Lesson 265 - Junior
Memory Verse
IKỌ IBUOT: “Ọfọfọn ọnọ mmọ eke esit mmọ asanade: koro mmọ eyekut Abasi” (Matthew 5:8).Notes
Mme Ufan
Jesus oyom mme anditiene Enye edi mbon emi ekopde inemesit. Ke ini Enye eketrede akpatre nneme Esie ye mme Apostle mbemiso edikọñ Enye ke eto, Enye ama ọdọhọ ete “Mma ntiñ mme ñkpọ emi nnọ mbufo, man idaresit Mi odu ke mbufo, idaresit mbufo onyuñ ọyọhọ” (John 15:11). Enye ọkọnọ mmọ ñkpọ eke edinamde mmọ eyọhọ ye idaresit.
Erinyaña nsio ke idiọk-ñkpọ ye ntọtuñọ ifiọk ñkpọ spirit, eda akamba idara esin ke uwem nnyin; edi nnyin isuk idi owo, ndien imoyom mme ufan ye mbre ndinam nnyin inemesit adaña emi idude mi ke isọñ.
Jesus ama okut nte ọfọnde ndinyene mme ufan ndien okonyuñ oyom ikọt Esie ekop inemesit ye kiet eken. Enye ama esibiat akamba ubak ini Esie ye mme owo, ibọhọke ke ini emi Enye ekesikade ndibọñ akam ikpọñ. Enye ama esima ndika ke ufọk Mary, Martha ye Lazarus man ekese mmọ. Ndusuk mme Pharisee emi ekeyomde ndikut ndudue nnọ Enye, ke unana ntak, ema ekot Enye, “owo udia ye ama mmin” (Luke 7:34), koro Enye ekesikopde inemesit ndika ñkadia ñkpọ ye mme ufan Esie ye mmọ oro Enye okodoride enyin ete ke eyekabade edi mme ufan Esie ke mmọ edifiọkde ibaña Enye.
Anditiene-Christ enyene nditim ndiọñọ mme utọ ufan emi enye emekde. Mmọ ekpenyene ndinam se inende man ekutap enye esin ke inemesit idiọk-ñkpọ. Andiwet Psalm ama ewet ete “Ami ndi nsaña kpukpru mmọ eke ebakde Fi” (Psalm 119:63). Abasi ama ọdọhọ ete, “Nte mbufo ifiọkke ite, eridi ufan ye ererimbot edi eridi usua ye Abasi? mmọdo owo ekededi eke oyomde ndidi ufan ye ererimbot anam idem usua ye Abasi” (James 4:4). Ntem ke nnyin ikut ufọn ke ndimek mme ufan ke otu mmọ oro emade Ọbọñ.
Mbre Ke Añwa
Ke emi nnyin ima ikenyene mme ufan, nso utọ mbre ke nnyin ikeme ndibuana, emi edinamde inemesit nnyin ebighi? Abasi ọnọ nnyin ndiye mbre añwa, man inyene inemesit. Ediwak nditọ esima ndinam isañ, ndidọk enyọñ obot, ndiwat ke enyọñ snow, ndiwọrọ ñkpọñ obio ñkodu ke ndobo ebiet, nditem udia ke ini mbre ke añwa, ndika utop, ndikọ iyak, ndiwọk ewọk, ye ndiwat enañ-ukwak.
Ndusuk nditọ ekop inemesit ndimum mme ọfọñ-ekpo ye ñkeñe unam eken, mme nditañ mme itiat. Ke ini ukwọ edim emi mmọ edude ke esit ufọk, mmọ ekeme ndibahade nnyuñ mbon ke uduot ke uduot se mmọ eketañde ke ini ndaeyo. Mmọ ekeme ndikut nto mme ñwed ata ndibe ido mme unam ye ñkpri unam ye ifiọk eke Abasi ọnọde mmọ ndidu uwem, mbọp ufọk, nnyuñ mman nditọ ke ata utibe usuñ. Ke mme ufọk uwut-ñkpọ editi, ñko (museum) mmọ ñko ekeme ndikut mme ñkpọ eke mmọ efen eketañde ebon emi ewutde ofuri ini uwem ñkpri unam oro eke Abasi anamde efiọk ñkpọ ntre.
