Lesson 258 - Junior
Memory Verse
“Nyetuak ibuot nse edisana temple fo; nnyuñ ñkọm enyiñ fo mbaña ima fo ye akpanikọ fo; koro afo omokpono ikọ fo akan ofuri enyiñ fo” (Psalm 138:2).Notes
Obot Moriah
Edieke isañade isim isọñ Palestine mfin emi, inyuñ ikade ikese obio Jerusalem, kiet ke otu mme ñkpọ inemesit emi idikutde edidi Akamba Ebiet-Ukpono emi ekotde Noble Sanctuary ye Ekara Akwa itiat emi adade ke ufọt esie. Nte ededi, ke ñkañ owo Abasi, isọñ emi ufọk emi adade edi edisana akan ufọk ke idem esie, koro ikpọ ñkpọ-ntibe ita ema eda itie ke edisana itie emi.
Enyiñ ebiet emi ekere Obot Moriah. Ke ikerede ibaña obot oro, ekikere ada nnyin okotuk Abraham, owo mbuọtidem . Anie minyeneke ndise emi ke esit esie nte Abraham asañade ke ọyọhọ usen ita ekpere obot emi enye “emenere enyin esie okut ebiet oro nsan-nsan”. Ke ñkaiso esie, edi obot emi enye akade ndiwa eyen esie. Anie okokot se ewetde ke Genesis 22 mitieneke owo Abasi emi ye Isaac eyen esie ke ekikere esie tutu ọsuhọre obot okosim ebiet emi mmọ ekekpọñde nditọ ufọk oro. Abraham ama osobo ye udomo ke obot Abasi. Oto ke se ikotibede emi nnyin inyene ediye ndise erinyaña ukpọñ. (Tọñọ ntak kot ọyọhọ Ukpep-ñkpọ 11 ke Akpa Ñwed). Iyomke usuñ ikpọñ ọtọ oro ekewotde Eyen Abasi, kpa Jesus Christ, man Enye ekpemen mme idiọk-ñkpọ ererimbot efep.
Ọyọhọ ñkpọ-ntibe iba emi akadade itie ke Obot Moriah ekedi ke eyo uwem David. Ke David ama akabat mme owo, ufen onyuñ edi edisobo owo 70,000, Abasi ama ọdọhọ David ọbọp itie uwa ọnọ Imọ ke ebiet ubek ibokpot Ornan ke Obot Moriah. Ke David ama okobup Ornan (emi ekekotde ñko Araunah, 2 Samuel 24:21) ete mme enye eyenyam ebiet ubek ibokpot, Ornan ama ọdọhọ yak David ada ke enọ, ke iyenọ enañ ye ifia ñko. Enye ọkọdọhọ ete “nnọnọ kpukpru” (1 Chronicles 21:23). Edi David ọkọdọhọ ete, imọ iyedep ke ọyọhọ ekọm-urua koro enye mididaha se mikpaha enye ñkpọ ifọp uwa inọ Jehovah. Ọyọhọ uwa ikaba emi ke Obot Moriah ada ọnọ edinam-asana. (Se Ọyọhọ Ukpep-ñkpọ 247).
Ọyọhọ akpan ñkpọ-ntibe ita emi adade itie ke obot Abasi emi ekedi ediberede usuñ Itie-Ukpono Solomon.
Ebeñe Idem Ndinam Utom
Eyak nnyin ke ekikere ise se ikotibede. Kpukpru ñkpọ edu ke mbeñidem. Uwuk utuenikañ o-gold 10, emi kiet enyenede ikañ candle itiaba, okpokoro emi edoride uyo iso, mme mkpoduoho okpoho, mme bowid o-gold, mme udiọk utuenikañ, mme basin, cup ye ikpañ ekedu ke itie mmọ. Mme oku ye mme Levi ema eda ndisana mkpoduoho emi ekedude ke Ataya edi. Solomon ama onyuñ ada mme mkpoduoho silver ye eke gold emi David ete esie ekebeñede onim edibon ọtọ kiet ye mme ñkpọ uto.
Edidem ama okot mbiowo, mme ibuot ke mme esien ye ọbọñ mme ete Nditọ Israel obok man emen Ekebe Ediomi eka ke Temple. Mme Levite ema emen Ekebe Ediomi eka ke obufa Ufọk Abasi, ebiet emi mme oku emende enye eduk ke Ata Edisana Ebiet enyuñ esin enye ke idak mba mme cherubim. Utọ ini emi ñkpọ ndomo kiet efen ikoduhe ke esit Ekebe ikan mme itiat ñwed iba oro.
Etọñọ Edinam
Edidem Solomon ye kpukpru owo enọ akwa Abasi nnyin ke ima esit mme erọñ ye enañ ewak ekan nte ekemede ndibat. Idahemi yak ida nte nnyin imokut ofuri okure Temple, inyuñ ikut nte mme oku ewọrọde eto Edisana Ebiet. Enam mme owo emi esana enyuñ esine mfia linen ke idem. Ke isede ñkañ usiaha-utin itie uwa, nnyin ikut mme ọkwọ ikwọ ye mme ebre ñkpọ nte esinede mfia linen ñko. Mme oku 120 emi eda esit kiet efuri ukorowo, mme harp, cymbal ye psaltery enyuñ ediana do. Akwa uyo mbon ikwọ enyuñ ekwọ “Koro enye ọfọnde, koro ima esie edide nsinsi”. Ñkpọ otibe! Ubọñ Jehovah ọyọhọ Temple nte obubit enyọñ tutu mme oku ikemeke ndinam utom mmọ.
