Lesson 274 - Senior

Memory Verse

IKỌ IBUOT: “Owo eke akande eyeda ñkpọ emi enyene; ndien nyedi Abasi esie, enye eyenyuñ edi eyen Mi” (Eriyarare 21:7).

Cross References

I Idorenyin Ye Ubọñ Ufọk Abasi Mme Andikan

1. Idorenyin eriset ke mkpa edi ata akpan idorenyin Ufọk Abasi, 1 Ñwed Corinth 15:19-23; 1 Ñwed Thessalonica 4:13-18; John 6:39, 40; 11:24-26; Utom Mme Apostle 24:14-16; 1 Peter 1:3-5

2. Ewut edisana uwem ye ubọñ Ufọk Abasi ke Ñwed Abasi, Ñwed Mbon Ephesus 5:23-32

3. Eyenọ Ufọk Abasi eti utip ke ntak edinam akpanikọ esie, Matthew 25:20-23, 31-40; Malachi 3:16, 17

4. Ufọk Abasi, nte Ñwan Ndọ Christ, eyedara ke Usọrọ Ndo Eyenerọñ, Eriyarare 19:7-9; Matthew 25:10; Luke 12:37

5. Ufọk Abasi Mme Andikan edidu ke iso Ebekpo Abasi ke ini akamba ndutuhọ edidude ke isọñ, Eriyarare 4:10; 5:8-10; 7:9-17; 15:1-4; Isaiah 26:20; Genesis 7:1, 16

6. Eyewut ubọñ Ufọk Abasi Mme Andikan ke ediyarade Christ, Eriyarare 19:11-16; 1 Ñwed Thessalonica 4:14

7. Christ eyekara ke isọñ, Ufọk Abasi Mme Andikan eyeñwam ke ukara oro, Eriyarare 2:26; 3:21; 11:15-18; 12:10, 11; 20:4-6

8. Ke akpatre, Ufọk Abasi Mme Andikan eyenyene nsinsi ubọñ ye inemesit emi owo mikemeke ndibuk, Eriyarare 2:7, 11, 17; 21:1-7; 22:1-5.

Notes

SE EKPEPDE EBAÑA

Akamba owo ufọk Abasi kiet ke ediwak isua emi ekebede ama ọbọ ntunọ oto akamba owo esie koro enye ọkọsọñọde ada ke akpanikọ emi akamba owo esie oro mikenyimeke. Ke ndisua nnọ owo Abasi oro, akamba owo oro ama ọdọhọ ete “Ke emi mmosio fi mfep ke otu Mbon Ekọñ Abasi.” Etiñ ete ke owo Abasi oro, ke ata nsuhọridem, ọkọbọrọ ete: “Oro ke afo ekere ke emekeme ndinam, edi ata akpan ñkpọ kiet edi afo ukemeke ndisio mi mfep ke Ufọk Abasi Mme Andikan.”

Ufọk Abasi emi edi otu mbon-ekọñ emi ọyọhọde ye ubọñ. Nnyin ikut enye nte otu emi ekotde esio ke ererimbot emi eñwanade eti eñwan mbuọtidem enyuñ esinde idem ke utom Obio Ubọñ. Edi nnyin ikut ite ke Ufọk Abasi Mme Andikan enyene ubọñ akan, koro enye edide Mbon-Ekọñ Abasi emi enyenede erikan, otu mme andinim ke akpanikọ emi edotde ubọñ, emi ema ekeyet ọfọñidem mmọ esana ke Iyip Eyenerọñ, emi edinyuñ etienede Eyenerọñ ke nsinsi ke ebiet ekededi eke Enye akade. Man owo ekeme ndidi kiet ke otu Ufọk Abasi Mme Andikan, owo enyene ndibem iso ndi kiet ke otu Mbon Ekọñ Abasi. Utọ ñkpọ oro iduhe ndidọhọ ete ke emekeme.

“... ndika ke enyọñ

Ke ediye mkpana ifure

Ke ini mmọ eken ekeñwanade man ebọ utip

Ekewatde ebe ke mme inyañ iyip.”

