Lesson 274 - Junior
Memory Verse
IKỌ IBUOT: “Mmọ ema ekan enye oto ke iyip Eyen-erọñ, onyuñ oto ke se mmọ etiñde nte ntiense” (Eriyarare 12:11).Notes
Editọñọ Ntak Ndi Jesus
Ñwed Abasi etiñ abaña editọñọ ntak ndi Jesus, emi oyomde ndida itie usọp-usọp, eyighe inyuñ iduhe. Jesus ama etiñ ọnọ mbet Esie ete ke Imọ iyekpọñ mmọ itiene Ete Imọ. Enye ọkọdọhọ ete: “Ndien edieke ñkade ñkotim itie ntre nnọ mbufo, nyefiak ndi ndida mbufo nnọ Idem Mi; man mbufo enyuñ edu ke ebiet eke Ami ndude” (John 14:3). Jesus ama ọkpọñ mmọ. Mme owo ema ese Enye nte Enye ọdọkde aka, tutu ikpa enyọñ ofuk Enye ke enyin mmọ. Owo iba emi esinede mfia ọfọñ idem, edọhọ mmọ ete, “Jesus emi, emi emende Enye ekpọñ mbufo eduk ke heaven, eyedi kpa ke ido emi mbufo ekutde Enye ọnyọñde oduk ke heaven, (Utom Mme Apostle 1:11).
Ntañ -Ndọk Ufọk Abasi
Editọñọ ntak ndi Jesus edida itie ke ikpehe iba. Ke akpa, emi Ñwed Abasi anamde añwaña edi “akpa eriset” (Eriyarare 20:5, 6), Ntañ-Ñdọk Ufọk Abasi esine kpa do. Ke ini oro mme odu-uwem ye nditọ Abasi emi ekedede emi etienede ebuana ke Ufọk Abasi akpanikọ eyedemere, ndien Spirit Abasi eyemen mmọ... man “isobo ye Ọbọñ ke enyọñ” (1 Ñwed Thessalonica 4:17).
Jesus ama etiñ ọnọ mbet Esie abaña mme ñkpọ emi edidade itie mi ke isọñ. Mmọ ema ebup, “Sian nnyin ini eke mme ñkpọ emi edidide; nso idinyuñ idi idiọñọ eridi fo, ye eke akpatre ini eyo emi?” Jesus ama etiñ ọnọ mmọ abaña ekọñ, akañ, idiọk udọñọ ye unyek-isọñ emi edidade itie ke nsio-nsio ebiet. Enye ama etiñ ọnọ mmọ ete ke mme owo eyesua, ebiaña, etap, eyat esit enyuñ ewot kiet eken. Enye ama afiak ọdọhọ mmọ ete ke “eyenyuñ ekwọrọ Gospel ubọñ Abasi emi ke ofuri ekondo nte ntiense enọ kpukpru mme idut.” Ndien Enye adian do ete, “Ndien adañoro ke utit eyedi”.
Kpukpru mme ñkpọ emi ema eda itie. Kpukpru mme ntiñ-nnim ikọ ke abaña se ididade itie mbemiso editọñọ ntak ndi Jesus ọyọhọ ikaba,ema esu. Jesus ekeme ndidi ini kiet ekededi. Oro edi ntak eduride nnyin utọñ ete idu ke mbeñidem ke abaña edidi Esie. Ntọt ididuhe aba ke abañ ini emi Jesus editañde Ufok Abasi ọdọk. Edidi Jesus edibabuat, “Nte emireñ-mireñ otode ke edem usiaha-utin ọwọrọ ayama osim edem usop-utin” (Matthew 24:27). Baba owo kiet ke mibọhọke Abasi Ete ikpọñ ọfiọk nnen-nnen usen oro Jesus ediwutde idem (Matthew 24:36).
