Lesson 313 - Senior

Memory Verse

IKỌ IBUOT: “Edi edinen owo Mi edidu uwem ke mbuọtidem: Ndien edieke enye edikhede afiak edem, ukpọñ Mi idikopke inemesit ke enye” (Mme Hebrew 10:38).

Cross References

I Mme Idaresit Ye Utip Edituak Ibuot nnọ Abasi Ke Akpanikọ

1. Ufọk Abasi emi ubọñ Abasi oduñde, edi ebiet emi ọfọnde akan ke ererimbot ọnọ owo Abasi, Psalm 84:1-4; 23:6; 26:8; 27:4; 122:1; 1 Chronicles 29:3; Luke 2:36, 37; 24:52, 53

2. Mmọ emi ekponode Abasi ke Spirit ye ke akpanikọ enyene ukpeme ke ofuri uwem mmọ, Psalm 84:5-8; 95:6, 7; John 4:14, 23, 24

3. Ndikeme ndikpono Abasi ndien ubiọñọ iduhe edi akakan unen ọnọ owo, Psalm 84:9-12; Deuteronomy 12:5; Psalm 122:4; 65:4

II Se Mbuọtidem Ọwọrọde Ke Ikọ Abasi

1. Mbuọtidem idighe ñkpọ eke miduhe, me ikpikpu ikọ, me se ekpedade ifiọk ekere, edi enye edi se nnyin idoride enyin ke esit, inyuñ itim inim ite se idibede owo ke enyin ododu, Mme Hebrew 11:1-3; 2 Ñwed Corinth 5:7; Ñwed Mbon Galatia 5:6

2. Mbuọtidem enyene ndidu man owo enem Abasi esit onyuñ oduk ke Heaven, Mme Hebrew 11:6; James 1:5-7; 1 Ñwed Timothy 1:5; 1 John 5:4; Mark 11:22; John 20:27; Ñwed Mbon Ephesus 6:16; Ñwed Mbon Philippi 3:9-11

3. Mbuọtidem edi se ikemede ndikọri, Luke 17:5; 1 Ñwed Thessalonica 5:8; 1 Ñwed Timothy 6:11, 12; Mme Hebrew 10:22

4. Ekeme ndiduọk mbuọtidem, Luke 18:8; 1 Ñwed Timothy 1:18, 19

5. Ebọ mbuọtidem oto ke edikop ikọ Abasi ke Spirit, Ñwed Mbon Rome 10:17; John 20:31; 2 Ñwed Timothy 3:15

6. Oto ke mbuọtidem nnyin ibọ kpukpru edidiọñ ito Abasi, Matthew 8:13; 9:29, 30; 17:20; 21:21; Mark 9:23

III Uwem Mbuọtidem

1. Uwem mbuọtidem ke Abasi inyeneke ufañ inọ idiọk-ñkpọ mme baba utom obukidem kiet, Habakkuk 2:4; Ñwed Mbon Rome 14:23

2. Nnyin itọñọ uwem nte owo Abasi ke mbuọtidem, inyuñ ika iso ke mbuọtidem ke idaha ke idaha, Ñwed Mbon Rome 1:16, 17; 5:1; 9:33; 10:9; Isaiah 41:10; Mme Ñke 4:18; 2 Ñwed Corinth 3:18

3. Mbuọtidem ke Abasi, inyuñ idighe utom Ibet ada utebe-ikpe ọnọ nnyin ke iso Abasi, Ñwed Mbon Galatia 3:6-14; Ñwed Mbon Philippi 3:9; Genesis 15:6; Utom Mme Apostle 10:43; 13:39

4. Ndisọñọ nyire tutu osim utit oto ke mbuọtidem, Mme Hebrew 10:35-39; 4:3; Deuteronomy 8:3; John 5:24; 20:31; Ñwed Mbon Colossae 1:21-23; James 2:5.

