Lesson 308 - Junior
Memory Verse
IKỌ IBUOT: “Mmọ emi edude ye Enye eyenyuñ ekan, kpa mmọ emi Abasi okokotde, onyuñ emekde, emi enyuñ edide mme anam akpanikọ” (Eriyarare 17:14).Notes
Ikot
Ini eyedi ke uwem owo kiet-kiet, emi Spirit Abasi edinọde ikot ke esit owo oro. Inyeneke ñkpọ ndinam ye utọ ikpọhidem eke owo oro enyenede, mme utọ utom emi enye anamde, mme enye edi owo inyene mme ubuene, mme enye edi akani owo mme eyenọwọñ. Edieke owo okponde ekem isua emi enye ọfiọkde se edinam idiọk-ñkpọ ọwọrọde, Spirit Abasi emi edide anam akpanikọ eyekot onyuñ odomo ndida esit esie nnyene.
Akparawa ọtọ-iñwañ ama ọbọ ikot esie usen kiet ke ini enye osuk ofuñde isọñ iñwañ esie. Enañ edip ye inañ ekefuñ isọñ iñwañ emi ke ini Elisha osuk etienede ebiet emi efuñde ema ke edem. Ndo-ndo oro, mme enañ emi etuak eda, ubọk Elisha ọkpọñ ñkpọ emi enye akadade ofuñ isọñ, ndien enye efehe ọwọrọ ọkpọñ iñwañ. Owo Abasi, Elijah, ama asaña ebe, onyuñ otop ekura esie ofuk akparawa ọtọ-iñwañ emi ke idem. Ekura ndituk Elisha ama anam enye onyime ndikpọñ mme enañ emi enye akadade ofuñ isọñ, ñkpọ ufuñ isọñ,iñwañ emi ema ekefuñ ubak, ye ete ye eka esie, onyuñ adaha etiene Ọbọñ
Akananam Spirit Abasi atuak ke usuñ esit fo? Akananam otuk fi ke esit nte ke akpana afo enyene erinyaña ukpọñ? Nte afo ama efehe aka ñkpọ-itie-eseme ndiyere ikot spirit oro?
Ekọm Unyọñ
Ema ewot enañ iba, enyuñ etem ke ikañ emi ekedade ñkpọ unam-utom ke iñwañ oro ebara; ema esọsọp enam usọrọ ndikọm kiet eken, tie suñ; enye ama onyuñ ọsọsọp ọkọm ete esie, eka ye mme ufan esie etie suñ, ndien ke nsinsi Elisha ama efre abaña utom iñwañ. Mbufa utom ekena enọ enye ke iso ndinam.
Eka Bethel
Utom Elijah ke isọñ ama okure, ndien ini ama ekem nte Abasi edimende enye aka ke Heaven (2 Ndidem 2:1). Enye ye Elijah ema etọñọ isañ ekpọñ Gilgal. “Tie mi,” Elijah ọdọhọ, “koro Jehovah ọdọñde mi utom ke Bethel.” Ye ọyọhọ ñkpe-mbiere nditiene ete-ufọk esie, Elisha ọdọhọ ete, “Ndikpọñke fi.” Mmọ ema eka iso esaña kiet. Elisha ama ọfiọk ete ke eyesọp ndimen Elijah ñka ke Heaven, ndien kpukpru ini emi enye okodude ye Elijah ekedi ata akpan ini, kpukpru anyan isañ oro ekedi inem-inem ọnọ enye
Ke ini mmọ ekesimde Bethel, mkparawa emi efiọkde mmọ nte nditọ mme anditiñ ntiñ-nnim ikọ, ema ekot Elisha enyuñ edọhọ enye ete, “Nte afo ọmọfiọk ete ke Jehovah eyemen usọ ọbọ fi mfin emi?” Ibọrọ esie ekedi, “Ih, ami mmọfiọk; mbufo edop uyo.”
Eka Jericho
Owo Abasi ama asaña ọsuhọre aka ke usuñ Jericho, ndien Elisha akasaña ikpat ke ikpat ye enye. Ini kiet efen, Elijah ama afiak odomo ñkpe-mbiere emi akparawa emi ekenyenede, kpa ye enye emi ekenyene ndika iso ke utom emi enye (Elijah) akanamde. “Mbọk, tie mi; koro Jehovah ọdọñde mi ñka ke Jordan.” Nditie ke Jericho ye nditọ anditiñ ntiñ-nnim ikọ? Ekpọñ mi ke edem ke ini Elijah osuk ebede aka iso? Ntaba edidiọñ eke okponde akan? Baba-o! “Ndikpọñke fi!”
Eka Jordan
Ke akpatre mmọ esaña edisim mben inyañ Jordan. Ke nsan-nsan ko, nditọ mme anditiñ ntiñ-nnim ikọ, owo aba ye duop, eda ese mmọ. Nso ke mmọ ekut? Nso ke Elisha okut? Nso ke nnyin ikut, nte isede ñkpọ-ntibe emi? Ufan nnyin Elijah emen mantle esie, akpañ enye, ndien ada enye oyibi usọp mmọñ akamba inyañ oro. Mmọ etre ndifehe nsuhọre. Nsat isọñ ọwọrọ ada, ndien owo iba emi esaña ebe inyañ oro ke nsat-isọñ.
