Lesson 288 - Junior
Memory Verse
IKỌ IBUOT: “Ekop uyo mme andida mbufo usuñ, enyuñ esuk ibuot enọ mmọ; koro mmọ ekpemede eyom ufọn ukpọñ mbufo” (Mme Hebrew 13:17).Notes
Ñkọri
Nte mbet ekekwọrọde ikọ ebaña Jesus, ediwak owo ema ediana ke ibat mmọ. Otu mme andinim ke akpanikọ ema ewak tutu mme anditiñ ntiñ-nnim ikọ ikemeke ndinam kpukpru utom. Ke otu mme Jew emi esemde usem Greek, nsuk-uyo ama ọtọñọ ete ke owo isehe mme ebe-akpa mmọ. Kiet ke otu utom mme Apostle ekedi ndideme mme ñkpọ uwem emi nnọ mmọ eke enanade (Utom Mme Apostle 4:35).
Sia mme anditiñ ntiñ-nnim ikọ ekedide mbon Hebrew, ekeme nditie nte ema enam mfọn enọ ñkañ kiet, koro ikọ iduhe ndiwut nte ke ema etre ndise mme ebe-akpa nditọ Hebrew. Etie nte owo ikokoikekoi itre ndise mmọ. Ñwed Abasi ekpep asua ọnọ edinam ñkpọ ke uma (Mme Ñke 24:23; Job 13:10; Leviticus 19:15). Paul ama ewet mme ikọ emi ọnọ Timothy: “Mmowuk fi ke isọ Abasi, ye Christ Jesus, ye ndimek angel, nte afo ekpeme ndinam uyo emi; okubem iso obiom owo ke unana ntak, okunyuñ anam baba ñkpọ kiet ke uma” (1 Ñwed Timothy 5:21).
Editiñ Mfina
Owo itiñke inọ nnyin mme anie ke eketiñ mfina emi enọ. Ndusuk ini mme owo esuk uyo enọ mme ufan ye mbọhọiduñ mmọ edi mmọ etre ndika mbine mme ada-usuñ mmọ, emi ekemede ndinehere idiọk edinam oro. Owo ama anam akpanikọ nditiñ mfina emi nnọ mme apostle, ndien ema esio ke ikadade mfina oro idi efep.
Edieke esiode fi efep ke ini edemede mme ñwed ke ufọk-ñwed, nte afo ukpudọhọke andikpep fo ete ke ema ebe imọ? Edieke ekpesinde mmọñ-eba ke udia enọ kpukpru owo, edi esin ndinọ fi, nte afo ukpudọhọke eka fo ke ema esin ndinọ fi? Nte idighe se idotde nditiñ nnọ mme ada-usuñ ke ini etiede nte ñkpọ inaha ọfọn?
Nnyin ifiọkke me, mme ntak ema edu ke abaña mfina emi. Ekpededi ama enen me inenke, ema esio ntak nsuk-uyo oro efep. Ema ekot mboho, ndien akamba otu mbet edu do. Ema etiñ enyuñ esio mfina emi efep.
Ntọtuñọ Ediyakidem
Jesus okokot mbet Esie ndinam utom nnọ Imọ. Enye ama ọdọhọ ndusuk mmọ ete, “Etiene Mi, ndien nyenam mbufo edi mme ọkọ-owo” (Matthew 4:19). Jesus ama etiñ ọnọ mme anditiene Enye ete ke idighe mmọ ekemek Imọ edi ke Imọ ikemek mmọ, inyuñ inim mmọ, man eka ekeñwum mfri (John 15:16). Jesus okokot mme apostle duopeba onyuñ osio mmọ ọdọñ ndikwọrọ Eti-mbuk nnyuñ ñkọk mbon-udọñọ (Matthew 10:1-8). Ke Jesus ama ọkọdọk ke Heaven (Utom Mme Apostle 1:9), mme apostle duopeba ema enyene utom ndikwọrọ Eti-mbuk nnyuñ nsuan eti etop erinyaña. Emi ekedi utom Spirit emi ekekotde mmọ edinam.
Nte ibat mme andinim ke akpanikọ ọkọkọride, mme utom ema ewak. Mme apostle duopeba ema edọhọ otu owo emek iren owo itiaba man mmọ eñwam ke ndusuk utom, oro edi ndise ñkpọ mbaña mme ñkpọ uwem emi. Emi eyeñwam owo duopeba emi ndiyak idem mmọ “ndiyire ke akam ye ke utom Ikọ Abasi.” Mmọ ema ekere ete ke ifọnke ndiyak ini ye ekikere mmọ ọwọñọre ọkpọñ utom emi Abasi okokotde mmọ ndinam.
