Lesson 288 - Senior

Memory Verse

IKỌ IBUOT: “Kpasuk ntre, mbufo mkparawa, esuk idem enọ mbiowo. Kpukpru mbufo enyuñ ebọbọ nsukidem ke idem nte mbọbọ, enam ñkpọ enọ kiet eken: koro Abasi añwañwana ye mbon iseri, edi ọfọn ido ye mbon nsukidem” (1 Peter 5:5).

Cross References

I Ntak Edinyene Nti Mme Ese Utom Ke Ufọk-Abasi

1. Man utom Ọbọñ okut unen, Abasi onim ete ebahare utom enọ mme andinim ke akpanikọ, 1 Ñwed Corinth 12:4-6, 14, 18-20

2. Ndinọ kiet eken ukpono ye edidiana-kiet enyene ndidu, 1 Ñwed Corinth 12:15-17, 21-26; 7:20; Ñwed Mbon Ephesus, 4:1-6

3. Ekebem iso emek mme Andida usuñ ke ñkpọ Spirit koro mme ñkpọ Spirit ekpon ekan ñkpọ ikpọhidem, 1 Ñwed Corinth 12:27, 28; Ñwed Mbon Ephesus 4:8, 11-13

4. Mme ñkpọ emi enamde owo odot ndidi ọkwọrọ-ikọ mme ese utom edi ukem-ukem, 1 Ñwed Timothy 2:1-7; 4:1-16; 2 Ñwed Timothy 2:6; 4:1, 2, 5; Ñwed Mbon Rome 11:29; Ñwed Mbon Ephesus 4:7; Titus 1:5-9; 1 Peter 5:2-5; 1 Ñwed Corinth 14:32; 2 Ñwed Corinth 6:1-10; Utom Mme Apostle 20:28

II Eritọñọ Ndinyene Mme Anam-Utom Ke Ini Ntọñọ Ufọk-Abasi

1. Nte ibat mbet ọtọtde ntre ke mme mfina ewewak enọ mme Apostle, Utom Mme Apostle 6:1

2. Sia efiọkde ete ke utom spirit edi ata akpan utom, mme Apostle ema ebiere ndiyak ini mmọ nsin ke utom oro, Utom Mme Apostle 6:2, 4

3. Mme idaha spirit mmọ emi esede ebaña ñkpọ ikpọhidem ekedi ukem ye idaha mmọ emi esede ebaña utom spirit, Utom Mme Apostle 6:3

4. Ema emek mme deacon enyuñ etim enọ mmọ item ndise mbaña ñkpọ ikpọhidem, Utom Mme Apostle 6:5-7; Ñwed Mbon Philippi 1:1, 9-11; 1 Ñwed Timothy 3:8-13

5. Mbiowo enyene itie mmọ ke utom spirit, mmọ enyuñ edu ke otu mme ọkwọrọ-ikọ Abasi, mme ese utom, mme ke otu mme anam utom eken ke ufọk Abasi, Titus 1:5, 6; 1 Ñwed Timothy 5:17; Utom Mme Apostle 11:29, 30; 14:23; 15:1-6, 22, 23; 16:4; 20:17, 28; 21:18; James 5:14; 1 Peter 5:1-5

6. Edimenere owo nnọ akamba itie ke Ufọk-Abasi Christ idighe nte asañade ekekem ye uduak owo, inyuñ itoho ke udọñ edimenere-idem ñkoñ ñkan mme owo, Psalm 75:6, 7; Ñwed Mbon Galatia 5:20; 1 Peter 5:2, 3; 1 Ñwed Corinth 1:26-31; 9:16-23; 2 Ñwed Corinth 3:5, 6; 5:18; Ñwed Mbon Colossae 1:1; 1 Ñwed Timothy 1:12

7. Mmọ emi eyakde ofuri ini mmọ enọ utom Abasi ke ufọk-Abasi Christ enyene unen ndibọ uñwam nto ufọk-Abasi ke ini odotde ye ke ini ukeme onyuñ odude, Matthew 10:9, 10; 1 Ñwed Corinth 9:7-15, 18; 16:17; Ñwed Mbon Galatia 6:6; Ñwed Mbon Philippi 4:14; 1 Timothy 5:18; Mme Hebrew 13:16; Utom Mme Apostle 18:1-3; 20:33-35; 1 Ñwed Thessalonica 2:9; 2 Ñwed Thessalonica 3:7-9

