Lesson 265 - Senior

Memory Verse

IKỌ IBUOT: “Mmọdo mme mbufo ediade, mme eñwọñde, mme enamde ñkpọ ekededi, enam kpukpru enọ Abasi ubọñ” (1 Ñwed Corinth 10:31).

Cross References

I Idọ Ererimbot

1. Ikọ Abasi ọdọhọ kpukpru owo ete ekuma ererimbot, me kpukpru se idude ke ererimbot, 1: John 2:15; Ñwed Mbon Rome 12:2; Ñwed Mbon Colossae 3:1, 2

2. Ewuk mme owo ete ema Abasi, enyuñ esin inyene ye udori isọñ, 1 Ñwed Timothy 6:6-12; Haggai 1:6; Mme Ñke 23:5; 27:24, 25; Ecclesiastes 2:18, 26; Matthew 6:19; Luke 12:20, 21

3. Mbumek obukidem edi eke ererimbot, 1 John 2:16; Numbers 11:4, 34; Psalm 78:18, 30; Matthew 5:27-30; Ñwed Mbon Rome 13:14; 1 Ñwed Corinth 10:6-10; Ñwed Mbon Galatia 5:16; Ñwed Mbon Ephesus 2:3; Titus 2:12, 13; 1 Peter 1:14; 2:11; 4:2, 3; 2 Peter 2:10; Jude 16-18

4. Mbumek enyin edi eke ererimbot, Genesis 3:6; 13:10; Joshua 7:21; Psalm 119:37; Ecclesiastes 5:10, 11; Luke 4:5

5. Iseri uwem edi eke ererimbot, Esther 1:3-7; Psalm 73:6-9; Daniel 4:30; Ezekiel 28:12-17; Utom Mme Apostle 12:20-23; Eriyarare 3:17; 18:11-16

II Mme Ñkpọ Inemesit Ererimbot

1. Anditiene-Christ adianare onyuñ ada nsan-nsan ọkpọñ mmọ emi emade enyuñ eyomde ñkpọ ererimbot, Ñwed Mbon Rome 12:2; Titus 2:6-12; John 15:19

2. Nditọ Abasi enyene ndinem Abasi esit, idighe owo, enyuñ edu uwem ndiñwam, inyuñ ibiọñọke nditọ ete mmọ, 1 Ñwed Corinth 10:23, 24, 31-33; 14:26

3. Usọrọ obukidem edi mbubiam ke enyin Abasi, Exodus 32:6, 7; 1 Peter 4:3, 4; Ñwed Mbon Galatia 5:21; Isaiah 1:14; Daniel 5:1-5; Luke 15:13

Notes

SE EKPEPDE EBAÑA

Ima Ererimbot

Mme ikọ emi Edisana Spirit eketiñde ebe ke Apostle John ete “ekuma ererimbot ye se idude ke ererimbot” idighe ikpu-ikpu ikọ. Mmọ ekedi ikọ odudu emi etode Abasi esim kpukpru owo, ke kpukpru ebiet emi enyenede idorenyin mme udọñ ndidu ke nsinsi emem ye Enye. Ndima ererimbot ọwọrọ ndidi usua ye Abasi! Ke Ñwed James nnyin ikot, “Nte mbufo ifiọkke ite, eridi ufan ye ererimbot edi eridi usua ye Abasi? Mmọdo owo ekededi eke oyomde ndidi ufan ye ererimbot anam idem usua ye Abasi” (James 4:4). Eren mme ñwan emi odomode ndifumi utọ ntọt emi anam idem esie idiọk. Ediwak ido ukpono Abasi edu ke eyo emi, emi ifiọk mmọ, ekikere ye se mmọ enimde ke akpanikọ enọde unen enyuñ eñwamde ke edibuana ke ido ukpono Abasi ye ediduk ñka ke ererimbot. Mme utọ ido ukpono Abasi oro edi eke ererimbot. Uwem, udọñ ye ata edu mmọ emi enyimede utọ ukpep-ñkpọ oro edi eke ererimbot ofuri-ofuri, inyuñ ikemeke ndidiañare ñkpọñ ererimbot. Etop eti mbuk Jesus Christ inọhọ unen ndiduk nduk mme ndinyene ebuana ye ererimbot. Anditiene-Christ enyene ndikop uyo Ete-ufọk esie, nnyuñ ndiañare idem esie ñkpọñ ererimbot.