Mme ikwọ emi mme efuri ñkpọ ye mme ebre ñkpọ edade uyo kiet ebre ke ufọk Abasi esinem nnyin ukem nte ikwọ emi mbon ikwọ ekwọde otim ọdọnọ. Edi, edi ke ini mme esit ye ekikere edide kiet, ye ke ini edidiana kiet emi otode edinam asana ikpọñ-ikpọñ odude ke ufọk Abasi, ke ubọñ Abasi ekeme ndiyọhọ ufọk. Utọ ini oro ikpọñ ke ufọk ekeme esit owo ndiyọhọ ye “obubit enyọñ” Utọ mboho ntuak ibuot oro ekpemenerede esit! didie mfin!
Akam Edidem
Idahemi nnyin imokut edidem Solomon nte adade ke ekpri enyọñ mbot emi okoñde ikpat inañ ye ubak. Enye etiñ ikọ ọnọ mme owo. Ndien enye ọtọñọ edọñ, emenere ubọk ke enyọñ ọbọñ akam. Okposuk edi eketimde enam Itie-ukpono ye mme okure esie eñwaña, Solomon ama ọdiọñọ ete ke Abasi iduñke iduñke ke ufọk emi ubọk owo ọbọpde. Nnyin imokop ikọ emi edemerede ukpọñ emi otode ke inua owo emi ọfiọkde ñkpọ akan: “Sese, enyọñ ye ata enyọñ ikemke fi, ñwañwa edi nso ufọk emi mbọpde” (2 Chronicles 6:18). Nte ededi, enye okoyom Abasi atat enyin ese ufọk oro uwemeyo ye okoneyo.
Ikañ Emi Otode Heaven
Nso utọ enyene ndik ñkpọ ke akam okurede, ikañ oto ke Heaven edita mme enọ ye uwa ndien ubọñ Abasi ọyọhọ ufọk! kpukpru owo eduọ ekibi iso mmọ ke isọñ ekpono enyuñ etoro Ọbọñ. Eda mme ñkpọ mbre ikwọ emi David okotimde ebeñe utọ ini emi ebre ikwọ ini kiet efen, mme oku efuri ukorowo ke mme owo ema ekedaha eda ke enyọñ.
Ọbọñ Ọtọñọ Ntak Edise
Okoneyo kiet, ke ediberede usuñ temple ama ekebe, Solomon ama okonyuñ asuan mme owo enyọñ ke mme tent mmọ, Ọbọñ ama edisobo enye onyuñ ọdọhọ ete ke ema ekop akam esie. Ekeme ndidi idaresit Solomon ama ọyọhọ ke ini enye okopde uyo Abasi nte ọdọhọde ete “Ke emi mmonyuñ mmek ufọk emi, nnyuñ nnam enye asana, man enyiñ mi okpodu do ke nsinsi; enyin mi ye esit mi ekpenyuñ edu do kpukpru usen” (2 Chronicles 7:16).
Uduak Abasi
Ediberede usuñ Itie-Ukpono Abasi ebiet usen Pentecost, edi nte ededi, mme owo ke eyo Solomon ikọbọhọ enọ Ikañ Spirit koro mikọdọñke Edisana Spirit kaña edi. Se itibede emi ke Akani Ediomi ekpep nnyin ete ke ema enim ikpọ ñkpọ enọ nnyin emi idude ke ini emi Edisana Spirit osuk anamde utom mi. Abasi ama onim uduak ke Akani Ediomi onyuñ anam enye osu ke Obufa Ediomi.
Akpa Edim
Ke awakde akan tọsin isua ema ekebe tọñọ nte ekeberede usuñ Itie-Ukpono Abasi, utibe usen kiet ama edi emi owo 120 ekebohode ọtọ kiet ke Jerusalem. Ñkan-ñkuk oro ikonyuñ ikpereke ndiye nte Itie-Ukpono Abasi. Ndusuk ekeme ndidi mme owo emi ikesineke mfia ọfọñ nte mme oku emi ekedude ke Itie-Ukpono Abasi ikoduhe. Edi mmọ ekesine ndisine ñkpọ edinen ido ye edisana ido, koro ema enam mmọ esana, enyuñ edu ke esit kiet. Mme Apostle duopekiet, eka ye nditọ eka Jesus irenowo ema edu do. Ikebighike mbemiso ini emi, ema emen Jesus edọk ke Heaven ke obubit enyọñ; Enye ama ebebem iso etiñ ọnọ mbio emi ete, “Edi eyenim mbufo uduọk-mmọñ ke Edisana Spirit ke usen ifañ mibehe kaña” Do ke ubet enyọñ, nte mmọ enamde item Jesus, owo 120 emi ema ebet eñwọñọ emi Ete ọkọñwọñọde. Nte ema ekpu mmọ? Ih Ih! “Ndien idaha kiet uyom oto ke enyọñ edi, ebiet uyom ata ọkpọsọñ oyobio eke ofimede, enye onyuñ ọyọhọ ofuri ufọk oro mmọ etiede ke esit ... Ndien Edisana Spirit ọyọhọ kpukpru mmọ ke idem, mmọ enyuñ etọñọ ndisem nsio-nsio usem, nte Spirit ọnọde mmọ ukeme nditiñ” (Utom Mme Apostle 2:2-4). Ediọñọ ediñwaña Spirit emi nnọ nte “Akpa Edim”.