8. Mme mmọ emi ekotde eyak utom enọ edot se ekponode enyuñ esukde ibuot enọ, 1 Ñwed Timothy 5:17-19; Mme Hebrew 13:7, 17, 18; 1 Ñwed Corinth 16:15, 16; 1 Peter 5:5; Ñwed Mbon Rome 15:30; Ñwed Mbon Galatia 4:14; Ñwed Mbon Philippi 2:25-30; 1 Ñwed Thessalonica 5:12, 13.

Notes

SE EKPEPDE EBAÑA

Ukara Ke Ini Eritọñọ Ufọk-Abasi

Abasi ama ọtọñọ ndidiọñ Ufọk-Abasi ke ndo-ndo oro ema ekenọ Edisana Spirit ke usen Pentecost, mme idiọñọ oro ekeñwọñọde ema etọñọ nditiene utom emi mme Apostle ekenamde. “Nte mbet ediọñde diọñ ewak” ntre ke oto ke uwak ibat emi, mme mfina efen ediana.

Mme Apostle, ke ema ekefiọk se uduak Abasi edide ke abaña mmọ, ema ekot kpukpru mbet ebon ọtọ kiet man etiñ ebaña mfina emi okodude ke otu mmọ koro ibat mmọ ọkọtọtde. Nnyin imekeme ndikut ke eritọñọ usuñ nte Abasi ekemekde okonyuñ onyimede ekara ufọk-Abasi ke ñkpọ ikpọhidem ye eke Spirit. Mme ñkpọ emi ñko “ekenyuñ ewet mmọ ndida nteme nnyin, emi utit mme eyo ama osim nnyin” (1 Ñwed Corinth 10:11). Mi ke Utom Mme Apostle, nnyin imenyene ediwak uwut-ñkpọ emi enimde ndiwut nte nnyin ikpekponode Abasi ye nte nnyin ikpanamde mme utom Ọbọñ eken.

Ikot Ọbọñ ama eneñede osim mme Apostle. Mmọ ikefreke utom emi mmọ ekenyenede, emi ñko ke mmọ ekenyene ndiyak nnọ mme anditiene Christ ke ntak Akwa Utom oro ekedọñde mmọ. (Matthew 28:18-20). Edinam emi mmọ ekenamde ke ini emi ekedi man ayak mmọ eka iso ndinam utom Spirit emi ekesidade kpukpru ini mmọ, ñko mbak mmọ ekukpọñ utom oro ekenam utom emi mmọ emi mikokotke kaña ete edinam ñkpọ Spirit ke Ufọk Abasi ekpekemede ndinam.

Utom Kpukpru Owo Ke Ufọk-Abasi

Edi se ifọnde akpan-akpan ke utom Ọbọñ, edieke ebaharede utom enọ ediwak owo nte ekemde. Emi edi eti edinam emi enyenede ediwak ntak. Ke akpa ifet man mme owo “ekunyuñ ebre odudu ye mmọ emi ekeyakde esin mbufo ke ubọk” (1 Peter 5:3), edi yak “kpukpru mbufo ebọbọ nsukidem ke idem nte mbọbọ” ndien “enam ñkpọ enọ kiet eken” (1 Peter 5:5). Kpa nte itiat emi ekesiakde enyuñ esọide ke itie udọk itiat mbemiso emen eka ebiet emi edibọpde temple, kpa ntre ke Abasi ebeñe nti ikọt Esie ọnọ nsio-nsio itie ke ufọk-Abasi Esie. Kpukpru mme anam akpanikọ nnọ Abasi enyene itie ke utom Ọbọñ. Isioho baba owo kiet ifep. Inyuñ ifreke baba owo kiet. Ibatke ite ke enyene idaha emi mme owo midotke ndida ke utom Abasi, oro edi, ke mme idaha utom emi mmọ ekemede ndida, edieke mmọ edide nditọ Abasi ke akpanikọ. Baba owo kiet inyeneke nditie ikpikpu. Kpukpru owo enyene itie mmọ, ekpededi usuhọre itie me enye emi owo mikwe, edinọ owo kiet-kiet utip etiene ido nte enye akanamde utom emi Abasi ọkọnọde enye.

