Mme Ñke 1:1-33; 2:1-22

Lesson 275 - Senior

Memory Verse
IKỌ IBUOT: “Uteñe Jehovah edi akpan ifiọk: mbon ndisime ese eti ibuot ye item ke ndek” (Mme Ñke 1:7).
Cross References

I Ikot Mbufiọk

1. Enọ mme Ñke ndida ñkpep ifiọk, Mme Ñke 1:1-6; Matthew 13:10, 11; Mark 4:10-12

2. Item ete ye eka edi ñkpọ-uto mfọn, Mme Ñke 1:7-9; Exodus 20:12

3. Dianare kpọñ idiọk etabi, Mme Ñke 1:10-19; 1 Ñwed Thessalonica 5:22; 1 Ñwed Corinth 15:33

4. Ekop uyo ifiọk ke kpukpru ebiet, Mme Ñke 1:20-23; Psalm 19:1-6; Luke 9:6; Utom Mme Apostle 8:4; Ñwed Mbon Rome 1:18-21

5. Ubierikpe ana ọnọ owo nsahi, Mme Ñke 1:24 -32; 29:1

II Utip Ke Ndiyere Ikot

1. Ndiyere ikot asaña ye utip, Mme Ñke 1:33; Jeremiah 38:20

2. Owo eke oyomde Abasi ke ofuri esit eyekut Enye, Mme Ñke 2:1-5; Jeremiah 29:13; Matthew 5:6; 13:44

3. Edi Ọbọñ ọnọ ifiọk, Mme Ñke 2:6-9; James 1:5

4. Ntiñenyin eyekpeme fi, Mme Ñke 2:10-22; Daniel 4:27

Notes
SE EKPEPDE EBAÑA

Ifiọk Ke Uduot Owo

“Eti ibuot ofiori ke esien; emenere uyo esie ke añwa: “Enye ada okot ke mbuot efak, ke mme inua-otop: ke obio ke enye etiñ ikọ esiemọ (Mme Ñke 1:20, 21).

Enyene ntọtuñọ ntiñ-nnim ikọ emi ewetde ke nde ke nde ọtọñọde ke akpa tutu osim ke akpatre Ñwed Mme Ñke. Ke ini Solomon okosuk ewetde mme inem ikọ emi, ekeme ndidi ama enyene spirit emi okodude ke esit esie, emi okotimde ayarare ofuri uduak Abasi ọnọ enye ke abaña uduot owo ke mme emana eke edidide. Ifiọk emi etiñde ebaña mi, idighe baba ñkpọ efen ikan Owo. Ifiọk ke uduot owo edi Christ Jesus – idighe ifiọk ererimbot, idighe ifiọk emi mme owo eyomde mfin emi ke ererimbot, edi, edi ifiọk emi otode ke enyọñ.

Eyen Abasi ọkọwọrọ ada ke akpatre usen akwa usọrọ oro onyuñ ofiori ete, “Edieke owo ekededi okopde nsat-itọñ, yak enye etiene Mi ediñwọñ” (John 7:37). Ke ufañ ikọ Abasi emi, nnyin ikut ite, “Eti ibuot ofiori ke esien; emenere uyo esie ke añwa.” Jesus ama ada ke mme efak; ema ekut Enye ke añwa-urua; Enye ama ekpep ata ekese otu owo ñkpọ.

Ifiọk Abasi

Ifiọk Abasi ọyọhọ ofuri-ofuri ke Jesus Christ. Ke Ñwed Abasi emi nnyin ikotde, edọhọ ete, ke “ofuri uyọhọ Abasi ke ododuñ Enye ke idem,” ndien ñko “ofuri inyene ọniọñ ye ifiọk edibede Enye ke idem” (Ñwed Mbon Colossae 2:3, 9). Ikọ Abasi ọwọrọ ada añwa-añwa nte ifiọk Abasi; ndien ke ini eren-owo me ñwan otimde ama ikọ Abasi, onyuñ ayak emiñ mme ewuhọ oro ke esit esie, enye enyene ifiọk osim erinyaña; do ndien ke enye ọdiọñọ ñkpọ emi odotde owo ndidiọñọ ñkan kpukpru ñkpọ─idaha spirit esie ke iso Abasi. Paul eketiñ ye mbon Corinth ete, “Edi nnyin ikwọrọ Christ nte owo emi ekewotde ke krọs; ọwọrọ itiat iduọ ọnọ mme Jew, ye ndisime ikọ ke enyin mme Gentile; edi ọnọ mmọ emi Abasi okokotde, ye mmọ edide mme Jew ye edide mme Greek, Christ emi edi odudu Abasi ye ifiọk Abasi” (1 Ñwed Corinth 1:23, 24).

