Lesson 292 - Junior
Memory Verse
IKỌ IBUOT: “Mbufo eka ekenam kpukpru mme idut edi mbet Mi, enim mmọ baptism esin ke enyiñ Ete ye Eyen ye Edisana Spirit” (Matthew 28:19).Notes
Enam Mme Utibe-Ñkpọ
Ema ekwọrọ mkpọsọñ ikọ Abasi emi ekesañade ye mme ikọ-ntiense emi ekedemerede esit owo ke akwa mboho edidemere ke Samaria. Ema enyuñ enim ederi uduọk-mmọñ ñko, emi etide nnyin abaña mme mboho utit isua emi esidade itie ke Portland, Oregon. Ke utit mboho mme ọkwọrọ-ikọ ye mme anam-utom ke iñwañ utom Abasi efiak enyọñ ufọk mmọ, man ekeka iso ke utom edisuan Eti-mbuk.
Owo emi ọkọkwọrọde ikọ ke Samaria ekedi Philip, emi ekefiọkde nte Deacon ọkọ-ukpọñ. Nnyin imeti ite ke enye ekedi kiet ke otu mmọ oro ekemekde nditiene nse ñkpọ mbaña ufọk-Abasi. Ata anditiene-Christ edi enye emi ebeñede idem kpukpru ini ndinọ ubọk uñwam ke ñkpọ ekededi.
Mme owo ye esit kiet ema ekpañ utọñ ke ukwọrọ-ikọ Philip, ndien mme utibe-ñkpọ ema eda itie ke mme mboho emi: ema ekpọk mme owo eyak ke ebuka edidehe spirit, mbon-udọñọ ye mbuñọ ema ebọ erikọk. Philip ekedi ete nditọ iban inañ emi eketienede ekwọrọ ikọ ñko.
Adaha Aka Ke Akpa-utatan
Usen kiet, angel Abasi ama osobo ye Philip onyuñ ọdọhọ enye ete aka usuk-usuk akpa-utatan, emi ekekerede Gaza. Ekeme ndidi enye ama ekere ete oro ọwọrọ ubiat ini ndisuhọre ñka ebiet oro; me ndibup ete, Nso idi ntak? Nte ediwak nditọ esimade ndinam. Enye ikebupke angel mbume ke abaña uyo oro ọkọdọhọde enye aka, edi, kpa nte Abraham akanamde, enye ama adaha “ọwọrọ aka, ifiọkke ñkañ eke enye akade” (Mme Hebrew 11:8).
Nte nnyin ikpekeme nditiene Ọbọñ mfin ikereke nte ñkpọ editiede? Nte nnyin imebeñe idem ndidọhọ nte “Ọbọñ wọñọre uduak mi nim ñkañ-ñkañ edieke enye mikemke ye uduak Fo ke abaña mi?”
Philip ama asaña ediwak itiat emi anamde owo okop mmem-idem. Ndusuk ofuri isañ esie ekedi ke mbuọtidem eke enye akasañade. Nte enye osuk asañade aka ntre ke udọñ esie okpon akan. Akpa-utatan ama ofiop akan nte esidide, edi ko ke isọñ esit esie, enye ama okop udọñ ndika ebiet eke Ọbọñ ọkọdọñde enye.
Mbon-isañ isiwakke ke usuñ akpa-utatan; edi sese ke iso, nte ukpat-ñkpọ asañade ekpere. Spirit ọdọhọ Philip ete, “Saña kpere kadiana chariot oro,” Enye efehe ebine ukpat-ñkpọ, ndien sese enye okut owo eunuch nte okotde Edisana Ñwed Abasi nte enye etiede ke ukpat-ñkpọ esie. Onyuñ obup ete, “Nte ọmọfiọk se ikọ oro okotde ọwọrọde?” “Ñkeme didie ke owo mitemeke mi?” edi ibọrọ owo emi edide andikama kpukpru okuk Edidem añwan ofuri Ethiopia.
