Lesson 282 - Junior
Memory Verse
IKỌ IBUOT: “Owo eke ọbuọtde idem ye Ami eyenyuñ anam utom eke Ami nnamde; enye eyenyuñ anam utom eke okponde akan oro: sia Ami nnyọñde ntiene Ete” (John 14:12).Notes
Obufa Uwem
Obufa uwem ama eberede ọnọ mme Mbet Jesus. Edisana Spirit ama ọsuhọre edi ke Usen Usọrọ mme Urua (Pentecost), mmọ enyuñ eyọhọ ye odudu emi otode Heaven ndiwọrọ ñka nnyuñ nam mme utibe-ñkpọ ke enyiñ Jesus. Utu ke ndifehe ndik, mmọ ema enyene uko ndida ke akpanikọ eke Jesus ekekpepde mmọ.
Ke ndo-ndo oro mbono edibọñ akam usen duop oro ama ekebe, emi mmọ ekebọde Edisana Spirit, Peter ye John ema eka Itie-ukpono Abasi ndibọñ akam. Mmọ ekesuk enyenyene udọñ edibọñ akam. Mmọ ekenyene ndika iso mbọñ akam edieke mmọ ekeyomde odudu oro Abasi ọkọdọñde ọnọ mmọ ọsuhọ ye mmọ.
Owo Ke Inua-Otop
Ke ini Peter ye John ekesañade ekpere inua-otop Itie-ukpono Abasi mmọ ema ekut owo mbuñọ nte etiede ebeñe ñkpọ. Owo ikoduhe ndise ñkpọ mbaña ubuene akani-eren emi, ke ntre enye ama eketie ke inua-otop, onyuñ ekere ete ke mmọ eke edidide ndituak ibuot eyenyene esit mbọm ndinọ imọ ekpri okuk udia.
Peter ye John ema enyene esit mbọm, edi mmọ ikenyeneke okuk ndomo kiet. Nso ke mmọ ekpenam enọ owo ubuene emi? Peter ama ese enye ye esit mbọm, onyuñ ọdọhọ ete: “Nnyeneke silver ye gold; edi se nnyenede ke nnọ fi oro. Ke enyiñ Jesus Christ emi otode ke Nazareth, daha, saña” (Utom Mme Apostle 3:6).
Peter eketiñ ye uko. Enye ama ọdiọñọ ete ke Abasi eyebọrọ akam imọ. Enye ama ọdiọñọ ete edieke ibeñede ke enyiñ Jesus, utibe-ñkpọ oro eyetibe.
Mme Utom Emi Okponde Akan
Jesus ama ọdọhọ ete: “Owo eke ọbuọtde idem ye Ami eyenyuñ anam utom eke Ami nnamde; enye eyenyuñ anam utom eke okponde akan oro: sia Ami nnyọñde ntiene Ete” (John 14:12). Ke ini Jesus ama ọkọnyọñ etiene Ete, Enye ama ọnọ Edisana Spirit edi; okonyuñ oto ke odudu Edisana Spirit ke mbet ekenyene ndinam mme utibe-ñkpọ ke enyiñ Jesus.
Idahaemi Peter ama enyene Edisana Spirit, enye ama onyuñ ayak idem esie ntọtuñọ-ntọtuñọ ọnọ utom Ọbọñ tutu enye ekeme ndidọhọ owo mbuñọ, “Daha, saña.” Nso utọ utibe-ñkpọ ndidọhọ owo emi akanam misañake ke ofuri eyo uwem esie! Ndusuk ini ikọ oro ikotimke iñwaña enye. Peter omum owo mbuñọ oro ubọk, onyuñ añwam enye ndidaha nda. Ke ndo-ndo oro enye okop odudu ke ukot esie ye ọkpọ itọñ-ukot esie, onyuñ asaña, oro edi usọp-usọp, idighe nte mbuñọ. Ikpọdọhọ ite ọfrọ.
Owo mbuñọ emi ama enem esit ke edikọk emi tutu enye etiene Peter ye John ebe oduk Itie-ukpono Abasi ndikọm Abasi. Enye ama ọdiọñọ enye emi ọkọkọkde enye, ndien esit esie ama ọyọhọ ye itoro ọnọ Ete esie ke Heaven emi okopde akam nti ikọt esie iba emi enamde akpanikọ.
Ke Enyiñ Jesus
Ntak kiet emi Abasi ọkọkọkde mbuñọ oro ekedi koro Peter ye John ekebeñede ke enyiñ Jesus. Jesus ama ọdọhọ mbet esie: “Nyenyuñ nnam ñkpọ ekededi eke mbufo edibeñede ke enyiñ Mi, man Ete enyene ubọñ ke Eyen” (John 14:13).
