Lesson 281 - Senior

Memory Verse

IKỌ IBUOT: “Sese nyenyuñ ndọñ uñwọñọ emi Ete Mi ọkọñwọñọde etiene mbufo: edi etie ke obio ebet, tutu esine mbufo odudu emi otode ke enyọñ” (Luke 24:49).

Cross References

I Uduọk-Mmọñ Edisana Spirit Nte Ọyọhọ Enọ-Mfọn Ita

1. Mbemiso Christ akpa, Enye ama ọñwọñọ ọyọhọ enọ-mfọn ita ọnọ mme andinim Enye ke akpanikọ, John 14:15-18, 26; 15:26, 27; 16:7-15; Luke 11:13; 24:49; Utom Mme Apostle 1:4-8; da domo Matthew 3:11 ye John 1:33

2. Mme anditiñ ntiñ-nnim ikọ ke ini Akani Ediomi ema etiñ ebaña ini emi edinọde Edisana Spirit, Matthew 13:17, 1 Peter 1:9-12; Joel 2:21-29; Isaiah 32:15; 59:20, 21; Ezekiel 36:25-27; 39:27-29

3. Enọ mfọn ita ema ewọrọ eda ke idak Akani Ediomi nte uwut-ñkpọ ke abaña mme enọ emi enade enọ nditọ Abasi ke eyo mfin.

(a) Ñkpọ-ntibe ita ke Obot Moriah, Genesis 22:1-18; 1 Chronicles 21:18-27; 2 Chronicles 5:1-14

(b) Mme ikpehe ita ke Ataya ye ke Temple, ebiet emi ekesikponode Abasi, Exodus 40:17-35 da domo Mme Hebrew 9:1-12 ye 10:9-22

4. Mmọ emi ema ekeda Iyip Jesus enam esit mmọ esana nte ọyọhọ utom mfọn iba ekeme ndibọ uduọk-mmọñ Edisana Spirit, Mme Hebrew 12:14; 13:11, 12 da domo Leviticus 4:1-12; 6:24-30; ye 16:1-28; Ñwed Mbon Ephesus 5:25-27; Ezekiel 36:22-29

II Edidọñ Iberedem Edi

1. Mbet 120 ekenyene esit kiet, emi okowutde ete ke mmọ ekedi iren ye iban emi ema ekenam esana, Utom Mme Apostle 2:1; Mme Hebrew 2:11; John 17:17-23; Psalm 133:1

2. Iberedem ama edi nte Jesus ọkọñwọñọde, Utom Mme Apostle 2:2-4

3. Ema eda idiọñọ emi ndudue me eneni mikeduhe, ewut ete ke emi ekedi Edisana Spirit, oro edi Iberedem emi ekeñwọñọde, Utom Mme Apostle 2:5-13, 16; Joel 2:28, 29

4. Editọñọ ntak nnọ Edisana Spirit ke mme ini efen ndisọñọ ukem-ukem idiọñọ oro, Utom Mme Apostle 10:44-48; 15:7-9; 19:1-7; 1 Ñwed Corinth 14: 18, 22

III Apostle Emi Ọkọyọhọde Ye Edisana Spirit Ye Ukwọrọ-Ikọ Esie

1. Peter ọyọhọ ye obufa odudu ye uko ke Spirit, onyuñ adaha ada ọkwọrọ ikọ ọnọ otu owo, Utom Mme Apostle 2:14, 15

2. Enye otim ada Ikọ Abasi ọsọñọ ukwọrọ-ikọ esie, Utom Mme Apostle 2:16-21; 2 Timothy 4:5; 2 Peter 1:19-21

3. Ke enye ama ekemen se mme anditiñ ntiñ-nnim ikọ eketiñde enim owut, enye aka iso ọkwọrọ abaña Jesus, Utom Mme Apostle 2:22-36; 4:12; John 10:7-9

IV Utom Emi Edisana Spirit Akanamde Ke Idem Mmọ Emi Ekenọde Mkpañ-Utọñ

1. Eñwọñọ Christ ama osu, enyuñ eyak obufa odudu enọ mme Apostle, Utom Mme Apostle 1:8; 2:37, 43; 4:13, 33; 6:10

2. Ibọrọ emi Peter ọkọnọde esine utibe eñwọñọ emi anade ọnọ nnyin emi idude ke ukperedem ini Edim Ikọ Abasi emi, Utom Mme Apostle 2:38-40

3. Akakan ñwọrọ-nda idiọñọ Edisana Spirit ekedi mme idiọñọ emi eketienede utom mmọ emi ekebọde Enye, Utom Mme Apostle 2:41-47; Mark 16:15-18

Notes

SE EKPEPDE EBAÑA.

