Lesson 262 - Junior
Memory Verse
IKỌ IBUOT: “Mbufo eka ekenam kpukpru mme idut edi mbet Mi, enim mmọ baptism esin ke enyiñ Ete ye Eyen ye Edisana Spirit” (Matthew 28:19).Notes
Jesus Nte Owo
John, Owo-mbet, emi ekenyuñ efiọkde nte mbet emi Jesus akamade, ama ekpere Andinyaña ke ini utom Esie ke isua ita ye ubak. Mmọ ekesaña ọtọ kiet ke mme ọkpọ-usuñ emi ekefiopde enyuñ eyọhọde ye obu; mmọ eketie ọtọ kiet edia udia enyuñ eyuhọ ke ukem oruk udia oro. Ndusuk, John ama esitie ke ini ke ini ye Jesus, kpa nte Peter ye Andrew ekesitiede.
Jesus okoduñ ke otu owo nte owo. Ekeme ndidi Enye ama anam utom ke ediwak isua ke ufọk utom Joseph, ama onyuñ ọfiọk se owo ndikop mba ọwọrọde. Enye ama enyene mbọm abaña mme owo. Enye ama okut ukut mmọ, onyuñ abuana ke mme ukut oro onyuñ atua ye mmọ; Enye ama ọfiọk mme idara mmọ onyuñ adara ye mmọ.
Oto Ke Heaven
Edi, John ama ọfiọk ete ke Jesus ama ọkpuhọre ye mme owo eken. Ke ediwak ini ke ntọtuñọ nneme ye Peter ye James, Jesus ekesitiñ ọnọ mmọ abaña uwem emi Enye okodude mbemiso Enye edi ke isọñ. Ini kiet Enye ama ada mmọ ọdọk ke enyọñ ọbọt onyuñ anam mmọ ekut ubak-ubak ubọñ emi Enye ekenyenede ke Heaven. “Iso Esie asiaha nte utin, edisine-ñkpọ Esie onyuñ akabare afia nte uñwana.” Ndien Moses ye Elijah, emi ema ekenyọñ eka ke Heaven ke ediwak isua mbemiso ini emi, ema esuhọre editiñ ikọ ye Enye. Mmọ ema efiọk Jesus. Mmọ ema efiọk Enye ke Heaven mbemiso Enye edimana ke Bethlehem nte nsek-eyen. Ke ekpri ini, Moses ye Elijah ema esop mmọ ke enyin; ndien mme Apostle ema ekop uyo Abasi ke ikpa-enyọñ nte etiñde ọnọ mmọ: “Emi edi edima Eyen Mi, emi mmenemesit ye Enye; ekop uyo Esie” (Matthew 17:5).
Eyen Abasi
Oro ekedi akpanikọ emi John mikekemeke ndifre. Jesus ekedi Eyen Abasi; onyuñ edi oro ke John eketim etiñ abaña ke mme ñwed emi enye ekewetde, emi nnyin inyenede ke Edisana Ñwed Abasi.
John ama ewet ediwak ñkpọ ndiyarare ñwut nte ke Jesus ama okpon akan ikpikpu owo, eyen Mary ye Joseph. John ọkọtọñọ Eti mbuk esie ke nditiñ nte, “Ikọ okodu ke eritọñọ, Ikọ okonyuñ odu ye Abasi, Ikọ onyuñ edi Abasi.” “Ndien Ikọ akabare edi obukidem onyuñ oduñ ye nnyin (nnyin inyuñ ikut ubọñ Esie, utọ ubọñ emi ikpọñ eyen ọbọde ke ubọk ete) ọyọhọ ye mfọn ye akpanikọ” (John 1:1, 14). Ikọ emi “akakabarede edi obukidem” ekedi Jesus. Enye okodu ye Abasi toto ke eritọñọ ini emi ekebotde ererimbot. “Oto ke Enye ekenam kpukpru ñkpọ; ndien mitoho ke Enye, inamke ñkpọ baba kiet eke ekenamde” (John 1:3).