Mme Deacon:
Esiwak ndikot mme anam-utom owo itiaba oro ke ufọk-Abasi nte “mme deacon.” Ekemek mmọ ndiñwam mme Apostle, ndinyuñ nse ñkpọ mbaña ndideme udia nnọ mmọ eke enanade. Mbemiso ekemek mmọ, mme Apostle ema edọhọ otu owo ete, “Emek owo itiaba, emi enyenede eti enyiñ, enyuñ eyọhọde ye Edisana Spirit ye ifiọk, esio ke otu idem mbufo.” Emi ekedi se akanade mmọ enyene, oro edi eti enyiñ, eyọhọ ye Edisana Spirit ye ifiọk. Mme idaha emi ama okoñ, edi mmọ eke eyomde ndidi mme anam-utom nnọ Ọbọñ enyene ndidu uwem Spirit ye eti uwem.
Iren-owo itiaba emi ekenyenede eti enyiñ ema enyene eti etop eto otu owo. Mmọ ema enyene eti edu-uwem, enyuñ enana ndo. Otu owo eyenyene mbuọtidem ke utọ mme owo oro. Iren-owo itiaba emi ema enyene enọ Spirit ñkọ. Mmọ ema eyọhọ ye Edisana Spirit. Mmọ ema ebọ Edisana Spirit emi edide enọ Abasi (Utom Mme Apostle 2:38; 10:45), emi anamde owo edi ntiense ọnọ Ọbọñ, onyuñ ọnọde enye odudu ndinam utom (Utọm Mme Apostle 1:8).Mmọ ema eda odudu oro enam ñkpọ man okubọhọ mmọ. Mmọ ema eka iso ndibọñ akam ndinyuñ nyak uwem mmọ nnọ Abasi. Ndibọ Edisana Spirit edi ata utibe edidiọñ, edi, edi ata akpan ñkpọ owo ndiyak edidiọñ Abasi osuhọ ke uwem esie.
Mme deacon itiaba emi ekenyene ndinyene ifiọk ñkọ. Edi se ikpọfọnde iren-owo emi, ndinyene ifiọk edinam ñkpọ, emi ediñwamde mmọ nditim nnam utom emi ekeyakde esin mmọ ke ubọk.
Otu owo ekemek mme deacon itiaba emi. Mme Apostle ema enyime enyuñ esọñọ mmọ ke akam. Nnyin ikut nte ekemede ndimen utọk mfep usọp-usọp. Mme Apostle ikoyomke odudu idem mmọ. Ema eyak utom emi mmọ efen ekpekenamde esin ke ubọk mme deacon itiaba emi. Mme Apostle ikesinke ndinam utom mmọ, edi mmọ ekededeme utom. Mmọ ema eda ima ye ifiọk esin ke ini mmọ enimde mme iren-owo emi edoride enyin ke mmọ, ndise mbaña ñkpọ uwem emi. Abasi ama okop inemesit ke erinam emi, koro ibat mmọ eke ekenimde ke akpanikọ ama aka iso awak ndien ekwọrọ Ikọ Abasi ekut unen.
Mmọ Efen Emi Edide Mme Anam Utom Ke Ufọk Abasi
Ke ini ediwak owo ekedide ndien mme ufọk-Abasi enyuñ esiaha, ntak ama odu ndinyene ediwak mme deacon ye mme anam-utom efen ke ufọk-Abasi. Ke mme ñwed emi Paul ye Peter ewetde, nnyin ikut mme item emi akabañade mme ada-idaha ufọk-Abasi ye mbiowo ye mme deacon ñko. Mme ada-idaha ufọk-Abasi ekedi mme ọkwọrọ-ikọ ke mme ufọk-Abasi. Mmọ ekenyene ndisin ifik, “ndisọñọ mmum ikọ akpanikọ” man mmọ “ekeme ndida eti ukpep-ñkpọ oro nteme mme owo, nnyuñ ñkan” mmọ eke ekpañde utọñ (Titus 1:9). Mme ọkwọrọ-ikọ eken ye ndusuk mme anam-utom, ekekot mmọ mbiowo. Mmọ ñko akana nte “ekpeme udim-erọñ Abasi.” Oro edi, akana nte mmọ enọ uñwam ke Spirit (1 Peter 5:2). Mmọ ekena nte edu uwem man edi uwut-ñkpọ enọ mbon Abasi.
Mme idaha eke kpukpru mme anam-utom anade nte eda ekedi ata ukem-ukem. Abasi oyom kpukpru mmọ emi enamde utom ke ñkpọ Spirit mme ke ñkpọ uwem emi ndidu eti uwem, eke ananade esuene, enana ndo enyuñ esuhọridem.
