Lesson 290 - Junior
Memory Verse
IKỌ IBUOT: “Koro uñwọñọ oro enyene mbufo ye nditọ mbufo ye kpukpru mmọ emi edude nsan-nsan, adaña owo nte Jehovah Abasi nnyin edikotde etiene Enye” (Utom Mme Apostle 2:39).Notes
Nte Nnyin Idiọñọde Paul
Nso ñkim-ñkim ifiọk ke nnyin inyene ibaña Apostle Paul! Enye emi akanade akabare edi akwa Apostle ọnọ mme Gentile, ọkọtọñọ ke edikọbọ ufọk-Abasi. Enye ekenyene udọñ nte ekpewotde Stephen, akpa anditiene-Christ emi akakpade ke ntak Eti-mbuk Christ. Enye ama ekere, kpa nte akwa oku ekekerede, ete ke nditọ Abasi esesuñi Abasi, ndien enye ke ifiopesit ama añwana ndikut ete owo ibiatke ibet.
Idighe Stephen ndiduọk uwem ikpọñ, edi ema eduri ediwak nditọ Abasi eken esioño ke mme ufọk mmọ, ekedọñ ke ufọk-ñkpọkọbi, enyuñ ewot ñko. Kere nte ndik okodude ke ini otu nditọ Abasi ebonode ke mme ufọk mmọ ekwọ ikwọ mme ekot Ñwed Abasi, ndien ke idaha kiet emum mmọ ekedọñ ke ufọk-ñkpọkọbi ke ntak oro.
Ke idut nnyin emi enọde unen edikpono Abasi, ọsọñ nnyin idem ndikere mbaña utọ edu edinam emi; edi ediwak nditọ Abasi ekenyene ndikut ukut ntem ke ntak mbuọtidem mmọ ke Abasi.
Paul ke idemesie ama etiñ abaña se enye akanamde ke otu mme anditiene-Christ: “Ñwak ñko ndinọ mmọ ufen ke kpukpru mme synagogue, nnyuñ ññwana ndinam mmọ esuñi Jesus; ndien ke eridama eke ndamade ye mmọ, nsin mmọ enyin tutu nsim mme obio mme idut” (Utom Mme Apostle 26:11). Enye esitiene mmọ ke idem ini emi mmọ eñwanade ndibọhọ ke ndifehe mkpọñ obio. Edi enye afiak etiñ ke ukperedem, “Edi Abasi akatua mi mbọm, koro ñkanamde emi ke unana ifiọk, ke ini mmenimke ke akpanikọ” (1 Timothy 1:13).
Edikwọrọ Ke Kpukpru Ebiet
Mme oku, ediana ye Paul, enam utọ akwa ukeme oro ndibiat ufọk-Abasi Christ ke Jerusalem, tutu ndusuk mme anditiene-Christ esuana. Edi ke ebiet ekededi eke mmọ ekade mmọ ekwọrọ ebaña Jesus. Ukọbọ oro ikanamke mmọ edop uyo. Utu ke ndibiat Eti-mbuk mfep, enye asuana oduk ediwak obio.
Ke ofuri Judaea ye Samaria, mme anditiene Jesus ema ekwọrọ ete ke Jesus ekedi Eyen Abasi, ndien ke Enye ama akpa onyuñ ọtọñọ ntak eset. Mmọ ñko ema etiñ ebaña ñkukut Christ ke ubọñ emi Stephen okokutde. Oro ama adiana ndisọñọ nnọ mmọ nte ke Jesus ke odu uwem; ndien ke Enye idighe aba suñ-suñ owo Galilee, owo Nazareth, edi Enye edi Christ ke ubọñ. Nso utọ Andinyaña ke mmọ ekenyene ndikwọrọ mbaña! Okposuk edi akakpade mmọ uwem mmọ, mmọ ema eka iso nditiñ nnọ mme owo ke kpukpru ebiet nte ke Jesus ekedi Messiah emi ekebetde ke anyan ini, Andifak Israel.
Philip Onim Edidemere ke Samaria
Deacon efen emi ekemekde ye Stephen ekekere Philip. Editọñọ Stephen ke itiat ikanamke Philip edighe, me etre edikwọrọ esie. Enye ama onyime eñwan oro, onyuñ aka iso ke edikwọrọ; ndien Abasi ebe ke enye anam utom, anam ikpọ utibe-ñkpọ. Se iketienede utom Philip, ekedi erikọk mbon-ụdọñọ ye ndedehe spirit ndiwọñọ ke idem mmọ oro ekedọñọde. Jesus ama ọdọhọ ete ke utọ mme idiọñọ emi eyetiene edikwọrọ Eti-mbuk, ndien Philip ke akpanikọ ama okut nte mme ikọ oro edide akpanikọ. Spirit Abasi ama odu enye ke idem, ndien mme owo ema enọ mkpañ-¬utọñ. Mmọ ema enem esit ndibọ etop akwa idaresit. “Akwa idara onyuñ odu ke obio oro.”
