Lesson 322 - Senior

Memory Verse

IKỌ IBUOT: “Ewai esit mbufo, ekuwai edisine-ñkpọ mbufo, enyuñ efiak edem etiene Jehovah Abasi mbufo: Koro Enye enyenede mfọn ye mbọm, isọpke iyaresit, onyuñ awak ima” (Joel 2:13).

Cross References

I Uyo Jehovah Ke Abaña Israel ye Mmọ Oko Gentile

1 Enọ Israel ata ọkpọsọñ ntọt ke abaña erisuan emi edisuande mmọ ye nte isọñ mmọ edinade ndon, Joel 1:1-12; Deuteronomy 4:25-28; Leviticus 26:14-39; Psalm 44:9-16; Ezekiel 6:1-7, 11-14; 36:16-20

2 Enọ ikot erikabare esit, Joel 1:13, 14; Deuteronomy 4:29-31; Leviticus 26:40-42

3 Etiñ ebaña usen Jehovah ye ndik ndik iyaresit ubiere-ikpe Esie, Joel 1:15-20; 2:1-11; Ezekiel 38:1-23; 39:1-29; Eriyarare 9: 1-21; 16:13, 14; 19:11-21

4 Enọ ikot efen ke abaña ọyọhọ erikabare esit, Joel 2:12-17; Isaiah 1:1-20

5 Enọ eñwọñọ eriñwam idut oro edieke mmọ ekabarede esit, Joel 2:18-20; Ezekiel 6:8-10; 36:28-38

6 Eyeñwaña akamba eridiọñ eke spirit eduọk ye uforo eke ikpọhidem ñkọ, ke ini emi editọñọde ntak itañ Israel ifiak, Jol 2:21-32; Ezekiel 36:21-27; 37:1-28; Jeremiah 31:1-40; Utom Mme Apostle 2:1-21

7 Etiñ ebaña akpatre akamba ubiere-ikpe emi edisimd mmọ emi mibọhọ erinyaña, Joel 3:1-21; Eriyarare 20:7-15; 21:8.

Notes

SE EKPPDE EBAÑA

Se ediọñọde ebaña Joel, anditiç ntiç-nnim ik] edi ata esisit, oro edi, enye ekedi eyen Pethuel okonyuñ odu uwem ke ñkpọ nte isua ikie itiaba mbemiso Christ amana. Nnyin imekeme ndikut nto ke ñwed emi enye ekewetde ite ke enye ekedi owo Abasi, ñko ke ema enam enye enyene ntọtuñọ ifiọk ke abaña uduak Abasi ye Israel. Edi ata utibe-ñkpọ akwa anditiñ ntiñ-nnim ikọ Abasi emi ndikere Joel, ndien enyiñ emi ọwọrọ Jehovah edi Abasi! Ibuot ukwọrọ ikọ esie edi ikot edikabare esit ye ntọt ke abaña mme ufen emi editienede edieke mmọ mikpañke utọñ inọ ikot emi.

Idut Emi Emekde

Ke ini Israel nte idut ọkọtọñọde ke Abraham, ema enam ediomi emi eridiọñ ye ufọn esie okokponde eti eti onyuñ osimde kpukpru emana. Kpukpru mme idut ererimbot ekenyene ndibọ eridiọñ nto ke ediomi oro. Sia Abraham okonimde Abasi ke akpanikọ, ema enọ enye eyen eren. Ntre ke idut eketo ke eyen eñwọñọ emi; ndien ke edikem ini Abasi ekekpeme, ekpep onyuñ ọtunọ mmọ, ke akpatre ada mmọ okoduk ke isọñ-eñwọñọ. Ke usuñ isañ mmọ. Moses ama ọnọ mmọ ntọt ke abaña mme ufen emi editienede mmọ emi etutde utọñ ke mbet Abasi onyuñ ọdọhọ ñko abaña mme edidiọñ emi editienede mmọ emi enimde mbet Abasi. Ikebighike Israel ema efre Abasi enyuñ etiene idiọk udọñ esit mmọ ke ndiyom nditie nte mme idut efen emi ekekande mmọ ekuk.

