Lesson 304 - Junior
Memory Verse
IKỌ IBUOT: “Ediwak owo eyeto ke edem usiaha-utin ye edem usop-utin, edisuhọre etetie ye Abraham, ye Isaac, ye Jacob, ke Obio Ubọñ Heaven” (Matthew 8:11).Notes
Eto Ke Edem Usiaha-Utin Ye Usop-Utin
Ama ọsọñ eti-eti mme Jew ndinim nte ke Eti-mbuk Jesus Christ etiene enyene mme Gentile ñko. Peter ekenyene ndikut ñkukut emi otode Heaven mbemiso enye onim ke akpanikọ. Nditọ Abasi emi ekesañade ye enye eka ufọk Cornelius, owo centurion, ema ekop mbon Rome esemde mme usem nte idiọñọ ndiwut nte ke mmọ ema ebọ Edisana Spirit, ndien mmọ emi ekedude ye Peter ema enim ke akpanikọ. Kpa ye emi, mme Jew ekesuk edu ke mkpa idem mme emi ekeme ndidi akpanikọ.
Centurion efen ama odu ke ini Jesus okodude ke isọñ, emi okonimde enye ke akpanikọ. Ke ini eyen esie ọkọdọñọde tutu ekpere mkpa, centurion emi ama ediyom uñwam oto Jesus. Mbet ema edu ke mkpaidem mme nte Jesus eyenam udọñọ okure okpono ndem emi, edi Enye ama ọdọhọ mmọ ete: “Edi ndọhọ mbufo nte, Ediwak owo eyeto ke edem usiaha-utin ye edem usop-utin, edisuhọre etetie ye Abraham, ye Isaac, ye Jacob, ke Obio Ubọñ Heaven” (Matthew 8:11). Ke utọ usuñ emi ke Jesus eketiñ ọnọ mme anditiene Enye ete ke ediwak owo eyedu ke Heaven ke esiode mme Jew efep. Mmọ eyekpon nte Ete Abraham, eyenyuñ ebọ mme utip mmọ ye Isaac ye Jacob. Edi ikañwañake mbet.
Idem mme Jew ke Jerusalem emi ekebọhọde ke uwem idiọk-ñkpọ ikonimke ke akpanikọ nte ke mme Gentile ekeme ndidi mme anditiene-Christ. Mmọ ema ekere ete ke Peter ama asabare idem esie ke ndidia ñkpọ ye Cornelius ye mme ufan esie.
Ñkukut Peter
Peter ama afiak ọnọ mbuk nte enye okokutde ñkukut nte esuhọrede akwa ọfọñ oto ke Heaven, emi kpukpru oruk unam ukot inañ, ye mme unam emi ibet okotde edidehe ye edisana edude ke esit ñko. Enye ama okop uyo osimde enye ete, “Daha ke enyọñ Peter; wot, ta”. Peter ekedi enye emi ekenyenede udọñ edinam ñkpọ nte owo Jew ekededi; ndien ke ini enye ọbọrọde, enye ọdọhọ ete, “Ami ñkemeke.” Enye akanam itaha ñkpọ ndomo kiet emi ibet okotde edidehe. Edi Abasi ama owut enye ete edieke Imọ idọhọde ite ke ñkpọ asana, ke Peter ikpokotke enye edidehe.
Edi akpanikọ ete ke Abasi ama ọnọ ibet emi okokotde ndusuk unam edidehe; edi mi ke idiọñọ efen odu ete ke ema enam Ibet ọyọhọ, ndien ikenyeneke aba odudu inọ mme Anditiene-Christ. Mme ido ye edinam emi ekenọde Israel nte mbukpọñ ukpep-ñkpọ ke ndikpep mmọ mbaña Jesus ye Eti-mbuk eke Enye edidade edi, ikedighe aba se eyomde. Jesus ke Idem-esie ama edi, ufọn ikoduhe aba inọ mbiet ñkpọ. Oruk unam emi owo atade ikpuhọkere idaha esit esie. Edieke enye edide anam-idiọk, nditre ndita unam idinamke enye edi anditiene-Christ (Matthew 15:17-19).
Iteñeke Owo Enyin
Peter ama odu ke mkpa idem abaña utọ ukpep-ñkpọ emi ñkukut emi akadade ọsọk enye ke ebede ñwọrọ-nda ukpep-ñkpọ edita unam. Ke ini mbon-ekọñ eketode ke ñkañ Cornelius edi, Peter ama ọtọñọ ndikere mbaña ukpuhọre emi odude ke ufọt mme owo emi esanade ye mmọ emi misanake, nte mme Jew ekenimde ke akpanikọ ete ke ukpuhọre odu. Enye ama ọfiọk ete ke ekenọ ñkukut emi man ekpep enye okukot owo baba kiet emi Abasi ama akanam asana “edidehe.” Abasi ọmọnọ owo kiet-kiet ifet ndinyene erinyaña edieke enye edikpọñde mme idiọk-ñkpọ esie.