Elisha ke emi, ọmọbọ utip editiene fo. Ediwak itiat emi afo akasañade idighe ikpikpu. Afo omokut utibe-ñkpọ efen emi otode ke odudu Abasi emi odorode Elijah. Edi utip eke okponde akan mmọdo ke iso ọnọ fi edieke afo edisuk etienede
Akpatre Ebeñe
Idaha emi, mmọ mbiba eda ke edem inyañ oko. Ini Elijah ekem ndika Heaven. Edi anie owo edika iso ke utom esie mi ke isọñ? Enyene ndinam mmọ emi edọñọde ekop nsọñ-idem, enyene nditiñ ikọ Abasi nnọ mme owo, enyuñ enyene ndinam mme akpa-mkpa eset ke mkpa. Anie edikañwana mme ekọñ ikan inọ Abasi. Elisha ama ọfiọk se enye oyomde, onyuñ enyenede ndinyene man enye ekeme ndika iso ke akwa utom emi. Enye enyene ndinyene ñkpọ! Ntre, ke ini Elijah ọkọdọhọde enye ete, “Siak se ndinamde nnọ fi, ke mika-imenke mi kaña ibọ fi”. Elisha ke nsuhọridem ọbọrọ ete, “Mbọk yak nnyene udeme spirit fo iba.”
Eti ebeñe. Nso ke enye ekpekebeñe emi okponde akan oro? Nso udọñ okpokpon akan owo ndiyom ndiyọhọ ye spirit Abasi iba? Ọmọfiọk ete owo ekededi mfin ekeme ndibọ uyọhọ spirit ye odudu Abasi? Edi ke ini nnyin ibeñede akwa uduọk-mmọñ Edisana Spirit ye ikañ, etie ukem-ukem nte Elijah ọkọdọhọde ete, “Afo emebeñe ọkpọsọñ ñkpọ.” Edi mmọ eke enyañade enyuñ eyetde esana enyuñ eyakde uwem mmọ ọyọhọ-ọyọhọ enọ Abasi, emi enyuñ eyomde ye mbuọtidem, ke ebọbọ akwa edidiọñ emi ke akpatre ini emi.
Ama enyene se akanade nte Elisha anam: “Ama okut nte emende mi ebọ fi, eyesu ntre ọnọ fi: edi mukwe, idisuhe” Elisha ama etiene tutu osim Bethel; Enye ama etiene ekesim Jericho; ndien etiene tutu osim Inyañ Jordan. Emi ikedighe ini enye ekpemende enyin esie efep ke ete-ufọk esie. Enye ikpoyomke nditaba edidiọñ emi, ke enye ama eketiene tutu edisim ebiet emi.
Nte ọkpọfọn mmọ emi ema ekenyaña, mme mmọ emi ema ekenam esana, efiak edem? Nte ọkpọfọn mmọ emi enamde esana ndisin ndiyom uyọhọ Spirit Abasi, akwa uduọk-mmọñ Edisana Spirit? Ndien ke ini ima ikọbọ enye, nte ini okpodu eke nditọ Abasi ekpemende enyin efep ke Ọbọñ ye Ete-ufọk mmọ ke baba ini kiet? Mme odot mmọ ndifre se idide utit mbuba mmọ emi enade ke iso? Mmọ ekeme nditaba Ntañ-ndọk edieke mmọ enamde ntre.
Ukpat-ñkpọ Emi Asakde Ikañ
“Ke mmọ esañade eka iso, eneme nneme.” Nnyin imetim ifiọk ite ke nneme mmọ akabaña Ọbọñ ye Heaven. Ndo-ndo oro, “chariot ikañ ye horse ikañ edibahare mmọ.” Owo ikemeke iditim ntiñ nte ñkpọ-ntibe emi eketiede, edi imekeme ndikere nte ekeyede. Ukem nte ukpat-ñkpọ emi asakde ikañ oro ọkọsọpde ọbiọñọde, ntre ñko ke enye ọkọsọp ndisop ke idio, ndien Elijah ọnyọñ ke Heaven, kiet ke otu owo iba emi ekpọñde ererimbot emi eka Heaven eke mibehe ke mkpa. Mkpa ikoduhe inọ Elijah; edi nte Enoch, “owo inyuñ ikwe enye, sia Abasi ekemende enye ọnyọñ” (Mme Hebrew 11:5).
Mfin ke ini emende mbon ima nnyin ekpọñ nnyin, nnyin idu ke ọkpọsọñ ndik ibaña edikpọñ emi mmọ ekpọñde nnyin. Okposuk edi, Elisha ama ọfiọk ete ke eyemen Elijah eka ke Heaven usen oro, edi nte enye adade do ese ukpat-ñkpọ emi asakde ikañ nte emende ete-ufọk esie, osop ke ikpa enyọñ, idem ama akpa Elisha, koro nnyin ikot ite “enye omum ọfọñ-idem esie, awai ke mbak iba.”
