Utom Mme Apostle 4:32-37; 5:1-16

Lesson 284 - Senior

Memory Verse
IKỌ IBUOT: “Inyene eke edeme nsu ọkọde ebiet edinime ibifik mmọ eke eyomde mkpa” (Mme Ñke 21:6).
Cross References

I Akpa Ufọk Abasi

1. Otu mme andinim ke akpanikọ ekedu ke esit kiet ye spirit kiet, Utom Mme Apostle 4:32; Ñwed Mbon Rome 15:5, 6; Ñwed Mbon Philippi 1:27; 2:2; 1 Peter 3:8

2. Ye akwa odudu mmọ etie ntiense ebaña eriset Christ, Utom Mme Apostle 4:33; 1:8, 22

3. Ema enyam mme ufọk ye mme isọñ enyuñ eda okuk ebahare, Utom Mme Apostle 4:34 -37; 2:45

II Mbubik Ananias Ye Sapphira

1. Ananias ye Sapphira ema enyam se mmọ ekenyenede edi esio ubak okuk enim, Utom Mme Apostle 5:1, 2

2. Peter ama asua ọnọ Ananias ndien Abasi ọdọñ ubierikpe osim enye, Utom Mme Apostle 5:3-6; Numbers 30:2

3. Sapphira ñko osu nsu onyuñ ọbọ ukem-ukem ubierikpe, Utom Mme Apostle 5:7-11

4. Mme idiọñọ emi enyenede nditiene mme andinim ke akpanikọ ema edu ndiwut nte Abasi ama onyime nte ufọk-Abasi oro ekenamde ñkpọ, Utom Mme Apostle 5:12-16; Mark 16:17, 18

Notes
SE EKPEPDE EBAÑA

Edidiana-kiet

Isua ita ye ubak emi Jesus akadade anam utom Ikọ Abasi, emi mkpa ye eriset Esie akadianade, ọkọrọ ye edidọñ Edisana Spirit emi ekedọñde; ke usen Pentecost, ama anam akamba ukpuhọre ke uwem ye ke esit mme mbet. Mmọ ema ekut ete idighe mme imọ inyene idem mme imọ aba, koro ema edep mmọ ke ekọm-urua kpa nsọñ-urua iyip Jesus. Ekekot mmọ ke nsio-nsio idaha ñkpọ uwem emi ete edisaña ye suñ-suñ owo Nazareth. Mmọ ema ekop nte Enye eketiñde abaña edidi obio Ubọñ, ema enyuñ enyene mme nsio-nsio edinam ye udọñ ke abaña edibọp ye edikara Obio Ubọñ oro. Mmọ ema ekut Enye ọkọkọkde mme udọñọ, ọdọñde mbon ukut esit, ọnọde mme otu owo udia, anamde mme akpa-mkpa eset onyuñ asuade ọnọ mme anam-idiọk. Mmọ ema ekop nte Enye eketiñde ke ọkpọsọñ uyo ndisua nnọ mbon mbubik emi ekedude ke eyo mmọ ye nte Enye okonyuñ otorode ubuene ebekpa koro enye ọkọnọde kpukpru se enye ekenyenede. Mmọ ema edu ye Ete Ufọk mmọ ke akpatre udia mbubreyo enyuñ ekut nte eketapde Enye enọ mme asua Esie; edi ke ini emi ekebede mmọ ema ekut nte Enye ọkọbọhọde ke ubọk mmọ oro ekeyomde ndiwot Enye. Mmọ ema ekop Ọbọñ mmọ ọbọñde akam ete ekpekam eyet mmọ esana man mmọ ekpekeme ndinyene ebuana ye edidiana kiet emi, ekemede ndidu nto ke Iyip edinam asana ikpọñ-ikpọñ. Ema enyuñ enam mmọ esana.

