Lesson 294 - Junior
Memory Verse
IKỌ IBUOT: “Koro ñkpọ iduhe eke efukde fuk emi midiyarakere; ñkpọ inyuñ iduhe eke edipde dip emi owo midifiọkke” (Matthew 10:26).Notes
Mme Idiọk-Ñkpọ Jeroboam
Ediọñọ ndusuk mme owo emi edude ke Ñwed Abasi eto mbuọtidem mmọ, ndusuk eto ke ime mmọ, ndusuk ñko ediọñọ eto mme ikpọ edinam mmọ. Edi ediọñọ ndusuk eto ke ndudue ye ebiọ mmọ. Eyeti Jeroboam kpukpru ini eto ke enyiñ esie, emi enyenede ebuana ye ikọ ition: “emi okonyuñ anamde Israel ediọk.” Efiak esọñọ mme ikọ emi ke itie efurenañ ke Ñwed Abasi emi abañade Jeroboam. Nso ikọ mfuhọ ke etiñ ebaña enye emi ekpekedide ada-usuñ ikọt Abasi emi akanamde akpanikọ! Nnyin imeti ite ke ekedi Jeroboam akanam eyen enañ gold iba onyuñ anam uwa ọnọ mmọ onyuñ ọdọhọ mme owo ete ke akak mmọ ndika ke Jerusalem ndikpono Abasi; ke ntre mmọ ñko ekpono nditọ enañ gold.
Ikedighe Nditọ Israel ikpọñ ekenyene unọmọ ke idiọk-ñkpọ idiọk owo emi, edi kpa ye ufọk esie ema enyene unọmọ ñko. Yak nnyin iti kpukpru ini ite ke uwem eke nnyin idude enyene ñkpọ ndinam ke uwem mmọ emi nnyin inyenede ebuana ye mmọ. “Koro baba owo nnyin kiet iduhe uwem inọ idem esie, baba owo kiet inyuñ ikpaha inọ idem esie” (Ñwed Mbon Rome 14:7). Nnyin ikot ke Ñwed Abasi, “Eyediọñọ idem eyenọwọñ ke ido esie, mme se enye anamde asana, mme onyuñ enen” (Mme Ñke 20:11).
Ndiyom Item
Idahaemi nnyin imokut nte eyen Jeroboam ọdọñọde. Ndien Jeroboam oyom ñwan esie ọkpuhọre idemesie onyuñ aka ke ọtọ Ahijah, anditiñ ntiñ-nnim ikọ emi okodude ke Shiloh man obup abaña me eyen esie eyekop nsọñ-idem. Ye ata ediwak mme enọ, emi ekedide ido ke ini oro ke adaña emi ekade ndibup anditiñ ntiñ-nnim ikọ ñkpọ, eka emi ekenyenede mfina ama ọtọñọ isañ esie ndiyom owo Abasi. Anditiñ ntiñ-nnim ikọ Abasi emi ekedi nnan, ke ntak emi ikpanaha nte ñwan Jeroboam ọkpuhọrede idemesie; edi enyin spirit esie; ama ọsọp ndidiọñọ kpa ye ikpat isañ ñwan emi. Mme “utọñ” esit esie, ñko, ikekopke mmemidem; Koro uyo Abasi ama etetiñ ikọ onyuñ ọdọhọ enye ete ke ñwan oro ke ededi ke usuñ, onyuñ etiñ ọnọ enye se enye editiñde inọ ñwan oro.
Andiyarare Kpukpru Mme Ndibe-ñkpọ
Abasi esiyarare mme ndibe-ñkpọ, me ñkpọ emi efukde-fuk ọnọ ikọt Esie. Mkparawa iren iba ema ebom usuñ ufọk eduk ufọk ini kiet enyuñ eyip okuk ke ini mmọ ekefiọkde ete ke mbon-ufọk oro ema eka ufọk-Abasi. Ke ini mbon-ufọk oro ema ekenyọñọ edi, mmọ ema ekut ete ke inọ ama oyip mmọ, eka ama etiñ ini kiet ete ke imọ imọdiọñọ mmọ emi ekeyipde okuk oro. Ke ndañ nsiere, mme ada-idaha eka ekesobo ye nditọ oro enyuñ eyom mmọ eyarare se mmọ ekenamde. Ke ini edade mmọ eka ke iso mmọ emi mmọ ekeduede, nditọ iren oro ema eyom ndifiọk ntak emi ekerede ete ke edi mmimọ. Eka oro ama ọdọhọ nditọ iren oro ete ke edi Abasi emi odude ke Heaven okowut imọ enye emi ekeduede. Enye onyuñ ọdọhọ mmọ ete yak mmọ eti kpukpru ini ete ke Abasi okut kpukpru ñkpọ eke mmọ enamde. Enye ñko onyuñ enyene usuñ ndiyarare mme ñkpọ oro nnọ owo Esie. “Ke akpanikọ Abasi mbufo edi Abasi mme abasi ye Ọbọñ ndidem; edi enye ayarare ndibe-ndibe ñkpọ” (Daniel 2:47).
