Lesson 281 - Junior
Memory Verse
IKỌ IBUOT: “Mbufo eyebọ odudu ke Edisana Spirit ama edi edidoro mbufo ke idem: mbufo eyenyuñ edi mme ntiense Mi ke Jerusalem, ye ke ofuri Judaea ye Samaria, tutu osim utit ererimbot” (Utom Mme Apostle 1:8).Notes
Eñwọñọ Abasi
Ke akpatre okoneyo emi Jesus okodude ye mbet Esie mbemiso ekekọñ Enye, Enye ama ọñwọñọ ọnọ mmọ ete ke Iberedem eyeto ke Heaven ediduñ ke mmọ. Iberedem emi eyetiñ ediwak ñkpọ ọnọ mmọ ke abaña Jesus ye Heaven, ndien eyekpep mmọ se edinamde ye ebiet eke edikade.
Nko, ke Jesus ama ekeset ke mkpa, Enye ama etiñ ọnọ mmọ ete ke Edisana Spirit eyedi edidoro mmọ ke idem. Enye ama ọñwọñọ ọnọ mmọ: “Mbufo eyebọ odudu, ke Edisana Spirit ama edidoro mbufo ke idem: mbufo eyenyuñ edi mme ntiense Mi ke Jerusalem, ye ke ofuri Judaea ye Samaria, tutu osim utit ererimbot” (Utom Mme Apostle 1:8). Edisana Spirit ekedi iberedem emi Jesus eketiñde abaña ọnọ mmọ. Enye eyedi idọñesit, andikpep, onyuñ ọnọ mmọ odudu.
Kpukpru se Jesus eketiñde emi ikotimke iñwaña mbet, ndien mmọ ekesuk eyoyom ndifiọk mme Jesus ke oyom ndinim ukara Esie mi ke isọñ ke ini emi. Ekeme ndidi mmọ ekekere ete ke emi edi odudu obukidem, ndien ke emi eyenam mmọ esọñọ idem enyuñ ekeme ndiñwana nkan ukara mbon Rome. Edi Jesus anam mmọ efiọk ete ke oro idighe akpan ñkpọ. Enye okoyom mmọ enyene udọñ ke ndinyene odudu spirit emi ekemede ndida nkan satan. Enye okoyom mmọ edi mme ntiense man ebe ke mmọ Edisana Spirit akabare mme anam idiọk ọnọ obio ubọñ Abasi.
Edisobo Ke Jerusalem
Jesus ama etiñ ọnọ mmọ ete ke edi Jerusalem ke Edisana Spirit edidi edidoro mmọ ke idem, ndien emi eyedi “ke usen ifañ mibehe kaña.” Ntem mbet ema etọñọ isañ eka Jerusalem ini kiet, enyuñ etọñọ ndibọñ akam. Mmọ ekedi owo 120 emi ekedude ke ebiet oro ndituak ibuot nnyuñ ntoro Abasi. Mmọ ikọfuhọke aba ke abaña mkpa Jesus, edi mmọ ema edara koro Enye ama akan mkpa onyuñ afiak aka ke Heaven. Nso utọ erikan ekedi oro ọnọ mmọ ete Andifak mmọ ama eset ke mkpa, onyuñ ayarare Idem Esie nte Eyen Abasi!
Edisobo oro ama aka iso ke ñkpọ nte usen duop, ye ubọñ Abasi ke otu mmọ. Ema enam kpukpru mmọ esana, mmọ enyuñ ekpono Abasi ke esit kiet, oro ekesin Spirit Abasi aka ọkọdiọñ mmọ. Kpukpru mbet ye iban emi eketienede Jesus, emi Mary eka Esie ekedide kiet, ema edu do nditoro odu-uwem Ọbọñ mmọ.
Usen Usọrọ Mme Urua (Pentecost)
Ke usen aba ye duop ama ekebe ke ema ekenam Usọrọ Nsaña-mbe, nditọ Israel ema ewut idara ke abaña Ibet emi ekenọde ke Obot Sinai oto ke edinam emi ekekotde usọrọ mme urua, mme usọrọ Pentecost. Jesus Eyen Erọñ Uwa nnyin, akakpa ke usen Usọrọ Nsaña-mbe. Ke usen aba ye duop ama ekebe, ke Usen Pentecost ama ekedi, owo 120 emi ekesuk edu do etuak ibuot enyuñ etoro Abasi. Mmọ ikayakke idem emem mmọ ndien enyọñ ufọk, edi mmọ ema esuk edu do kpa nte Jesus ọkọdọhọde. Ke idaha kiet mmọ ekop ñkpọ emi akanamde uyom nte akwa ọkpọsọñ ofim, emi otode Heaven. Enye ama ọyọhọ ofuri ufọk emi mmọ ekedude Emi ekedi Spirit Abasi emi ọkọsuhọrede edidoro mmọ, Edisana Spirit emi Jesus ọkọñwọñọde.