Ekura
Ekura Elijah oto ke enyọñ ọsuhọre. Emi ekedi ekura oro okotukde Elisha ke iñwañ esie usen oro; emi ekedi ekura oro ete-ufọk esie ekesinede; emi ekedi mantle oro Elijah akakpañde onyuñ adade oyibi mmọñ Inyañ Jordan. Ke emi ekenyene Elisha. Nte enye ama ọbọ se enye ekebeñede oto ete-ufọk esie? Nte enye ama ọbọ udeme spirit Elijah iba? Eyak nnyin ise.
Enye ama afiak ekesim mben inyan oro. Do ke ntan mben inyañ, ekeme ndidi nde ikpat Elijah emi edade eka ke Heaven ema edu. Edi Abasi Elijah ama odu do, koro nte Elisha okoyibide mmọñ oro ye ekura, Abasi oro ama ọbọrọ onyuñ anam mmọñ abahade. Elisha ikoduhe ikpọñ nte enye asañade ke nsat-isọñ ebe inyañ oro. Enyin esie ikekemeke ndikut Enye emi akadade enye usuñ, edi enyin spirit Elisha ikesehe ñkpọ efen ibe Ọbọñ Abasi. Elisha ama enyene ekura; enye ama enyene odudu; enye ama ọbọ ibọrọ ebeñe esie: “udeme spirit fo iba.”
Elisha ama otim oyom udeme spirit iba emi, ndien enye ama onyuñ ada enye anam ñkpọ. Enye ama anam ata ediwak utibe-ñkpọ, nte nnyin idikpepde ke mme ukpep-ñkpọ ini iso. Okposuk edi idighe kpukpru utibe-ñkpọ emi enamde eto ke odudu Abasi ke ewet esin ke Ñwed Abasi, edi ke Ikọ Abasi, nnyin imokut nte ewetde utibe-ñkpọ emi Elisha akanamde utim-ikaba nte emi Elijah akanamde.
Unana Edinim Ke Akpanikọ
Mkparawa, nditọ mme anditiñ ntiñ-nnim ikọ emi ekedude ke Jericho, ema efiọk ete ke spirit Elijah ama odoro Elisha ke idem. Nte ededi mmọ ema eyik mme Elijah ama ọnyọñ aka Heaven ke akpanikọ. Mmọ ema ebeñe Elisha ayak mmọ eka ekeyom Elijah ke mme obot ye ebedeñ. Elisha ama ọdọhọ mmọ ekuka, edi ke ini mmọ eyirede, enye ama ayak mmọ eka. Ke ofuri usen ita, mkpọsọñ iren owo aba ye duop ema eyom, edi ikekemeke ndikut owo Abasi emi, koro enye ama ọnyọñ aka Heaven.
Ntañ-Ndọk
Ñkpọ-ntibe emi eyefiak ada itie usen kiet ke ini Ntañ-ndọk edidade itie. Mmọ emi edikpọñde ke isọñ idinimke ke akpanikọ ete ke emen Ñwan-ndọ Christ edọk. Mmọ eyeyom Ñwan-ndọ, edi idikwe enye. Idighe ọkwọrọ-ikọ, mme anditiñ ntiñ-nnim ikọ Abasi ikpọñ ke eyom ndimen ndọk ke ini Ntañ-ndọk Ufọk-Abasi, edi kpukpru mmọ emi ebeñede idem mmọ ebaña edidi Esie, ke ndibọ edifen ke mme idiọk-ñkpọ mmọ, ndinyene esit emi enamde asana oto ke Iyip, ye ke ndibọ enọ odudu emi otode ke uduọk-mmọñ Edisana Spirit. Edieke afo oyomde ndidi kiet ke otu mmọ, tim tiene Jesus. Nyene iwuk nte Elisha ekenyenede, “Ndikpọñke fi.” Mfin, Ñwan-ndọ Christ, ke ebebet edifiak ndi Ọbọñ, ndien nnyin imekeme ndidu ke otu mmọ emi miditabike mkpa, edi “eyemen nnyin emi idude uwem, ... man isobo ye Ọbọñ ke enyọñ: ntem ke nnyin ididu ye Ọbọñ ke nsinsi-nsinsi” (1 Ñwed Thessalonica 4:17).
Questions
MME MBUME- Nso ñkpọ ke Elijah akanam Elisha nte enye osuk ofuñde isọñ?
- Tiñ se Elisha akanamde ke ini oro.
- Nso akwa ñkpọ okoyom nditibe nnọ Elijah?
- Nte Elisha ama ọfiọk abaña ñkpọ emi? Nso idi ntak?
- Tiñ baña iwuk esie ndisaña ye Elijah.
- Nso ñkpọ ikotibe ke Inyañ Jordan?
- Nso ke Elisha ekebeñe Elijah mbemiso emen enye edọk?
- Nnyin inam didie ifiọk mme ema enam ebeñe esie mme ikanamke?
- Elijah akasaña ke nso aka Heaven?
- Nso idiọñọ ke nnyin inyene ndida mfiọk nte ke spirit Elijah ama odoro Elisha ke idem?