1 Ndidem 16:29-34; 17:1-24.

Lesson 296 - Senior

Memory Verse
IKỌ IBUOT: “Sese, Jehovah etiñ enyin ke idem mmọ eke ebakde Enye, ye mmọ eke edoride enyin ke ima Esie; ke anyaña ukpọñ mmọ osio ke mkpa, onyuñ onim mmọ ke uwem ke akañ” (Psalm 33:18, 19).
Cross References

I Ibak Ukara Ahab

1. Ibak Ahab ama akan eke kpukpru ndidem Israel emi ekebemde enye iso, 1 Ndidem 16:29-34

2. Elijah, owo emi emehede ke edibọñ akam asua ọnọ Ahab, 1 Ndidem 17:1; James 5:17, 18

II Ukpeme Abasi Ye Nte Enye Ọkọbọkde Elijah

1. Utere ọbọk Elijah, 1 Ndidem 17:2-7; Luke 12:24; Psalm 147:9: Matthew 6:25-33

2. Enam ebiet iduñ enọ Elijah ke ufọk ebekpa, 1 Ndidem 17:8-16; Matthew 10:41, 42; Luke 4:25, 26

3. Elijah anam eyen ebekpa eset ke mkpa, 1 Ndidem 17:17-24.

Notes
SE EKPEPDE EBAÑA

Edikpono Baal

Ke ini Jeroboam eyen Nebat okobotde nditọ enañ gold iba okonyuñ ofioride ete “O Israel, se mme abasi emi ekedade mbufo ke isọñ Egypt edọk edi” onyuñ anamde Israel enam idiọk ke ndikpono ndem, eketie nte enye ama osim akpatre emiom ye Ata Ọkpọsọñ Abasi. Edi ekedi ata mfefere ñkpọ ọnọ Ahab ndibuana ke idiọk-ñkpọ Jeroboam. Enye ama anam akakan idiọk-ñkpọ ke ndida ukpono Baal, emi ọkọyọhọde ye kpukpru mbubiam ido ye afai, nduk ke Israel. Israel idahaemi ema enam ukem idiọk-ñkpọ emi ekesinde Abasi ada akwa nsobo etiene nditọ Canaan. Mme oku Baal ekedi mme owot-owo sia ido ukpono Baal okoyomde ediwa nsek-nditọ.

Ọkpọsọñ Udọñ Elijah

Ikpaha owo idem ndikut nte mbubehe Israel akafinade Elijah; enye ama ọfiọk isuñi emi ekebetde Israel ke ntak idiọk-ñkpọ emi. Enye ama okot abaña nte Abasi ediberide ikpa enyọñ edinyuñ omumde edim akama edieke mmọ editrede ndinim ewuhọ Abasi. Enye ama ekere ete ke oro ekedi edikem ini, ndien ke enyene ndinam ñkpọ ke abaña idut Israel ndien “enye onyuñ ọbọñ akam eti eti, ete edim okudep; ndien edim idepke ke isọñ ke isua ita ye ọfiọñ itiokiet” (James 5:17). Elijah okobiom mbiomo mbio-obio esie: okoyom ndukut Israel afiakde etiene Abasi ke usuñ ekededi. Enye ikekereke mfina, ukut ye ufen eke ekebetde enye, ema ekam esọhi edikpono abasi Baal efep. Enye ama onyime ndida itie esie nnyuñ mbuana ke ukut ye mme anam-idiọk, Abasi ama akam onyime ndisio mmọ mfep ke idiọk usuñ mmọ. Ererimbot eyo emi oyom mme owo nte Elijah emi enyenede akwa udọñ ndikut mbon efen ewọrọde ekpọñ idiọk.

Ndida Ke Iso Abasi

“Ma uwem Jehovah Abasi Israel emi, ndade enye ke iso, mbara ye edim ididuhe ke mme isua emi, ke mitoho ke uyo mi” (1 Ndidem 17:1). Emi, kakpan, ekedi eñwọñọ uko ọnọ uduot-owo ndinam, oro edi ndidọhọ ke uyo imọ, ikpa-enyọñ eyenọ edim, me, eyemum edim akama. Ikọ emi ikọwọrọke koro ekenyikde enye ke ndo-ndo oro, edi ekebere ke ọkpọsọñ edibọñ akam ke ata anyan ini. Oruk ikọ oro iwọrọke ito ikpikpu udọñ edi oto edisana ebuana ye odu-uwem Abasi.