Mme ekọñ edu enọ nnyin kpukpru ndiñwana ke uwem emi edieke nnyin iyomde ndisaña ke ediye udim mme andikan ke uwem emi edidide.

Idorenyin Owo Abasi

Edisana Spirit etiñ ọnọ nnyin ebe ke inua Apostle Peter ete ke ekebon nnyin “obufa ada esin ke odu-uwem idorenyin oto ke eriset Jesus Christ ke mkpa” (1 Peter 1:3). Enye afiak etiñ abaña udeme nnyin nte ñkpọ eke “mikemeke ndibiara, eke ñkpọ misabakere, eke minyuñ ikemeke ndibe mfep, Abasi okonyuñ onim udeme oro ke heaven” ọnọ nnyin. Apostle Paul ñko, ke idak nda-usuñ Edisana Spirit, etiñ ọnọ nnyin abaña idorenyin anditiene-Christ onyuñ ọdọhọ ete ke eriset ke mkpa Christ ye eriset emi ndisana Ikọt Abasi edisetde edi itiat idak isọñ ye uwem idorenyin oro.

Idara ikpoduhe edieke eriset ke mkpa mikoduhe. Edieke eriset ke mkpa mikpoduhe. edituak ibuot, mbuọtidem, idiọñọ emi etienede edikwọrọ Ikọ Abasi, erinyana nsio ke idiọk-ñkpọ, ye ediyet nda-mmana idiọk-ñkpọ mfep ikpoduhe. Mbuọtidem nnyin ọkpọwọrọ ikpikpu, nnyin ñko ikposuk idu ke mme idiọk-ñkpọ nnyin. Mmọdo eyak ikere ibaña emi, ye ubọñ emi odude ke eriset ke mkpa ye Ntañ-Ndọk Ufọk Abasi, koro ke editọñọ ntak ndi Christ ke Mbon-Ekọñ Abasi edikabare edi Ufọk Abasi Mme Andikan.

Akpa Eriset Ke Mkpa

Ewet ekese ñwed, ekwọrọ ediwak ikọ enyuñ ekpep ediwak ñkpọ ndisọñọ ndinyuñ mfaña ediset mme akpa-mkpa. Ke ini Christ okodude ke isọñ, ndusuk mme asua Esie ema etọhọ eti-eti ye Enye ebaña ikọ emi. Mmọ ema enyene uko nditiñ ikọ esuene ndian eriset ke mkpa ke iso Esie, emi kpa Enye ke Idemesie edide eriset ye uwem! Enye emi ekenyenede odudu ndiyak uwem Esie nduọk nnyuñ ntọñọ ntak nda enye, akanam ntre man nnyin ikpeset ke mkpa inyuñ ikeme ndida ke iso Ebekpo Abasi ke akwa ubọñ ye utibe idara emi ayañade ifiọk owo.

Mbon mfaña emi ekañde odudu Abasi ye akpanikọ emi odude ke Ikọ Abasi, ekañ akpanikọ emi ñko. Edi akpanikọ emi ọsọñ ada, kpa itiat emi ebọpde idorenyin Ikọt Abasi edori, ete ke eriset ama odu emi Ọbọñ ye Andinyaña nnyin ọkọwọrọde ke udi onyuñ ọdọk ke Enyọñ ndidi Ekpe Emem nnọ nnyin. Ndien sia Enye ama akakan mkpa ye udi, usen kiet nnyin ñko iyedọk ikosobo ye Enye ke ikpa-enyọñ. Mbon emi ekebemde nnyin iso emi ikpọhidem mmọ edude ke udi eyeset. Mmọ emi edude uwem eyedọk ekpọñ isọñ ekesobo ye nti ikọt Abasi emi ekesetde. Kpukpru mmọ ye nti ikọt Abasi emi edisetde ke utit Akwa Ukut eyenyene udeme ke Akpa Eriset emi Christ edide akpa mbuñwum. Nnyin emi idisobode ye Enye ke Ntañ-Ndọk ke ekot ata idọk, mmọ emi edisetde ke utit Akwa Ukut edi nsuhọ idọk (1 Ñwed Corinth 15:20-23; 1 Ñwed Thessalonica 4:13-18).

