Psalm 46:1-11; 90:1-17

Lesson 291 - Senior

Memory Verse
IKỌ IBUOT: “Nam uyai Jehovah Abasi nnyin odoro nnyin ke idem; nyuñ nam se ubọk nnyin anamde ọsọñọ ada ye nnyin nyuñ nam se ubọk nnyin enamde ọsọñọ ada” (Psalm 90:17).
Cross References

I Uko Mme Andinim Ke Akpanikọ

1. Ndik ifinake ata eyen Abasi, koro Abasi edide ebiet ubọhọ ke akpanikọ, Psalm 46:1-3; 1 John 4:18

2. Ikọ Abasi ọnọ owo ọyọhọ uwem, Psalm 46:4, 5; John 10:10

3. Mme asua ikọt Abasi ewak eti-eti, edi Abasi anam ikọt esie enyene erikan, Psalm 46:6-9

4. Mmọ eke ebetde Jehovah eyefiọk Enye, Psalm 46:10, 11; Exodus 14:13; Isaiah 40:31

II Abasi Ini Ye Eke Nsinsi-Ini

1. Abasi ododu ke kpukpru ini, inyeneke utit, Psalm 90:1, 2

2. Esibe ini uwem owo ke isọñ enam ọmuhọ ke ntak idiọk-ñkpọ esie, Psalm 90:3, 5-9

3. Abasi ibatke tọsin isua ke ñkpọ ndomo kiet ke ini ñkanika Esie, Psalm 90:4

4. Ekpep owo ndibat mme usen esie, Psalm 90:10-12

5. Abasi ayarade ata uyai emi odude ke uwem ọnọ kpukpru mmọ emi eyomde, Psalm 90:13-17.

Notes
SE EKPEPDE EBAÑA

Ata Ebiet-Ubọhọ

Abasi ododu kpukpru ini ndiñwam kpukpru mmọ emi edibuọtde idem mmọ ye Enye. Odu mme ini emi etiede nte ke ofuri ererimbot edaha eda ndiñwana ye enye emi amade onyuñ anamde ñkpọ ọnọ Abasi, edi ke ndifiak nduñọre odudu Abasi, ye uko Esie, ye inemesit Esie ke abaña ufọn ukpọñ owo, edemere mbuọtidem emi edikande afanikọñ emi etiede nte mmọñ ọtọ ofuk owo. Etie nte andiwet ye mme owo emi etiñde ebaña ke Psalm 46 ema enyene erikan ke esobode ye ata ñkpọ-ndik emi ọkọbiọñọde uforo idut mmọ. Ndusuk mbon-ekọñ idut efen ema ebumere eduk ndida obio, koro ebiet emi Psalm etiñde abaña ekedi obio emi enyenede Abasi, oro edi, Jerusalem; edi mme asua ikadaha obio emi ke ini emi, koro Abasi ekedide ebiet-ubọhọ mmọ ye odudu mmọ, ndien ọkpọsọñ ubọk Esie ama asaña ekpere ndiñwam mmọ nsio ke nnanenyin mmọ.

Ekedi odu-uwem mbuọtidem ke mme owo emi ekenyene, ndien ukem idaha mbuọtidem oro eyesuk aka iso emenere ubọk Abasi ke ererimbot mfin, ndinam ikpọ utibe-ñkpọ ke ibuot mmọ emi edikotde Enye ke ofuri esit akpanikọ. Ke Psalm emi, eneñere ewut ikpọ ndutime emi akakade iso ke otu mbio emi, edi andiwet Psalm emi owut ete ke mme owo ikefeheke ndik. Mbuọtidem ye idorienyin emi mmọ ekenyenede ke nsinsi Abasi okomum mmọ akama. Ndusuk ini ekedi ñkpọ-ndik emi eketiede nte owo ikemeke ndikan, emi okosimde mmọ, akanam mbuọtidem mmọ ọwọrọ ọsọñ ada eyire ye Abasi. Ke adañaemi owo odude ke akwa nnanenyin onyuñ ofioride okot Abasi, edi ke utọ ini oro ke Abasi ekeme ndiwut odudu Esie. Odudu Abasi eneñere owut idem iñwañ-iñwañ ke adañaemi ayararede edikoñ Esie ñkan se owo ekemede ndinam.

