1 Ndidem 19:19-21; 2 Ndidem 2:1-18

Lesson 308 - Senior

Memory Verse
IKỌ IBUOT: “Ọfọfọn ọnọ mmọ eke ekopde biọñ ye nsat-itọñ edinen ido: koro mmọ eyeyuhọ” (Matthew 5:6)
Cross References

I Ikot Abasi

1. Elijah ama odori Elisha ekura esie ke idem; edinam emi okowut ikot Abasi, 1 Ndidem 19:16, 19; Exodus 3:1, 2; Judges 6:11,12; Psalm 78:70-72; Amos 7:14, 15; Matthew 4:18, 19

2. Elisha ama ọkpọñ inyene ye ufọk esie etiene ikot Abasi, 1 Ndidem 19:20; Matthew 8:21, 22; Luke 9:61, 62; Genesis 24:55-58

3. Elisha ama ada mme enañ anam uwa ndien aka akanam ñkpọ ọnọ Elijah, 1 Ndidem 19:21; 2 Ndidem 3:11, 12; John 13:13-16; Luke 22:25-27; Matthew 20:28; Ñwed Mbon Philippi 2:17

II Ekura Abasi

1. Elisha ama etiene Elijah, ikereke ibaña mme ubiọñọ ye mfina, 2 Ndidem 2:1-8; Ruth 1:15-18; 2 Samuel 15:21; John 11:16; 13:1; Ñwed Mbon Rome 16:4; 2 Timothy 1:16; Utom Mme Apostle 2:42

2. Ediyire Elisha ye edinam akpanikọ esie ama anam Elijah obup se enye oyomde imọ inam inọ enye, 2 Ndidem 2:9, 10; 2 Chronicles 15:12-15; Psalm 73:25; Mark 5:27-34; 10:51, 52; 7:25-29

3. Ofum idio ekemen Elijah ọdọk ke Heaven, 2 Ndidem 2:11; Genesis 5:24; Mme Hebrew 11:5; 1 Ñwed Corinth 15:51, 52; Matthew 24:27, 28, 40, 41; Luke 9:30, 31; 1 Ñwed Thessalonica 4:14-18

4. Elisha ama ọbọ ekura Elijah oro ekedi mbiet edibọ uduọk-mmọñ Edisana Spirit, 2 Ndidem 2:12-18; Luke 24:49; John 14:12-14; Utom Mme Apostle 2:1-4, 16-18; Psalm 45:1, 7.

Notes
SE EKPEPDE EBAÑA

Ekot Enyuñ Emek

Ọsọsọñ ndikut ke Ikọ Abasi, ido nte emekde mme owo esin ke idaha utom Abasi emi eyede akan emi Elijah okodoride Elisha ekura ke idem. Elijah ama ekpere utit ọkpọsọñ utom esie nte anditiñ ntiñ-nnim ikọ Israel, mbon mfiak-edem. Akana nte emek owo emi enyenede ndida itie utom Abasi emi, ndien owo oro ekedi Elisha, ndusuk Elijah ikọfiọkke owo emi, edi Abasi ama ọfiọk.

Edi Abasi esimek mme ọkwọrọ-ikọ ye mme anam-utom, okot, onyuñ onim mmọ ke nsio-nsio idaha utom Esie. Nnyin ifiọk emi oto ke Ikọ Jesus: “Idighe mbufo ekemek Mi, edi Ami ñkemek mbufo nyuñ nnim nte mbufo eka ekeñwum mfri, mfri mbufo okponyuñ osuk odu” (John 15:16). Paul eketiñ ñko abaña utom ukwọrọ-ikọ esie ete: “Koro edieke ñkwọrọde gospel, nnyeneke ntak mbure; utom oro obiomo mi ke idem nte ñkpọ eke nnyenede ndinam; koro idifọnke fọn inọ mi edieke mmeñkwọrọke gospel. Koro edieke nnamde utom emi ke erinyime esit mi, mme-nyene utip; edi edieke mme nnamke ke erinyime esit, ntie nte akama-ukpọhọre emi eyakde utom esin enye ke ubọk, ete anam’ (1 Ñwed Corinth 9:16, 17). (Kot Mme Hebrew 5:1-4). Abasi ama ọdọhọ Elijah ete, “nyuñ yet Elisha eyen Shaphat, emi otode ke Abel-meholah, nim ke prophet ke itie fo” (1 Ndidem 19:16). Ikedighe utom Elijah ndimek owo emi edidade itie esie, edi Abasi ọmọfiọk esit owo.