Ikọ emi “Ma uwem Jehovah Abasi Israel emi ndade enye ke iso”, owut ete ke Elijah okodu uwem nte ñkpọ emi enye okosuk odude ke iso odu-uwem Abasi kpukpru ini. Mfin nnyin ikpenyene ndifiọk nte ke Abasi ọfiọk kpukpru ikọ eke nnyin itiñde ye kpukpru ekikere nnyin, ñko ke Enye ke ododomo mme edinam nnyin. Yak kpukpru iren owo, iban ye nditọwọñ efiọk ete ke mmimọ ida kpukpru ini ke iso Ata Ọkpọsọñ Abasi.

Ke Mben Idim Cherith

Nso ke Elijah ekeme ndikut ke mben idim Cherith? Nte ataya mme aba-itiat ama odu do? Me enye ekenyene ndiduñ ke idak ikpa-enyọñ? Emi ikedighe mbubehe Elijah: Enye okodu ke ebiet emi Abasi ọkọdọhọde enye aka. “Afo eyeñwọñ mmọñ ke idim: mmonyuñ nteme mme utere nte ebọk fi do.”

Mme utere! Nso ufọn ke emi edida edi! Nso ke utere ekeme ndida ndi emi ọkpọfọnde owo Abasi ndidia? Edisana Ñwed Abasi ọdọhọ ete “Ese mme inuen enyọñ, ete, mmọ itọhọ tọ, inyuñ idọkke dọk; inyeneke ubet ubon ñkpọ ye ufọk ibokpot” (Luke 12:24). Emi edi mme inuen emi enyenede ndinọ Elijah udia ke usen ke usen. Ke akpanikọ Abasi okoyom uwem mbuọtidem oto Elijah, edi Elijah ama enyene mbuọtidem. Abasi ọkọnọ utere udia, ndien utere ọnọ Elijah. Nte ekesañade enọ ye ebiet udia okotode ifinake adaña nte Abasi ekedide Andinọ. “Uwem akan udia, ikpọhidem onyuñ akan edisine ñkpọ” (Luke 12:23). “Enyin Jehovah ese mbon eti ido, utọñ Esie onyuñ ọbiọñọ ọnọ eseme mmọ” (Psalm 34:15). Abasi Elijah ke ododu uwem, kpa ntre ñko ye mme utere. Se inanade mfin edi oruk mbuọtidem Elijah.

Ema edomo mbuọtidem Elijah. Idim ama asat! Ikokureke ke enye ndisuk mbet mme inuen enọ enye udia ke usen ke usen edi idim eke enye ọkọñwọñde mmọñ oto ama asat, kpasuk idim Cherith emi Abasi ọkọnọde enye aka. Elijah ikobupke mbume edi ekebet ke nsat isọñ oro tutu “Uyo Jehovah osim enye ete daha ke enyọñ ka ke Zarephath emi enyenede Sidon, nyuñ duñ do: sese, mma nteme ñwan kiet emi ebe esie akpade, nte ọbọk fi do”.

Ebekpa Sidon

Zarephath ikedighe isọñ eduek, ebekpa emi ikedighe enyene-ñkpọ añwan. Enye ọwọrọ aka nditañ ñkpri ifia. Emekeme ndikere nte ekpetiede fi ke idem edieke enọde fi okoduñ ke ufọk emi ñwan ye eyen esie eketiede biọñ ekenyuñ enyenede ekpri udia mmọ mbiba ndidia ini kiet ndien idorienyin efen inyuñ iduhe? Ekpekeme ndisọñọ nda mbup ete “edi bem iso sio ke esit, nam ekpri uyo nọ mi” me mbuọtidem ndidọhọ “Ndom uyo oro idikureke ke abañ, aran ke ekpeme itreke, tutu osim usen emi Jehovah edinọde edim ke iso isọñ”? Omonyuñ ekere ete ke eka emi biọñ ọdọñde ekeme ndida uyo nnọ esenowo ke ini eyen esie oyomde-yom se akpadiade? Enye ama ese onyuñ otim abahare aran ye udia emi onim ọnọ usen kiet. Idahaemi, akayak kọp ndom uyo kiet ye ikpañ aran ifañ!

