Lesson 260 - Junior
Memory Verse
“Eyenyuñ esio Enye enyiñ Immanuel, oro ọwọrọ ete, Abasi ke ododu ye nnyin” (Matthew 1:23).Notes
Utin Edinen Ido
Mme prophet Akani Ediomi ema ekwọ ediwak ini ebaña usen emi Andifak Israel, kpa akwa Messiah edidide man edibiat odudu mme asua mmọ. Malachi, akpatre ke otu mme prophet, ama ewet oto ke nda usuñ Abasi: “Utin edinen ido asiaha ọnọ mmọ: se inamde itọñ uwem ọsọñọ onyuñ odu enye ke mba” (Malachi 4:2). Obufa usen ekenyene ndisiere ke ini uñwana edisiahade ebe ke ekim idiọk-ñkpọ, ndien Ọbọñ eyeto ke Ubọñ ada eriyaña ọsọk ikọt Esie Israel.
Idaha emi uyo mme prophet ema edobo. Ke isua ikie inañ, owo ikokopke uyo nte otode Heaven edi. Ekim eke ñkañ spirit, emi okodude ke isọñ, ama aka iso okim akan. Ñkukure se ikomumde idorenyin ikama ekedi editi se mme prophet emi ekebemde iso edu ekewetde. Ekedi akpanikọ ete ke Messiah eyesuk edi.
Ekpri Ibat Mme Anam Akpanikọ
Mi ye ko, ke ufọt ekim oro, irenowo ye iban ema esuk edu emi ekenyenede mbuọtidem ke Abasi ete ke Enye idikpọñke ikọt Esie. Mmọ ema etuak ibuot enọ Abasi Israel ebọñ akam enyuñ edori enyin.
Ediwak mme anditiene Christ mfin, emi ekọbọde mmọ ke mme idut eke minimke Abasi ke akpanikọ, esuk enyenyene mbuọtidem ke edidi Jesus, okposuk edi nte ekim eke ñkañ spirit akande mmọ okuk. Ke esit mmọ emi enyenede iwuk ndidu ke mbeñidem mbet edidi Jesus, Abasi ke ọnọnọ mmọ odu uwem mbuọtidem.
Utọ mbuọtidem oro ke Zacharias ye Elizabeth ekenyene. Mmọ eketo ke ubon Aaron, akpa akwa oku; Zacharias ke ini emi ama enyene unen ndinam utom ke Ufọk Abasi, osuk ebet edidi Jesus.
Ete ye eka Zacharias ema emum mbuọtidem mmọ ekama ke mme eñwọñọ Abasi, ndien enyiñ emi mmọ ekesiode eyen mmọ ọkọwọrọ “Abasi emeti”. Mmọ ema enyene mbuọtidem ete ke Abasi ifreke eñwọñọ Esie, emi Enye ekebemde iso ọñwọñọ ọnọ Eve ke Iñwañ ete ke iyenọ Andifak. Didie ke ukpuhọre okpodu? Abasi ama ọtọñọ ntak anam eñwọñọ ọnọ Abraham, onyuñ ọsọñọ oro ke uñwọñọ. Emi ikekemeke ndibiara. Ekenyene ndidiọñ kpukpru idut ererimbot oto ke Abraham, ikponyuñ idighe owo efen ke mibọhọke Christ, Andinyaña. Enye ekenyene ndidi!
Ediwak isua emi ọkọyọhọde ye mba ema ebe, idiọñọ uñwana ikonyuñ iduhe. Utu ke oro eketie nte ererimbot okokim akan. Ndusuk nditọ Israel ema ewọrọ ke ufin Babylon enyọñ edi Jerusalem ye idorenyin nte ke obufa usen ọmọñ asiaha, edi uwem okosuk akaka iso ke ukem idaha mkpa-mba oro.
