Lesson 318 - Senior

Memory Verse

IKỌ IBUOT: “Jehovah otim onim ikpat (eti) owo, onyuñ amama usuñ esie” (Psalm 37:23).

Cross References

I Uwem Elijah Ye Eke Elisha Ekebiet Kiet Eken

1 Anditiñ ntiñ-nnim ikọ mbiba emi ema emia mmọñ Jordan man esaña ebe, 2 Ndidem 2:8, 14

2 Elijah ye Elisha ekedi ñkpọ-utom emi ekeñwamde ndinyene mmọñ ke ini nnanenyin, I Ndidem 18:41-45; 2 Ndidem 3:9-20

3 Nsio-nsio ebekpa iba ema ebọ uñwam ye ndọñesit ke ini unana eto utom Abasi Elijah ye Elisha, I Ndidem 17:10-16; 2 Ndidem 4:1-7

4 Mmọ mbiba Elijah ye Elisha ema ekpe Abasi ubọk ete anam nditọ iren efiak enyene uwem, I Ndidem 17:17-24; 2 Ndidem 4:18-35

5 Elijah ye Elisha ema ebeñe ete iyaresit Abasi odoro mmọ emi mikenimke ke akpanikọ, 2 Ndidem 1:9-12; 2:23-25

6 Uwem Elijah ama etre mi ke isọñ ke ini ekemende enye edọk ke heaven ke ofum idio, 2 Ndidem 2:11, 12

7 Elisha ama ọdọñọ akpa, edi utibe odudu eriset emi otode Abasi ama ọsuhọ ke ikpọhidem esie, 2 Ndidem 13:14-21

Notes

SE EKPEPDE EBAÑA

Mme Anditiñ ntiñ-nnim ikọ eke Abasi

Mbiet Elijah ye Elisha esitimere mme okot Ñwed Abasi ndusuk ini. Enyiñ mmọ etie ukem-ukem, mmọ ekenyuñ enam utom ọtọ kiet ke ini mmọ ekenamde utom Abasi. Mmọ mbiba ema enam ikpọ utibe-ñkpọ, emi okotimde otuk mbio Israel. Kpa ye oro mbiet ke idem ye edu-uwem Elijah ye Elisha ama enyene akamba ukpuhọre.

Elijah, Owo Tishbi

Ndikere mbaña uwem Elijah nnyuñ nda ñkodomo ye eke Elisha, enye emi akadade itie esie, eyenam otim enem nnyin. Elijah ama oduk edi ke mbuk nditọ Israel ke usuñ eke owo mifiọkke. Akpa etop esie emi ekewetde ama enyene nyọ nte mbiet esie. Etop esie ekedi ntọt ọnọ nditọ Israel ke abaña idiọk ini ke iso. “Mbara ye edim ididuhe ke mme isua emi ke mitoho ke uyo mi” ekedi ñwed edimen idem ñwut emi Elijah ekemende idem esie owut nditọ Israel nte anditiñ ntiñ-nnim ikọ eke Abasi. Ke akpa ifet emi edidem Ahab ọkọbọde etop oro, nnyin ifiọkke nte enye ọkọsọpde ndinyime uyo anditiñ ntiñ-nnim ikọ, edi nte edim eketrede ndidep, ama ayarade owut ete ke Elijah edi ata anditiñ ntiñ-nnim ikọ eke Abasi. Ema eduñọre idut eyom uto isuñ-utom afanikọñ emi, edi owo ikekwe enye. Enye ekedi ñkpọ-utom Abasi, ndien Abasi ama ekpeme enye.

Utom ikọ Abasi Elijah ekedi kiet emi akañwanade ye kpukpru oruk idiọk-ñkpọ emi Israel ekesinede ke esit, idut emi Abasi ekemekde. Enye ọwọrọ ada ke mme ufañ ñwed ke Ikọ Abasi nte ñkpọ ndise, ye nte enyene-ndik mbet emi Abasi ebede ke enye ayat esit abaña idiọk-ñkpọ. Ema etiñ ebaña ete ke ini anditiñ ntiñ-nnim ikọ eke Abasi edide ndisian etop nnọ mme owo, ubiere-ikpe Abasi odu ke edem, ikpat kiet. Eketie nte emi ekedi akpanikọ ye Elijah.

Elijah ke ediwak ini ekedi ukpọñ emi okodude ikpọñ, koro enye ekesiwọrọ edi ke ini ke ini ke ebiet udibe esie ndisuñi idiọk-ñkpọ. Enye ikasañake ntre-ntre ke otu nditọ Israel, edi esiwọrọ edi ke ñkpọ otibede. Etop emi Elijah esitiñde ọnọ mme owo, esiwak nditi mmọ nte ke Abasi idiyakke idiọk owo ọbọhọ; nte esidide, edi ndik-ndik ubiere-ikpe Abasi ọduọ odoro mme idiọk owo nte enyene-ndik ntọt ọnọ mbon efen.