Owo iyikke ke ini Jesus ọkọdọhọde ete “Edi ñtiñ akpanikọ nnọ mbufo nte, ediwak mme ebe-akpa ekedu ke Israel ke eyo Elijah, ke ini esiride ikpa enyọñ isua ita ye ọfiọñ itiokiet, akamba akañ okonyuñ odude ke ofuri isọñ; edi idọñke Elijah etiene mmọ baba kiet, ke mibọhọke ebe-akpa añwan, emi odude ke Zarephath ke isọñ Sidon” (Luke 4:25, 26).

Edi ekedi ñwan emi mfọn-ido esie akananade mbiet; enye emi okonyimede ndinam uyo Abasi ke ini biọñ ye mkpa ekebetde enye. Abasi ama osuk enyin ese mme ebe-akpa ke Israel, edi ikekwe kiet emi enye okpodoride enyin nte esen owo Sidon emi. Nte Abasi esede ufọk Abasi mfin nte Enye ke okokut nti ido emi Enye amade, mme ana nte Enye okot esen owo man ọnọ anditiñ-ntiñ-nnim-ikọ Esie udia? “Anie edikut enyene ido añwan? Ñkọm ekọm urua esie akan pearl anyan usuñ” (Mme Ñke 31:10).

Ndusuk ebe-akpa emi ke Zarephath ama okop abaña Abasi Israel mbemiso Elijah edidi. Abasi ama ọdọhọ Elijah ete “mma nteme ñwan kiet emi ebe esie akpade nte ọbọk fi do.” Ndifiọk mbaña Abasi emi akakamade Israel ke ofuri isua aba emi mmọ ekeyode ke akwa akai ikọt, ọkọnọde mmọ udia mme angel edia, okonyuñ osiode mmọñ ke itiat ọnọ mmọ eñwọñ, ekpenyene ndisin mbuọtidem ke esit owo ekededi. Edi ñkpọ kiet ndinim ke akpanikọ nte ke Abasi ekeme ke onyuñ ananam mme utibe-ñkpọ, onyuñ edi ñkpọ efen ndibuọt idem ke Abasi ke ini ọkpọsọñ idomo kpa idomo emi akamade mkpa ye uwem, emi otukde nnyin me nditọ nnyin. Mme eñwọñọ Abasi esọñọ eda. “Ndom uyo inyuñ ikureke ke abañ, aran inyuñ itreke ke ekpeme” etiene mme ikọ emi “Koro ntem ke Jehovah Abasi Israel ọdọhọ ete ndom uyo oro idikureke ke abañ, aran ke ekpeme idinyuñ itreke”. Abasi nnyin omokpon!

Uwem Ke Otu Mme Akpa Mkpa

Ini kiet efen, ema edomo mbuọtidem Elijah ke ikañ ndien ọwọrọ enam ọfọn ama nte silver ye gold. Ini emi, eyen ebe-akpa emi ama ọdọñọ onyuñ akpa. Elijah okoduk ke ubet esie, onim okpo eyen emi ke bed esie onyuñ ofiori okot Abasi. Ikata enye ana okubi eyen emi ke idibi ndien “Jehovah okop uyo Elijah; ukpọñ eyen oro onyuñ afiak oduk enye ke idem, ndien enye eset.” Nso utọ owo edi emi! Nso utọ mbuọtidem onyuñ edi emi ekemede ndisio owo ke mkpa nsin ke uwem!

Questions
MME MBUME
  1. Anie ekedi ñwan Ahab?
  2. Enye okoto ewe obio, ndien ewe abasi ke enye okokpono?
  3. Nso ikanam Elijah ọbọñ akam ete edim okudep?
  4. Ke nso utọ usuñ ke akana Elijah enyene udia ke ini enye okoduñde ke mben idim Cherith?
  5. Nso ikanam idim oro asat?
  6. Zarephath okodu ke ewe idut?
  7. Nso ikanam Jesus asiak enyiñ ebe-akpa Zarephath emi?
  8. Nso utibe-ñkpọ iba ke ekenam ke ufọk ebe-akpa emi?
  9. Siak ediwak usuñ emi ekedomode mbuọtidem Elijah nte ukpep-ñkpọ owutde.
  10. Nso ikanam ebe-akpa emi ọsọñọ onim Elijah nte ata owo Abasi?