Ke ediwak isua ema ekebe ke idak ime Abasi ye Israel, ekedi ndikut mmọ nte eduọde eduk ukpono ndem ke ini ke ini,, ke akpatre Abasi ama asana mmọ ayak esin ke itie ntañ mfep. Ntañ mfep emi ekedi ntọñọ ufen nte eketiñde ke ntiñ-nnim ikọ ete eyesim mmọ edieke mmọ esinde uyo Abasi. Ke itie ntañ mfep oro mmọ ema efiori enọ Jehovah ndien Enye okop, afak mmọ onyuñ ọtọñọ ntak ada mmo afiak ke isọñ mmọ. Ema etọñọ ntak ebọp Temple; ndien okposuk edi nte ubọñ esie mikedighe se edade edomo ye akam emi ekebọpde, edi osuk edi kpa ufọk Abasi, ukpono Abasi ama aka iso do. Isral ikenyeneke nsọñọ nda ke Abasi, oro esin ke akpatre mbon Rome ema ekan mmọ.

Edi idut emi ema esin mbọm Abasi ofuri ofuri tutu osim ini emi mmọ ekọñde Christ, Messiah mmọ ke eto. Mmọ ekedọhọ ete yak iyip Esie ọkọbọ mme imọ ye nditọ mme imọ edi nnyin imokut mi ite ke Abasi ikenọhọ mmọ se mmọ ekebeñede ikpọñ edi ama ọkọrọ ye kpukpru ubiere-ikpe ke abaña erisin emi mmọekesinde mme etop Esie. Ema esobo idut mmọ. Ewuri mme obio ye Itie-ukpono mmọ. Ekọbọ mmọ enyuñ esuan mmọ esin ke kpukpru iso isọñ. Ekebat mmọ nte mfum mfum ke ererimbot, owo ikabatke mmọ ke ñkpọ, edi ekabare esua mmọ. Edi mmọ ekesuk eda ke idaha mmọ, enyuñ eforo ke ndusuk idaha ekan mme mmọ eñwen ke ererimbot. Mme Jew ema enyene ata akamba inyene nte idut, ema enyuñ esidu ñko ke ata ọkpọsọñ unana nte idut, mmọ edi mme okpono Abasi enyọñ-enyọñ, edi esin nkukure Owo emi ekemede ndida mmọ nsọk Abasi. Edi Abasi ifepke enyin ikpọñ mmọ, koro Enye osuk etide eñwọñọ Esie ye ete mmọ Abraham.

Mme Ntọt Emi Mme Anditiñ Ntiñ-nnim Ikọ Ekenọde

Israel ema ebọ ufen eti eti oto ke mmọ ndisin Eyen Abasi ye mmọ ndiyuñ ntut utọñ ke uyo Abasi. Edi mmọ ikemeke ndidọhọ nte ke mme imọ ikọfiọkke ite ke eyedọñ ubiere-ikpe emi etiene mme imọ. Edisana Spirit ọsuhọ ediwak ntọt emi otode Akani Ediomi ke abaña ñkpọ emi. Ke akpanikọ mme anditiñ ntiñ-nnim ikọ ema enọ mmọ item awak akan se ewetde enim enọ nnyin. Ikọ ntọt emi odudu ke ofuri Ñwed Abasi. Kpukpru ini esiwak nditiñ ete, edieke Israel esukde ibuot eyediọñ mmọ; edi edieke mmọ esọñde ibuot, mmọ eyebọ ufen. Joel, anditiñ ntiñ-nnim ikọ edi kiet ke otu mmọ emi Abasi ọkọdọñde ndida akwa ye akpan etop emi ndi.

Eyighe iduhe nte ke Joel ekedi ọkwọrọ edinen ido, ọnọ owo item, ke abaña usuñ Abasi ye edisana ido, isuñ utom Abasi nte ewakde ndikut ke uwem esie. Edi edisana Spirit ama onyime ndisuhọ kpa ntiñ-nnim ikọ kiet emi, emi Joel eketiñde abaña Israel ye mme Gentile. Ntiñ-nnim ikọ emi ke idem esie ọyọhọ ye mkpa idem, koro mme ibuot ñwed ita emi tọñọ ke mfiak edem nditọ Israel etiñ ñkpọ tutu osim Akwa Afia Ebekpo ubiere-ikpe. Ke udọn ye mbufiọk ikọ emi, ntiñ-nnim ikọ emi odot se nnyin ineñerede ikpañ ntọñ man nnyin ikeme ndibọ etop esie, ikubiet mme mmọ oro Abasi okoyomde ndidiọñ edi akabade ososuñi.