Ebiọ Ke Ndisin Ifiọk

Mfiori ifiọk ke añwa ekedi, “Adaña didie ke mbufo mme okọi edima ọkọi?” “Mme ọkọi” edi kpukpru mmọ oro esañade ke ndue-idem ke ererimbot, emi minyuñ ikereke ibaña Abasi, Andinyaña mmọ, inyuñ ikereke ibaña utit mmọ. Enyene ntọt emi enọde ke Ikọ Abasi, emi ọdọhọde ete, “Nnyin idinam didie ibọhọ edieke nnyin isinde erinyaña eke okponde ntem?” (Mme Hebrew 2:3). Ndusuk owo mfin emi ke esin erinyaña mmọ enyuñ ekere ete ke mfọn Abasi eyefumi enyin ke ndue-idem mmọ, ndien ke akpatre eberede inua-otop Heaven enọ mmọ enyuñ ekọm mmọ ubọñ-ubọñ eda ekesin ke Akwa-obio Gold; edi Ikọ Abasi otim ọsọñọ ete, baba usuñ ubọhọ kiet iduhe inọ “mme ọkọi” emi esinde utọ erinyaña eke okponde ntem.

Ifiọk Ererimbot

Afo emekeme ndima ifiọk ererimbot, onyuñ efehe ebine mme ñkpọ eke ererimbot efehede ebine mfin emi. Mme owo ke edama ke ndifehe mbine ifiọk ererimbot emi, udọñ onyuñ odu mmọ eti-eti ndikpep nsim akwa idaha ke ufọk-ñwed. Ñkpri ufọk-ñwed, ye Ikpọ ufọk-ñwed ye mme ufọk-Ñwed Nta-Ifiọk emi ebọpde eyọhọ ke ofuri ererimbot, ebọp enim enọ mkpọsọñ nduñọre ke abaña ifiọk ye edidiọñọ-ñkpọ. Nnyin ikemeke ke emi ndifiọk utibe nduñọre ye se mme owo eyararede ke edinam mmọ mfin emi. Edi ke kpukpru ifiọk ererimbot emi, mme ukpọñ owo ke esuk etetak – enyuñ etak kpa ukem-ukem nte ukpọñ eke mikabakere esit onyuñ odude ke ufọt akai ndien inyeneke ifiọk.

Mbon Nsahi

Eti ibuot ke ofiori ke esien, ifiọk emenere uyo esie ke añwa: “Adaña didie ke mbufo mme ọkọi edima ọkọi? Nsahi edinyuñ enem mbon nsahi?” (Mme Ñke 1:22). Mbon efen edu emi esuk ekade iso esin Enyiñ Jesus ke nsahi, enyuñ ekama Edisana Ñwed Abasi nte ñkpọ nsahi, edọhọ ete, “Nnyin iyom obufa Ñwed Abasi emi ekemde ye obufa emana nnyin.” Mmọ emetak ukem nte mmọ oro esinde utọ erinyaña eke okponde ntem. “Adaña didie.... ke.... mme ndisime edinyuñ esua ifiọk?” (Mme Ñke 1:22).

Abasi ikotke mme owo ndisime koro mmọ eteñede – baba, idighe ntre! Okokot mmọ ndisime sia mmọ mikereke ibaña utit mmọ, koro mmọ mikotimke ida ini ikere ibaña akakan ñkpọ emi edide ufọn ukpọñ mmọ emi mikpaha ke nsinsi.

Jesus ama etiñ abaña owo kiet emi ọkọkọde ata ediwak inyene onim ke ubet ọnọ idemesie man akpadia ke ediwak usen; edi kpa ke ufọt ini oro enye osuk ekerede ete imotim ibọp eti itie ukpeme isin mmọ, Abasi etiñ ikọ ke Heaven ete, “Afo anana ibuot, eyekpak ukpọñ fo ke ubọk fo ke okoneyo emi” (Luke 12:20). Abasi ikekotke enye ndisime koro ibuot esie akabiarade; Abasi eketiñ ikọ ọnọ enye koro enye ekesinde ifiọk emi otode ke enyọñ. Enye ekekere abaña ufọn idemesie; enye okotim oyom mme ñkpọ eke ediyuhọde itọñ obukidem esie, ama onyuñ ọkọ mmọ; edi kpa ke ufọt akpakip inyene esie, enye ama okop uyo otode Abasi ete, “Afo ndisime.” Enye ikekpañke utọñ inọ uyo mfiori Ifiọk emi okofioride ọnọ mme owo ke kpukpru ebiet, “Ekabare ke nduari mi” – ekabare esit, ebeñe idem ndisobo ye Abasi.

Utit Mme Mmọ Oro Esinde

Mbọm idiọk itie mmọ oro esinde ndiwọñọre ñkpọñ idiọk-ñkpọ, emi uyo Abasi edisimde mmọ ete, “Koro Ami ñkokotde, ndien mbufo esin; ñkanyan ubọk Mi, ndien baba owo kiet eke esede iduhe; Ndien mbufo ema eduọk kpukpru item Mi, inyuñ inyimeke nduari Mi: Ami ñko nyesak ke ini nnanenyin mbufo; nyenyuñ mbiaña ke ini ndik anamde mbufo” (Mme Ñke 1:24-26). Ikọ Abasi otim etiñ añwaña ete kpukpru mmọ emi esinde Enye ye Ikot Esie, “eyedia mfri usuñ mmọ” (Mme Ñke 1:31).