Eunuch edi owo emi esimade ndidọñ enye akpan utom, ñko eyighe iduhe ite ke enye ekedi ata eti owo. Ekeme ndidi enye ama okop ñkpọ abaña ndutuhọ ye mkpa Jesus ke Jerusalem emi akadade itie ke ñkpọ nte isua kiet mbemiso ini emi. Kpa ye oro, nte enye osuk okotde ñwed Isaiah, enye iketimke ifiọk ete ke imọ ikot ibaña Jesus. Enye okoto ke Ethiopia edi ndituak ibuot nnọ Abasi ke Temple ke Jerusalem, edi enye ikekwe se esit esie okoyomde. Philip, ọkwọrọ-ikọ, ama atat inua esie onyuñ ọkwọrọ abaña Jesus, onyuñ owut owo eunuch emi ete Jesus ekedi enye emi Isaiah, anditiñ ntiñ-nnim ikọ eketiñde abaña.
Utom Nnyin
Okposuk edi nte Philip okodude ikpọñ ke akpa-utatan, enye ikebiatke ini nditiñ ñkpọ mbaña Jesus. Nte afo amanam kpukpru se ekemede ndiwut mme anam-idiọk usuñ erinyaña? Nte odu eyen eren me ñwan ke ufọk-ñwed emi enyenede udọñ ndifiọk Jesus, ndien ketiñ, nte eunuch “Ñkeme didie ke owo mitemeke mi.” Yak nnyin iduñọre uwem nnyin inyuñ itim ifiọk ite ke nnyin iduọkke baba ifet kiet ndinam mmọ efen efiọk Jesus. Ekeme ndidi Ọbọñ ke ọdọhọ owo ekededi mfin ete, “Daha ke enyọñ, saña ke edem usuk usuk”, oro edi, ke ikọ efen, “Ka ke ọtọ eke ndidọñde fi man okosobo ye ukpọñ emi okopde biọñ.”
Imokop mbuk ibaña nneme emi ikerede ite amada itie ke ufọt Jesus ye Gabriel. Etie nte mmọ eketiñ ñkpọ ebaña usuñ ndisuan Eti-mbuk ke ini Jesus ama ọdọk etiene Ete Esie emi odude ke Heaven. Jesus ama ọdọhọ Gabriel ete ke Imọ imayak enye inọ mbet ndika nketiñ nnọ ererimbot mbaña Christ. Ndien Gabiel ama obup, “Nso iditibe edieke mmọ minamke?” Ndien, nte mbuk oro akade iso, ibọrọ Jesus ekedi, “Nnyeneke usuñ efen.”
Mme ufan ke Christ, edi utom nnyin nditiñ mbuk Jesus nnọ mme ukpọñ eke edude ke ekim. Nnyin iyomke ndisobo ke itie ikpe Christ, ndien ikut owo emi nnyin isikutde kpukpru usen ke ufọk-ñwed ye ke itie-utom, me ke efak, nte anyande nnyin ubọk ke iso onyuñ ọdọhọde ete, “Afo ukutiñke ñkpọ unọ mi ubaña Jesus; afo ukukotke mi ete ndi ika ufọk-Abasi.”
Edinim Emi Otode Esit
Ukpat-ñkpọ ke osuk aka iso ye Philip ye owo eunuch ke esit. Ini kiet, uñwana ama asiaha oduk ke ukpọñ asaña-isañ owo Ethiopia. Mmọñ odu ke iso esie. “Se mmọñ mi; nso ibiọñọ mi ndina uduọk-mmọñ?” ekedi mme ikọ emi obufa owo emi akabarede esit eketiñde. Philip ọbọrọ ete, “edieke afo onimde ke akpanikọ ke ofuri esit fo, afo emekeme.” Edi akpanikọ ete owo eunuch akada ofuri esit ndien enye ekeme ndidọhọ ete, “Mmonim nte Jesus Christ edi Eyen Abasi.” Idaresit esie ama ọyọhọ. Enye ama enyene ebuana ye Enye emi Isaiah ekewetde ete, “Enye onyuñ obiom mme idiọk ido ediwak owo” (Isaiah 53:12).