Udomo Idaha Ntiñ-nnim ikọ oro

Akpa itie ke ntin-nnim ikọ oro etiñ abaña mfiak edem nditọ Israel ke spirit ye edisuan mmọ nsin ke ofuri ererimbot. Mme ntọt emi ekebuaha ye ikot ndikabare esit nnyuñ ñkpono Abasi ọyọhọ ọyọhọ ke usuñ nte ekemede ndikut ke ebiet ekededi ke Ñwed Abasi. “Mbufo ewai esit mbufo, ekuwai edisine-ñkpọ mbufo, enyuñ efiak edem etiene Jehovah Abasi mbufo: koro Enye enyenede mfọn ye mbọm, isọpke iyaresit, onyuñ awak ima,” edi kiet kotu mkpe ubọk emi otode Abasi nnen-nnen osim ikọt Esie. Israel ema enyene enyọñ-enyọñ ido ukpono Abasi, emi ikedighe nnen-nnen, koro mmọ ekekot enyiñ Abasi ke mkpọk inua mmọ ke ini esit mmọ ama ọkọwọñọre ọkpọñ Enye.

Enyọñ-enyọñ ukpono Abasi inyeneke udori ibọhọke esit ọwọñọre etiene Abasi. Utre udia, ke idem esie, edi ikpikpu ibọhọke asaña ye akam ye mkpe ubọk emi otode ọwọñ esit, emi Abasi amade ndibọ. Edimia idem ufen ke usuñ kiet ekededi man ebọ mfọn Abasi, ke ini owo osuk odude ke idiọk-ñkpọ ye ukwañ ido, ikemeke ndiñwam, edi akam ọdọdiọñ ọsọñọ owut ete ke iyaresit Abasi eyetiene owo oro ọdọhọde ete ke imekabare esit. Edu ukpono Abasi ekededi emi akañde odudu Abasi ikemeke ndida owo oro nsim ke Heaven. Nnyin imekeme ndiwai edisine ñkpọ nnyin ndiwut ido edikabare esit edi isuk inyenyene esit emi oyomde usuñ ọkpọñ editua ñkpọfiọk. Etop anditiñ ntiñ-nnim ikọ oro ekedi yak mmọ esioño ikpikpu edinam me usọrọ, ediwut idem nte owo Abasi ye kpukpru mme ñkpọ oro mmọ ekenyenede oto ke edinam ye edinim ido obio mmọ, enyuñ efiak etiene Abasi ke ọyọhọ edikabare esit edieke mmọ eyomde ndibọhọ enyene-ndik nsobo emi edide etiene mmọ.

Israel ikokopke ikọ Joel, adaña nte etiñde ebaña edikabare esit. Ikọ Abasi ama osu ndien ema esuan mmọ esin ke ofuri ererimbot. Edi Abasi ifreke enyin ibaña Israel, emi Enye ọfiọkde onyuñ amade; Enye ke ọtọñọ ntak enen iso ye mmọ.

Mme mmọ emi eyerede ikot Abasi ema emen utom oro Israel ekpenamde enam, ọkọrọ ye nsin ifik ke ndida etop ke abaña Messiah emi ekedide ndiñyaña ererimbot nsio ke mme idiọk-ñkpọ mmọ nsọk ererimbot ye mme Jew emi ekesuande. Mme owo ke otu mme Jew ema eyere ikot oro, edi idut mmọ esuk edu ke unana edinim ke akpanikọ. Edisin emi mmọ ekesinde Christ ke osuk akaka iso tutu mfin: koro ke mme usen akwa ukut mbemiso ọyọhọ ini iyaresit oro osim mmọ, mmọ eyenam ediomi ye ebuana ye Asua Christ. Ke ibio ibio ini, Asua Christ eyebiat ediomi oro onyuñ ọwọñọre kpukpru odudu iyaresit esie etiene mme Jew. Ini emi ke edikot ini ukut Jacob. Mmọ eyekut ukut ke usuñ emi akananam mmọ mikwe, ndien ke ufọt ini ukut mmọ, mmọ eyefiori ekot Abasi man afak mmọ. edi ke utọ ini eseme emi mmọ edisemede ke ofuri esit enọ Abasi ke mme ikpọ ñkpọ editibe.

