Lesson 307 - Junior
Memory Verse
IKỌ IBUOT: “Nyekọm fi ke akwa esop: nyetoro fi ke otu ediwak otu owo” (Psalm 35:18).Notes
Ekọm Ye Itoro
Nte itọñọde ntak ikut Usen-Edinọ-Ekọm, esit kpukpru mme anditiene-Christ emenere ke nditoro Abasi ke abaña mme edidiọñ usen edem. Edi idighe ke usen nduọk-odudu emi ikpọñ, edi ke kpukpru usen ke isua, eyen Abasi ọnọnọ Enye ekọm. Akpa ufañ iba ke Psalm emi eteme nnyin ñkpọ ita ndinam: akpa, ndikọm Ọbọñ; ọyọhọ iba, ndikwọ itoro; ọyọhọ ita, nditiñ mfọn-ido Esie. Eteme nnyin ndinam emi kpukpru usenubọk ye mbubreyo.
Ke Akam
Yak nnyin ise mme usuñ emi nnyin ikpotorode Ọbọñ. Usuñ kiet edi ke akam. Ke ini nnyin itọñọde edọñ ke mben itie-nna nnyin, mme ke ubet, mme ke itie-akam ke ufọk Abasi, ndien itọñọ ndikọm Enye ke mfọn Esie, Enye eyesobo ye nnyin ke itie akam oro onyuñ añwaña mbufa edidiọñ esin ke ukpọñ nnyin. Ñko, nte nnyin isuk itorode Abasi ke isọñ-esit nnyin ke ini inamde utom, Enye eyeda idara ye ima ọyọhọ ukpọñ nnyin.
Mboho ikọ-ntiense edi ifet nditoro Ọbọñ; mboho mkparawa edi eti ini ñko ọnọ nditọ-ọwọñ ye mkparawa ndinọ ikọ-ntiense mmọ. “Yak mme mmọ emi Jehovah afakde edọhọ ntem, kpa mme mmọ emi Enye afakde osio mme asua ke ubọk” (Psalm 107:2). Edieke nditọ etọñọde ke uyen, eyedi mmem-mem ñkpọ ke ini iso ọnọ mmọ ndidaha-nda ke akwa esop nditiñ se Ọbọñ anamde ọnọ mmọ. Nte enye anade ke itie-nna esie, ekpri eyen-añwan emi ekedide isọñ mboho-edidemere ke mme isua emi ekebede, ama ekere abaña ini iso esie. Nte enye ekerede abaña nte imọ ikpodude uwem eke enyenede udori, onyuñ ọbọñde akam, ñwọrọ-nda udọñ emi enye ekenyenede ke esit esie ekedi enye ndidi anam-utom efak. Abasi ama otim enye idem abaña utom oro, ndien mfin emi, enye enyene inem ke ifet eke enye enyenede ndinọ ikọ-ntiense esie ke mme inuk efak.
Ke Ikwọ
Usuñ efen ndikọm Ọbọñ edi ke ndikwọ ikwọ. Edieke ọsọñde fi idem ndikwọ ikwọ, kwọ nte ekekeme. Ndusuk nditọ esinyene ifet ndibọ ukpep-ñkpọ emi anamde ekeme ndikwọ ikwọ ọfọn. Nte mmọ ekponde ewọrọ owo, ndusuk ini eyeda uyo mmọ etoro Abasi ke ini ukpono Abasi ke otu, enyuñ eda enam mbon udọñọ enyene ndọñ-esit. Ke ediwak itie ke Ñwed Abasi imokut ite ke ikwọ ama ada akamba ubak itie ke ido ukpono Abasi. Ke Akpanikọ, “ọfọn ndikọm Jehovah, nnyuñ ñkwọ enyiñ Fo, O Ata Edikoñ” (Psalm 92:1).
Ke Edibre Ikwọ
Ọyọhọ ufañ ita etiñ ọnọ nnyin abaña usuñ efen emi anditiene-Christ ekemede ndiwut mfọnido Ọbọñ: “Ke ndido uruk duop, ye ke psaltery; ye ke uyom harp.” Mfin, nnyin imekeme nditoro Abasi ye ñkpọ mbre uruk inañ, nte: violin, viola, cello ye bass viol. Piano ye harp emi enyenede ediwak uruk, edi ñko se edade ekpono Ọbọñ. Nnyin ifiọkke nsio-nsio ñkpọ ubre ikwọ emi ekedude ke otu ñkpọ ubre ikwọ 4,000 emi Edidem David ekenyenede (1 Chronicles 23:5), edi ewet ke Ñwed Abasi nsio-nsio ñkpọ mbre ikwọ emi ekekamade ke eyo oko: ukorowo, psaltery, cornet, cymbal, dulcimer, flute, ifiom, sackbut, tabret, timbrel ye ndido ọkọrọ ye mme ndido uruk eke ima ikasasiak.
