Lesson 261 - Junior
Memory Verse
“Kuyat esit ubaña mme oburobut owo; kufibe ufup ye mme anam-idiọk” (Psalm 37:1).Notes
Eyesọp Ndisibe Mme Anam-Idiọk Mfep
David ekewet ete: “Kuyat esit ubaña mme oburobut owo; kufibe ufup ye mme anam-idiọk. Koro eyewara ndisibe mmọ nte mbiet, mmọ eyenyuñ ekeñe nte awawa ikọñ”.
Eyewara ndisibe mmọ!
Ndusuk owo ekeme ndidu ke mkpa-idem ke abaña uforo mme anam-idiọk. Mmọ esaña didie enyene udori ntre okposuk edi nte mmọ enamde idiọk-ñkpọ? Kiet ke otu mme Etiñ-ntiñ-nnim ikọ ama ewet ini kiet ete: “Koro ñkefibede mbon iseri ufip, ñkut ifure mme idiọk owo ... tutu ndiduk ke edisana ebiet Abasi; nyefiọk utit mmọ. Afo odori mmọ kpa ke mfọfiọnọ ebiet: ọduọk mmọ ke nditaha” (Psalm 73:3, 17, 18).
Ñwed Abasi etiñ ọnọ nnyin ete: “Se ededi owo ọtọde, oro ke enye edinyuñ ọdọk” (Ñwed Mbon Galatia 6:7), ke ntre okposuk edi nte idikutde mme idiọk owo eforode, enyuñ enyenede udori ke kpukpru ñkpọ uwem, ke ini owo Abasi edidomode ukeme ndidu uwem ye ata esisit emi enye enyenede, ana nnyin iti ite ke ini eyedi emi edineñede mme ñkpọ ebon. Kpukpru mme anam-idiọk eyebọ ufen, midighe ke uwem emi, eyedi ke ererimbot eke edidide.
David ama etiñ ñko ete: “Ñkokut idiọk owo enyene-ndik, onyuñ asuan idem esie nte awawa eto”. Enye ekeme ndiwut ofuri idiọñọ uforo, onyuñ eye ndise, “Ekem enye adaha, ndien, sese, enye iduhe.”
Mme idiọk owo enyene odudu eti eti, ndien ke ndusuk ini mmọ etiñ esuñi Abasi. Abasi ke ima Esie, ekeme nditre ndisibe mmọ mfep usọp-usọp, edi ini ke edi eke edisobode kpukpru mme anam idiọk ọtọ kiet.
Mme Adia Akpa Abasi
Utit owo Abasi etie didie? Enye edi adia akpa Abasi, eyenyuñ oduñ ke nsinsi ye Abasi. Paul, Owo Mbet ama ọbọ ediwak mkpọsọñ ufen ke enye ama akayak esit esie ọnọ Jesus, edi enye ikememke idem. Enye ke kpukpru ini ama esise ñkpọ otuñọ osim utip emi enye ọkọfiọkde ete ke imọ iyebọ ke ubọk Ọbọñ. Enye ama okop inemesit ke ekikere ete ke mme anditiene Christ edi nditọ Abasi, “Edi edieke nnyin idide nditọ, imonyuñ inyene udeme ke se enimde enọ nditọ; imenyene udeme ke se Abasi onimde; imasaña ye Christ inyene udeme: koro ana nte nnyin ima ikut ndutuhọ ye Enye, iyenyuñ ida ubọñ ye Enye” (Ñwed Mbon Rome 8:17).
Ọbọñ ọkọñwọñọ ete, “Yak Jehovah adat fi esit; ndien Enye eyenọ fi se esit fo oyomde” Ke ini usuñ nnyin enemde Ọbọñ, Enye adara ndinọ nnyin utip. Mme akam nnyin enem Enye esit. “Ama edi mmọ eke eñeñerede esaña, enye isinke mmọ nti ñkpọ’ (Psalm 84:11).
Mmọ Emi Ekewotde Ke Ntak Ikọ Abasi
Mme utibe eñwọñọ emi Abasi ọkọnọde edi emi, kpa ye oro ke ndusuk idaha, ini esidu emi etiede nte Abasi ibọrọke akam owo Abasi ke ndinọ mmọ mme udọñ esit mmọ. Ekere nso abaña ata ediwak owo emi ekeyakde uwem mmọ aka ke ntak mbuọt-idem mmọ, ebọ kpukpru oruk idiọk ndutuhọ, emi ndiọi owo ekemede ndikere mbaña ? Mmọ ema edat esit ke Ọbọñ, kpa ye oro, mmọ ema ekut nte ebọde kpukpru se mmọ ekenyenede ọkọrọ ye uwem mmọ. Nte mmọ ekeyom mfina ye ubiak oro?
