Lesson 266 - Junior
Memory Verse
IKỌ IBUOT: “Koro ofuri-ofuri se idude ke ererimbot, mbumek obukidem, ye mbumek enyin, ye ikpikpu ubọñ uwem emi, itoho Ete, edi oto ke ererimbot” (1 John 2:16).Notes
“Eyeda Mfri Mmọ”
“Kpukpru eti eto eñwum eti mfri; edi mbiara eto oñwum idiọk mfri.” (Matthew 7:17). Ererimbot eyom ndikut Jesus ke uwem mmọ emi etienede Enye. Ke ediwak idaha owo okut Jesus ebe ke owo emi ema ekenyaña ukpọñ esie; edieke emi edide akpanikọ, edi ata akpan ñkpọ ọnọ owo kiet kiet emi edide Anditiene-Christ ndikut nte imoñwum eti mfri.
Mfin emi eneñere etiñ ñkpọ etuk ifiọk ñwed, ñkọri ke ikpọhidem, ke ekikere, ke ubom-idaha ye uku. Mkparawa iban ye iren emi emade ido edisine ñkpọ ererimbot emi esisọp ndinyene itie ke mme edinam ufọk ñwed ye eke ererimbot. Edi anditiene-Christ ama owo emi otimde anam ekikere abaña ufọk eke spirit, onyuñ ọbọkde ukpọñ esie kpukpru usen ke Uyo emi otode Heaven. Edi akpanikọ, Ọbọñ ñko ese ke inemesit owo emi ema ekeyet esit esie ke Iyip Eyen Erọñ, emi ñkpọ mbanidem esie midighe eke enyọñ-enyọñ idem, edi, edi eke “esit-esit uwem.” Edi mmọ emi ekpọnọrede kpukpru ñkpọ eke ekpesinde ubahare ke ufọt mmọ ye Christ enim, edinyene edidiọñ Esie ke uwem mmọ.
Idomo
Satan odomo nnyin ebe ke ekikere ye enyin. Nnyin ikemeke ndibiọñọ idomo ndidi kpa nte nnyin mikemeke ndikpan mme inuen ndife mbe ke ibuot nnyin; edi nte owo kiet ọkọdọhọde, “Ami mmekeme ndibiọñọ mmọ ndibọp mme efọk ke idet mi.” Idomo eyedi ndiñwana man ọwọñọre fi ọkpọñ se ọfiọkde ete edi nnen-nnen. Ndusuk owo eyenam etie nte enyime mmọ enam mme ñkpọ emi afo ama ọkọfiọk ete ifọnke anditiene-Christ ndinam. Satan eyedọhọ ete, “Edieke owo emi mme eken esinede ata ibio ubọk ọfọñ, ntak emi afo musineke?” Edi ti ete, edieke afo ebietde ererimbot ke ekpri mi ye ekpri ko, idibighike eyekabare anam nte ererimbot enamde ñkpọ. Ke nditre ndinam mme item Satan afo eyekeme ndikan. Nte asañade oyom usuñ ọkpọñ edu unam ñkpọ ererimbot, ntre ke ọfọn ye afo. Ididomoke fi okpon akan nte ekemede ndiyọ.
Ema ebup ekpri eyen añwan ini kiet se enye akpanamde edieke idomo ọkọñde ke enyin usuñ esie. Enye ete, “Ih, mkpayak Jesus ọbọrọ ikot oro”.
