Lesson 264 - Junior
Memory Verse
IKỌ IBUOT: “Abasi amama owo eke ọnọde ke inemesit” (2 Ñwed Corinth 9:7).Notes
Abraham, Owo Akpanikọ
Ini kiet efen, ukpep-ñkpọ emi ada nnyin akatuaha ye uwem Abraham emi ekotde enye, Ete Mbuọtidem, ufan Abasi ye Ete kpukpru mme idut. Efiọk ebaña Abraham nte owo mbuọtidem ye andikop uyo nnọ Abasi.
Ke ini edem, ekpere ndidi ke editọñọ ini, mme ekọñ ema edu, kpa nte edide ke emi. Usen kiet Abram (enyiñ emi ekekotde enye ke ini oro, ama okop ete ke udim ekọñ mme usua ema eda Lot, eyen eyen-eka esie ye ñwan ye nditọ ye inyene enyọñ nte mbuot-ekọñ. Ini kiet Abram ama ada ñkpọ-ekọñ ye nditọ ufọk esie owo 318 emi enye ekekpepde ekọñ ebine mme asua oro. Enye ama enyene akamba erikan ke ekọñ oro, onyuñ afak eyen eyen-eka esie Lot ye ofuri ufọk esie ye mme inyene emi eketañde.
Ke ini Abram ọkọnyọñde ekọñ, Melchizedek, edidem Salem, ama edikọm enye. Efiọk utibe owo emi ke ikọ Abasi nte Edidem Edinen Ido, Edidem Emem, enyuñ etiñ ete enye “inyeneke ete, inyuñ inyeneke eka, inyuñ inyeneke oruk iman, inyuñ inyeneke eritọñọ eyo uwem, ye utit uwem, edi enam enye ebiet Eyen Abasi” (Mme Hebrew 7:2, 3). Melchizedek ama ọdiọñ Abram, emi owutde ete ke enye ama okpon akan Abram (Mme Hebrew 7:6, 7). Enye ekedi mbiet Christ, edieke enye mikedighe Christ ke Idemesie, ekeyararede Enye ke ini nte Akani Ediomi oro. Nte ñkpọ ndiwut inemesit esie, Abram ama ọnọ Melchizedek ọyọhọ mbak ñkpọ duop. Emi ekedi akpa ini emi eketiñde ñkpọ ebaña ọyọhọ mbak ñkpọ duop ke Ñwed Abasi.
Eyen-eyen Abraham
Ke ñkpọ nte isua 150 ama ekebe, Jacob, eyen-eyen Abraham ke ndifehe man ọbọhọ eyen-eka esie, ama ọsuhọre ana ke ukpọk isọñ ede idap ke okoneyo ye itiat ke udoribuot esie. Ke ndap, enye ama okut eberi emi okotode Heaven ọsuhọre ediwuhọ ke isọñ, ye nte mme angel Abasi edọkde enyuñ esuhọrede ke esit. Ọbọñ Abasi ama ada ke ibuot eberi emi. Ke ini Jacob edemerede, enye ama etiñ ete, “Kakpan Jehovah odu ke ọtọ emi; ndien ami mfiọkke.... emi onyuñ edi usuñ heaven” (Genesis 28:16, 17). Ndien enye ada itiat emi enye okodoride ibuot ede idap owuk, ndien ọtọhọ aran ke esit. “Ndien Jacob akaña akaña, ete, Ekpedi nte Abasi edidude ye ami, edinyuñ ekpemede mi ke usuñ emi ami ñkade, onyuñ ọnọde mi udia ndia, ye ọfọñ-idem nsine, ami nnyuñ mfiakde ndi ke ifure ke ebiet ete mi, Jehovah ama onyuñ edi Abasi mi:... ndien nyesio ubak kiet ke itie duop kpukpru se afo edinọde mi, nda ntomo fi” (Genesis 28:20-22). Ekeme ndidi enye ama enyene ifiọk ke abaña ndinọ ubak ñkpọ kiet ke itie duop oto ete esie Isaac, mme ete-ete esie, Abraham.
