Lesson 284 - Junior
Memory Verse
IKỌ IBUOT: “Ikpe iditebeke ntiense nsu, ndien etiñ nsu idibọhọke” (Mme Ñke 19:5).Notes
Edidiana-kiet
Ke ema ekekpọñ mmọ enyọñọ ke ufọk-ñkpọkọbi, mme Mbet ema eka iso ndikwọrọ Eti-Mbuk. Mmọ eketiñ ye uko emi ekenọde mmọ ke ini emi mmọ ekebọde Edisana Spirit ke mmọ ema ekebọñ akam. Mmọ ekekwọrọ ebaña Jesus ye eriset ke mkpa Esie. Mmọ eketiñ se mmọ ekekutde ye odudu. Jesus ama ọñwọñọ ete ke mmọ eyebọ odudu, eyenyuñ edi mme ntiense ke mmọ ema ekebọ Edisana Spirit (Utom Mme Apostle 1:8).
Akwa otu owo emi ekenimde ke akpanikọ ema edu. Nte Peter ọkọkwọrọde ikọ usen kiet, owo 3,000 ema enim ke akpanikọ, ndien ema ena uduọk-mmọñ (Utom Mme Apostle 2:41). Ini efen ke otu mmọ oro ekekopde ukwọrọ-ikọ, owo 5,000 ema enim ke akpanikọ (Utom Mme Apostle 4:4). Ima ye edidiana-kiet ama ọbọp mmọ emi ekenimde ke akpanikọ ọtọ kiet, koro Jesus ọkọnọde mmọ uyo ete ema kiet eken (John 15:12). Enye ama ọbọñ akam abaña mbet Esie ete kpukpru mmọ ekpedi kiet (John 17:21, 22). Mmọ ekebono ọtọ kiet ye ke esit kiet nte emi Paul ekewetde ete mme anditiene-Christ ekpenam ntre (Ñwed Mbon Rome 15:6; Ñwed Mbon Philippi 1:27; 2 Ñwed Corinth 13:11).
Ema Enyam Mme Inyene
Okposuk edi nte minyeneke se etiñde ndiwut ete ke ema edọhọ mmọ enam ntre, mme anditiene-Christ ema enyam se mmọ ekenyenede enyuñ eyak okuk enọ mme Mbet. Mmọ ekenam emi ke ima-esit mmọ, owo ikobupke-bup me ndinyinyik owo ete yak enam ntre. Mme andinim ke akpanikọ eketie nte ema enyene akamba udọñ enọ inyene ke ñkañ Spirit. Inyene ke Heaven (Matthew 6:19-21). Eketie nte ata akpan ñkpọ ọnọ mmọ akan ñkpọ efen.
Mmọ ikefamke ubọk ke okuk. Mme Mbet ema enyene mfọnido enyuñ enọ mmọ oro ekedude ke unana. Ata eti spirit ke Eti-Mbuk emi edi ndiñwam mmọ efen, koro Ñwed Abasi etiñ ete, “Koro Abasi amama owo eke ọnọde ke inemesit” (2 Ñwed Corinth 9:7). Abasi isiyomke owo anyam inyene esie man oto do akabare edi anditiene-Christ. Okposuk, edieke owo amade inyene esie tutu osim idahaemi mmọ miyakke enye anam ñkpọ Abasi, odot enye ndikpọñ mmọ. Mbuk odu ke Ñwed Abasi abaña akparawa owo inyene emi inyene esie ekedide ubiọñọ ọnọ enye ye Ọbọñ. Enye okobup Jesus mme nti ñkpọ emi enye akpanamde man enyene nsinsi uwem, (Matthew 19:6). Enye ama odu eti uwem, ama mbọhiduñ esie, onyuñ onim ndusuk mbet Abasi. Enye okobup ete “Nso isuhọ mi ndinam?” Akparawa emi ama enyene ediwak inyene, enye ama onyuñ ama mmọ akan nte amade Abasi. Jesus ọkọdọhọ enye ete ke eyenyene inyene ke Heaven edieke edinyamde mme inyene esie ada ọnọ mme ubuene. Akparawa emi ama enyene inyene eti-eti onyuñ otim ama okuk esie. Enye ọkọnyọñ ke mfuhọ. Inyene esie ekedi ubiọñọ ọnọ enye ndinam ñkpọ nnọ Abasi (Mark 10:22).