Sia kpukpru nnyin idide owo, ifiọk nnyin onyuñ omuhọde, iduhe owo ke otu nnyin, emi ekemede ndikut nnyuñ mfiọk kpukpru mfina emi esidukde edi ke utom Ọbọñ. Enọ ndusuk owo enọ ke usuñ kiet, edi enọ mmọ eken ke usuñ eñwen. Ndusuk owo enyene mbufiọk ke editiñ ikọ, ke ini ndusuk efọnde ke utom usọ. Ndusuk owo enana ukeme ndinam ndusuk utom edi enyene ọyọhọ uko ndinam utom efen. Kpukpru owo enyene itie mmọ, ndien eyom kpukpru owo.

Kpukpru nnyin inyene ndibere ye kiet eken. Se kiet mikemeke ndinam, owo e¬ñwen enyene ndida itie-utom oro nnyuñ ñka iso ke utom. Ebiet eke kiet mikemeke ndinam ọfọn, enye eken enyene ndinọ uñwam, ye ikọ ndisọñọ enye idem, mme ndiñwam ke akam. Ekeme ndinam akamba ñkpọ nnọ Abasi kpa ye ubon owo edieke Spirit edidiana kiet odude ke otu nditọ Abasi.

Mme Ñkpọ Emi Enamde Owo Odot Ndidi Anam Utom Abasi

Edi se idemerede owo udọñ nte ke mme ata akpan ñkpọ emi mme Mbet etiñde ete ke mmọ enam owo edi eti anam-utom ke Ufọk-Abasi, ọkpuhọre ye se mme anditem owo udomo ke ererimbot eyomde. Mbon ererimbot eyom mme idaha emi mme Mbet mitiñke ibaña mi.

“Mbon emi enyenede eti enyiñ enyuñ eyọhọde ye Edisana Spirit ye ifiọk” ekedi mmọ emi ekemekde ndida nnam utom Abasi. Owo ekeme ndibup: “Nso idi ntak emi eyirede ete ke ana nte mme akama-ukpọhọre enyene eti idaha ke ñkañ spirit? Nte utom mmọ ikedighe ndise mbaña edideme udia ye mme ñkpọ uwem emi nnọ otu oro?” Ih, oro ekedi utom mmọ. Edi kpa ke utom oro, ye ke utom efen ekededi emi abañade Obio-Ubọñ, edi se ifọnde asaña-utom Christ “ndinyene eti enyiñ nnyuñ nyọhọ ye Edisana Spirit ye ifiọk.”

Nte anade edi, ana nte enye enyene eti etop man enye edi kiet ke otu ufọk-Abasi Christ. Akani idiọk uwem esie ama ebe efep. Enye eyedi obufa owo. Enye isañake aba ke uwem unana akpanikọ. Ntre edieke uwem enye emi eyomde anam-utom ke ufọk-Abasi minanake ndo, ke edinam akpanikọ, enye minyuñ inyeneke eti ibuot, ekeme ndikut ete ke enye idotke ke baba usuñ kiet ndidi kiet ke otu ufọk-Abasi Christ inyuñ inyeneke unen ndinam utom ke itie ekededi nte kiet ke otu mbon ufọk-Abasi oro.

Paul Apostle eneñere etiñ ọyọhọ-ọyọhọ ke ini enye ọkọnọde mmọ emi ekedude ke idak esie item abaña mme ñkpọ emi. Enye ama ọdọhọ ete ke inaha enyene se etiñde edian enye, inyeneke ndidi ọdọ iban iba, enyene ndidi owo ntiñ-enyin onyuñ enyene suñ-suñ ido, enyene eti uwem, enyene mfọn-ido, ọsọp ndibọ item onyuñ ekeme ndikpep mmọ efen ñkpọ edieke oro edide ikot esie. Enye inyeneke ndidi owo utọk, idighe owo emi esinde esit ke okuk me ọdiọkde itọñ mbine idiọk udori, idighe owo eñwan ye usua, akan oro enye ñko inyeneke ndidi enye emi esinde esit ke ñkpọ owo. Nditọ esie enyene ndidi mbon nsuk-ibuot, enye onyuñ otim akara ufọk esie ke ntiñ-enyin ye ata ima.