Eyen Abasi ekededi emi anamde akpanikọ enyene ntọtuñọ ekikere emem ye idara ke esit esie. Idara ye emem emi iduhe ke usuñ efen ibehe ke owo ndinyene erifen ke mme idiọk-ñkpọ. Abasi mme anditiene-Christ edi Abasi ima emi oyomde ñkop-uyo ye ukpono oto nditọ esie, emi ñko onyuñ añwañade ima ye mme edidiọñ ọnọ mmọ. Nnyin imadara ndikop uyo Esie, koro nnyin imade Enye. Jesus ama okot ata ñkpri nditọ ọnọ Idemesie onyuñ ọdọhọ ete, “Koro Obio Ubọñ Abasi edide eke oruk emi.” Adat nnyin esit didie nte ke Abasi nnyin amama nnyin onyuñ oyom ndinam nti ñkpọ nnọ nnyin kpukpru ini!
Mme abasi mme okpono-ndem itiehe ntem. Mme anditiñ ntiñ-nnim ikọ nsu etiñ enọ mme owo ete ke mmọ enyene ndinam ọburọbut uwa ye se midotke ndisuhọre iyaresit mme abasi mmọ; ndusuk ini edọhọ mmọ yak ewa nditọ mmọ. Ido ukpono mmọ awak ndiyọhọ ye ndik ke ini mmọ edomode ndineñere mme ukwañ-ñkpọ mmọ nnyuñ nda idaresit nsin ke esit mmọ. Edi kpukpru ini ñkukure se idude edi mfuhọ ye idot. Nnyin imadara koro nnyin imọfiọk eti usuñ, inyuñ ikeme nditiñ mbuk ima Jesus emi ọnọde nditọ Esie idara.
Mme owo emi ekekpañde utọñ ke se Philip ọkọkwọrọde ema enem esit etieti ndikop etop esie ndien ediwak ema enim ke akpanikọ se enye eketiñde. Enye eketiñ ọnọ mmọ abaña emem emi mmọ ekesiyomde kpukpru ini.
Mme Utibe-ñkpọ Satan
Ama odu owo emi ekekerede Simon emi ekesinamde mme utibe-ñkpọ ke otu owo ke Samaria oto ke odudu Satan. Mme owo ekekere ete enye ekedi abasi oto ke se enye ekesinamde. Edi idaresit ikoduhe ke nditiene enye. Enye ama otun mme owo usuñ ke abiaña emi okotode andidiọk. Idighe kpukpru owo emi enamde mme utibe-ñkpọ edi eke Abasi.
Ñwed Abasi etiñ abaña mbon ifọt, mbia-idiọñ, ye mme ebre-idiọñ, ye ntọt ete yak nditọ Abasi ekunyene ñkpọ ndinam ye mmọ. Odudu mmọ oto Satan, ndien nditọ Abasi inaha ekpañ utọñ enọ mmọ. Abasi ọdọhọ ete ke mmọ edi ọburọbut. Enye ọdọhọ ñko ete: “Mbufo ekukabare etiene ekpo, ekunyuñ ebup mbia-idiọñ, mbak mmọ edisabare mbufo: ami ndi Jehovah Abasi mbufo” (Leviticus 19:31).
Ke ini Simon, ebre-idiọñ ama okokut idara mme owo emi ekenimde ke akpanikọ ke abaña Jesus ye nte ekenyuñ enimde mmọ uduọk-mmọñ nte Jesus ekekpepde, enye onim ke akpanikọ ñko. Okposuk edi enye ọkọdọhọde ete ke imonim; onyuñ etiene odu ke mboho emi Philip okonimde ndibuana ke mme edidiọñ emi otode erinyaña ukpọñ. Mme ñkpọ emi Simon okokutde emi Philip akanamde ke enyiñ Jesus ema ekpon ekan ñkpọ ekededi emi akananam enye ekekemede ndinam.
Peter Ye John Ke Samaria
Ke ini mme Apostle ke Jerusalem ekopde ebaña akwa edidemere emi akakade iso ke Samaria, mmọ ema edọñ Peter ye John man ekeñwam mmọ. Okposuk edi ediwak owo ema ekebọ erinyaña ye edinam-asana oto ke ukwọrọ-ikọ Philip, enyuñ enim mmọ uduọk-mmọñ, baba owo kiet do ikọbọhọ kaña uduọk-mmọñ Edisana Spirit. Ke Peter ye John ema ekesim do, mmọ ema etọñọ ndibọñ akam ete yak kpukpru mmọ ebọ uduọk-mmọñ Edisana Spirit.
Se oruk mbono akam emi mmọ ekenyenede? Mbufa ndisana ikọt Abasi oro ekeyom eyọhọ mmimọ ye odudu Abasi, ukem nte ekedide ye mbet ke Usen Pentecost. Nte ekedi mmemem mmọ ñko ndinyene odudu oro?