Mme Inyene Eke Spirit
Ediwak mme anditiene-Christ inyeneke ọkpọsọñ inyene isọñ emi, edi se mmọ enyenede esana eyak enọ Ọbọñ ke ndida nnam utom Esie. Mmọ ñko enyene inyene ke ñkañ Spirit emi ekemede ndida nnam ufọn nnọ mmọ efen. Usen kiet Peter ye John ema eñwam owo mbuñọ. Peter ọkọdọhọ ete: “Nnyeneke silver ye gold; edi se nnyenede ke nnọ fi oro. Ke enyiñ Jesus Christ emi otode ke Nazareth, daha, saña.” Edikọk udọñọ mbuñọ esie ekedi ata akpan ñkpọ ọnọ owo mbuñọ oro akan okuk. Nnyin ñko imekeme ndibọñ akam, nditiñ ikọ ntiense, ndinyuñ ntiñ mme ikọ edidemere nnọ mmọ eke edude ke udọñ ñkpọ Spirit. Ke Isaiah 41:6 nnyin ikot, “Kpukpru owo eyeñwam mbọhiduñ mmọ; kiet eyenyuñ ọdọhọ eyen ete esie, ete, sọñ esit.”
Barnabas
Kiet ke otu mmọ emi ekenimde ke akpanikọ, emi ekenyamde mme inyene mmọ, enyuñ enọ mme Mbet okuk mmọ, edi kiet emi etiñde esiak mi. Enye ekedi owo emi ekekotde Joses, emi ke akade iso, mme Mbet ekot Barnabas. Ke mme usen emi etienede, Ọbọñ ama ada owo emi ke utibe usuñ anam utom. Enye ikeyakke ñkpọ ndomo kiet ọbiọñọ enye ke ndinam ñkpọ Ọbọñ. Enye ama ayak idem esie ye nda-mmana enọ, ntre ñko ye inyene esie ọnọ Abasi. Barnabas ekedi ufan Paul emi akañwamde enye ke ini enye akakabarede esit obufa (Utom Mme Apostle 9:26, 27). Ke ini akade iso, ema enọ Barnabas aka Antioch man ọkọsọñọ mme owo idem, koro “Enye edide eti owo, Edisana Spirit ye mbuọtidem enyuñ eyọhọ enye ke idem: ndien ediwak owo ediana ye Ọbọñ” (Utom Mme Apostle 11:24). Barnabas akasaña ye Paul ke akpa isañ ukwọrọ-ikọ esie, ndien ñko ye Mark eka ke Cyprus (Utom Mme Apostle 15:39). Ntem ke Barnabas ọkọbọ ediwak edidiọñ ndien okonyuñ edi edidiọñ ọnọ ediwak owo efen.
Ananias
Eren ye ñwan esie ema enyam inyene mmọ ñko, edi enim ubak okuk ke ufọk. Ke ini Ananias ọkọnọde ubak okuk ke otu mme Apostle, enye akanam nte ọkọnọ kpukpru. Ndusuk ini Ananias iketiñke ndomo ikọ kiet. Ke edinam esie, okowut idem nte mfọn-ido ye edu owo Abasi, edi esit esie ọkọyọhọ ye abiaña. Enye okoyom itoro owo. Enye okoyom okuk ñko. Ananias ikenyeneke mbuọtidem ke Abasi ndikpeme enye edieke enye ọkpọnọde Ọbọñ kpukpru. Ananias eketie nte kiet emi okoyomde ndikpono Abasi ye mammon ke ini kiet oro (Matthew 6:24).
