Lesson 315 - Senior

Memory Verse

IKỌ IBUOT: “Mmọdo edieke mbufo emi ediọkde efiọkde ndinọ nditọ mbufo nti enọ, adaña didie akan oro ke Ete mbufo ke Heaven ediyak Edisana Spirit ọnọ mmọ eke ebeñede Enye?” (Luke 11:13).

Cross References

I Edikpu Mme Asua

1 Abasi ayarade uduak asua ọnọ Elisha, 2 Ndidem 6:8, 9; I Ndidem 20:22

2 Ema enyaña Israel oto ke ñkop-uyo, 2 Ndidem 6:10; Deuteronomy 6:24; 8:1

3 Abasi ọfiọk mme ekikere kpukpru owo, 2 Ndidem 6:11, 12; Psalm 139:1-4; 147:5; I Chronicles 28:9; Mme Hebrew 4:12

II Ukpeme Abasi Ọnọ Ikọt Esie

1 Akamba udim ekọñ ekanare obio Dothan ekuk, 2 Ndidem 6:13-15; Psalm 27:3; Psalm 91:1-16; 118:6

2 Elisha enyene mbuọtidem, 2 Ndidem 6:16; 2 Chronicles 32:7;

3 Ema etat akparawa enyin, 2 Ndidem 6:17; Numbers 22:31; Luke 24:31; 10;23, 24; Ñwed Mbon Ephesus 1:18

4 Enam enyin asua okim, 2 Ndidem 6:18-20; Ñwed Mbon Ephesus 4:18; 2 Ñwed Corinth 4:3, 4

5 “Edieke biọñ ọdọñde owo usua fo, nọ enye udia adia,” 2 Ndidem 6:21-23; Ñwed Mbon Rome 12:20; Mme Ñke 25:21

6 “Ebeñe ndien ke eyeno mbufo,” Luke 11:9-13; John 14:12-14; 16:23, 24; Matthew 7:7-11

Notes

SE EKPEPDE EBAÑA

Mbufiọk Unam Ñkpọ

Ñkpọ-ntibe unana idorenyin esidi akpan ñkpọ ke ekọñ. Mbemiso ekan utọ ñkpọ-ntibe emi, mme owo eda ata ediwak usuñ ifiọk ndidọñ uyep ke obot ye ke mmọñ ye ke ofum. Ke mme isua ifañ emi ebede, enyene mme mbufa ñkpọ emi enamde emi ekemede ndida nse ñkpọ nnyuñ mfiọk ñkpọ mbaña mme asua. Ndusuk ini, esinyaña mme nsuñ-ikañ ye mbon ekọñ eto mme utọ usuñ emi. Ke ata anyan ini mbemiso eda mme utọ edinam ñkpọ ye ifiọk emi ewọrọ edi, ema enyaña Israel oto ke ata akamba ifiọk emi akande se owo ekpekemede ndinam. Abasi, emi ọsuhọrede enyin ese emi onyuñ okotde ekikere esit owo, emen mme ikọ ye ekikere edidem Syria ekenemede ke esit ubet-nna esie eketiñ ọnọ anditiñ ntiñ-nnim ikọ Esie, mbemiso enye ememen mme ekikere esie editiñ ọnọ mme ikpọ owo ekọñ esie.

Utọ idaha ifiọk emi ama esinyaña Israel ke ata ediwak idaha ke edinam mmọ etim enyene ukpeme enọ idem mmọ. Emi edi usuñ ndọñesit ọnọ nditọ Abasi mfin emi ndifiọk nte ke satan ikemeke nditibe ubuat-ubuat eñwan ye nditọ Abasi emi Abasi midibemke iso idiọñọ, ndien ke utọ usuñ emi Enye itreke ndisiak ata akamba usuñ ubọhọ nnọ mmọ ndikan utọ eñwan emi. “Idomo ikosimke mbufo ibọhọke se inade owo ndibiom: edi Abasi edi anam akpanikọ, idinyuñ iyakke edomo mbufo ebe se ukeme mbufo edide; edi Enye eyesiak usuñ ubọhọ ọnọ mbufo ke ufọt idomo, man mbufo ekeme ndibiom enye” (I Ñwed Corinth 10:13).

Kufehe Ndik

Ke edidem Syria ama okokop ete ke Elisha edi enye emi Abasi esimade ndidọñ mme etop Esie mbe ke enye, ke ndo-ndo oro enye ọdọñ ekeda owo Abasi oro edi. Ntak emi owo ekpekerede ete ke imekeme nditimere mme uduak ye utom akwa Abasi? Ediwak ini owo esikere ete ke imọ imekeme ndifehe mbọhọ mbet nsi nsi Abasi. Ye mbon-ekọñ esie ndikanare ekpri obio Dothan ñkuk eketie edidem Syria nte edi mmem-mmem ñkpọ ndimum ikpọñ owo emi. Emi ekpedi ntre edieke mbon-ekọñ ekpekenamde ñkpọ ye owo ikpọñ.