Ufọk Abasi Christ ididuhe ke ererimbot ke ini emi. Mmọ edidu ye Christ ke ebekpo Abasi, ke Usọrọ Ndọ Eyen Erọñ. Owo eñwen ididuhe emi mme Jew ekpekade ekeyom ndọñesit ke mibọhọke Abasi. Mmọ Oko (Gentile) emi esuande etop Abasi ididuhe nditiñ nnọ mmọ mbaña Christ emi ekedide, emi mmọ ekesinde. Eyewot ata ediwak mme Jew, edi nsuhọ eyesuk odu emi edibọhọde edinyuñ efioride ekot Messiah edi edinyaña mmọ. (Ema ekut oruk ñkpọ emi ke ata esisit idaha ke ido nte ekese mme Jew ekenamde ke ini ndik ndik ukọbọ okosimde mmọ ke ini Ekọñ Ofuri Ererimbot ọyọhọ iba. Ediwak mmọ, nte ekedade (mmọ) eka nsio nsio itie man ewot mmọ, ema efiori ekot Messiah, ete edinyaña mme imọ. Adaña didie ndien ke ñkpọ emi editie ke ini ata ọyọhọ iyaresit ini ukut Jacob oro edisimde mmọ! Messiah eyedi; ndien ke eridi Esie, ke ini mme Jew edikpọñde unana erinim ke akpanikọ inyuñ ikpono enye emi mmọ ekesinde, idut nditọ Israel ndien eyemana ke usen kiet. Ukara emi Abasi ama okonim ọnọ ndimek ikọ Esie eyeda itie ukara ekededi emi mmọ edinyenede ke ini oro. Christ edidi ibuot Ukara Oro. Edidi Christ idaha emi edidi Eriyarade Esie.

Israel enyene ukara idem mmọ, edi imekeme ndikut nte ke idighe nnen-nnen ukara emi Abasi okonimde ọnọ mmọ edi oro. Nte ido esidide, ata nnen-nnen ukara ikemeke ndidu ibọhọke tutu Edidem odu ndida ibuot, ndien Enye ididighe ibọhọke tutu mme Jew enyime ndida Enye nte Christ mmọ. Ndien nte nnyin isede, edidi ata akamba ufen ndida mme Jew nsim utọ itie edisuhọre idem nsin uduak Abasi.

Etiñ ediwak ñkpọ ke itie ñwed emi nte nnyin itimde ikere ye ke mme itie ñwed efen emi abañade ukem ñkpọ ntibe emi. Etiñ enọ nnyin ebaña mme ñkpọ ntibe ke ekpri ibio ini oro ke ufọt Israel ndifiori ñkot Messiah mmọ ye edidi Edinen Owo oro. Ke ini Christ edidide, Enye edidi ye tọsin ndimek ikọt Esie duop, mbon ekọñ Heaven, ndien eyeñwana ekọñ ye mbon ekọñ ererimbot emi onyuñ akan mmọ. Enye eyenyuñ owuk Obio Ubọñ edinen ido, onyuñ akara ke tọsin isua ke isọñ emi. Tọsin isua ukara emi edi Ini Ukara Christ. Ini odu emi ekotde Usen Ọbọñ, oro edidi utit ediyarare idem Christ, ini emi ke Enye edida enyene ndik ubiere-ikpe itiene mme mmọ emi midaha ye Enye ye kpukpru mmọ emi efikde ndimek ikọt Esie. Se iditienede Usen Ọbọñ emi, ye ke idem ini Ukara Christ ke tọsin isua Israel yemek ndidi ikọt Christ; idighe koro Abasi ama ọñwọñọ ye Abraham, edi koro mmọ eyemenere enyin mmọ ese Enye emi mmọ ekekimde ndien eyekabare esit ke mme idiọk ñkpọ mmọ enyuñ ebọ erinyaña.

Mme Ñkpọ Ntibe Emi Edidade Itie Ke Usen Ọbọñ

Nte nnyin isede mme ñkpọ ntibe mfin ọsọsọñ eti eti nnyin ndikut mmọ ke enyin nte nkpọ nsi nsi, ndien se nnyin idoride enyin ibaña edi ikpikpu oto ke mme ñkpọ eke etiede nte akpan ñkpọ emi osuk akade iso idaha emi. Man ntiñ-nnim ikọ otim eneñere añwaña nnyin inyene ndidiañare ñkpọñ ọkpọsọñ eriduñọre mme nkpọ ntibe eyo mfin ndien idomo mmọ ye mme ñkpọ ntibe emi ekebede ye mme ñkpọ oro edidide ke ini iso.