Ke ini ukpọñ enyenede ima ọnọ ererimbot ye mme ñkpọ emi enye ekemede ndinọ, enye ikemeke ndidi mbet Jesus Christ. Ñwed Abasi owut nte ererimbot etiede onyuñ etiñ ke ediwak usuñ ye ke ediwak itie ete ke ererimbot ọyọhọ ye ntañidem, inemesit obukidem, uduot andidiọk ye ñkpọ eke esọpde eda owo esim nsobo. (Kot Ñwed James 3:15; 1 John 2:17; Luke 21:34; Matthew 24:38).

Ediwak owo ekere ete edieke mbọhiduñ mmimọ ekọbọde ke usuñ idiọk-ñkpọ, mmọ ñko enyene unen ndinam kpasuk ntre. Okposuk edi nte ofuri ererimbot misañake ke uduak Abasi, iduhe baba owo kiet emi ekemede ndikut unen ke ndinam ntre. Abasi enyene ukeme ndida ofuri uduot owo ñka ke ebekpo ubierikpe man enam ibat idiọk-ñkpọ mmọ koro Enye ọñwọñọ ọnọ owo ete ke Imọ iyenam ntre ke ekem ini. Nditak ke unam idiọk nnyuñ ndi enyene ebuana ke udọñ itọñ ñkpọ ererimbot eyenam owo okut ufen iyaresit Abasi ke ntak idiọk-ñkpọ esie.

Ediwak owo ke ererimbot ema esin Christ enyuñ ewọñọde ekpọñ usuñ Esie. Mmọ emi edi mbon ererimbot. Edinam mmọ ye ekikere mmọ, ye edu uwem mmọ eda mmọ efiak edem ekpọñ Abasi, ndien utit uwem mmọ isañake ikekem ke se Abasi oyomde ke abaña edisana uwem ye edinen ido. Nsaña mmọ mme ñka mmọ mme mbubehe ye kpukpru edu uwem mmọ edi ndiyom uyuhọ nnọ idem mmọ nto ke udọñ idiọk-ñkpọ ye inemesit. Owo enyene ndien ndidu uwem emi enemde Abasi esit, midighe enye emek ñkañ ererimbot emi utit esie edide nsinsi nsobo.

Idighe Eke Ererimbot

Anditiene-Christ odu ke ererimbot edi idighe eke ererimbot. Enye idibeke ke ndobo ebiet iduñ emi adiañarede ọkpọñ idiọk-ñkpọ emi odude ke ererimbot; koro enyene ndinam mme owo efiọk ebaña Gospel ye odudu Abasi ndinyaña owo nsio ke idiọk-ñkpọ. Owo Abasi ekeme ndinam utom nnyuñ ndu uwem emi enemde Abasi esit ke ufọt ukwañ ye idiọk emana onyuñ edi ntiense ọnọ Abasi. Mfaña iduhe inọ mme owo ndidọhọ nte ke mimọ ikemeke ndidu uwem owo Abasi ke itie utom mimọ ye ke kpukpru usen uwem, koro edi ikọ ntiense nditọ Abasi ke kpukpru ebiet nte ke mmimọ imekeme ndidu uwem erikan. Nditọ Abasi edu uwem enọ Enye ke otu mbon-ekọn, ke mbubehe ufọk mmọ, ye ke ebiet ekededi ye ke kpukpru ebiet. (Se Daniel 1:8; Mme Hebrew 11:24-26).

