Lesson 307 - Senior

Memory Verse

IKỌ IBUOT: “Emetọ mmọ ke Ufọk Jehovah; mmọ eyesiaha ke okure Abasi nnyin” (Psalm 92:13).

Cross References

I Utom Ye Mme Ufọn Editoro Abasi

1. Edi eti ñkpọ nditoro Abasi, Psalm 92:1-3; 33:2; 89:1; 147:1; 1 Chronicles 23:5

2. Akwa ubọk utom Abasi ayarare, Psalm 92:4, 5; 139:17; Isaiah 28:29; Ñwed Mbon Rome 11:33, 34

3. Idiọk ye ndisime owo ikereke ibaña akpatre ufen emi anade ebet idiọk owo, Psalm 92:6-9; 94:8; 68:1; Jeremiah 12:1-3; Malachi 3:15

4. Mme edidiọñ edinen owo ewut idem, Psalm 92:10-14; 23:5; 89:24; 135:1-3; Isaiah 65:22; Hosea 14:5, 6

5. Ebọp enyuñ esọñọ kpukpru edinam mfọn ye ubierikpe Abasi eto nti edinam Esie, Psalm 92:15; Deuteronomy 32:4; Ñwed Mbon Rome 9:14.

Notes

SE EKPEPDE EBAÑA

Usen Ekọm

Nnyin imọkọm Abasi koro Akwa Ukara ofuri obio America osiode usen kiet ke isua onim nte usen ekọm. Edi ke utọ usen emi ke esinyik kpukpru owo ndikọm nnyuñ ntoro Abasi ke mbọm ye edidiọñ Esie ke isua emi ekebede. Nte idut, nnyin imenyene ediwak ntak ndinọ ekọm. Nte owo kiet kiet imonyuñ inyene ediwak ntak emi ikpọnọde ekọm. Etie nte Abasi okonim obio America ke ini emi ekoyomde ebiet ubọhọ ke ererimbot ndinọ ikọt Abasi emi mikenyeneke unen ndikpono Abasi ke idut mmọ.

Mi ke idut nnyin emi, mbet ukara nnyin ọnọ owo kiet kiet unen ndikpono Abasi nte ekikere esie edide. Baba idut efen iduhe emi akanam enyenede oruk ọyọhọ ufañ oro ke ndinam ikọ Abasi nte emi nnyin inyenede. Mme owo efen iduhe ke ofuri ererimbot emi enyenede unen nditoro Abasi ñkan mme owo emi edude ke idak ukara idut America.

Ediwak owo inyeneke esit ekọm inọ unen emi mmọ enyenede oto mbet ukara mfin emi; edi utu ke mmọ ndikwọ nnyuñ ntuak ibuot nnọ Abasi, mmọ eda Usen Ekọm enim usen usọrọ ye akwa idara, usen ukpa mmin ye usin ntime. Yak but anam idut emi Abasi otimde ọdiọñ, edi mmọ esọhi mfọn Abasi ke ikpat! Nsobo kebet mme utọ owo emi enanade esit ekọm ntem ibọhọke mmọ ekabare esit.

Akpasa-Uyo America

Ke ini nnyin imenerede enyin ise akwa iñwañ mkpasip nte adatde, emi esikotde akpasa uyo America, nnyin itiñ, ye David ite: “Enye osio mmọñ ke ubet Esie ebit ikpọ obot: mfri utom fo ọyuhọ isọñ. Enye anam mbiet otibe ọnọ ufene, ye ikọñ emi owo anamde utom ke esit, man osio udia ke isọñ” (Psalm 104:13, 14).

Esit eke ọyọhọde ye idara itoroke Abasi ini kiet kpọt ke isua, ke Usen Ekọm; edi, nte andiwet Psalm, kpukpru usen ubọk, enye owut Ima Abasi onyuñ owut mbuọtidem Esie ke okoneyo. Ke akpanikọ, eyen Abasi enyene nsọñọ-nda itoro nte incense emi ọwọrọde oto itie-uwa eke esit esie. Oro anam owo okop inem nditoro Abasi. Ebọ ediwak edidiọñ ke spirit enyuñ ekan ke ediwak ekọñ spirit, oto ke editoro Abasi.

Ndusuk andiwet Psalm ama emehe ke nditoro Abasi ke akam. Ke ọkpọsọñ inemesit enye ama emen ndido uruk duop esie ndien nte nnuen-ubọk esie osuk ebrede, akwa idara oduk ukpọñ esie tutu enye oyom ñkpọ eke okponde akan oro ndida nnọ idem esie uyuhọ. Ntre enye akayak ndido uruk duop onim onyuñ efehe ebine “harp” esie, ndien do ke ukpọñ esie ọkọdọk onyuñ eneñere ọdọk ke itoro Spirit, tutu uyo esie ekeme nditiene inem ikwọ oro ñkwọ nnọ enyiñ Ata Edikoñ.