Abasi ndimek owo nsin ke utom Esie esitiene mbeñidem emi owo oro akanamde, emi enye onyuñ osuk anamde abaña utom oro. Abasi idọñke ọkọi ndinam utom Esie. (Kot 1 Ñwed Timothy 3:6). Mmọ emi Enye esiwakde ndikot nsin ke utom Esie edi, mmọ oro eke uwem ye edinam mmọ eyọhọde ye mbuọtidem, enyuñ edide se edoride enyin ete ke eyekeme ndinọ uñwam ke utom Abasi ke ini iso. Utọ owo oro ekedi David. “Onyuñ emek David owo esie, onyuñ ada enye ke nna ufene efep: ada enye ke ukama mme uman erọñ emi enọde mmọñ-eba, efep edi, ete enye ọbọk Jacob ikọt esie, ye Israel udeme esie. Ndien enye ada ofuri esit esie, ọbọk mmọ; eyenyuñ akama mmọ ke usọ ubọk esie” (Psalm 78:70-72). Ntre Abasi okonyuñ emek Joseph, okposuk enye ekedide akparawa, ete anam mme ikpọ ñkpọ ọnọ Imọ. (Se Ke Psalm 105:17-22).

Ukpọñ emi enyenede udọñ ndinam utom Abasi, enyene ndinam kpukpru ñkpọ ke odudu esie ndikut nte imọ imodot ke utom oro. Ke ini ikot osimde enye, enye eyebeñe idem. David, ekpri eyen ekpeme-erọñ, ikabiatke ini baba kiet ndiñwana ye Goliath, usua Israel, ke enyiñ Ọbọñ, koro enye, David ama owot ekpe ye anawurekpe ke ini enye ekedide akparawa, oto ke uñwam Abasi. Ke ini ekeyomde owo eke edimende ofut Abasi, David ọkọsọñọ idem esie ke mbuọtidem emi enye ekenyenede ke Abasi, onyuñ onyime ndika. Abasi ekemek enye koro enye ama ebeñe idem. Owo efen ikoduhe ke Israel emi ekenyenede ukeme ndika ñkañwana ekọñ Abasi emi ye Goliath.

Ke ini Elisha osuk anamde utom esie, enye ama okop nte ekura emi Elijah okotopde, odorode enye ke idem. Enye ama okop akwa udọñ ke esit esie, enyikde enye ndinam utom Abasi emi okodobide akan ekura; ye uyo Abasi etiñde ke esit esie, mme ikọ oro ekese owo ke ediwak emana ema ekekop: “Tiene Mi.”

Ediyak Idem

Owo ndifiọk ke esit esie nte ke Abasi enyene uduak ndikot enye ke usuñ kiet mme eken nsin ke utom Esie, kiet me eken, isioho owo oro ifep ke ediyak idem esie ke akam man enye ekeme ndinam utom oro ọfọn. Ndiyere ikot Abasi eneñere ọwọrọ ata ntọtuñọ nyak-idem nnọ Abasi man owo oro ekeme nditim nnam utom oro ekekotde enye ete edinam. Elisha ikenyeneke ukpuhọre ye mme owo efen. Enye ama ọfiọk ikot esie, onyuñ ọfiọk se ediyomde ito enye, ama onyuñ ọfiọk ete ke ikot emi enyene ndikpon ñkan kpukpru ekikere ye uduak esie ke uwem. Utom Abasi okoñ akan kpukpru utom ke uwem emi, owo inyuñ ikemeke ndibat mme utip esie, edi oto ke ọyọhọ ñwa-idem nnọ utom Abasi ke owo edikeme ndinam uduak Esie. Nnyin imekere ite ke ukpọñ Elisha ama añwana mbọk ye Abasi ke ini enye ọdọhọde ete: “Mbọk yak mi ntim kaña ete mi ye eka mi inua, ndien nyetiene fi edem.” Ibọrọ Elijah, “Ka, fiak di, koro nnam fi nso ñkpọ?” ke ibio-ibio, ọkọwọrọ ete: “Afo enyene ndiyere ikot Abasi, edi Enye okot fi, idighe ami ñkot, ndien afo enyene ndiyere Enye.”

