Lesson 296 - Junior
Memory Verse
IKỌ IBUOT: “Ndom-uyo inyuñ ikureke ke abañ, aran inyuñ itreke ke ekpeme, ekem ke uyo Jehovah” (1 Ndidem 17:16).Notes
Idiọk-Ñkpọ Ye Anam-Idiọk
Ke ñwed Genesis nnyin imokot nte idiọk-ñkpọ owo okokponde eti-eti ke isọñ tutu Jehovah atua mkpọfiọk koro Enye akanamde owo. Enye ọdọhọ ete, “Nyesọhi owo emi mbotde mfep” (Genesis 6:7). Nnyin imeti nte ikekpepde ñkpọ ibaña Mmọñ Ukwọ emi kpukpru owo eketakde ibọhọke Noah ye ufọk esie. Abasi osuk ayayat esit ke abaña idiọk-ñkpọ, ndien usen kiet Enye eyetọñọ ntak ọdọñ nsobo etiene mme anam-idiọk. Ke ukpep-ñkpọ mfin, nnyin ikpep nte Edidem Ahab ọdiọñde “anam se iyatde Jehovah Abasi Israel esit, akan kpukpru ndidem Israel oro ekebemde enye iso” (1 Ndidem 16:33).
Elijah, anditiñ ntiñ-nnim ikọ, anam-akpanikọ owo Abasi, emi nnyin idikpepde akpan-akpan ibaña, ama akabare enyene akwa mbiomo abaña idiọk-ñkpọ ye ukpono-ndem ke Israel. Usen kiet enye ama asian edidem, inyuñ ifeheke enye enyin ete, “Ma uwem Jehovah Abasi Israel, emi ndade enye ke iso, mbara ye edim ididuhe ke mme isua emi, ke mitoho ke uyo mi” (1 Ndidem 17:1). Akana nte etre ndinam idiọk-ñkpọ, Elijah ama onyuñ onyime ndibọ ufen, edieke odotde, man ekeme ndinam mme owo efiak etiene Abasi.
Emum Edim Ekama
Nnyin ikpenyene didie esit ekọm ke abaña mme owo emi esọñọde eda ke idaha mmọ nte mme abak Abasi ke edinen-ido! Moses emenere esañ esie ke enyọñ inyañ, ndien mmọñ abahare (Exodus 14:21); owo efen emi ekedide Joshua, ama ọnọ utin ye ọfiọñ uyo, ndien mmọ etuak eda. Elijah ama etiñ ikọ, ndien kpukpru edim kpa ye mbara ema etre. Enye ama ọfiọk ete ke Abasi eyemum edim akama. Edi akana nte edomo mbuọtidem esie. Unana edim kpukpru ini esida unana udia edi, ndien akañ ke isọñ Israel eyenyuñ osim enye ñko. Nte afo emekeme ndibuọt idem ye Abasi, Elijah?
Abasi ama odu ke ebiet oro nditiñ nnọ enye ebiet emi enye edikade, ke emi kpukpru ñkpọ ema ekesat ekure, udia onyuñ akabade anana. Idiọk edidem okosuk oyoyom Elijah. Ke akpanikọ edidem ama ọdọhọ ete, “Afo edi ntak unana-edim emi.”
Elijah ama odibe nte ọfọnde ọbọhọ edidem, ñkpọ onyuñ ọfọn ye enye eti-eti, koro enye ọkọñwọñde mmọñ oto idim, onyuñ ata uyo ye unam emi mme utere ekesidade esọk enye ke kpukpru usen ubọk ye mbubreyo. Nnyin imonim ke akpanikọ ite ke edi Abasi eketeme mme utere ebiet eke mmọ edikutde udia. Edi bet, koro mme usen edidomo ke edi ke iso. Mmọñ ke idim ama ọtọñọ ndisat nsit-nsit, tutu usen kiet baba ntọi mmọñ kiet ikoduhe. Elijah, se, se afo anamde mi! Ikọ fo omum edim akama; idahaemi idim mmọñ fo asat. Elijah oyom ndinam didie idahaemi?
Ebe Akpa Ye Eyen Esie
Nnyin inimke ke akpanikọ ite ke Elijah ama okop mmemidem, nte enye osuk ebetde ndikop uyo nto Jehovah. Ekeme ndidi usuñ itọñ esie emi akasatde okoyom idim emi ama akasat ofuri-ofuri. Ke ukem ini oro uyo Abasi osim enye ete, “Daha ke enyọñ ka ke Zarephath,... nyuñ duñ do: sese, mma nteme ñwan kiet emi ebe esie akpade, nte ọbọk fi do” (1 Ndidem 17:9).
