Lesson 283 - Junior
Memory Verse
IKỌ IBUOT: “Yak uñwana mbufo ayama ke iso owo, man mmọ ekut nti utom mbufo, enyuñ etoro Ete mbufo emi odude ke Heaven” (Matthew 5:16).Notes
Ke Etehe Solomon
Ekeme ndidi ibat-ibat mme Jew emi ekekade Itie-ukpono Abasi ke ini ubọñ akam ekekut owo mbuñọ emi ekedide ubuene, emi akanade isua 40 ke Ediye Inua-otop. Ekesimen enye eka do kpukpru usen man enye ọkpọbọ ñkpri okuk oto mmọ emi edukde eka do.
Edi usen enye emi ọkpuhọre, enye ikenyeneke aba ndidi ebeñe-ebeñe, mme nditie ke inua-otop aba. Kpukpru enyin ese enye nte enye asañade akanade iso etehe itie-ukpono Abasi.
Se enye do nte adade ye Peter ye John. Iso esie ayama nte akpañde utọñ okop ukwọrọ-ikọ Peter. Ana nte mfina odu. Ke ata anyan ini emi ebeñe-ebeñe emi ekedide mbuñọ, owo ndomokiet ikotimke ikere ñkpọ ibaña enye, edi idahaemi ekọk enye, ata ediwak owo eda ekanare enye, idem ke aduai mmọ eti-eti. Peter ke etiñ ete ke oto mbuọtidem ke Jesus emi Abasi akanamde eset ke mkpa ke enam owo mbuñọ emi okop nsọñidem. Edi ndusuk mme Jew inimke eriset ke akpanikọ, ke ntre ntime odu. Edi bet, etubom Itie-ukpono Abasi ke edi, bodisi (police) emi edisede ñkpọ abaña ntime oro. Ke okoneyo oro enye ada Peter ye John ọwọrọ ekesin mmọ ke ufọk-ñkpọkọbi. Ini kiet efen, kpukpru ñkpọ odobo ke Itie-ukpono Abasi.
Adaña didie ke esitie nte owo ikereke ibaña owo udọñọ ke ini ukut. Me ke ini anam-idiọk akade iso odu uwem ibak esie, owo isehe inyuñ ikereke ibaña. Edi ke ini odudu Abasi ọkọkde me anyañade owo unana emi, andidiọk eyebumere ndien mmọ emi ekpedarade eti-eti eyedi kpa mmọ emi edude ke iyaresit.
Ke Iso Akwa Oku
Ke ini Jesus okodude ke ererimbot ndinam utom, ke ini mme owo ekutde mme utibe-ñkpọ emi Enye anamde, ndusuk mme Jew ema esidiomi ete ke mibọhọke etre Enye ndinam mme utom oro, ke ibio-ibio ini kpukpru owo eyenim Enye ke akpanikọ. Mmọ ema eka etiene Caiaphas akwa oku, emi ọkọdọhọde mmọ ete ke Jesus enyene ndikpa usen kiet man oto do ada nsinsi uwem ọsọk kpukpru owo (John 11:49-52). Enye eketiñ ntiñ-nnim ikọ abaña mkpa ye eriset Jesus.
Ekedi kpa ke iso Caiaphas, akwa oku oro ke ekeda Peter ye John edi ke usen oro ke mmọ ema ekenam owo mbuñọ oro okop nsọñidem. Ema ebup mmọ ete: “Mbufo eda odudu ewe enyuñ eda enyiñ anie enam ñkpọ emi?” Ifet efen ekedi emi ọnọ Peter nditiñ mbaña Jesus. Yak nnyin ikufre ete ke Peter ekedi enye emi ama ọkọbọ uduọk-mmọñ Edisana Spirit ke ubet enyọñ ke Usen Pentecost. Oro edi ntak emi enye eketiñde ikọ ye utọ uko oro: “Edi enyiñ Jesus Christ eyen Nazareth, emi mbufo ekewotde ke cross, emi Abasi akanamde eset ke mkpa, edi enyiñ emi esin owo emi ada ke iso mbufo ye nsọñidem... enyiñ baba kiet efen inyuñ iduhe eke enọde ke otu owo ke idak ikpa-enyọñ, eke enyenede ndida nnyaña nnyin” (Utom Mme Apostle 4:10-12).
Mme Ntiense Ke Abaña Jesus
Mme oku ye mbiowo ema edu ke mkpaidem ke ndikut uko Peter ye John. Mmọ ema efiọk ete ke mme ọkọ-iyak iba emi ikakaha ufọk-ñwed nte mmọ ke idemmọ ekekade. Didie ke mme anana-ifiọk-ñwed emi ekpekeme nditiñ ikọ ntem? Ke iso mmọ ñko, owo emi enamde okop nsọñidem ama ada do. Ibọrọ kiet kpọt okodu: mmọ emi ema edu ye Jesus. Ke abaña utibe-ñkpọ emi ekenamde ke idem owo mbuñọ emi, mmọ ekedọhọ ete, “nnyin inyuñ ikemeke ndineni.”