Ye ndusuk owo, ikọ Abasi emi etiñde ete, “Angel Jehovah ana akan mmọ eke ebakde enye okuk, onyuñ anyaña mmọ” etie mmọ nte ikpikpu ikọ ñke, edi ye Elisha ekedi ata odu uwem ikọ. Elisha ikesikwe mbon udim ekọñ enyọñ iso ye iso edi ke ini utọ ñkpọ-ntibe ntem, enye ama ọfiọk ete ke mmọ mmọdo. Elisha ekedi owo emi ekekperede Abasi kpukpru ini man ọfiọk se anamde. Mme etop esie eketo Heaven. Enye ekesikpañ utọñ esie ọnọ Andibot enye. Ke ini eyen ufọk esie okokutde mme udim ekọñ mbon Syria nte ekanarede Obio ekuk, ke ndik enye ama ofiori ete, “Ahah, ete mi, nnyin idinam didie?” Elisha ikenyekke idem mme nditimere esit esie mbaña se enye akpanamde adian do. “Kufehe ndik”, ekedi mme ikọ nsọñidem emi okotode owo emi ọkọdiọñọde Abasi esie. Ndien ke ata ekpri ebeñe, enye ama ebeñe Abasi ete atat enyin akparawa oro. Idighe nte enyin eyen ufọk emi ama okim. Enye ama okut mbon-ekọñ Syria nte eketimde idaha mmọ ndida obio. Elisha okoyom eyen ufọk esie okut esisit se enye okokutde, “mme Chariot Israel, ye mbon horse esie” (2 Ndidem 2:12).

Enyin Ikpọhidem Ye Enyin Spirit

Edi ata mmem-mmem ñkpọ owo ndida mme ñkpọ emi ekande enye ekuk eyọhọ ke enyin ikpọhidem ndien anam enyin Spirit akabare okim. Edi utom andidiọk ndida mme ñkpọ uwem emi ñkan owo ñkuk anam ini ye odudu esie abiara oto ke ntak ndiyom mme ñkpọ uwem emi. Mme udọñ ñkpọ ererimbot ekeme ndiyọhọ enyin owo ofuri-ofuri tutu anam mme ñkukut Heaven akabare okim. Ke ndida nse ke ñkañ Spirit utọ mme mmọ emi ke efiak edem eka ata ikpikpu ukpọk itie emi etiede nte ñkim-ñkim ntuhube. “Koro erikere ñkpọ obukidem ọwọrọ mkpa” (Ñwed Mbon Rome 8:6). “Mmọ edi mme asua cross Christ:…. Emi ekerede mme ñkpọ isọñ emi” (Ñwed Mbon Philippi 3:18, 19). Ọbọñ akpakam atat kpukpru owo enyin ndikut ñkpọ ñkan mme ñkpọ ererimbot emi nnyin iduñde ke esit.

Eketat enyin Elisha ke ini enye ọkọkpọñde ofuri se enye akanamde ọtọñọ nditiene Elijah. Enye ama okut ukpat-ñkpọ ikañ ke ini enye ekebierede nditie ye Elijah tutu osim akpatre. Mme enyin nnyin eyetara ke ini nnyin itọñọde ndiyom mme ñkpọ enyọñ; edieke nnyin ima itim ibine akpan ñkpọ emi tutu osim akpatre, kpukpru mme ubọñ Heaven ke usen kiet eyebe ediduk ke ekikere nnyin, ndien mme inem ñkpọ ererimbot emi eyekabare etie nte mmem urua enyuñ ekpri ke enyin, ndien idem eyekpa nnyin ete, mme nso ke nnyin ikokut ke mmọ? Mme nso ñkpọ edi emi eke mme owo emende ekpuhọ ye ukpọñ mmọ? Mme usen owo esọp ebe adaña didie ke ererimbot! Owo emi akpade ọkpọsọñ utom ọnọ mme ñkpọ ererimbot emi, Abasi ọdọhọ enye ete: “Afọ anana ibuot, eyekpak ukpọñ fo ke ubọk fo ke okoneyo emi; ndien anie edidia ñkpọ eke ọkọkọde onim?” (Luke 12:20).