Notes

SE EKPEPDE EBAÑA

Ediwak ini Abasi esida ekpri itie ke Ikọ Abasi anam erinyaña osim iren ye iban. Ewet ekpri ufañ-ñwed emi ikanañ ke Edisana Ñwed Abasi, ke akpa itie etim ewet enye ọyọhọ-ọyọhọ akan mme itie ita eken. Abasi eketiñ mme ikọ emi ke esit Martin Luther, emi okodude ke mkpañ-utọñ, ndien enye ama ọbọ erinyaña. John Wesley ñko ama onyuñ okop ikọ emi; ndien oto ke mme ikọ emi nditim ññwaña enye, enye ama okop ata “obufa ufiop” ke esit esie, emi Edisana Spirit ekedide ntiense abaña erinyaña ukpọñ esie. Mme nwọrọ-nda ikọ oro edi emi: “Edinen owo Mi edidu uwem ke mbuọtidem”, me nte ekewetde ke akpa, “Edinen owo eyedu uwem ke mbuọtidem esie.” Yak nnyin ikere ñkpọ ibaña mmọ, se mmọ ewọrọde, ye nte ikemede ndida mmọ nnam ñkpọ ke uwem nnyin.

Edi ata akpanikọ ete, okposuk edi nte Edisana Spirit akadade mme ikọ emi ada mme owo usuñ osim edidiọñ emi odude ke erifen ke mme idiọk-ñkpọ, emi nnyin ikotde utebe-ikpe ke mbuọtidem, akamba ubak ukpep-ñkpọ oro esinede ke mmọ otim enyene ndinen owo kpa mmọ oro ema ekebemiso efak enyuñ efen ke mme idiọk-ñkpọ mmọ. Mmọ edi, kpa nte kpukpru Ikọ Abasi edide, uwem ọnọ mmọ eke eyomde uwem, ye ubiom-ikpe ọnọ mmọ eke emekde mme usuñ ekim. Eñwọñọ oro otode Akwa Abasi esine ke mmọ. Mmọ ewut utom eke anade ọnọ owo ndinam. Mmọ esọñọ ewut ete ke ekeme ndinam owo akabare edi edinen onyuñ enyene mbuọtidem. Mmọ enọ owo idorenyin ye ndọñesit, enyuñ ewut ikọt Abasi, ke kpukpru ikot ye utom, usuñ nditim mfiọk uduak Abasi, man owo kiet-kiet ñko ekeme ndisaña ke usuñ oro Abasi okonimde ọnọ enye ndisaña. Oto ke akpan ñkpọ emi ekpepde ke mme ikọ ifañ emi, utom Obio Ubọñ aka iso, ekpeme enye, eda usuñ ke nde ke nde enyuñ enam ndutim. Emi edi ukpọhore ọnọ nnyin ke kpukpru se inamde inọ Abasi ye utom Esie.

Erinyaña Oto Ke Mbuọtidem

“Ke mfọn ke ema enyaña mbufo oto ke mbuọtidem: erinyaña emi inyuñ itoho mbufo; edi Abasi ọnọnọ” (Ñwed Mbon Ephesus 2:8). Ke ikọ efen, Ikọ Abasi etiñ ọnọ nnyin ete ke erinyaña edi enọ Abasi, nnyin inyuñ ibọ enye ke mfọn oto ke mbuọtidem. “Mmọdo sia ema ekeda mbuọtidem enam ikpe etebe nnyin, nnyin imenyene emem ye Abasi oto ke Ọbọñ nnyin Jesus Christ” (Ñwed Mbon Rome 5:1). “Abraham ọbuọt-idem ye Abasi, ndien ebat oro enọ enye ke edinen ido” (Ñwed Mbon Rome 4:3; Ñwed Mbon Galatia 3:6; Genesis 15:6). Apostle Paul ekewet ete: “Emi ñkayakde kpukpru ñkpọ atak ... man mbọ Christ nda nnyene, enyuñ ekut ete ndu ke Enye, ke mmenyeneke edinen ido idem mi eke otode ke erinim ibet, edi edinen ido eke otode ke eribuọtidem ye Christ, kpa edinen ido emi Abasi ọnọde kabaña mbuọtidem” (Ñwed Mbon Philippi 3:8, 9

Emi otim owut ete, okposuk edi nte itie edikot ñwed emi enyenede ndisana ikọt Abasi, mmọ ñko enyene akpan etop enọ mme anam-idiọk, koro edieke owo oyomde ndisaña ke mbuọtidem, enye enyene ndibem iso nduk ke uwem mbuọtidem, ñko ke ñkañ eken, edieke owo odukde ke uwem mbuọtidem, enye enyene ndisaña ke mbuọtidem.