Ke akpa ufañ ke Edisana Ñwed-Abasi nnyin ikot: “Ke eritọñọ Abasi okobot enyọñ ye isọñ.” Ndien John etiñ ọnọ nnyin ete ke Jesus okodu ye Abasi ke ini oro, okonyuñ edi Abasi ke Idem Esie. Apostle Paul onyuñ etiñ ukem ñkpọ oro: “Abasi... ke ukperedem ini emi ama etiñ ọnọ nnyin ke Eyen; emi Enye ekemekde onim, ete edidi andinyene kpukpru ñkpọ, okonyuñ adade ubọk Esie obot ekondo” (Mme Hebrew 1:1, 2). Ndien ke ini ekebotde owo, Abasi ọkọdọhọ ete, “Eyak nnyin inam owo isin ke mbiet nnyin, etie nte nnyin” (Genesis 1:26). Mme ikọ emi mmọ ye nnyin eda enọ uwak owo nte edade etiñ ikọ ke itie emi.
Owo Ita Enyene Ubọk Ke Edibot Ererimbot
Edisana Spirit ñko ama odu ke ini ekebotde ererimbot: “Spirit Abasi onyuñ ọkubọ ke enyọñ mmọñ” (Genesis 1:2). Job ama onyuñ ewet ete: “Spirit Abasi akanam mi: ibifik Abasi Ibom okonyuñ onim mi ke uwem” (Job 33:4); ndien, “Spirit esie anam ikpa-enyọñ edi uyai; edi ubọk esie okobot urukikọt itọk” (Job 26:13). Kpukpru Mmọ Mbita ke Mbuot Abasi kiet ema enyene ubọk ke Utom obot.
Nnyin ikemeke ndifiọk se “Owo ita ke kiet” ọwọrọde; edi etiñ ebaña mmọ ke ini ke ini ke Ikọ Abasi emi anamde utom mmọ añwaña, ete ke mmọ kiet kiet edu ke nsinsi, enyene ofuri odudu, ye ofuri ọniọñ enyuñ edodu kpukpru ini. Nnyin ikot Mbita emi Edisana Mbuot Abasi Ita ke Kiet: Abasi Ete, Abasi Eyen, ye Abasi Edisana Spirit.
Ufọn Ndiyom Ọyọhọ Owo Iba
Nso idi ntak emi nnyin inimde Mbuot Abasi Ita ke Kiet ke akpanikọ? Nso idi ata akpan ntak emi nnyin inimde ke akpanikọ ite ke Jesus ekedi Edisana Eyen Abasi? Nso idi ntak emi akanade nte Eyen edi ke isọñ onyuñ oduñ ke otu owo?
Ata ñwọrọ-nda edu Abasi edi edisana ido. Ndien edisana Abasi ikemeke ndise idiọk-ñkpọ owo. Ibet Abasi edi, “Ukpọñ eke anamde idiọk eyekpa.” Abasi okoñ ke Heaven Esie, akara kpukpru ererimbot, enyene ofuri odudu ọfiọk kpukpru ñkpọ.
Owo odu ke isọñ emi ema ekesuñi oto ke idiọk-ñkpọ. Ekebot enye man ọnọ Abasi ubọñ. Abasi ama okop inem ebuana ye owo ke Iñwañ Eden mbemiso idiọk-ñkpọ nsobo osim owo. Edi idiọk-ñkpọ Adam adianare owo ọkpọñ Abasi. Ikoduhe se owo akpanamde ke idem esie man ọtọñọ ntak enen iso ye Abasi. Enye ama odot ndikpa ke idiọk-ñkpọ esie, koro enye ama abiat ewuhọ Abasi.
Ke utọ ini ntem ke nnyin ifiọk ntak emi Christ ekedide ke isọñ. “Abasi kiet odu, Ekpe-emem kiet ke ufọt Abasi ye owo onyuñ odu, emi ke Idem Esie edide owo, kpa Christ Jesus” (1 Ñwed Timothy 2:5). Ekpe-emem edi esine ufọt, kiet emi odomode ndida emem ndi ke ufọt owo iba emi etọhọde.
Owo ikekemeke aba ndisobo Edisana ye Edinen Abasi. Owo ama anam idiọk-ñkpọ okonyuñ enyene ndikpa. Ndien Jesus edi ndinyaña owo. Enye ada ke ufọt anam-idiọk ye edinen Abasi. Mi ke ibet Abasi asaña ekekem.