Usio-ndise ekeme ndidi ata inem utom ke ini nduọk odudu, emi ekemede nditọñọ ye ekpri ñkpọ usio-ndise emi kpa ekpri eyen ekemede ndida nsio ndise ke añwa ke ini usen eyede. Ke akade iso enye ekeme ndikpep ndidu ke esit ufọk nsio mme ndise emi eyede ekan. Ke ediwak mbubreyo, enye ekeme ndikop inemesit ke ndiwut mme ufan esie ndise emi.
Imenyene item mi ndinọ. Ti ete nnyin inyene ndinim Abasi ke akpa; ndien nnyin iyetim ikop inemesit ke se inamde ndinem idem esit edieke ibemde iso idu edisana uwem, inyuñ inyenede nneme ke ini ke ini ye Abasi. Enye eyekpep nnyin mbufa ñkpọ ye se idemerede esit nnyin ke ikpepde Ikọ Esie.
Ikwọ
Ikwọ anam ediwak mkparawa ekop inem uwem. Ndusuk etọñọ ukpep-ñkpọ ikwọ mbemiso edika ufọk ñwed. Ke ufọk ñwed mmọ etọñọ ndibre ke otu mbon ikwọ. Emi ọnọ mmọ ifet nditim nnyene ebuana ye nditọ eñwen emi emade se mmọ ñko emade. Ndien mmọ ekeme ndida ifiọk mmọ nsin ke edikpono Abasi ñko, emi anamde inemesit mmọ otim okpon. Adaña nte ifiọk mbre ikwọ okponde, enye eyekop inemesit ke ndikpañ utọñ nnọ nsio-nsio oruk ikwọ nta-ikwọ owo kiet ye mme ikwọ emi ekwọde ke otu.
Mkparawa ekeme ndisin idem eti-eti ke nditañ mme usan ikwọ nta mbon ikwọ nnim nnyene. Ndien ke ndida emi mbuọt kiet eken mmọ eyekop inemesit ekan nte ekpedepdedep. Ndusuk mme itie ukot ñwed ke idut nnyin ñko enyene mme nti usan ikwọ ndinọ ke ebuọt.
Edi idighe kpukpru ikwọ efọn. Ntak edibre band ye unek edi man edemede idiọk udọñ ke esit mmọ emi ekopde. Mme ñkukwak eke ebrede ekeme ndidemere idiọk udọñ ye mme idiọk-ñkpọ efen emi esuade eke owo mikpemaha. Men utọñ fo fep ke se ikpewọñọde ekikere fo ikpọñ edisana uwem.
Unana Uwem Ibuk
Ke ebede mbre, mme ñkpọ eñwen edu emi ekemede ndinọ nnyin inemesit. Man itim ikop inemesit ke ñkpọ ekededi, nnyin inyene ndifọn ido, inyuñ ikere ibaña inemesit mmọ efen ke se nnyin inamde. Ke ini Jesus eketiñde abaña nnyin nte mme ufan Esie, Enye ama ọdọhọ ete, “Baba owo kiet inyeneke ima eke okponde akan enye emi, owo ndikpayak uwem esie nduọk, kabaña mme ufan esie” (John 15:13). Enye ama ayarade owut ete ke imotim ima nnyin. Enye ọkọsuhọre edi ndinim Obio Ubọñ Esie ke esit mme owo, ndien awa Idem Esie ndifak nnyin. Ekedi ñkpọ inemesit ọnọ Enye ndinam uduak Ete Esie, ndien nnyin ñko iyenyene idara ke inamde uduak Abasi.