Ikpikpu Inemesit
Andiwet Psalm owut ukpuhọre emi odude ke ufọt idiọk-owo ye edinen-owo. Edi akpanikọ nte ke enye owut mme ntak emi edinen owo enyenede, emi esinde enye otoro Ọbọñ. Ndusuk ini mkparawa iren ye iban ekere ete ke mkparawa emi esikade ufọk-ndise, unek, mbre ikpa, itọk ke enyọñ snow ye mme itie mbubru eken, esinyene inemesit ekan mmọ emi ekade Ufọk-Abasi, ukpep Ikọ Abasi ke Usen Ọbọñ, ndikpep ikwọ ye ndibre ikwọ, mme ndikpep ndikwọ nnyuñ mbre ikwọ man otim mmọ idem ndinam utom Ọbọñ. Edi yak nnyin ise se ukpep-ñkpọ emi ekpepde nnyin.
Yak ise ndise eto iba, cedar ye eyop. Ke etak eto kiet-kiet ekpri awawa mbiet odu emi edisọpde asat oto ufiop eyo. Edi mme oruñ eto mbiba oro esuhọre eduk isọñ ntọtuñọ-ntọtuñọ man enyene mmọñ, emi anamde mmọ ekakaiso esehe.
Uwem idiọk owo etie nte mbiet: “Koro utin asiahade asaña ye ufiop-ufiop ofim ọfọp mbiet” (James 1:11). “Mme oburobut owo efiaride nte mbiet, ndien ... eyesobo mmọ ke nsinsi” (Psalm 92:7). Ntre ke ikut ite okposuk edi etiede nte idiọk owo enyene inemesit ndusuk ini, edi mmọ emi efrede Abasi enyuñ edude idiọk uwem, enyuñ eyomde usuñ inemesit idem mmọ, usen kiet, eyeka ke hell ye mme idut eke efrede Abasi (Psalm 9:17). Mme anam-idiọk ye mme oburobot owo “eyewara ndisibe mmọ nte mbiet, mmọ eyenyuñ ekeñe nte awawa ikọñ” (Psalm 37:1, 2).
Mme Eyop Ye Mme Eto Cedar
Yak ise se etiñde ebaña anditiene-Christ: “Edinen owo eyesiaha nte eyop: onyuñ ọkọri nte cedar ke Lebanon” (Psalm 92:12). Ke ewe usuñ ke eda edinen owo edomo ye eyop ye eto cedar? Efiọk eto mbiba emi ke uyai mmọ. Okposuk edi, idighe tutu owo eye uyai ọkpọ-iso mbemiso mme ufan ema enye. Edieke ekutde uyai Jesus ke uwem anditiene-Christ, enye ekeme nditie nte usuhọre owo ke enyin mme idiọk owo, edi eyenyene mme ufan ke otu nditọ Abasi, koro nditọ Abasi emek ndidu ye mmọ emi efọnde ido, enyenede nti ekikere, etiñde se inende, enamde akpanikọ enyuñ enanade ñkari ke edu uwem mmọ.
Efiọk eto cedar ñko ke inem utebe esie. Ke ini Jesus, emi edide enem-utebe Rose Sharon, ye Lily mme itihere (Ikwọ Solomon 2:1), odukde ke esit owo, afo unimke ete Enye esin inem ke uwem oro? Nnyin isikwọ ke ikwọ ntem:
“Jesus Rose Sharon siaha ke esit mi;
Sin uyai akpanikọ ye ‘disan’ uwem,
Man k’ebiet ‘kededi uwem okpowut,
Inem ye ifiọk ima Abasi.”
Ediwak ini, edifuñ, mme edikama ndak eyop esiwut idiọñọ edikan, idaresit ye ubọñ. Nnyin imọfiọk ite ekesuan ndak eyop ke usuñ ke ini Jesus akawatde ubọñ-ubọñ oduk ke Jerusalem. Ata eyen Abasi enyene edikan ebe ke Iyip Jesus. Usen kiet enye eyebuana ye akwa otu owo emi owo mikemeke ndibat, eke etode ke kpukpru obio ye esien ye idut ye usem, esine mfia ọfọñ-idem, enyuñ ekama ndak eyop ke ubọk (Eriyarare 7:9).