Mbuọtidem edi ata akpan ñkpọ—koro ke enye miduhe owo baba kiet ikemeke ndinem Abasi esit (Mme Hebrew 11:6). Mbuọtidem edi ata akpan ñkpọ—koro ke enye miduhe owo ikemeke ndibọ erinyaña (Mme Hebrew 11:6; James 1:5-7). Mbuọtidem edi ata akpan ñkpọ—koro ke enye miduhe, nnyin inam idiọk-ñkpọ (2 Ñwed Corinth 5:7). Mbuọtidem edi ata akpan ñkpọ -- koro ke enye miduhe nnyin ikemeke ndinyene erikan (1 John 5:4). Mbuọtidem edi ata akpan ñkpọ — koro ke enye miduhe nnyin inyeneke nsọñọ-nda (2 Chronicles 20:20). Mbuọtidem edi ata akpan ñkpọ—koro nnyin iyom enye ndida “nnime kpukpru enyim ikañ andidiọk” (Ñwed Mbon Ephesus 6:16). Mbuọtidem edi ata akpan ñkpọ—koro nnyin imoyom enye “ikan” kpukpru ñkpọ ekọñ Spirit eken (Ñwed Mbon Ephesus 6:16).

Anam-idiọk emi edide etiene Abasi ọbọ erifen ke mme idiọk-ñkpọ esie, ọbọ utebe-ikpe ke mfọn Abasi, enam enye edi obufa oto ke Iyip, enyuñ eda enye esin ke ubon Abasi oto ke mbọm Abasi, “ke mfọn ... oto mbuọtidem.” Atua-mkpọfiọk emi oyomde erifen idibọhọ baba kiet ke otu nti ñkpọ emi edude ke erinyaña edieke enye eyikde Abasi, mme onyuñ etrede ndinim eñwọñọ Abasi emi abañade enye ke akpanikọ. Oto ke mbuọtidem ikpọñ, nnyin ikeme nditiene Abasi; ndien ana udomo mbuọtidem odu ke kpukpru akam eke ibọñde inọ aka Ebekpo, koro ke didie ke owo ọkpọbọñ akam ọnọ Abasi ke enye minyeneke udomo mbuọtidem ke Abasi? “Owo eke enyenede eyighe ke esit esie ... enyene ubiom-ikpe” (Ñwed Mbon Rome 14:23), edi eke ọbuọtde idem ye Enye okutak, edi enyene nsinsi uwem (John 3:16). “Edieke afo adade inua fo onyime ete Jesus edi Ọbọñ, onyuñ onimde ke akpanikọ ke esit fo ... eyebọhọ” (Ñwed Mbon Rome 10:9).

Uwem Edinen Owo Edi Eke Mbuọtidem

Ke isede akpa itie edikot ke ukpep-ñkpọ nnyin, iyekut ite ke esine se inyenede owo nte “esie.” Mi ke enọ ekikere enyuñ ekpep ntọtuñọ akpanikọ ete, “Edinen owo Mi edidu uwem ke mbuọtidem,” man etim efiọk, edi, edi akpan ñkpọ ete ke mbuọtidem oro enyene ndidi eke “esie.”

Owo ekeme ndikere ete ke imọ idaha anditiene- Christ ye owo Abasi oto ke edinen ido ete ye eka esie, me eke mmọ oro ekande enye ekuk. Enye ekeme ndinyene nsinsi idorenyin oto ke ufañ ikọ eke esiode efep ke ọyọhọ erikabare esie, nte: “Ebe eke minimke ke akpanikọ ama akabare edi edisana ke ñwan esie, ñwan eke minimke ke akpanikọ ama onyuñ akabare edi edisana ke eyen ete oro”, ọdọhọ ete ke eyak edinen ido enọ imọ oto ke mme akam owo efen. Eyen emi ete ye eka esie edide mbon Abasi ekeme ndiyom ebiet udibe ke ukem ikọ eke akade ntem: “Buọt idem ye Ọbọñ Jesus, ndien eyenyaña fi ye ufọk fo” (Utom Mme Apostle 16:31), oyut ekabare etop akpanikọ emi man ọwọrọ ete koro ete me eka imọ ema ebọñ akam ebaña imọ, ke imọ iditakke. Ndusuk ñko ema ekere ete koro mme ete ye eka mmọ efiọkde Abasi, ke ini ama ekem eyenyaña mmimọ, okposuk edi oro mmọ edude uwem nsọñ-ibuot ke ofuri eyo uwem mmọ, enyuñ esinde mbọm Abasi ke ediwak ini. Edi ekpri ufañ ikọ emi ke ukpep-ñkpọ nnyin ayarare owut ndudue emi odude ke mme ekikere abiaña mmọ, koro “edinen owo Mi edidu uwem ke mbuọtidem esie.”