Ukperedem Edim
Mmọdo, ke ñkpọ nte isua 2000 ema ekebe tọñọ nte ñkpọ-ntibe ubet enyọñ emi akada itie, ekpri otu mme andinim ke akpanikọ ema eboho ke Los Angeles ke Califonia. Esit mmọ ñko ama asana onyuñ enen koro ema enam mmọ esana. Mme ebre ikwọ ikoduhe do, mme ñkpọ mbana o-gold ikonyuñ iduke ke usuhọde ebiet oro.
Ke usen ọfiọñ 6 ke ọyọhọ ọfiọñ inañ ke isua 1906; ema edọñ Edisana Spirit edi nte ekedide ke usen Pentecost nte Ikọ Abasi ọdọhọde. Emi ekedi “Ukperedem Edim” Spirit, ndien tọñọ ke ini oro, ata ediwak owo ebọ ukem Enọ oro.
Mme Anana-Utit Ediyak Idem
Nte afo ọmọbọ enọ emi ke esit fo? Nte omoyom ndien ubọhọ kaña ibọrọ akam fo? Duñọre “temple” fo. Tim fiọk ete ke imọbọp idori ke ọkpọsọñ Ukot-ufọk emi edide Jesus Christ. Nte akanam amaka ke Obot Moriah onyuñ ọbọ Iyip oro esin ke esit fo? Ndien nte ama ọtọñọ ntak aka Obot Abasi akawa uwa emi akpade fi ñkpọ? Nte ikañ ama ọduọ ata uwa fo? Nte ema enọ fi afia edisine ñkpọ edinen ido ye edisana ido, kpa edinam asana? Ñko nte ama ada ñkpọ okpoho ye eke gold edinim ke itie unim ñkpọ Ọbọñ? Esikpa nnyin ntọtuñọ ediyak-idem nnọ man ikeme ndibọ enọ emi. Nte afo amawa anana ibat enọ ye uwa nte Edidem Solomon akanamde?
Nte udọñ oro ndiyak nnọ Abasi ofuri-ofuri odu fi ke esit edieke ifet odude ndinam ñkpọ nnọ Abasi? Ekeme ndidi ekpri utom ndisọhi ntọñ mfep ke mme mkpoduoho Ufọk Abasi, mme ndiyọ ekpri mfina ke ndibuana ubet kiet ye eyen Abasi emi asañade ebe ke obio fo. Ndusuk ini Abasi ekeme ndiyom fi abiat esisit ini ke akam ke usenubọk mbemiso afo aka ufọk-ñwed. Mme owo emi edide obufa ke ñkan ñkuk fo, omokot mmọ edi ke Ukpep-ñkpọ Usen Ọbọñ? Nsinam afo mudọhọke ete “Ndinyuñ nnọhọ Abasi se mikpaha mi baba okuk kiet. Mmayak kpukpru nnọ ke ofuri esit. Nyenam se ededi emi Abasi edidọhọde mi nnam”. Edieke ediyak idem fo ekemde, tie bet uduọk-mmọñ Edisana Spirit, kwọ itoro Esie, “Koro enye ọfọnde: koro ima esie odude ke nsinsi”, tutu ubọñ Abasi ọyọhọ ufọk fo ndien Iberedem edi ediduñ ke temple fo.
Questions
MME MBUME- Tiñ isañ ikata emi ekesañade eka Obot Moriah.
- Edika Obot Moriah emi, ini kiet-kiet akada ọnọ nso?
- Anie ekemen Ekebe Jehovah?
- Ekenim Ekebe Jehovah ke mmọñ ke Itie-Ukpono Abasi?
- Nso utọ mme ñkpọ ikwọ ke ekebre ke ini ekeberede usuñ Itie-Ukpono Abasi?
- Nte Abasi ama ọbọrọ akam Solomon?
- Nso ikotibe ke ini mme ebre ikwọ ye mme ọkwọ ikwọ ekwọde?
- Tiñ baña editọñọ ntak nsobo emi Jehovah okosobode ye Solomon ke okoneyo.
- Tiñ mme ñkpọ emi ñkpri nditọ ye mkparawa ekemede ndinam nnọ Jesus.
- Nso oruk ufen ke Abasi ọkọñwọñọ ndinọ Nditọ Israel ke efiakde edem ekpọñ Enye?