Jesus ọyọhọ Owo iba ke Mbuot Abasi Ita ke Kiet, ama obiom ke Idem esie ndudue ererimbot onyuñ akpa ke ibuot mme anam Idiọk-ñkpọ. Baba owo kiet ikpekedighe ekpe-emem, koro kpukpru owo ema enam idiọk-ñkpọ, enyuñ etaba ubọñ Abasi (Ñwed Mbon Rome 3:23). Owo kiet-kiet oyom ekpe-emem. Ndien Eyen Abasi, edisana emi minyuñ inamke idiọk-ñkpọ, ekenyene ndidi Ekpe-emem ke ufọt Abasi ye owo.
Ekeme ndinyaña nnyin nto ke Jesus ikpọñ. Jesus ọkọdọhọ ete, “Owo baba kiet itieneke Ete, ibọhọke ebe ke Ami” (John 14:6). Edieke nnyin ikpede Jesus ubọk ite efen ọnọ nnyin, enye eyenyaña nnyin osio ke mme idiọk-ñkpọ nnyin.
Unana Edinim Ke Akpanikọ
Mme Jew eke ini Jesus, ekedi mmọ emi mikenimke ke akpanikọ kpa nte ediwak mmọ emi ekotde idem mmọ mme anditiene-Christ, enamde mfin. Mmọ ete imọnim Abasi Ete ke akpanikọ, ndien mmọ ekpono Enye; edi mmọ inyimeke Jesus.
Mme Jew ema efiọk, oto ke ndikot Ikọ Abasi ete ke Abasi eyenọ Messiah edi, ndien ke Enye eyemana oto edisana eyen añwan. Isaiah, anditiñ ntiñ-nnim ikọ emi mmọ ekekponode, ama ewet ete, “Ọbọñ ke idem esie ọnọde mbufo idiọñọ: sese, eyenọwọñ añwan eyeyomo onyuñ aman eyen eren, onyuñ osio enye enyiñ IMMANUEL” (Isaiah 7:14). Ndien ke ini oro ọkọwọrọde osu ke emana Jesus, mmọ ikonimke ke akpanikọ. Mmọ ikekereke ke esit mmọ ite ke eyen ekeme ndimana ke ini minyeneke ete eke ererimbot, ke ntre mmọ esin ndinim ke akpanikọ ke esit mmọ ete ke Enye ekedi edisana Eyen Abasi.
Mme Ntiense Emi Ekenimde Ke Akpanikọ
Andrew ekedi kiet ke otu akpa mme Apostle emi ekekotde. Ke ini enye eketiñde ọnọ Peter abaña Jesus, enye ọkọdọhọ ete: “Nnyin imokut Messiah,” emi ọwọrọde Christ, mme Enye emi ekeyetde aran emi edidade erinyaña ọsọk ererimbot. Ke usen efen Philip asaña etiene Jesus, onyuñ etiñ ye Nathanael ete, “Nnyin imokut Enye, emi Moses ekewetde abaña Enye ke ibet, mme prophet ekenyuñ ewetde ebaña.” Nathanael ama onim ke akpanikọ, onyuñ ọdọhọ ete, “Andikpep, Afo edi Eyen Abasi, Afo edi Edidem Israel.” Mme Apostle oro ema enim ke akpanikọ tọñọ ke eritọñọ ete ke Jesus ekedi edisana Eyen Abasi. Jesus ke akade iso, ama etiñ ọnọ mmọ ete, “Ete ke Idem Esie amama mbufo, sia mbufo ekemade Mi, enyuñ eminde ke akpanikọ ete Ami ñkoto ke ọtọ Ete ndi” (John 16:27).
Edisọñọ Idaha Esie Nte Abasi
Jesus ama ọsọñọ idaha Esie nte Abasi oto ke mme utibe-ñkpọ emi Enye akanamde. Akpa utibe ñkpọ Esie ekedi ke usọrọ ndọ ke Cana ke Galilee emi Enye akanamde mmọñ akabare edi wine. Ke ndinam emi, Enye “ayarare ubọñ Esie; mbet Esie enyuñ ebuọt idem ye Enye” (John 2:11), ema enim ke akpanikọ ete Enye edi Eyen Abasi. Enye ama ọbọk owo 5,000 ke uyo ition ye ñkpri iyak iba. Enye ama anam owo emi ama akakpa ọtọñọ ntak odu uwem.