Mme Anam-utom Ke Ufọk-Abasi Mfin
Ke ufọk-Abasi nnyin, oro edi Apostolic Faith, nnyin imenyene mme anam-utom eke onyuñ etiede ukem-ukem ye eke mme Apostle ke akpa ñtọñọ ufọk-Abasi. Ke akamba itie nnyin ke Portland, Oregon, andise kpukpru utom, emi ekotde (General Overseer) odu. Nnyin imonyuñ inyene andidiana enye ñko, emi onyuñ añwamde ke akamba utom oro. Okposuk edi eke nnyin mimekke mbiowo ye mme deacon, edi imenyene mmọ eke edade mmọ ntre, ndien mmọ enyuñ enam utom mme deacon ye eke mbiowo. Mmọ eke eñwamde mme ọkwọrọ-ikọ edi “mme anam-utom.”
Imenyene mme ọkwọrọ-ikọ ye mme anam-utom emi ekemede ndikot mmọ mbiowo. Mmọ ebọñ akam enọ mbon-udọñọ, enyuñ eneme mme mfina ñkañ Spirit ye ada-usuñ enyuñ enọ item. Mmọ eken enyuñ edu, eke etiede nte mme deacon, emi esede ñkpọ ebaña mme ñkpọ uwem emi. Utom mmọ ekeme ndidi ndise nte ebonde mme motor, ye mmọ emi ekpemede añwa, ye nte ebọpde mme mbufa ufọk, ye utom ke ufọk umiñ-ñwed, ye mme utom efen eke abañade mme ñkpọ uwem emi. Ñkpọ Spirit ye ñkpọ uwem emi edi mbak Eti-mbuk, ndien kiet ikemeke ndikut unen ikpọñ, ibọhọke mmọ mbiba esaña kiet.
Nte nnyin iyakde mme esit ye ubọk nnyin, Spirit Abasi oyom onyuñ emek owo kiet-kiet esin ke itie utom esie. Owo ekeme ndidu ke idaha utom esie anam akpanikọ ndien ke ekpri ini Abasi ekeme ndinọ enye utom efen ndinam. Ke otu owo itiaba emi ekebemde iso emek ndidi mme deacon, owo iba ke otu mmọ ema enam utom efen. Stephen, emi “mfọn ye odudu ọyọhọde enye ke idem, anam ikpọ ye mme utibe-ñkpọ ye mme idiọñọ ke otu mbio-obio... Ndien mmọ ikemeke ndida ke iso ifiọk ye Spirit eke enye adade etiñ ikọ” (Utom Mme Apostle 6:8, 10). Ukwọrọ-ikọ Stephen ama ọnọ mme Jew akamba ubiom-ikpe tutu mmọ “esio mme ntiense nsu” ebaña enye, enyuñ etọñọ enye ke itiat. Emi ekedi eti ifet ọnọ enye ndidi akpa owo Abasi emi ewotde ke ntak Ikọ Abasi. Philip ñko okonyuñ edi ọkwọrọ-ikọ. Enye “ọkọkwọrọ Christ” ke akamba mbono edidemere ke Samaria tutu ediwak owo enim ke akpanikọ enyuñ ebọ erinyaña (Utom mme Apostle 8:5, 12). Ema edọñ enye aka ebine eunuch owo Ethiopia, onyuñ añwam eunuch ndikabaresit (Utom Mme Apostle 8:27, 37). Ke otu nnyin mi odu owo emi ekedide ibuot ke otu mme ekpeme-ufọk nnyin. Enye ama anam akpanikọ ke utom esie, ndien Abasi okot enye ndida itie utom efen. Ke ediwak isua idahaemi, enye edi ọkwọrọ-ikọ, onyuñ ọkwọrọ Eti-mbuk ke ofuri esit.
Ediwak nditọwọñ ye mkparawa esinyene udọñ ndikpedi mme anam-utom nnọ Ọbọñ. Mmọ ema eyak uwem mmọ enọ Abasi, man mmọ edi ñkpọ-utom emi “enyenede ukpono, ñkpọ-utom emi Abasi anamde asana, emi Ete-ufọk ekemede ndida nnam ñkpọ, emi ebeñede enye enim enọ kpukpru oruk eti utom” (2 Ñwed Timothy 2:21). Spirit Abasi ama añwam mmọ ndida ke mme idaha eke enimde enọ mme ọkwọrọ-ikọ ye anam-utom. Mmọ ema edu uwem emi minyeneke ndo, emi asanade, enyene eti-ibuot ye akpanikọ ye mfara ke idem. Mmọ ema ema mbon Abasi enyuñ efọn ido ke ndidara nnyuñ ñkama mmọ isen. Mmọ ema ekara idem mmọ nte ọfọnde enyuñ enam akpanikọ ke kpukpru ñkpọ. Ke ntre mmọ ema ebeñeidem man Abasi ada mmọ anam ñkpọ. Ke ini ekemde Abasi ama ọnọ mmọ ifet ndikabare ndi mme andikpep ñkpọ ke Usen-Ọbọñ ye mme anam-utom ye ọkwọrọ-ikọ.
