Lesson 314 - Senior
Memory Verse
IKỌ IBUOT: “Uteñe Abasi edi akwa udori, ke ini asañade ye esit eke okutde ete se inyenede ekem” (1 Ñwed Timothy 6:6).Cross References
I. Mfafaha ye Nsesire Usuñ
1. Nditọ iren mme anditiñ ntiñ-nnim ikọ eyom ebiet eke añwañade akan, 2 Ndidem 6:1,2; Matthew 7:13,14; Luke 13 :23,24.
2. Ebọrọ ebeñe mmọ, 2 Ndidem 6:2,3; Psalm 106:15.
II. Ibuot Ekuri Emi Okosopde
1. Afanikọñ emi esobode ke ññwaña usuñ, 2 Ndidem 6:4,5; Ecclesiates 11:9.
2. “Ekebọbuọt enye”, 2 Ndidem 6:5; 1 Ñwed Corinth 4:7; Matthew 25:14-30.
3. Ekut ibuot ekuri ke ata utibe usuñ, 2 Ndidem 6:6,7.
Notes
SE EKPEPDE EBAÑAMfafaha Inua Otop
“Ebiet emi nnyin itiede mi ke iso fo afaha akan nnyin”. Ikọ emi “afaha” ọwọrọ ete ekpekpri onyuñ ababa ñkọ. Okposuk edi nte nditọ mme anditiñ ntiñ-nnim ikọ etiñde ebaña mme ufọk emi mmọ ekeduñde, ikafañ ke nnyin ikut nte ediwak owo iban ye iren, enyenede ukem-ukem mfaña ntem ebaña ikọ Abasi ke eyo emi. Jesus ọkọdọhọ ete, “Ebe ke mfafaha inua-otop eduk: koro inua-otop emi adade owo aka nsobo atara, ọkpọ-usuñ onyuñ añwaña; mme andiduk ke esit enyuñ ewak. Koro inua-otop emi adade owo osim uwem afafaha, usuñ onyuñ esire; ndien mme andiduk enye iwakke” (Matthew 7:13,14).
Edineñere Ukwañ-Usuñ
“Ebiet emi …. afaha akan nnyin” Emi osuk edi mfiori emi ata ediwak owo ekade iso ndifiori ke ini mmọ esobode ye akpanikọ emi odude ke ikọ Abasi. Ndusuk owo ekop ikọ Abasi enyuñ eyom ndinyene mme nti ñkpọ emi odude ke esit, edi ke adaña emi mmọ ekopde mme utibe ikọ-ntiense eto mmọ emi ekenyimede ndika ñkeneñere ukwañ usuñ mmọ, ke ndikpe mme okuk oro mmọ ekeyipde me ñkani isọn oro mmọ ekekamade, mmọ emi enyọñ ke mfuhọ enyuñ edọhọ ete, “Ebiet emi …. afaha akan nnyin.
Efibe
Mbon efen edi enyuñ ebọñ akam eyom edidahado ke mme idiọk-ñkpọ mmọ, ndien Abasi ayarade uwem efibe mmọ owut mmọ, oro edi, edieke owo mmọ kiet ọdọde ndọ onyuñ osiode ke ndọ afiak ọdọ owo efen ke ini akpa ebe esie osuk odude ke uwem. Jesus otim asian nnyin añwa-añwa ete: “Owo ekededi eke osiode ñwan esie, onyuñ ọdọde efen, esin efibe abiat enye: onyuñ edieke ñwan osiode ebe esie, ọdọ efen, enye esin efibe” (Mark 10:11,12). Ke ekikere ediwak owo, utọ ukpep-ñkpọ emi afaha akaha. Mmọ ekpọñ mfafaha usuñ eyom ññwaña inua-otop, ye usuñ emi añwañade, eke mmọ ekemede ndika iso ndu ye udiana ebe mmọ, ndien esuk ebat ete ke isuk imomum idaha owo Abasi mmimọ ikama; okposuk edi nte John Ọduọk-owo-mmọñ ọkọsọñọde ada ke ukpep-ñkpọ emi, onyuñ ọdọhọ Herod ete ke inenke enye ndida ñwan eyen-ete esie ndọ. Kpukpru owo esuk edori enyin ndika Heaven, okposuk edi nte Paul ọkọdọhọde ete “Mmọ emi enamde oruk ido eke etiede ntem ididaha Obio Ubọñ Abasi inyene” (Ñwed Mbon Galatia 5:20,21).