Kere se oro ediwọrọde nditiene mbuana ke Akpa Eriset! Mme ikpọhidem emi ema ekekut kpukpru oruk udọñọ ye ubiak eyedi ikpọhidem ubọñ. Kpukpru ubiak eyekure. Unana ukeme ye mme ubiọñọ ke obukidem eyebe efep. Nnyin iyebiet Christ koro iyekut Enye nte Enye etiede. Utom edinam asana emi ke akaka iso ke esit ikọt Abasi. Mmọ ke ebeñe idem ebet usen emi Enye edikotde mmọ. Edi ke utibe usen oro Enye eyenam nnyin ifọn ima onyuñ anam ibiet Enye.

Nnyin iyenyene ọyọhọ ifiọk. Ini ye ufañ ididighe ubiọñọ. Nnyin idikpaha mkpa aba. Ndik ididuhe ke esit mme ke ekikere nnyin. Eyesọñọ idaha nnyin ke nsinsi, nnyin idinyuñ inyeneke ntak ndiñwana aba ye idiọk-ñkpọ me idomo. Nnyin iyedu ye Jesus Ọbọñ nnyin, Andinyaña ye Ebe-Ndọ ke nsinsi nsinsi. Kpukpru edidiọñ emi, ye ekese efen, ena enọ owo emi ebeñede idemesie ndinyene ebuana ke Akpa Eriset.

Nnyin imekeme ndikut ndutuhọ mi. Ikpọhidem nnyin ekeme ndibiomo ndo onyuñ ọbuñọ oto iduọ owo, ndusuk itoho oro. Ikpọhidem nnyin ekeme ndikop mmem-idem, ndien ke ntak oro nnyin inyeneke ukeme ndinam utom Ọbọñ nte ikpanamde. Edi ke utibe usen eriset oro, odudu emi akanamde Jesus eset ke mkpa eyenyuñ anam ikpọhidem nnyin emi enyenede ndikpa, odu uwem oto ke Spirit Esie emi oduñde nnyin ke idem; ndien nnyin iyebọhọ kpukpru ubiak ye mmem-idem, inyuñ ikeme ndinam utom Esie otim ọfọn ke nsinsi nsinsi.

Mbeñe-Idem Ndinyene Erikan

Nte nnyin ikokutde ke ukpep-ñkpọ edem ke abaña Mbon-Ekọñ Abasi, nnyin imenyene ediwak ekọñ eke ñkañ spirit ndiñwana mi ke isọñ, ndien ana nnyin inam ọyọhọ mbeñe-idem edieke nnyin iyomde ndidu ke idaha ndisobo ye Ọbọñ ye Andinyaña nnyin. Kpukpru owo eke enyenede idorenyin emi ke Abasi enam idem mmọ esana kpa nte Abasi asanade (1 John 3:3). Utọ owo oro eyedu uwem “ke eti ibuot ye edinen ido ye ido Abasi ke eyo emi” (Titus 2:12). Enye eye, “asana onyuñ anana ndo” onyuñ edi kiet ke otu “ufọk Abasi emi ọyọhọde ye ubọñ, minyuñ inyeneke ntọi mme eriñwine mme oruk ñkpọ eke etiede ntre” (Ñwed Mbon Ephesus 5:27). Inyene ndinam ofuri mbeñe-idem emi ke ini uwem nnyin, koro Ntañ-Ndọk Ufọk Abasi edidi ubuat-ubuat, ifet idinyuñ iduhe idaha oro nditim idem. (Kot Matthew 24:17; 25:1-13). Enye “akañwaña Idem Esie, ada mbiet ofin, owut idem nte owo,” onyuñ “ọsuhọre idem, akabare osuk ibuot tutu ọsuñọ ke mkpa, kpa mkpa cross” (Ñwed Mbon Philippi 2:7, 8), man enam nnyin ibiet Enye. Edieke akanade ete enam Enye ebiet nnyin man ekpenam nnyin ibiet Enye, otim odot ete nnyin ibiet Enye mi man ikpebiet Enye ke ini idisobode ye Enye ke enyọñ.