Ke owo mitimke ise, owo ekeme ndikere ete ke Abasi ama ọkpọñ mmọ. Edi se nte mmọ ekade ebiet emi eyomde ndiwot mmọ. Nso uñwana idi oro ke enyin mmọ? Nte mmọ ekut Jesus? Paul Apostle ewet abaña Moses, ete ke enye ama ọsọñọ ada “nte ñkpọ eke okutde Enye emi enyin owo mikwe” (Mme Hebrew 11:27). Kpañ utọñ kop ikwọ emi mmọ emi ekewotde ke ntak ikọ Abasi ekwọde ke ini eketopde mmọ esin enọ ekpe eta. Mmọ edaresit koro ema ebat mmọ ete edot ndibọ ndutuhọ ke abaña Andinyaña mmọ.
Anyanya Uwem
Udọñ mmọ ekedi ndiyara anyanya ye Andifak mmọ, ndien udọñ oro ama osu. Mmọ ke ekwọ ikwọ edikan mfin emi ekanare ebekpo Abasi. “Ọfọfọn ye owo eke ọsọñọde ada ke idomo, koro ke ema ekedomo enye efiọk ete ọfọn, enenọ enye anyanya uwem, emi Ọbọñ ọkọñwọñọde ndinọ mmo emi emade Enye” (James 1:12). Anyanya uwem edi utip mmọ. Anyanya oro mmọ ekedoride enyin ndibọ akañwam mmọ ndiyọ ini ukut oro, emi ekekotde mmọ ete edibiom.
Ke ini ekemiade mme Apostle ke ntak edikwọrọ mbaña Jesus, “Mmọ oro ewọrọ ekpọñ esop, edara koro ebatde ete mmọ emedot ndibọ esuene ke abaña enyiñ Jesus” (Utom Mme Apostle 5:41).
Ukeme Emi Otode Heaven
Satan ke otim ndiọi udim ekọñ esie ebeñe nditọ Abasi. Nnyin ifiọkke ini emi edikotde nnyin man ibọ ufen ke ntak Christ. Nnyin emi imade Enye ke ofuri esit nnyin iyenyene ukeme oro otode Heaven emi ediñwamde nnyin ndiyọ se ededi ke ntak Esie. Edieke nnyin inyenede ọkpọsọñ ukọbọ ke ererimbot emi, imọfiọk ite ke eyesọp ndikure. Ndien ke ini ididuọkde akpatre ibifik, nnyin iyedu ye Jesus ke ubọñ. Ke ini kiet iyewọrọ ikpọñ uwem emi iduk nsinsi uwem, ebiet emi idara nnyin miditreke.
Mmọ Emi Enyenede Ifure-Ifure Ido
Ke Ukwọrọ-ikọ Christ ke enyọñ obot, Enye ọkọdọhọ ete, “Ọfọfọn ọnọ mmọ eke enyenede ifure-ifure ido: koro mmọ eyeda isọñ enyene” (Matthew 5:5). Ọbọñ ekemenere akpanikọ oro owut David ke ata edem edem ke eyo esie. Enye ekewet ete, “Mbon nsukidem eyedia eyuhọ: mmọ eke eyomde Jehovah eyetoro Enye: yak esit mbufo odu uwem ke nsinsi”. David etiñ ñko ete, “Mbon nsuk idem eyedia eyuhọ” (Psalm 22:26).
“Eyedia eyuhọ” Mme ikọ oro etuñọ adaña didie! Nnyin imokut ediwak owo ke ererimbot emi enyenede awak akan se mmọ eyomde, edi mmọ inyeneke uyuhọ. Kpukpru ini mmọ eyom awawak akan. Owo ndomo kiet inyeneke uyuhọ ke minyeneke Jesus ke esit esie. Ke enye enyenede ima Abasi, enye okop uyuhọ, edide enye enyene ñkpọ efen mme inyeneke. “Ekpri ñkpọ ke uteñe Jehovah ọfọn akan ediwak inyene ye afanikọñ ke esit” (Mme Ñke 15:16). Paul eketiñ ete, “Koro mmekpep nditie ke oruk itie ekededi eke ntiede ye inem” (Ñwed Mbon Philippi 4:11).
Paul ama ekpep ndidu ke uyuhọ. Nnyin ikpep ndinyene uyuhọ ke ini nnyin ikerede ibaña ima Abasi ye nnyin. Anditiene Christ edi ata ñkpọ uto ke enyin Abasi. Jesus ekedep nnyin ke Iyip Esie, ndien Enye eneñede etiñ ọsọñọ ọnọ nnyin ete, “Kpa ye idem idet” ibuot mbufo emebat kpukpru. “Ekukọmọ ke ima inyene; enemesit ye se mbufo enyenede; koro Abasi ọdọhọde ete, Ndikpuhu fi, ndinyuñ ñkpọñke fi” (Mme Hebrew 13:5).
