Lesson 291 - Junior
Memory Verse
IKỌ IBUOT: “Nam nnyin ifiọk ndibat usen nnyin ntem, man nnyin ida esit ifiọk idi” (Psalm 90:12).Notes
Ọbọñ Ekpere Ndiñwam
Mme owo oro ekewetde mme Psalm ema ekpep ndibuọt idem ye Abasi. Ekpededi David, Moses me, mme ewet-ikwọ efen, enye ama okut kiet emi enye ekemede nditiene ke ini nnanenyin esie, man okut uñwam.
Ke editọñọ ikọ Psalm 46, andiwet etiñ ete “Abasi edi ebiet ubọhọ nnyin ye odudu nnyin, Enye edi Andinyaña eke ekperede nnyin eti-eti ke nnanenyin.” Enye otim ekpere nnyin eti-eti man añwam ke ini ekededi emi nnyin ifioride ikot Enye.
Ke mme usen oro Nditọ Israel ekam esuk esañade eka isọñ Canaan, Moses ama ewet mme mbiet ikọ emi: “Nsinsi Abasi edi ebiet iduñ, nsinsi ubọk enyuñ edu ke idak” (Deuteronomy 33:27). Ndusuk ini ke nnyin idude ke nnanenyin, nnyin ikere ite ke ebọ nnyin kpukpru ñkpọ efep; ekeme nditie nnyin ke idem nte imọduọ, ndien etie nte ñkpọ isuhọke aba inọ nnyin. Edi ke nnyin ibuọtde idem ye nsinsi Abasi, mme ubọk Esie edu nnyin ke idak, ndien Enye idiyakke nnyin iduọ.
Abasi ọkọdọhọ Isaiah ete, “Edi ami ñkanam, onyuñ edi Ami ndimenere, ndinyuñ mbiom, nnyuñ nnam mbufo ebọhọ” (Isaiah 46:4). Ndien ke ini Paul ọnọde ñwed esọk akparawa ọkwọrọ-ikọ, Timothy, enye ọkọdọhọ ete: “Ọbọñ eyenyaña mi osio ke kpukpru idiọk ndunam owo, eyenyuñ ekpeme mi okosim obio ubọñ Esie ke heaven” (2 Timothy 4:18).
Abasi Ebiet-ubọhọ Nnyin
Ebiet-ubọhọ edi ebiet ifure, ebiet-udibe. Ke idut Oregon imenyene ediwak mme ebiet-ubọhọ emi ndiọi unam edude ke ifure ebọhọ ikañ mme ata-utop. Ke ndusuk ebiet-iduñ mme unam inaha nte ewot baba edop, ata akamba ebet, me, oruk mme inuen ntre. Osuk etie nte mme unam emi efiọk ebaña ubọhọ eke mmọ enyenede, oro anam mmọ eyọrọde nte emama, ke uwak ibat mmọ, ke mme akai ikọt, akpan-akpan ke ini utop ekemde, ke mmọ ekpewọrọde ekpọñ ebiet-ubọhọ mmọ, ofut akpadia mmọ.
Abasi oyom owo enyene ifiọk ete ke imọ imekeme ndikut ifure ke Ọbọñ. Satan ke otop mme owo ye mme idañ esie ke kpukpru ebiet, ndien ediwak mme unam-udia esie ifiọkke ebiet ekpekade man ekut ubọhọ. Edieke mmọ ekpekam esede ke Edisana Ñwed Abasi mmọ ekpekut, kpa nte andiwet Psalm okokutde, ete ke Abasi edi nsinsi ebiet-ubọhọ nnyin. Mmọ oro efehede ebine Abasi eyom uñwam, ekut emem enọ ukpọñ mmọ, emi okodude ke nnanenyin.
Nnyin ikemeke ndida mme enyin obukidem nnyin ñkut mme idañ eke Satan otopde, edi nnyin imekeme ndikut mfina eke mmọ ekamade. Kpukpru idiọk-ñkpọ, ukut, ufup, ntañidem, ye usua ewọrọ eto ke mme idañ esie. Ke ini mme ikpọ ekọñ esiahade, ndien mbon-ekọñ ke ñkañ mbiba etop ediwak ñkpọ-ekọñ, nnyin ifiọk ite ke akam edi Satan ọkọtọñọ ñkpọ emi ke nditop mkpri idañ mkpa esie.