Kpukpru ata nti mme anditiene-Christ ke eyo mfin emi enyene eti ifet, ke mmọ efiọkde ebaña emi ye mifiọkke. Nnyin iduñ ke ini Edisana Spirit, oro edi, Ini Ufọk Abasi. Emi edi ini emi eyakde mme ọyọhọ enọ-mfọn Abasi enọ mmọ emi esañade ekpere “ebekpo mfọn.” Emi edi ini emi mme anditiñ ntiñ-nnim ikọ ke ini Akani Ediomi ekeyomde ndikut, ye mkpaidem ye ọkpọsọñ udọñ. Emi edi ini emi mme ñkpọ oro mme angel ekenyenede udọñ ndikut ekedade itie. Emi edi ini emi nnyin ikemede ndikut, nnyuñ mfiọk, nnyuñ ñkeme ndibọ, mme ñkpọ oro, emi ediwak ndinen owo ke eyo oko ekeyomde ndikut, ndifiọk ye ndinyuñ mbọ.

Eyighe iduhe Jesus ndidọhọ ete ke owo eke ekpride akan ke emana mfọn emi okpon akan owo emi okodude ke ini Akani Ediomi, emi ekedade enye nte andikpon ñkan! Se Jesus eketiñde ikọwọrọke ite ke nnyin imokpon ikan mmọ ke ido edisana uwem, me ke eti ido, me ke ido Abasi, koro kpukpru se nnyin idide – ye se mmọ ekedide eto ke mfọn Abasi ke Christ Jesus. Se Jesus eketiñde ọwọrọ ete ke nnyin ikpon ikan mmọ ke idaha, ke mme utom eke edọñde nnyin, ye ke ikot nnyin ye ke emana nnyin emi eneñere ekpere editọñọ ntak ndi Esie.

Uyọhọ-Idaha Emi Odude Ke Mme Edidiọñ Emi Owo Enyenede

Oto ke mme ukpuhọre emi edade itie nte mme isua ebede, mme ikọ ke mme usem emi etiñde ke ndusuk idaha ewọrọ ñkpọ efen, mme nte ekabarede mmọ ekeme ndiwọrọ ñkpọ efen. Ke mme isua emi ebede, nnyin ikesida ikọ emi edọhọde ete ndomo-nse ke ini itiñde ibaña mme mfọn Abasi, ñkpọ nte utibe utom erifen ke mme idiọk-ñkpọ ye edinam asana ofuri-ofuri. Se ikọ oro akadade ọnọ ọkpụhọre ye se enye ọwọrọde mfin emi. Ke ini oro nnyin iketiñ ibana mme enọ mfọn emi Abasi ọnọde ikọt Esie nte ndomo-nse ikọ Abasi. Edi se ikọ emi ọwọrọde ọkpuhọre oto nte edade enye esin ke usem idahemi ye nte owo emende idorienyin ye mbuọtidem esie ọkọñ ke ifiọk ye ukpep-ñkpọ ererimbot emi. Mfin emi mme owo edodomo ñkpọ ese, utu ke mmọ ndinyenyene ñkpọ oro ke idem mmọ, oro edi mbọm ye mfọn Abasi; ke ntak emi ndidodomo ikọ Abasi nse idighe ifiọk emi owo ekpenyenede mme idorienyin emi otimde ọsọñọ ete ke owo oro enyenyene erinyaña ukpọñ, mme edinam-asana mme odudu emi otode Edisana Spirit. Nnyin imemek ndidọhọ nte ikọ Abasi emi owo enyenede-nyene akan ndidọhọ nte ikọ Abasi emi edomodedomo ese, koro se Abasi enyenede ndiyak nnọ owo, ye emi Enye osuk ọnọdenọ nnyin, idighe ñkpọ-ndomo-nse. Enye edi se owo enyenede-nyene, ye ọyọhọ-ọyọhọ idorenyin, odu-uwem ifiọk, ye eti idaha emi baba owo kiet mikemeke ndinyene.