Men ikọ emi domo ye ikọ emi Jesus eketiñde ye owo mbet Esie emi okoyomde ndibem iso nkobuk ete esie kaña. Ibọrọ ekedi: “Tiene Mi; nyuñ yak mme akpa-mkpa ebuk mme akpa-mkpa mmọ” (Matthew 8:22).

Edinam Utom

Elisha, ke ama akanam uwa okure, ọkpọñ ufọk esie etiene Elijah. Ñwed Abasi etiñ ete ke enye “ọkọtọhọ Elijah mmọñ ke ubọk” (2 Ndidem 3:11), emi ọwọrọde ete ke enye ama añwam Elijah ke kpukpru utom emi enye ekekemede ndinam nnọ Anditiñ ntiñ ikọ eke Abasi oro. Ikot Abasi ndisim owo, edi ikot utom ndiñwam mbon efen, nte ñkpọ emi enamde enọ Christ. (Se ke 2 Ñwed Corinth 5:20). Jesus ọkọdọhọ ete: “Ami ndu ke otu mbufo nte enye emi adade mbet” (Luke 22:27). Jesus ọkọdọhọ mbet Esie ete: “yak enye emi okponde akan ke otu mbufo akabare etie nte eyen-ọwọñ; enye emi onyuñ edide etubom akabare etie nte anam-utom” (Luke 22:26). Jesus ñko ọkọtọñọ ntak etiñ ete: “Kpa nte Eyen Owo mikedighe, man enam ñkpọ enọ Enye, edi man Enye anam ñkpọ ọnọ owo, onyuñ ọnọ uwem Esie ndifak ediwak owo” (Matthew 20:28).

Uwem emi eyakde enọ Abasi, edi uwem emi ebiatde ke ndinam mme ñkpọ Abasi nnọ nditọ Abasi ke ebiet ekededi emi Abasi okutde ete ọfọn. Nnyin inyene ndiyak uwem nnyin man oto do itọñọ ntak ida mmọ inọ nsinsi uwem. Kpukpru nditọ Abasi enyene ndifiọk emi ke idaha ke idaha nte mmọ ekponode Abasi, man mmọ ekpekeme ndinyene nsinsi uwem.

Nditiene item Christ esiwawak ndida mme owo ñka ke mme anyan ebiet ke ererimbot, ke mme idut emi mifiọkke Abasi, ebiet eke mmọ enyenede ndisobo ye ekese unọmọ, emi ke ndusuk ini, mmọ ekeme ndiduọk uwem mmọ ke ini ekwọrọde Ikọ Abasi man enyaña mme owo esio ke mme idiọk-ñkpọ mmọ. Emi edi utom ñwa-idem nnọ Abasi, koro eyen-ufọk ikponke ikan ete-ufọk esie. Kpa nte Jesus ọkọnọde kpukpru ñkpọ, kpasuk ntre ñko ekeme ndikot anditiene-Christ man enye ọnọ kpukpru se enye enyenede ke abaña ubọñ Abasi, koro Ete-ufọk esie oyomde oro oto enye.