Edi idighe kpukpru se etiñde emi ikpọñ-ikpọñ enam owo edi eti anam-utom Abasi. Mmọ emi emekde ndinam utom Abasi enyene ndiyọhọ ye Edisana Spirit ye eti-ibuot. Edi se idotde nditiñ ñkpọ mbaña eti-ibuot ye Edisana Spirit ke ifet emi.

Eti-ibuot emi anade nnyin inyene edieke nnyin iyomde ndinam utom Abasi ke akpanikọ edi eti-ibuot emi otode ke enyọñ. Emi idighe ifiọk ererimbot, mme eke obukidem mme eke Satan emi akamade ufup ye ndomo-idem. Eti ibuot emi otode Abasi “edi edisana ke mbemiso, onyuñ etie emem-emem onyuñ eme ime, awara ndikop mkpe ubọk, onyuñ ọyọhọ ye mbọm ye nti mfri; edi se itode ofuri esit, ye se minyeneke mbubik” (James 3:17). Nnyin imekeme ndibeñe ifiọk emi ke mbuọtidem, inyuñ iyokke ke baba usuñ kiet, koro edi Abasi ọnọ “kpukpru owo ke ntat-ubọk” (James 1:5, 6). Ntre ntak baba kiet iduhe inọ owo eke minyeneke enye. Edieke owo minyeneke, ntak edi koro enye mibeñeke, edi ọyuhọde ke ifiọk idem esie ye odudu esie ye ukeme esie.

Akpatre akpan ñkpọ edi ndiyene Uduọk-mmọñ Edisana Spirit. Akpan ñkpọ etiñde ebaña enọ emi edi utibe odudu emi odude owo ke idem ndinam utom Abasi. Enye edi enọ emi Jesus ọkọñwọñọde ndinọ mbemiso Enye ayak uwem Esie ke krọs, ñko mbemiso Enye ọdọk oduk ke Heaven (Kot Ñwed John 14:15-26; 15:26, 27; 16:7-15; Utom Mme Apostle 1:8).. Edi enọ emi otode enyọñ, emi ebeñede nnyin idem onyuñ ọdọñde nnyin utom, ọnọ nnyin ukeme ndida mme ukpọñ nsọk Abasi.

Mme Idaha Utom Ke Apostolic Faith

Ke ata ntiñ-enyin, akpa Ese-utom ke ñka emi ye mme nsaña esie ema enim itiat idak isọñ utom emi man asaña ekekem ye Ikọ Abasi. Ke ekutde ete ke mme idaha utom emi abañade ñkpọ Spirit ke ekebem iso etiñ ebaña enyuñ ebemiso esin mme owo ke ini ntọñọ Ufọk-Abasi, edi mme itie utom emi ñko ke ekebem iso esin mme owo enyuñ eda mmọ nte utom eke ekponde ekan ke utom Apostolic Faith.

“Nsio-nsio usuñ edinam ñkpọ enyuñ edu,” ñko “nsio-nsio oruk utom enyuñ edu” ke utom nnyin, kpa nte ekedude ke editọñọ Ufọk-Abasi. Edikwọrọ Ikọ Abasi edi akakan utom ke Ufọk-Abasi, ndien mme anam-utom emi enyene ndidi mmọ eke edotde emi enyuñ ekotde, emi enyenede kpukpru mme enọ ye mfọn emi ekemde ye utom emi oyomde ofuri uwem owo. Enye enyene ndida akpa itie, nte andikpon ñkan ke utom ufọk-Abasi. Ke ekpebatde ke adiana ke adiana idaha utom emi enamde ke Ufọk-Abasi, enye edi akpa ye andikpon ñkan. Itie mme ọkwọrọ Ikọ Abasi enyene ndidu, ye mme asuan-etop Abasi ye mme Ọbọk-erọñ ye mme Andikpep man enam ikọt Abasi efọn ema, utom Ọbọñ okut unen.