Mme Mbana-Idem Ererimbot
Etim efiọk edu iban ke ndiwọñọre ukpep-ñkpọ Christ nnim ñkañ kiet ke ntak edifat idet mmọ ọmuhọ nte eke iren-owo. Ñwed Abasi ekpep ete ke edi ñkpọ “but ñwan ndifat mme ndikporo idet” edi “edieke ñwan enyenede anyan idet, edi ubọñ ọnọ enye; koro enọ enye idet esie nte ufuhọ-ñkpọ” (1 Ñwed Corinth 11:6,15). Etie nte iban ebat edifat idet nte asañade ye ido ererimbot ke ata ekpri ñkpọ ke ndida ndomo ye nsi nsi uwem. Ọkọrọ ye oro, ndusuk owo edu emi ekpọñde mfafaha usuñ utu ke mmọ esana mbana-idem ererimbot eyak.
“Ekunyuñ ekabare ebiet eyo emi, edi eyak mbufo ekpuhọre” (Ñwed Mbon Rome 12:2). Ererimbot ke ediwak idaha enyan mmọ oro esinde ndibiet mmọ ke ido mbana mmọ nnuen-ubọk nsahi. Ekpep mme mmọ oro ebede ke mfafaha inua-otop ete, “Ekuma ererimbot ye se idude ke ererimbot. Edieke owo ekededi amade ererimbot, ima Ete iduhe enye ke esit” (I John 2:15).
Mme Inemesit ye Inyene Ererimbot
“Usuñ emi afaha akaha,” emi edi mfiori mme idiọk owo ke ini mmọ ekopde ebaña idaha edu uwem eke ananade ndo eke ikọt Christ edude emi onyuñ ọwọrọde ọkpọñ kpukpru mme idiọk udọñ ererimbot, mme ñkpọ nte uka ndise, unek, ediñwọñ ikọñ, ye ediñwọñ mmin. Akparawa owo inyene emi ekedide andikara, akaka ebine Jesus man obup abaña usuñ nsinsi uwem. Edi ke ini edọhọde enye ete ayak mme inyene esie ọnọ mme ubuene onyuñ ọkpọñ mme ufan esie etiene Christ, enye ama adaha ọnyọñ ke mfuhọ. Jesus ama ama enye. Ema enim inyene ke Heaven enọ akparawa oro, edi usuñ oro ama afaha enye akaha.
Uwem Unana Idiọk-ñkpọ
Ndusuk mme owo ekere ete ke inua-otop oro afaha akaha ke ini etiñde enọ mmọ ete ke owo Abasi enyene ndidu uwem emi okoñde akan idiọk-ñkpọ. Ewe ikọ okpotim añwaña akan emi, “Owo eke anamde idiọk-ñkpọ edi eke satan” (I John 3:8). Inua-otop afafaha, ndien usuñ onyuñ esire, edi eda owo esim Heaven. Ediwak owo esaña ke ññwaña usuñ, enyuñ ekere ete ke ọfọn ye mmimọ, enyuñ ekere ete ke idighe akpan ñkpọ ndisaña ke mfafaha usuñ nnyuñ nnam ñkani ido; edi utit usuñ oro edi nsobo. Nte ifọnke ndisaña ke mfafaha usuñ nnyuñ nnyene ifet ndibe nduk ke inua-otop oro, akan ke akpatre ndikut nte ke afo omokpon, atara onyuñ ọyọhọ usuñ ndien ukemeke ndibe nduk ke mfafaha inua-otop?
Ke Adiana ke Adiana
Edibọbọk idiọk-ñkpọ, edisuhọre idaha Ikọ Abasi ye ọkpọsọñ ekikere ke abaña ñkpọ ererimbot emi eda mkpa ke spirit ọnọ ekese ñka ukpono Abasi. Edidemere ema esida itie ediwak ini oto mme ọkwọrọ Ikọ Abasi emi ekemumde ñkoñ-ñkoñ idaha mmọ ekama; edi ke adaña nte mmọ ebede efep, ekese ini ufọk Abasi ewọñọde etiene ido nditọ Israel, emi ekenamde “ñkpọ Jehovah ke ofuri eyo Joshua, ye ke ofuri eyo mbiowo oro ebighide uwem ekan Joshua” (Judges 2:7). Ndien mmọ efiak edem etiene ido edikpono ndem. Yak mkparawa ekpeme idem mbak mfiori mmọ ke abaña ediyom ndidu uwem unana mfara ke idem me ndidu otime-otime uwem edinuk mmọ esin ke ññwaña usuñ!