Eyop ọnọ anana ibat owo udia ke edem usiaha-utin. Eda isip esie enam udia mme camel; ndien eda efañ emi otode ndak esie enam mme uruk ye ekara. Ekpat eyop ọnọnọ nti mbukpọk; enyuñ eda ikọñ esie enam ediwak ñkpọ.
Oñwum Mfri
Anditiene-Christ ñko eyeñwum mfri onyuñ onyime ndinam ñkpọ nnyuñ nnọ uñwam. Jesus enem esit ke ini nnyin iñwumde mfri ekese. Imeti nte ikekpepde ibaña mme mfri spirit: ima, idaresit, emem, ime, mfọn-ido, eti-ido, erinam akpanikọ, ifure-ifure ido, mfara ke idem (Ñwed Mbon Galatia 5:22). Ke ini mme owo ekutde nte ima Jesus ayamade ọwọrọ ke uwem nnyin, enyuñ ekutde nte nnyin itiede ke emem okposuk edi ñkpọ mifọnke, mmọ eyefiọk ete ke imenyene Jesus ke esit nnyin. Usuñ efen “ndiñwum mfri” edi ndida mme idiọk owo nsọk Jesus. Beñe Enye ke usenubọk mbemiso afo aka ufọk-ñwed ete añwam fi nditiñ ikọ kiet mbaña Enye nnọ owo; beñe Enye ndinọ fi ifet ndikot eyen-eren mme eyen-añwan ete edi ke Sunday School.
Nditọ Abasi
Eda eto cedar ye eyop nte idiọñọ ubọñ. Ndidi owo ubọñ ọwọrọ “ndimana nto ubon ubọñ” mme ndito “ubon eke ọwọrọde etop,” mme ndito “ubon eke enyenede akamba idaha.” Owo amana oduk ke ubon Abasi ke ini enye amanade obufa. Ntre, nte inọhọ enye uku ndidi eyen Edidem? Mme anditiene-Christ edi “nditọ Abasi: edi edieke nnyin idide nditọ, imonyuñ inyene udeme ke se Abasi onimde; imasaña ye Christ inyene udeme” Ñwed Mbon Rome 8:16, 17). Oro ada anditiene-Christ esin ke Ubon Ubọñ; okposuk edi mme idiọk owo mifiọkke, edi ke akpanikọ enye enyene ñkọñ-kọñ idaha ke ererimbot idiọk-ñkpọ emi. “Nnyin idi nditọ Abasi ke emi; ndien iyarakere kaña iwut se nnyin ididide” (1 John 3:2).
Edinen Ọbọñ
“Jehovah enenen: enye edi akwa itiat mi, ndien ukwañ-ñkpọ iduhe Enye ke esit” (Psalm 92:15). Nte esit fo esiyọhọ ye itoro, inua fo onyuñ ọyọhọ ye ikwọ ke ini ekerede ete ke usen kiet edinen Ọbọñ eyemen nditọ Esie aka ediye ebiet oro ekotde Heaven? Owo kiet-kiet enyene ifet ndinam mbeñidem ke abaña Heaven, edi Ọbọñ emi ukwañ-ido miduhe ke Enye eyenọ mmọ emi enamde oburobut ido, emi mituaha ñkpọfiọk ke abaña idiọk-ñkpọ mmọ eka nsinsi nsobo.
Yak nnyin ibiere ke esit nnyin ndiduk ntọtuñọ-ntọtuñọ ke Ikọ Abasi ye ke akam. Edieke “oruñ” erinyaña nnyin ọsuhọrede oduk ke ima Abasi, nnyin iyebiet “eto eke etọde ke mben akpa mmọñ, eke osioñode mfri esie ke ekem ini” (Psalm 1:3). Ke ntem ke nnyin idikeme nditoro Ọbọñ, idighe ke Usen Ekọm ikpọñ, edi ke ofuri usen ke isua.
Questions
MME MBUME- Ikafañ ke ikpenyene ndikọm Ọbọñ?
- Siak ke nsuhọre ñkaha usuñ ition emi ekpetorode Abasi.
- Tiñ ke nsuhọre ñkaha ntak duopeba emi akpanamde ikọm Abasi.
- Eda mme idiọk-owo edomo ye nso?
- Didie ke eda edinen owo edomo ye eto cedar ye eyop?
- Wut ukpuhọre emi odude ke utit idiọk-owo ye edinen owo.
- Anie okop inem uwem akan, anditiene-Christ me anam-idiọk? Nso edi ntak?