“Edieke ekenamde mbufo eset ye Christ ndien, eyom ñkpọ enyọñ emi Christ odude do etie ke ubọk nnasia Abasi. Esin esit ke ñkpọ enyọñ, ekusin ke ñkpọ isọñ” (Ñwed Mbon Colossae 3:1, 2). Edieke ima nnyin odude ke ñkpọ Abasi ye ke Obio Ubọñ Abasi, nnyin imekeme nditim mfiọk ite ke nnyin idighe eke ererimbot. Mmọ oro edude ke ererimbot enim ñkpọ uto mmọ ke ererimbot, ndien Jesus ọdọhọ ete, ọtọ eke ñkpọ-uto fo odude, do ke esit fo edinyuñ odu ñko (Matthew 6:21).

Mme Ama Inemesit

Kiet ke otu mme idiọñọ ukperedem ini edi ke mme owo eyedi “Mme ama mbre ñkan Abasi” (2 Timothy 3:4). Ọkpọsọñ edifehe mbine inemesit ke kpukpru ebiet nte mme owo eyomde ke ofuri iso isọñ akabare edi kiet ke otu ndiọk ñkan ñkpọ emi akade iso ke ererimbot, ọkọrọ ye unana ido Abasi. Mfaña iduhe nte ke Abasi oyom ikot Esie edat esit enyuñ enyene ọyọhọ inemesit. Ke Ñwed Abasi mme ibuot ñwed edu ndiwut ebiet emi inemesit otode. “Afo eyewut mi usuñ uwem: uyuhọ idaresit ke iso fo; ñkpọ inemesit ke ubọk nnasia fo ke nsinsi-nsinsi” (Psalm 16:11).

Ke ini idut ererimbot ewọñọrede ofuri-ofuri ekpọñ Usen Ọbọñ man oyom inemesit, ikereke ibaña Abasi, edi ekọbọ ke ñkpọ ekededi emi mmọ edoride enyin ndiyuhọ ukpọñ mmọ, idut oro enyene ndisọp ñkabade ndi mbon unana ibuot tutu osim ata idiọk idaha ke ererimbot emi. Baba idut ntat-enyin kiet iduhe mfin emi miyakke idem ofuri ofuri inọ udia-ñkpọ, uñwọñ-ñkpọ ye unam idara tutu oro akabade edi idiọk-ñkpọ. Jesus ama etiñ abaña oruk ñkpọ ntre, “Koro nte mmọ ediade enyuñ eñwọñde ñkpọ, edọde ndọ enyuñ edade owo enọ ndọ ke mme usen eke ekebemde ukwọ iso, tutu osim usen emi Noah odukde ke ubom, minyuñ ifiọkke tutu ukwọ edi edimen mmọ kpukpru efep; Kpasuk ntre ke eridi Eyen Owo eyedi” (Matthew 24:38, 39).

Ñwed Abasi aka iso etiñ abaña mmọ oro ediade, eñwọñde enyuñ edarade edi idighe ke ntak efen ikan ndiyuhọ udọñ obukidem: “Ediwak owo esaña edu uwem, emi mma nkasian mbufo ediwak ini, nnyuñ nsian mbufo ke emi ye mmọñ eyet, nte Mmọ edi mme asua cross Christ: nsobo eyedi utit mmọ; idibi mmọ edi abasi mmọ, mmọ eseñ ke se isuenede mmọ, mmọ ekere ñkpọ isọñ emi” (Ñwed Mbon Philippi 3:18, 19). Abasi abat ọkpọsọñ uyuhọ udia nte ukpa mmin, ndien emi edi idiọk-ñkpọ (Kot Mme Ñke 23:21; Isaiah 56:12; Luke 12:19; 1 Ñwed Timothy 5:6).