Elisha ekedi ata eti anditiene Abasi koro enye okonyimede ndinam ñkpọ nnọ Anditiñ ntiñ-nnim ikọ Abasi ke ebiet ekededi. Odu mme owo emi mimaha ndinam se mmọ ekotde utom ufin, ke ufọk Abasi, enyuñ ekerede ete ke mme imọ imokpon idaha ke uwem emi ikan, ndinam utọ utom ufin oro. Iduhe utom emi midighe akpan utom ke iso Abasi; inyuñ iduhe baba owo kiet eke edọhọde enye ọsuhọre idem okosim ke idaha emi Jesus okosimde, Enye akayakde mme owo etọk Enye ke kpukpru ikọ emiom ye isuñi, etuhọre Enye, ndien ke akpatre ebọ Enye uwem. “Enye “akañwaña Idem Esie, ada mbiet ofin, owut idem nte owo; ndien sia Enye ọwọrọde edi ke ido owo, Enye ọsuhọre idem, akabare osuk ibuot tutu ọsuñọ ke mkpa, kpa mkpa cross” (Ñwed Mbon Philippi 2:7, 8). “Okposuk edi nte Enye ekedide enyene-ñkpọ; ke ntak mbufo Enye akabare edi ubuene, man oto ke ubuene Esie mbufo ekabare edi mme enyene-ñkpọ” (2 Ñwed Corinth 8:9). Oro ekedi uwut-ñkpọ Jesus Christ, emi akayakde idem Esie ye kpukpru se Enye ekenyenede ọnọ Abasi, Ete Esie, ke ntak erinyaña ukpọñ mme owo; nnyin inyuñ ikemeke ndinam ọsuhọre akan se Abasi oyomde nnyin inam.

Odudu Abasi

Ke ini emi Abasi okoyomde ndida ofum idio mmen Elijah ndọk ñka ke Heaven, Elijah ọkọdọhọ Elisha ete, “Tie mi.” Edi Elisha ikonyimeke ndikpọñ Elijah. Utom Elisha ekedi ndinam ñkpọ nnọ Elijah; Elisha ñko ama ọfiọk ete ke idibighike eyemen ete-ufọk esie ekpọñ enye. Esit Elisha ama ofiop, koro enye ikoyomke ñkpọ efen ikan Spirit ye odudu emi Elijah ekenyenede. Utom emi owo anamde ọnọ Abasi ikemeke ndiwọrọ usuñ baba kiet, ibọhọke enamde ebe ke odudu Spirit Abasi. Elisha ama ọfiọk emi, ke ntre, enye ikekemeke ndikpọñ Elijah ikpat kiet, tutu enye ọbọ odudu emi Elijah ekenyenede.

Nditọ mme anditiñ ntiñ-nnim ikọ ema eti Elisha ebaña edisọp ñkpọñ emi ete-ufọk esie edikpọñde enye, enyuñ edomo ndibiọñọ enye nditiene Elijah. Edi ñkpọ ndomo kiet ikanaha ọbiọñọ enye. Ke akpatre, Elijah obup enye se enye okoyomde. Ibọrọ Elisha ekedi: “Udeme Spirit fo iba,” edi mbiet ibọrọ emi ukpọñ emi oyomde baptism Edisana Spirit esinọde. Ke isañade “uko-uko ibe iduk ke ebekpo mfọn,” nnyin ibeñe Abasi, inyuñ ibọ Spirit Esie emi Jesus ọkọñwọñọde ndinọ.

Elijah ama etiñ mme ñkpọ emi Elisha enyenede ndinam mbemiso ọbọ se enye ekebeñede. Ke utọ usuñ emi, Abasi onim mme ñkpọ emi anditiene-Christ enyenede ndinam mbemiso enye ọbọ uduọk-mmọñ Edisana Spirit. Ana enye enyene erinyaña, efen mme idiọk-ñkpọ esie oto ke odudu emi odude ke iyip Jesus Christ, onyuñ edi obufa owo ke Christ Jesus. Enye enyene ndibọ edinam asana, ọyọhọ utom mfọn iba. Ndien enye ekeme ndiyom iso Abasi man añwaña Edisana Spirit ọnọ enye.