Edina Uduọk-Mmọñ
Nnyin imotim ifiọk ite mbume ikoduhe ke abaña ido ye edu nte ekpenimde owo uduọk-mmọñ, nte edide ido mfin emi. Nnen-nen usuñ kiet odu, oro edi usuñ nte Ñwed Abasi etemede. Okposuk edi oro ediwak usuñ ndinim owo uduọk-mmọñ odude ke ererimbot, edieke mme mbume edude ke abaña akpanikọ emi nte Ñwed Abasi ekpepde, enye enyene ndiyom ibọrọ nto ikọ Abasi, enye eyekut ibọrọ do. Ke ini ebukde owo ke mmọñ, oro ada ọnọ mkpa, edibuk ye eriset ke mkpa ye Christ (Ñwed Mbon Rome 6:3, 4). Edi mmọ eke ekpade ke ebuk, ndien onyuñ edi mme owo emi ema ekekpa ewọrọ ekpọñ idiọk-ñkpọ, ererimbot, obukidem ye Satan, enyene unen ndibuhọ ke uduọk-mmọñ. John okonim Jesus uduọk-mmọñ. Akpatre utom emi enye ọkọdọñde mbet ekedi, “Mbufo eka ekenam kpukpru mme idut edi mbet Mi, enim mmọ uduọk-mmọñ esin ke enyiñ Ete ye Eyen ye Edisana Spirit” (Matthew 28:19).
Ewe ndise emi owutde nnennen usuñ nte enimde uduọk-mmọñ añwaña akan se ewetde ke Utom Mme Apostle 8:38. “Mmọ mbiba Philip ye Eunuch oro, enyuñ esuhọre eduk ke mmọñ; ndien Philip onim enye uduọk-mmọñ.” Ufañ-ñwed emi etienede etiñ ete, “Edi ke adaña emi mmọ etode ke mmọñ ewọrọ edọk, Spirit Jehovah ada Philip adaha, eunuch inyuñ ikwe enye aba”.
Ukpat-Ñkpọ Eti-mbuk
Ekeme ndidi idem ama akpa eunuch oro abaña nte enye mikekwe Philip aba, edi, okposuk edi oro enye mikekwe andikpep esie, enye ama okut Messiah. Enye ikananake ifiọk aba ke abaña Owo Ukut, emi enye okokotde abaña. Christ ama anam ukpọñ esie ọwọrọ ufin.
Ukpat-ñkpọ okosuk akaka iso awat owo eunuch aka isọñ Ethiopia ye Eti-Mbuk Erinyaña. “Ukpat-ñkpọ Eti-mbuk” ke akaka iso ndisọsọp nsuan etop idorienyin nnọ kpukpru owo. Mmọ emi eyomde uwọrọ-ufin idiọk-ñkpọ, mfuhọ ye afanikọñ ekeme nditiene ñwat ke ukpat-ñkpọ emi nnyọñ ufọk mmọ ye idara.
Questions
MME MBUME- Philip okodu mmọñ ke ini ekenọde enye aka Gaza?
- Owo eunuch akaka nso ke Jerusalem?
- Nso ke enye akanam ke ini Philip okosobode ye enye ke akpa ifet?
- Nte enye ama enem esit ndikut Philip?
- Ewe itie ke Ikọ Abasi ke enye okokot?
- Nso akamba ukpuhọre okoduk ke uwem esie?
- Tiñ se ikotibede ye Philip ke enye ama okonim, owo eunuch uduọk-mmọñ ama?
- Nso akpan ukpep-ñkpọ ke nnyin ikeme ndida nto mbuk emi?