Ikpọ Utom

“O Jehovah, se Afo anamde okpon didie!” David, kiet ke otu mme andiwet Psalm, ke ediwak ini odu ke mkpaidem onyuñ awak ndiwet mbaña ubọk-utom Abasi. Enye ọkọdọhọ ete mme heaven ke ebuk ubọñ Abasi; utin, ọfiọñ ye ntanta-ọfiọñ eyarade odudu Esie. David eketi nte Abasi ọkọfọnde ye Nditọ Israel: tutu Ididuot Inyañ efehe ọkpọñ iso Esie, ndien ñko Inyañ Jordan onyuñ abahade ọnọ Nditọ Israel. Abasi mmọ ama enyene odudu ndinam mme utibe ñkpọ.

Nnyin ikpono kpa Abasi oro Nditọ Israel ekekponode. Enye edi Abasi odudu. Abasi nnyin ekeme ndikpuhọde uwem mme owo. Enye ekeme ndifen idiọk-ñkpọ anam-idiọk, eyet uwem esie asana, osio enye ke ukara Satan onyuñ emen enye esin ke obio ubọñ Christ. Edi odudu Abasi ikpọñ ekeme ndikpuhọde esit anam-idiọk nnyuñ nam enye edi owo Abasi. Odudu efen ikemeke ndinam oro.

Kuyak usen Ekọm emi ebe ke mumenekere uyo fo utoro utibe Abasi ye Andinyaña, kpa Jesus Christ, ke ediwak edidiọñ emi Enye ọkọnọde fi ke isua emi ekebede. Enye ọmọnọ fi ukpeme ke ediwak ñkpọ ndik emi afo okutde ye se mukwe ke adaña nte mmọ ekedade fi ke iso. Enye ọmọnọ fi nsọñidem, udia ye edisine ñkpọ. Ọnọ fi ibifik onyuñ omum fi akama ke esit ekaubọk Esie. Enye ama ekeme ndikpemen uwem fo mfep ini kiet nte emi enimede ikañ kandel ke ini ekededi. Edi Enye akabade ọnọ fi ekese edidiọñ. “Yak owo ekọm Jehovah ke ima Esie, ye ke mme utibe-ñkpọ emi Enye anamde ye nditọ owo!

Mme Ntọtuñọ Ekikere

“Ekikere Fo emetuñọ eti eti.” Ekikere owo edi enyọñ-enyọñ. Ndusuk owo ekere ete, sia owo ama ekenyene ifiọk abaña ndusuk odudu ererimbot ke ndinam ọtọmbe, ke ifiọk esie otim aka anyan. Edi utọ mbufiọk emi owo enyenede edi ndida ata ekpri ke otu mme ndedibe utibe-ñkpọ Abasi ñwọrọ ke uñwana. Abasi okobot kpukpru ñkpọ. Se owo oyomde-yom okut edi se Abasi ama okobobot.

Paul Apostle ofiori, ke ama eketiñ ayarare mme ndedibe ñkpọ mfọn; “Uwak ọniọñ ye ifiọk Abasi edituñọ adaña didie! Mme ikpe Esie ekak owo ndiduñọre adaña didie, onyuñ ayaña owo nditiene nde usuñ Esie” (Ñwed Mbon Rome 11:33). Paul anam añwaña ete ke okoto ke unana edinim ke akpanikọ esibe Israel efep, ndien idahemi oto ke mbuọtidem ekabare eda mme Idut esin. Ñkpọ emi ama okpon akan enye ke ini enye okosuk ekerede abaña mme ntọtuñọ ekikere Abasi.

Andiwet Psalm ñko ama otim enem esit ke ntọtuñọ ifiọk Abasi. Enye ama okut ete ke owo iyaresit ye ndisime owo ikọfiọkke uñwam emi Abasi ọnọde owo; koro mmọ ikotimke ifiọk ite ke ikemeke ndida enye ndomo ye inyene emi ekutde ke enyin ikpọñ. Anam-idiọk ekeme ndiforo nte awawa nsehe eto, edi edieke enye osiode Abasi efep ke uduak esie, usen eyedi emi enye editakde ke nsinsi. Nte afo omosio Abasi efep ke uduak fo mfin?