Mme Utip

Ediwak itie ke Edisana Ñwed Abasi etiñ ebaña mme utip eke edidemede enọ Ufọk Abasi Mme Andikan ke ini mmọ edidade ke iso Ebekpo Abasi; “eyeyama nte ikpa-enyọñ ayamade” enyuñ ebiet “ntanta-ọfiọñ ke nsinsi nsinsi” (Daniel 12:3). Abasi eyemenede nnyin onim ke enyọñ (Psalm 91:14) ye Eyen Abasi ke mme ebekpo ubọñ ye nsọñ-uyo. Abasi eyeda nnyin nte ọsọñ-urua inyene Esie eyenyuñ anam nnyin idara ke utibe ubọñ obufa Enyọñ ye obufa isọñ ke anana utit nsinsi ini. Tọsin Isua Ukara edidi ini ndinam ñkpọ nnọ Ọbọñ nnyin, emi anade nte nnyin ima inyuñ ikpono. Nnyin iyekpe ikpe nte enende ke ini oro inyuñ ikeme ndidara ọyọhọ-ọyọhọ ke mme unen emi idinyenede ke eti ini oro.

Nnyin ididuhe ke idak ndik ubierikpe. Edi mme anam-idiọk emi ekekpañade ediset eda ke iso Akwa Afia Ebekpo man ekpe ikpe mmọ ke abaña mme idiọk-ñkpọ emi mmọ ekenamde ke isọñ. Ikañ iyaresit Abasi edidi ofuri se mme idiọk owo edikutde, edi utọ enyene ndik ufen oro idinyeneke Ufọk Abasi Mme Andikan baba ini kiet. Abasi idiwutke mmọ ñkpọ efen ibọhọke anana utit ima, eti ido, mbọm ye mfọn. Mmọ eyekut iso Esie enyuñ ese uñwana ọkpọ iso Esie. Abasi emi asanade onyuñ ọfọnde ama idisehe Ufọk Abasi Mme Andikan ke enyin iyaresit baba ini kiet. Ufọk Abasi eyenyene nsinsi emem ye idara emi minyeneke mbiet.

Ufọk Abasi eyeñwam ke ndikpe ikpe mme anam-idiọk ye eke mme angel ñko. Edinọ mmọ utom etiene ido nte mmọ ekedade ifet emi mmọ ekenyenede enam ñkpọ enọ Abasi ke isọñ. Mmọ ididuhe uwem ifu me eke unana iwuk edi eyedi uwem eke ọyọhọde ye utom eke ọnọde owo inem ye uyuhọ ke nsinsi-nsinsi. Mmọ eyedia mfri eto uwem enyuñ eñwọñ mmọñ uwem. Ini ididuhe emi mfri eto oro, mme ata edisana mmọñ oro edinanade. Mme mfina emi etode ke se mbon nta-ifiọk eyo emi efiọkde ndinam ididuhe. Owo idiyomke uñwana efen koro Eyenerọñ Abasi edide Uñwana. Mme inọ ididuhe, me mbon nsu, ye mbon isuñi, me ñkpọ emi abiatde, ye mme odudu emi enamde owo edighe ye unana idorenyin ke abaña ini iso. Kpukpru owo edidu ke nduọk-odudu ye ubọñ ke nsinsi-nsinsi.

Eriyarare

Ke ini ndutuhọ emi, Ufọk Abasi odu ke ukut. Enye ke ebe ke mme idomo ye nsiñere esie. Enye odu ke ini mbeñe-idem esie. Edi ini ke edi emi ediyarare enye ke ọyọhọ ubọñ esie.