Mi ke nnyin ikut ite ke kpukpru owo enyene ndidi ntiene Abasi, nnyuñ nyom erifen ke mme idiọk-ñkpọ, enyuñ ebọ akamba mbuọtidem emi otode ke edinam eke ekpri mbuọtidem emi okodude ke eritọñọ ke esit anam-idiọk emi atuade mkpọfiọk anamde. Edieke anade enye odu uwem ke “mbuọtidem esie”, ndien edi akpanikọ nte ke enye ana nte enyene mbuọtidem. Edieke enye odude ke idaha nsọñ-ibuot ye Abasi, owut ete ke enye inyeneke mbuọtidem emi owo enyenede ndida ndu uwem, me ndikpa ke esit. Mbuọtidem eke Abasi oyomde oto nnyin edi enye emi osuk oduñdeduñ nnyin ke idem ke usen ke usen, okoneyo ye uwemeyo.

Mbuọtidem eke anade nnyin inyene edi enye eke oyomde nda-usuñ oto Abasi, koro imenyene mbuọtidem, ite ke Enye eyeda nnyin usuñ. Mbuọtidem eke anade nnyin inyene edi enye eke esede Abasi ke kpukpru se iyomde ke usen ke usen, koro ke mbuọtidem nnyin inim ite ke Enye eyekere abaña nnyin. Mbuọtidem eke anade inyene edi enye emi oyomde udia Spirit oto Abasi, koro ibuọtde idem ite ke Enye eyebọk nnyin ke Edisana Ikọ Esie. Mbuọtidem eke anade inyene edi enye eke esede Abasi ke abaña erinyaña ukpọñ ye nsinsi idorenyin nnyin, koro ibuotde idem ite ke edi eti uduak Esie ndida obio Ubọñ oro nnọ nnyin. Mbuọtidem eke anade inyene edi enye emi ekemede ndiduñ ke ndido idem nnyin, emi anamde inim ke akpanikọ ite ke eyekpuhọre ikpọhidem nnyin oto ke Edisana Spirit man nnyin ikeme ndisobo ye Ọbọñ ye Andinyaña nnyin ke edidi Esie ke ikpa enyọñ. Oro edi mbuọtidem eke anade inyene ye mbuọtidem eke anade ida idu uwem.

Ke ekpri ibio usen uwem emi, odu tosin ediwak ini emi anade nte iberi edem ke mbuọtidem nnyin ke Abasi man Enye añwam nnyin. Paul ekewet abaña ukut, etabi ye mfiomo ke ikpọhidem ye ke ukpọñ ndien nnyin imọfiọk ite ke ikpedighe mmem-mmem ñkpọ inọ enye ndiyọ mme ñkpọ emi, edieke enye mikpekenyeneke mbuọtidem ke Abasi. Edi okposuk edi oro nnyin midikwe ndutuhọ ke oruk usuñ oro enye okokutde, osuk ana nte nnyin isaña ke mbuọtidem nnyin ye Abasi.

Eyen Abasi adahada ke usen-ubọk man anam mme utom usen esie, idighe ke idorenyin ke idem-esie nte edide ke otu mmọ eke minimke Abasi ke akpanikọ, edi, edi ke erinim emi otode ke mbuọtidem esie ke Abasi. Eyen Abasi ebeñe Abasi nda-usuñ ke usen, oyom ukeme ndinam mme utom eke anade ọnọ enye ke usen oro, ye ọniọñ ke kpukpru ñkpọ, man uwem esie ekpedi ñkpọ edidiọñ ọnọ ediwak mbon efen. Enye ayak uwem ye usen esie ọnọ Abasi ke akam. Enye ebeñe ukpeme ọnọ mbio eke ekperede enye ye mbon ima esie onyuñ oduri edidiọñ Abasi odori ke kpukpru mbubehe eke enye anamde ndida ukpono ye ubọñ nnọ Abasi ke usen oro. Enye ọbọñ akam abaña mmọ eke ekutde ukut ke obukidem. Enye ọbọñ akam abaña mme isuñ-utom Abasi eke enamde utom ke ntak Christ. Enye ayak usuñ esie ọnọ Abasi. Eyen Abasi anam kpukpru ñkpọ emi koro enye enyenede mbuọtidem ke Abasi. Enye ọfiọk ete ke imọ ibọñ akam inọ Abasi emi okopde onyuñ ọbọrọde akam.