Mme idañ oro ekeme ndimum nnyin, enyuñ eda mme idiọk ekikere, mme ikọ utọk, ye mme edinam ibuk esọk nnyin. Mme oruk ñkpọ emi idighe eke Abasi, nnyin inyuñ iyomke mmọ ke uwem nnyin. Nnyin idinam didie ibọhọ? Edi ndifehe nduk ke ebiet-ubọhọ nnyin, nsinsi Abasi. Iyip Jesus eyeyet kpukpru se Enye mimaha osio, efen ke mme idiọk-ñkpọ onyuñ emen ndiọi ekikere efep ọnọ kpukpru mmọ eke ebeñede Enye.
Ikopke Ndik
Ke nnyin itiede ke ifure ke ebiet-ubọhọ oro, nnyin inyeneke ntak ndifehe ndik. Jesus do ke ñkañ nnyin, “andinyaña eke ekperede nnyin eti-eti ke nnanenyin.” Andiwet Psalm ọkọdọhọ ete ke imọ ikemeke ndifehe ndik ekpedi nte unyek-isọñ onukde akwa obot ọduọk ke inyañ. Ediwak owo efehe ndik ke ekpri ñkpọ nnyekidem osimde mmọ. Kere baña nte mmọ ekpeyemede ọnọ ndik edieke mme obot ekpeduọñọde eduk inyañ! Ke ini unyek-isọñ akadade itie ke ekpri obio kiet, mmọ oro ekeduñde ke esit ema efehe ndik eti-eti, ndien ke otu ofuri owo edi akani añwan kiet kpọt eketie nte okop inemesit ke unyek-isọñ oro. Kpukpru owo ema ediọñọ enye, ndien ke akpatre owo kiet obup ete “Eka, nte ndik inamke fi?” “Ih ih,” ekedi ibọrọ esie, “Ami mmadara ndifiọk nte ke ami mmenyene Abasi emi ekemede ndinyeñe ererimbot.”
Andiwet Psalm ikefeheke ndik, ñko, ibaña oyobio ke inyañ. Enye okodori enyin ete ke Abasi ekeme nditiñ ikọ ndien mbufut mmọñ ana suñ. Enye ikoduhe ye Jesus ke ekpri ubom oro, ukem nte mbet ekedude ye Enye ke Inyañ Galilee ke ini Jesus ọkọdọhọde ete “Dobo, na suñ,” ndien oyobio okure; edi, kpa ye oro, enye ama ọfiọk ete ke Abasi emekeme ndinam ntem. Enye ama ekpep man ọfiọk Abasi emi akanamde inyañ ye isọñ, ndien nte enye esede mme ikpọ odut ye mme mbufut emi ekamade afia efot, mmọ etiñ ebaña odudu Abasi ndinọ mme ofum ye mme inyañ uyo. Ke itie Psalm kiet nnyin ikot ite: “Enye ọdọhọ, ndien oyobio edemere, onyuñ emenere odut esie... Enye anam oyobio odobo, ndien odut mmọ odop uyo” (Psalm 107:25, 29).
Eyarade Odudu Abasi
Akwa usen kiet ke edi emi ofuri ererimbot edikutde inyuñ ifiọkde odudu Abasi. Ke ini uyo Esie edisiorode, isọñ eyetara ọnọ ufiop ikañ. Kpa Uyo oro eketiñde ikọ ndien ererimbot ọwọrọ odu eyetọñọ ntak abiat enye efep ke usen ikpe.
Edi mbemiso ebiat ererimbot efep, eyedu ini emem ke isọñ emi. Ke Psalm emi, nnyin ikop ikwọ emi abañade Tọsin Isua Ukara Christ kiet, ini emi Ọbọñ edinamde kpukpru ekọñ edop. Owo baba kiet ikemeke nditre mme ekọñ, ekpededi mme esop eke ediwak owo etode nsio-nsio idut edibono. Edi Jesus emekeme. Ndien ke Enye edide nditre mmọ, eñwan ididuhe aba. Ke usen oro, Enye eyewut kpukpru mme idiọk owo ye mmọ oro minimke ke akpanikọ ete ke Imọ imokpon eti-eti ke odudu, ñko ke Imọ ikara ofuri ererimbot.
