Lesson 287 - Senior

Memory Verse

IKỌ IBUOT: “Usuñ ndisime owo enen enye ke enyin: edi owo eke okopde item enyene ibuot” (Mme Ñke 12:15)

Cross References

I Nsọñ-ibuot Ke Shechem

1. Mme esien edem edere ebeñe ete esio urua utomo enọ mmimọ, 1 Ndidem 12:1-5

2. Edidem oyom item oto mkparawa ye ikpọ owo, 1 Ndidem 12:6-11; Mme Ñke 1:25-33

3. Edidem ọbọrọ ukem nte mkparawa ekenọde enye item, 1 Ndidem 12:12-15

4. Mme esien edem edere esọñ ibuot, 1 Ndidem 12:16-19

II Ukara Ke Edem Edere Israel

1. Enim Jeroboam ke edidem, 1 Ndidem 12:20, 25

2. Enye onim ido edikpono Abasi nte ekemde ye ukara emi enye oyomde, 1 Ndidem 12:26-33; Ñwed Mbon Galatia 1:6

III Ukara Mbon Judah Ke Edem Usuk

1. Rehoboam aduak ekọñ, edi okop uyo Abasi emi akpande enye, 1 Ndidem 12:21-24

2. Rehoboam ada Judah esin ke ntọtuñọ edikpono-ndem, 1 Ndidem 14:21-23; 2 Chronicle 12:1

3. Abasi ada ubọk Shishak, edidem Egypt, ọtunọ mmọ, 2 Chronicle 12:2-5; Judges 2:14, 3:7, 8, 12

4. Abasi owut mbọm ke adaña emi Rehoboam ọsuhọrede idem esie, 2 Chronicle 12:6-12; 1 Ndidem 21:29

5. Ukara Rehoboam ekedi idiọk ukara, 2 Chronicle 12:13-16

Notes

SE EKPEPDE EBAÑA

Idiọk Uwut-ñkpọ

“Ndien ñko ami nsua ofuri ọkpọsọñ utom emi enamde ke idak utin: koro nnyenede ndinim enye nnọ owo eke editienede mi edem. Ndien anie ọfọfiọk mme enye edidi owo eti ibuot mme edidi owo ndisime?” (Ecclesiates 2:18, 19). Solomon ama otim ekere abaña edu uwem eyen esie, edi ọkpọkọfọn adaña didie edieke enye ọkpọkọkpọñde eti uwem owo Abasi nte uwut-ñkpọ onim ọnọ eyen esie etiene. Solomon ndikpọñ Abasi ke ini usọñ esie edi ñkpọ mfuhọ. Edi ñkpọ eke ọsọñde ndinim ke akpanikọ nte ke enye emi Abasi ọkọdiọñde akan ofuri ndidem eken ama ọwọñọre ọkọkpọñ Abasi aka ukpono-ndem. Nso utọ idiọk edinam ke enye ọkọkpọñ onim ọnọ eyen esie ye kpukpru mmọ efen! Enye ekekeme didie ndiwut eyen esie ifiọk usuñ ata Abasi, ke ini uwem ye edinam esie esañade isio? Ndusuk mme ete ye eka mfin emi eyom nditọ mmọ eduk usuñ emi mmọ ke idem mmọ ema ekekpọñ. Ọkpọkọfọn didie edieke mmọ ekpekenimde nti uwut-ñkpọ enọ nditọ mmọ!

Idiọk Ubiere-Ikpe

Ke ndo-ndo oro Solomon ama akakpa nditọ Israel edọñ ekedọhọ Jeroboam ọnyọñ ke Egypt edi. Abasi ama ọñwọñọ ọnọ Jeroboam ndikara esien Israel duop ndien sia mme owo ekenyenede ifiọk ebaña emi, mmọ ema eyom enye. Ekebe ke enye ñkañ edere esien Israel duop eyom Rehoboam anam utomo efere mmọ.

Abasi ama ọnọ Solomon akwa ifiọk, edi ke idaha ñkpọ-ntibe enye emi, Enye ọbọ eyen Solomon ifiọk ndikpe edinen ikpe. Andinọ kpukpru nti ye enọ eke ọfọnde ama emekeme ñko ndimum ubọk Esie ñkama ke ini Enye ekpede ebiere ndinam ntre. Enye emi ọkọnọde Nebuchadnezzar ukara ye itie edidem ye ubọñ ye ukpono, kpa Enye ñko akanam enye ọsuhọre onyuñ ọbọ enye ifiọk. Enye ekeme ndisuhọre kpukpru mmọ oro esañade ke ntañ-idem. “Ntre ke edidem ikopke inọ mbon oro: koro Jehovah akanamde ọwọrọ ntem” (1 Ndidem 12:15). Idiọk mkpe-mbiere Rehoboam ekedi usuñ emi Abasi akadade ọbọ enye ubak obio ukara.