Ñwan Jeroboam ikoyomke owo ndimen enye ñwut ke akpanikọ, enye ikenyeneke-nyene ufañ nditiñ ikọ. Edi Anditiñ ntiñ-nnim ikọ Abasi ikpọñ eketiñ kpukpru ikọ, onyuñ asua ọnọ enye ata eti-eti ke enye ndikpuhọre idemesie. Enyọñ-enyọñ ido mbubik ekeme ndibiaña ererimbot; ndusuk owo ekeme nditie nte “ekutde unen” ke “ndibiaña” mbio efen ke se ibañade edu-ukpono Abasi. Ndusuk owo ñko ekeme ndikut unen ke ndibiaña mme ọbọk-erọñ mmọ me ọkwọrọ-ikọ Abasi ke ndinọ mme enọ me ndiñwana ndiwut idem nte ke idi ñkpọ ke mmọ midighe, edi Abasi emi odude ke Heaven okut kpukpru ñkpọ, ke usen kiet eyeda enye ọwọrọ ke añwa.
Nso utọ ndisime ndikere nte ke enyin owo Abasi ikemeke ndikut mbe ekpri mfefere ewura emi owo esinede! Ata eyen Abasi emi anamde akpanikọ inyeneke baba ñkpọ ndomo kiet ndidip me ndifuk. Uwem esie edi ana iñwan ñwed, emi kpukpru owo ekotde enyuñ efiọkde (2 Corinth 3:2). Enye ikemeke ndifehe ndik me ndikop but ke ini osobode ye anditiene-Christ efen me anam-idiọk.
Etop Ahijah
Ahijah ama ọdọhọ ñwan Jeroboam ete ke imọ imenyene “mkpọsọñ ikọ” inọ enye, me ke ikọ efen, ata idiọk etop. Enye ama ọdọhọ enye afiak ọnyọñ onyuñ eketiñ ọnọ ebe esie ete ke Ọbọñ Abasi Israel ọkọdọhọ ete sia enye nte edidem emi akarade mme owo minyimeke ndinim mme mbet Abasi, edi akabarede anam idiọk ke ndinam mme abasi efen onyuñ otopde Ọbọñ ọduọk ke edem esie, Imọ iyeda idiọk itiene ufọk Jeroboam. Owo idibukke owo eke edikpade. Mmọ eke edikpade ke obio, ebua eyeta mmọ; mmọ eke edikpade ke obio iñwañ, mme inuen eyeta mmọ. Ndien enye ọdọhọ ete, “Afo daha ke enyọñ ndien ka ke ufọk fo: adaña emi ukot fo odukde ke obio, eyen oro eyekpa.” Ibọrọ esie ekedi oro!
Ama edi eke Nditọ Israel akana nte edibede mmọ ofuri-ofuri efep ke eti isọñ, oro ekedi se Ahijah eketiñde; akana nte esuan mmọ edọñ ke anyan ebiet. Ke akpatre ntiñ-nnim ikọ esie, enye ama ọnọ ubiere-ikpe emi akasañade ye mfuhọ, “Enye (Jehovah) eyeyak Israel ọnọ, abaña mme idiọk ido Jeroboam emi ọkọdiọkde emi okonyuñ anamde Israel ediọk.”
Ikọ Abasi Ama Osu
Ke akpanikọ, ekeme ndidi ye ndodobi esit ke eka eyen emi ọkọtọñọ ndisaña nnyọñ ufọk. Eyen esie Abijah ekenyene ndikpa, ofuri ufọk esie ñko ekenyene ndikpa, ndien owo ibukke mmọ baba kiet. Ke ini enye osimde enyin usuñ ufọk esie, eyen esie ama akpa. Edi nte ededi, eyen-eren emi ekedi ñkukure eyen ke ofuri ufọk Jeroboam emi akanade nte enyene udi, koro ema ekut ndusuk nti ido Abasi ke enye. Nnyin ikot ite ke ini ukara edidem Asa ema ewot kpukpru mbon ufọk Jeroboam baba owo ndomo kiet ikosuhọke “baba se iduọkde ibifik, inọ Jeroboam, edi osobo enye ama, ekem ke uyo Jehovah emi enye akadade inua Ahijah Shilonite owo esie ọdọhọ” (1 Ndidem 15:29).
Kpukpru nnyin imọdiọñọ ite ke Nditọ Israel, mme Jew, ema esuana ke ofuri ererimbot. Ikọ Abasi kpukpru ini enyene ndisu, edi baba idiọk-ñkpọ emi ufen miditieneke iduhe.
Questions
MME MBUME- Nso itie ukara ke Jeroboam akakama ke ini emi?
- Nso idi ntak emi Jeroboam ọkọdọñde ñwan esie utom ke ọtọ anditiñ ntiñ-nnim ikọ oro?
- Ahijah akasaña didie ọfiọk ete ke ñwan Jeroboam kedi ndikut imọ?
- Didie ke ekeme ndida Jeroboam ndomo ye David?
- Tiñ ibio-ibio ubiere-ikpe emi okosimde ufọk Jeroboam. Emi okosimde Israel.
- Nso ikotibe ye eyen-eren Jeroboam emi ọkọdọñọde?
- Nso idi ntak emi akanade nte ebuk eyen emi?
- Tiñ baña mmọ efen ke Ñwed Abasi emi ekedomode ndidip idiọk-ñkpọ.