikerede ibaña akwa ima emi Jesus amade nnyin, iyekeme ndida ekọm nduk “ke inua otop esie, eda itoro eduk ke okure esie”.
Uwa Itoro
Nditọ Israel ekesida mme ñkpọ uwa nte erọñ, ebot ye enañ eka ke Ataya ndituak ibuot nnọ Abasi. Inaha nte nnyin iwa mme ufene ke uwa idahemi. Uwa nnyin edi mme itoro emi etode esit nnyin ewọrọ. Apostle Paul ama ewet ete: “Yak nnyin iwa uwa ekọm inọ Abasi kpukpru ini ke enyiñ Jesus, kpa mfri mkpọk-inua eke ekponode enyiñ Esie” (Mme Hebrew 13:15).
Inaha nte edi ke ufọk Abasi ikpọñ ke nnyin ikwọ ikwọ, edi ana nte itoro odu kpukpru ini ke esit nnyin. Ndusuk nnyin inyeneke eti uyo ndikwọ ikwọ, onyuñ ekeme ndidi uyo nnyin itimke ifọn. Kpa ye oro nnyin imekeme ndinam edinem uyom nnọ Ọbọñ. Ke ndusuk idaha nnyin idinamke uyom, edi mme itoro eyedu ke esit nnyin. Imekeme ndibọñ akam ekọm inọ Jesus.
Edikpono Abasi Ọtọ Kiet
Paul Apostle ama otim ọfiọk ufọn eke nnyin ikemede ndinam nnọ kiet eken ke nditiñ mbaña ima Abasi. Ọfọn nnyin ndikwọ ikwọ ọtọ kiet; onyuñ edi se inamde mbuọtidem nnyin edemere ke ini ikopde ibaña se Abasi anamde ọnọ mbio efen. Paul ekewet ete eyak nnyin idemere kiet eken inọ ima, “ikunyuñ isin ndisop idem ọtọ kiet, nte edu ndusuk owo edide, edi inọ kiet eken item”. Nnyin inyene odudu ke ndisobo idem ọtọ kiet, ye ndinyuñ ntiñ mbaña mme edinam Abasi. Ndien Abasi ke akpañ utọñ, onyuñ enem esit abaña oruk nneme oro.
Malachi, anditiñ ntiñ-nnim ikọ ama ewet: “Ndien mme abak Jehovah eneme kiet ye kiet: ndien Jehovah akpañ utọñ, onyuñ okop, mmọ enyuñ ewet ñwed eriti ke iso esie enọ mme abak Jehovah ye mme ekere enyiñ esie” (Malachi 3:16). Idem ndikekere mbaña enyiñ Ọbọñ ada eridiọñ ọsọk esit nnyin! Abasi ọkọdọhọ abaña mmọ emi ekerede ebaña Enye enyuñ etiñde ebaña mfọn ye mbọm Esie ete: “Mmọ eyedi ata inyene mi ke usen emi ami ndoride” (Malachi 3:17). Ata inyene Abasi! Kpukpru nnyin emi idarade inyuñ ikwọde itoro Esie ke ofuri esit nnyin iyedi ikọt Esie ke ini Enye edidide nditañ ikọt Esie nnyọñ.
Ke Nsinsi
Mfọn ye Mbọm Abasi edu ke nsinsi. Enye idikpọñke ikọt Esie. Okposuk edi ke ndusuk ini nnyin iyik, mme ikop ndobo ye ndik, mfọn ye mbọm oro eyedu ye nnyin; ndien ke ini mbuọtidem nnyin edemerede, nnyin iyetọñọ ntak idara. “Akpanikọ esie onyuñ ebigi ke ofuri emana”. Kpukpru owo, ke kpukpru emana, enyene ifet ndinam ñkpọ nnọ Enye edieke emade.