Ke ererimbot, ediwak owo enyene inyene eto ke ọkpọsọñ eñwan ndidomo ndibe owo efen iso, ye ke ndidomo ndinam ọfọn akan enye emi odomode idem ye enye. Edi usuñ Abasi idighe ntre. Nte nnyin inyenede nsuhọre-idem inọ Enye, inyuñ iyak uduak nnyin inọ Enye, ntre ke idinyene edikan ke usuñ isañ nnyin nte mme anditiene Christ. Nnyin imekeme ndisaña, edi inyeneke ediwak inyene ererimbot emi nte mme ufan nnyin emi edude ke ererimbot esinde ifik enyene, edi usen ke edi emi nnyin ididade isoñ emi inyene inyuñ ikara ye Christ. Ke akpanikọ Ọbọñ eketiñ ọnọ John ke isuo Patmos ete ke owo eke akande “eyeda ñkpọ emi enyene”
Ama aduai Paul Apostle ke idem eti eti ke ini enye ọfiọkde abaña inyene eke enye edinyenede ke uwem emi ebede, tutu enye ewet ete, “Koro mbat nte ndutuhọ eke ikutde idaha emi idighe se idotde ndida ndomo ye ubọñ eke ediyarare ke idem nnyin” (Ñwed Mbon Rome 8:18).
Ukeme Mbon Nsukidem
Iwọrọke ite sia mme idiọk owo eforode ke ererimbot emi, mmọ esọñ idem ekan odudu emi akarade se idide eti. Jesus ama enyene kpukpru odudu ke Heaven ndisọñọ Enye idem, kpa ye oro Enye akayak Idem Esie ọnọ mme idiọk owo ekọñ ke Krọs. Enye eketiñ ete ke imekeme ndikot ediwak ke itie angel duopeba, emi ekpebiatde mbon Rome ye Jew emi edianade ọtọkiet ediomi idiọk ediomi ebaña Imọ, edi Enye ikokotke. Ini ubierikpe ikekemke. Akan oro, sia owo mikọbiọñọke uduak mmọ ndiwot Jesus, mme oku ye mbon ekọñ ekekere ete ke mme imọ imọkop odudu, ndien ke iduhe owo eke ekpetrede idiọk udọñ esit mmọ ndiyom odudu.
Ọbọñ eyesak ke ini nsobo mme idiọk owo edidide. Ke ini edem, ke ini Enoch okodude, enye ama etiñ abaña usen iso emi Ọbọñ edidide ye ndimek Ikọt Esie man edikpe ikpe ebiere enọ ererimbot emi, “Ndinyuñ mbiom kpukpru mmọ emi mibakke Enye ikpe, mbaña kpukpru mbukpo ido eke mmọ enamde”, kpa ye kpukpru “mkpọsọñ ikọ eke mmọ emi mibakke Enye etiñde edian Enye” (Jude 15). Abasi eketiñ ete koro mme anam idiọk esinde ndikpañ utọñ nnọ Imọ, iyesak ke ini nnanenyin mmọ; iyenyuñ ibiaña ke ini ndik anamde mmọ (Mme Ñke 1:26). Ini ndiyom Ọbọñ edi emi man efen ke mme idiọk ñkpọ nnyin. Ini eyebiara edieke edibetde ubierikpe edi.
Tiñ enyin ke owo eke ọfọnde ama nyuñ se edinen owo: koro (eti) utit anade ọnọ owo emem”. Esisit ini, uwem nnyin eyesọp ndibe mfep. Se Abasi edikutde ke nnyin ke akpatre ini uwem nnyin edi se edidade anam ibat. Akpatre ini oro edidi ata akpan ini ntọñọ ọnọ ata eyen Abasi. Enye ke ebebeñe idem idahaemi ọnọ uwem eke edidide, ebiet eke kpukpru edidide idara ye emem, ye ebiet eke enye edikarade ye Christ nte edidem ye oku ọnọ Abasi. Enye eyekut utit mme idiọk owo; ndien enye eyenọ Andinyaña ubọñ emi akanyañade ukpọñ esie osio ke usuñ mme idiọk owo, onyuñ anam enye edi andikan man odu ye Jesus ke nsinsi.
Questions
MME MBUME- Nso ñkpọ iditibe ọnọ mme anam idiọk?
- Owo Abasi edibọ nso utip?
- Tiñ nte mmọ emi ekewotde ke ntak Ikọ Abasi ekesañade eka ndikpa?
- Anie edida isọñ enyene?
- Nso ñkpọ inọ uyuhọ ke uwem owo?
- Nnyin ikeme didie ndibọ uyuhọ?
- Utit “edinen owo” etie didie?