“Anie naña edi emi! Enye owuk... ndien mmọ ekop uyo Esie” (Luke 8:25). Mme utere ema ekop uyo Abasi; ebe akpa ama okop uyo Esie. Ofum ye mmọñ, ofuri ererimbot, inyañ ye ikpa-enyọñ ye mme unam, ekop uyo Esie ñko. Mme idiọk-owo ikpọñ-ikpọñ esin ndikop uyo Esie!
Ndisaña anyan usuñ isañ ye mmem-idem ñka Zarephath, emi ekedide ñkpọ nte itiat 100, ọkọwọrọ ndibuọt idem ke Abasi ke kpukpru itiat. Kpa ye oro, enye ekedi owo emi okokopde biọñ ye nsat-itọñ kpa nte nnyin mfin emi (James 5:17). Edi nte enye odukde ke esit obio, ebe-akpa ama odu emi akatañde ifia. Oto ke mba ye nsat-itọñ anyan usuñ isañ, enye okop biọñ eti-eti, Elijah ọdọhọ enye ete, “Mbọk, sin ekpri mmọñ ke uñwọñ-ñkpọ di sọk mi ññwọñ.” Nte enye akade, enye Elijah ọtọñọ ntak okot enye onyuñ ọdọhọ ete, “Mbọk da uyo esisit ke ubọk fo di sọk mi.”
Utip Ñkop-Item
Enye ama enyene mmọñ, edi udia esie akayak esisit ndikure. Enye etiñ ọnọ enye (Elijah) nte ke imọ inyene ekpri ndom-uyo ke abañ ye aran esisit ke ekpeme, emi enye okoyomde nditem ndia ye eyen esie, “man nnyin ita enye ndien ikpa.” Ndien Elijah ama etiñ mme ikọ nsọñọ-idem iba oro esiwakde ndikut ke Ñwed Abasi. Ke Genesis 15:1, nnyin ikot, “Kufehe ndik” Ke Eriyarare 1:17; “Kufehe.” Ediwak ini ke Ñwed Abasi nnyin ikot, “Kufehe ndik.” Nnyin ikpọkọm didie Abasi ke mme ikọ oro! Nte afo ukereke ete ke ubuene ebe-akpa oro ama enem esit ke nti ikọ oro?
Enye ama ọsọp ndikop uyo Elijah. Ke akpa ifet enye ama anam uyo onyuñ ada ọsọk enye; ndien edinam uyo esie ye eke eyen esie. Edieke owo ebemde iso ekere abaña mmọ efen, edidiọñ Abasi eyetiene enye. Edi akpanikọ ete ke edidiọñ ama etiene ebe-akpa emi, koro enye ye ofuri ufọk ema enyene se ediade ke ediwak usen. Ndom-uyo ama odu ke abañ ye aran ke ekpeme tutu ini akañ ebe (1 Ndidem 17:14-16). Nte afo ukereke nte ekpri eyen-eren adade do ese eka esie nte enye osiode ndom-uyo ke abañ, onyuñ odude ke mkpa-idem ebiet eke otode? Edi nte afo unimke ke akpanikọ nte ke eka emi ama etiñ ọnọ eyen-eren esie ete ke Abasi akanam enye awak koro enye ọkọfọnde ido ye anditiñ ntiñ-nnim ikọ Esie?
Udomo Efen
Ndien usen kiet ekpri eyen-eren emi ama ọdọñọ, onyuñ akpa. Eka emi ekedi ebe-akpa, ndien idahaemi eyen esie akpa ñko. Okosuk etie nte Jehovah ama ọkpọñ ebe-akpa emi, edi emi ekedi usuñ ndiyarade ñwut enye nte ke Elijah ekedi owo Abasi ke akpanikọ. Enye ama ebine Elijah ini kiet oyom uñwam. Enye ama emen eyen emi aka ke ubet esie onyuñ ayak enye onim ke mkpana esie. Emi ekedi idomo efen ndidomo mbuọtidem Elijah, edi Abasi ama anam akpanikọ ọnọ enye: enye ama ata uyo ye unam emi mme utere ekedade esọk enye: ama onyuñ ọñwọñ mmọñ emi okotode idim; ama onyuñ adia udia ke okpokoro ebe-akpa.