Andidiọk ọfiọk nte odomode mkparawa ebe ke usuñ ntañidem. Enye enyeñe ekpri ñkpọ asian ke enyin mmọ, ndien ete, “Nyenọ fi emi edieke edituakde ibuot ọnọ mi. Nyenam fi ebiet emi edieke edinamde nte ndọhọde.” Ndusuk ñkaiferi eduọ ke idomo ke abaña ndat-ndat ndom eyetde ke mfuk, mme ñkpọ utuk mkpọk-inua. Ukut-ukut ye mbubiam ntañidem edi ñkpọ iduọ ọnọ ediwak ñkaiferi mfin emi. Ndusuk ñkaiferi emi eketọñọde edọñ ke ñkpọ-itie eseme ema ewọrọ ekpọñ ufọk Abasi inyuñ ibọhọ mme utibe enọ Esie, koro mmọ imaha ndikpọñ mme ido ererimbot nte edinam idet, ibio ekura, mme ọfọñidem eke minyeneke ubọk, ndat-ndat ndom eyetde ke mfuk, me ñkpọ utuk mkpọk-inua. Se ekpri ñkpọ eke esinde mmọ enyam ukpọñ mmọ enọ asua ukpọñ mmọ. Okuo etie didie? Nte ekikere ndidi “ọwọrọ etop ñkaiferi,” mme “ọkpọsọñ akparawa” enem fi akan idorenyin ndidi ata andikan?
Ekọm Abasi, koro ndusuk edu ke otu mme ata ñkpri ñkaiferi emi esinde ndiwọrọ etop ke otu mme idiọk owo (edieke ikemede ndikot oro ñwa-idem) man esuhọre etie ke ukot krọs enyuñ ebọ Gospel Christ esin ke esit mmọ.
Uwut-ñkpọ añwan emi ekeyetde ñkpọ ke iso esie odu ke Ñwed Abasi (Kot 2 Ndidem 9:30). Idighe owo efen ke ebede Jezebel, ata idiọk añwan emi akakpade enyene-ndik mkpa. Ke akpanikọ owo ikobukke enye koro edi mme ebua eketa okpo esie. Ke akpan, mbuk uwem esie akpanam owo asua ido nditiene idiọk uwut-ñkpọ ke abaña ediyet ñkpọ ke iso. Edieke anade nte etiene uwut-ñkpọ, tiene eti esie, ndien Ñwed Abasi ọnọ ediwak uwut-ñkpọ, ñko mme odu-uwem ikọ ntiense edu ke Ufọk Abasi Ikpan eto mmọ emi esinde kpukpru oruk idiọk-ñkpọ.
Ndibiet Ererimbot
Edieke nditọwọñ ye mkparawa ke ufọk, itie utom mme ke añwa mbre ediyakde eti usuñ edisine ñkpọ akara mmọ, mmọ eyedu ke idaha ndimenere Eti-mbuk enyuñ ekut unen ke iso Abasi ke abaña uwem mmọ. Ata Anditiene-Christ ana nte ọnọ Abasi ubọñ ke ikpọhidem, ye ke spirit, emi enyenede Abasi (I Ñwed Corinth 6:20).
Ñke emi edi akpanikọ didie: “Ikọ kiet ekem enyene ibuot owo”! Mme mmọ emi eyomde nti ñkpọ emi Abasi enyenede ọnọ mmọ, ke ewutde mmọ usuñ edisine ñkpọ ye unam idet, esidọhọ ete, “Madara koro eketiñde enọ mi”. Mme mmọ eken eke esañade ekpere edu uwem eke ererimbot, tutu mmọ etre ndinyene mfefere esit ke abaña ñkpọ ererimbot, mmọ imaha ndisọp nyak ñkpri ñkpọ emi midoroke udori ebe mmọ. Ke ini mbre nsọñidem ke ufọk ñwed ye ke mbre ke esit ebiet, eyak nditọwọñ esine ọfọñ mme enyuñ esioño ọfọñ ke usuñ nte eduọkde idaha ye eti edu ukama idem oto ke ntak uwebe eyo man enyene ekpri vitamin D. Ọfọñ uyere mmọñ eke mifukke owo idem ye mfefere ọfọñ ewọk idighe se ñkaiferi mme ñwan emi edide Anditiene-Christ ekpesinede. Mme mfefere edisine ñkpọ ke ini eyo idotke ñko. Mme ọfọñ emi ebọpde enyuñ edianare owo ke idem ekaha enyuñ ekpọhọrede itọñ isañake ikekem ke uteñe Abasi.