Peter akasaña ye ntiense itiokiet ke ini enye akakade ufọk Cornelius. Edi eti ñkpọ ke ini inyenede ndinam utom emi ikerede ite ekeme ndida mbume ndi, ndisaña ye mme ntiense. Peter ama ada ime etiñ ofuri ifiọk esie ke abaña Cornelius ye mme Gentile eken emi enimde ke akpanikọ, ndien ikọt Abasi emi edide mme Jew ema eyuhọ. Mmọ ema ekut ete ke Abasi ọkọdọñ enye ke akpanikọ. Ndien ke mmọ ema ekekop ete ke mme Gentile ema ebọ Edisana Spirit, mmọ ñko, ema edara.
Ndisuan Mbuk
Eti-mbuk ana asuana. Ikedighe ke Jerusalem ikpọñ ye mme ñkpet-ñkpet obio eken ke ekenyene ndiñwaña Edisana Spirit nduọk, edi akana emen etop Eti-Mbuk emi eka ke mme idut efen. Emi ekeme ndidi koro mme Anditiene-Christ mikakaha anyan ebiet, ke nditim ntiñ, mmọ ekpekeyuhọ ndika iso ndu ke ebiet eke mmọ ekeduñde tutu mmọ ekpaña. Ke ediwak emana, mme ubon mmọ ekpesuk eduñ ke ukem isọñ emi. Edi idahemi mmọ ema ekop akwa idaresit ebaña odu-uwem Mbuk emi mmọ enyenede ndinọ. Mmọ enyene ndika ñkesuan Eti-Mbuk emi. Ana eda ikọ inua ye edu-uwem mme Anditiene-Christ etiñ etop erinyaña ke ufọt mmọ emi minyeneke kaña erinyaña ke mme anyan ebiet.
Ukọbọ
Ke ema eketọñọ Stephen ke itiat ewot, ọkpọsọñ ukọbọ ama otibe emi ekesuande mme Anditiene-Christ ke Jerusalem. Ndusuk ini mmọ ekenyene ndisaña anyan usuñ koro, nte Paul (emi ekesuk ekotde Saul ke ini oro) ama editiñ abaña idem esie ete, “Nsin mmọ enyin tutu nsim mme obio mme idut.” Mmọ efen ema edu emi eketiede ukem nte Paul mbemiso edinyaña enye, ndien mmọ ema edomo eti-eti ndibin mme ndinọ mmọ oro ekebuọtde idem ye Jesus ufen. Nte emekeme ndikere mbaña nte owo okpoyomde ndinam Jesus ye mme Anditiene Enye idiọk, ke ini mmọ mikanamke idiọk mibọhọke eti?
Ebiet ekededi eke mme anditiene-Christ emi ekekọbọde ekefehede eka, mmọ ekekwọrọ ebaña Jesus enọ mme Jew ikpọñ. Ndusuk ini, ata ediwak mmọ ikokopke kaña ibaña nte Peter akakade ufọk Cornelius, mmọ ikonyuñ ifiọkke ite ke edikwọrọ Eti-mbuk ekenyene kpukpru owo.
Jesus ama ọdọñ mbet Esie eka ke ofuri ererimbot ekekwọrọ Eti-mbuk ndien onyuñ ọñwọñọ ete, “Sese Ami ndodu ye mbufo kpukpru ini, tutu osim utit ererimbot.”
Ubọk Abasi Odoro Mmọ Ke Idem
Ke ini Jesus ọkọñwọñọde ete ke Imọ iyedu ye ikọt Esie, Enye ama ọdọhọ mmọ ete, mmọ enyene ndibem iso mbọ odudu emi otode Heaven. Odudu oro akasaña ye uduọk-mmọñ Edisana Spirit. Ke ini mbet Jesus ekekwọrọde ikọ ke mme obio Cyprus, Phenice ye Antioch, mmọ ema enyene odudu oro, ndien, “ubọk Abasi ama ọdọrọ mmọ”. Okposuk edi nte mmọ ekesinde ifik, ndikwọrọ mbaña Jesus, edieke Spirit Abasi mikoduhe ke utom mmọ, mme ukpọñ ikpọkọbọhọ erinyaña. Paul ama ada utom ukwọrọikọ esie odomo ye eke Apollos, onyuñ ọdọhọ ete, “Ami ñkọtọ, Apollos ọkọbọk ke mmọñ; edi ñkọri oto Abasi” (I Ñwed Corinth 3:6). Iduhe ñkpọ kiet emi nnyin inamde inọ Ọbọñ eke edisọñọde ada ibọhọke nnyin inam enye nte Spirit Abasi adade usuñ.