Ndusuk utọ edidiana kiet oro ikoduhe ke ufọk-Abasi mbemiso nte okodude ke ini oro. Kpukpru mmọ ekedu ke esit kiet ye spirit kiet. Ema esio kpukpru ntọi idiọk itọñ ye idiọk udori ke uwem mmọ efep. Ke akpanikọ mmọ ekedi mbon “Ufọk Abasi emi ọyọhọde ye ubọñ minyuñ inyeneke ntọi mme eriñwine mme oruk ñkpọ eke etiede ntre... asana onyuñ anana ndo” (Ñwed Mbon Ephesus 5:27). Mmọ ekedi mbak enyuñ etie nte uwut-ñkpọ ke abaña utibe ye mme utọ edinam akpanikọ emi ediọñọde nte Ñwan-ndọ Christ, ufọk- Abasi mmọ emi edide ikpan, ema ekenyuñ enyene ọyọhọ erikan. Ke akpanikọ mmọ ema ebọ ọyọhọ edinam-asana mbemiso ebọ utibe enọ ọyọhọ ita, kpa uduọk-mmọñ Edisana Spirit emi mmọ ekebọde ke usen Pentecost (Utom Mme Apostle 2:1 da domo ye Mme Hebrew 2:11 ye John 17:21, 23).

Eriset ke mkpa Jesus ye idorienyin eriset emi ufọk-Abasi enyenede ekedi akpan ukot ikọ ntiense ye ukwọrọ-ikọ mmọ. Ekedi ukot ukwọrọ-ikọ emi ke abaña eriset ke mkpa akanam mme odudu hell ye Satan edaha eda eñwana ọkpọsọñ ye mme Apostle ye mme mbet. Edi mmọ ema enyene obufa idorienyin ke Abasi, kpa idorienyin eriset ke mkpa, emi ekedide odu-uwem idorienyin koro ema enam Christ eset ke mkpa. “Edieke mikanamke Christ eset, mbuọtidem mbufo ọwọrọ ikpikpu, mbufo ke esuk edodu ke mme idiọk-ñkpọ mbufo,” Paul, Owo-mbet ama afaña ke ini iso onyuñ emen owut nnyin isọñ akpanikọ emi mme Mbet ekedade toto ke eritọñọ.

Ke ini ekopde mme ikọ-ndighe enyuñ ekutde mme ukọbọ emi ebetde mmọ oto ndiọi odudu, koro ukwọrọ-ikọ mbet akabañade akpan idorienyin ye ukpep-ñkpọ emi ọnọde ufọk-Abasi uwem, mbet ema etọñọ ndibọñ akam ñkan nte mmọ ekesibọñde akpa ete Abasi ọnọ mmimọ uko ndikwọrọ Ikọ, enyuñ ebeñe mme idiọñọ ye mme utibe-ñkpọ nditiene, oto ke enyiñ Jesus.

Idara ye inemesit ema eyọhọ esit mmọ; ye ata ima ndima Abasi, ye kiet eken, ama ọyọhọ ofuri uwem mmọ onyuñ anam esit mmọ emi ema ekeyet asana ọdọdiọñ adiana kiet. Ema ebup ọfiọk-ñkpọ owo kiet mbume emi “Nso idi ufan? Enye ọbọrọ ete: “Ukpọñ kiet emi oduñde ke idem owo iba.” Ikọ Abasi etiñ ọnọ nnyin ete “Edi otu mmọ emi enimde ke akpanikọ, enyene esit kiet ye spirit kiet.” Ema ebọp mmọ edian ọtọ kiet ke ima nditọ Abasi ye ebuana emi mmọ eke ema ekenam esana efiọkde— emi ererimbot mifiọkke.

Mmọ ikokotke inyene mmọ eke mmọ, baba owo mmọ kiet ikananake ñkpọ. Mmọ ekebuabuana kpukpru ñkpọ. Mmọ emi ekenyenede mme ufọk ye isọñ ema enyam enyuñ eda okuk esọk mme Mbet man edeme ekem nte ekemde ye unana kpukpru owo.

Etiñ enọ nnyin ete Joses, emi mme Mbet ekekotde Barnabas ama enyene isọñ onyuñ anyam ada okuk edinim ke ukot mme Mbet. Owo itiñke inọ nnyin ite Abasi ama oyom oro oto enye, edi enye ama ayak kpukpru se enye ekenyenede esin ke ubọk Abasi ke ofuri esit. Nnyin ifiọkke mme okuk ifañ ke isọñ oro akakpa. Ekeme ndidi okuk oro ama awak onyuñ ekeme ndidi okuk ekedi ekpri. Edi ekpedi nte ekededi ekenọ emi ke ntak Christ ye utom Esie.