Idorenyin Anditiene-Christ
Ndidu ke mbeñe-idem mbet edidi Jesus edi idorenyin ọnọ kpukpru mme anditiene-Christ. Paul ewet ọnọ mme anditiene-Christ ke Corinth ete edieke inyenede idorenyin ke Christ ke uwem emi ikpọñ, nnyin idi “mmọ emi enyenede mbọm ikan kpukpru owo eñwen”. Edi anditiene-Christ enyene idorenyin ke Christ ke uwem emi ye ke uwem eke edidide, koro enye onimde mme eñwọñọ Abasi ke akpanikọ. Idorenyin oro edi “ukwak ubom ukpọñ nnyin, eke midikpuhu nnyin edi ọsọñọde omum isọñ” (Mme Hebrew 6:19). Idorenyin oro anam andinim ke akpanikọ anam idem esie asana kpa nte Christ edide edisana (1 John 3:3).
Ndidu Ye Jesus
Nso idi ntak emi edidi Jesus ọyọhọ ikaba edide akpan ñkpọ ọnọ mme anditiene-Christ? Nso idi ntak emi mmọ ewukde enyin ese enyuñ etiede ebet ñkpọ-ntibe oro? Mmọ eke edude ke mbeñe-idem ebet edifiak ndi Jesus eyekop “uyo archangel” ye “ukorowo Abasi.” “Mmọ emi ekpañade ke Christ eyebem iso eset”, ndien eyemen mmọ emi edude uwem “edọk ye mmọ ke ikpa enyọñ man isobo ye Ọbọñ ke enyọñ” inyuñ idu ye Jesus ke nsinsi-nsinsi (1Thessalonica 4:16, 17).
Owo ifañ enyene udọñ ndikut iso Andifak mmọ! Owo ifañ ke itọñ Heaven ọdọñ mmọ! Mmọ eke ema ekebeñe idem ebaña Akpa Eriset eyekut ekan mbukpọñ ñkpọ, ekut ebe ndisese, ekut ekan ndisobo ye Andinyaña mmọ! Mmọ eyedu ye Jesus ke nsinsi. Mmọ eyetiene ebuana ke ikwọ Heaven emi ọdọhọde ete, “Hallelujah; Erinyaña, ye ubọñ, ye ukeme enyene Abasi nnyin” (Eriyarare 19:1). Mmọ eyedi mme “oku Abasi ye Christ, mmọ eyenyuñ eda ubọñ ye Enye ke tọsin isua.” Ke Eriyarare 20:6 nnyin ikot ite, “ọfọfọn ọnọ owo emi enyenede udeme ke akpa eriset”.
Mbeñe-idem
Heaven edi itie emi ema eketim ema (John 14:2) enọ mmọ eke ema ekedu ke mbeñe-idem (Eriyarare 19:7). Eyak nnyin ikere usuñ nte owo ekemede ndidu ke mbeñidem ke abaña Heaven ye edidi Ọbọñ. Ñwed Abasi ọnọ nnyin ntọt emi edide ukem ọnọ nditọwọñ ye ikpọ owo. Mbemiso owo edi eke Ọbọñ, enye enyene ndikut ete ke eda Iyip Jesus eyet mme idiọk-ñkpọ esie (Eriyarare 7:14). Ke ini owo ọbọde erinyaña, Ọbọñ ọnọ enye odudu ndidu uwem unana idiọk-ñkpọ (1 John 3:9). Ke ini owo anamde idiọk-ñkpọ enye idighe aba eyen Abasi. “Owo eke anamde idiọk-ñkpọ edi eke Satan” (1 John 3:8) onyuñ edi “ofin idiọk-ñkpọ” (John 8:34).
Owo enyene ndika iso nnam uduak Abasi nnyuñ ñkop uyo Abasi, man enye aka iso ndidi mbet Esie (John 8:31). “Edi eyenyaña owo eke edimede ime tutu osim akpatre” (Matthew 10:22). Ñwed Abasi ekpep ete ke owo enyene ndisaña ke uñwana emi Jesus ọnọde (1 John 1:7). Nnyin emi ikpepde mme ukpep-ñkpọ Usen Ọbọñ emi imenyene uñwana eke okponde. Nnyin inyene uñwana koro imokop ibaña erinyaña (Ñwed Mbon Rome 10:9), ikop ibaña nsana-nyak (Ọyọhọ ukpep - ñkpọ 269), ikop ibaña ufọn ndidu edisana uwem, ye uwem eke enamde asana ofuri-ofuri (1 Peter 1:15, 16; 2 Peter 3:11; Ñwed Mbon Ephesus 5:26, 27), inyuñ ikop ibaña eñwọñọ Ete, emi edide uduọk-mmọñ Edisana Spirit, emi Jesus ọkọnọde mme mbet Esie ewuhọ ete ebọ (Utom Mme Apostle 1:4, 5, 8).