Abiaña
Abasi okowut Peter ete ke Ananias ikenamke akpanikọ. Ọbọñ ese esit, ndien Enye otim ọfiọk akpan ntak eke odude do. Owo ikemeke ndibiaña Abasi. Edieke enye odomode ndibiaña mme owo, Abasi esiyayarade enye ọnọ ọkwọrọ-ikọ esie, andikpep, mme ete ye eka.
Peter ama ọfiọk ete ke Satan ekesin ekikere emi ke esit Ananias, ndien Ananias ama ọduọ oduk ke idomo. Edieke akananam edomode fi anam se mifọnke, fiọk do ndien ete ke edi satan ada ekikere oro edi, onyuñ odomo ndinuk oro nsin ke esit fo.
Peter eketi Ananias ete ke owo ikenyikke-nyik enye mme ndifefik enye ete anyam inyene esie onyuñ ada okuk ọkọnọ mme Mbet. Ananias akanam oro ke ekikere esit esie. Inyene oro ekedi ekesie ndinam nte enye amade. Kpa ke idem ini oro ema ekenyam, owo ikebupke Ananias ada okuk ọkọnọ mme Mbet. Ikedighe idiọk-ñkpọ inọ Ananias ndinọ ubak okuk. Ananias akanam idiọk-ñkpọ ke ini enye okodomode ndibiaña mme Mbet. Enye okodomo ndiwut idem ke se enye midighe. Mme edinam esie ama owut ete ke enye ama okuk, ke ntre ke enye ibuọtke idem ye Abasi mme mme anam utom Esie. Peter ọkọdọhọ Ananias ete, “usuhu nsu unọ owo, osu ọnọ Abasi.”
Ubierikpe
Ananias ke ndusuk ini ekekere ete ke eyekpono enyuñ etoro imọ ke ndinam ñkpọ eke ebietde eti. Ekeme ndidi enye ama ekere se editiñde edieke edibupde imọ mbume. Ke ekem ini, enye ikekemeke ndisioro uyo. Usọp-usọp ubiereikpe ama osim owo emi ekekerede ndinam idiọk. Ubierikpe ama odobi, ntre ñko ke idiọk eketie. Ke ekikere Ananias ndituk Abasi, enye okodomo ndisuhọre odudu Abasi. Edieke owo osude nsu ọnọ ọkwọrọ-ikọ Abasi, osu ọnọ Abasi. Emi ekpedi ntọt ọnọ mme owo kpukpru ini, ndinam akpanikọ nnọ Abasi ye ikọt Esie.
Ke ini Ananias okokopde mme ikọ Peter, enye ọduọ akpa, ifet edikabare esit ikoduhe. Owo iketiñke ikọ ndomo kiet inọ ñwan esie, ema etim okpo Ananias, emen ewọrọ eka man ekebuk, nte ekedide ido ke ini oro ndibuk owo ke ndondo oro akpade.
Sapphira
Ke ñkpọ nte awa ita ama ekebe, Sapphira, ñwan Ananias oduk etiene mme Mbet. Enye ye ebe esie ema ediomi ndimum ubak okuk mmọ ñkama. Mmọ ema ediomi ke ndibe ndinọ ubak okuk mmọ, ndinyuñ ndọhọ ete ke ofuri okuk edi oro.
Ndusuk ini Sapphira ñko ama ekere abaña ekọm ye ukpono; edi ke ini Peter okobupde enye, ema ekut ete ke enye ama etiene abuana ke idiọk-ñkpọ Ananias ye unana ukpono, enye iketiñke akpanikọ ke abaña okuk oro. Enye ikafañake, ikonyuñ inyeneke ifet nditua mkpọfiọk. Ubiereikpe ama odu, mkpa ọsọsọp etiene edem. Ke ini Peter eketiñde ọnọ enye se iketibede inọ Ananias, ndien ke enye ñko eyekpa, enye ọkọduọ ke ukot esie onyuñ akpa. Ke ini mme owo ema ekenyọñọ ndibuk Ananias, mmọ ema ekut ñwan Ananias nte anade emi akanade nte ebuk ke ñkañ ebe esie.