Mme Ñkpọ Iren-owo Emi Iban Esinede
“Ñwan okusine ñkpọ eren-owo ke idem, eren-owo okunyuñ esine ọfọñ-idem añwan ke idem: koro Jehovah Abasi fo esede kpukpru mmọ eke enamde ntem ke ñkpọ mbubiam” (Deuteronomy 22:5).
Ke ntre, ke abaña eti usuñ edikama idem, ọfọñ ukot ye kpukpru mme ọfọñ emi ekimde nte ọfọñ iren-owo idotke iban ndisine. Idighe koro Ikọ Abasi akpande mmọ ikpọñ, edi mmọ idotke ye iban. Nditọwọñ emi eyakde mmọ esine mme ñkpọ iren-owo emi, eyenyene inem ebaña enyuñ eka iso ndisine ke mmọ ekponde ewọrọ owo. Mfin ediwak mme eka eyo emi isineke ọfọñ eñwen ibọhọke mme utọ ọfọñ oro ke ini mmọ enamde utom ke ufọk.
Ndusuk ini ekeme ndiyom mme ñkaiferi emi edude ke ñka band ufọk ñwed esine ọfọñ ukot. Ntak iduhe owo Abasi ndikpanam emi. Edieke enye etiñde ñkpọ emi ye andida usuñ ke ñka band oro mme ye akamba etubom ufọk ñwed, enye eyenyime enye esine ọfọñ añwan utu ke ọfọñ-ukot. Edi edieke minyimeke ọkpọfọn enye ọwọrọ ke ñka band oro. Abasi eyekpono mmọ oro enyenede spirit ke idem mmọ eke edidọhọde, “Abasi nnyin emi nnyin inamde ñkpọ esie emekeme ndinyaña nnyin... Ndien midige ntre,’ nnyin ikwe nte inamde ñkpọ inọ abasi ererimbot emi” (Daniel 3:17, 18).
Ndusuk ñkaferi ye ikpọ iban efaña ete ke ndisine ndusuk ọfọñ eke ekimde nte ọfọñ iren-owo iwọrọke ite ke edi ọfọñ iren-owo. Ke ntre, sia ekimde enye nte ọfọñ iren-owo, odot ndikpọñ nnyuñ ntre ndisine.
Ñkpọ Mbana-Idem Ye Nte Enamde Idet
Esibup ediwak mbume ebaña edikọñọ ñkpọ, ye nte ñkaiferi ye ikpọ iban ekpenamde idet. Eyak nnyin ika ke Ñwed Abasi ikese mme ñwọrọ-nda item ifañ ke abaña mme ñkpọ emi.
“Nte kpa idem ibuot mbufo ikpepke mbufo ite edi ñkpọ but ọnọ eren-owo ndinyene anyan idet?
“Edi edieke ñwan enyenede anyan idet, edi ubọñ ọnọ enye” (2 Ñwed Corinth 11:14, 15).
“Ekubana idem enyọñ-enyọñ ke eridọk idet, ye erikọñọ ñkpọ mbana gold, ye edisine ediye ọfọñ idem;
“Edi eda edisine-ñkpọ eke midibiarake, kpa suñ-suñ spirit eke enyenede iso but, ebana idem ke esit-esit uwem mbufo; koro oro edi se isọñde urua ke enyin Abasi” (1 Peter 3:3, 4).
“Kpasuk ntre ñko nyom iban esaña ke suñ-suñ ido, esine ñkpọ eke owutde but ye eti ibuot: mmọ ekubana idem ke edidọk idet, ye gold ye pearl ye ọsọñ-urua edisine-ñkpọ” (1 Ñwed Timothy 2:9).