Adaña didie ke mmọ ekenem esit! Kere Edisana Spirit, ọyọhọ owo Ita ke mbuot Abasi ita ke kiet emi ekedide ndiduñ ke esit mme owo. Ndien Enye ekedi ke esit kpukpru mmọ. Sese nte mmọ ekedatde esit enyuñ etorode Abasi!
Ke Mme Usem Efen
Nte ọmọfiọk usuñ nte mmọ ekedade efiọk ete Edisana Spirit edidoro mmimọ? Enye eketiñ ebe ke idem mmọ kiet-kiet ke usem emi mmọ mikọfiọkke. Ndien mmọ emi eketode mme obio efen emi eketiñde mme usem oro ekekeme ndikop se mmọ etiñde.
Sia ini emi ekedide ini nsio-nsio usọrọ ufọk-Abasi, ediwak mme okpono Abasi ke ediwak idut ema edi ke Jerusalem man edidara ndisana usen usọrọ. Ke ini mmọ ekekopde ebaña se ikadade itie ke otu usuhọre owo 120 emi eketienede Jesus, mmọ ema eka man ekekop. Ndien kpukpru owo ke otu mmọ oro eketode nsio-nsio obio ekekop owo kiet-kiet nte etiñde ke usem esie, etiñ ebaña utibe ubọk utom Abasi. Ekedi Spirit Abasi emi eketiñde ebe ke inua mbon Jew emi mikọfiọkke ñkpọ, ada edeme mmọ ọnọ Abasi Ubọñ ke Usem emi mmọ mikọfiọkke ke idem mmọ. Spirit ama etiñ ediwak ñkpọ efen emi abañade Jesus ọnọ mmọ, kpa nte Enye ọkọdọhọde ke Imọ iyenam. Ke akpanikọ isen owo oro ema edu ke mkpaidem enyuñ eyik. Nte akanam ekop ebaña utọ ñkpọ emi ke mme usen edem?
Ntiñ-Nnim Ikọ Joel
Ih, ke ñkpọ nte isua 800 emi ekebede, Joel, anditiñ ntiñ-nnim ikọ ama etiñ ete ke emi eyetibe; ndien idaha emi, Peter ada uko-uko ye mbet duopekiet eken onyuñ etiñ onọ akwa otu owo ete ke ntiñ-nnim ikọ Joel ọmọwọrọ osu. “Emi edi se Prophet Joel eketiñde.” Nso utọ iwuk ye odudu ekedu ke mme ikọ Peter oro! Emi ekedi akpanikọ; eñwọñọ Abasi ama ọwọrọ osu.
Peter ama owut, ebe ke ikọ emi enye eketiñde uko-uko, ete ke imọ ke imọbọ odudu ito Abasi nditie ntiense nnọ otu mmọ emi ekesakde enyuñ edọhọde ete ke mbet ekpa mmin. Ini kiet ko, Peter ama akañ Ọbọñ esie ke iso ekpri eyen-ufọk owo, koro enye ekefehede ndik ndida nnọ se inende. Edi idahaemi, sia Edisana Spirit ama ọkọyọhọ enye ke idem, baba ñkpọ ndomo kiet ikekemeke ndikpan enye ndiyarade Jesus nte Eyen Abasi, ndien enye, Peter, ekedi kiet ke otu ikọt Esie.
Enye ama asua ọnọ mme Pharisee ke ndikowot Jesus. Enye eketiñ uko-uko ọnọ mmọ ete, “kpa Jesus emi eyak ke ubọk mme anana-ibet, ekọñ ke krọs ewot.” Oro ama ekem ndikpanam mmọ eyat esit, edi Peter ama enyene awak akan oro nditiñ nnọ mmọ mbaña Christ “Edi Abasi... anam Enye eset.” Mmọ ikoyomke ndinim nte ke Jesus ama eset, koro emi akpanam mmọ enyime ete ke Enye edi edisana Eyen Abasi.