Mme owo ke eyo oko ema enyene ata ifiọk erifen nnọ ke idiọk-ñkpọ ye edinam esit asana. Ema efen enọ mmọ enyuñ enam mmọ esana oto ke mmọ ndimenere enyin nse Krọs ke mbuọtidem emi Abasi ọkọtọde ke esit mmọ abaña uwa Eke Ọfọnde Ama emi ediwade. Ke nditim ñkpep uwem mmọ, ye se Ñwed Abasi etiñde abaña mmọ nte ñkpọ itoro, ye nte esit mmọ akatuade oyom, onyuñ okutde uyuhọ emi odude ke mbọm ye mfọn Abasi, owut nnyin ete ke mmọ ema ebọ erinyaña ukpọñ emi minyeneke ukpuhọre ye eke nnyin. Etiñ ebaña mmọ ke obufa ediomi nte uwut-ñkpọ mbuọtidem ye edisana uwem, (Utom Mme Apostle 2:29, 30; 28:25; 2 Peter 1:21; Mme Hebrew 11). Edi ata akpanikọ, ke ini Jesus ọkọñwọñọde ndinọ Iberedem, ye ke ini Enye ọkọdọhọde ete ke Iberedem ikedighe kaña inyuñ ikemeke ndidi, ibọhọke Enye (Jesus) ọdọk ke Heaven, Enye iketiñke ibaña kiet ke otu mme enọ-mfọn iba emi mme owo ema ekebọbọ ke idak Akani Ediomi toto ke eritọñọ. Uduọk-mmọñ Edisana Spirit ikemeke ndidi enọ edinam-asana ofuri-ofuri nte ndusuk owo ekpepde, koro ke ini Akani Ediomi, ema esinam mme owo esana. Iberedem ikedighe kaña -- ke akpanikọ ikpenyuñ inọhọ Enye esọk mme andinim ke akpanikọ, ibọhọke tutu Jesus ọdọk ke Heaven.

Mary eka Jesus ekedi ñwan emi ema ekenam asana. Edi Mary ekedi kiet ke otu mmọ emi ekebetde, ekenyuñ ebọde Iberedem (Utom Mme Apostle 1:14). Nnyin ikot ite ke edinam-asana anam nnyin idi kiet ye nditọ Abasi eken ọkọrọ ye Abasi (John 17:21, 23; Mme Hebrew 2:11). Ifiak ikot ite ke owo 120 emi ekebọde Edisana Spirit emi Abasi ọkọñwọñọde, ke mmọ ekedu ọtọ kiet ye esit kiet. (Utom Mme Apostle 2:1). Owo inyeneke se ekpetiñde ñko ebaña owo 120 emi, akan ndidọhọ nte ke ema enanam mmọ esana ofuri-ofuri.

Abasi ama ọbọbọrọ akam emi Jesus ọkọbọñde abaña mbet Esie, ete, anam mmọ esana, mbemiso edisim usen Pentecost. Mmọ ekedu ke esit kiet ke usen oro! Edisana Mary, eka Jesus, okodu ke esit kiet ye Apostle emi, ke usen ifañ eke ebede akakañde Ọbọñ esie, edi Abasi ọtọñọ ntak emenere enye. Akani owo eneni oro ama odu esit kiet ye mmọ emi ini kiet ekeyomde ikpọ itie ke Obio Ubọñ Jesus Christ. Akani owo ọbọ-utomo oro emi ekesede ke ndek okodu ye esit kiet ye enye emi nnyin ikpadade nte akpa ọkọ-ukpọñ nnọ Abasi ke otu mme mbet; oro edi owo emi eketiñde eti mbuk abaña edidi Christ ọnọ owo emi edikabarede edi asaña- utom esie ke ini iso ke Ufọk Abasi Christ.

Kpukpru mmọ emi ekedu ye esit kiet! Ndien ekedi kpa mmọ emi ke Edisana Spirit okodoro! Baba ñkpọ kiet ikemeke ndida oruk edidiana kiet oro ndi, ibọhọke utom edinam-asana. Idighe mmem-mmem ñkpọ inọ mmọ emi enamde esana ndidu esit kiet ye mmọ eke misanake. Man oruk edidiana kiet oro odu, kpukpru mmọ enyene ndinyene edinam-asana ke uwem mmọ.