Edinam emi Asañade ye Uteñe Abasi

Owo Abasi inọhọ uñwam ke ndibuana ke mme ñka, mbre, unek mme ndika ufọk ndise koro ke akpa ifet, utọ itie oro ye spirit emi odude ke mme ñkpọ oro eneneñede eñwana ye Spirit Christ, mmọ oro ebuanade mme ekade itie oro edi mme idiọk owo, ndien ata akpan ntak ke abaña mme mbre emi edi ndinem obukidem esit. Esisit eti ñkpọ emi ekpekemede ndikut ke mmọ edi se mmọ ema ekebabiat oto ke ekese idiọk-ñkpọ emi esañade ye mbre emi. Mbufa ndise idahemi emekabade edi usuñ edikpep nditọwọñ unam idiọk-ñkpọ emi ekponde ekan se ererimbot akananam ekutde. Usiak-ifia mme osio ndise enuk udọñ itọñ idiọk-ñkpọ esin ke esit owo enyuñ enam ukwañ ido ye idiọk-ñkpọ etọ efuk se ekotde ntat-enyin eyo emi. Edi ndusuk ndise emi ekpep mme owo ndinam idiọk-ñkpọ, ndien oto do kpukpru oruk idiọk-ñkpọ ebiat se inende inyuñ ifọnde ima.

Edisio ekebe-ndise, edi se etorode nte kiet ke otu mme ikpọ usuñ ntat-enyin ke mme isua emi ebede. Ekeme ndidi ekpedi ntre, edieke ekpedade enye enam ufọn enọ mme owo ye Ubọñ Abasi nde. Edi enye ama owowut ọniọñ esie ke ndikwọrọ idiọk-ñkpọ ukem nte mme ndise emi, onyuñ ananam akan ekebe utiñ-ikọ koro enye adade enyin ye utọñ emi edide mme usuñ ukpep-ñkpọ iba emi ekponde ekan kpukpru adian ọtọ kiet. Anditiene-Christ emi esede onyuñ akpañde utọñ ọnọ mme usuñ idiọk-ñkpọ ye ido edibiat ibet eke etiede ntem ke ekebe-ndise, ọsọñọ se mbon efen ekopde, enyuñ ekutde onyuñ abuana ke esit. Mme ikpọ ufọk utom iba emi edide mme anam mmin ye ufọk utom unam cigarette, eñwam ñka-iso ekebe-ndise, enyuñ enuk anana ibat udim owo edọñ ke nsinsi nsobo; kpa ye idem edikpañ utọñ ñkop etop unyam urua mmọ ekeme ndida owo nsim nsinsi nsobo.

Mme enyene nditọ ekpenyene ndinọ nditọ mmọ item ke abaña mme ñwed mbuk ñkpọ-ntibe ye mme “ndiọi ñwed efen” emi ndusuk ekemede ndikpuhọre ekikere mmọ nnyuñ nnuk mmọ ekenam idiọk-ñkpọ.

Nso idi ntak emi mifọnke owo Abasi ndiduk mme ñka mbre? Emi edi mbume emi esiwakde ndibup. Paul ọkọdọhọ Timothy, akparawa ọkwọrọ-iko ete, “Erisin idem mbet ñkpọ ikpọhidem enyene esisit udori; edi uteñe Abasi ọwọrọ udori ke kpukpru usuñ, koro uñwọñọ uwem emi odude ke emi ye eke uwem emi edidide asañade ye enye” (1 Ñwed Timothy 4:8). Ke akpa ifet mme mbre idahemi enyene mbiet ye se mbon Rome ekesibrede, ndien utit mme andibre esidi mkpa. Mme mbre idahemi ekọñọ ke mbet mbuba. Ndikan edi kpukpru se eyomde; ekpep mme owo kpukpru oruk usuñ man nte ekpededi mmọ ekpekan mbon efen. Baba ñkpọ kiet iduhe eke añwanade ye Eti Mbuk Christ nte udọñ ndinyene odudu ye ukeme ndikan mbon efen. (Kot Zechariah 4:6; 1 Samuel 2:9). Anditiene-Christ oyom ndikan nto ke edinen usuñ, edi ebiere ndinam ñkan man enye akpada ubọñ ọnọ Abasi inyuñ iyomke ndida ubọñ nnọ idem esie.