Herod, akwa ada ibuot ama afiak ọbọp Ufọk Abasi ke Jerusalem. Akwa ufọk emi ekedade afia itiat marble ebọp ama ọwọrọ ada do. Ekeda mme usan gold ebiri ke ñkañ edem-usiaha-utin esie, emi ke ini utin asiahade anam enye esem. Enye ekedi akwa ediye ufọk ikpọñ ikpọñ emi owo ọkobọpde. Ekebe Ediomi Abasi ama osop ke ini ntañ mfep ndien edi itiat ikpọñ ikpọñ ọkọsuhọ ke Ata Edisana ebiet, emi ekedide idiọñọ ete ke ubọñ Abasi ikoduhe aba.
Ema enyime Nditọ Israel eka iso ke ido ukpono mmọ, mme oku ñko enyuñ enam utom ke osimde ini mmọ nte Solomon okonimde ke ediwak isua emi ekebede. Mme owo ema esisobo ke usen ubọk ye ke mbubreyo ke añwa Ufọk Abasi ndibọñ akam, ke ibibene ke adaña ini mme oku edude ke esit ndifọp incense nnọ Abasi. Mmọ ema esitua ebaña ubọñ Abasi emi mikoduhe aba enyuñ ebọñ akam ebaña eridi Messiah mmọ. O Ọbọñ, edibighi didie?
Idaha Zacharias Nte Oku
Ama ekem ini nte ufọk Abia ekenyenede ndinam ñkpọ ke Ufọk Abasi ndien Zacharias ekedi oku mmọ. Enye ye ñwan esie ekedi mbon Abasi emi ekemade enyuñ enimde mme mbet Abasi. Enye ama enem esit ndinam ñkpọ nnọ Abasi.
Ke Zacharias ama ekesine ekura mme oku, onyuñ ada incense oduk ke Edisana Ebiet ndifọp ke itie uwa gold, kpa nte mme oku Aaron ekesinamde ke isua 1500 emi ekebede esit esie ama ọyọhọ ye idara ke ndinam utom esie. Mmọñ ke enye ekenyene ndikpere Abasi ñkan ke Edisana Ebiet Esie? Ke akpanikọ Abasi eyekop mme-akam esie. Nte enyiñ esie ikedighe Zacharias emi ọwọrọde “Abasi emeti”?
Eyom Eyen-Eren
Zacharias ye ñwan esie ema esọñ. Ke ini mmọ mikọsọñke, mmọ ema ebọñ akam eyom eyen-eren, ọkọrọ ye akam ke abaña emem Israel, edi Abasi ikọbọrọke ebeñe mmọ.
Ke ini Zacharias ama okokure utom esie ke Edisana Ebiet, enye ama edighe ndikut esen owo emi okotode Heaven edi. Ini kiet, ke ufọt udiọk utuenikañ gold ye itie ufọp uwa incense, angel Abasi ama ọbiọñọre. Ediyarade emi okotode Heaven! Nte ndop uyo ke isua 400 okure? Nte Abasi ọtọñọ ntak oyom nditiñ ikọ nnọ ikọt Esie mbe ke inua Eti-mbuk? Mme nte Zacharias edi Eti-mbuk oro? Mme nte angel oro akaka ndinọ etop mbaña Messiah emi oyomde ndidi? Nte emi edi se Zacharias ekebetde, odoride enyin onyuñ ọbọñde akam abaña? Kpa ye oro, Zacharias ama okop ndik.
Kufehe ndik Zacharias. Ọbọñ ama okop akam fo. Ekedi utibe ñkpọ angel ndida ke iso esie ye etop emi otode Heaven! Abasi ama okop akam esie ndien oyom ndinọ enye eyen eren.
Zacharias ama etre ke ata anyan ini ndibọñ akam nyom eyen eren. Enye ekekere ete ke ini ama ebe, edi akanam ini ibehe Abasi. Abasi ọmọñ ọnọ Zacharias ye Elizabeth utip mbuotidem mmọ. Idaha emi idaresit mmọ-ọmọñ eyọhọ. Zacharias afo eyenyene eyen eren! Nso utọ eyen! Enyiñ esie enyene ndikere John, emi ọwọrọde “Enọ mfọn Abasi.”