Edi mmem-mmem ñkpọ ndien ndikut nte ke ini nnyin itiñde ibaña mme enọ mfọn emi anade nte owo enyene, nnyin itiñ ibaña ikpọ enọ-mfọn ita. Akpa, enyene ndifen nnọ nnyin ke uwem idiọk-ñkpọ mbemiso eda nnyin esin ke ubon Abasi. Ọyọhọ iba, enyene ndinam nnyin isana oto ke eritọñọ ntak nda Iyip Jesus nyet esit nnyin man oto do efiak eyak uduot Abasi emi okosopde ke uwem nnyin enọ nnyin nte nnyin ikutde ke Ikọ Abasi, ebe ke edinen-ido ye edisana uwem. Ndien, ke akpatre, sia kpukpru owo ke idak Akani Ediomi ekenyenede ifet ndibọ mme enọ-mfọn iba emi, onyuñ ana iñwañ-iñwañ ete ke owo 120 oro ke ubet enyọñ ema ebọ eñwọñọ emi Jesus ọkọñwọñọde, emi mme anditiñ ntiñ-nnim ikọ ke idak Akani Ediomi eketiñde ete, ke enọ emi enyene nnyin mfin, ndien nnyin imokut do ite ke ọyọhọ enọ-mfọn ita odu ọnọ nnyin ndibọ. Ata utibe ọyọhọ enọ ita emi edi edibọ Iberedem Edisana Spirit emi Jesus eketiñde abaña (John 14:15-18, 26; 16:7-15). Enye edi uduọk-mmọñ Edisana Spirit ye ikañ emi John, ọduọk-owo-mmọñ eketiñde abaña (Matthew 3:11).

Uduọk-Mmọñ Edisana Spirit ye Ikañ

Ke ini Jesus ọkọkpọñde mbet Esie, Enye ama etiñ ọnọ mmọ ete ke Iberedem eyedi man ada mmọ oduk ke ofuri akpanikọ, onyuñ ọnọ mmọ odudu ndinam utom Ọbọñ onyuñ emen ifiọk abaña idiọk-ñkpọ, ye edinen-ido, ye ikpe otuk ererimbot esit. Kpukpru se etiñde emi esu, ke enyuñ eka iso esu. Ema ebọrọ akam Jesus ke abaña edinam mbet Esie esana, ye eñwọñọ Esie ndinọ Edisana Spirit ema enyuñ esu.

Iketiñke inọ owo 120 oro usuñ eke Edisana Spirit ediwutde Idemesie. Owo inyuñ itiñke inọ nnyin usuñ nte Enye edidide, nte Enye ediwutde Idemesie, me kpukpru se Enye edinamde ye nnyin, me ke nnyin, me se edidade nnyin anam, ke ini enọde nnyin uduọk-mmọñ Edisana Spirit. Edi eyighe ikoduhe ke esit owo 120 emi, me ke esit mmọ emi ekedade ekpere, ke ini Spirit ekedide, Spirit isiwutke idem me ndinam ñkpọ ke usuñ kiet ikpọñ-ikpọñ, nte ima ikọdọhọ; odu mme ñkpọ emi Enye esinamde, emi Enye edinyuñ anamde kpukpru ini. Edi ata akpan-ñkpọ nnyin ndiduñọre Ikọ Abasi man itim ifiọk se mme akpan-ñkpọ oro edide.

Ke akpa itie, Iberedem emi enyene ndinọ nnyin odudu ndinam utom Ọbọñ. Enye ñko eyeda nnyin usuñ. Edisana Spirit eyeda nnyin osim ofuri akpanikọ. Eyenam nnyin iti kpukpru se Ikọ Abasi etiñde. Ke ini ibọde uduọk-mmọñ Edisana Spirit, nnyin iyekut ite ke Enye ododuñ ke nnyin, emi ke mbemiso Enye ekedodu ye nnyin. Enye eyenam nnyin idi ntiense ibaña Christ, eyenyuñ ọdọñ nnyin ika ikekwọrọ Eti-Mbuk. Mmọ emi ekotde idem mmọ nditọ Abasi ke eyo mfin enyime kpukpru se etiñde emi. Edi idighe ñkukure se Enye anamde edi oro, emi inyuñ idighe ñkukure idiọñọ emi Enye ọnọde ke ini Enye ọnọde mme andinim ke akpanikọ uduọk-mmọñ Edisana Spirit.

Mme idiọñọ efen ema ewut idem ke ata eritọñọ Akpa Edim. Mmọ emi efañade se Ikọ Abasi ekpepde eneni ete: edieke anade nte eyom kpukpru mme idiọñọ emi ke eyo emi, nnyin inyene ndiyom kpukpru mmọ kpa ke ukem usuñ oro. Edi akpanikọ ndinim nte ke akwa usen ñkpọ-ntibe oro, ke ini Akani ebede efep, ndien Obufa ada itie ke ọyọhọ idaha esie, ete ke mkpọsọñ ñkpọ ekpenyene ndida itie. Onyuñ edi se isọñde-sọñ owo ndikere, ke edade ese nte akwa usen oro eketiede, ntak emi mme idiọñọ eke ekande oro mikadaha itie. Eñwọñọ oro ama osu. Iberedem ama edi, okoneyo ama ebe, ndien ema enọ ọyọhọ edidiọñ oro. Edi ntre, mme ñkpọ-ntibe ye mme idiọñọ ema edu emi mitọñọke aba ntak ida itie. Ekeme ndidi nte ke mmọ ema eda itie ke ini owo otimde ekere abaña usen oro ye akwa ñkpọ-ntibe oro.