Ke ini mme owo ekebiatde ini mmọ ndikọ inyene ye ifiọk ñwed, me inemesit uwem emi, Jesus akayak ofuri odudu Esie ndikpep mme owo ke abaña ima Esie ye kpukpru owo. Enye ekesikọk mme owo udọñọ, etiñ ikọ ndọñesit ndimenere esit mme ubuene nnyuñ nnam mmọ efiọk ete ke itie ukpono odu ọnọ mmọ ke ererimbot. Ke edinam ntem, Enye ama anam ediwak owo ekop inemesit, mfọnido Esie ye owo ada ima eke okponde akan ọnọ kpukpru mme emana emi etienede.
Mme asuan-etop Abasi emi enyenede ndibe ke ukut mmen Eti-mbuk nsọk idut mme okpono ndem edi se ekpetuade mmọ mbọm ke abaña ñwa-idem mmọ. Edi idaresit eke mmọ enyenede ke utom ofuri esit mmọ anam mmọ ekop inemesit ke ini owo ama akabare edi enye emi Abasi osiode ọdọñ utom usuan etop Abasi, enye ikemeke ndifiak edem ke utom Ọbọñ. Etim ekut idaresit esie ke afañ ikwọ emi: “Ndikut owo emi Abasi anyañade asakde imam owut ete ke kpukpru nsin ifik oro ama odot.”
Ñwọrọ-Nda Ñkpọ Inemesit
Ata Anditiene-Christ emi okopde inemesit ke ntọtuñọ ebuana esie ye Christ, ekere ñkpọ ke usuñ emi, “Nyom ndidu uwem nnọ Abasi ye mmọ eñwen, idighe idem mi. Nyom kpukpru owo ke ererimbot ekut Jesus ke uwem mi.” Owo eke enyenede utọ ekikere ntre idinyeneke mfina ke ndifiọk se Abasi etiñde abaña mme ñwọñọ nda mbre inemesit ererimbot emi. Enye eyekut nte inemesit uwem emi edide ikpikpu ke edade edomo ye se enye ekemede ndinam nnọ Ọbọñ.
Ikọ Abasi ekpep ete: “Ekuma ererimbot, ye se idude ke ererimbot. Edieke owo ekededi amade ererimbot, ima Ete iduhe enye ke esit. Koro ofuri-ofuri se idude ke ererimbot, mbumek obukidem, ye mbumek enyin, ye ikpikpu ubọñ uwem emi, itoho Ete, edi oto ke ererimbot. Ndien ererimbot ke ebebe efep, ye mbumek esie; edi owo eke anamde se Abasi amade ododu ke nsinsi” (1 John 2:15-17).
Efe Mbre
Ndusuk owo ebup ete, “Nso idiọk idu do ke ndika efe mbre?” Tie kere baña mme ekikere, ye mme udọñ emi edemerede ke esit ke ntak mme utọ mbre inemesit emi. Afo eyekut abiaña-abaña usuñ uwem nte ewutde ke ndise emi. Mmọ emi edude uwem nte ekutde ke ndise oro ikopke inemesit nte mmọ ewutde ke edinam mmọ. Mmọ edu uwem nte Satan oyomde mmọ edu, ndiyuhọ udọñ obukidem, ndien utip idiọk-ñkpọ edi mkpa.
Ediwak okuk, ndiye ọfọñ, nsọñ-urua iduñ ye mme moto idighe akpan ñkpọ ke abaña uwem. Ke okotde mme mbuk emi owo ewetde enim, owo eyekere ete ke okuk ekedi oruñ kpukpru inemesit. Ndien mmọ emi enyenede ubọk ke edinam ndise emi, ewut kpukpru idiọk-ñkpọ mmọ añwa-añwa. Edidọ uwak iban ye uwak ebe ye edidiañare ke ndọ, edi se edade ke ñkpọ inemesit. Iduọ esit ye mfuhọ emi edibiat ibet Abasi edade edi, ye ufen unana ukpeme emi nditọwọñ ebọde, owo itiñke-tiñ ibaña, edi fiọk ete ke emi edi se itibede ye mme mmọ emi edude utọ uwem oro. Jesus ete, “Etiñ enyin ekpeme se mbufo ekopde” (Mark 4:24). Enye ama ọfiọk ete ke ediwak mme idiọk-ñkpọ emi edomode ndiduri ekikere nnyin nsio ke Ikọ Esie eyedu, ndien edieke nnyin mikpemeke, nnyin imekeme ndiwaha ñkpọñ usuñ oto ke mme ñkpọ emi ikopde inyuñ ikutde, emi satan onimde nte afia ndiduri nnyin nsin ke iyire esie.