Usọp-Usọp Mkpa
Ama odu mme ini efen emi ekesobode mmọ emi eketimerede enyuñ ebiatde ibet Abasi usọp-usọp oto ke ubierikpe Abasi. Nnyin ima ikot ibaña nsọñ-ibuot Korah ke eyo nditọ Israel (Ọyọhọ ukpep-ñkpọ 105). Korah ye kpukpru mmọ emi ekenyenede mbọm ebaña enye, kpa ntre ye mmọ emi ekenamde idiọk-ñkpọ ye enye ema etak “Isọñ onyuñ atat inua esie, emen mmọ... ye kpukpru ñkpọ mmọ. Mmọ enyuñ esuhọre ke udi ndisi, ye kpukpru owo emi edude ye mmọ, ndien isọñ esire abaha mmọ: enyuñ esobo mmọ ke otu esop efep” (Numbers 16:32, 33). Mme uwut-ñkpọ edu ke Ñwed Abasi ke abaña mme owo emi ekebọde usọp-usọp ubierikpe Ọbọñ ke ntak idiọk-ñkpọ mmọ (Numbers 14:37; 2 Ndidem 1:10-12).
Nte ededi, kpukpru mme anam-idiọk isikpaha usọp-usọp; ndien kpukpru usọp-usọp mkpa isidighe ufen idiọk-ñkpọ. Ke ndusuk ini nditọ Abasi esikpa usọp-usọp ñko, edieke oro edide usuñ nte Abasi amade ndida mmọ. Edi ke ini usọp-usọp mkpa osimde anam idiọk, enye inyeneke ifet ndibọñ akam nnyuñ ñkabare esit, ini eyebe ndifen ke mme idiọk-ñkpọ esie, ye ndinyuñ nnam emem ye Abasi. Mkpa idiọk owo inemke Abasi esit (Ezekiel 33:11); edi, “Mkpa mbon ima Jehovah edi ñkpọ-uto ke enyin esie (Psalm 116:15).
Andibuana Ke Edinam Idiọk-Ñkpọ
Ifiọk emi Sapphira ekenyenede akpana oduri nnyin utọñ. Enye ikasañake ye Ananias man ekenọ okuk, edi ama enyene ubọk eti-eti ke idiọk esie. Sapphira akañwam Ananias ke idiọk-ñkpọ esie ke ndisu nsu. Enye eketiene abuana ke nsu Ananias.
Yak nnyin itim ikpeme mbak nnyin idibuana ke idiọk-ñkpọ mmọ efen, ke ndifuk mme ndinyime idiọk-ñkpọ mmọ. Anditiene-Christ isidipke idiọk, edi esisasua se idide idiọk (Ñwed Mbon Ephesus 5:11).
Akpanikọ Me Nsu
Ke utom ke ufọk-ñwed fo ye ke itie mbre fo, kutiene unyene ubọk ke mme idiọk usuñ mbio efen ke nditre ndiwut eti idaha fo. Idighe kpukpru ini ke etetiñ nsu; ndusuk ini esinanam nsu ñko. Mme nditiñ me ndinanam, “nsu baba kiet isañake ñkpọ ye akpanikọ” (1 John 2:21).
Ke ini nnyin ikekpepde mme ñke, ima ikut ite ke Abasi asasua nsu (Mme Ñke 6:16-19). Satan edi osu-nsu ye ete nsu (John 8:44). Ke ini owo mitiñke akpanikọ, enye edi eke Satan, inyuñ ikemeke ndika Heaven, ke mibọhọke enye akabare esit onyuñ etiñ akpanikọ. Ke Eriyarare 21:8 nnyin ikot ite ke kpukpru mme osu-nsu “udeme mmọ eyedu ke akwa mkpọdiọhọ emi asakde ye ikañ ye brimstone”
Akwa Ndik
Nso ke usọp-usọp mkpa Ananias ye Sapphira akanam ye mme owo? Emi otuk esit kpukpru mmọ eke ekopde ebaña enye. Ndik odoro mmọ ke idem, ndien mmọ ekut nte nsu odobide ye akpan ntak emi anade owo anam akpanikọ ye Abasi. Mmọ ema efiọk ete “Edi ata ñkpọ ndik ndiduọ nsine ke ubọk Abasi emi odude uwem” (Mme Hebrew 10:31). Ndusuk ini ekefiak eti mmọ se mbon eyo oko eketiñde “Anie ekeme ndida ke iso edisana JEHOVAH ABASI emi?” (1 Samuel 6:20), ndien enọ ibọrọ nte David ewetde ke Psalm 24 “Enye emi ubọk asanade, esit minyuñ ideheke; emi mimenekere ukpọñ esie inọ nsu, minyuñ iñwọñọke inọ abiaña.”