Baba mbọñ me mmọ oro ekarade ke ọkpọsọñ ubọk ye ñsọñ-esit iduhe emi edikemede ndida ke iso Jesus, Edidem nnyin ke ini Enye edidide. Eyebiat odudu mmọ ofuri-ofuri ke adaña oro mmọ ekopde uyo eto Heaven, ndien Christ edi man owuk ebekpo Esie ke isọñ emi. Nnyin, nte mme Anditiene-Christ, ima ibebem iso inyene Ọbọñ mme udim ye nnyin. “Abasi Jacob edi ubọhọ nnyin.”
Idorienyin Nnyin
Uwem nnyin ke isọñ emi edi ata esisit ke idade enye idomo ye nsinsi ini. Ata akpan ñkpọ emi anade nnyin ke iso mfin emi edi nnyin ndineñere mfiọk nte ke nnyin imebeñe idem ibet uwem eke ini iso. Mmọ oro enamde mbeñeidem man edikara ye Christ iyakke ñkpọ ndomo kiet ke ererimbot emi ọbiọñọ mmọ ndikpono nsinsi Edidem.
Peter, owo-mbet okoyom ererimbot oro ayamade akan, onyuñ ọfọnde akan, ndien, enye ekewet ete: “Edi nnyin itie ibet obufa enyọñ ye obufa isọñ, nte uñwọñọ Esie edide; ndien edi do ke edinen ido ediduñ. Mmọdo ndima, sia mbufo etiede ebet mme ñkpọ emi, enyene ifik ndien, man Enye okposim mbufo nte etiede ke emem, enana ntọi, enyuñ enana ndo ke enyin Esie” (2 Peter 3:13, 14). Nnyin iyom ndiduñ ke obufa ererimbot emi kpukpru ñkpọ ediyede, enyuñ efọnde ema, edi nnyin imenyene ñkpọ ndinam man inam idem nnyin efọn ekem ndiduñ do. Baba idiọk-ñkpọ me ibak iduhe do, ntre enyene ndinam nnyin isana ke ofuri idiọk-ñkpọ nnyin mi, oto ke Iyip Jesus, mbemiso nnyin idot ndiduk ke itie ubọñ oro.
Ke Psalm Moses emi, enye ọkọbọñ akam ete, “Nam nnyin ifiọk ndibat usen nnyin ntem, man nnyin ida esit ifiọk idi.” Eyak nnyin ikere ibaña isua uwem nnyin mi, ndien inam ñkpọ ke usen ke usen nte odorode nnyin udori. Ndusuk owo enam ñkpọ etie nte mmọ ekere ete ke mmimọ ididuñ ke isọñ emi ke nsinsi, ndien ntak iduhe baba kiet mmọ ndinam mbeñeidem ndisobo ye Abasi. Edieke idude uwem nnyin ke usen ke usen ke ido eke owutde ete ke nnyin imonim ke akpanikọ ite ke Jesus ọmọñ edi ke utit usen oro, nnyin iyetim ikpeme edu nte nnyin inamde mme ñkpọ man ikuyat Enye esit.
Nnyin ifiọkke me uwem nnyin ekeme ndibe mfep oto ke unọmọ, me udọñọ, ndien ana nte nnyin ida ke iso Ọbọñ. Uwem edi ñkpọ eke minyeneke iwuk, edi mkpa enyene ndida itie, ibọhọke Jesus edi man edida nnyin ọnyọñ ke akpa ifet. Nnyin iyom ndidu uwem kpukpru usen man oto do nnyin ikufehe ndik ndiwọrọ ñkpọñ ererimbot emi.
Nte Mbuk Emi Ebukde
Edieke nnyin ikpekemede ndidu uwem nsim isua 70 me 80, nte Moses ekewetde, oro ọniọñ adaña didie ke emende enye edomo ye nsinsi ini? Moses ọkọdọhọ ete ke adaña anyan ini uwem oro akakam etie “nte mbuk eke ebukde.” Owo ekeme nditiñ mbuk nnọ fi, ndien afo efre enye kpa idaha-oro. Ndusuk edieke enye enemde, afo emekeme nditi enye ke esisit ini; edi inamke ukpuhọre ke uwem fo.
Kere baña anana ibat ntantafiọñ emi Abasi esede mmọ onyuñ omumde akama ke itie mmọ nte mmọ esuk ekanare ntre ke ofum. Kere baña anana ibat owo emi ekeduñde ke isọñ emi ke isua 6,000 emi ekebede. Owo kiet edi nso ke otu udim owo oro, ke adaña ibat ini oro? Ibọhọke nnyin inam ata akpan ñkpọ, baba owo kiet idifiọkke, me ndikekere, mbaña ke ofuri isua ikie, me akande oro, me akananam nnyin ima idu. Idem mme mkpọsọñ owo ekam esiti mmọ ke ata esisit ini.