Mme Pharisee ikoyomke ndinim ke akpanikọ nte ke Jesus edi Eyen Abasi. Edi oto ke mme utibe-ñkpọ emi mbet ekenamde ke enyiñ Jesus, ema enọ Enye ubọñ nte Abasi. Edieke mmọ ekpekebọñde akam ke enyiñ kiet eken, oro edi nte ke enyiñ John, mme eke Peter, mme ke Mary, eka Jesus, Abasi ikpọkọbọrọke. Mmọ ekedi owo, nte afo ye ami. Ñkukure ukpuhọre emi okodude ke mmọ ekedi emi mmọ ekeyakde idem ntọtuñọ-ntọtuñọ enọ utom Abasi tutu mmọ ekeme ndinyene mbuọtidem ndinim ke akpanikọ nte ke Abasi eyenam mbuñọ oro asaña edieke ibọñde akam ke enyiñ Jesus.
Peter ye John ikenyeneke saña-saña odudu. Elijah ñko emi akadade odudu akam anam se owo mikpekemeke ndinam ke ukeme esie ikonyuñ inyeneke. James ọkọdọhọ ete: “Elijah ekedi owo emi enyenede mbiet uduot nnyin, enye onyuñ ọbọñ akam eti-eti, ete edim okudep; ndien edim idepke ke isọñ ke isua ita ye ọfọñ itiokiet. Enye onyuñ ọtọñọ ntak ọbọñ akam: ndien enyọñ edidep edim, isọñ onyuñ osioño mbuñwum” (James 5:17, 18).
Kere se nnyin ikpanamde oto ke enyiñ Jesus edieke nnyin ikpesinde ifik ibọñ akam nte mmọ emi ekebọñde! Ikọ ọdọhọ nnyin ete: “Esọñọ eñwana kabaña ikọ mbuọtidem, emi ema ekeyak ini kiet ko esin nti ikọt Abasi ke ubọk” (Ñwed Jude 3). Mi nnyin imokut ite ke Ọbọñ oyom nnyin iñwana ndinyene utọ odudu oro.
Nso idi ata akpan ñkpọ inọ nnyin mfin? Nte nnyin imenyene udọñ ndinyene odudu Abasi ke uwem nnyin ñkan ndikọ ñkpọ nnọ idem nnyin? Nso akpan udọñ odu ke esit nnyin, ndinyene odudu Abasi okpon akan, me ndinam uwem nnyin eye nte ererimbot eyomde? Nte imetiñ enyin ke ñkpọ Abasi ikan eke idem nnyin?
Inemesit Emi Odudu Akamade
Nte afo emekere ete ke owo emi ekekọkde ama ekere abaña okuk emi Peter ye John mikenyeneke? Enye ama ọbọ ñkpọ emi okponde akan se okuk ekpedepde. Nte afo emekere ete ke ndidi ubuene ama afina Peter ye John? Inemesit mmọ ekedi ndifiọk nte ke inam uduak Abasi.
Idem akaduai mme owo didie nte mmọ efehede eka ndise se ikotibede! Ata ediwak owo ema edi enyuñ ese Peter ye John ke mkpaidem. Mme nso utọ owo ekpedi emi, emi ekpekemede ndinam mbuñọ asaña isañ? Ifet efen ekedi emi ọnọ mme Apostle ndikwọrọ mbaña Jesus.
Peter ikefeheke mme owo enyin aba. Enye ama ọbọrọ mme mbume mmọ ke ndidọhọ ete, “Nsinam idem akpade mbufo abaña owo emi? Nsinyuñ inam mbufo ewukde enyin ese nnyin, nte edide nnyin ida odudu idem nnyin mme uteñe eke nnyin iteñede Abasi inam enye asaña?” Edieke nditọ Israel emi ekpekenimde Abasi ke akpanikọ nte mmọ ekedọhọde, mmọ ekpekefiọk ete ke Jesus ekedi Eyen Abasi, ñko ke ekeda enyiñ Esie enam utibe-ñkpọ oro.
Ekañ Jesus
Nso ikọ ubiom-ikpe ke Peter eketiñ ọnọ otu owo! “Mbufo ekañ Enye emi asanade onyuñ enende, enyuñ ebeñe ete eyak owo obom enọ mbufo, enyuñ ewot Ọbọñ uwem.” Nte oro ikedighe ata ñkpọ ndik emi mme okpono Abasi oro ekenamde?
Edi kpukpru se Peter eketiñde ikedighe ndidori mmọ ikọ. Ekedi akpanikọ ete ke mmọ ema ekọñ Jesus ke eto, okposuk edi nte mmọ ekenamde ke unana ifiọk. Ediwak mme Ewet-ñwed (Scribe) ye mme Pharisee ikọfiọkke ite ke Jesus ekedi Eyen Abasi. Peter okosuk ọnọnọ mmọ idorienyin edieke mmọ ekpekabarede esit.