Mi, nnyin itim ikut ite ke iban ye ñkaiferi emi ewakde ke isua emana ndifat idet nte ererimbot idotke ye idaha Ikọ Abasi. Se inende ke enyin Abasi edi ekpri ini ndida ke iso ukut-iso, anyan ini ndikot Ñwed Abasi ye ndibọñ akam, ndisine “suñ-suñ spirit eke enyenede iso but, koro oro edi se isọñde urua ke enyin Abasi.” Edi eti ini ndien nte mkparawa emi etienede Christ ekpeñwanade ye idiọk ido editiene ererimbot ke edu edisine ñkpọ eyo emi.
Afo ọdọhọ ete, “Ñkemeke ndikpe ekọm-urua.” Se afo ọdọhọde ọwọrọ didie? Afo ekere ete ke ekpri ediyet ñkpọ ke mkpọk-inua me ke mbara me erikọñọ ñkpọ itọñ odoro fi akan nsinsi uwem? Me ekpri mkpanuen gold odoro fi akan idorenyin ndisim Obio emi ebọpde ke gold ye ndisaña ke efak gold?
Ndusuk emekeme ndibup fi mbaña edisine mkpanuen ndọ. Edi ñkpọ eke ọfọnde mkparawa iban ye iren ndifiọk ibọrọ mbume emi. Okposuk edi edide idiọñọ edidọ ndọ, edi esuk esin enye ke ñkpọ mbana gold. Edieke eyakde esine mkpanuen ndọ, ana nte enyuñ esine mkpanuen ndiwut enye eke oyomde ndidọ ndọ. Emi esidi ọsọñ-urua ñkpọ mbanidem, ndien edisine “ñkpọ gold ye pearl ye ọsọñ-urua edisine-ñkpọ” edi se ekpande. (Kot 1 Ñwed Timothy 2:9). Edieke Anditiene-Christ ekemede ndisine utọ mkpanuen kiet, eñwen inyuñ idiọkke, ndien ke ini esisit mme mmọ emi ekemede ndidep nsọñ-urua mkpanuen eyeduọ eduk ke edibana idem ke usuñ eke midotke ye nditọ Abasi.
Edi nnyin ibiọñọke ndida gold nnam edet ye mme ñkpọ eken eke mifọnke ndida oruk ñkpọ efen nnam, adaña midighe ke ntak ndida mbana idem.
Edisabare Itie-Ukpono Abasi
Ndusuk mkparawa eda idem mmọ nte mme ọfiọk-ñkpọ ke mmọ ekpide mme idiọñọ ke idem mmọ. Mme mmọ emi ekade ñkpọ ke mmọñ enyuñ edude uwem idiọk-ñkpọ, esinyene mme utọ idiọñọ emi ke ubọk ye ikpanesit mmọ; ndien mme mkparawa emi eyomde ekut mmọ nte “mkpọsọñ” esima enim mmọ mme idiọk idiọño emi ke idem. Edi Ikọ Abasi ọbiọñọ emi, koro nnyin ikotde ite: “Ekunyuñ ekpi obuk-idem mbufo... ekunyuñ ewet ñwed ke idem mbufo” (Leviticus 19:28). Mme mmọ eke enamde oruk ñkpọ emi esabare idem mmọ eke edide Temple odu-uwem Abasi; ndien Ikọ ọdọhọ ete, “Edieke owo owuride temple Abasi, Abasi eyesobo owo oro.” Emi ekeme ndidi kiet ke otu “mme idiọk itọñ ini uyen” emi Ñwed Abasi etiñde abaña, ndien edọhọ nnyin “ifehe ibọhọ” mme ñkpọ emi, ke ikọ efen, fehe kpọñ mmọ, daha kpọñ mmọ nnyuñ “bine edinen ido, ye mbuọtidem ye ima ye emem.” (Kot 2 Timothy 2:22).
Ke mme idut efen, mme andiduñ esinam ata ọkpọsọñ ibak ye ikpọhidem mmọ. Ndusuk esinyene akamba mkpanuen ke ibuo ye utọñ, ndusuk ebiomo ukot mmọ ndo; ndusuk eken, ye akwa ubiak, enuak ibuot ñkpri nditọ emi emanade mbufa man enam mmọ enyene ibuot emi miyehe minyuñ ibietke owo. Mme utọ ñkpọ oro ayat Abasi esit adaña didie!