Ido Ukpono Abasi Eke usuñ owo

Ke ema ekesin ebeñe mmọ, mme esien ñkañ edere esọñ ibuot enyuñ enim Jeroboam ke edidem mmọ. Edi akana nte enye asaña ke mbet Abasi, ndien ukara esie eyesọñọ ada. Utu ke ndisuk ibuot esie nnyuñ mbuọtidem ye Abasi, enye ọwọñọre etiene ifiọk idemesie onyuñ ọtọñọ usuñ ukpono abasi esie. Enye ikeyomke akpanikọ edi akada ñkari usuñ man akara nte ekemde ye idiọk udọñ esie. Enye ama otibi mmem-mmem usuñ ukpono ọnọ nditọ Israel ndien ekese mmọ ema enyime. “Akan mbufo ndidọk ke Jerusalem,” oro ekedi ikpikpu ikọ emi Jeroboam eketiñde ndida Israel nsin ke ido edikpono abasi obukidem emi asañade ye mme usọrọ ye mme edinam, edi inyeneke odudu ndikpuhọre uwem mmọ.

Edu ikọ Abasi eke asañade ye uwak usọrọ emi Jeroboam okotibide onim ọnọ uduak esit esie ebiet ukem ndusuk ido ukpono Abasi eyo emi. Ata ediwak owo ekpọñ akani usuñ enyuñ etiene mmem-mmem usuñ. Mmọ inyuñ ikereke ite ke ọfọn nditọñọ edọñ ke akani itie ubọñ akam ye ata edikabare esit man mmọ ekabare emana obufa. Mmọ esaña ye edikọm ubọk, ñwed akaña ye ebeñe emi ebeñede mmọ ete, afo “nyime Christ nte Andinyaña fi,” oro eyenam fi edi anditiene-Christ, emi edi se mmọ edọhọde. Edi ata erinyaña ọtuñọ akan emi. Ndot-ndot mmọñ eyet edikabare esit, ye editua nyom mbọm Abasi, ukpuhọre ke ata isọñ esit ye ntiense emi otode Abasi, nte ke efen kpukpru mme idiọk-ñkpọ edi idiọñọ ọnọ kpukpru mmọ emi esañade ke usuñ Abasi, etim idem mmọ ndika heaven. Mme mboho ye nsio-nsio ido ye nsu-nsu usuñ edikpono Abasi enyene nso udori, edieke ke akpatre owo ọduọkde ukpọñ esie?

Ido edikpono Abasi Jeroboam ekenem mmọ emi emade idiọk-ñkpọ, mmọ emi mikwe idiọk emi odude ke ediñwọñ mmin, unek, me mme inemesit ke mme idiọk-ñkpọ eken. Ererimbot mfin emi ọyọhọ ye mme okpono Abasi emi minimke ke akpanikọ ite ke owo ekeme ndidu uwem eke okoñde akan idiọk-ñkpọ. Mmọ ebọp enyin mmọ man ekukut akpanikọ enyuñ eyom usuñ ndibọhọ Ikọ Abasi emi ọdọhọde añwa-ñwa ete “Baba owo kiet emi Abasi okobonde inamke idiọk-ñkpọ” (1 John 3:9). Ndusuk mme andikpep mbon efen usuñ Abasi eneñere enim ke akpanikọ ete mmimọ isaña ke eti usuñ okposuk edi mmọ edude ke idiọk-ñkpọ, emi anam owo otop afara onyuñ edighe, ndifiọk ete ke mmọ edu ke otu mmọ “eke minyimeke ndibọ ima akpanikọ, man ekpenyaña mmọ?” Ikọ Abasi ọdọhọ ete “emi esin Abasi ọdọñ abiaña ndinam utom ke esit mmọ, ete enim nsu ke akpanikọ: man edikpe ikpe kpukpru owo emi midaha akpanikọ edi edarade ke ukwañido” (2 Ñwed Thessalonica 2:10-12).