Ke ema ekesin mme owo ke mme itie-utom ñkpọ Spirit, ema ewọñọre iso ndien ese mme akpan utom eken, emi eñwamde ndisuan ikọ Abasi. Toto ke editọñọ utom Apostolic Faith, ema ekpep nnyin ete ke ubahare inyeneke ndidu ke otu Ikọt Abasi; kpukpru owo enyene ndidiana kiet, edidiana-kiet emi ekutde ke otu mmọ emi enamde esana ikpọñ, emi akpande ubahare ndidu. (Kot Mme Hebrew 2:11; John 17:9-23; Ñwed Mbon Ephesus 5:22-32). Ema enyuñ ewut nnyin ete ke enyene ndinam kpukpru ñkpọ ke nde ke nde nte adade edidiọñ edi ye nte eyede. (1 Ñwed Corinth 14:26, 40), koro Abasi idighe Abasi ndutime (1 Ñwed Corinth 14:33). Spirit mme ọkwọrọ-Ikọ Abasi enyene ndisuk idem nnọ kiet eken (1 Ñwed Corinth 14:32; 1 Peter 5:5, 6). Kpasuk ntre ñko enọ nnyin emi idide ndido idem mme andinim ke akpanikọ item ndisuhọre idem nnọ kiet eken; Kpa nte enọde mme Ọkwọrọ-Ikọ Abasi item ndikere mbaña ifiọk, ubierikpe ye ifiọk ñkpọ Spirit eke mme ọkwọrọ-Ikọ Abasi. Baba kiet ke otu nnyin, edide Ọkwọrọ-ikọ me kiet ke otu, inyeneke ndiwut Spirit me ido edida ikpọñ, nnana ebuana ye kiet eken, me nnyin ndikere ete ke imekeme ndida ikpọñ ke ñkpọ ekededi. Akpan-akpan adaña nte edifiak ndi Jesus ekperede, ndien odudu abiaña ke ọtọt ke ererimbot, nnyin inyene ndibeñe idem nnyuñ mbọ uñwam nto kiet eken ke kpukpru ñkpọ Spirit.

Nnyin inyene “ndiyom enọ eke ọfọnde akan ke ofuri esit” inyuñ “iñwana ke abaña ikọ mbuọtidem emi ema ekeyak ini kiet ko esin nti ikọt Abasi ke ubọk”. (1 Ñwed Corinth 12:31; Jude 3). Nnyin inyene “ndidemere enọ Abasi” emi odude ke nnyin (2 Ñwed Timothy 1:6). Nnyin inyene ndida odudu nnyin nnam kpukpru se ubọk nnyin okutde ndinam (Ecclesiastes 9:10). Ke ima ikenam ñkpọ emi ke ofuri ukeme nnyin, nnyin imekeme ndimen mbuọtidem idori ke Abasi ite ke Enye eyediọñ se nnyin inamde. Abasi esikpono utom ke ini utom oro osuk akade iso onyuñ ayak edidiọñ Esie odori ke esit. Koro Edisana Spirit ọnọde unyime, mme idiọñọ emi ekeñwọñọde onyuñ etienede nsin-ifik ye akam emi ebọñde, nnyin imenyene ntak ndikere ite ke usuñ eke edade enam utom oro enen.

Nnyin imenyene etubom ke otu mme Ese-utom ye udiana esie emi esede ebaña ofuri utom Ufọk-Abasi Apostolic Faith. Ñkọk Ufọk-Abasi Apostolic Faith kiet-kiet edi se Etubom mme Ese-utom emi odude ke akamba itie (headquarters) esede ñkpọ abaña. Se ukara idut eyomde, man edi mmem-mmem ñkpọ ndibọp utom ke idak Ufọk-Abasi Apostolic Faith ke Obio Portland, Oregon ye kpukpru ñkọk Ufọk-Abasi efen edi se ekpri otu emi ekotde Mme Ada-Ibuot Utom (Board of Trustees) mi edude ke Akamba Itie (Headquarters) esede ñkpọ ebaña. Mmọ emi edude ke ekpri otu emi edide Mme Ada Ibuot Utom, edi mmọ emi emekde ke otu mme Ọkwọrọ-Ikọ Abasi emi ofuri Ufọk-Abasi enyenede ndinọ unyime ñko, ke ini mmọ edude ke ediomi utom Abasi. Ewet-ñwed emi edide akama-okuk emi onyuñ esede ñkpọ abaña mbubehe okuk ñko edi andise ñkpọ eke abañade mbet, ndien ke ini emekde enye esin ke otu Mme Ada-Ibuot Utom, ekabare ekot mmọ ete Mbuot Utom (Executive Board).