Ukpuhọre odu adaña didie ke uwem idiọk owo! Enye iduhe uwem ito ke mbuọtidem emi edide esie. Enye odu uwem ke asian esie — kpa asian emi mkpri ukeme esie ọbiọñde. Enye odu uwem nte ifiọk ini iso esie etiede — ekikere ini iso eke enye ekerede oto mme ñkpọ eke otibede ke uwem esie me se enye ọfiọkde nte otibede ke uwem mbon efen. Enye odu uwem ke ukeme esie — ukeme emi ekebemde iso enọ enye oto ke mfọn Abasi, emi enye odomode ndinam okpon ebe adaña oto ke ifiọk owo. Idiọk owo esiwak ndiyak uwem esie ndinam ñkpọ nnọ mbon ufọk esie, midighe ntre edieke enye edide owo eke mifamke ubọk enye ayak uwem esie ndinam ñkpọ nyom ufọn owo. Ukpeme ye mfọn eke enye ekemede ndinọ mbon eke edude ke idak esie, edi mme ñkpọ eke enye ekemede ndidep mme ndinyene nto ke se ubọk esie anamde, mme ke ifiọk esie. Enye ke idem esie inyeneke nsinsi idorenyin inyuñ inyeneke nti ikọ ndọñesit inọ owo efen ke ini owo oro adade iso ye iso ye nsinsi ini. Uwem ye edinam idiọk-owo osuk atak ke se ibañade uwem emi, ke ebede oro, otuk mmọ oro eke enye emekde ndidi mbon nduk ye nsaña esie.

Edinen owo, ke ñkañ eken, ọkọrọ “uko ke uko” ekpededi enye ebe ke itihere mmọñ eyet. Ke ini ukut ye afanikọñ edorode enye ke idem, edinen owo esin mbuọtidem ye iwuk esie ke Abasi, okut ubọk ufak Abasi, onyuñ ọbọ edidiọñ ke ntọtuñọ isọñ esit esie, okposuk edi nte oyobio abarade ikpọhidem esie. Ke itihere mmọñ eyet, edinen owo okut Abasi ima emi adade enye usuñ osim erikan ye ọyọhọ idaresit. Odudu esie odu ke Abasi; ke ntre, enye edi kiet ke otu mmọ emi ediọñde enyuñ enyenede idaresit. Enye eyetoro Abasi okposuk edi oro mfina osimde enye ke kpukpru ñkañ.

Ndikọrọ “uko ke uko” edi ata akpan mbufiọk emi enyenede ubọñ ke idem esie. Eyarare edinen ido Abasi enọ nnyin “ebe ke mbuọtidem osim mbuọtidem.” Mme ikọ iba emi etim enyene ebuana eti eti, koro edieke anade nte ikọrọ “uko ke uko” ana nte nnyin “ibe ke mbuọtidem isim mbuọtidem.”

Yak ikere ibaña eyen Abasi emi osuk amanade ata obufa, emi okutde akpa ubiọñọ, emi edide ata edidomo mbuọtidem esie. Adaña ini eyen Abasi eberede ke Abasi ke ufọt idomo, enye okut nte Abasi okponode mbuọtidem esie, onyuñ ọnọde enye erikan. Oto ke erinam emi, esọñọ mbuọtidem esie, koro ke edidori mbuọtidem esie ke Abasi, enye ama ọbọ obufa nsọñ-idem oto Abasi. Ibighike , eyikhe inyuñ iduhe nte owo Abasi afiakde okut ndutime ke usuñ efen, ndusuk ekeme ndikpuhọre ye eke akpa idomo. Enye onyuñ ọtọñọ ntak ebere ke Abasi, ye obufa unyime ye mkpon-ñkan mbuọtidem, koro idaha emi enye ọfiọk ete ke ini ikanamde ntem ke ñkpọ oro ekebede, ke Abasi ama ekpere onyuñ ọnọ imọ uñwam. Abasi ọtọñọ ntak okpono mbuọtidem esie onyuñ ọnọ enye uko oro enye oyomde.