Ntiñ-Nnim Ikọ David
Peter ama etiñ abaña ntiñ-nnim ikọ David, Jesus etiñ ebe ke inua ete-ete mmọ David: “Afo mudukpọñke ukpọñ mi ke obio ekpo; uduyakke owo ima fo okut mbiara.” Mme Jew emi ema ekpono David: ndien akpakana mmọ ekpañ utọñ ke mme ikọ esie, koro enye ama okpono Ọbọñ onyuñ etiñ abaña eriset Esie. Idahaemi, David ama akpa inyuñ iduhe aba, ke mibọhọke ebiet emi ekebukde enye odu ye mmọ. Edi Jesus ama okpon eti-eti akan David ndien Enye ama eset ọwọrọ ke otu mme akpa-mkpa onyuñ ọkpọñ ukpọk udi.
Edieke David, ama eketiñ onyuñ onim eriset ke mkpa ke akpanikọ, ke ñkpọ nte awakde akan tọsin isua emi ekebede, nso ikpedi ntak emi mmọ emi ema ekekut ke enyin ke idem mmọ mikpenimke ke akpanikọ? Jesus ama asaña ke otu mmọ ke usen aba ke Enye ama ekeset ke mkpa. Kpukpru owo 120 oro ekedi mme ntiense ebaña eriset ke mkpa.
Esit Amia Mmọ
Mme owo ema edu ke ini Peter eketiñde ikọ emi, emi ekenimde se enye eketiñde ke akpanikọ. Esit mmọ ama ọtọñọ ndimia mmọ ke ndisin Jesus, ndien mmọ ekeyom ndifiọk se mmọ ekpenamde man ekpenyene utọ odudu emi Peter ekenyenede. Peter eketiñ ọnọ mmọ ete ke mmọ enyene ndibem iso ñkabare esit man enyaña ukpọñ mmọ. Mmọ ekedi mme aka ufọk-Abasi enyuñ ekpe ọyọhọ mbak ñkpọ duop enyuñ enyene akwa udọñ. Edi akananam mmọ ikabakere esit ke mme idiọk-ñkpọ mmọ.
Peter ama etiñ ọnọ mmọ ete edieke mmọ eyomde utọ odudu eke imọ inyenede, ke mmọ enyene ndinim ete Jesus edi eyen Abasi. Ndien ke ema ekenyaña mmọ, mmọ enyene ndina uduọk-mmọñ nte emi Jesus ọkọdọhọde, ke enyiñ Ete, ye Eyen, ye Edisana Spirit, oro edi idighe ke akani edu-uwem mmọ, idighe kpa uduọk-mmọñ eke John, ọduọk owo mmọñ.
Odudu Oto Ke Ediyak Idem Ofuri-Ofuri
Odu ediwak owo mfin emi ekpemade ndinyene odudu Abasi ke uwem mmọ man mmọ ekpenam ñkpọ enọ Abasi, edi mmọ inyimeke ndinọ se Abasi oyomde mmọ enọ. Peter ekenyene ndinam ediwak utom nyak idem ofuri-ofuri man oto do enye ọbọ odudu emi enye enyenede idahaemi. Peter ama enyene iwuk onyuñ ọñwọñọ ọnọ Abasi ete ke iyesaña ye Enye tutu mkpa. Enye ama enyene uduak esie, ama onyuñ ada mbet eken usuñ. Enye ama ekeme nditiñ nnyuñ nsọñọ nda ke ikọ esie, onyuñ ọsọñọ ebiere ndinam ñkpọ, nnọ Jesus. Edi ke ediwak ini enye ikesinyeneke odudu ndinam mme ekikere esie. Ekpri idomo akanam Peter akañ Ọbọñ esie.
Ke ini Peter ama ọkọfiọk mmeme ye ndudue esie, enye ama ọwọrọ akatua ata ndot-ndot eyet. Ke mme akam esie enye ama asana mme ekikere esie ayak onyuñ oyom uñwam Abasi. Ọbọñ ama efen ọnọ enye anam enye ọtọñọ ntak edi owo Abasi. Ke oro ama ekebe, ke ini Jesus akayararede idem owut owo duopekiet emi ekekọde iyak, ndien ọdọhọde Peter, “Nte ama Mi akan mmọ emi?” Peter ama ekeme nditiñ ke ofuri esit esie ete ke baba ñkpọ ndomo kiet iduhe eke okponde akan utom Ọbọñ esie. Ikata ke Jesus okobup, tutu Peter ikọfiọkke aba se ọkpọbọrọde. Enye ama ayak idemesie ofuri-ofuri ndien ofiori ete: “Ọbọñ, ọmọfiọk kpukpru ñkpọ” (John 21:17). Ih, Jesus ọfiọk kpukpru ñkpọ, ndien Enye ekeme ndikut esit nnyin. Enye ọfiọk mme nnyin imenyime mme inyimeke ndiyak kpukpru man itiene Enye.