Hell eke asakde ikañ ye nsinsi ndutuhọ edi enyene-ndik ñkpọ eke ọfọnde nditim ñkere mbaña, emi etiede nte ọkpọsọñ ñkpọ ọnọ owo eti ibuot ye owo ikike ndikpañ utọñ ke uyo Abasi. Kpa ye oro, mme tọsin owo ke esuk eka usuñ nsobo ye ata esisit ekikere ke abaña ebiet eke mmọ edibiatde nsinsi ini. Ke itihere ukwañ usuñ mmọ, mmọ esak enyuñ enam mbubru ye utibe ikot Christ; edi eyedi ata isio mbuk ke ini nti ikọ emi edibede, ndien Abasi ete, “Ami ñko nyesak ke ini nnanenyin mbufo.” Didie ke owo mba edisak, me edibiaña owo nsahi ke usuñ isañ esie, ke ini “Enye etie ke enyọñ asak: Ọbọñ ababiaña mmọ” (Psalm 2:4).

Ndiyom Abasi

Owo emi oyomde ndibọhọ ubierikpe Abasi enyene ndikpañ utọñ ke ikot Esie. Abasi ọyọhọ ye mbọm ye akpanikọ; edi inyañake baba owo kiet ke enyene idem mibemke iso iyarade mme idiọk-ñkpọ esie ke esit akpanikọ onyuñ oyom ata edikabare esit. Ekot nnyin idi, idighe ndikpañ utọñ ikpọñ, edi ndiyak esit nnyin nnọ mbufiọk. “Ama ofiori okot asian, emenere uyo fo ọnọ mbufiọk; Ama oyom enye nte silver, onyuñ ọduñọre enye nte ñkpọ uto eke edibede; Ndien afo eyetim ọfiọk uteñe Jehovah, onyuñ osim ifiọk Abasi” (Mme Ñke 2:3-5).

Ediyom mme ndibe inyene onuk mme owo esin ke ndisaña ke mme ufọt akai-ikọt, nnyuñ mbe ke mme mkpọdiọhọ eke eyọhọde ye ice, nnyuñ nsuhọre nduk ke mme udem akwa akpa-inyañ, enyuñ enyime ndiyak uwem mmọ nnọ ke nsio-nsio usuñ man ekpekeme ndinyene se mmọ eyomde. Ikot mbufiọk, ke nditim ntiñ isuhọkere ikan ke ifik ye ke edinam. Edi uduak Abasi ete yak mme owo ediana ke esit kiet ye uko, ndiñwana ke ọkpọsọñ ubọk nnyuñ nyom ke ofuri esit ye ntiñ-enyin, man mmọ ekpekeme ndida mme ndibe ñkpọ Obio Ubọñ Abasi nnyene.

Ata akwa inyene emi akande ererimbot odibe ke ifiọk Abasi. Mme inyene ererimbot edi ñkpọ ibio-ibio ini, ke ini ifiọk Abasi odude ke nsinsi. Ata ediwak owo emi ekeyomde inyene ererimbot, ekeda mmọ ọsuñọ ke nsobo ye mkpa, edi uteñe Jehovah ada owo ọsuñọ ke nsinsi uwem. Eñwan Eti-Mbuk oyom mbon uko esọñọ eda ndibiọñọ mme ikpikpu ekikere, ñkari andidiọk ye nsahi mbon abiaña, nnyuñ nsuan mme udim ekọñ Satan, ndien emum akpanikọ emi odude ke Ikọ Abasi ekama. Mme usuñ edinen-ido, eke ubierikpe, ye ndikpe unen ikpe, ye kpukpru nti usuñ edu ke mfọn enọ kpukpru mmọ emi eyakde esit ọyọhọ-ọyọhọ enọ ifiọk usuñ Abasi.

“Koro mbon edinen ido eyeduñ ke obio, mmọ eke efọnde ema eyenyuñ ebighi ke esit.”

“Edi eyesobo mme idiọk owo ke isọñ efep enyuñ esọhi mbon abiaña efep ke esit” (Mme Ñke 2:21, 22).

Questions
MME MBUME
  1. Mme nso ufọn edu ke nditiñ iko ke ñke?
  2. Nso idi edinam ndisime owo ke abaña nti item?
  3. Nso ke eda item mme ete ye eka ekedomo?
  4. Nso idi ido mmọ oro ediọkde itọñ udori?
  5. Mme anie edi “mme ọkọi” emi etiñde ebaña ke Ñwed Mme Ñke 1:22?
  6. Nso idi utip mme mmọ oro esinde ikot Abasi?
  7. Nso ñke ke Jesus okotop emi ebietde enye emi odude ke Ñwed Mme Ñke 2:1-5?
  8. Ebiet ewe ke ifiọk owo kiet-kiet oto ọwọrọ?
  9. Nso idi ndusuk utip mmọ emi enyenede ifiọk?