Mbiowo ye mme deacon iren ye iban edu kpa nte ekedide ke editọñọ Ufọk-Abasi. Utom mbiowo edi ndinam nnyuñ mbere ke ofuri esit ke kpukpru se enyenede ndinam man utom Abasi aka iso. Nditọ Abasi emi, iren ye iban enam utom ebaña ñkpọ spirit emi mme Ọkwọrọ-Ikọ Abasi ekpenamde. Mmọ ekeme ndibuana ye mme Ọkwọrọ-Ikọ Abasi ebọñ akam enọ mbon-udọñọ enyuñ ekeme ndibuana ye mbiowo eñwen ebọñ akam. Ke ini Ọkwọrọ-Ikọ Abasi ọnọde item me nsua-nnọ, enyene ndinam mbiowo edu man eñwam akpan-akpan ndisọñọ Ikọ oro Ọkwọrọ-Ikọ etiñde ye ndinam item ọsọñọ ada. Uñwam mbiowo emi Ọkwọrọ-Ikọ Abasi esiyomde ediwak ini edi mmọ ndidomo mme spirit nse me mmọ eto Abasi me itoho (1 Thessalonica 5:21; 1 John 4:1). Mbiowo edi mme nti anam utom Abasi emi ema ekewut ima emi mmọ enyenede enọ mme ukpọñ owo, ema kpukpru ñkpọ Ufọk-Abasi enyuñ ebere ye mme akama utom Ufọk-Abasi. Nti mme Ọkwọrọ-Ikọ Abasi esiyom item eto mmọ, ediwak ini esiyom mmọ ediana ye mme akama utom ke ini eyomde ndinam akpan ñkpọ. Eda mmọ ediwak ini nte mme adaha Ufọk-Abasi, akam ye mbuọtidem mmọ enyene uñwam eke owo mikemeke nditiñ.

Mme deacon iren ye iban edi mmọ oro esede ebaña utom ubọk ke okure Abasi. Unen edikpeme ñkpọ Ufọk-Abasi odu mmọ ke ubọk; utom ukwak ye utom usọ ekededi emi enamde ikọ Abasi ọkọri, edi mmọ enam.

Ke utom nnyin owo idaha enyiñ emi nte akpan ñkpọ, inyuñ inyeneke oruk ọfọñ kiet me eken inọ mmọ. Edi imọfiọk ite utom eke mmọ enamde edi ata akpan utom. Edi Abasi okot mmọ kiet-kiet ọnọ utom emi koro edi Edisana Spirit oyom mmọ emi etimde edot man mmọ edida utom emi ye itie ke Ufọk-Abasi Christ. Ekikere ye udọñ nnyin edi ndifiọk ete ke edimenere itie oto ke usuñ emi. Ke ntak emi, man eyak Edisana Spirit enọ usuñ Esie ndinam utom ke ufọk-Abasi, nnyin idodomo ofuri ukeme adaña nte ikekeme nditre ndimek usuñ idem nnyin ndida mbọp utom Abasi.

Edi akpanikọ nte ke mmọ oro Abasi okotde edot ukpono ke iso ofuri mmọ emi enimde ke akpanikọ. Utom ekededi ke Ufọk-Abasi edi akpan utom, ñko kpukpru ikot ye edimek edi akpan ñkpọ ye se idotde. Ana nte nnyin iyak ofuri uwem nnyin isin ke utom edieke iyomde ite ebat nnyin nte mme anam akpanikọ ke utom oro; ndien ke inamde ntre, nnyin ke isio ikpat isaña ibine mme utom eke ekponde ekan enyuñ edotde ekan.