Andiwet Psalm ewet ete: “Mmọdo nnyin mididikhede, isọñ ọkpọkpuhọre ikpọ obot ekpenyuñ esehere esine ke esit inyañ”. Ekeneñere etie nte mfina mmọ eyeda mmọ ekpere nsobo. Usen kiet ke edi, ke onyuñ otim ekpere, emi oruk ini ntre ediwọrọde osu. “Edi usen Ọbọñ edibuat nte inọ; ke usen oro ikpa-enyọñ eyebe efep ye akamba uyom, se edade ebot ererimbot eyenyuñ etara ke ọkpọsọñ ufiop, ndien isọñ ye kpukpru utom eke enamde ke esit eyeta ikañ ebiara” (2 Peter 3:10). Kpasuk mmọ oro ikpọñ-ikpọñ, emi enyenede odu-uwem mbuọtidem ke odu-uwem Abasi edikeme ndibọhọ ke usen oro. “Sia kpukpru ñkpọ edibiarade ntem, nso oruk owo ke mbufo ekpedi ke edisana ido ye ke uteñe Abasi?” (2 Peter 3:11).

Mmọñ Uwem

Ke esit obio Jerusalem emi ibibene akanare okuk, akwa idim emi misisatke ama odu. Mmọñ idim emi ama ewet suñ-suñ ebe ke ufọt obio, atara edi ituñọke. Owo ikadaha idim emi nte akpan ñkpọ sia mikedighe nte ekemede ndiwat ubom ke esit. Ekedi ñwọrọ-nda akpanikọ ete, okposuk edi nte Jerusalem ekedide akpan obio ọnọ ofuri ererimbot ke ini oro, owo ikọbọpke enye ke mben inyañ emi ekemede ndiwat ubom ke esit. Ke ini mme asua ekanarede obio ekuk ke ini ekọñ, do ndien mme owo eyekut akamba ufọn utọ idim oro. Mmọñ emi ọnọde uwem ikemeke ndinyene ubiọñọ mme editre nto mme asua emi edude ke edem ibibene obio.

Mmọñ inyañ Siloah ikpekemeke ndimen akamba ubom, edi ama enyene akamba ufọn eke akande oro. Ema edọk mme usuñ mmọñ emi akanamde mmọñ esie asaña osim ofuri mme andiduñ Jerusalem. Mi, ema ekeme ndisuk nsat-itọñ mbon obio, enyuñ enam mmọñ ekeme ndisim kpukpru ufọk ke obio. Shiloah edi mbiet mfọn emi mikpuhu emi Abasi Israel ọfọnde ye ikọt esie.

Ekut mme ikọ emi ke otu mme ntiñ-nnim ikọ emi eketiñde ebaña Messiah: “Mmọnyọ idikpọñke Judah, eto ọbọñ idinyuñ ikpọñke ñkpatian-ukot esie, tutu Shiloh edi; mme idut eyenyuñ ekop enọ enye” (Genesis 49:10). Idighe ke ndudue ke kiet ke otu mme enyiñ Eyen Abasi asaña ekekem ye enyiñ emi enọde idim-mmọñ emi mikpuhu emi odude ke obio Abasi, koro Jesus edi Idim mbọm Abasi emi ebererede enim enọ mme andiduñ ofuri ererimbot. Jesus ama ada ofiori ke akpatre usen akwa usọrọ ete; “Edieke owo ekededi okopde nsat-itọñ, yak enye etiene Mi ediñwọñ” (John 7:37). Idim mfọn Abasi otuñọ akan Shiloah, inyuñ inyeneke adaña. Ezekiel etiñ abaña inyañ emi nte otode ke ufọk Ọbọñ ọwọrọ: “Akpa eke mmeñkemeke ndisaña mbe: koro mmọñ oro ọtuñọde, edi mmọñ ewọk, akpa mmọñ ewọk, akpa mmọñ eke owo mikemeke ndisaña mbe” (Ezekiel 47:50). Mfọn Abasi inanake mmọ emi enyenede esit ndiyom nnyuñ mbọ.