Ke ini owo asañade ke kpukpru mme uñwana emi enye ọkọbọde, owo oro eyenyene ifiọk ke esit esie ete ke imọ imebeñe idem ndisobo ye Ọbọñ. Enye eyekpeme idem esie abaña “idiọk ñkpọ emi odude ke ererimbot” (James 1:27). Enye enyene ndikpeme nnyuñ ntie mbet edifiak ndi Jesus emi oyomde ndida itie usọp-usọp (Titus 2:11-13). Nte afo ọmọfiọk ke imọ imebeñe idem ke abaña edidi Ọbọñ? Edieke mufiọkke, nso idi ntak mubọñke akam uyom Abasi tutu afo ọfiọk ete ke imọ imodu ke mbeñe-idem ibet ntañ -ndọk?
Mme Andikan
Mbemiso afo odu ke mbeñe-idem ke abaña edidi Jesus, owo kiet ekededi enyene ndidi ọyọhọ andikan. Ọyọhọ andikan enyene ndikan ererimbot, obukidem ye Satan. “Emi edi erikan eke akakande ererimbot kpa mbuọtidem nnyin” (1 John 5:4). Imokut ntak enọde nnyin item “esọñọ eñwana ke abaña ikọ mbuọtidem, emi ema ekeyak ini kiet ko esin nti ikọt Abasi ke ubọk” (Jude 3)! Edi mbuọtidem nnyin ke Jesus Christ anam nnyin inyene erikan. Owo ekeme ndidi andikan oto mbuọtidem, “oto ke iyip Eyen-erọñ onyuñ oto ke se mmọ etiñde nte ntiense (Eriyarare 12:11). Kot se ekeñwọñọde enọ mme andikan ke Eriyarare 2:7, 11, 17, 26; 3:5, 12, 21. Kpukpru mme edidiọñ oro eda mmọ edian ke eñwọñọ emi: “Owo eke akande eyeda ñkpọ emi enyene; ndien nyedi Abasi esie, enye eyenyuñ edi eyen Mi” (Eriyarare 21:7). Esit owo ekpemenerede didie ke ini okotde abaña mme ñkpọ emi Abasi enyenede ke itie unim-ñkpọ ọnọ ikọt esie! Owo ekpenyene ndiduñọre esit esie didie, mbak enye “okutaba nduọk odudu oro” (Mme Hebrew 4:1)!
Edidi Nte Edidem
Edidi Jesus ye ntañ-ndọk ufọk Abasi edi kiet ke otu ikpehe editọñọ ntak ndi Esie. Ikpehe efen eyeda itie ke ini Ọbọñ edifiakde idi nte Andikan, “asaña ye tosin duop ndisana ikọt Esie edi” (Jude 14) ndidi “EDIDEM NDIDEM, YE ỌBỌÑ MBỌÑ” (Eriyarare 19:16). Mme uyo eyeto ke Heaven edọhọ ete, “Obio ubọñ ererimbot emi amakabare edi obio ubọñ Ọbọñ nnyin ye Christ Esie. Enye eyenyuñ ada ubọñ ke nsinsi-nsinsi” (Eriyarare 11:15).
Oro edi ini emi “Eyen owo edidide ke ubọñ esie”. Eyebon kpukpru mme idut ke iso Esie. Ọbọñ eyebahare mmọ kiet ye eken nte ekpemerọñ abaharede “erọñ ye ebot” (Matthew 25:31, 32). Mmọ eke ebakde Abasi edi mme erọñ, mbon nsuhọridem ye mme enyene ime ye mme enyene ufọn. Mmọ eke mibakke Abasi edi mme ebot, mbon emiom ye mbon nsọñ-ibuot ye mme odu otime – otime uwem. Ema enọ mmọ unen ndidu mi ọtọ kiet ke ererimbot, edi ini edibahare ke edi.