Unana Edikpe Ekọm-Urua

Nnyin ikut ite okposuk edi idude ke idaha mfọn ntem edi mmem-mmem ndiduọ. Ananias ye Sapphira ñwan esie, ema enyam se mmọ ekenyenede, edi ebahade ubak okuk enim enọ idem mmọ. Emi edi ata ukem edinam mmọ emi edọhọde ete idi nditọ Abasi, edi emum se inyenede Abasi ekama. Ubak emum ini mmọ; mmọ inyeneke ifet baba kiet ndinam utom Ọbọñ. Mmọ enyene ini enọ inemesit ye mbubehe mmọ, edi esin edikpono Abasi. Mmọ eyesuhọre etie ke ufọk, ikaha ufọk-Abasi edieke minemke mmọ ke idem ndika; mme ke edọñọde esisit, mme enyuñ enyenede ekpri utom ndinam, mmọ enyene ndiyom se etiñde eda enyaña idem mmọ ke nditre ndinọ ima, ini ye utom mmọ emi enyenede Abasi.

Ndusuk owo emum mme ndammana-enọ mmọ ekama. Utu ke eda ndammana-enọ mmọ enam ñkpọ enọ Abasi, mmọ emum ofuri-ofuri ekama, ndusuk enọ nte mmọ emade, enyuñ ekpe ubak ekọm-urua.

Nsu

Se ekemede ndidọhọ ete ndiọk ñkan ke mbuk Ananias ye Sapphira idighe koro mmọ ekenimde ubak okuk, edi koro mmọ ekesude nsu ebaña se mmọ ekenamde. Mmọ ekeyom mme Mbet ekere ete mmimọ ima inọ kpukpru; do abiaña ye mbubik ekedi se mmọ ekeduakde. Ananias ye Sapphira ema ediomi ke idem mmọ enyuñ ebiere ndinim ubak okuk nte ñkpọ mkpeme-idem ke abaña ini usọñ mmọ. Ndusuk mmọ ema ekere ete ini eyedu emi uñwam emi otode Abasi edikpude mmọ, do ke mmọ ediyom okuk ndida ññwam idem. Edi mmọ ekeyom ndidu ke otu mmọ emi ewọrọde etop, edi iyomke ñkpọ ererimbot emi kiet atak mmọ ke ndinọ kpukpru, ntre ke mmọ ekebiere ndinim ubak okuk edi enam nte ema enọ kpukpru. Ananias ye Sapphira iketuakke ida ikere ite ke mmimọ ikenam ñkpọ emi ye Abasi idighe ye owo. Mmọ ema efre ete “Abasi eyekot kpukpru ñkpọ emi enamde edi ikpe, ọkọrọ ke kpukpru ndibe-ndibe ñkpọ, edide eti, enyuñ edide mme idiọk” (Ecclesiastes 12:14).

Peter ikọdọhọke ite “Ananias omosu nsu ọnọ mi.” Enye ọkọdọhọ “Ananias, nsinam Satan ọyọhọde fi esit, esin osu nsu ọnọ Edisana Spirit?... Usuhu nsu unọ owo, osu ọnọ Abasi.” Ke Ananias okopde mme ikọ emi enye ọduọ ke isọñ akpa, ndien mkparawa emen enye idaha oro ekebuk.

Ke hour ita ema ekebe ñwan esie oduk edi, inyuñ ifiọkke se ikotibede inọ ebe esie. Peter obup enye me mmọ ekenyam iñwañ ebọ ibat okuk oro. Ibọrọ esie ekedi, “Ikọbọ adaña oro.” Peter asua ọnọ enye ete “Anam didie mbufo edukde ediomi ndidomo Spirit Jehovah nse?” Ke ndo-ndo oro enye ọduọ ke ukot Peter akpa, ndien mkparawa emi ekenyọñde ndibuk ebe esie emen enye ewọrọ ekebuk.