Ke akade iso, ke ini ukara Jehoash, Jehoiada oku ama emen ekebe otibi ndudu ke okukip esie onyuñ odiọk enye ke ñkañ itie uwa, ke ubọk nnasia, ke owo odukde ufọk Jehovah (2 Ndidem 12:9). Ekeda okuk emi ediọñ se ikabiarade ke Ufọk Abasi.
Uduak Abasi Ke Abaña Okuk
Abasi okonim edinọ ọyọhọ mbak ñkpọ duop, idighe koro Enye ananade ñkpọ onyuñ oyomde se owo enyenede, edi enye okonim emi nte usuñ ndikọ okuk ndida nnam utom Esie. Abasi enyene mme unam ke mme tọsin ikpọ obot, ñko silver ye gold edi Esie. Ema eyom Nditọ Israel emi ekefuñde isọñ eda se ikedide udeme Jehovah esọk Enye. Ikedighe udeme mmọ; edi, ekedi eke Jehovah koro edi Enye ọkọnọ mmọ kpukpru se mmọ enyenede. Mme eto-mfri eketibe ke isọñ emi Jehovah okosiode owuk; ekedi edim Esie akanam mme mfri edat; okonyuñ edi Jehovah akanam edi mmem-mmem ọnọ mmọ ndinọ udeme mfri emi enyenede Enye, emi ekedi mbak ñkpọ kiet ke itie duop.
“Ndien ama edi ọyọhọ duop ke otu enañ, ye ke otu ñkpọ ñkpri ufene, se isuk ididi eke asañade ke idak esañ ebe, ọyọhọ duop edidi edisana ñkpọ Jehovah” (Leviticus 27:32).
Emi ekedi usuñ nte ekebọde ñkpọ kiet ke itie duop ke mme enañ mmọ: ekenam mme ufene emi esaña kiet-kiet ebe ke mfafaha inua-otop, ebiet emi owo adade ndinim idiọñọ ke kpukpru ọyọhọ enañ duop. Nte nnyin mfin emi imotim itiñ enyin ke ndisio ñkpọ kiet ke itie ñkpọ duop ke inyene nnyin nnọ Jehovah, edide enañ, ukwak unam utom, inyene, mme okuk?
Ñkop-uyo Edi Akpan Ñkpọ
Ndusuk owo ekere ete edinọ ñkpọ kiet ke itie duop ekedi edinam Akani Ediomi, edi nnyin imokut ukpep-ñkpọ emi ke Obufa Ediomi ñko. Jesus ama ọdọhọ mme scribe ye Pharisee ete ekpe ñkpọ kiet ke itie duop enyuñ enam ikpọ ñkpọ ibet, nte ikpe, nditua owo mbọm ye mbuọtidem (Matthew 23:23). Kpukpru mme ewuhọ Jesus edi akpan ñkpọ; edi ndusuk mmọ ekpon enyuñ edobi ekan mmọ eken. Ke abaña ndusuk ibet, Enye ọkọdọhọ ete, “Edi mbufo ekpenam mme ñkpọ emi,” ekọrọ ye mme ewuhọ eken emi mbufo mikpetreke ndinam.
Ido edikpe ọyọhọ mbak ñkpọ duop ọkọñọ ke ñkpọ duop ke itie ikie ke se owo enyenede, ekpededi okuk utit ọfiọñ, mme mbubehe emi adade udori ọsọk owo, se ñkpọ oro ekpededi. Enyene ndikpe ọyọhọ ubak duop ke okuk eke owo misioho ñkpọ ke esit kaña. Ñkpri nditọ ekpenyene ndikpep ndinọ Abasi ñkpọ kiet ke itie duop ke kpukpru okuk eke mmọ enyenede.
Akananam ntak-urua iduhe inọ owo emi anamde ñkpọ Abasi ke ofuri esit, udori inyuñ iduhe inọ owo emi anamde ñkpọ Abasi ke ubak esit. Edidiọñ esitiene nditọ Abasi ke edikpe ọyọhọ ubak duop. “Nte edi ewuhọ ami ndikpe ọyọhọ mbak duop mme ndinam nte mmade?” emi edi mbume emi esimade ndibup. Ikọ Abasi ọnọ ibọrọ:
“Nte owo okpotuk Abasi, koro mbufo etukde mi? Ndien mbufo edọhọ ete, Nnyin ikotuk fi ke nso? Ke ọyọhọ mbak ñkpọ duop ye ke edimenere uwa.