Obio Ubọñ Christ ọtọñọ ke akpa eridi Esie, edi Christ ididighe nte Edidem ke Eriyarare Esie ibọhọke Enye edi ke Ntañ Ndọk. Nnyin imofiọk ite ke edi ata Obio Ubọñ ye ubọñ eke Spirit emi Israel edinyenede ye Christ nte ibuot, enyene ebuana ye editọñọ ukara emi ama akadada itie, ye erifiak nyọñ mme Jew ñka ke obio mmọ emi osuk adade itie idaha emi. Ndien akwa ñkpọ ntibe erifak emi edidade iti ke Usen Ọbọñ iditibeke tutu mme Jew efiori enọ Abasi ebaña erifak. Mmọ idinyuñ iyomke erifak ibọhọke tutu efik enyuñ ekobọ mmọ ke isọñ emana mmọ, ke mmọ ema ekenyọñ ye unana erinim ke akpanikọ. Okposuk edi nte mme ñkpọ ntibe emi edisọpdesọp, nte ededi mmọ ekeme nditibe ke ata;ibio ibo ini ke unana idorenyin. Ididaha tọsin isua mme isua ikie mbemiso mme ñkpọ emi ewọrọ esu ke akpanikọ. Ikọ Abasi ọdọñ kpukpru oro ke mme usen idighe ke mme isua mme ke mme ini. Edi ata nnen-nnen nditọ Abasi eyedu ke mbeñe idem ebet Ntañ Ndọk emi ekemede ndida itie ke ini ekededi emi edibemde edinim ebekpo odudu Asua Christ iso.

Ukperedem Edim

Ediwak ñkpọ eyeda itie ke esisit ini mbemiso enam kpukpru ñkpọ ema. Ndusuk mme ñkpọ-ntibe emi ema edada itie ndusuk eken ke ekpere ndisu. Edi kpukpru mme ñkpọ ntibe emi ke enyeñe enyuñ eyire ke akwa ñkpọ-ntibe emi okponde ke ñkañ Spirit. Ediwak mme okpono Abasi ke ererimbot emi imaha ndikpañ utọñ nnọ ñkpọ-ntibe emi, edi ata isen isen ñkpọ. Ediwak mmọ emi ekpedide mme anditiene Christ ifiọkke ibaña akpan ñkpọ emi odude ke akwa idiọñọ ini mfọn emi. Akwa ñkpọ-ntibe emi, ediwak ñkpọ eyirede, mme ọkọñọde, edi ukperedem edim emi edepde.

Ama edi nte Joel eketiñde ke ntiñ-nnim ikọ, Peter onyuñ akabarede ke usen Pentecost, akpa edim spirit Abasi, emi Ufọk Abasi ini oro ekenade uduọk mmọñ ke edisana Spirit, Edisana Spirit ama ebe ke Peter, ofimi eyihe ke esit mme owo emi ekpekerede se ntiñ-nnim ikọ Joel emi ọwọrọde ke abaña ñkpọ ntibe emi. Abasi ọdọhọ ete: “Ama ekem ke ukperedem ini, Nyeñwaña spirit mi ndori kpukpru obukidem: Ndien nditọ iren mbufo ye nditọ mbufo iban eyetiñ prophecy, mkparawa mbufo eyekut ñkukut, Mbiowo mbufo eyenyuñ edaba ndap: Ke eyo oro nyenwaña spirit Mi ndori ifin iren Mi ye ifin iban Mi: mmọ eyenyuñ etiñ prophecy” (Utom Mme Apostle 2:17, 18). Ndien eyighe ikpoduhe aba ke abaña mme ntiñ-nnim ikọ eken nte abañade eriñwaña Spirit nduọk, koro Peter: ama ọdọhọ ete ke eyenọ kpukpru owo ukem odudu emi adaña owo nte Abasi edikotde, ke kpukpru ini ye ke kpukpru ebiet ke ofuri ererimbot.

