Lesson 303 - Junior
Memory Verse
IKỌ IBUOT: “Ndien mme idut eyesaña ke uñwana fo, ndidem eyenyuñ esaña ke usiere fo” (Isaiah 60:3).Notes
Ebuana Ke Edidiọñ
Ọkpọsọñ udọñ ama odu ke ufọk Cornelius ke ini enye okokopde ete Peter ke edi nditiñ nnọ enye mbaña Jesus, Andifak Israel, ye odudu emi ọkọduọde odoro mme mbet ke usen Pentecost. Cornelius ama okot ediwak mme ufan ye mme iman esie man etiene enye ekop eti-mbuk erinyaña. Enye okodori enyin ndikop odu-uwem mbuk, ndien enye ama oyom ndibuana utibe akpanikọ emi ye mmọ efen. Edidiọñ emi ebuanade ye mbon efen eyekabade awak.
Ata ediwak mbon ekọñ Rome emi ekeduñde ke Jerusalem ikamaha mme Jew ikonyuñ ikopke inem ke ukpono Abasi mme Jew. Kpukpru emi ọkọwọrọ ndisime ọnọ mmọ. Mmọ ekedu ke Judea nte mme ekpeme mbet ikpọñ-ikpọñ enọ ukara Rome. Ke akpanikọ mme Jew ema ekere ete ke mimmọ idu ke idak ufin inọ mmọ; edi kpa ye oro mmọ ema enyuñ ekere ete ke mimmọ imọfọn ikan mbon Rome koro mme Jew ekedide idut emi Abasi ekemekde. Ke enyin mme Jew, mbon Rome ekedi mme okpono ndem, mme ke ikọ efen, mme ebua; ndien mme Jew ekere ete iyesabare idem mimmọ edieke idinyenede ebuana ye mbon Rome.
Ke Kpukpru Mme Idut
Mbemiso Jesus ọdọk ke Heaven, Enye ama etiñ ọnọ mme anditiene Enye ete ke mmọ edikwọrọ Eti-mbuk emi ke kpukpru mme idut, edi ikañwañake mmọ nte ke oro ediwọrọ ndikwọrọ ñko nnọ mbon Rome ye mme Gentile eken. Mme Jew ema edu emi ekeduñde ke ediwak mme idut efen, ndien ekeme ndidi mmọ ekekere ete ke mimmọ ima ikwọrọ inọ mme Jew ke kpukpru mme idut, ke mme imọ iyenam nte ekemde ye Akwa Utom Emi Edọñde: “Eka ke ofuri ererimbot ekekwọrọ Eti-mbuk enọ kpukpru owo” (Mark 16:15).
Ke ndo ndo oro Peter odukde ufọk, enye anam añwaña Cornelius nte ke idak ibet mme Jew, owo Jew ikpanaha oduk ufọk owo ekọñ Rome; edi edieke Abasi okoyomde Peter anam ukpuhọre ñkpọ, enye ama ebeñe idem ndisuk ibuot. Edieke Abasi ọkọdọhọde ete, “Ka ke kwọrọ nọ owo ekọñ Gentile”, enye enyene ndika. Ntem ke Peter ekedi nditiñ nnọ Cornelius mbaña Eti-mbuk Jesus Christ.
Mme Utom Edinen Ido
Cornelius ikedighe ikpikpu owo ekọñ Rome. Enye ikatuake ibuot inọ mme abasi mbon Rome, edi akanam ñkpọ ọnọ Abasi akpanikọ ke ofuri esit. Enye ye ofuri ufọk esie ema esibọñ akam eti eti, enyuñ etre udia. Mme owo emi ema ekeyet esana, emi esañade ke idaha uñwana emi mmọ ekenyenede. Mmọ ema enam edi ata akpan ñkpọ ke uwem mmọ ndituak ibuot nnọ Abasi. Ndien nso utọ edidiọñ ke mmọ ekebọ! Mmọ ekedi akpa mme Gentile ndibọ uduọk-mmọñ Edisana Spirit. Mmọ ema ebọ utip ke edinam akpanikọ nnọ Abasi. Mmọ ema enam mme utom edinen ido.
Ke ini Peter ama ọkọtọñọ ukwọrọ ikọ esie, enye ama ọdọhọ ete; “Ke akpanikọ mokut nte Abasi iteñeke owo enyin: edi ke kpukpru idut Enye adadara owo ekededi eke abakde Enye onyuñ anamde nti ido.” Cornelius ikonyuñ isañake ibe ke mbiet erikpono Abasi ikpọñ-ikpọñ, edi enye ama owut ke uwem emi enye okodude nte ke enye ama anam ikọ Abasi.