Enọ Ofuri Obukidem
Joel, anditiñ ntiñ-nnim ikọ ama ọdọhọ ete: “Ndien ama ekem ke ini ñkpọ emi ebede, nyeñwaña spirit mi nnọ ofuri obukidem” (Joel 2:28). Peter ama etiñ ñko ete: “Koro uñwọñọ oro enyene mbufo ye nditọ mbufo ye kpukpru mmọ emi edude nsan-nsan, adaña owo nte Jehovah Abasi nnyin edikotde etiene Enye” (Utom Mme Apostle 2:39).
Idahaemi, edieke mbon Samaria emi edinimde ke akpanikọ edinyuñ eyak idem mmọ ofuri-ofuri enọ uduak Abasi, mmọ ñko, ekeme ndibọ uduọk-mmọñ uduọk-mmọñ Edisana Spirit. Nte mmọ ema etim eyom enye ye ofuri ifik? Mmọ ema eyom ke akpanikọ. Ndien ke Peter ye John ema ekebọñ akam ye mmọ enyuñ edori mmọ ubọk, mmọ ebọ Edisana Spirit. Nso idara ke owo enyene ke ini enye akabarede edi Itie-Ukpono Abasi ọnọ Edisana Spirit!
Idighe Ke Okuk
Simon ama okut nte Spirit Abasi okodorode ndisana owo emi oto ke ibọrọ akam Peter ye John, ndien enye okoyom ndinyene odudu oro mmọ ekenyenede. Enye okoyom ndikpe okuk man enyene. O, se nte enye ọkọdọñọde nnan ndikere nte ke imọ imekeme ndidep odudu Abasi ke okuk! Emi owut ete ke ata ediwak mme anditiene-Christ ekpedu ke ererimbot mfin akan nte edude ke emi edieke ekpekemede ndidep Erinyaña ukpọñ ke okuk. Edi nso edi okuk? Enye idibigike. Ekpededi gold ye silver eyebiara.
Se Abasi oyomde oto nnyin edi se ididude ke nsinsi: Spirit nnyin, uduak nnyin, ye ima nnyin. Ke nnyin ima inọ Enye oro, nnyin iyedi Esie ofuri-ofuri ke ñkpọ ekededi eke Enye oyomde ndinam ye nnyin. Peter ikenemke esit ye Simon esin enye ọkọdọhọ ete: “Okuk fo etiene fi atak, koro afo ekerede ete iyeda okuk idep enọ Abasi.”
Ediwak mme okpono Abasi ema ebiat mme ufọk-Abasi mmọ ke ndinam okuk edi akpan ñkpọ akan spirit Abasi. Jesus ọkọdọhọ ete “Mbufo ekebọ ke ikpikpu, enọ ñko ke ikpikpu.”
Utom nnyin edi ndikwọrọ erinyaña ukpọñ nnọ mme ukpọñ eke etakde, ndinọ ke mfọn se Abasi ọkọnọde nnyin. Ndien nnyin inyene ndidu uwem ke iso mme owo ke usen ke usen ke utọ usuñ emi mmọ edifiọkde ete ke nnyin idi mme anditiene-Christ. Ke ini nnyin inyenede mfikhe ke abaña utom Ọbọñ, ana nnyin inọ okuk ke ima-esit ndida ññwam ke utom oro. Anditiene-Christ enyene ndima Abasi eti-eti ndien enye onyuñ ọnọ ọyọhọ mbak duop ye enọ ima-esit esie ke idaresit.
Idorienyin okosuk ododu ọnọ Simon. Edieke enye akabarede esit, Ọbọñ eyediọñ enye. Enye ekeme ndinyene odudu emi enye okoyomde edieke enye ọnọde se Ọbọñ okoyomde oro edi, esit esie, ye uduak esie. Tutu osim usen mfin emi, owo ekeme ndibọ odudu oro, uduọk-mmọñ Edisana Spirit, edieke ema ekenam enye asana ke akpanikọ, enye onyuñ enim mme eñwọñọ Abasi ke akpanikọ, onyuñ esin ifik oyom ọyọhọ enọ oro.
Peter ye John ema enyọñọ Jerusalem ke mbono ama akasuana, ndien mbet eken ema eka iso ndikwọrọ ikọ ke ediwak mme obio iñwañ ke Samaria.
Questions
MME MBUME- Nso edi akpa ñkpọ emi eketiñde enọ nnyin ebaña Paul?
- Nso idi ntak emi Abasi akatuade Paul mbọm?
- Anie okonim edidemere ke Samaria? Nso idi ntak emi enye okodude ke Samaria?
- Didie ke mme owo ekedara enye?
- Anie ekedi Simon? Ndien nso ke enye okoyom?
- Nso ke mbon Samaria ekebọ ke Peter ye John ema ekesim do?
- Didie ke nnyin ikeme ndibọ odudu nto Abasi?