Ndusuk mmọ eke edide nditọwọñ ye mkparawa mfin enyene edisana ye eti udọñ ndinam utom nnọ Abasi. Edieke Ọbọñ ebighide ndidi, mmọ eyedi mme anam-utom ke ufọk-Abasi. Abasi okop didie inemesit ke ini nditọwọñ ebeñede uwem mmọ enim enọ utom Esie enyuñ ebet ini eke Enye edimekde mmọ ndiduk ke itie utom Esie!
Ukpono
“Yak ebat ete, mbiowo eke etimde ekara edot akwa utip; akpan-akpan mmọ emi ekpade utom ke ukwọrọ-ikọ ye ukpep-ñkpọ” (1 Ñwed Timothy 5:17). Ukpono odu ọnọ mmọ emi Abasi ayakde mme ifet ye mme idaha utom esin mmọ ke ubọk. Abasi ama ayak ukpono ọnọ mmọ. Nte nnyin imekeme ndisuhọre idaha oro? Nnyin “ikpono mmọ eti eti ke ima kabaña utom mmọ” (1 Ñwed Thessalonica 5:13). Nnyin iwut ukpono nnyin ke ndisuk ibuot nnọ mmọ, oro edi ndikop uyo mmọ (1 Peter 5:5; Mme Hebrew 13:17). Edi se ifọnde onyuñ eyede nnyin ndikot mme ọkwọrọ-ikọ ye mme anam-utom nnyin “Brother” ye “Sister”, utu ke ndikot mmọ ke enyiñ eke mmọ ekerede ikpọñ, okposuk edi nte itimde ifiọk mmọ eti-eti. Nditọwọñ ye mkparawa akpan-akpan enyene ndiwut utọ ukpono oro nnọ mmọ emi Abasi emekde esin ke saña-saña itie utom.
Uñwam
Mme Levi ke otu Nditọ Israel ikọbọhọ udeme mmọ ke isọñ Canaan. Jehovah ekedi udeme mmọ (Deuteronomy 10:9). Mmọ ekenam utom ke Itie-ukpono Abasi, enyuñ ebọ udeme mmọ eto mme ñkpọ emi ekedade eka do, nte Jehovah ọkọñwọñọde. “Kpa ntre ke Ọbọñ ebiere onim, ete mmọ emi ekwọrọde gospel ekpeda se itode ke gospel edu uwem” (1 Ñwed Corinth 9:13, 14). Mme Apostle ye mbiowo ye mme deacon ibọhọ okuk utit-ọfiọñ. Ke ini Jesus okosiode mme Apostle ọdọñ ndikwọrọ ikọ nnyuñ ñkọk kpukpru oruk udọñọ, Enye ete, “Eyen-utom odot udia esie” (Matthew 10:10). Mme ñkpọ emi mmọ ekenanade, nte udia, ebiet iduñ, edisine-ñkpọ ye okuk usuñ-isañ, ekedi se ekenọde mmọ, edi mmọ ikọbọhọ okuk utom. Onyuñ edi ntre ye nnyin: mmọ emi eyakde ofuri ini mmọ esin ke utom Eti-mbuk emi, minyuñ inyeneke usuñ efen ndida ññwam idem, ebọ uñwam eto Eti-mbuk. Mmọ emi enọde ubak ini mmọ, enam utom idem mmọ man eda edia ñkpọ. Ke kpukpru emi idaresit eke odude ke utom edi utip mmọ.
Abasi ọnọ kpukpru nnyin item emi: “Ekop uyo mme andida mbufo usuñ, enyuñ esuk ibuot enọ mmọ; koro mmọ ekpemede eyom ufọn ukpọñ mbufo” (Mme Hebrew 13:17).
Questions
MME MBUME- Ke Jesus ama ọkọdọk ke heaven, mme anie ekenyene utom edisuan Eti-mbuk?
- Nso idi ntak emi ekemekde akpa mme deacon itiaba oro?
- Nso ikedi utom mmọ?
- Ekemek mmọ didie?
- Nso ikedi idaha eke mme deacon akanade nte enyene?
- Ke ini akade iso, ewe mme anam-utom ufọk-Abasi ke ekefiak emek?
- Anie odot ndidi anam-utom ke ufọk-Abasi nnyin mfin emi?
- Nso ke ekpri eyen ekeme ndinam man ebeñe uwem esie ndidi anam-utom nnọ Abasi?
- Didie ke nnyin iwut mmọ emi Abasi onimde ke idaha utom ukpono?
- Didie ke emek mme anam-utom ke ufọk-Abasi mfin emi?