Mme mmọ oro enamde edinen ido, Abasi adadara mmọ. Nnyin inyene ndiwut ke mme edinam nnyin ite ke nnyin idi mme andimana obufa ke Christ. Mme owo ekeme ndikot idem mmọ mme anditiene-Christ, edi edieke mmọ esuk enamde idiọk-ñkpọ, Jesus ididarake mmọ ke ini mmọ edade ke iso Esie ndibọ ubierikpe. Enye ididaha mmọ nte nditọ Esie.
Nte ikpọhidem nnyin etiede, ibat okuk emi nnyin inyenede, ukpono emi mme ufan nnyin enọde nnyin, isañake ñkpọ ye mme eyedara nnyin mme ididarake nnyin ida isin ke Heaven. Nnyin inyene ndiñwum mme mfri spirit, emi edide ima, idaresit, emem, ime, mfọn-ido, erinam akpanikọ, ifure-ifure ido, mfara ke idem. Ke ini Jesus okutde mme mfri emi ke idem nnyin, Enye eyedọhọ ete “omotim anam, eti asaña utom ye owo akpanikọ: duk ke idara Ọbọñ fo” Enye eyedara nnyin. Nnyin inyeneke ndibet tutu ima isim Heaven ndien edara nnyin. Mi ke ererimbot emi edieke enyañade nnyin, Ọbọñ ada nnyin nte udeme Esie onyuñ añwaña uwak edidiọñ ọnọ nditọ ima Esie. Mme akam nnyin ñko edi ñkpọ inemesit ọnọ Enye ke ini nnyin ibọñde akam oto ke esit emi idiọk ñkpọ miduhe.
Usuan Etop John
Peter ikefeheke ndik ndikwọrọ ikọ nnọ mme Gentile. Enye ama etiñ ọnọ mmọ abaña Jesus, Enye emi John ọduọk owo mmọñ eketiñde abaña. Ukwọrọ ikọ John ekedi. “Mbufo ekabare esit; koro Ubọñ Heaven ke ekpere.” Ndien ke ini Jesus ekedide etiene enye man ana uduọk-mmọñ, John ama ofiori ete, “Sese, Eyen-erọñ Abasi emi emende mme idiọk ñkpọ ererimbot efep”. Usen oro Edisana Spirit ama ọsuhọre edidoro Jesus ke idem, eyet Enye aran onim ọnọ utom oro Enye ekenyenede ndinam ke otu mme owo ke adaña ini Enye okodude ke isọñ. Enye ama anam mbon udọñọ ekop nsọñidem, anam mme nnan ekut usuñ, ọdọñ mme anana-owo ye mbon mmem-idem esit. Peter etiñ abaña Enye ete; “asaña ke ebiet ke ebiet anam ufọn ọnọ owo”.
Nte kpukpru owo ikpamaha ndifiọk oruk Andinyaña emi? Ke akpanikọ mme Gentile ñko ekpedat esit ndinyene Enye nte ọbọñ mmọ. Jesus ama ọdọhọ ete ke Imọ ikenyene ukeme ndinam mme ikpọ utibe-ñkpọ oro koro Abasi okodude ye Imọ.
Odudu Emi Otode Heaven
Jesus edi uwut-ñkpọ nnyin, ndien Enye oyom nnyin iñwam mbio efen ke enyiñ Imọ. Nnyin imekeme ndinam emi edieke nnyin inyenede odudu Edisana Spirit ke uwem nnyin. Jesus ama ọdọhọ ete; “Edi mbufo eyebọ odudu, ke Edisana Spirit ama edi edidoro mbufo ke idem” (Utom Mme Apostle 1:8). Kpa nte Jesus odude ke ebuana kpukpru ini ye Ete, kpasuk ntre ke ana nnyin iyire ke edibọñ akam nnyuñ nsaña ñkpere Abasi edieke nnyin iduakde ndinam mme utom emi Enye oyomde nnyin inam.
Odudu nnyin ndida nnam utom nnọ Jesus oto Heaven. Nnyin ikemeke ndinam baba ñkpọ kiet ke idem nnyin. Jesus ọdọhọ abaña Idem Esie ete, “Eyen ikemeke ndinam baba ñkpọ kiet ke Idem Esie, ke mibọhọke se okutde nte Ete anamde; koro ñkpọ ekededi eke Ete anamde, kpa oro ñko ke Eyen onyuñ etiene anam” (John 5:19). Edieke Jesus ye Ete ekedide kiet ke usuñ nte Jesus mikekemeke ndinam ñkpọ ke idem Esie ikpọñ, adaña-didie ke nnyin ikpenyene ndibọ odudu nto Abasi man ikeme ndinam utom nnọ Enye.
