Lesson 312 - Junior
Memory Verse
IKỌ IBUOT: “Itoro enyene Jehovah Abasi Israel; koro Enye emedi ndise ikọt Esie, onyuñ afak mmọ” (Luke 1:68).Notes
Usen Emana Edidem
Ndusuk mme ñkpọ-ntibe emi ebañade emana Andinyaña nnyin, Jesus Christ, ndusuk ini edi se isọñde nnyin idem nditim mfiọk; edi mmọ edi se iyañade ifiọk owo, edi nnyin imọfiọk ite edi akpanikọ nte ewetde ke Ñwed Abasi. Ikpọnọ ekọm adaña didie ke emi nnyin inimde ofuri mbuk uwem Jesus ke akpanikọ, ọkọrọ ye edidi Esie ke ererimbot!
Angel Gabriel emi okowutde Mary idem ekebem iso etiñ abaña emana Esie. Enye ama etiñ ọnọ enye ete ke ema emek enye ete edi eka Eyen Abasi. Se Mary ọkọbọrọde Gabriel ekedi: “Sese, ofin-añwan Jehovah; akpakam osu ọnọ mi kpa nte uyo fo edide” (Luke 1:38). Ndien angel oro adaha ọkpọñ enye.
Ntanta-ọfiọñ emi enyenede utibe uñwana, okowut nnen-nnen ebiet utibe emana. Edi uyama ntanta-ọfiọñ emi akada mme ọfiọk-ñkpọ owo usuñ oto ke anyan idut man edikpono enyuñ enọ Jesus mme enọ. Ekeme nditie nte mme ñkpọ-ntibe emi idighe akpanikọ, edi ke owo odopde ekere ete Eyen Abasi, Andinyaña ye Andifak ererimbot ye nsinsi Edidem, ekenyene ndidi, nte ikpedighe ata isen ñkpọ edieke mme utibe idiọñọ oro mmikebemke edidi Esie iso?
Eka Ke Bethlehem
Mme angel ema esian mme ekpemerọñ ko ke mben obot ete, “Mbufo eyekut nsek-eyen emi ewañde ke ọfọñ nte anade ke ebiet usin-udia ufene” (Luke 2:12). Mmọ ema esọsọp eka ke Bethlehem ndikut Nsek-eyen oro, ndien efiak enyọñọ etiene otu erọñ mmọ, ekpono enyuñ etoro Abasi. Mme ọfiọk-ñkpọ owo eto ke edem usiaha-utin edi ke obio Jerusalem, ebiet ukpono Abasi ofuri ererimbot. Mmọ ebup ete “Enye emi akamanade nte Edidem mme Jew odu mmọñ?” Mmọ eketo ke ata anyan ebiet edi, edi mmọ ikọfiọkke ite akam edi mme imọ idisuan etop emana Andinyaña. Esit ama otimere edidem Herod ye kpukpru mbio Jerusalem. Christ akpamana ke mmọñ? ekedi mbume emi edidem okobupde mme ikpọ oku ye mme scribe. Mmọ ebọrọ enye ete, “Ke Bethlehem obio Judea”. Udiana mbume esie ekedi mme nso “ini” ke ntanta-ọfiọñ oro ọkọwọrọ. Mmọ ikeyikke idiọk edidem emi, edi ema etiñ kpukpru enọ enye. Ndien Herod ete, “Eka ekotim ebup ebaña nsek eyen emi; ndien ema ekut Enye edi edidọhọ mi, man ami ñko ñka ñkatuak ibuot nnọ Enye” (Matthew 2:8). Edi edidem emi ikaduakke ndituak ibuot nnọ obufa Edidem emi amanade, edi okoyom usuñ ndiwot Enye.
Mbio Jerusalem ekenam nsọ? Nnyin ikwe nte mmọ etọñọde isañ ndika ke Bethlehem. Anam didie mmọ mifiọkke ite ke Edidem amana ke ebiet emi oyomde usuñ, ke ñkpọ nte itiat itiokiet? Ke Edem usiaha-utin ke mme isenowo emi eketo ndisaña nyom Nsek eyen Edidem. Mmọ ekut Enye enyuñ eda mme enọ esọk Enye. Etiñ ete ke ekenọ gold nte idiọñọ ubọñ Esie, frankincense ekedi idiọñọ idaha Esie nte Abasi, ye myrrh ke idiọñọ ukut Esie. Nte ededi, ekedi ido ndinọ ndidem ye mme andikara mme enọ ke eyo oro, ndien ke esuk enamam ntre mfin.
“Owo Ukut”
Mme ọfiọk-ñkpọ owo ema eduọñọ ke iso Jesus enyuñ etuak ibuot enọ Enye; edi mbemiso mmọ enyọñọ, Abasi ama ọsọñọ etiñ ọnọ mmọ ete ekufiak eka ke ọtọ Herod, edi esaña ke usuñ efen enyọñọ obio mmọ.