Kere baña odudu emi Peter ekenyenede ke ama ọkọbọ Edisana Spirit. Oto ke ukwọrọ-ikọ esie ke akpa usen oro, owo 3,000 ema ekabare esit etiene Abasi. Ndien emi ekedi akpa ntọñọ ukwọrọ-ikọ esie emi ọkọyọhọde ye Spirit Abasi.
Odudu Emi Odude Ke Nnyin
Edieke nnyin iyomde odudu ke uwem nnyin emi asañade ye uduọk-mmọñ Edisana Spirit, nnyin inyene ndinam ukem ediyak idem ofuri-ofuri emi Peter akanamde. Nnyin inyene ndiyak idem nnyin, ukpọñ ye Spirit ofuri-ofuri nnọ Jesus ndida mmọ nnam nte Enye amade. Jesus ọkọdọhọ ete ke odudu emi eyetiene nnyin ke ima ikọbọ Edisana Spirit. Adaña nte isuk iyakde uwem nnyin ofuri-ofuri inyuñ idade odudu emi Enye ọnọde nnyin, iyebọ awak akan.
Ke owo ama akakabare esit, ediyak idem esie ofuri-ofuri eyeda enye osim edisana uwem. Ndika iso nyak idem, emi asañade ye mbuọtidem ke eñwọñọ Abasi, eyeda edinam asana edi. Emi edi edinam asana “Mme nte mbufo ifiọkke ite, ikpọhidem mbufo edi temple Edisana Spirit…? (1 Ñwed Corinth 6:19). Edisana Spirit ididukke itiene temple eke misanake, ntre enyene ndiduhọre enyuñ eyet nnyin oto ke edinam-asana. Ndien nnyin imenyene unen ndibeñe Edisana Spirit ndidi man oduñ ke nnyin.
Peter ete: “Uñwọñọ oro enyene mbufo ye nditọ mbufo ye kpukpru mmọ emi edude nsan-nsan, adaña owo nte Jehovah Abasi nnyin edikotde etiene Enye.” Mmọ emi edude “nsan-nsan” esin nnyin ñko ke esit.
Awak akan isua 2,000 tọñọ nte mbet ekebọ Edisana Spirit ke usen Usọrọ mme Urua (Pentecost), edi nnyin mfin emi ke ibọbọ ukem uñwọñọ emi ke esit ke ima iyere ikot Abasi inyuñ iyak idem nnyin ofuri-ofuri inọ uduak Esie. Ndien nnyin inyuñ ibọ ukem idiọñọ emi mmọ ekebọde nte ntiense ke Edisana Spirit odukde edi: etiñ ke nsio nsio usem nte spirit ọnọde ukeme nditiñ.
Questions
MME MBUME- Edisana Spirit ekebemiso ọsuhọre edi ke nso utọ usen?
- Mme anie ekebọ uduọk-mmọñ Edisana Spirit ke ini oro?
- Tiñ ukpuhọre emi okodude ke uwem Peter ke enye ama ọkọbọ uduọk-mmọñ Edisana Spirit.
- Anie eketiñ ntiñ-nnim ikọ abaña Edisana Spirit ke ñkpọ nte isua 800 ke edem?
- Ekebighe adaña didie ke ema ekenam Usọrọ Nsaña-mbe mbemiso Usọrọ mme Urua?
- Didie ke mmọ oro ekefiọk ete ke Edisana Spirit ama edi edidoro mmọ?
- Mme isen owo emi ekedude ke Jerusalem ekekere nso ebaña ñkpọ-ntibe emi?
- Nso ke Peter ọkọdọhọ mme owo ke mmọ enyene ndinam mbemiso mmọ enyene odudu oro?
- Anie ke ekenam eñwọñọ Edisana Spirit enọ?
- Nso utọ idiọñọ ke nnyin ibọ ke enimde nnyin uduọk-mmọñ Edisana Spirit?