“Enye ọfiọk adaña nte ọdọñde mi ndikot
mme ukpọñ mmemidem, Ntre ke Enye oyom mi
ñka nnyuñ ntiñ ikọ ima nnọ Enye;
“Enye oyom mi mbuk utibe ima esie ye ntak
emi Enye ekedide edikpa, Ntre inam utom ọtọ
kiet, Ọbọñ mi ye ami”,
Idaha Christ Nte Abasi
Akpan ukot ikọ ke ukwọrọ-ikọ mbet ekedi nte ke Jesus ekedi Edisana Eyen Abasi. Ebiet ekededi eke mmọ ekekade mmọ ema etiñ ebaña idiọk mkpa emi Jesus okosobode ke ubọk mme Jew, edi Enye ama ọtọñọ ntak eset ke ọyọhọ usen ita. Akanam anditiñ ntiñ-nnim ikọ eñwen, mme akwa ada usuñ eñwen ke Ikọ Abasi isetke ke mkpa. Okoñ ebe idaha eyihe, Jesus ekedi Eyen Abasi. Ndien Jesus eset idihe nte Spirit ikpọñ, edi ye ikpọhidem ñko. Enye ama adia ñkpọ ye mmọ, mmọ ema enyuñ etuk ikpọk idem Esie. Enye ama eset ke obukidem ke akpanikọ. Ke akpan emi ekedi Eyen Abasi.
Akwa Ebiereikpe
Jesus ama asaña ke otu owo nte owo, ndien onyuñ ekpep ete ke Imọ ikemeke ndinam baba ñkpọ kiet ke esiode Ete efep. Kpa ye oro Enye ama ọnọ mme anditiene Enye uyo ndikwọrọ nte ke usen kiet Enye, Jesus, eyekpe ikpe ererimbot. Ete okoyom ndiyak kpukpru ubiere-ikpe nsin Enye ke ubọk. Jesus emi akasañade ke nsuhọridem ke isọñ, eyedi ebiere-ikpe ofuri ererimbot ye Heaven nde. Edidi ata akpan ñkpọ nnyin ndikabare ndi mme ufan Jesus idahaemi ke adaña emi Enye okotde nnyin ke mbọm. Edi ke adaña emi Enye edide nte Ebiere-ikpe ini ididuhe inọ nnyin ndikabare esit.
Ke ini ubiere-ikpe edi Jesus edibahare edinen owo ye anam idiọk. Enye eyenam kpukpru mme akpa-mkpa etọñọ ntak edu uwem man ekpe ikpe mmọ; ndien Enye eyenọ mmọ utip nte ekemde ye mme utom mmọ (Eriyarare 20:12, 13). Kpa Jesus emi mme Jew ekekọñde ke krọs ewot eyedi nte Ọbọñ mme mbọñ ye Edidem mme ndidem. Ke ini oro mme mmọ emi ekesinde Jesus eyetuaña enyuñ efuhọ ke mme idiọk-ñkpọ mmọ, edi mmọ edikop mme enyene ndik ikọ oro; “Akananam ndiọñọke mbufo: edianare Mi, mbufo mme anam-ukwañkpọ” (Matthew 7:23).
Cornelius Adat Esit
Adaña didie ke Cornelius ye mme ufan esie ekeda ofuri esit eyom ndinim ukwọrọ-ikọ Peter ke akpanikọ! Adaña didie ke mmọ ekenem esit nte ke mmọ ñko emekeme ndidi mme ufan Jesus, ndiduñ ye Enye ke nsinsi! Mmọ eyedu ke Obio Ubọñ Christ ke ini emi Enye edidide ndiwuk ukara Esie ke isọñ, eyenyuñ ebuana ke kpukpru mme edidiọñ emi Jesus akade ndibeñe nnọ mmọ emi emade enye.
Peter ama esikop mfuhọ nte ke adaña ediwak mbon Jew emi ekponode Abasi ema etaba edidiọñ koro mmọ mikenimke Jesus ke akpanikọ; edi ke emi enye ọbọ ndọñ esit ke ini Cornelius ye mme nsaña esie ekenimde ke akpanikọ. Mmọ ema etim ebeñe esit mmọ ebet ini emi, eke mmọ edikopde akpanikọ eke okponde ntem emi mme anditiñ ntiñ-nnim ikọ ema eketiñ ebaña, emi idem mme angel ema ekenyene udọñ ndifiọk mbaña, oro edi, ediñwaña Edisana Spirit nnọ. Nte mmọ ekpañde utọñ enọ kpukpru se Peter etiñde, mmọ ema enim ke akpanikọ ke ofuri esit, ndien Edisana Spirit ama ọsuhọre edidoro mmọ.