Edi yak nnyin ikere ibaña mme idiọñọ ye se ikotibede. Ọkpọsọñ oyobio eke uyom ofimede ama odu. Nte nnyin ñko isikopke ke spirit, nte ukem uyom oyobio oro ofimede ke adañaemi otu ebighide ke akam, man Enye edi ediyọhọ onyuñ ọnọ owo odudu ndinam utom ke iñwañ utom Ọbọñ? Uyom emi ke utọñ obukidem ikemeke nditie idahaemi nte eke akpa, edi ata utom eke Spirit osuk edi ukem-ukem. Kpukpru se Abasi ọkọdọhọde ete eyesu, ke eyenyuñ enam enọ mmọ emi eyomde mfọn Abasi, ke esu ntre idahemi kpa nte ekedide ke ini oro.

Mmọ enyuñ ekut “mme edeme eke esakde ikañ, nte edemede idem edoro mmọ ke ibuot” ke ini Akpa edim ekedepde; emi ñko ke ñkañ Spirit ama ada itie ke ini Ukperedem Edim. Edeme-ikañ emi owo okutde ke enyin idaha aba itie nte eke ata akpa usen emi ekenọde Edisana Spirit ye mme idiọñọ emi Ọbọñ ọkọñwọñọde ndinọ edi ukem-ukem ke ini emi, kpa nte ekedide ke ini oro.

Edi idiọñọ kiet emi misuhe kaña anam ediwak owo edu ke eneni ye eyighe. Edi mbume ikpeduhe. Eyighe ikpenyeneke ndidu ñko. Ñwed Abasi ọdọhọ ete ke owo 120 ema eyọhọ ye Edisana Spirit, edi ediwak owo inyimeke ndida mme ikọ eken. Enye ọdọhọ “mmọ enyuñ etọñọ ndisem nsio-nsio usem, nte Spirit ọnọde mmọ ukeme nditiñ”.

Nte idiọñọ enye emi ama ebe efep? Nte idiọñọ emi ekenyene mbio oro ikpọñ-ikpọñ ke ini Ufọk Abasi ọkọtọñọde obufa? Nnyin imonyime ite ke ndusuk mme idiọñọ oro ekena enọ akwa Usen Pentecost, onyuñ ana ata iñwañ-iñwañ ete Abasi iketọñọke ntak aba inọ mme ndusuk idiọñọ oro tọñọ nte usen Pentecost ekebe! Kpukpru mmọ ema eyọhọ ye Edisana Spirit; ndien eñwọñọ emi enyene nnyin mfin kpa nte ekenyenede mmọ. Ndidian do, kpukpru mmọ ema esem mbufa usem nte Spirit ọkọnọde mmọ ukeme nditiñ. Abasi ikonimke idiọñọ enye emi inọ usen oro ikpọñ-ikpọñ, edi enyene nnyin mfin ñko. Edi idiọñọ emi owutde idem ke ini owo ọbọde uduọk mmọñ Edisana Spirit ye ikañ kpa nte Ñwed Abasi ọdọhọde. Edi ọyọhọ ufik-ñkpọ emi Edisana Spirit efikde owo ndiwut ete ke Edisana Spirit oduñ ke uwem owo oro. Owo ekededi eke ọbọde enọ odudu emi eyekut ete ke Edisana Spirit ada mkpọk-inua ye edeme esie, ndien ke ikọ itoro ewọrọ ke inua esie, idighe ke usem eke andibọ Edisana Spirit oro ọfiọkde, edi, edi ke ata usem idut efen, emi owo ekemede ndifiọk, ke ediwak idaha owo emi otode ke idut oro enyene ndifiọk se enye etiñde, edieke enye adade ekpere ke ini owo oro ọbọde Edisana Spirit.