Ekeda akamba idomo edomo akamba mbuọtidem, emi ke utit adade akamba nsọñọ-idem emi otode Abasi edi. Enye “ekebe ke mbuọtidem osim mbuọtidem” onyuñ ọkọrọ “uko ke uko.”

Edi kpa ntre ke ofuri uwem anditiene-Christ. Idomo kiet kiet esọñọ eyen Abasi idem enyuñ enọ enye odudu ke abaña se isọñde eke edidide; ndien ke enye oyomde uñwam oto Abasi, kpa ke ini ufọt ikañ-ikañ idomo, esọñọ enye idem enyuñ enam enye enyene odudu awak akan ke Abasi. Mbuọtidem oro ema eketọtọ enye ke esit ke ọkọri onyuñ okpon oto ke mme mfina eke enye okokutde onyuñ enyenede erikan oto ke ima ye mbọm Abasi eke akayararede ke idem esie.

Edinen owo ese kpa iso ye uko, ye mbuọtidem ke Abasi ke abaña mme mfina oro enye ọfiọkde ete eyesim imọ man oto do edomo mbuọtidem imọ. Ke ntre, enye odu uwem “ke mbuọtidem esie.” Akam ye nsọñọ-idem esie edi: “koro Enye ọfiọkde usuñ eke odude ye ami: Enye odomo mi: nyewọrọ mbiet gold ye “mme enye eyewot mi:nyesuk mbuọt idem ye Enye, edi nyekañ ido mi ke iso esie.” Mi ñko enye odu uwem ke “mbuọtidem esie.” Ke enye ọwọñọrede enyin okut mme erikan ye se enye ekekemede ndinam ke edem, enye itoroke idem esie ke mmọ baba kiet edi akam ọdọhọ idem esie ete: “Nso ñkpọ ke onyuñ enyene eke mukọbọhọ bọ? Ndien edieke ọkọbọde bọ, nsinam oburede mbure nte ñkpọ eke mukọbọhọ?” (1 Ñwed Corinth 4:7). Enye ọmọfiọk Enye emi odotde ndibọ ubọñ, ndien enye onyuñ ọfiọk usuñ nte enye ọkọbọde mme erikan ye se enye ekekemede ndinam nto kpa Owo kiet oro.

Ndida Mbuọtidem Mfiọk Uduak Abasi

Odu ediwak usuñ eridiọñ ye ifiọk anditiene-Christ emi nnyin mifiọkke. Odu mme uniọñ ye utuñọ eke nnyin kiet kiet misimke minyuñ ikopke. Ana nnyin “isọñọ iñwaña kabaña ikọ mbuọtidem, emi ema ekeyak ini kiet ko esin nti ikọt Abasi ke ubọk” (Jude 3). Owo ekeme ndisim ke idaha kiet, ke ini owo efen ọdọkde ada ke idaha efen. Edi kpukpru nnyin inyene ndisuk ñkaka iso ñkọri ke Abasi, edieke anade nte nnyin “efọn ema enyuñ esọñ ke ukpọñ, ekunana baba ñkpọ kiet” (James 1:4). Edi ñkpọ mfuhọ, nnyin ikemede ndikut nte ke odu ediwak mmọ eke mitọñọke kaña ndidomo mfọnido ye ima Abasi nse, ndinyuñ mfiọk nte Enye otimde enyene inem ke nnyin, ke kpukpru ñkpọ eke inamde, me idide inọ Enye.

Ñkoñ ñkan idaha emi owo Abasi enyenede edi man enye okpodu ke mfọn-mma uduak Abasi. Ndidu ke ufọt uduak Abasi edi se owo Abasi okpoyomde akan. Enye ekeme didie ndifiọk mfọn-mma uduak Abasi, nnyuñ nkeme ndinsaña ke esit adaña oro enye ọfiọkde enye? Ibọrọ odu ke ekpri ibuot ikọ nnyin: “Edinen owo Mi edidu uwem ke mbuọtidem esie.”