Ke ini Ererimbot okodude ke ata Ekim, ke adaña emi uñwana Eti-mbuk ama ekekpere ndinime ofuri ofuri ke ererimbot, utom emi Edisana Spirit ekesinamde ama etre. Ibọhọke tutu ama okosim ọyọhọ emana edip ke Edisana Spirit ọkọtọñọ ntak owut idem kpa ke ukem usuñ emi ye ke ukem idaha Esie. Martin Luther ama ada ukpep ñkpọ utebe-ikpe ke mbuọtidem afiak edi ke ererimbot ke ata ediwak mme okpono Abasi ema ekefre enyin ebaña ukpep-ñkpọ oro, ibọhọke mme ibat ibat owo emi ekesuanade ekebọ ke ini Ekim oro. John ye Charles Wesley ke ema eketiene uñwana emi okowutde idem ke eyo mmọ, ema eyom se ikande oro ke Abasi, ndien oto ke mmọ ukpep-ñkpọ edinam asana ofuri ofuri ama afiak oduk edi ke ererimbot. Ndien ke ini akamba udọñ ke ñkpọ spirit, ke ọfiọñ April 9, 1906. Abasi ama otim ekpri out owo onim ke obio Los Angeles ke California, man oto do mmọ ebọ oyọhọ enọ mfọn ita; emi edide iberedem Edisana Spirit. Nte nnyin ikotde ntiñ-nnim ikọ Joel, nnyin imekeme ndikut ite ke erinwaña ukperedem Edim nduọk ekedi se enimde enọ ukperedem ini, ini emi ebemde Usen Ọbọñ iso onyuñ eneñede ekpere eti eti.

Erinọ akwa odudu Spirit emi esọk mme Gentile kpa ye mme Jew, eneñere owut añwa-añwa oto ke ikọ Peter ke Usen Pentecost. Ñko ke ikọnọhọ mme mmọ oko (Gentile) ikpọñ inyuñ isin mme Jew eneñere añwaña ke itie ñwed oro ye ke ofuri itie ñwed Abasi. Ezekiel ewet, oro ke nda usuñ Abasi ete:

“Ndien nyesime mbufo edisana mmọñ ke idem, ndien mbufo eyedi edisana: nyesio mbufo kpukpru ndek mbufo ye kpukpru ibọk mbufo ke idem mfep nnam esana.

“Nyenyuñ nnọ mbufo obufa esit, nnyuñ nda obufa spirit, nsin mbufo ke idem nnyuñ nsio mbufo esit enyene itiat ke obuk mfep, nnyuñ nnọ mbufo esit enyene obuk.

“Nyenyuñ nda spirit mi nsin mbufo ke idem, nnyuñ nam mbufo esaña ke mme ewuhọ mi, enyuñ ekpeme ikpe mi enyuñ enam” (Ezekiel 36:25-27).

Ini akwa utom spirit emi, emi edide mfọn ye mbubehe mme Jew saña saña, eneñerede ewet mi nte eritọñọ ntak ntañ mme Jew mbọk kadaña emi edinamde mme Jew esana ke iso kpukpru mme okpono ndem (Ezekiel 36:23). Emi ididighe usen efen ibe Usen Ọbọñ! Ini efen iduhe emi mme Jew ediọñọde Christ nte Ọbọñ ye Andinyaña mmọ enyuñ eda Abasi nte Abasi mmọ ke ndikpono Enye ke akpanikọ. Ekeme ndibup ete, nso utọ utom spirit ke edinam enọ mmọ ke utọ ini emi? Ke ibọrọ esie yak nnyin ikere ibaña itie ñwed emi ekotde ke enyọñ.

Enyene ndisime mme Jew “Edisana mmọñ,” ndien eyesio mmọ ke ndek ye ke ukpono ndem efep. Oro idighe ñkpọ efen ibe enọ utebe-ikpe ye eridahado nnọ ke mme idiọk ñkpọ mmọ. Etim ekekere mme ikọ Abasi, ndien ke utọ ntak oro nte enyuñ etiñde ikọ, oro, ete ke ema efen enọ mme Jew ke mmọ eyebọ enọ efen. Ke ọyọhọ enọ iba ekpuhọre esit mmọ enyuñ enam spirit mmọ ekabare edi obufa. Emi, ñkọ asaña ukem-ukem ye mme itie efen ke ñwed Abasi, koro uduak Abasi edi mme mmọ emi ema ekenyaña mmọ esio ke uwem idiọk-ñkpọ enyene ndika iso nyom nyuñ mbọ ọyọhọ enọ mfọn iba oro edi edinam-asana ofuri ofuri. Eyenam mme Jew, ndien, esana etiene edinam emem mmọ ye Abasi.