Ebeñe Emi Ekebọrọde
Ke ini nditọ-iren mme anditiñ ntiñ-nnim ikọ esemede ebaña nte itie afahade akan mmọ enyuñ eyomde ndika ke ebiet efen eke añwañade, Elisha ama ọbọrọ mmọ ete, “Mbufo eka.” Andiwet Psalm ọdọhọ ete ke Israel ema ediọk itọñ ke akai-ikọt ndien Abasi “ọnọ mmọ se eyomde; edi esin mmọ ndiọk idem ukpọñ” (Psalm 106:15). Mmọ ekeyom unam ndita, ndien Abasi ama ọnọ mmọ, edi ọkpọkọfọn adaña didie ye mmọ edieke mmọ ekpekeyuhọde ke edita “uyo mme angel.”
Ediwak ini mme owo eñwana ndimek usuñ idem mmọ, ndien Abasi asana mmọ ayak edi esin mmọ ndiọk-idem ke ukpọñ. Ikebighike ikaha nte nditọ anditiñ ntiñ-nnim ikọ ekewọrọ ebe eduk ke ebiet eke añwañade, ndien kiet ke otu mmọ ọduọk ibuot ekuri esie. Oro ebiet owo eke awahade ọkpọñ mfafaha usuñ. Enye ekeme ndika iso nda eto ekuri mmia ñkanare edi ibuot ekuri ama osop, ntre ke mme ikọ esie eduọñọ ñko. Enye ekeme ndinam kpukpru ñkpọ ke ofuri odudu esie edi ke esiode nda-usuñ spirit efep, enye akabare edi ikpikpu ye ukpọk.
Mme Ibuot Ekuri Emi Ekebuọtde
“Ahah, ete mi! koro ñkọbuọtde buọt,” emi ekedi eyet emi eyen anditiñ ntiñ-nnim ikọ akatuade ke ini enye okokutde nte ibuot ekuri ọwọrọde ke eto oduk ke udem akpa Jordan. Owo emi ama ọfiọk ete ke imọ ikọbọbuọt ñkpọ utom emi, ndien ke imọ iyebọrọ mbume ibaña enye. Ediwak owo edu emi ekerede ete ke mmimọ inyene ndinam nte imade ye ini, ukeme, ye inyene mmọ; ndien edi akpanikọ nte ke owo edi andikpeme mme ñkpọ emi Abasi ọnọde enye. Emi otim ayarade ke Ñke ke abaña okuk. Christ, emi edade edomo ye enyene ñkpọ-owo oro ọkọdọhọ eyen-ufọk esie emi okodipde okuk ọbọñ esie ke isọñ, ete: “Nsidi ndien ntak eke afo mukemenke okuk mi usin ke ubọk mme akama-okuk, man ñkpọbọ iso-okuk ye udori ke mma nnyọñ ndi?” (Luke 19:23). Ọbọñ eyenyọñ edi ke ediye usen kiet. Nte afo eyenyene eti mbuk ndibuk nnọ Enye ke abaña mme ñkpọ oro Abasi ayakde esin fi ke ubọk? Nte afo eyekeme nditiñ ete, “Ọbọñ okuk Fo omodoro okuk duop”? Mme editua eyet ete, “Ahah, Ete mi ọbọhọ mi osop”?
Utit Ofuri Ñkpọ
Ke ini owo adade ke iso Abasi ke akpatre usen, ndinam ibat ke abaña mme utom emi enye akanamde, owo nte Elisha ididuhe do ndifiọrọ ibuot ekuri emi okosopde, me ndinyene ini nditi me nti ifet emi ekeyakde edeñ ke idak mmọñ ke mme ini eke ekebede. Enye emi ama ọkọkpọñ mfafaha usuñ, eyekut ete ke ini oro imọ ikọduọkde ibuot ekuri, imọ ima inyuñ iduọk ukpọhọre nsinsi uwem.
Questions
MME MBUME- Ikọ emi “mfafaha” ọwọrọ didie?
- Tiñ baña mbuk “nditọ mme anditiñ ntiñ-nnim ikọ” nte odude ke Ikọ Abasi.
- Nso ke Jesus etiñ abaña usuñ emi adade osim uwem?
- Nso ibọrọ ke Jesus ọkọnọ ke mbume emi, “Nte mmọ emi enyañade iwakke?”
- Da ññwaña ye mfafaha usuñ domo ise.
- Didie ke ikeme ndida edinyime Elisha nnọ nditọ mme anditiñ ntiñ-nnim ikọ ndomo ye edinam Abasi ye nditọ owo?
- Nso ukpep-ñkpọ spirit odu ke ndiduọk ibuot ekuri?
- Nso ke nnyin inyene emi nnyin ikpokotde ite “ikọbọbuọt?”