Ñwed eke nnyin ikotde ekpenyene ndidi se idotde. Ndusuk mme babru ñkpọ-ntibe ye mme ñwed mbuk idighe se ifọnde. Mmọ enam nditọwọñ ye mkparawa ekere enyuñ enam idiọk. Jesus ama etiñ ini kiet ye mme Anditiene Enye: “Ọfọfọn ọnọ enyin mbufo, koro mmọ ekutde ñkpọ; onyuñ ọfọfọn ọnọ utọñ mbufo, koro mmọ ekopde ikọ” (Matthew 13:16). Mmọ ekekop enyuñ ekut se ibañade Abasi emi edinọde mmọ nsinsi uwem. Enyin ye utọñ enyene ndina iñwañ onyuñ asana man ikeme ndibọ nsin ke esit-esit idem nnyin mme ñkpọ emi edinamde nnyin ibeñe idem inọ Heaven.
Mmọ Eke Esit Asanade
Jesus ete, “Ọfọfọn ọnọ mmọ eke esit mmọ asanade: koro mmọ eyekut Abasi” (Matthew 5:8). Mmọ eke esit asanade ikopke inemesit ke mbubru emi midotke, inyuñ idomoke ndisine ñkpọ ke usuñ eke ekenamde mme owo ewuk enyin ese mmọ. Ndusuk ñkaiferi ekeme ndisine ñkpọ ke usuñ eke ọfọnde, edi ido mmọ, ikpat isañ mmọ, me nte mmọ etiede eyewut mme idiọk udọñ mmọ. Utọ edu uwem oro itoho ke esit emi asanade. Paul ọnọ item: “Fehe kpọñ mme idiọk itọñ ini uyen, nyuñ tiene mmọ eke esemede ekot Ọbọñ ke edisana esit, bine edinen ido, ye mbuọtidem, ye ima ye emem” (2 Ñwed Timothy 2:22).
Ndusuk ndise emi mme ete ye eka esiwutde ke ekebe ndise ke ufọk mmọ ekeme nditie nte efọn edi mmọ ekpena ekere ebaña mme nso utọ udọñ ke ndise emi edidemere ke idem nditọ mmọ. Nte eyesin akamba udọñ ke esit mmọ ndidu edisana uwem nnyuñ nnam utom Ọbọñ, me edida udọñ ke abaña mme ñkpọ emi mbon ererimbot enamde idi? Ekebe ndise ke ada mme nsio-nsio ndise oduk ke mme ufọk, ndien andidiọk ke ada ọkpọsọñ ñkpọ utom emi oduri mme ekikere mkparawa esin ke mme inemesit idiọk-ñkpọ. Nditọwọñ esikop inem ke se mmọ ekutde ke ekebe ndise, ke nditim ntiñ, ekpri eti ñkpọ emi ekpebọde eto do idighe se edade edomo ye idiọk emi mmọ ebọde esin ke idem.
Mme Mbre
Kpukpru owo ema ndibre mbre ndien nnyin imekeme ndikpep ndinam utom ke esit kiet ye eti edu-uwem edieke ibrede ke nnen-nnen usuñ. Edi nnyin inyene ndikpeme se ibrede. Edieke nnyin mikpemeke satan ebeñe idem ndibiat nnyin nnyuñ ntun nnyin usuñ ke se itiede nte inemesit eke ọfọnde.