Philip ye Stephen edi mmọ oro ekenamde akpanikọ ke utom mmọ ndien emenere mmọ ndidi mme ọkwọrọ-ikọ: Stephen ama ọkwọrọ Ikọ Abasi emi ekedemerede ubiọñọ oto mme asua Christ ke ini oro, edi enye ama enyene itoro onyuñ anam utibe utom emi ibat-ibat owo, edieke owo ekedudedu ekenamde. Philip ama ọkwọrọ ikọ ke ediwak isua ke ediwak itie ndien Abasi ama ada enye ke utibe usuñ ada akpanikọ ọsọk mmọ emi ekeyomde. Ke uwut-ñkpọ iba emi nnyin imokut ite ke edinam akpanikọ enyene utip esie, inyuñ ikut ite ke mmọ emi ekotde man ese ñkpọ ebaña udia edot ukpono, koro mme ọkwọrọ-Ikọ Abasi ye mme ada-usuñ ke ini iso ekeme ndidu ke otu mmọ.

Usuñ nte edade ekama mme ñkọk Ufọk-Abasi nnyin edi ukem-ukem nte eke Akamba itie Ufọk-Abasi nnyin. Ọbọk-erọñ, me ọkwọrọ-ikọ emi ekamade utom enyene uñwam eto mme Ọkwọrọ-ikọ eken ye mbiowo ye mme deacon iren ye iban edieke enende onyuñ odotde, etiene nte otu okponde. Ekeme ndimek owo kiet ndise ñkpọ mbaña mbubehe okuk, kpa nte edide ke akamba itie Ufọk-Abasi nnyin. Okposuk edi nte ñka Mme Ada-ibuot Utom miduhe, ọbọk-erọñ emi enyenede eti-ibuot eyeda mme mmọ emi enyenede ifiọk ye eti-ibuot ke abaña ntọtuñọ ñkpọ Spirit adian idem ke abaña mme mfina emi esidukde edi ke utom Abasi.

Nso ifet itie ntre owo ndidi ndido kiet ke utibe Otu emi edide Ñwan Ndọ Christ, ndinyuñ ndiana ye Christ ke abaña utom erifak owo! Enọ nnyin utom, ete inam mme owo etie ke emem ye Abasi (2 Ñwed Corinth 5:18, 19). “Nnyin idi mme akama ukpọhọre ndibe ñkpọ Abasi” (1 Ñwed Corinth 4:1). Edi Edisana Spirit ye Ñwan-Ndọ Christ enọ etop Ikọ Abasi esọk mme ukpọñ emi etakde mfin, man mmọ ebeñe idem ebet akwa usen Ọbọñ (Eriyarare 22:17)

Mme ekọñ edu enọ nnyin ndiñwana nnọ Abasi edi, “ñkpọ ekọñ, eke idade iñwana ekọñ, idighe ñkpọ ekọñ obukidem, edi se ikopde idem ke enyin Abasi ndiwuri mkpọsọñ ebiet” (2 Ñwed Corinth 10:4). Nnyin imenyene akpan ye edisana utom ndinam, ndibiom, nnyuñ nnam enye okut unen. Edi ifet nnyin okpon adaña didie! Mme utom emi nnyin inamde inọ Abasi edikọri adaña didie edieke nnyin inamde akpanikọ ke mme ñkpọ emi Enye ọnọde nnyin ndinam! Utip nnyin edinyene ubọñ adaña didie edieke nnyin idikade iso ikosim akpatre inyuñ inyene ukeme ndinim mme nti ebek nnyin ke ukot Esie koro nnyin ikanamde ke esit akpanikọ ye ntiñ-enyin ye edisana ifik, mme ñkpọ emi Enye ọkọnọde nnyin inam!

Questions

MME MBUME

1. Nso idi ukpuhọre mbet ye Apostle?
2. Nso idi utom mme Ọbọk-erọñ? ọkwọrọ Eti-mbuk? Andikpep?
3. Nso ikanam emek mme deacon itiaba ke ini ntem?
4. Nso utom okpon akan ke Ufọk-Abasi Christ?
5. Siak mme ñkpọ ifañ emi enamde owo odot ndidi anam-utom Christ?
6. Nso idi mme utom ebiowo?
7. Esimek mme mbiowo eto ewe ibon ke Ufọk-Abasi?
8. Nso idi mme utom deacon, eren ye ñwan?
9. Ewe owo iba ke otu mme deacon itiaba oro ekekabare edi mme ikpọ ọkwọrọ-ikọ?
10. Anie esimenere owo itie ke Ufọk-Abasi Christ? Ndien nso idi idiọk usuñ ndida mmenere owo itie?