Itoro Ke Mme Ñkpọ Ikwọ
Usen efen andiwet Psalm ama ekere abaña nte ekpetorode Ọbọñ. Enye ọkọtọñọ ke ndidọhọ ete, “Mbufo etoro Jehovah. Etoro Abasi ke edisana ebiet esie”. Oro ọwọrọ ete ke ufọk Abasi. Nte ufọk Abasi ekeme ndimum uboñ Abasi ñkama? Ke ufañ ikọ oro, andiwet Psalm ama adian ete, “Etoro enye ke ikpa-enyọñ odudu esie”. Ofuri ererimbot ikemeke nditoro Abasi nte ekemde. Ofuri enyọñ enyene ndiyọhọ ye mme itoro Esie. Ndusuk mme owo mfin itoroke Abasi, edi usen ke edi emi itoro Esie ediyomode ke ofuri ererimbot. Ke usen oro Enye eyekara ofuri ererimbot. Nnyin iyekop oruk itoro nte eke andiwet Psalm etiñde ete: MBUFO, kpukpru mme idut, ekwak ubọk; esio mkpo idara enọ Abasi ... Mbufo ekwọ enọ Abasi, ekwọ; ekwọ enọ edidem nnyin, ekwọ. Koro Abasi edide Edidem ke ofuri ererimbot; mbufo etim ekwọ” (Psalm 47:1, 6, 7).
Ke itie ukpọnọ Abasi emi Solomon ọkọbọpde ata ediwak mbon ikwọ ye mme ebre ikwọ ema edu emi ekekwọde itoro enọ Abasi. Mme andiwet ndisana ikwọ ema eyom usuñ nte ekpemenerede enyiñ Ọbọñ ke enyọñ, ke ntre kiet ke otu mmọ ama ewet ete: “Etoro enye ke uyom ukorowo; Etoro enye ke psaltery ye harp. Etoro enye ke ekọmọ ye unek: Etoro enye ke ndido uruk ye ke ifiom. Etoro enye ke ọkpọsọñ uyo cymbal”.
Nnyin itimke imehe ye ndusuk mme ñkpọ ikwọ emi enye etiñde abaña, edi eyak nnyin ikere ibaña akamba otu mme ebre ikwọ nte emi nnyin ifiọkde idahemi. Ndusuk akpa mme ebre violin eyetọñọ nditoro Abasi, ndien mme andibre udiana violin eyedian uyo. Mme andibre viola ye cello eyekop inem-inem ikwọ oro, enyuñ eyom ndidian suñ-suñ uyo mmọ ntoro Abasi; ndien ibighike mmọ kpukpru eyebuana ke ikwọ oro enyuñ ekwọ itoro enọ Abasi. Do ke ata akamba ndodobi uyo mme andibre bass ke ndido uruk eyebre “Amen”. Edinem ikwọ emi ke otu mme ebre ndido uruk eyedemere mme efri ifiom, obukpoñ ye ukorowo man etiene ebuana ke itoro oro. Uyo mmọ eyetim ọsọñ onyuñ aka anyan. Mme ebre anyan ọduk ye bass eyeyom ndidian itoro ñko. Ndien ke ọdọdọk ke osusuhọre eyedi mme inem uyo harp. Ke utit itoro oro, iyekop nte cymbal oyomode. Ndien ofuri otu mme ebre ikwọ oro eyedian uyo ọtọ kiet ke akpatre enam itoro enọ Abasi emi akanamde nnyin, emi edide Edidem nnyin, emi mbọm Esie odude ke nsinsi.
Ke esiode kpukpru mme ñkpọ mbre ikwọ emi efep, ye otu mme andikwọ ikwọ, yak kpukpru ñkpọ eke eduọkde ibifik etoro Jehovah. Mbufo etoro Jehovah!
Questions
MME MBUME- Nso inam owo otim okop inemesit ?
- Anie enyene ndikwọ mme itoro nnọ Abasi?
- Mmọñ ke ana nte nnyin itoro Enye?
- Ikeme nditoro Enye didie?
- Ikpetoro Enye ibaña nso?
- Nso idi uwa eke inọde Abasi?
- Ini ewe ke akpana nte itoro Enye?