Enye ama odu ikpọñ-ikpọñ ke ubet esie ọbọñ akam eti-eti ọnọ Abasi abaña ekpri eyen emi. Abasi ama okop akam esie ke ufọt ini emi ekeyomde enye mi ñko, onyuñ ọtọñọ ntak ọnọ uwem ọsọk eyen emi. “Sese, eyen fo ke odu uwem,” enye eketiñ ikọ emi nte enye emende eyen-eren emi ọsọk eka esie. “Ndien ñwan oro ọdọhọ Elijah, ete, Ke emi ke mfiọk nte ke afo edi owo Abasi, uyo Jehovah emi odude fi ke inua onyuñ edi akpanikọ ñko” (1 Ndidem 17:24). Enye ama ekere ete ke owo emi edi owo Abasi ke ini uyo ye aran ọkọtọtde, edi idahaemi enye ọmọfiọk ete ke Elijah ekedi owo Abasi ke akpanikọ. Enye ama okut ke enyin mbuọtidem ebe ọkpọñ owo okosim Abasi emi owo oro okokponode. Ke akpanikọ Enye ọkọdọñ enye etiene ñwan oro, koro nnyin imokot nte ke ediwak mme ebe-akpa eken ema edu ke isọñ Israel ke mme usen oro, ke ini ọkpọsọñ akañ okodude ke isọñ, edi idọñke Elijah etiene owo mmọ baba kiet (Luke 4:25). Abasi ama ọfiọk ete ke ñwan emi akayakde esisit enye ndikpa, eyekop uyo Elijah. Abasi ama okut ima ye ekọm ye esit unana-ibuk eke enye ediwutde Elijah. Enye ama ọfiọk ete ke enye eyenim mme utibe-ñkpọ emi owo Abasi emi akanamde ke akpanikọ. Ndien enye ama anam ntre.
Ndinim Abasi Ke Akpanikọ
Ñwan kiet ama ọnọ ikọ-ntiense ke mboho ete ke akanam imọ inyeneke ifet kaña ndisaña biọñ ke ntak Eti-mbuk. Edieke ekpeyakde idomo osim nnyin nte emi okosimde Elijah me ebe-akpa emi okotode Zarephath, nte nnyin ikpenyene mbuọtidem ke Abasi? Jesus ama ọdọhọ ete, “Ese mme inuen enyọñ,... Abasi ọbọk mmọ: mbufo emekpon ekan mme inuen adaña didie?’ “Ese ekpọñ-idim... Edi edieke Abasi esinede mbiet,... adaña didie akan oro ke Enye edisine mbufo ñkpọ, O nditọ ekpri mbuọtidem?” (Luke 12:24, 27, 28). Do ke nnyin inyene mme eñwọñọ ke abaña udia ye edisine-ñkpọ. Etiñ ñko enọ nnyin ete: “Emebat kpa kpukpru idet ibuot mbufo” (Matthew 10:30); “Ekufehe ndien; mbufo emesọñ urua ekan ediwak ñkpri inuen” (Matthew 10:31). Ke Psalm 147:9, nnyin ikot ite, “Emi ọnọde unam udia esie, onyuñ ọnọ nditọ raven eke etuañade.” Edieke Abasi ekerede abaña mme raven adaña didie ke Enye edinọ uñwam esọk ebe-akpa ye eyen akpa, (Psalm 146:9) ye kpukpru nnyin nde. Nte nnyin imekeme ndibuọt idem ye Enye ke mkpọsọñ ini?
Questions
MME MBUME- Mmọñ ke ekedọhọ Elijah aka okodibe?
- Nso oruk inuen ekesida udia esọk enye?
- Yom itie efen ke Ñwed Abasi emi etiñde ikọ abaña mme inuen emi?
- Mmọñ ke ekedọhọ Elijah aka ke ini idim ama akasat?
- Nso ikedi akpa ebeñe emi enye ekebeñede ebe-akpa? Ye ọyọhọ iba?
- Elijah ọkọdọhọ ete ke ndom-uyo ye aran edibighi adaña didie?
- Tiñ se ikotibede ke ini eyen ebe-akpa oro ama akakpa.
- Nso idi ntak emi afo ekerede ete ke ekenọ Elijah esọk ebe-akpa emi saña-saña?