Imotim isọñọ idọhọ ite ke idighe owo ndikokoi nsem se enye amade ke inua. Idighe owo ndinyeñe ibuot mme ndisiñere idem. Idighe ndisem ikpikpu usem emi baba idut kiet ke ererimbot mifiọkke se ọwọrọde. Enye edi ata usem emi owo efiọkde, ke ediwak idaha, mmọ eke etode obio oro eke usem oro otode esikop enyuñ efiọk se ọwọrọde ke mmọ edade ekpere andibọ Enọ Edisana Spirit. Enye edi ata Ikọ emi otode Abasi, emi Edisana Spirit etiñde ebe ke inua owo. Enye idighe se inamde spirit nditọ Abasi eken emi edade ekpere ekop iyaresit, edi usuñ nte enye ebede oduk andibọ ke idem eyekabare anam Spirit ada edidiọñ ye edidemere ọnọ kpukpru mmọ eke ekande enye ekuk.

Nte idiọñọ emi Ñwed Abasi etiñde abaña Edisana Spirit ama owut idem ini efen? Ih. Ke ini Cornelius ye ufọk esie ekebọde Edisana Spirit ke ñkpọ nte isua itiaba ema ekebe tọñọ ke usen Pentecost, mmọ ekesem nsio-nsio usem enyuñ etoro Abasi (Utom Mme Apostle 10:44-48; 15:7-9). Ke isua 23 ema ekebe tọñọ ke usen Pentecost, Paul ama aka ke Ephesus, “mmọ oro ñko esem nsio-nsio usem” (Utom Mme Apostle 19:1-7). “Uyom ata ọkpọsọñ oyobio” mme “mme edeme eke esakde ikañ” ikoduhe ke mme itie iba oro ke ini mmọ ekebọde Edisana Spirit, edi Abasi ama ọnọ mmọ edisem nsio-nsio usem nte idiọñọ emi Ñwed Abasi adade ọsọñọ uduọk-mmọn Edisana Spirit ke idem mmọ. Abasi ikenimke idiọñọ enye emi inọ usen Pentecost ikpọñ-ikpọñ, edi ama ayak enye ọnọ ke itie iba eke esiakde mi, ọkọrọ ye ekese tọsin owo ke eyo nnyin emi.

Ukperedem Edim

Ke ini Peter ọkọkwọrọde utibe Ikọ Abasi ke Usen Pentecost, enye ama etiñ owut mme ntiñ nnim ikọ emi Joel eketiñde abaña ini Edisana Spirit emi. Tim duñọre suñ-suñ ukwọrọ-ikọ esie, eyekut ete ke enye eketiñ ñkpọ ubak-ubak otuk se Joel ekewetde onim. Kiet ke otu ikọ Peter ekedi “koro uñwọñọ oro enyene mbufo ye nditọ mbufo ye kpukpru mmọ emi edude nsan-nsan adaña owo nte Jehovah Abasi nnyin edikotde etiene Enye.” Ntre, ntak iduhe eke ntiñ-nnim ikọ oro mme edinọ Edisana Spirit, ukem nte ekedide ke Usen Pentecost ekpetrede ke ini Ufọk Abasi ọkọtọñọde-tọñọ. Uñwọñọ oro enyene “adaña owo nte Jehovah Abasi nnyin edikotde etiene Enye;” enye onyuñ enyene mmọ oro edude nsan-nsan.” Eñwọñọ oro eketiñde enim enyene nnyin nde. Ntre, edieke nnyin isañade ke ọyọhọ uñwana Ikọ Abasi, oro edi ke nnyin iyomde ofuri ọyọhọ mfọn Abasi emi akpanade enyene nnyin nde, iyebọ uduọk-mmọñ Edisana Spirit.

Nte nnyin nde iyesem nsio-nsio usem nte Spirit ọnọde ukeme? Imọsọñọ idọhọ ite, ih! Odudu Abasi, Uduak Esie, Ikọ Esie ye mme eñwọñọ Esie edi ukem-ukem mfin, mkpọñ ye ke nsinsi. Edisem nsio-nsio usem nte Spirit ọnọde ukeme edi idiọñọ emi Ñwed Abasi adade ọsọñọ ete ke owo ọmọbọ Edisana Spirit. Nnyin ke eyo emi imoyom idiọñọ emi kpa nte ekedide ke akpa usen emi ekenọde Edisana Spirit ye ke mme ini efen eke eketienede edem, nte ewetde ke Ñwed Abasi.