Ukpuhọre odu ke mbre nsa-okuk ye mbre emi edade mbufiọk ebre. Edi ke mme mbre nsa-okuk, oro edi, mbre card ye mbre bingo ke mbre ñwo amana oto. Ndien idiọk mbre emi ama oduk owo idem, etie nte iduhe baba ñkpọ kiet eke ekemede ndibiat mbre emi ke idem owo ibọhọke Abasi. Ndusuk ini enye ada owo okosim ke idiọk itie eke enye ọbọde ufen onyuñ odude ke unana oto ke mbre ñwo emi. Ndisin ekpri penny ke ndudu ekebe ekeme nditie nte idiọkke, edi ediwak okuk ekeme nditak ke ini edibre mbre akabarede edi ido. Ibighike owo okut idem esie nte ebrede ye okuk eke awakde eti-eti.
Mme mbre mbufiọk enyene uduot efen. Owo enyene ndikpekpep man anam ọfọn, ndien idighe ñkpọ mfọniso. Edi ke ini utọ mbre oro ema enehere ekpon enyuñ ewọrọ etop, nnyin ikut mbiara, utuk, abiaña, ye usua emi edinamde mbre emi mifọnke ye mmọ emi emade akpanikọ ye edisana ido.
Ndinam Eti-mbuk Eye
Edieke nnyin ikpọfiọkde nte ukpọñ owo edide akpan ñkpọ, ye utom nnyin nditiñ mbaña Jesus nnọ ukpọñ oro, mme inemesit ererimbot emi ikpọdọñke nnyin ke baba usuñ ndomokiet. Idem mme ñkpọ emi ekpetiede nte ke idiọk iduhe ke mmọ eyekabare edi ñkpọ ubiat ini. Nnyin ikpebre mbre emi anamde nnyin ikop nsọñ idem ikpọñ, inamke ibe oro. Ti ke nnyin inyene ndinam ibat ke iso Abasi ke abaña nte nnyin ikebiatde ini nnyin. Ọbọñ ke ese kpukpru ñkpọ eke nnyin inamde. Nnyin idi ñkpọ uto ke enyin Esie. “Ekedep mbufo ke ekọm-urua; mmọdo enọ Abasi ubọñ ke ikpọhidem mbufo” (1 Ñwed Corinth 6:20).
Ediwak owo ke ererimbot ikotke Ñwed Abasi. Mmọ ke ese eren owo me ñwan, akparawa eren me añwan emi ọdọhọde ete ke idi anditiene-Christ. Nte afo edi enye emi ọnọde Eti-mbuk Jesus Christ uyai? Nte owo eke esede fi ekeme ndikop inem oto ke edisana ido ye kpukpru edu edinam fo? Mme nte afo odomo ndibuaha idem ye ererimbot nnyuñ nnam nte mmọ enamde, man ekukut ukpuhọre ke afo? “Ekunyuñ ekabare ebiet eyo emi, edi eyak mbufo ekpuhọre, oto ke erinam emi enamde esit mbufo edi obufa, man mbufo edomo efiọk se uduak Abasi edide, uduak Abasi eke edide eti, onyuñ enemde owo esit, onyuñ ọfọnde ama” (Ñwed Mbon Rome 12:2).
Edieke esit nnyin ọkọñọde ke ndika Heaven nte ebiet iduñ nnyin, nnyin ididaha idem ikọkọmọ ke mme inemesit ererimbot. Nnyin iyesin ifik eti-eti ndinam idem nnyin asana man oto do idi Ñwan-ndọ Christ.
Questions
MME MBUME- Nso utọ ufan ke owo Abasi enyene ndimek?
- Nso utọ mbre inemesit ke afo esima? Nso idi ntak?
- Ima eke Jesus amade nnyin okpon didie?
- Nnyin ikpenyene ndima kiet eken didie?
- Nso idi akamba inemesit emi andisuan Eti-mbuk enyenede?
- Anie edikut Abasi iso?
- Nso ke Ñwed Abasi etiñ abaña ima okuk?
- Nte mme idiọk owo ekut ete ke afo edi anditiene-Christ oto ke usuñ nte afo odude uwem?