Jesus ama asaña ke enyọñ mmọñ, emi baba owo efen mikpekemeke ndinam. Ke ini mbet, emi ekedude ke ubom, ekutde Enye nte asañade ekpere mmọ, mmọ ema ekop ndik, enyuñ ekere ete ke mmimọ imokut ekpo. Edi Jesus ọbọrọ mmọ ete, “Edi Ami: ekufehe ndik.” Ke ndo-ndo oro Jesus odukde ke ubom, mmọ ema ekesim mben esuk eken. Oro ekedi utibe ñkpọ efen.
Edi ediyarare idaha Esie nte Abasi emi okokponde akan ekedi emi Enye ekemede ndiyak uwem Esie nnim ndien onyuñ ọtọñọ ntak emen; Enye ekeme ndikpa onyuñ ọtọñọ ntak odu uwem ke ikpọhidem Ubọñ Esie. Enye eketiñ ntem ete: “Ewuri temple emi, ndien nyediọñ enye ke usen ita.” Mme Jew ema edu ke mkpaidem enyuñ eyat esit ke ibọrọ oro, edi Enye iketiñke ibaña itie-ukpono emi ebọpde ke itiat emi ekedide ufọk Abasi mmọ. “Enye etiñ abaña temple ikpọhidem Esie” (John 2:21). Eriset Esie ididighe eke spirit, edi ikpọhidem Esie eyewọrọ ini kiet ke udi. Mbet ema eti mme ikọ emi ke ini Jesus ama ekeset ke mkpa.
Idem mme demon ema etie ntiense ete Jesus edi Edisana Eyen Abasi. Ini kiet mmọ ema efiori ete: “Nnyin isaña nso ye Afo, Afo Eyen Abasi? Nte emedi ndituhọre nnyin ke ini mikemke kaña ini?” (Matthew 8:29).
Ke Inua Ntiense Iba
Jesus ama enyene ntiense efen nditiñ nsọñọ ete ke Enye okoto Abasi. “Ñko ewet ke ibet mbufo,” Enye eketiñ ọnọ mme Pharisee ete, “ikọ-ntiense ke inua owo iba edi akpanikọ” (John 8:17). Enye ekedi ntiense kiet ke Idem Esie oto ke mme utibe-ñkpọ emi Enye akanamde. Ntiense efen ekedi Ete emi ọkọdọñde Enye. Ikata, uyo Abasi ama etiñ oto ke enyọñ, nditoro Eyen Esie. “Emi edi edima Eyen Mi, emi esit enemde Mi eti-eti ye Enye.”
Ke ekperede utit Ñwed John, enye etiñ ete, “Ewet mmọ emi, man mbufo enim ke akpanikọ ete Jesus edi Christ, Eyen Abasi, man, ke erinim ke akpanikọ, mbufo ekpenyene uwem ke enyiñ Esie’ (John 20:31).
Ndinam Utom Ọtọ kiet
Jesus akanam utom ọtọkiet ye Ete. Enye ọkọdọhọ ete, “Ami ye Ete Mi idi kiet” (John 10:30); “Ami ñkemeke ndinam baba ñkpo kiet ke Idem Mi”; “Ete Mi ke ananam utom tutu osim emi, Ami ke nnyuñ nnam.” Edi Enye ọnọ Ete Esie ukpono: “Ete omokpon akan Mi” (John 14:28). John ewet awak akan itie ikie mme ebiet emi Jesus okotde Abasi Ete Esie.
Ke okoneyo emi eketapde Jesus Enye ama enyene anyan nneme ye Mbet Esie. Enye ama etiñ ọnọ mmọ ediwak ñkpọ ke abaña ebuana Esie ye Ete. Enye ama ọfiọk ete ke ofuri uduak Usio-isop okodu ke ubọk Esie ndien “Imọ ikonyuñ ito Abasi, inyuñ inyọñ itiene Abasi.” Ekpri ini uwem Esie ke isọñ ama ekpere ndikure, ndien ini ñkpọ-ntibe emi Enye ekedide ọnọ ama esik ekpere. Enye ama ọdiọñọ ete ke ekpri esisit ini mme Apostle Esie eyesin Enye, edi Enye ọkọdọhọ ete, “Edi ntiehe ikpọñ, koro Ete odude ye Ami” (John 16:32).