Edi ediyak ọyọhọ-ọyọhọ mfọn eke spirit nnọ mmọ ididuhe ibọhọke mmọ ebọ kpukpru edidiọñ emi Abasi enyenede ndinọ ndaña owo eke edide etiene Enye. Ke ntre, nte nnyin ikotde ke mme ufañ efen ke itie ñwed emi esiakde mi, imokut ite ke mmọ ñko enyene ndinyuñ mbọ Uduọk mmọñ Edisana Spirit ukem ukem nte nnyin emi idude ke ini Ukperedem Edim emi. Abasi ọdọhọ ete: “Nyenyuñ nda spirit mi nsin mbufo ke idem.”

Nnyin iyom mme owo eneñere etiñ enyin ke mme ikọ Iba oro iwetde ke ikpọ ubọk ñwed do. Ikọ oro, Nyenyuñ; eneñere owut ete ke emi edi enọ efen emi adianarede ọkpọñ iba eken, ukem-ukem oro ke ikọ emi, nyenyuñ, owut ete ke eribọ edinam asana ofuri ofuri emi mmọ edibọde edi saña-saña, adianarede ọkpọñ enọ erifen, mme eridahado nnọ ke mme idiọk-ñkpọ mmọ. Ọyọhọ enọ ita edi Uduọk mmọñ Edisana Spirit ye ikañ. Ikọ oro ke idem esie enyene mbiet ñko, koro kadaña emi Jesus ọkọnọde enwọñọ abaña edidi iberedem Edisana Spirit Enye ọkọdọhọ ete: “Nyenyuñ mbeñe Ete, ndien Enye eyenọ mbufo Iberedem efen, man Enye edidu ye mbufo ke nsi nsi; kpa spirit akpanikọ;.... Enye ododuñ ye mbufo, eyenyuñ odu mbufo ke esit” (John 14:16, 17). Kufre ñko ete ke Christ eketiñ mme ikọ emi ọnọ mme Jew, ndien ekedi tutu ke Usen Pentecost ke mmọ ekefiọk ete ke mme ikọ oro akabaña mme mmọ oko (Gentile!)

Mi ke Akani Ediomi, nnyin imokut mme ikọ Obufa Ediomi, mme eñwọñọ Obufa Ediomi, ye mme edidioñ eke ñkañ spirit eke Obufa Ediomi nte etiñde ebaña. Mme edidiọñ emi inyeneke ibat-ibat owo ikpọñ, edi enyene kpukpru owo, “odoro mme Jew ke akpa itie, onyuñ odoro mme Greek ñko: koro Abasi miteñeke owo enyin” (Ñwed Mbon Rome 2:10, 11).

Questions

MME MBUME

1. 1 Nnyin idiọñọ adaña didie ibaña Joel, anditiñ ntiñ-nnim ikọ?

2. 2 Nso idi ata akpan ibuot ntiñ-nnim ikọ Joel? Ewe akwa usen ke enyuñ esiak ke mme ibuot ñwed oro?

3. 3 Ewe anditiñ ntiñ-nnim ikọ eke Abasi efen eketiñ ntiñ-nnim ikọ abaña erisuan nditọ Israel?

4. 4 Ke Isaiah ibuot kiet, nnyin imokot ibaña edu ukpono emi mikenemke Abasi esit. Tiñ mme akpan ñkpọ emi ekpenamde Abasi enem esit ke edu ukpono nnyin.

5. 5 Ntak emi Abasi eneñerede enyene ima abaña nditọ Israel?

6. 6 Tiñ mme edidiọñ emi edinọde nditọ Israel ke ini editañde mmọ efiak ọyọhọ-ọyọhọ.

7. 7 Nte idut Israel eke idaha emi edi ọyọhọ ọyọhọ edisu emi eketiñde mme ntiñ-nnim ikọ ebaña editọñọ ntak ntọñọ idut oro ke isoñ. Edieke midighe ntre, tiñ se isuhọde ndinam.

8. 8 Nso itie ke Israel edinyene ke ini ukara Christ ke tọsin isua?

9. 9 Mme anie edida ke iso Akwa Afia Ebekpo ndikop ubiere-ikpe mmọ?

10. 10 Mmọñ ke edinọ mmọ emi ikpe obiomde ke iso Akwa Afia Ebekpo ubiee-ikpe eka?