Nsu-Nsu Mme Anditeme

Owo ekeme ndikere ete ido ukpono Abasi ke ifiọk owo nte Jeroboam ekenimde ekpenyene ndisọp mbiara ndien etop eduọk; edi mme oruñ idiọk-ñkpọ ototim ọtuñọ oduk ke uduot owo, ndien esit owo eke mimanake obufa ototim ọdiọk, anam Israel etiene ido ukpono abasi eyen-enañ emi ekedide ndem, tutu editañ mmọ nte ifin ke ñkpọ nte isua ikie iba ema ekebe. Anditin ntiñ-nnim ikọ ama ewet ete: “Esit abiaña akan kpukpru ñkpọ, onyuñ abiara fap; anie edikeme ndifiọk enye? Ami Jehovah nduñọre esit, ndomo ñkpọ esit idem, man nnọ kpukpru owo nte ekemde ke usuñ mmọ ye nte ekemde ke mfri utom mmọ” (Jeremiah 17:9, 10). Ediwak owo edomo nditie ufan-ufan ye se ekpededi emi ekotde ke enyiñ edikpono Abasi, mmọ eyenyime, edi enọ nnyin ntọt ebaña mme anditin ntiñ-nnim ikọ abiaña. “Edi mme prophet abiaña ema enyuñ ebiọñọde ke otu mbio-obio, kpa nte abiaña-abiaña mme anditeme edinyuñ edude ke otu mbufo; mmọ edisaña ndibe ndibe eda esen ukpep-ñkpọ eke osobode ukpọñ owo, eduk etiene mbufo, edinyuñ ekañ kpa Ọbọñ emi akafakde mmọ, edinyuñ esin nsobo abuat idem mmọ. Ediwak owo eyenyuñ etiene mmọ ke mbukpo ido mmọ; oto mmọ ke owo eyenyuñ etiñ idiọk edian usuñ akpanikọ. Ke mbumek mmọ ke eyeda ikọ abiaña ekama mbufo enam mbubine; toto ke eset ubiom-ikpe mmọ itreke ndibine mme mmọ emi, nsobo mmọ inyuñ iyetke idap. Koro edieke Abasi mikayakke mme angel emi ekeduede ebọhọ, edi otopde mmọ ọduọk ke itie ufen,....” (2 Peter 2:1-4). Abasi ididarake kpukpru owo emi ekotde enyiñ Jesus ke mkpọk-inua. Enye anam nnyin idiọñọ ite ke ana nnyin itiene akpanikọ, inyuñ idu uwem emi okoñde akan idiọk-ñkpọ man nnyin ikeme ndida Obio Uboñ Heaven nnyene.

Rehoboam

Rehoboam ikọfiọkke adaña nte mme oruñ nsọñ-ibuot ekeniọnde, ibọhọke tutu enye ọdọñ Adoram, emi ekedide andibọ utomo ke Israel. Do ndien ke Rehoboam ekefehe ke chariot esie aka ke Jerusalem ndidibe, onyuñ okot udim-ekọñ Judah ye eke Benjamin nditre nsọñ-ibuot oro. Ekedi ke ufọn esie ndikop uyo Abasi nnyuñ ntre ndiwọrọ ñka ñkañwana ye Israel. Ekedi ñko ke ufọn esie ye eke mbọñ esie ndisuhọre idem mmọ ke ini Shishak edidem Egypt ekedide ndiñwana ke Jerusalem; edi ke ediwak ini Rehoboam “onyuñ anam idiọk, koro miwukke esit esie ndiyom Jehovah” (2 Chronicle 12:14).

Utit Eyo Mfọnọ Ñkpọ

Ukara oro ọkọyọhọde ye ubọñ emi Abasi ọkọnọde Solomon ọkọsọp ndibiara adaña didie oto ke edikpono ndem! Ke ndo-ndo oro Solomon akakpade ukara ama abahare ke ikpehe iba; ukara ñkañ edere ekedi esien duop emi ekotde Israel, ye ukara ñkañ usuk emi ekedide Judah ye Benjamin emi ekediọñọde nte Judah. Ikedighe ukara ndibahare ikpọñ-ikpọñ, edi ikebighike, ke ọyọhọ isua ukara ition tọñọ nte Rehoboam ọkọtọñọ ndikara, Shishak edidem Egypt ama edi ke Jerusalem editañ ñkpọ-uto ufọk Jehovah ye eke ufọk edidem ñko. Utu ke Rehoboam anam otu-ekọñ gold, enye anam eke okpoho. Ema edomo ndinam enyọñ-enyọñ ido ukpono Abasi, edi ata ubọñ ama ọkpọñ Jerusalem; gold ama akabare edi okpoho, idaresit esie akabare “akpañkpañ eke oyomode.” Nditọ iren Israel ekpenyene nditua nnyuñ mfuhọ, nditọ iban ekpekenyene ndisio mkpo eyet, koro eti obio-ubọñ amakabare abiara, oto ke emi Judah ọkọkpọñde Abasi esie!

Questions

MME MBUME

1. Nso ebeñe ke Nditọ Israel ekenim ke iso Rehoboam?
2. Nso ke afo ekere abaña ibọrọ esie?
3. Nso idi ntak emi Rehoboam ọkọbọrọde ntre?

4. . Ewe esien ekedu ye Jeroboam? ye Rehoboam?

5. Edibahare ukara emi ekebighi adaña didie?
6. Nso ikọbiọñọ Rehoboam ndiñwana ye Israel?
7. Nso idi ntak emi Jeroboam akanamde eyen-enañ o - gold?
8. Jeroboam akada ifiọk ukpono Abasi esie ke mmọñ?
9. Ke didie ke mbọm Abasi akayararede ọnọ Rehoboam?
10. Nso ibio-ibio ñkpọ ke etiñ ebaña ukara Rehoboam?