Uduọk-Mmọñ Jesus
Nnyin imada ini itiñ isọñọ ebuana emi odude ke Abasi Ete ye Abasi Eyen ndiwut nte ke Owo iba emi enam Utom ọtọkiet. Edi toto ke eritọñọ mme ñkpọ edu ndiwut nte ke ọyọhọ Owo Ita ke Mbuot Abasi kiet odu. Ke ini Jesus akanade Baptism ke Jordan ke ubọk John Ọduọk-owo-mmọñ, Enye akasaña oduk ke mmọñ ndien John ama etiñ añwa-añwa ete, “Eyen-erọñ Abasi emi emende mme idiọk-ñkpọ ererimbot efep.” Ke ini enimde Jesus baptism ekure, Spirit Abasi (Edisana Spirit) ọsuhọre edidoro Jesus nte ibiom; ndien ekop uyo Abasi ke Heaven ọdọhọde ete, “Afo edi edima eyen Mi; mmenem esit eti-eti ye Afo” (Luke 3:22). John Ọduọk-owo-mmọñ ete: “Ami mma nnyuñ ñkut, nnyun ntie ntiense nte, Emi edi Eyen Abasi.”
Iberedem
Akpatre okoneyo emi Jesus akabiatde ye Mbet Esie ke isọñ, Enye ama anam añwaña utom Edisana Spirit, emi Enye okokotde Iberedem. Enye ọkọdọhọ ke Imọ inyene ndinyọñ man Iberedem edi edida mmọ usuñ. Ke John 14:26, nnyin ikot ibaña kpukpru Owo ita ke Mbuot Abasi kiet: “Iberedem, kpa Edisana Spirit, emi Ete edinọde edi ke enyiñ Mi, Enye eyekpep mbufo kpukpru ñkpọ.” Abasi Ete, ke enyiñ Abasi Eyen, ekenyene ndinọ Iberedem, kpa Abasi Edisana Spirit, ke ererimbot ndiduñ ye ikọt Esie. Enye eyetiñ ọnọ mmọ ediwak ñkpọ abaña Jesus, ndien iditiñke ibaña Idemesie. Enye ñko eyenọ mmọ odudu nditie ntiense nnọ Jesus.
Nte akpatre ikọ Jesus ke abaña akwa utom usuan-etop, Enye ama ọsọñọ mbuot Abasi Ita ke kiet onyuñ ọdọñ mbet Esie eka ke ofuri ererimbot ekekwọro Eti-mbuk enọ kpukpru owo, “enim mmọ baptism esin ke enyiñ Ete ye Eyen ye Edisana Spirit” (Matthew 28:19). Emi edi ibet Jesus, ndien nnyin inyene ndinam nte Enye ọdọhọde.
Questions
MME MBUME- Nso akpan ntak akanam Apostle John ewet mme ñwed esie?
- Adaña didie ke John ọkọfiọk Jesus?
- Nso idi mme akpa ikọ ke Ñwed Eriyarare?
- Owo ifañ edu ke Mbuot Abasi? Mmọ enyuñ edi mme anie?
- Nso idi ntak emi Jesus ekedide ke Isọñ?
- Ke enyiñ anie ke nnyin ibọñ akam inọ Abasi Ete?
- Siak ndusuk akpa ntiense emi ekenimde ke akpanikọ ete ke Jesus edi Edisana Eyen Abasi.
- Tiñ ndusuk usuñ emi Jesus akanamde añwaña ete ke Imọ idi Eyen Abasi.
- Nam añwaña se ikadade itie ke ini ema ekenim Jesus uduọk-mmọñ.
- Tiñ mme ikọ emi Jesus ọkọdọhọde ete esitiñ ke ini enimde owo uduọk-mmọñ (Matthew 28:19).