Ebiet-Ubọhọ

Jerusalem, Obio Abasi, ekedi obio emi ọwọrọde etop ke ofuri ererimbot nte akamba ebiet-ubọhọ. Enye ekedi obio emi ọsọñde eti-eti mbon ekọñ mme asua ndida nnyene, sia ikpọ obot ekekande enye ekuk. Enye ama akabare edi akamba ebiet-ubọhọ, akpan-akpan ke ini Nditọ Israel ekenamde ñkpọ enọ Abasi ke esit kiet ye ke akpanikọ. Ke utọ mme ini ntre, Abasi esiwak ndisobo asua, ndusuk ini ebin enye efep, mbemiso enye (asua) asaña ekpere nte ekemede nditop mme idañ esie, mmendiñwana ñkan enye (Isaiah 37:33). Ekpedi nte mme asua ekpekande obio ekuk, ikpekemeke ndibe nduk adaña nte nditọ Abasi ekenyenede mbuọtidem ye idorienyin mmọ ke Abasi.

Se ekutde ke enyin ikpọhidem emi Andiwet Psalm adade owut, enyene ñko ediye ñkpọ eke enye adade ọnọ ke ñkan spirit. Nditọ Abasi kiet-kiet ke ererimbot etie nte ebiet-ubọhọ ọnọ se inende, ndibiọñọ se idiọkde ye ndiọi owo emi etimerede ererimbot. Abasi ama onim ñkpọ-ekọñ spirit ọnọ nditọ Esie ke ererimbot mfin, ndien mmọ emi esinede enye enyene ukeme ndisọñọ nda uko-uko ñkan idiọk-ñkpọ ye andidiọk. Abasi ọtọ ọkọ akanare ikọt Esie okuk, kpa nte akanamde ye Job (Job 1:10). Baba mfina, unọmọ, idomo mme ñkpọ kiet ekededi ikemeke ndisim eyen Abasi ibọhọke Abasi onyime. Edieke Abasi onyimede mme ñkpọ emi ebuñ ọkọ esaña ekpere nditọ Esie, nte Enye okonyimede ukut osim Job, kpa ye oro, eyen Abasi osuk enyenyene erikan edi edieke mbuọtidem ye idorienyin esie esuk esọñọde ke Ete emi odude ke Heaven. Adaña ini nte mbuọtidem ye idorienyin esuk edude ke esit, adaña ini nte idaha owo Abasi osuk odude ke uwem owo, idikemeke ndinuk ọkọ-ukpeme Abasi mfep. Nnyin idọdiọñ ikan oto ke Enye emi amade nnyin (Ñwed Mbon Rome 8:35-39).

Nsinsi Abasi

Kpukpru ñkpọ ererimbot enyene ñtọñọ ye utit; edi ọkpọsọñ Abasi emi okobotde ererimbot ye kpukpru se iyọhọde ke esit, odu ke “nsinsi nsinsi”. Enye inyeneke ñtọñọ mme usen, mme utit mme isua. Ọsọñ ñkaña owo ndifiọk akpanikọ emi, akpan-akpan edieke enye mikabakere esit inyuñ idu ke ebuana ye Abasi emi odude ke Heaven.