Mme anditiñ ntiñ-nnim ikọ eke Baal ema ekut odudu Abasi Elijah, enyuñ eduọk uwem mmọ ke ñkpọ-ntibe oro koro mmọ ekedomode ndisin Abasi enyọñ ke ndek. Elijah ama osuñi Ahab ye Jezebel ke ntak akwa idiọk-ñkpọ mmọ, onyuñ asian mmọ ubiere-ikpe Abasi. Ke ini Elijah okosuk anamde eti-ido ye uñwam ọnọ nditọ Israel, okosuk etie mmọ nte uduak esie ekedi ndibiat ukpono-ndem.

Ke ndika iso ke utọ edikañ idiọk-ñkpọ emi, ama odot nte Abasi enyene owo emi ebierede ke ekikere esie ndinam edinen ido Abasi nte Abasi etemede. Elijah ekedi owo emi mbiet ye uduot esie okodotde ye idaha ikot oro. Nte okosuk ededi, nnyin imọfiọk ñko ite Elijah “ekedi owo emi enyenede mbiet uduot nnyin” (James 5:17). Elijah ama ama Abasi ntọtuñọ-ntọtuñọ, ndien koro enye akamade Abasi ke ofuri uwem esie, ekeme ndidi enye ama ama nditọ Israel kpasuk ntre. Edieke owo amade Abasi, enye eyema mme ukpọñ owo ñko, koro ima Abasi enyene akamba ebuana ye mme ukpọñ owo.

Ekeme ndikere ete ke Elijah iketimke ima nditọ Israel, ke enye ikpọkọdọhọke iyaresit Abasi odoro mmọ ke ini ke ini. Ibọrọ mbume oro edi, ediyọ idiọk-ñkpọ idighe idiọñọ ima. “Abasi edi ima” edi asua kpukpru ukwañ-ido.

Abasi ndimen idiọk-ñkpọ mfep edi mfọn-ido emi ọsọñde ndibat ke udori ererimbot. Nte ido ukpono-ndem akatarade ekedi akpan idiọk-ñkpọ emi akadade iyaresit Abasi etiene idut. Ñkukure uñwam kiet okodu ọnọ utọ ñkpọ oro, oro ekedi ndibiat ido edikpono ndem. Elijah okoyom edikpono Abasi ke akpanikọ afiak ada itie, ama onyuñ enyene ata ifiopesit ndinam utọ utom oro. Edim ikpeduhe ke Israel tutu mme owo ekpekekabare esit mmọ etiene Abasi. Edi akpanikọ ete ke ọkpọsọñ ubọk emi Abasi adade amia mme anam-idiọk oto ke akwa ima ye mfọnido emi Enye enyenede ọnọ owo emi emiade. Utọ edinam oro edi se esiwakde ndida ke usuñ efen, ndien ndusuk ini owo emi enyende ata ifiopesit ndikpono Abasi esidi se ebiomde ikpe, nte ekenamde Elijah, ete ke enye edi etubom andituhọre mme owo.

Elijah ikananake ifiọk ke abaña mme ndutiñ ye ubiọñọ emi enye okokutde, koro enye ama enyene ini mmem-idem ye unana udọñ ke enye ama akakan mme anditiñ ntiñ-nnim ikọ eke Baal. Kpa ye oro, idighe owo emi efehede mbuba ọfọn ke esisit ini ke erinyaña, edi esikam edi enye emi emede ime osim akpatre. Elijah ama enyene erikan ke ini mmem-idem esie, ndien nnyin imekeme ndinam ukem oro.

Se nte Abasi okokponode okonyuñ ọdiọñde utọ eti owo Abasi emi! Utit esie ekedi kiet ke otu mmọ emi ekenyenede erikan ye ubọñ emi ewetde ke Ikọ Abasi. Emen ke ofim idio ndisobo ye Ọbọñ, ndien udim enyọñ ekanare ekuk! “Sese, chariot ikañ ye horse ikañ..... ndien Elijah ọdọk ke Heaven ke idio oro.” Anie mikpamaha ndinyọñ ke utọ usuñ oro. Israel ama ọduọk akwa ada-usuñ ke ini Ọbọñ esie ekemende Elijah ọnyọñ Ufọk.

Elisha, Eyen Shaphat

Abasi ekemek Elisha ndida itie Elijah. Inọhọ owo ekededi ndinam ofuri utom Abasi. Ekot nnyin kiet kiet ndinam idaha utom Abasi emi nnyin ikemede ndinam edieke nnyin imade. Elijah ama añwana ọkpọsọñ ndinam edikpono Abasi ada itie ke Israel, ndien utom esie ama ayarade owut idem ke otu mme owo. Enye ama añwana mme mkpọsọñ eñwan ọnọ Abasi, ndien ke emi-ekem ini ndiyet andida itie esie aran.