Abasi omokot ikọt Esie ọnọ edisana uwem emi man mmọ edi saña-saña ikọt Esie, emi emekde onyuñ ọsọñde urua. Edi ererimbot ifiọkke mmọ ntre. Satan imaha nti ido emi nditọ Abasi enyenede. Edi ọbọbiọñọ anditiene-Christ onyuñ oyom ndiwot enye. Mme isuñutom Satan enyuñ ebiet ọbọñ mmọ, kpa nte mme isuñutom Christ ebietde Ọbọñ ye Andinyaña mmọ. Ererimbot emi idighe ufan ye mfọn Abasi, mme ufan ererimbot enyuñ edi mkpọsọñ usua mme asaña-utom Krọs.

Ererimbot ibatke nti ido ye mfọn nditọ Abasi ke ñkpọ. Ke ererimbot edi iseri, abiaña, ñkohoridem ye nditoro, se owo anamde ke eda efiọk enyuñ ekpono owo, nso itie ke ekeme ndinọ mmọ emi enyenede suñ-suñ ye ifure-ifure ido? Nso ke enye emi amade mme asua esie ekeme ndibọ nto ererimbot emi asuade kpukpru nti ñkpọ? Spirit emana emi eñwañwana ye anyan ime, eti ido, mfọn ido, ifure-ifure ido, ima ye mfara ke idem. Ererimbot enyene esisit ukpono mme uteñe ọnọ owo eke enyenede utọ nti ido oro me owo emi odude uwem nte ewuhọ Abasi etemede.

Edi usen emi enyenede ubọñ ke edi ọnọ ikọt Abasi. Mme usen ekim ye ufik ye ediñwana ye idiọk-ñkpọ, emi idude ke esit idahemi eyesọp ebe. Usen ubọhọ ke ekpere. Nnyin emi idude uwem ke emana emi ikutde mme idiọñọ nte ewutde idem, emi owutde ete ke utit ekpere, inyene ndimenede ibuot nnyin ke enyọñ koro edifak nnyin ke ekpere.

Ọbọñ eyedi nte inọ ke okoneyo. Eyesio mkpo edi idighe ofuri ererimbot edikop. Utọñ mme idiọk owo ke ererimbot ikpañke ndikop uyo ukorowo heaven. Mme idiọk owo ekop se ọbọñ mmọ, kpa Satan, oyomde mmọ enam, emi onukde mmọ enam uduak ye udọñ esie adaña nte enye odomode ndikan obio ubọñ Heaven nnyuñ nda Ebekpo Christ nnyene. Mbon-Ekọñ Abasi ikpọñ edikop uyo ikot. Mmọ kiet kiet, okposuk edi mifiọkke ñwed, esuhọrede idem, me ebuenede enyuñ ekutde ukut, me efikde, ekeme ndidi ke ama ayak ñkpọ ekọñ onim ke utit uwem esie, eyekop uyo Abasi onyuñ okop nte akakan odudu oro edimende enye osio ke ererimbot mfuhọ aka ke ebiet nsinsi ubọñ ye inemesit.

Mme Ubọñ Heaven

Owo itiñke ediwak ñkpọ inọ nnyin ibaña ubọñ Heaven. Ema emen Apostle Paul eduk ke ubọñ Heaven ndien enye ete ke ima ikut ediwak ñkpọ emi edeme imọ mikemeke nditiñ, emi imọ minyuñ ikemeke ndinam añwaña. Edi John Edima ọmọnọ nnyin ndusuk ndise emi eyede akan nte ekpetiñde, emi enye okokutde, kpa mme ñkpọ emi etimde ebeñe se ididade itie ke iso, me ke Ebekpo Abasi ke ini Akwa Ukut ke isọñ. Sia Ñwed Abasi ama otim anam añwaña nnyin ke nde ke nde, se ibañade Ebekpo emi John okokutde, uyai ñkan-ñkuk esie, ye mme ñkpọ emi enamde do enyuñ ewọrọde do, enam nnyin imekeme ndikere mme ñkpọ emi, ndien ikut ata esisit akakan uyai ye ubọñ emi ke usen kiet nnyin idikutde inyuñ ibuana ke esit.