Sia se Peter eketiñde otuk ntiñ-nnim ikọ Joel akabañade edinọ Edisana Spirit ke usen Pentecost, ọfọn nnyin ndiduñọre ata ntọñọ ntiñ-nnim ikọ emi man nnyin ifiọk kpukpru se ibañade nnyin. Joel etiñ ọnọ nnyin ete ke ini edim iba edidu, kiet eyetie nte akpa edim emi ekesidepde ke Palestine ye eken nte ukperedem edim emi esidepde ke ekperede ini ukpeñe. Akpa edim ke Palestine ekedi ndinam se etọde ọkọri, ndien ukperedem edim ekedi ndinam mfri otim adat. Kpasuk ntre ke edim Edisana Spirit enyene nditie. Akpa edim ekedi ndida ntọñọ Ufọk Abasi ke obufa eyo mfọn emi – oro edi ke eritọñọ ñkọri esie. Ukperedem edim edi ndida Ufọk Abasi nsim ini ukpeñe emi otimde ọfọn ama.

Tim se mme ñkpọ eken emi Joel eketiñde adian edim Edisana Spirit emi. Owo iketimke ifiọk ini emi akpa edim edidepde, edi eneñere etiñ ete ke ukperedem edim eyeda itie ke akpa ọfiọñ isua mme Jew. Ndien ini mbuk ñkpọ-ntibe ererimbot, emi ekemde ye ata isua emi otim anam añwaña ete ke ini emi edi utit ini! Owo ekeme ndidọhọ ete ke mme ntiñ-nnim ikọ emi ebaña Israel ikpọñ, ndien ñko ke mme ntiñ-nnim ikọ Ukperedem Edim edibaña mmọ ñko ke abaña ini editọñọde ntak ntañ mmọ nnyọñ, edieke Apostle Peter mikpetiñke ete ke akwa enọ-mfọn emi enyene mmọ emi edude nsan-nsan, emi Jehovah Abasi nnyin edikotde etiene Enye. Owo ikedaha mme Jew nte mmọ emi edude “nsan-nsan.” Ekenim itie emi enọ mme Gentile emi eketiñde ebaña nte mmọ emi “edude nsan-nsan,” “ke añwa,” mme “isen owo,” ye “mme olive ikọt.” ntiñ-nnim ikọ emi ada ọnọ ñkpọ iba, ke akpanikọ. Nnyin idọhọke ite ke mmọ emi edude “nsan-nsan” edi mme Gentile emi ekedude ke ini oro, ñko, ikọ emi inyeneke mme andinim Christ ke akpanikọ emi edude “nsan-nsan” ke ukperedem ini emi, oro edi mmọ emi eyomde uduọk-mmọñ Edisana Spirit ke ini Ukperedem Edim emi. Ikọ emi enyene oruk owo iba emi enimde ke akpanikọ.

Mme ñkpọ emi Abasi ọkọdọhọde ete iyenam ke ini Edim emi kiet kiet ema esine edisem obufa usem nte Spirit ọnọde ukeme nditịñ. “Ofuri obukidem, oro edi mme Jew ye mme Gentile – ekena nte ebọ enye, enyuñ edian do ete “nditọ iren mbufo, ye nditọ iban mbufo eyetiñ prophecy.” Ikọ emi ekem ndiwut ete ke utibe edisem nsio-nsio usem mfin edi idiọñọ emi Abasi ọnọde ukem nte ọkọnọde mme idiọñọ eken emi Enye ọkọñwọñọde. Edidaba ndap ye edikut ñkukut ekenyene ndidiana do, ndien onyuñ edi akpanikọ ete idighe kpukpru idaha emi enọde Edisana Spirit ke enyene ndidaba ndap mme ndikut ñkukut, koro ekenyene ndinọ ndusuk owo ukeme ndidaba ndap, ye mmọ eñwen ndikut ñkukut.

Ke ọyọhọ ọfiọñ Inañ, ke isua 1906, ke akpa ọfiọñ isua ukpono Abasi mme Jew, ke akwa obio Los Angeles – ayak esisit ndikada itie ukem-ukem ini oro ke ediwak itie efen ke ererimbot – ema etọñọ ntak eyak Edisana Spirit enọ mmọ emi ema ekenam mmọ esana ofuri-ofuri, emi eketiede ebet uñwọñọ Ete. Ntiñ-nnim ikọ Joel ama osu ke ukem ọfiọñ oro; ndien mme ukem idiọñọ oro ema ewọñọ ewut idem kpa nte ekedide ke Usen Pentecost, ye ke mme ini efen ke eyo mme Apostle. Mmọ emi ekebọde uduọk-mmọñ Edisana Spirit ema ebebem iso enyene edinam-asana. Edisana Spirit ama ọnọ mmọ odudu ndinam utom ke ini mmọ ekebọde: mme mkpọk-inua emi ke akpa mikekemeke ikọ nditiñ ema ekabare edi ñkpọ utom ndikwọrọ nnyuñ nsọñọ nda ke mbuọtidem, ndien mme mbet emi ema ekemem enyuñ etọñọ ndiduọk odudu, ema ekabare edi nditọ Abasi emi enyenede uko. Mmọ ema esem nsio nsio usem nte Spirit ọkọnọde mmọ ukeme nditiñ, ukem-ukem nte ewetde ke Edisana ñwed Abasi ke abaña ini emi mme owo ekebọde Edisana Spirit. Mme mbet etọñọ ntak ekekwọrọ Ikọ Abasi, ke ofuri ererimbot, Spirit ọnọ mmọ odudu, Edisana Iberedem onyuñ ada mmọ usuñ.

