Lesson 273 - Junior
Memory Verse
IKỌ IBUOT: “Biom ukut nte eti owo-ekọñ Christ Jesus” (2 Ñwed Timothy 2:3).Notes
Nti Mbon Ekọñ Ye Ñkpọ Ekọñ Mmọ
Apostle Paul ama emen uwem nditọ Abasi odomo ye eke mbon-ekọñ, me ekọñ. Odudu idiọk-ñkpọ okpon eti eti ke ererimbot, ndien Abasi oyom ikọt Esie edi mme ọsọñ odudu ye mme ọsọñ esit ke ndiñwana nkan enye. Enye oyom nditọ esie edi nti mbon-ekọñ.
Ọbọñ ọnọ nnyin ñkpọ-ekọñ man añwam nnyin ndiñwana ñkan asua. Paul ama ọdọhọ ete: “Eda ofuri ñkpọ-ekọñ Abasi, man mbufo edikeme ndisọñọ nda ke usen idiọk, enyuñ esọñọ eda ke ema ekenam kpukpru ñkpọ” (Ñwed Mbon Ephesus 6:13). Owo ekọñ ke uduot esie ke ekọñ esine ọfọñ eke ekemde ye ufiop mme tuep ke ebiet eke enye odude ndiñwana; enọ enye ikañ ye mme ọtọmbe-ubọk ndida mkpeme idem esie, itam ukwak ke ñkpọ mkpeme idem, ñkpọ mmọñ ye eke udia ndida ññwọñ mmọñ nnyuñ ndia udia ke ini ekọñ akade iso; ndien enọ enye aka okosobo ye asua.
Ñkpọ-ekọñ anditiene-Christ edi se owo mmikemeke ndikut, edi afo emekeme ndifiọk ete ke enye enyene enye etiene nte enye odude uwem. Spirit Abasi, akpanikọ, edinen ido, ye erinyaña ukpọñ edi ndusuk ñkpọ-ekọñ esie.
Paul akada enye odomo ye owo ekọñ eyo oko emi akamade ofut ye otu-ekọñ. Enye ama etiñ ete ke mbuọtidem edi otu-ekọñ nnyin, Spirit Abasi edi ofut nnyin, edinen ido edi ukwak ikpanesit nnyin; akpanikọ edi ubọp-isin nnyin, ndien mbeñe-idem ndikwọrọ Gospel edi ikpa-ukot nnyin.
Ke Mbeñeidem
Ndisine ñkpọ-ekọñ idighe ñkukure se owo-ekọñ enyenede ndinam man añwana ekọñ eke okutde unen. Enye enyene ndika iso mbọñ akam, nnyuñ mkpeme. Satan enyene ñkari eti-eti ndisin eti owo-ekọñ ke nsobo. Ñkukure usuñ emi nnyin ikemede ndikan enye edi nnyin ndikpeme nnyuñ ndu ke mbeñidem ndiñwana ye enye ke Ikọ Abasi ke ini ekededi eke enye otopde ikañ-ikañ eduat esie emi edide eyighe, unana edinim ke akpanikọ, edisioño ndo, me, mme udọñ idiọk-ñkpọ eken.
Satan ama ada Jesus ini kiet ọdọk ke akamba obot ndidomo Enye. Enye okoyom Jesus atuak ibuot ọnọ imọ onyuñ okpono imọ. Nte afo emekeme ndikere mbaña uko eke etiede ntre? Edi Jesus ama ọfiọk ndiñwana ekọñ nnyuñ ñkan enye. Enye eketiñ oto Ñwed Abasi, ke ntre Satan ekenyene ndifehe. Nnyin imekeme ndinam ukem ñkpọ oro Jesus akanamde. Edieke nnyin itiñde enyin ikpep Ikọ Abasi inyuñ inimde kpukpru ke akpanikọ, nnyin iyenyene ibọrọ ndinọ ke ini ekededi eke nnyin ikopde nte etiñde nsu-nsu ikọ edian Ñwed Abasi, me ke ini ikopde ukpep-ñkpo eke ọwọrọde ọkpọñ se Jesus eketiñde.
Ndikpep Kpukpru Ñkpọ
Ke otu mme akpatre ikọ emi Jesus eketiñde ọnọ mbet esie mbemiso Enye ọnyọñ aka ke Heaven ekedi: “Mbufo eka ekenam kpukpru mme idut edi mbet Mi, enim mmọ baptism esin ke enyin Ete ye Eyen ye Edisana Spirit: enyuñ ekpep mmọ enam kpukpru ñkpọ eke ñketemede mbufo” (Matthew 28:19, 20). Jesus okoyom mmọ efiọk ete ke ekedi akpan ñkpọ onọ mmọ ndikpep kpukpru ñkpọ eke Enye ekekpepde mmọ.