Isua itiaba mme itiaita ema ebe ọtọñọde ke Pentecost, ke ini owo 120 oro ke ubet enyọñ ekebọde Edisana Spirit. Ke akade iso, ndusuk mme owo ke Samaria ema enyuñ ebọ enọ oro. Ndien ke emi ema ediñwaña enye enọ mme Gentile, ndisọñọ ikọ Joel, anditiñ ntiñ-nnim ikọ “Ndien ama ekem ke ini ñkpọ emi ebede, nyeñwaña Spirit Mi nnọ ofuri obukidem” (Joel 2:28). Mme Jew emi ekedude ye Peter ema edu ke mkpaidem. Nte ekedi mmem-mmem ñkpọ mme Gentile ndibọ uduọk-mmọñ Edisana Spirit? Nte mmọ ema edot? Nte Edisana Spirit ọkpọsuhọre edidoro mbon eñwen ke mibọhọke ekpri ibat mmọ eke emekde?
Nnyin idaresit didie koro eñwọñọ ekenyenede “ofuri obukidem”! owo ekededi eke anamde edinen ido, emi enamde asana ofuri ofuri odot ndibọ uduọk-mmọñ Edisana Spirit. “Koro uñwọñọ oro enyene mbufo ye nditọ mbufo ye kpukpru mmọ emi edude nsan-nsan, adaña owo nte Jehovah Abasi nnyin edikotde etiene Enye” Utom Mme Apostle 2:39).
Mme Jew ikekemeke ndiyik nte ke mbon Rome ema ebọ Edisana Spirit, koro mmọ ema ekop nte mmọ etiñde ke nsio-nsio edeme (ke usem emi ọkpuhọrede ye se mmọ ekefiọkde), ukem nte owo 120 oro ekenamde ke usen Pentecost.
Edina Uduọk-Mmọñ
Mbon Rome idahaemi ema enyene erinyaña, edinam asana, ye Uduọk-mmọñ Edisana Spirit, edi mmọ ikanaha kaña uduọk-mmọñ. Ema efen ke mme idiọk-ñkpọ mmọ; ema enam mmọ esana, mmọ ema enyuñ ebọ ediyet aran emi otode Abasi. Ntak emi ọkọfọnde mmọ ndina Uduọk-mmọñ? Edina uduọk-mmọñ edi ntiense ọnọ ererimbot nte ke nnyin imakabare idi mme anditiene-Christ. Kpukpru mmọ oro Abasi anyañade enyene ndina uduọk-mmọñ ke ini ekededi emi mmọ enyenede ifet ndinam ntre. Inaha enye ebet tutu enam enye asana onyuñ ọbọ uduọk-mmọñ Edisana Spirit. Ke ndo-ndo oro enye ọbọde erinyaña enye akabare edi obufa ke Christ; ndien ke edina uduọk-mmọñ enye owut ererimbot ete idahaemi imọ idi anditiene-Christ. Ke ini Peter ọnọde uyo ete enim mmọ uduọk-mmọñ esin ke enyiñ Jesus, enye okoyom enam emi nte ekemde ye se Jesus okowutde ke enyiñ Ete, ye Eyen, ye Edisana Spirit. Emi owut mkpa, eribuk ye eriset Jesus; onyuñ owut ñko edikpa nnyin ñwọrọ ñkpọñ idiọk-ñkpọ ye ediset nsaña ke obufa uwem.
Ke ini Peter ọnyọñde enye ama ọkpọñ otu mme Gentile emi esọñọde enim ke akpanikọ ke ufọk Cornelius.
Questions
MME MBUME- Nso ke Cornelius akanam ke ini enye ama okokop abaña edidi Peter?
- Nso ke mme Jew ekekere ebaña mbon Rome?
- Nso idi ntak emi Peter akakade ndikwọrọ ikọ nnọ Cornelius?
- Tiñ ñkpọ baña ido edikpono Abasi Cornelius ye ikọt esie.
- Nso ikedi mme ntọñọ ikọ ke ukwọrọ-ikọ Peter nnọ Cornelius?
- Anie ke Abasi adara?
- Nso ididi idaha Christ ke ini enye editọñọde ntak edi?
- Nso ikotibe inọ Cornelius ye ikọt esie ke ini mmọ ema ekebọ ukwọrọ-ikọ Peter?