Mme ukpọñ ema ebọ erinyaña ke mme esen idut oro koro mme ọkwọrọikọ ye mme anam-utom Abasi ekebọñde akam eti-eti, ndien Spirit Abasi ama ebe ke mmọ etiñ ikọ ke esit mme anam-idiọk. Mme udọn ikọ ekeme ndinọ inem-esit, edi ada Spirit Abasi ndituk esit owo. Ke ini nnyin idomode nditiñ nnọ owo nte ke Jesus ekeme ndinyaña enye nsio ke idiọk-ñkpọ, nnyin ñko, inyene ndinyene Spirit Abasi oro ke idem nnyin man ikọ nnyin ekeme ndituk esit esie.
Abasi ọnọ Spirit oro ọyọhọ-ọyọhọ ke ini nnyin ibọde uduọk-mmọñ Edisana Spirit; edi nnyin inyene ndika iso mbeñe Abasi edi diọñ utom nnyin, inyuñ ika iso ndiyak kpukpru se nnyin inyenede nnọ Enye man otodo ikut nte Abasi anamde utom ebe ke nnyin. Nnyin imokop ediwak ini ite, “Edidemere itoho ke edinam edi oto ke edibọñ akam.” Nditọ Abasi ekpekam enyene mbiomo edibọñ akam ke esit mmọ ebaña erinyaña mmọ emi etakde!
Mboho Ke Antioch
Antioch okodu ke edere-edere Jerusalem ke ñkpọ nte itiat ikie ita, emi ekedide anyan usuñ ọnọ mme owo ndisaña. Edi ke esit akwa obio oro ediwak mme owo ema edu emi ekenimde ukwọrọ ikọ mbet Jesus ke akpanikọ, ndien akwa edidemere ama ọtọñọ. Ke ini mme andinim ke akpanikọ ke Jerusalem ekopde ebaña ñkpọ emi, mmọ edọñ Barnabas nte ọkwọrọ-ikọ ndinim mme mboho. Barnabas ama enem esit eti-eti ndikut nte ediwak mme owo ekebọde erinyaña ye nte odudu Abasi ọkọsuhọrede odoro mmọ; ndien enye ama ebe aka Tarsus ndiyom Paul man ediñwam ke mme mboho.
Paul ye Barnabas ema ekediana kiet enam eti mboho ukwọrọ ikọ, mmọ edu ke Antioch ofuri isua, ekwọrọ ikọ ye odudu tutu akwa otu owo ebọ erinyaña. Mmọ ke idem mmọ ema esọñọ ke mbuọtidem, ema enyuñ edu ke mbeñidem ndika iso ke obufa iso utom. Nte mmọ esuk ebọñde akam enyuñ etrede udia ye mme mmọ eñwen ke ufọk Abasi, Edisana Spirit ọdọhọ ete “Edianare Barnabas ye Saul enọ mi, man mmọ enam utom oro ñkokotde mmọ nnọ” (Utom Mme Apostle 13:2). Oro ọkọwọrọ ete ke mmọ edidi mme ọkwọrọ-ikọ nnọ mme Gentile. Usuñ ama eberede man otodo kpukpru owo ekop eti-mbuk enyuñ ebọ erinyaña.
Mme Anditiene-Christ
Ekedi ke Antioch ke ekebem iso ekot Ikọt Abasi mme Anditiene-Christ. Yak nnyin emi idọhọde ite idi mme Anditiene-Christ itim ifiọk ite ke nnyin itiene Christ, inyuñ idu uwem ke utọ usuñ eke Enye midikopke but ndinyene nnyin.
Questions
MME MBUME- Nso ikedi Centurion?
- Didie ke Ọbọñ okowut Peter nte ke mme Gentile ekeme ndibọ erinyaña?
- Nso ikanam mme ufan Peter enim ete ke ekeme ndinyaña mme Gentile?
- Nso idi ntak emi mme Anditiene-Christ ekekpọñde Jerusalem?
- Nso ke mmọ ekenam ke ebiet ekededi eke mmọ ekekade?
- Mme anie ekeka ke Antioch ndisiak ufọk Abasi?
- Didie ke Paul ye Barnabas ekefiọk ete ke mmimọ ididi mme ọkwọrọ-ikọ inọ mme Gentile?
- Paul ye Barnabas ekebighi didie ke Antioch?
- Ikọ emi “Anditiene-Christ” ọwọrọ didie?
- Mmọñ ke ikọ emi “Anditiene-Christ” ọkọtọñọ?