Ñkpọ iduhe ke esit owo emi otimde oyom Abasi emi oyomde ndisuhọre mme ndikañ utom kiet ekededi emi Abasi anamde ke esit owo. Mmọ emi “biọñ ye nsat-itọñ edinen ido” ọdọñde enyene ọkpọsọñ udọñ ndibọ kpukpru se Abasi enyenede ndinọ mmọ. Edieke eyighe odude ke ekikere ndusuk mmọ, oto ke ntak unana ifiọk mmọ, mme ke se mmọ ekenimde ke akpanikọ ke akpa, Edisana Spirit emi ọñwọñọde ete iyeda nnyin isim ke ofuri akpanikọ eyesọsọp emen eyighe oro efep. Enye odu ke ererimbot mfin emi ndien Enye eyeda kpukpru owo eke eyomde Enye usuñ. Enye odu ye kpukpru owo emi esit mmọ ekabarede ese Heaven; ndien ke ini Enye ebede oduk ke esit mmọ ke ata ọyọhọ idaha emi mmọ ke idem mmọ efiọkde, Enye iduhedu aba ye mmọ edi Enye ododuñ mmọ ke idem ke obufa ebuana. Tọñọ ke ini oro kakaiso, adaña ini nte mmọ esuk edade ke akpanikọ Abasi, Enye ododuñ ke mmọ. Ndien kiet ke otu mme idiọñọ emi otimde owut ete Enye oduñ mmọ ke esit, edi, ke ini Enye okodukde, Enye eketiñ ebe ke inua mmọ ke usem emi mmọ ke idem mmọ mifiọkke.

Questions

MME MBUME

1. Ke mme ini ewe ke Christ ọkọñwọñọ Iberedem? Siak ndusuk eñwọñọ oro nte ekemede.
2. Ewe ntiñ-nnim ikọ ke ekenọ ke Akani Ediomi ebaña edinọ Edisana Spirit?
3. Tiñ nte ekewutde mme enọ ita emi ke idak Akani Ediomi.
4. Nso ke Ikọ Abasi ke nnyin ikeme ndida nsọñọ ikọ emi idọhọde ite ke owo emi oyomde uduọk-mmọñ Edisana Spirit enyene ndibem iso mbọ Edinam Asana?
5. Tiñ mme ñkpọ-ntibe emi ekedade itie ke ini Solomon ekebererede usuñ temple emi ebietde ukem ñkpọ-ntibe emi akadade itie ke usen Pentecost.
6. Nso idiọñọ ke Ñwed Abasi ọnọ abaña uduọk-mmọñ Edisana Spirit? Nte ema enọ mme idiọñọ emi ke ini efen emi eketọñọde ntak eyak Edisana Spirit enọ ke ini mme Mbet? Nte ema enọ idiọñọ emi ke ini ekenọde ukperedem edim? Nte ke enọnọ idiọñọ emi esọk mmọ emi ebọde Edisana Spirit mfin emi?
7. Tiñ se Ñwed Mme Hebrew 13:8 etiñde nyuñ tiñ ebuana emi itie ñwed emi enyenede ye idiọñọ emi Ñwed Abasi etiñde ke abaña uduọk-mmọñ Edisana Spirit mfin.
8. Nso ikada itie ke utom emi mme Apostle ekenamde enọ Abasi ke mmọ ema ekebọ Edisana Spirit? Tiñ mme ukpuhọre emi ekedade itie ke uwem mme Mbet kiet kiet ke ini mmọ ema ekebọ Edisana Spirit ye ke ini mmọ mikọbọhọ.
9. Owo ndinam utom esie mma ọwọrọ didie?
10. Mum ke ibuot nnyuñ tiñ eñwọñọ emi anade ọnọ nnyin ke ukperedem ini emi, nte ewetde ke Utom Mme Apostle 2:39