Mme oku ekenim ete ke ana nte etre oruk ukwọrikọ emi. Ana nte edọhọ Peter ye John ekutiñ ikọ enọ owo baba kiet ke enyiñ Jesus. Peter ye John ikenyimeke ndinam utọ item oro. Mmọ ekedọhọ ete: “Mbufo ekam ekere mme enen ke enyin Abasi ndikop uyo mbufo ñkan eke Abasi: koro nnyin mikemeke nditre nditiñ se nnyin ikokutde inyuñ ikopde.” Jesus ama ọnọ mmọ uñwana, mmọ inyuñ ikemeke ndidip ke “idak abañ.”
Mme Itoro Abasi
Ukwọrọ-ikọ Peter ama ọsọñ odudu tutu mme owo emi ekewakde ekan 5,000 enim ke akpanikọ. Mmọ ema enọ Abasi ubọñ oto ke utibe-ñkpọ emi mmọ ekedide ntiense ebaña. Nte akpana nte edop uyo ke emi? Nte ekpenyene ndineni? Nte mbọñ mme akwa oku ekpenyene ndikpan uyom itoro emi? Baba, ikpekemekekeme.
Mfin emi, nte mkpọk-inua nnyin ekpenyene nditre nditoro Abasi ke ini anam-idiọk akabarede esit ọkpọñ idiọk esie onyuñ okut idara erinyaña ukpọñ? Nte imekeme ndidop uyo ke ini edidiọñ Abasi ọduọde akanare itie ubọñ akam? Ke ini Abasi añwañade edidiọñ ye Spirit Esie ọnọ mme esit emi ekopde biọñ, me ke ekọkde owo udọñọ, nte ikpenyene nditek ke itoro emi ọwọrọde ke esit nnyin nditoro Abasi? Baba, koro edieke nnyin idopde uyo, etie nte mme itiat ekpefiọri mkpo.
Esop ke Jerusalem me esop efen ekededi ikekemeke ndibiat Eti-Mbuk emi mfep ke ntọñọ ini oro ke adaña ini Ufọk-Abasi ọkọtọñọde-tọñọ utom. Ikemekekeme ndisuhọre nnim mfin. Amasuana akanare ofuri ererimbot: mbon udọñọ ebọ erikọk, mme anam-idiọk ñko ke ekpọk uruk idiọk-ñkpọ mmọ. Odudu Abasi osuk ododu ke ererimbot mfin: “Oto koro... ọbuọtde idem ke enyiñ Esie” mbon udọñọ ke ebọ erikọk. “Erinyaña inyuñ itoho ke baba owo kiet efen: koro enyiñ baba kiet efen inyuñ iduhe eke enọde ke otu owo ke idak ikpa-enyọñ, eke enyenede ndida nnyaña nnyin.”
Nso utọ mboho akam ke mme anditiene-Christ oro ekenyene ke usen oro ke ema ekeyak Peter ye John ke esop! Nnyin inim ke akpanikọ ite ke owo Ediye Inua-otop ama etiene abuana ke mboho akam oro ñko. Odudu Edisana Spirit ama ọsuhọre edi edinyek ebiet oro. Ndibe-ndibe uwem ikoduhe ke esit mbon Abasi oro, edi mmọ ekewọrọ añwa eketiñ ikọ Abasi ye uko.
Unana Ndik
Eyak nnyin ibiere ke esit nnyin ite ke nnyin idikopke ndik nditiñ mbaña Jesus. Edieke ifet odude ọnọ nnyin nditiñ ikọ mbaña Enye, nnyin ikpenyeneke ndikop but nditiñ ye uko mbaña mme ikpọ ñkpọ emi Enye anamde ye nnyin.Questions
MME MBUME- Ebiet ewe ke ukwọrọ-ikọ Peter ke ndusuk owo ekesin ubahare?
- Nte ama odu ndusuk mmọ emi ekenimde ke akpanikọ? Ifañ ke ekedi?
- Nte emekere ete ke Peter ye John ekedi mmọ emi ekefiọkde ñwed?
- Anie owo ke efiọk nte Akwa Itiat-inuk?
- Nso ikedi ntak emi mme andikara ye mbiowo mikenenike utibe-ñkpọ emi mmọ ekekutde?
- Nso ke Peter ye John ekebọrọ esop ke ini ekekpande mmọ nditiñ mbaña Jesus?
- Nso ikotibe ke ini mmọ ebọñde akam?
- Nte owo okpokop but ndikere anditiene-Christ?