Usen emi eyen emi edimanade ọnọ Zacharias ye Elizabeth ekenyene ndidi usen idaresit mmọ; edi ididighe inọ mmọ ikpọñ. Angel ama ọdọhọ ete: “Ediwak owo eyenyuñ edara emana esie ... enye eyenyuñ anam ediwak nditọ Israel ekabare etiene Jehovah Abasi mmọ.”
Ikọ Mme Anditiñ Ntiñ- nnim Ikọ
Kpukpru mme Jew emi eteñede Abasi ema ekot mme ntiñ-nnim ikọ Isaiah ke abaña isuñ utom emi edibemde Messiah iso edi. Enye eyeka iso ndibeñe mme esit owo nnim man mmọ enyime Jesus ke ini Enye edidide. Isuñ-utom ekenyene ndidi uyo emi ofioride ke desert; edi etop emi enye edinọde ekenyene ndidi ntọñọ obufa emana. “Enye ikedighe uñwana oro, edi ekedi man edi ntiense ọnọ uñwana oro” (John 1:8). John ekedi enye emi akasiande abaña edidi obufa usen.
Etop John ọduọk-owo mmọñ edidi: “Mbufo ekabare esit, koro Ubọñ Heaven ke ekpere”(Matthew 3:2). Kpukpru se mme Anditiñ-ntiñ-nnim-ikọ eketiñde ebaña akpa eridi Messiah ekenyene ndisu Mmọ ekisitiñ ñkpọ ebaña usen ke iso. Edi idahaemi mmọ ema esitiñ kpukpru ini ebaña usen emi edidide. Ke akpatre, usen oro ama edi! John ọduọk-owo mmọñ ekenyene ndida eti ini emi nnyan ubọk ñwut Jesus, Eyen-erọñ Abasi.
Unana Zacharias Ndinim Ke Akpanikọ
Etop oro ama okpon akan nte Zacharias ọkpọbọde. Didie ke emi ekeme nditibe? Udọñ esie ndinyene eyen ke ini uyen ikọwọrọke isu. Ke akpanikọ, enye ama ekere ete ke ikpekemeke nditibe idaha emi. Edi nte emi ikedighe angel Gabriel, emi otode iso Abasi edi, editiñ ọnọ enye? Edi Abasi ke Idem-Esie ọkọdọñ angel ete ada eti mbuk oro ọsọk Zacharias. Nso idi ntak emi enye ekpeyikde?
Nso idi ntak emi nnyin ikpeyikde mme eñwọñọ Abasi? Ikọ Esie ikpuhu kpa nte uwemeyo ye okoneyo mikpuhu. Nnyin idọhọ ite ke nnyin imonim Abasi ke akpanikọ, edi ikafañ ke mbuọtidem nnyin esimem? Eyak nnyin ibọñ akam ibeñe Abasi añwam nnyin ndibuọt idem ke Enye nnyuñ nnim kpukpru eñwọñọ emi Enye ọnọde.
Zacharias ama oyom idiọñọ, ema enyuñ enọ enye. Enye idikemeke nditiñ ikọ tutu eñwọñọ oro osu. Ke ọfiọñ usukkiet, enye idikemeke nditiñ ndomo ikọ kiet, koro enye mikonimke etop angel ke akpanikọ. Ke ini emi enye edikutde ke imenyene eyen-eren inua esie eyekubọre.