Mme erọñ eyekop uyo Ọbọñ ọdọhọde ete, “Edi, mbufo emi Ete Mi ọdiọñde, edida ubọñ emi ekonimde enọ mbufo toto ke eritọñọ ererimbot”. Eyenọ mmọ emi emade Abasi ebiet iduñ, nsọñ urua inyene emi Abasi ekebeñede onim ọnọ nditọ Abasi. Nso idi ntak emi mmọ edibọde utip? Mmọ ema enam akpanikọ enyuñ ekop item. Mme utom mmọ eyarare ete ke ema enyaña mmọ, edep mmọ eto ke Iyip Jesus. Mmọ ewut ima enọ kiet eken, etuk idem mmọ; se mmọ ekenamde, ekenam ke enyiñ Jesus ye ubọñ Esie.
Mmọ eke mibakke Abasi eyekop mme ikọ emi: “Edianare Mi, mbufo emi edide mbon nsobo,... Adaña nte mbufo mikanamke ñkpọ emi inọ kiet ke otu ata ñkpri emi, mbufo inamke inọ Mi”. Mmọ emi mibakke Abasi eyebọ ufen ke mme ñkpọ emi mmọ mikanamke. Uwem mmọ eyewut ete ke mmọ ikenyeneke erinyaña, ñko mmọ ikosukke ibuot inọ ñwed Abasi, ñko se mmọ ekenamde ikanamke ke ntak ndimenere ubọñ Jesus. Eyeti mmọ mme ini emi mmọ mikọnọhọ mmọ efen uñwam ke ini akpakanade nte mmọ enam ntre. “Mmọ oro eyedaha ekoduk ke nsinsi ufen: edi edinen owo eyeduk ke nsinsi uwem”.
Andikan
Mmọ emi ebakde Abasi eyenyene nsinsi uwem koro mkpa, “akpatre usua emi edisobode”, eyeda “erikan emen mkpa” (1 Ñwed Corinth 15:26, 54). Christ eyedi Andikan kpukpru mme asua Esie (1 Ñwed Corinth 15:24, 25) oro edi satan (Eriyarare 20:10), Mme anditiene satan (Eriyarare 20:15), ye mkpa ye obio ekpo (Eriyarare 20:14). Koro Christ eyedi Andikan, ikọt Esie, ufọk Abasi, eyetiene edi mme andikan. “Edi yak ekọm enyene Abasi, emi ọnọde nnyin erikan, oto ke Ọbọñ nnyin Jesus Christ” (1 Ñwed Corinth 15:57).
Do ndien ke erinyaña mme anditiene-Christ ediyọhọ. Mmọ eyedi mme andikan mkpa, obio ekpo, ye udi, oto ke odudu Jesus. Mme anditiene-Christ eyenyene akpatre erikan. Owo idinukke mmọ aba man enam idiọk! Mmọ idiñwanake aba eñwan ye Satan! Mmọ idikopke udọñọ aba ye ukut, mfuhọ ye mkpa idiñyuñ iduhe aba, eseme ye ntuaña ye ubiak idiñyuñ iduhe aba! “Abasi eyekwọhọre kpukpru mmọñ eyet ke enyin mmọ efep” (Eriyarare 21:4).
Nso utọ inemesit ye idara! Nso utọ erikan ye utip! Kpukpru emi ye se iwakde ikan oro ana ebet mmọ eke ebeñede idem ndida ọyọhọ idaha nnọ Jesus, emi ebeñede idem mmọ ebet Heaven, enyuñ ebetde Ọbọñ ye Andinyaña mmọ, Jesus Christ.
Questions
MME MBUME- Nnyin inam didie ifiọk ite ke Jesus eyesọp edi?
- Siak mme ñkpọ-ntibe iba emi edidade itie ke editọñọ ntak ndi Jesus.
- Nso ñkpọ idida itie ke ini etañde ufọk Abasi edọk?
- Nso ñkpọ iditibe ye mme anditiene-Christ emi ekekpañade?
- Didie ke owo ekeme ndifiọk ete ke imọ imebeñe idem ibaña edidi Jesus?
- Mme anditiene-Christ edibighi didie ye Jesus?
- Didie ke owo ekeme ndidi andikan?
- Nso ke eñwọñọ enọ andikan?
- Anie edidi Edidem ndidem ye Ọbọñ-mbọñ?
- Mme anie edida ke iso Jesus man ekpe ikpe mmọ?