Mbemiso Jesus edimana, ema etiñ ebaña Enye nte “owo ukut, onyuñ emehe ke mfuhọ” ( Isaiah 53:3). Ikebighike nte Enye ekedi ke ererimbot emi, mme owo ema “esin Enye ke ndek.” Mfina ama osim Enye ọtọñọde ke ata nsek: ufañ ikoduhe ke ufọk-isen, ñkpọ-nna Esie ekedi usin-udia ufene, ndien kpa ke ini nsek oro akana emen Enye eka ke Egypt ndibọhọ uduak ofube-ufup edidem.
Herod, edidem, ekere ete ke mme ọfiọk-ñkpọ ebiaña imọ ke ini okutde ete ekpri Nsek-eyen oro ye mme ete Esie idighe se imọ isimde. Ih ih, Herod, idighe mme ọfiọk-ñkpọ owo ebiaña fi, edi Abasi emi etiede ke ebekpo asak fi. Enye ke ekpeme edisana Eyen Esie, kpa Nsek eyen Jesus emi ke usen kiet edikpade, edi idighe ke ubọk fo.
Edidem ke iyaresit esie, ama ọdọñ otu mme owot-owo ete eka ekewot kpukpru nditọ-iren emi edude ke Bethlehem ọtọñọde ke nditọ isua iba tutu ọsuhọre osim nsek nditọ. Eyen idiọk edidem emi, Herod efen, okowot John Ọduọk-owo mmọñ onyuñ asak Christ nsahi; eyeyen esie okowot Apostle James; ñko edi eyen eyeyen esie Herod Agrippa ọyọhọ iba, ekekpe ikpe Paul Apostle. Nso utọ ufen ebet utọ ufọk mme andikara emi ekediọkde ntem ye Jesus, Eyen Abasi, ye mme anditiene Enye!
Oto ke ndap emi Abasi ọkọdọñde, ema eteme Joseph ebiet emi enye enyenede ndika. Enye ama osuk ibuot onyuñ emen Nsek-eyen ye eka Esie aka ke Egypt onyuñ odu do tutu edidem Herod akpa. Nte mmọ ekesuk edude ke Egypt, Abasi ama ọtọñọ ntak asian Joseph ebiet emi enye enyenede ndika - ini enye emi, ke Nazareth emi odude ke Galilee. Emi ekefiọkde nte “obio mmọ” (Luke 2:39), ebiet emi Joseph ye Mary eketode eka Bethlehem ndikpe utomo mbemiso Jesus amana. Mi ke Nazareth, Jesus okoduñ ye Mary ye Joseph, ndien ke ini Enye edide eyen isua duopeba Enye ama asaña ye mmọ aka ke Jerusalem ke usọrọ Passover (Luke 2:41, 42).
Se Enye Ọwọrọde Ọnọ Nnyin
Nnyin ikot ke Ñwed Abasi nte “Abasi akamade nnyin, onyuñ osiode Eyen Esie ọdọñ” (1 John 4:10). Okposuk edi nte ndusuk owo edọhọde ete ke ekedọñ Jesus edi ke ererimbot emi man owut owo usuñ nte ekpodude uwem, nnyin imọfiọk ite edidi Esie ke isọñ okpon akan oro ọnọ ubon owo. “Koro Abasi akamama ererimbot ntem, tutu Enye osio ikpọñ-ikpọñ Eyen emi Enye obonde ọnọ, man owo ekededi eke ọbuọtde idem ye Enye okutak, edi enyene nsinsi uwem” (John 3:16). Tutu osim mfin, emi amakebe isua 2000 tọñọ nte Christ Andinyaña akamana, kpukpru mmọ emi enimde Enye ke akpanikọ ke esit mmọ, ekabarede esit ekpọñ mme idiọk-ñkpọ mmọ enyuñ ebeñe Enye oduk ke esit mmọ, ekeme ndibọ erifen oto ke Iyip Jesus emi ọkọduọhọde ke Krọs Calvary. Emebeñe ebiet iduñ ke Heaven enim enọ kpukpru mmọ oro ema ekefen ke mme idiọk-ñkpọ mmọ enyuñ ewetde enyiñ mmọ ke Ñwed Uwem.
Nte Christmas ọwọrọ ndinọ mme ufan ye mme ọdiọñọ mme enọ ñkpọ ererimbot ikpọñ-ikpọñ? Christmas ọwọrọ eriti emana Andinyaña, Andifak, ye Edidem emi oyomde ndisọp ndi ọnọ kpukpru mme anditiene-Christ. Christmas ọwọrọ nso ọnọ fi?
Questions
MME MBUME- Nso idi mme enyiñ eken emi ekotde Jesus?
- Herod akanam nso ke etop emi enye ọkọbọde ke abaña emana Jesus?
- Nso ikedi mme mbume eke enye okobupde mme ọfiọk-ñkpọ owo?
- Tiñ nte mme ọfiọk-ñkpọ owo ekesañade efiọk nnen-nnen ebiet emi Jesus akamanade.
- Didie ke ekebiọñọ mmọ ndifiak ntiene Herod?
- Ekenọ Joseph ntọt didie ebaña idiọk uduak Herod?
- Tiñ se Edidem Herod akanamde ke ini enye okutde ete ema ebiaña imọ?
- Ewe obio ke efiọk nte “obio mmọ” ọnọ edisana ubon emi?
- Tiñ baña edika mme ekpemerọñ ke Bethlehem.