Ndusuk owo ekere ete ke ndusuk ukpep-ñkpọ ke Ñwed Abasi idighe akpan ñkpọ, ndien mmọ eyetiñ ebaña mbio emi mmọ edade nte edi akpan ñkpọ ikpọñ. Ndusuk owo enyene ekikere efen ebaña se idide akpan ñkpọ. Edi ọkpọsọñ owo-ekọñ edi enye emi adade kpukpru se Ọbọñ ekekpepde nte akpan ñkpọ; ndien enye odu uwem eke ekemde ye mme ukpep-ñkpọ oro.
Mme Ñkari Satan
Ekọñ edinen ido ye ukwañ ido nnyin ọkọtọñọ ke Iñwañ Eden. Satan akada ñkari akan Adam ye Eve ke akpa eñwan esie. Enye ikakamake ikañ mme ibọk emi etopde ke ofum mme ita. Enye akada ñkari akan. Enye akada ikọ inua abiaña akpa ete ye akpa eka nnyin.
Nnyin imekeme ndibọ nduri-utọñ ke oro inyuñ itiñ enyin ke abaña se nnyin ikpañde utọñ inọ. Satan enyene mbufiọk ke ñkpọ nte isua 6,000 ọtọñọde ke ini oro, ama onyuñ ekpep ata ediwak mbufa ñkari. Ke ntre anditiene-Christ enyene ndidu ke ukpeme kpukpru ini midighe ntre etap enye esin ke usuñ idiọk-ñkpọ.
Inemesit idiọk-ñkpọ ye inyene ererimbot emi omoduri ediwak owo esin ke nna-ekọñ asua. Edi odu ndusuk mmọ eke mmikereke ibaña mme oruk ñkpọ oro; ndien andidiọk enyene ndida mme usuñ efen ndibiaña mmọ. Enye ọdọñ mme anditiñ ntiñ-nnim ikọ abiaña ndiwut idem nte mmimọ idi mme ọkwọrọ-ikọ Abasi. Ndusuk owo enim nsu emi etiñde enọ mmọ ke akpanikọ, koro mmọ mmimaha akpanikọ. Mmọ eyom ndimum ndusuk idiọk-ñkpọ ñkama ke esit mmọ.
Paul ama osobo ye nsu-nsu mme andikpep, enye okokot mmọ “mme anam-utom ñkari”. Edi enye ama ọdọhọ ete ke eyighe iduhe ndikut nte ke mme utọ owo oro edu, edieke satan ke idem esie oforode angel uñwana. “Ntre ke idige utibe-ñkpọ edieke mme asaña-utom esie eforode mme asaña-utom edinen ido: edi utit mmọ eyekem ye ubọk-utom mmọ” (2 Ñwed Corinth 11:13-15).
Mme Idiọk Spirit Eke Edude Ke Enyọñ
Ndusuk nsu-nsu mme andikpep emi edide mme ñkpọ utom satan, eneneñere ewọrọ eka ndiyom iduọ owo. Mmọ eka ke mme ufọk-ñwed emi ekpepde ikọ Abasi enyuñ ebuaha ye nti nditọ ufọk ñwed, kpukpru ini mmọ enam nte ñkpọ eke mmọ emade Ọbọñ. Ke ema ekenọ mmọ unyime ndikwọrọ ikọ, mmọ eduk ke mme ufọk Abasi idut nnyin enyuñ edọk eda ke itie ukwọrọ-ikọ ndisuan idiọk ibọk mmọ man ewọñọre esit mme owo esin ke idiọk.
Mme ñkpọ utom satan efen enyuñ edu emi ema ekebiaña mmọ ñko, emi ke ndusuk idaha mmọ ifiọkke ite ke mmimọ ima ifiak “edem ikpọñ mbuọtidem”. Ekeme ndidi mmọ ema ediọñọ Abasi ini kiet ko enyuñ enam utom esie ke ofuri esit mmọ; edi, ke unana ntiñ-enyin ke edibọñ akam ye ke edikpep ke ñwed Abasi mmọ ema eduọk Spirit Abasi. Mmọ ema ewọñọre suñ-suñ ekpọñ ukpep-ñkpọ ikọ Abasi. Mmọ ema ekabare ekop inem ñkpọ ererimbot, oduk ke esit mmọ. Utu ke ndikpep kpukpru mbet Jesus, mmọ ekpep se mme itie ukpono Abasi mmọ emade ndikop ikpọñ-ikpọñ. Ediwak itie ukpono Abasi enyuñ edọhọ nte Nditọ Israel ekedọhọde ke eyo Isaiah ete, “Mbufo ekuse edinen ñkukut enọ nnyin; etiñ inem ikọ enọ nnyin: ekut ñkpọ nsu” (Isaiah 30:10). Ekeme ndidi mmọ itiñke ikọ oro ntem, edi mmọ eyeyom mme ọkwọrọ-ikọ eyak mmimọ ika iso ke mme idiọk-ñkpọ mmọ, emi onyuñ ọwọrọde kpasuk ntre.