Isaiah ọdọhọ nnyin ete ke Ebekpo Abasi edi “edikoñ ye edimenere” (Isaiah 6:1), enyuñ etiñ ke ebiet efen ke Ñwed Abasi ete ke enye asana ama onyuñ edi nsem-nsem ke uyai. Ọfọn ndikere mbaña mme ñkpọ emi etiñde mi, nnyuñ ndian ke ndise emi John edima ọnọde nnyin oto ke nda-usuñ Edisana Spirit.

John Edima etiñ ọnọ nnyin ete ke imọ ikokut Kiet nte etiede ke Ebekpo, ndien nnyin imọfiọk ite ke Kiet oro idighe efen ibọhọke Nsinsi Mbuot Abasi Ita ke kiet. Ñkukure ikọ emi John ekekemede nditiñ mbaña edibiọñọre utibe Mbuot Abasi emi ikọyọhọke, edi kpa ye unana ikọ oro, nnyin imenyene ndise eke ayañade ifiọk ye ekikere nnyin.

“Ebiet itiat Jasper ye sardius” edi se John etiñde abaña nte Andikpon Ñkan etiede. Nnyin imekeme ndikut nto ke oro ite ke uyama ama oto ke Ebekpo emi ekpedade edomo ye mme nsọñ-urua itiat oro emi ema eketim eyet asana. Nnyin ikeme ndikere ata esisit mbaña se John okokutde: edisana, purple, ikañ-ikañ, ididuot, ayama nte crystal, ke “edikoñ ye edimenere” Ebekpo emi asanade ama onyuñ esemde ke uyai, ata ediye awawa akpara akan enye okuk, enye onyuñ odoro ke enyọñ inyañ glass emi ebietde crystal.

Ke ini Moses ye mbiowo Israel ekedude ke enyọñ Obot, mmọ ema ekut “Abasi Israel: ndien ñkpọ odu enye ke idak ukot, esem nte ñkpọ eke enamde ke sapphire, onyuñ asana nte idem enyọñ” (Exodus 24:10, 11). Ezekiel ewet ete ke ebiet emi Ebekpo Abasi okodude, ke ñkukut emi imọ ikokutde, ekedi “ikpa-enyọñ... ebiet enyin crystal, enyene ndik” (Ezekiel 1:22). Inyañ glass emi ebietde crystal emi John okokutde ekebiet awawa ikpa-enyọñ, esem ke uyama esie onyuñ añwaña: oro edi itie Ebekpo edisana Mbuot Abasi ke ọyọhọ ubọñ Esie emi owo mikemeke ndibuk nte etiede.

Ubọñ Ufọk Abasi Emi Ayararede

Utọ ediye ndise emi ọfọnde ama ntem, emi ayañade owo akwa ifiọk ye udọn-ikọ ndibuk mbaña, ke esiode efep unana ukeme esit nnyin ndikere utibe uyai esie emi etiñde ubak-ubak enọ nnyin, ikpuhọkede ye se mmọ emi editienede ebuana edikutde ke ini ñkpọ ntibe emi edinyeñede isọñ edidade itie.

Ke iso ye ke ñkan-ñkuk Ebekpo, John ama okut mme ñkpọ uwem ye mbiowo emi otode ke ikwọ emi mmọ ekwọde ye itoro emi mmọ enọde, nnyin ifiọk ite ke mmọ edi otu mmọ emi efakde. Owo-mbet oro ikọfiọkke nnen-nnen ibat mmọ koro enye ọdọhọde ete ke mmọ edi tọsin duop ke itie tọsin duop ye mme tọsin ke itie tọsin. Mmọ emenere uyo kiet ke ikwọ itoro koro efakde enyuñ enamde mmọ ebọhọ mme ufen emi ekebetde mmọ ke ntak idiọk-ñkpọ mmọ. Emi edi ubak se John okokutde, koro eyedian akwa udim otu owo efen do emi baba owo kiet mikemeke ndibat, emi editode ke akwa ukut ewọñọ, eyet ọfọñidem mmọ ke Iyip Eyenerọñ enyuñ enam ñkpọ enọ Abasi ke iso Ebekpo Esie ke nsinsi (Eriyarare 7:9-17).