Iseri
Ke Ñwed Abasi mme ñkpọ itiaba edu eke Abasi asuade, nte ọmọfiọk enye emi edide akpa? “Ñkohore-idem.” Edieke oyomde ndifiọk se Abasi ekerede abaña ntañidem, kot mme itie eñwen ke Ñwed Abasi. (Kot Mme Ñke 6:16-19; 8:13; 16:18; ye 29:23). Kot ñko baña akwa andikara, Nebuchadnezzar, emi Abasi ọkọsuhọrede enye tutu enye asaña ke ubọk ye edọñ onyuñ ata mbiet nte enañ. Ke ini Abasi ke mbọm Esie ọkọtọñọde ntak ọnọ andikara emi ifiọk esie, enye ete, “Enye emekeme ndisuhọre mmọ eke esañade ke iseri.” (Daniel 4:37). Esiak mme enyene-ndik idiọk-ñkpọ duopeta ke Gospel nte Mark ewetde, kiet edi uwot owo, efen edi ntañidem (Mark 7:21, 22). “Kpukpru mme idiọk-ñkpọ emi eto owo ke esit ewọñọ, enyuñ esabare owo.”
Isaiah, anditiñ-ntiñ-nnim ikọ ama ewet abaña ubierikpe Abasi ke abaña nditọ iban Judah emi eketañde idem. Enye etiñ abaña ibọ ke itie ediye ukot idet ye ikpọk ke ibuot mmọ. Enye ete ke Imọ iyebọ mmọ ñkpọ mbanidem ye ukpuhọ ewura, ndien ke itie inem utebe, uñwak eyedu (Isaiah 3:16-24).
Mme ido, edinam ye edu eke ererimbot ke ebebe usọp-usọp, edi oro iwọrọke ite ke Anditiene-Christ ana ayak idem esie ọnọ utom andidiọk onyuñ anam nte mmọ eken enamde. Mme ñkaiferi ye ikpọ iban emi efatde idet mmọ, esibede ubọk ọfọñ mmọ, ekọrọde itọñ ọfọñ mmọ, esibe ebuana mmọ efep ke Heaven.
Ke Ini Jesus Edidide
Eti item nditiene edi: “kunam ñkpọ kiet eke ededi eke afo muduyomke ekut fi nte anamde ke ini Jesus edidide.” Enye ke ese nte nnyin isañade ye Enye; ndien mmọ eke ebietde ererimbot, obukidem ye andidiọk eyekut idem mmọ ke afia Satan ke ini Jesus edidide nditañ Ñwan Ndọ Esie emi eketiede ebet Enye. Abasi akpakam emenere esit nnyin, onyuñ anam idemere man “ekunyuñ ekabare ebiet eyo emi: edi... ekpuhọre” (Ñwed Mbon Rome 12:2) man ke ini Jesus edidide nnyin ikpodu ke otu mmọ eke ekpuhọrede mmọ enyuñ edọkde ekesobo ye Enye ke ofum. “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.” (1 John 2:17).
Questions
MME MBUME- Tiñ baña mme ubierikpe emi ekenọde “nditọ iban Zion.”
- Nso utọ eribana idem edi se inende ke enyin Abasi?
- Nso idi kiet ke ñkpọ mbana idem emi edọhọde nnyin isine?
- Nso iditibe ye mmọ emi esabarede ikpọhidem mmọ?
- Didie ke nnyin ikeme ndikan idomo?
- Nso ke Abasi ekere abaña ñkohoridem?
- Nso idi mbet emi enọde iban ke abaña edisine ñkpọ iren-owo?
- Nte Ñwed Abasi ọbiọñọ edisine ñkpọ mbana idem?
- Nso ke Ñwed Abasi etiñ abaña edifat idet?
- Mme anie edidi Ñwan Ndọ Christ?