Ndiñwana Ye Idiọk-Ñkpọ
Edi utom ufọk Abasi akpanikọ, ufọk Abasi emi edude ke Ekọñ, ndiñwana ye idiọk-ñkpọ ke ebiet ekededi eke ekutde enye. Ñkukure usuñ emi ekemede ndinam oro nte ọfọnde edi ndibem iso nnyene ima Abasi ke esit nnyin, ke oro ebede eyet esit nnyin asana, ndien ibọ baptism Edisana Spirit emi ọnọde nnyin ofut spirit.
Ke nnyin ima ikenyene mme ñkpọ-ekọñ emi, nnyin inyene ndika iso nyak idem nnyin nnọ ke utom Ọbọñ, oro edi, ntọtuñọ ediyak-idem emi akpade nnyin ñkpọ. Satan ke añwana ekọñ ke ofuri esit, ntre ñko mbon Ekọñ Abasi enyene ndiñwana ke ofuri esit edieke mmọ eyomde ndikan.
Ndusuk owo ekpep ete ke idighe se eyomde inyuñ idighe mmem-mmem ndidu uwem emi okoñde akan idiọk-ñkpọ. Nso idi ntak, koro ndidu uwem eke okoñde akan idiọk-ñkpọ edi itiat idak isọñ ọnọ mfọn erinyaña ukpọñ nnyin! Edieke minyañake nnyin isio ke mme idiọk-ñkpọ nnyin, nnyin ikpuhọkede ye mme anam idiọk-ñkpọ ekededi. “Ñkpri nditọ mi ekuyak baba owo kiet ada mbufo awaha ọkpọñ usuñ: owo eke anamde edinen ido edi edinen, kpa nte Enye edide edinen; owo eke anamde idiọk-ñkpọ edi eke satan” (I John 3:7, 8). Ke ntre nnyin imekeme nditiñ usọp-usọp me nnyin idi nditọ Abasi me idighe.
Edifiak Edem
Mbon efen edu emi enyimede ete ke owo enyene nditọñọ ntak mmana, nnyuñ mfiọk ete ke emefen mme idiọk ñkpọ esie, edi mmọ esin ndinim ke akpanikọ nte ke ekeme ndinam owo asana nnyuñ ndu edisana uwem. “Koro emi edi Uduak Abasi, ete mbufo ekpekabare esana.” Koro Abasi ikokotke nnyin ite ididu uwem mbubiam, edi okokot nnyin ete, ididu uwem ke edisana ido” (1 Ñwed Thessalonica 4:3, 7). Ndusuk efaña ete ke oro etiñ abaña ndisana ke ikpọhidem ye edidianade nda. Edi emi ọtuñọ akan oro. Paul ama aka iso ke se enye ekewetde ọnọ mbon Thessalonica ke ndidọhọ nte, “Abasi emem ke Idem Esie akpakam anam mbufo esana ofuri-ofuri, onyuñ ekpeme mbufo ofuri-ofuri ke spirit ye ukpọñ ye ikpọhidem, anam mbufo ekunyene ndo ke ini Ọbọñ nnyin Jesus Christ edidide” (1 Ñwed Thessalonica 5:23).
Mbon efen edu emi ekwọrọde edisana uwem, enyuñ etiñ ntak emi ekpedude uwem eke asanade ke nsọñ uyo, edi efiak edem ekpọñ baptism Edisana Spirit. Jesus ama ọdọhọ ete, “Mbufo eyebọ odudu, ke Edisana Spirit ama edi edidoro mbufo ke idem: mbufo eyenyuñ edi mme ntiense Mi ke Jerusalem, ye ke ofuri Judea ye Samaria, tutu osim utit ererimbot” (Utom Mme Apostle 1:8). Abasi oyom mme ntiense Esie enyene odudu ndibuk mbuk Jesus, man spirit Abasi otuk esit mme owo.
Mme Ọkwọro-ikọ edu emi enanade odudu, enyuñ eyom ndikpanam ñkpọ nnọ Abasi okpon akan, edi mmo iyomke ebiet eke odudu oro otode. Owo ekededi eke ọbọde edrnyaña ye edinam asana ọtọñọde ke ata ekpri tutu okosim ata akamba, ekeme ndibọ odudu edieke enye amade ndiyak idem esie ọyọhọ-ọyọhọ nnọ Abasi. Abasi ama ọñwọñọ ebe ke inua Joel, anditiñ ntiñ-nnim ikọ ete, “Nyeñwaña spirit mi nnọ ofuri obukidem” (Joel 2:28). Oro edi baptism Edisana Spirit emi ọyọhọde ke uwem eke ema ekenam ọfọn oto ke iyip Jesus ke ini edinam asana.