Etop Emi Angel Ọkọnọde Mary
Oro ikedighe ñkukure etop emi Gabriel ekenyenede ndinọ. Ke ọfiọñ ition ama ekebe enye ama afiak edi ererimbot. Ke ini enye emi enye akaka etiene ñka-iferi Jew kiet emi okotode esien Judah. Nso utọ etop ke akada ọsọk enye! Enye ekenyene ndidi eka Messiah! Kpukpru ñka-iferi Jew ema ebet eñwọñọ Abasi ye idorenyin ke ofuri ediwak isua emi ọkọyọhọde ye mmem-idem, ete ke imekeme ndidi eka Edidem Israel emi editiede ke ebekpo David. Ema eyak ukpono emi enọ Mary. Enye okoto ubon ndidem emi David okotode; edi ama oto ke ediwak isua emi mbon Babylon eketañde mmọ efep ye ufik mbon Rome, uyai idaha ubọñ Israel oro ama akpa mmọñ. Eka Ọbọñ nnyin ikenyeneke inyene ye ubọñ isoñ emi, edi ama enyene inyene eke ñkañ Abasi. Enye odu uwem ndinem Abasi esit, ndien ke emi angel ọdọhọ enye: “Mmọkọm fi, afo emi enyenede akwa mfọn-iso, Jehovah odu ye afo ... ama okut mfọniso ke iso Abasi”.
Kere nte Mary ekenemde esit ke ndikop utọ ikọ oro nto inua angel Abasi! Abasi ama okut mme isua emi enye akanamde akpanikọ ke ndituak ibuot nnọ Enye ke edisana ye edinen ido. Abasi ama okut enye ndusuk ke idem idaha emi enye mikekereke ite ke Enye ke esese imọ. Abasi ama okut kpukpru ñkpọ emi enye akanamde, ndien enye ama okut mfọn ke iso Esie.
Mme utom nnyin akpakam edi se inemde Ọbọñ esit! Eyak nnyin iti ite ke Enye ke okokut kpukpru se inamde. Ke ini Enye enyenede saña-saña utom emi ekpenamde, Enye ọfiọk owo emi ekpemekde, owo emi ebeñede idem ndinam utom oro.
Koro uwem esie ekenemde Abasi esit, Enye ama emek Mary ete edi eka Messiah. Heaven ema etuak ibuot, ndien Eyen Mary ekedi Eyen Abasi. Abasi ama ọdọñ Eyen Esie edi ke ererimbot ke obukidem.
Esen-Owo Joseph
Angel ama ọtọñọ ntak edi ini kiet efen. Enye akaka ndidọhọ Joseph nte ke Eyen Mary enyene ndikere Jesus “Koro edi Enye eyenyaña ikọt Esie osio ke mme idiọk-ñkpọ mmọ” Eyekot Enye ñko Immanuel, emi ọwọrọde: “Abasi ke ododu ye nnyin”Abasi okoyom ndika ñkese ikọt Esie ñkan nte ekedide akpa. Ke mbiet owo, Enye okoyom ndiduñ ke otu mmọ.
Usiere ama edi. Obufa usen ama edisim. Jesus uñwana ererimbot, eyekan ekim idiọk-ñkpọ. Utin edinen ido emi etiñ-ntiñ nnim-ikọ Malachi ekewetde abaña ekenyene ndimana ke ini mibighike. Enye eyebọp mmọ eke esit ọbuñọde eyekọk udọñọ, anam nnan okut usuñ, eyenyuñ ọkwọrọ ete yak kpukpru owo ke kpukpru ebiet (edide Jew mme edide Gentile) edi ke edadara mmọ ndidi man enyaña mmọ esio ke mme idiọk-ñkpọ.
Questions
MME MBUME- Anie ekedi akpatre etiñ-ntiñ nnim ikọ ke Akani Ediomi?
- Ekebighe didie ọtọñọde ke emi enye eketiñde tutu osim emana Jesus?
- Enyiñ oro Zacharias, ọwọrọ nso?
- Ewe ufọk ke Zacharias okoto? ndien nso ikedi utom esie?
- Anie akaka etiene enye ke Itie-ukpono Abasi? Nso ikedi etop esie?
- Nso ikedi idiọñọ nte ke etop oro eyewọrọ osu?
- Nso ikenyene ndidi utom John ọduọk–owo mmọñ ke ini uwem esie?
- Nso etop ke Gabriel ọkọnọ Mary?
- Etop oro okokpon didie?