Ikọ Abasi ọdọhọ owo Abasi ete, “Eda ima nditọ-ete ema kiet eken; esọp ndikpono kiet eken” (Ñwed Mbon Rome 12:10). Oruk edu uwem ntem iduhe ke mme mbre emi. Mmọ emenere owo emi akande oto ke ukeme ye odudu esie. Owo inọhọ Abasi emi akanamde ikpọhidem, emi onyuñ ọnọde uwem, emi nnyin inyuñ idude ke Enye itoro. Mmenede-idem edi se Abasi asuade koro se iwutde idem oto ke ubọk utom satan (se ke Mme Ñke 25:27; Matthew 23:12; Genesis 3:5; Isaiah 14:14). Christ akakpa ndinyaña owo nsio ke utip idiọk-ñkpọ onyuñ ọnọ owo odudu ndikan odudu idiọk ye obukidem.

Idahemi etiñ enọ mme owo ebaña ubọk-edem ye unana edinim mbet emi atarade oduk ke mme ikpọ ufọk-ñwed. Udim-udim mkparawa eduọk uwem mmọ oto ke unam idiọk-ñkpọ, ebiere ufen ñkpọkọbi enọ ndusuk mmọ oto ke ndikokoi nyak ekan mmọ ke mbre mbuba man mmọ ekpebọ okuk nte ekebierede ndinọ mmọ oto ke abiaña. Mbre mbuba ke ñkpri ufọk ñwed nta-ifiọk ebiara ke ata ediwak usuñ, ndien ke ñkpri ye ikpọ ufọk ñwed nta-ifiọk emi etimde ekere, mmọ ebiere ndisio mbre mbuba ke ufọt ufọk-ñwed ye ufọk ñwed mfep ke ñwed ukpep-ñkpọ mmọ. Nte anditiene-Christ enyene ebuana ke mme utọ ñkpọ ntem?

Nso eti ñkpọ ke ekeme nditiñ mbaña mbre utop-ita ye mbre mbọk? Uwem mbon emi ke ebe efep kpukpru ini oto ke mbre ntak-urua, uduọk iyip eyo emi. Abasi ikpọñ ọfiọk udomo nsobo emi osimde ukpọñ ye ekikere owo oto ke ntak ediyom mbre utop ita, mbre mbọk, mbuba uwat enañ ye kpukpru mmọ eken emi ekotde “ndisana mbre.”

Odu ata ndisana ye nti mbre emi anditiene-Christ ekemede ndibuana ke esit, emi enamde ufọn ke ekikere enyuñ enọ nsọñ-idem, mmọ edi uwat ubom, ukọ iyak, utop ye ewọk. Ikọ Abasi ke idem esie añwam mme owo ndikop inem uwem ebe ke nsio-nsio oruk edinam emi efọnde ekan, koro enye ọnọ owo emem ye uyuhọ. Anditiene-Christ inaha esin idem esie ke ñkpọ ererimbot ye mme mbre emi enọde owo unan man oto do enye enyene inemesit.

Questions

MME MBUME

1. Ido ererimbot ọwọrọ nso?
2. Didie ke ekebe utiñ-ikọ ufọk ndise ye ekebe-ndise enam uwak idiọk-ñkpọ ebe ke edinam mmọ?
3. Nso idi ntak emi mme anditiene-Christ minyeneke ebuana ye mbre mbuba?
4. Siak nsio-nsio edinam emi anditiene-Christ ekemede ndinyene ebuana man ọnọ enye nsọñidem ye inemesit?
5. Nso idi ntak emi anditiene-Christ minyeneke ndima ererimbot mme se idude ke ererimbot?