Ekpedi mme idut mmọ ewọrọ etop ndien eduọ, enyuñ efre ebaña mmọ Abasi ọkọdọhọ ete: “Sese mme idut ebiet ntọi mmọñ ke abañ, enyuñ ebat mmọ nte obu ke balance: Sese, enye eyemen mme isuo nte ata ekpri ñkeñe” (Isaiah 40:15).
Esie Ke Nsinsi
Ke nnyin isede idem nnyin ibe ke mme nsio-nsio uwut-ñkpọ oro, nnyin ikut ite ke akpanikọ, nnyin imekpri, inyuñ idighe mme ọwọrọ-iso owo. Edieke uwem nnyin ke isọñ emi edisopde nte ntuhube ke ikpa-enyọñ, mme nte mbiet eke ọkọride ke usenubọk ndien esibe enye eduọk ke okoneyo; ndien edieke edibiatde mme utom ubọk nnyin mi efep, nso ñkpọ, ndien, idi akpan ñkpọ? Nso ñkpọ ibighi? Nso idi ntak emi nnyin idude mi?
Jesus okobot nnyin ọnọ Idemesie, man iduñ inyuñ ikop inem nsinsi ini ye Enye. “Koro Afo okobotde kpukpru ñkpọ; ndien oto uduak Fo ke mmọ edu, ekenyuñ eboro” (Eriyarare 4:11). Uwem nnyin mi edi man ibeñe idem ibet akamba ubọñ eke ererimbot efen emi edide ke iso, emi edinyuñ ebighide ke nsinsi.
Uwem nnyin ke isọñ ekeme nditie “nte mbuk eke ebukde”, edi Abasi nnyin odu ke nsinsi. Nsinsi Abasi oro edi ubọhọ nnyin. Enye edi Idorienyin nnyin, Erinyaña nnyin, Andidọñ nnyin esit, Andikpeme nnyin. Ke Enye nnyin ikut idara idahaemi, ndien nnyin iyetim ifiọk uyọhọ idara eke uwem nsinsi.
Moses ọkọbọñ akam ete, “Nọ nnyin ima fo ke usenubọk yuhọ.” Ekeme ndidi etiñ oro ebaña ini uyen. Mbọm Abasi etiene nnyin ọtọñọde ke uyen nnyin. Nnyin nte nditọwọñ ye mkparawa imokop uyuhọ oto ke ima Esie ye nnyin ke nnyin iyakde esit nnyin inọ Enye ọtọñọde ke ini uyen nnyin.
Moses ñko ama ọbọñ akam ete yak mme utom ubọk nnyin ewọrọ esọñ eda. Enye okoyom ndinam mme ñkpọ eke miditaha ikañ ke ini Jesus edidide. Mme ñkpọ eke nnyin inamde inọ Jesus, koro imade Enye ye ikọt Esie, eyebighi ke nsinsi. Utom efen iduhe eke okponde akan ndikọ ukpọñ nnọ Jesus. Oruk utom ntre ebiet silver ye gold emi ikañ midibiatke edi, akam anam mmọ esana enyuñ efọn ekan. Daniel, anditiñ ntiñ-nnim ikọ ekewet ete ke mmọ emi ekọde mme ukpọñ enọ Christ eyeyama enyuñ “ebiet ntanta-ọfiọñ ke nsinsi-nsinsi” (Daniel 12:3).
Yak nnyin kiet-kiet ibeñe idem ke ini uyen nnyin ibet ubọñ eke edidide. Ke ido ntem ke nnyin idiyuhọ mi, inyuñ ikop inem ndikara ke nsinsi ye Ọbọñ ye Edidem nnyin.
Questions
MME MBUME- Nso idi ubọhọ?
- Anie edi ubọhọ ọnọ anditiene-Christ?
- Nso idi ñkpọ eke nnyin ibọhọde ke ini idude ke ifure ke ebiet-ubọhọ?
- Nnyin inyene ndika ke mmọñ man ikut Jesus?
- Ini uwem eke Abasi ọñwọñọde ọnọ nnyin ọniọñ didie?
- Oro ọniọñ didie, ke edade edomo ye nsinsi ini?
- Moses ọkọdọhọ nnyin inam nso ye ofuri usen nnyin?
- Nso utom edisọñọ eda ke nsinsi?