Ndisehe Nte Eto

“Edinen owo eyesiaha nte eyop.” Nnyin imekeme ndikut mi ite ke idorenyin edinen owo enyene ukpuhọre ye eke idiọk owo emi edade ekedomo ye mbiet emi edisọpde esibe enim ndien enye eyemere. Eyop owut uyai ye edisuk ñka iso nnyene ifen. Enye enyene ukeme ndibiom akwa mbiomo mkpasip emi anamde ufọn ke idem nnyin. Iduhe ini ke isua emi etopde kpukpru ifen man enye enyene nduọk odudu ke akwa utom edinyene ifen ke ini esie. Enye enyene ifen kpukpru ini. Emi etie nte uwem owo anditiene Christ. Enye oñwum mfri kpukpru ini. Enye inyeneke nduọk-odudu baba ini kiet ke utom oro. Ndien nte mbiomo edinam ñkpọ nnọ Abasi ye owo emi enye obiomde osuk ododobi, ntre ke enye ọdọdiọñ ọkọri ke spirit.

“Onyuñ ọkọri nte Cedar ke Lebanon.” Eto Cedar owut nnyin nsọñọ nda, ubọñ ye uyai. Utuñ ikemeke ndibiat eto Cedar, ke ntre enye ebighe ke ediwak isua. Eda mbuọtidem etọ ndinen owo ke obio ubọñ Abasi. Eda ikọ Abasi eduọk mmọ mmọñ enyuñ etim ekpeme. Mmọ esin oruñ enyuñ eyire ke ima. Mmọ enyene nsọñọ-nda enyuñ ekop odudu nte eyop ye Cedar. Mmọ eñwum mfri kpukpru ini enyuñ enyene ufọn ke ata ediwak usuñ. Ndien ke ndidian ke kpukpru oro, “eyesuk ekọri ke usọñ.” Se utọ ndọñesit eke enyenede kpukpru nnyin!

Simeon ye Anna, okposuk edi nte ekesọñde, mmọ ekesuk etiene edu ke Temple ndikpono Abasi ke ini ete ye eka Jesus ekemende enye ke nsek eka do. Simeon okodu edisana uwem ye uwem edinam ñkpọ nnọ Abasi. Enye okodu uwem onyuñ asaña ye Abasi ke anyan ini. Enye ekedi ñkọk Ata Vine emi oñwumde mfri ke ediwak isua, ndien ke emi enyin esie ama okokut Andinyaña, enye ama ebeñe idem ndinyọñ ke emem. Anna ñko akanam ñkpọ ọnọ Abasi ke utre udia ye ubọñ akam okoneyo ye uwemeyo. Ke ini enye okokutde Christ enye etiñ ikọ ntiense ọnọ mmọ oro ekeyomde ubọhọ ke Israel. Simeon ye Anna ekebiet eyop ye Cedar ke Lebanon; koro mmọ ema eñwum mfri ke ini usọñ ukem nte ekedide ke ini uyen mmọ. Nnyin kpukpru imọfiọk nti iban ye iren emi ekeyakde idem enọ utom Abasi enyuñ edu uwem eke oñwumde mfri ọnọ Abasi ndien enyuñ enam ñkpọ enọ Enye tutu osim ini mkpa. Ekemen ndusuk mmọ edọk ke Heaven ke ini mmọ esuk ebọñde akam ebaña ererimbot emi atakde. Nte nnyin imoyom nditie ntre? Nnyin imekeme edieke imade!

Isọñ Emi Ọyọhọde Ye Nti Ñkpọ

Ke ini Ekọm emi, eyak nnyin iti ekese mfọn Abasi emi osimde nnyin ke isua emi ebede inyuñ ikwọ itoro inọ Enyiñ Esie. Koro nnyin imekeme nditiñ ye David ite: “Afo emedi edise isọñ, onyuñ ebit enye eti-eti; anam enye oñwum ñkpọ eti-eti; mmọñ ọyọhọ ke akpa Abasi: afo otim ibokpot mmọ, koro afo ọdiọñde enye (isọñ) ntem. Bebit mme furrow esie, suhọre mme ibombom esie, afo ada edim emem enye, onyuñ ọdiọñ se enye otibede. Afo amada anyanya ufọn fo ayara isua; mme isañ fo enyuñ etọi isek. Mbiet wilderness etetọi: ñkpri obot enyuñ ebọbọ idara ke idem. Ñkpri ufene efuk mme ntañwañ ebiet: ibokpot onyuñ esine mme itihere; mmọ esio ñkpo idara, enyuñ ekwọ ikwọ” (Psalm 65:9-13).

Questions

MME MBUME

1. Nso edi ntak emi nnyin inamde idara Ekọm?
2. Nnyin ikeme ndidara enye didie? nso edi ntak?
3. Mbon iyaresit ye ndisime ese inyene idiọk owo didie?
4. Abasi ese inyene idiọk owo didie?
5. Eda ndinen owo edomo ye nso utọ eto?
6. Siak ndusuk mme ñkpọ emi afo ọdiọñọde abaña mme eto emi.
7. Enye ọdọhọ ete ke edinen owo enyene ndinam nso ke ini usọñ?
8. Siak ndinen owo emi ekeñwumde mfri ke ini usọñ.