Jesus ama ọnyọñ ke Heaven, ndien mmọ ikemeke ndikpuhọre se ema ekenanam ye Enye; edi Enye ke afiak edi, ndien mmọ ekeme ndibeñe idem mbet edidi Esie. Ke nditim ntiñ mmọ ekedi mme ndimek ikọt Abasi; mmọ ekedi nditọ Abraham emi Abasi akanamde ediomi ete, “Kpukpru mme idut ke ererimbot eyenyuñ ekut mfọn eke otode ke ubon fo.” Abasi okosuk oyoyom ndida mmọ ñkpep mbio efen mbaña usuñ erinyaña ukpọñ.
Ikọ Mme Anditiñ Ntiñ-nnim Ikọ
Peter ikọnọhọ mme owo obufa ukpep-ñkpọ ke ndikwọrọ mbaña Christ. Enye eketi mmọ mme ñkpọ emi mme anditiñ ntiñ-nnim ikọ ekewetde ebaña ke ediwak isua emi ekebede. Mme owo ema efiọk ebaña ikọ mme anditiñ ntiñ-nnim ikọ. Nso idi ntak emi mmọ mikọfiọkke ite ke mme ikọ ntiñ-nnim ikọ oro akabaña Jesus?
Moses ama ọdọhọ ete: “Jehovah Abasi eyenam prophet eke edibietde mi, adaha ada ọnọ mbufo ke otu nditọ-ete mbufo; mbufo edikop Enye ke kpukpru se Enye editiñde ọnọ mbufo.” Akpakana mme owo etim ekpañ utọñ ke mme ikọ oro, koro akasañade ye ntọt: “Ama ekem eyesibe kpukpru owo eke midikopke uyo prophet oro efep ke otu mbio-obio” (Utom Mme Apostle 3:22, 23). Anditiñ ntiñ-nnim ikọ oro ekedi Jesus; ndien ekenyene ndisibe mmọ mfep edieke mmọ minimke Enye ke akpanikọ.
Samuel, ye kpukpru mme anditiñ ntiñ-nnim ikọ efen, ema etiñ ebaña Jesus ñko. Kpukpru mme anditiñ ntiñ-nnim ikọ emi ekesitiñde ikọ, ekesitiñ ebaña eridi Jesus ke usuñ kiet mme eken. Mmọ ema etiñ ntiñ-nnim ikọ ete ke eyenọwọñ añwan ediman Eyen, ke Bethlehem ke esien Judah, enyuñ etiñ ete ke edidem kiet eyeyom nsek eyen oro ndiwot; ñko ke Enye ama okpon ọwọrọ owo, nditọ-ete esie eyewọñọre ekpọñ Enye, eyekọñ Enye ke eto, Enye eyenyuñ eset. Kpukpru mme ñkpọ oro eketibe kpa nte ekewetde ke Ñwed mme anditiñ ntiñ-nnim ikọ.
Ntak emi mme Jew mikenimke ke akpanikọ ekedi koro idiọk-ñkpọ okodude ke esit mmọ; edi Peter ama afiak ọnọ mmọ ifet efen. Mmọ enyene ndikabare esit, etua mkpọfiọk ke idiọk-ñkpọ enyuñ ewọñọre ekpọñ mmọ, ndien mmọ eyebọ erinyaña. Kere baña mbọm Abasi ke abaña mme anam idiọk-ñkpọ emi! Mmọ ekekọñ Jesus, kpa ye oro ekedọñ Christ ke ama ekeset esọk mme Jew ke akpa ifet man mmọ efiak enyene ifet efen.
Ndusuk ema enim ke akpanikọ, edi ediwak ikonimke. Ke ñkpọ nte isua 35 ama ekebe, oto ke unana edinim ke akpanikọ mmọ, mbon-ekọñ Rome ema eka ekọñ ye mmọ, enyuñ esobo obio Jerusalem. Ọtọñọde ke ini oro tutu osim emi, mme Jew ekut ata ediwak ukut, nnanenyin ye isinenyin koro mmọ ekesinde Christ ye utọ utibe enọ emi Enye akadade ọsọk mmọ.
Questions
MME MBUME- Peter ye John ekeka mmọñ ke ini mmọ ekekutde owo mbuñọ oro?
- Nso ke Peter ọkọdọhọ owo oro?
- Nso ikotibe ke ini Peter okomumde enye ubọk?
- Odudu ewe ke Peter akada anam utom? Okonyuñ edi ke enyiñ anie?
- Peter eketiñ ikọ adian mme Jew abaña nso?
- Nso utọ ifet ke Peter ọkọnọ mmọ?
- Nso ke mme Jew ekpenam man añwam mmọ ndinim Jesus ke akpanikọ?
- Nte mme utibe-ñkpọ ke osuk ada itie mfin emi?