Elisha ikefepke Elijah enyin, edi eketiene enye ke mbuọtidem aka ke itie ke itie. Ndien ke ndo-ndo oro, ke ini Chariot ikañ akabaharede mmọ, eda ofum idio emen Elijah edọk ke Heaven. Elisha ama okut nte enye ọdọkde, ndien ke enye ama akawai edisine ñkpọ esie, enye esine ekura Elijah emi okotode ke enyọñ ọduọ. Nte Elisha amiade mmọñ Jordan ke ekura, onyuñ ofioride ete: “Enye Jehovah Abasi Elijah?” Abasi ayarade Idem Esie ke ndibahare mmọñ Jordan man Elisha asaña ebe. Nnyin ñko imekeme ndiyarade akpanikọ Abasi ye idaha Esie. Ke ndikop item Esie ye ndinyuñ nyom Enye ke nnen-nnen usuñ, imekeme ndibọ mme ntọtuñọ ñkpọ Abasi nte Elisha ọkọbọde.

Mbet Jesus ikie ye edip ekebono ọtọ kiet ye esit kiet, ebọñ akam ke usen duop eyom Spirit Abasi emi ekeñwọñọde; ekem ke osimde usen Pentecost, Abasi ama añwaña Spirit Esie odori kpukpru mmọ ke idem.

Etie nte nditọ mme anditiñ ntiñ-nnim ikọ ema enyene ifiọk ebaña edimen Elijah ndọk kpa nte Elisha ọkọfiọkde, edi suk Elisha ikpọñ okoyom Spirit emi okodude Elijah ke idem, onyuñ edi enye ikpọñ ọkọbọ Spirit oro. Ke ini ekese owo ema ekefiọk ebaña eñwọñọ emi Jesus ọkọñwọñọde ndinọ Iberedem, kpa Edisana Spirit, ndien owo emi ewakde ebe ikie ition enyuñ ekutde Jesus ke Enye ama ekeset, ekedi owo ikie ye edip ekeneñere enyene udọñ ndidu ke ini Spirit oro ekedide. Kpa ntre ke edi mfin emi. Mmọ emi enyenede udọñ ke abaña mme ñkpọ Abasi ke eyoyom mmọ esaña ke mme item Abasi man ebọ enyene, enyuñ edu ke nnen-nnen itie ye idaha ke ñkañ Spirit man Abasi ekeme ndinọ mmọ mme udọñ esit mmọ.

Odudu Abasi eyeka iso odoro ke idem mmọ eke edikpọñde kpukpru etiene ikot Jesus Christ. Eñwọñọ Abasi edi akpanikọ, nte Peter eketiñde ke usen Pentecost ke ini ọkọdọhọde ete: “Edi emi edi se prophet Joel eketiñde, ete: Abasi ọdọhọ ete, Ama ekem ke ukperedem ini, Nyeñwaña Spirit Mi ndori kpukpru obukidem: Ndien nditọ-iren mbufo ye nditọ mbufo iban eyetiñ prophecy, Mkparawa mbufo eyekut ñkukut, Mbiowo mbufo eyenyuñ edaba ndap: Ke eyo oro, nyeñwaña Spirit Mi ndori ifin iren Mi ye ifin iban Mi; Mmọ eyenyuñ etiñ prophecy.” “Koro uñwọñọ oro enyene mbufo ye nditọ mbufo ye kpukpru mmọ emi edude nsan-nsan, adaña owo nte Jehovah Abasi nnyin edikotde etiene Enye” (Utom Mme Apostle 2:16-18, 39).

Questions
MME MBUME
  1. Anie ekemek Elisha ndida itie Elijah?
  2. Anie emek mme ọkwọrọ-ikọ Abasi mfin emi?
  3. Nso ekedi ntak emi Elijah ọkọdọhọde Elisha afiak edem ke ini emi Elisha eketienede enye ke edem?
  4. Nso idi ntak emi owo enyenede ndiyak idem esie nnọ Abasi ntọtuñọ-ntọtuñọ ke ini oyomde ndinam utom Abasi?
  5. Elisha akasaña didie ọbọ Spirit Abasi emi okodorode Elijah ke idem?
  6. Ekeme didie ndibọ Spirit Abasi mfin?
  7. Anie ekeme ndibọ Spirit Abasi mfin emi? Siak itie ke Ikọ Abasi ndisọñọ ibọrọ fo.