Akam

Akam nditọ ikọt Abasi akpakam edi ntem “Ọbọñ, tat enyin mme anam-idiọk man mmọ ekut mme ndiọi usuñ edinam mmọ, ye mme uyai ye nti idaha edinam Eti-mbuk emi. Mmọ ekpekam ekut mme edinam ye ukpuhọre ke ufọt ibio-ibio ini ye eke nsinsi uwem. Yak mmọ emi ediọñọde Abasi etim enyene enyin emi eñwañade eke etimde ekut usuñ oro, “ebiet uñwana eke asiahade aka iso ayama, tutu osim ufọt uwemeyo” (Mme Ñke 4:18). Ọbọñ, tat enyin mkparawa emi ebiatde ini mmọ ke mme ñkpọ eke enyenede ekpri udori enyuñ esinde usuñ edinen ido; emi ọwọrọde “udori ke kpukpru usuñ” (I Ñwed Timothy 4:8).

Ọkọ Eke Owo Mikemeke Ndibuñ Mbe

“Ndien Jehovah atat eyen oro enyin; ndien enye okut” – nso utọ ndise! Obot oro ama ọyọhọ ye mme enañ-mbakara ye mme ukpat-ñkpọ ikañ ekan Elisha ekuk. Nso utọ ufañ ke usua oro ekenyene ndibuñ mbe utọ ukpeme oro? “Baba ñkpọ ekọñ kiet eke ebotde ebaña fi idikwe unen; -- emi edi udeme ikọt Jehovah” (Isaiah 43:17). Satan ọkọdọhọ abaña Job ete. “Nte afo usinke ọkọ ukan enye, ye ufọk esie, ye kpukpru se enye enyenede, ukuk?” (Job 1:10). Abasi enyene mbon-ekọñ ukpeme ọnọ nditọ Esie kiet-kiet, eke baba satan me odudu hell mikemeke ndikan.

Ke ini mbon usua ekedide ebine Elisha enye ekebeñe Abasi ete ada nnan ọtọ mmọ. Abasi ama ọbọrọ, ndien owo Abasi ama ada mme nnan ye mmeme mbon-ekọñ emi usuñ oduk ke esit obio Samaria. Kere mkpaidem emi mmọ ekenyenede ye but ke enyin mmọ ema eketara ye nte mmọ ekutde idem mmọ nte mbon-ñkpọkọbi mbon-ekọñ ke esit Obio Samaria. Ke ini ema eketat enyin eyen ufọk Elisha, enye okokut erikan. Ke ini enyin mbon-ekọñ Syria ema eketara mmọ ekekut nte ekande mmọ.

Ekpri Mbuọtidem

Nso utọ ata eti nsọñọ-nda ke mbuọtidem ke Elisha ekenyene ntem ke ini enye enemede ye Abasi! Ndibet tutu okut ete ke mbon-ekọñ oro ema eneñere esuhọre ebine enye, enye ebeñe Abasi ete anam mmọ edi nnan, ndien Abasi ama anam mmọ edi nnan. Jesus ọnọ nnyin uyo ete yak nnyin inyene utọ mbuọtidem emi ke edidọhọ nnyin ete. “Ebeñe ndien eyenọ mbufo.” Ndien, ke enye okutde unana mbuọtidem nnyin, enye emen añwa-añwa uwut-ñkpọ ọnọ nnyin ete “Ewe ete odu ke otu mbufo eke edinọde eyen itiat ke ini eyen ebeñede enye uyo?” Nso ekpekeme ndidi ata akamba ikọ nsin-ifik nnọ owo kiet ekededi ndibeñe Abasi ñkpọ nnyuñ nnim nte ke Abasi eyenam ebeñe imọ? Adaña didie ke ete mbufo emi odude ke heaven ke enyọñ edinọ mmọ emi ebeñede Enye Edisana Spirit?”

Questions

MME MBUME

1. 1 Da mme ntọt emi Elisha ọkọnọde domo ye mbufa ñkpọ emi enamde idaha emi ndida ndiọñọ itie udibe mbon-ekọñ asua.

2. 2 Ikafañ ke Israel ekenyaña idem mmọ oto ke ndikop mme ntọt emi?

3. 3 Edidem Syria ekekere didie abaña usuñ nte uduak esie ekesiyararede ọnọ Elisha?

4. 4 Nso ke Elisha eketiñ ke ini enye okopde ete ke ekan enye ekuk?

5. 5 Nso ke akparawa oro okokut ke ini enyin esie ama akatara?

6. 6 Didie ke Elisha akanam ye mbon-ekọñ Syria?

7. 7 Da editat eyen-ufọk Elisha enyin domo ye editat mbon-ekọñ Syria enyin.

8. 8 Nso ikedi isọñ ke ikọ Abasi emi akanamde enọ mbon-ekọñ Syria udia edia?

9. 9 Jesus ọkọdọhọ ete, “Ebeñe, ndien eyenọ mbufo.” Nọ mme itie emi otode ñwed Abasi emi ọdọhọde ete ke nnyin ibọhọ ke ediwak ini ke ini nnyin ibeñede.

10. 10 Jesus okodomo ebeñe nnyin ye nso?