Ke akpa ifet, nnyin inyene ndifiọk nte ke Abasi emi ọfiọkde nte ñkpri inuen eduọde, onyuñ abatde idet ibuot nnyin, onyuñ ekerede abaña kpukpru se nnyin iyomde, edi Enye ke Idem Esie otim enyene inem ke nnyin. Ana nte nnyin ifiọk ite ke Enye ama nnyin. Ana nte nnyin ifiọk ite ke Enye ke ekere nnyin, ke ọfiọk abaña kpukpru ñkpọ-ntibe ye erinam emi otibede ke uwem nnyin. Edieke nnyin isọñọde inim oro ke akpanikọ, imekeme nditiene Enye uko-uko nyom uñwam, nda-usuñ, ukeme, mme ñkpọ efen ekededi eke nnyin iyomde. Enye ama ọñwọñọ ete iyebọrọ kpukpru ebeñe nnyin, edieke ekemde ye uduak Esie. Mi, ndien edi usuñ ndiyom uduak Abasi. Edieke nnyin inyenede mbuọtidem ke Abasi, emi edinamde nnyin idọk ida uko-uko ke eñwọñọ Esie, ida ọyọhọ-ọyọhọ ye ofuri esit ke idaha oro Enye onimde ọnọ nnyin ndida, nnyin imekeme ndinyene uko ite ke se iditibede inọ nnyin edidi uduak Esie ke abaña nnyin.

Edieke nnyin ikerede ite Abasi ọnọ nnyin utom ndinam, imekeme ndidomo utom oro ye se Enye ọnọde nnyin ndida nnam utom oro. Iren ye iban emi ekefiọkde Abasi ke eyo oko, ema esiwọrọ eda ke mbuọtidem ke ediwak ini, enyuñ ekut nte Abasi añwamde mmọ, onyuñ ọnọde kpukpru se mmọ enanade. Edieke Abasi oyomde nnyin itiñ ikọ, Enye ọñwọñọ ndinọ nnyin ifiọk eke iyomde. Edieke Enye oyomde nnyin ika, Enye eyesiak usuñ onyuñ ọnọ se iyomde ndida ñka. Edieke Enye oyomde nnyin ndiyọ, eyenọ nnyin mfọn ndinam ntre. Emi edi mbuọtidem nnyin! Emi edi uko nnyin! Emi edi iberedem nnyin! Nnyin idu uwem ke mbuọtidem oro. Edieke nnyin mikemeke ndinam oro, nnyin ndien inyeneke baba ñkpọ kiet eke nnyin ikemede ndiberi edem.

O, mbọm ye ima Abasi ekpon adaña didie! Akamba uduak Esie ke abaña nnyin edi utibe adaña didie! Uduak Abasi enem adaña didie, onyuñ ọkpuhọre adaña didie ye spirit ererimbot ye eke eyo emi! Okposuk edi nte enye ayañade ifiọk nnyin, kpa ye oro ekeme ndinam enye. Enye edi mfefere uwem idorenyin ke Abasi kpa uwem mbuọtidem. Enye edi se inade inọ kpukpru owo eke ekerede enyiñ Christ, koro “edinen owo Mi edidu uwem ke mbuọtidem esie.”

Questions

MME MBUME

1. Se mme itie inañ oro mme ikọ emi edude, “Edinen owo Mi edidu uwem ke mbuọtidem” ke Ñwed Abasi. Kot mme ufañ ikọ oro eke ewetde mbem-iso, ye mme ufañ eke etienede itie ñwed emi.
2. Ọwọrọ didie owo “ndikọrọ uko ke uko”?
3. Nso ebuana ke “ndikọrọ mbuọtidem ke mbuọtidem” enyene ye “ndikọrọ uko ke uko”?
4. Nso ke andiwet Psalm etiñ abaña edinam utom ke ufọk Abasi nte edade edomo ye uwem mme anam-idiọk?
5. Kpep Psalm 84:11 sin ke ibuot.
6. Psalm 84 asaña didie osu ke Luke 2:36-38?
7. Ewe ikpọ owo iba ke Ufọk Abasi ekebọ erinyaña oto ke itie ibuot ikọ emi?
8. Tiñ ukem-ukem se ikọ Abasi okotde mbuọtidem.
9. Tiñ ntak emi mbuọtidem edide akpan ñkpọ, ndien siak mme itie ke ikọ Abasi ndisọñọ mme ibọrọ fo.
10. Ikpekeme didie ndifiọk uduak Abasi oto ke uwem mbuọtidem?