“Emeda isuñi esuñi mbufo: ndien mbufo ofuri idut emi eketuk mi.
“Mbufo eda kpukpru ọyọhọ mbak duop edisin ke ufọk unim-ñkpọ, man udia odu ke ufọk mi, ndien eda emi edomo mi, Jehovah mme udim ọdọhọ, mme ami ndiberekede window heaven nnọ mbufo, nnyuñ ññwaña nti ñkpọ nnọ mbufo tutu akaha” (Malachi 3:8-10).
Ntem nnyin imokut mi ite owo eke mikpehe ọyọhọ mbak duop edi inọ ye ñwo. Edi se idiọkde owo ndituk Abasi ke enọ ima esit, edi se idiọkde ikan edi nditre ndisio ọyọhọ mbak duop. Idighe okwo mme okim, edi “edi eke Jehovah” (Leviticus 27:30-32). Edieke oyomde ibio-ibio usuñ ndibọ mme edidiọñ nto Ata Edikoñ, da “Kpukpru ọyọhọ mbak duop edisin ke ufọk unim-ñkpọ.” Ekeme ndidi ke idighe ọyọhọ mbak duop ke okuk ikpọñ ke afo omum akama etre ndinọ Abasi, edi emetre ñko ndinọ Abasi ọyọhọ mbak duop ke ima, me utom edinyime esit, me ediyak idem me nda-mmana enọ. Tọñọ ndiduñọre uwem fo; ndien edieke edidiọñ Abasi miduhe ke uwem fo, ekeme ndidi afo ke otuk Abasi ke usuñ kiet mme eken. Edieke nnyin iyomde Abasi eberede ubet unim nti ñkpọ Esie, nnyin inyene ediberede eke nnyin ñko.
Ke Idaha Utom Ete Ufọk
Ke ukpep-ñkpọ edem, ima ikpep ibaña mme Levi emi ekesiode mmọ saña saña enim ndinam ñkpọ nnọ Abasi, oro edi ndiñwam mme oku, ndimen Ataya ye nditiene mbre nnyuñ ñkwọ ikwọ. (1 Chronicles 25:1; 15:16-22; 2 Chronicles 5:13). Kpa nte nti mme ọkwọrikọ me, mme ọbọk-erọñ mfin eyakde ofuri ini ndikwọrọ ikọ nnọ nditọ Abasi, mme mmọ emi ema eyak ini mmọ enọ utom Abasi. Kpasuk ntre mfin, utọ mme mmọ oro edot ufọk Abasi ekama mmọ. Paul, Owo-mbet ọkọdọhọ ete, “Nte mbufo ifiọkke ite mmọ emi enamde utom temple edadia se itode ke temple?... Kpa ntre ke Ọbọñ ebiere onim, ete mmọ emi ekwọrọde Gospel ekpeda se itode ke Gospel edu uwem” (1 Ñwed Corinth 9:13, 14). Ikpenyene esit ekọm adaña didie inọ nti mme ọkwọrọ ikọ, emi eyakde mme ñkpọ uwem emi etak mmọ man mmọ ese ñkpọ ebaña nditọ Abasi! Etiñ enọ nnyin ete, “Ekpono mmọ eti-eti ke ima ke abaña utom mmọ” (1 Ñwed Thessalonica 5:12, 13).