Ke eritọñọ ekebot owo esin ke mbiet ye uduot Abasi, edi akpanikọ ete nsinsi uwem ekedi udeme inyene esie. Nte ikọtọhọ eto uwem ke Iñwañ Eden? Abasi ama ọnọ owo emi mikanamke idiọk-ñkpọ ifet ndidia Eto Uwem oro. Edi idiọk-ñkpọ ama oduk ke esit owo, ebin enye osio ke Iñwañ onyuñ anam enye ataba mme eñwọñọ ye edidiọñ emi Abasi okonimde ọnọ enye ke ini enye okodude uwem unana idiọk-ñkpọ. Idiọk-ñkpọ ke esit owo ama ọkpuhọre idaha owo ke abaña nte enye ekenyenede ndidu uwem ke nsinsi, koro Abasi ama ọnọ ntọt ete ke ntut-utọñ ke ewuhọ Esie eyeda mkpa edi; edi oro ikpuhọke idaha ukpọñ emi midikpaha ke nsinsi. Enye ododu uwem aka iso ke ofuri nsinsi-ini. Mkpa ikpọhidem iwutke mkpa ukpọñ. Adam ama odu uwem ke isua 930 edi enye ama akpa ke ntak ñtọñọ idiọk-ñkpọ. Tọñọ ke ini oro mme isua uwem owo ekabare emuhọ, enyuñ eka iso emuhọ. Andiwet Psalm ama etiñ ete ke owo ikpenyeneke idorienyin ndidu uwem mbe isua 80, emi onyuñ edi akpanikọ ke eyo nnyin emi.

Etie nte emi edi akpan ekikere ke esit owo emi ewetde Psalm ibuot Añañ ye duop. Abasi edi nsinsi ntre ñko ukpọñ owo odu uwem ke nsinsi. Usuñ ye edu nte owo odude uwem ke ererimbot, nte ekikere esit esie etiede ye Abasi ye mme edinam esie etiene nte mbet Abasi asañade, ebiere ebiet emi ukpọñ esie edidude ke nsinsi. Andiwet Psalm otim anam añwaña ete, ke uwem owo edi ibio-ibio, ndien ke enye ekpenyene ndida ufañ ye ifet emi enye enyenede ndibak nyom iso ye mfọn Abasi ke ini uyen esie. Do ndien ikpọñ ke ekeme ndikut ata akpan ñkpọ eke ọfọnde akan ke uwem. Mme owo esuk ema ndibem iso nyom uyuhọ ke mme usuñ efen, edi edieke ekemede ndikut ata uyuhọ, edi ke Abasi oto ke Jesus Christ ye Usio-Isop emi Enye ọkọnọde ke Krọs. “Nam nnyin ifiọk ndibat usen nnyin ntem, man ida esit ifiọk idi” (Psalm 90:12). Idem ifiọk ererimbot ekpenyene ndikpep owo ete ke edi ikpikpu ndisuk ñka iso nyom inemesit emi edibighide ke ekpri ini, ke ini idara emi okponde akan emi uduot-owo ekemede ndifiọk edide kpa erinyaña ukpọñ esie nsio ke idiọk-ñkpọ, man anam enye enyene mfọn ye ebuaña ke ubọk Abasi Andibot enye. Erinyaña emi idaha idaresit ye uyuhọ ikpọñ isọk enye, edi ada nsinsi uwem nte akakan eñwọñọ ọnọ esit akpanikọ.

Questions
MME MBUME
  1. Nso idi ntak emi eyen Abasi ọyọhọde ye uko?
  2. Abasi ebighi uwem adaña didie?
  3. Isua uwem nnyin ifañ ke Abasi ada nte usen kiet ke enyin Esie?
  4. Tiñ añwaña nte andiwet Psalm okutde uniọñ isua uwem owo.
  5. Nso idi uniọñ isua uwem owo nte Andiwet Psalm etiñde abaña?
  6. Eda didie uniọñ isua uwem owo oro edomo ye uniọñ isua uwem owo mfin emi?
  7. Nso idi nnen-nnen ini ke uwem, nditọñọ ndiyom mfọn Abasi nnọ uwem fo?