Ubiere-Ikpe

Ke ifet enye emi ubiere-ikpe ekedi usọp-usọp. Idiọk-ñkpọ mmọ ikedighe ekpri, ntre Abasi ama onyuñ ọnọ ata akamba ufen. Ubiere-ikpe ekeme nditre ndidi usọp-usọp, nte edide ke usuñ enye emi me ke mme usuñ eke ebietde enye emi, ke ini enamde utọ idiọk-ñkpọ emi me efen, edi ubiere-ikpe eyedi, nte ededi. Owo ekeme ndibọ ufen emi okponde ke uwem emi, ke ntak idiọk-ñkpọ esie, edi oro iwọrọke ite ufen esie ke ererimbot enye eken eyesuhọre. Kpukpru mmọ emi enyenede ubiom-ikpe idiọk-ñkpọ, minyuñ ituaha mkpọfiọk ibọ erifen, eyetop mmọ esin ke ikañ hell emi asakde ke nsinsi.

Ke idahaemi ufọk-Abasi okodu ke eritọñọ esie, ndien ke ntak ufọn ufọk-Abasi, Abasi owut iyaresit Esie ke abaña, inọ ye mbubik. Ekpedi ema eyak mme owo iba oro ekeduede edu uwem, mmọ efen ekpetiene nde ikpat mmọ ekere ete ke anyan ime Abasi eyeda mbọm ọsọk mmọ. Abasi ama ọfiọk emi “koro miwarake ndinọ idiọk owo ufen, oro esin nditọ owo esọñ esit ke idem mmọ enam idiọk” (Ecclesiastes 8:11). Abasi ọkọnọ ubiere-ikpe Ananias ye Sapphira nte uwut-ñkpọ edinen ubiere-ikpe Esie.

Mme Ikpọ Utibe -Ñkpọ

Akamba ndik ama odoro ufọk-Abasi ye kpukpru mmọ emi ekekopde ebaña utom Abasi ye ikot Esie. Ubiere-ikpe emi ama ekem ye ntak emi ekenọde enye, koro ata edisana uwem ye nnen-nnen edinam, ema eyọhọ kpukpru esit; ndien edieke okodude mme mbubik ye ñkari efen emi ekesuhọde, ema esọsọp esioño efep ke otu mmọ. Mme owo ema ekop odudu emi akasañade ye ukpep-ñkpọ emi, Abasi anam mme ikpọ utibe-ñkpọ ye mme idiọñọ oto ke ubọk mme Mbet.

Etop emi ama asuana idighe ke Jerusalem ikpọñ, edi ye mme obio emi ekanarede enye ekuk. Mme owo eto kpukpru ebiet eda mbon udọñọ mmọ edi. Ema ewak eti eti tutu ndusuk ikemeke ndisim Peter, do mmọ enim mbon udọñọ mmọ ke mbri ye mkpana ke mben usuñ man mbukpọñ Peter emi asañade ebe ekeme ndisim mmọ. Ikọ Abasi ọdọhọ ete “enam udọñọ okure kpukpru mmọ.” Emi ekedi mbuọtidem emi otu owo ekenyenede, emi okonyuñ edi odudu emi okodude ke ñtọñọ ufọk Abasi. Ekedi nsuhọridem mme Mbet akanam mme utibe idiọñọ emi etiene utom mmọ oto ke odudu Edisana Spirit. Mmọ ikọdọhọke ite ke mmimọ inyene odudu ke idem mmimọ, mme edisana uwem idem mmimọ akanam mme idiọñọ emi etiene utom mmọ. Ekedi ke enyiñ Jesus ye mbuọtidem ke enyiñ emi akada erikọk edi. Eyak nnyin isọñọ iñwana “kabaña ikọ mbuọtidem, emi ema ekeyak ini kiet ko esin nti ikọt Abasi ke ubọk” (Jude 3).

Questions
MME MBUME
  1. Idaha Ufọk-Abasi ke ñkañ spirit eketie didie ke ini emi?
  2. Nso ke Joses akanam ke abaña iñwañ emi enye ekenyenede?
  3. Nso ke Ananias ye Sapphira ekenam ke abaña mme ñkpọ emi mmọ ekenyenede?
  4. Abasi ekese edinam Ananias ye Sapphira didie?
  5. Unọmọ emi akada nso ñkpọ etiene Ufọk-Abasi ye ofuri otu owo?
  6. Nso itibe inọ nnyin mfin edieke isude nsu me ibiañade abiaña?
  7. Nso utibe-ñkpọ ke Abasi akada akam mme Mbet anam?
  8. Ke ini ndusuk owo mikekemeke ndisim mme Mbet, nso ke mmọ ekenam ye mbon-udọñọ mmọ?