Edieke ekemede, kere ata esisit baña ediye ndise nsinsi ubọñ emi. Kere, kpa ke ata esisit ini, mme ubọñ emi ebetde ata mme andinim ke akpanikọ. Ndien da mmọ emi afo ekerede do nam awak ke ibat nsinsi ini! Ayaña owo ifiọk? Ih! Akak inua nditiñ? Ih!

Mme ọsọñ akan owo ndisim? Baba! Ke ofuri akpanikọ, isọñke! Iyip Jesus ekem, edifen Abasi onyuñ ekeme nditim owo kiet kiet idem man kpukpru owo eke eyomde ekpekeme ndikut Ubọñ oro. Odudu emi odude ke mfọnma Uwa oro ekeme ndinam owo kiet kiet odu ke otu anana ibat udim oro eyetde esana emi ediduọde ke iso Ebekpo enyuñ etop mme anyanya mmọ edori ke enyọñ nsem-nsem inyañ oro enyuñ ekwọ:

“Afo omodot... koro ekewotde Fi, Afo ama onyuñ ada iyip Fo osio owo ke kpukpru esien, ye usem, ye obio, ye idut, afak mmọ ọnọ Abasi” (Eriyarare 5:9).

Kere baña ñko mme ubọñ efen emi ediyararede enọ otu mme andibọhọ emi. Nte ñkpọ eke se etiñde mi mikemke, Abasi ọnọ otu emi efakde unen ndiwat ke enyọñ afia enañ mbakara, ndisine ediye linen emi asanade onyuñ esemde, ndinyuñ mfiak ndi ke isọñ nsaña ye Ọbọñ ye Andinyaña emi enyenede edikan ke utit Akwa Ukut (Kot Eriyarare 19:11-16 ye Jude 14).

Ndien kere baña mme ifet emi enọde owo kiet kiet ke ini Ukara Christ ke Tọsin Isua ke isọñ (Eriyarare 20:4-6). Da emi dian ye utit ofuri ñkpọ, ke ini Enyọñ ye isọñ eke edude ke emi edibiarade, edinyuñ ewukde ke itie mmọ, obufa Enyọñ ye obufa isọñ emi baba idiọk-ñkpọ me ñkpọ-ndek midisabakede. Ke ama okotim ekere ofuri emi, bet nyuñ kere ke esit fo baña oro ke ata esisit ini, ndien dian ke se afo ekerede, eyefiọk ete ke ufọt ofuri ubọñ emi, Ufọk Abasi emi ọyọhọde ye ubọñ, emi ananade ntọi ye eriñwine, utibe udim ekọñ emi enyenede erikan, eyekpere Abasi emi akafakde ikọt Esie onyuñ adade mmọ osim ebiet nsinsi Ubọñ emi, kpa Ufọk Abasi Mme Andikan!

Questions

MME MBUME

1. Nso ke owo enyene ndinam man edi kiet ke otu Ufọk Abasi Mme Andikan?
2. Ini ewe ke Mbon-Ekọñ Abasi ekabarede edi Ufọk Abasi Mme Andikan?
3. “Ọyọhọ andikan” ọwọrọ didie?
4. Siak ndusuk mme utip emi edinọde Ufọk Abasi.
5. Nso ke Jesus edinam ọnọ Ufọk Abasi Esie ke Usọrọ Ndọ Eyenerọñ?
6. Nso itie ke Ufọk Abasi edinyene ke ini ukara Christ ke tọsin isua ye akpatre Ubierikpe?
7. Ini ewe ke mme andiduñ isọñ ke akpa ifet edikut Ufọk Abasi Mme Andikan ke ọyọhọ ubọñ esie? Tiñ nte editiede.
8. Nso ididi nsinsi idaha Ufọk Abasi?
9. Kpep Ñwed Mbon Ephesus 5:23-32 sin ke ibuot.
10. Kpep akpan ñkpọ emi odude ke Matthew 25:31-40 sin ke ibuot.