Mkpa Ananias ye Sapphira iketreke ñkọri ke edisuan Eti-Mbuk. Nditọ Abasi ema eka iso ke utom mmọ ke ndikpono Abasi. Mme andinim ke akpanikọ ekedọdiọñ etọt, ndien ediwak ke otu iren ye iban ema ediana ke ñkọri ufọk Abasi. Ọbọñ ama ọdiọñ mme owo koro ema esio idiọk-ñkpọ ke otu efep. Man otodo nnyin inyene edidiọñ mfin, ana esio idiọk-ñkpọ ke uwem efep, ye ke otu mmọ emi etienede Enye. Edieke idiọk-ñkpọ osuk akade iso odu ke esit ye uwem, Abasi idikemeke ndinam utom nte Enye akpanamde.
Mme Utibe-Ñkpọ
Ke odudu Abasi, mme Mbet ema enam mme utibe-ñkpọ ke otu mme owo. Akwa otu owo ema eto ke mme nsio-nsio obio ye mme obio emi akande Jerusalem ekuk edi. Ediwak idiọñọ ye mme utibe-ñkpọ ema eda itie, ema enam mbon udọñọ ekop nsọñidem, ebin ndedehe spirit efep, ndien kpukpru mmọ emi ekedade esọk mme Mbet ema ekop nsọñidem. Mme owo ema enyene utọ iwuk ye mbuọtidem oro, enye ekesin mmọ emende mbon udọñọ ekenim ke mben ọkpọ-usuñ, man oto do mbukpọñ Peter “ọduọ ndusuk mmọ ke idem.”
Ndusuk ini Jesus eketiñ abaña mme utibe-ñkpọ emi, ke ini Enye ọkọnọde Mbet Esie eñwọñọ Iberedem ete: “Owo eke ọbuọtde idem ye Ami eyenyuñ anam utom eke Ami nnamde; enye eyenyuñ anam utom eke okponde akan oro: sia Ami nnyọñde ntiene Ete” (John 14:12). Mme utibe-ñkpọ emi ekedi ndusuk mme idiọñọ emi Jesus ọkọdọhọde ete ke eyetiene mmọ emi enimde Enye ke akpanikọ (Mark 16:17, 18). Ke eyo mfin emi, mme idiọñọ oro ke etiene ata mme andinim ke akpanikọ, ke ini mmọ, ke mbuọtidem, ebọñde akam ke enyiñ Jesus ke ukpono ye ubọñ Esie. (Kot ke Utom Mme Apostle 4:29, 30 ye Ñwed Mbon Rome 15:18, 19).
Questions
MME MBUME- Nso ñkpọ ikọnọ mme Mbet odudu nditiñ ikọ ye uko?
- Nso idi edidiana-kiet?
- Tiñ se afo ọfiọkde abaña Barnabas.
- Peter akasaña didie ọfiọk ete ke Ananias itiñke akpanikọ?
- Anie akanam Ananias ye Sapphira edomo ndinam abiana?
- Ewe usuñ ke Ananias ye Sapphira ekenam idiọk-ñkpọ?
- Nso ikedi ubierikpe Abasi ọnọ Ananias ye Sapphira?
- Didie ke Ọbọñ ese nsu?
- Nso ñkpọ ke mkpa Ananias ye Sapphira anam ke idem mme owo?
- Mme Mbet ekesaña didie enam mme utọ utibe-ñkpọ oro?