Ke utom Abasi, owo kiet kiet enyene ndinam nte ekemde ye ikot esie. Enyene ikpehe utom Abasi emi Elijah akanamde ama, ndien utom esie ama okure. Elisha ama ada itie Elijah onyuñ ọtọñọ do aka iso ke utom Abasi, okposuk edi ekedide ke nsio-nsio usuñ. “Edi mme enọ edi nsio-nsio, edi spirit edi kiet. Nsio-nsio usuñ erinam ñkpọ enyuñ edu, edi Ọbọñ edi kiet. Nsio-nsio oruk utom enyuñ edu, edi, edi Abasi kiet esine kpukpru owo ke idem anam kpukpru ñkpọ” (I Ñwed Corinth 12:4-6).

Ndusuk ini esineni ete anie okokpon akan. Elijah me Elisha? Emi asaña ekekem ye ndisime ye anana ifiọk mbume emi Paul ọnọde nnyin item ete isin. (Se 2 Ñwed Timothy 2:23; I Ñwed Timothy 1:4). Mmọ mbiba ekedi mkpọsọñ owo Abasi, mmọ kiet kiet ke ikot ye usuñ esie. Edisana owo Abasi enyene ndinyene udọñ nditiene uwut-ñkpọ ke ido Abasi ye edisana ido, iñwanake ndikpon man akara eyen ete esie, mme ndikpon ñkan eyen ete esie.

Eti Elisha akpan-akpan ke udọñ esie ndiyom “udeme spirit iba” mi otode Abasi, emi enye okoyomde akan ñkpọ efen. Elisha ama enyene uko ndibeñe Abasi ediwak, ndien onyuñ ọbọ ediwak oto Abasi. Utom Elisha otim atuaha ye ini Edisana Spirit, ye edinọ Ukperedem Edim, akan ke eyo mme anditiñ ntiñ-nnim ikọ. Ekeme ndida editọñọ utom esie ñkodomo ye mmọ emi eyomde enyuñ ebọde odudu eto ke enyọñ ebe ke uduọk-mmọñ Edisana Spirit.

Elisha okodu uwem erikan ofuri, nnyin ikwe nte ewetde ebaña utọ ini mmem-idem oro Elijah okokutde. Enye ama anam ikpọ utibe-ñkpọ nte Elijah, ama onyuñ anam akan anditiñ ntiñ-nnim ikọ efen ke esiode Moses efep.

Odudu Eriset

Mkpa Elisha ikedighe unyọñ erikan nte emi enye ekedide ntiense ke ini ekemende Elijah eduk ke Heaven. Elisha akakpa ke udọñọ; okposuk edi edinyọñ esie mikọwọrọke etop, enyene ñkpọ emi okotibede emi miwakke ndidi ntre ke mkpa esie ama ekebe. Owo emi ekeyomde ndibuk ke ebiet efen, ke nyekidem ema etop enye eduọk ke udi Elisha koro mme owot owo ekekperede. Ke ini okpo owo-mkpa oro ama okotuk ọkpọ Elisha, owo oro ama afiak odu uwem. Emi okoto odudu eriset emi okodude ke edisana owo Abasi oro.

Jesus ama ọdọhọ Martha ete, “Ami ndi eriset ye uwem: owo eke ọbuọtde idem ye Ami, okposuk edi nte enye ama akpa, enye eyedu uwem:” (John 11:25). Nnyin ifiak ikot ñko: “Edi edieke Spirit Abasi emi akanamde Jesus eset ke mkpa oduñde ke esit mbufo, Enye emi akanamde Christ Jesus eset ke mkpa eyenyuñ anam ikpọhidem mbufo emi enyenede ndikpa edu uwem, oto ke Spirit Esie emi oduñde ke esit mbufo” (Ñwed Mbon Rome 8:11).

Questions

MME MBUME

1. 1 Siak mme ediwak utibe-ñkpọ emi Elijah ye Elisha ekenamde emi eketiede ukem-ukem.

2. 2 Elisha ekebiet Elijah didie ke edu-uwem?

3. 3 Nnyin inam didie ifiọk ite ke owo kiet ikemeke ndinam ofuri utom Abasi?

4. 4 Unyọñ Elisha ọkọkpuhọre didie ye eke Elijah?

5. 5 Nso ke nnyin ikpep ito akpanikọ emi ọdọhọde ete okpo owo ama afiak enyene uwem ke ini okotukde ọkpọ Elisha?

6. 6 Ke nso usuñ ke ini utom Elisha ebiet ini Edisana Spirit?