Mbet emi asañade ye eñwọñọ odu ke Mme Ñke 3:9, 10: “Kpono Jehovah ke inyene fo, ye ke akpa ubak kpukpru mbuñwum fo: Ndien ebiet-unim-ñkpọ fo eyeyọhọ kpak, obufa wine eyenyuñ ọyọhọ ke ebiet-udigi fo ọduọhọ.” Edieke nnyin inimde ewuhọ edikpe ọyọhọ mbak duop emi, idighe ediwak nti edidiọñ ke ikpọhidem ikpọñ ke nnyin idibọ, edi nnyin iyenim ñkpọ uto ke Heaven. Eda ọyọhọ mbak duop ekama ufọk Abasi ye utom Abasi. Edinọ ntem eyeñwam ndisuan ñwed etop Eti-mbuk eka ke ofuri ererimbot; eyenyuñ añwam mme anam utom Abasi ke mme idut ererimbot efen ndisuan Eti-mbuk ke ekebe utiñ-ikọ ye se ewetde ke ñwed ñkpọ-ntibe ye ke ndikama mme ubom isọñ eke Eti-mbuk ye eke mmọñ emi edade esaña esuan etop Eti-mbuk. Edieke idiande mbuọtidem, akam ye nyakidem ye enọ emi nnyin inọde, nnyin kpukpru iyeñwam ndida mme ukpọñ nnọ Christ, ndien utip nnyin eyekpon.
Mmọ emi etimde ekpere Abasi ifañake akpanikọ emi, me akpanikọ eken eke ekpepde ke Ikọ Abasi. Eneni ke abaña ñkpọ emi esiwak ndidaha nda ke ufọt mmọ oro mibọhọ erinyaña ukpọñ. Akananam Abasi iyakke owo eke enyenede eti udọñ ndifiọk akpanikọ odu ke ekim.
Etiñ mbuk ebaña ekpri akparawa kiet emi ekenyenede esisit inyene. Abasi ama anam enye ọfiọk akpanikọ emi odude ke ndisio ọyọhọ mbak duop, ndien enye ọdọhọ ete “Ọbọñ, ami nyenam.” Ndien owo efen edidọhọ enye ete: “Afo udukemeke ndinam oro. Emi ekedi akani edu edinam mme Jew, ndien mme anditiene-Christ mfin inyeneke udeme do.” Akparawa oro ọbọrọ ete, “Ami ñkere nte emi edi ñkpọ emi anade enam enọ Abasi, ndien ami nnyene ndinam se Enye etiñde.” Enye ama anam uduak Abasi, ndien Abasi ofori onyuñ okpono enye ke edinam esie.
Utom Abasi
Abasi ọdiọñ utom Apostolic Faith oto ke ido edinọ ọyọhọ mbak duop ye enọ ima esit, ndien akananam nnyin inyanke owo usan utañ-okuk ke iso mme ndisuan efọk ñwed nyom uñwam ke okuk. Odu ekpri ekebe ke edem Ufọk Abasi nnyin emi mme owo esinde ọyọhọ mbak duop ye enọ ima esit mmọ. Abasi ye mme andisin okuk emi ikpọñ efiọk se owo kiet kiet esinde ke ekebe emi. Kpukpru mmọ oro emanade obufa ke akpanikọ, emi esañade ke uñwana Eti-mbuk akpanikọ emi, enyime ndisọñọ nda ke ukpep-ñkpọ emi, enyuñ ebọ mme edidiọñ emi ekeñwọñọde. “Edieke mbufo efiọkde mme ñkpọ emi, ọfọfọn ọnọ mbufo ke mbufo enamde mmọ” (John 13:17).
Nte afo ama ọdọhọ “Ami ndikemeke ndikpe ọyọhọ mbak duop?” Ọfọn ndifiọk ete ke afo ukemeke ndisọñ ibuot ke mme ewuhọ Abasi. “Enọ, ndien eyenọ mbufo; eyedomo ọyọhọ udomo eke emiñde ọsuhọre, eke enyeñede, onyuñ ọyọhọde ọduọhọ,...” (Luke 6:38).
Questions
MME MBUME- Anie edi akpa owo emi Ñwed Abasi etiñde ñkpọ abaña edikpe ọyọhọ mbak duop?
- Nso ke etiñ ebaña mmọ oro etukde Abasi?
- Tiñ mbuk ebekpa emi ekesinde okuk iba ke itie unim ñkpọ.
- Nso ke Jesus eketiñ abaña enye?
- Nso ke nnyin ikpep ito edinam emi?
- Ekesida okuk ọyọhọ mbak duop enam nso ke eyo Nditọ Israel?
- Nte edi ewuhọ nnyin ndikpe ọyọhọ mbak duop?
- Nte odu ndusuk ewuhọ Abasi emi nnyin ikerede ite idige se ekpenimde?