Esit Christ
Ke ini Apostle Paul ekewetde ọnọ Mbon Philippi enye ama ọdọhọ ete, “Eyak mbufo enyene oruk esit emi okodude ke Christ Jesus... (enye) ọsuhọre idem, akabare osuk ibuot tutu ọsuñọ ke mkpa” (Ñwed Mbon Philippi 2:5, 8). Eñwan nnyin ekeme ndidi eñwan emi osuñọde ke mkpa. Nte nnyin imebeñe idem ndinam se ikponde ntre nnọ Ọbọñ? Ke eñwan emi Korea eñwanade ye Communism, ediwak mme anditiene-Christ ema edu emi ekewutde mbuọtidem mmọ ke Christ ke ndiyak uwem mmọ akan ndikañ Andinyaña. Abasi ama okut mmọ nte mbon-ekọñ emi Enye ekemede ndibuọt-idem, emi mmikabatke uwem mmọ ke ñkpọ tutu osim mkpa.
Edi ke ndusuk idaha, ọsọñ ndidu uwem nnọ Jesus akan ndikpa nnọ Enye. Ke ifiop-esit ye ke edinam ke ata, ndusuk owo ekeme ndiyere ikot ye unana ndik enyuñ eyak kpukpru enọ, edi edieke mmọ enyenede ndika iso ndu uwem ke isua ke isua, ntuk idem mmọ ke abaña inemesit ñkpọ ererimbot emi man eka iso esuan Ikọ Abasi, mmọ ekeme ndifiak edem ñkpọñ uwa oro mmọ ekewade idem mmọ. Abasi akpakam añwam nnyin kpukpru usen ndimen krọs nnyin nnyuñ ntiene Jesus, mfre mbaña mme udọñ ye inemesit eke nnyin ke ntak Esie!
Paul ama ọdọhọ ete: “Edi mme ñkpọ eke ekpedide udori enọ mi, ke ñkabat mmọ ke ntak-urua kabaña Christ. Ke akpanikọ mbat kpukpru ñkpọ ke ntak-urua, man mbọ akan ifiọk Christ Jesus Ọbọñ mi: emi ñkayakde kpukpru ñkpọ atak kabaña Enye, mmonyuñ nsin mmọ ke mbio man mbọ Christ nda nnyene” (Ñwed Mbon Philippi 3:7, 8).
Paul ama ọnọ ntak uwa esie ete, “Man ñkpọfiọk Enye ye odudu eriset Esie ke udi, ye nsaña ke ndutuhọ Esie, nnyuñ ñkabare ñkpa mkpa eke ebietde mkpa Esie; man ke usuñ ekededi ñkpọsim eriset ke mkpa” (Ñwed Mbon Philippi 3:10, 11). Uwem enyene ndika iso ke nsinsi, midighe ke Heaven edi ke hell. Paul ama ebeñe idem ndibọ kpukpru ukut mi ke isọñ man enye akpabuana ke akpa eriset, ndiduñ nnyuñ ñkara ye Jesus ke nsinsi.
Mme anditiene Christ oro ke Korea eke ewade uwem mmọ ke ntak Christ enyene ukem idorenyin oro. Ke eriset mme akpa-mkpa,mmọ eyewọrọ edi edudu uwem ke nsinsi ye Ọbọñ. Nso ñkpọ idu do edieke ikpọhidem ekpenyenede ndibọ esisit ndutuhọ mi? Uwem nnyin mi etie nte ntuhube, ke edade edomo nsinsi ini emi minyeneke utit. Edi se nnyin ikanamde inọ Ọbọñ ikpọñ ke edibat ke ini nnyin ididade ke iso Ebiere-ikpe ofuri ererimbot.
Jesus akayak uwem Esie ọnọ man enyaña nnyin. Nte ikpedighe utibe-ñkpọ edieke nnyin ikpekemede ndida ke iso Esie nnyuñ ndọhọ nte ke nnyin ima iyak uwem nnyin inọ Enye ke ndinam utom ñwaidem? Me ke ndikpa ke ntak Esie edieke anade nte edi ntre?
Questions
MME MBUME- Nso ke owo ekọñ Christ enyene ndiñwana mbaña?
- Nso idi ñkpọ ekọñ anditiene-Christ?
- Nso ñkpọ mkpeme idem edinyaña nnyin mbak Satan?
- Mme ukpep-ñkpọ Christ ifañ ke Enye ọkọdọhọ nnyin ete ikpep?
- Siak ndusuk usuñ emi satan abiañade owo.
- Didie ke ikeme nditiñ ukpuhọre emi odude ke ufọt eyen Abasi ye anam idiọk?
- Nso idi ntak emi Paul okonyimede kpukpru ñkpọ atak enye?
- Nso ke Abasi oyom oto nnyin?