Lesson 323 - Senior

Memory Verse

IKỌ IBUOT: “Ñkokut idiọk owo enyene-ndik, onyuñ asuan idem esie nte awawa eto, eyen isọñ. Ekem enye adaha, ndien, sese, enye iduhe: ndien nyom enye, edi idige aba nte ekutde enye” (Psalm 37:35, 36).

Cross References

I Ukọbọ Herod Ye Mme Mbet

1 James edi akpa Mbet emi ekewotde ke ntak ikọ Abasi, Utom Mme Apostle 12;1, 2; 8:1

2 Herod aduak ñko ndiwot Peter man enem Mme Jew esit, Utom Mme Apostle 12:3; Ñwed Mbon Galatia 1:10

3 Herod ọkọbi Peter, onyuñ aduak ndiwot enye ke Easter ama ebe, Utom Mme Apostle 12:4; Mark 14:2

II Ubọhọ Peter Edi Ibọrọ Akam

1 Ema ebọñ akam kpukpru ini ebaña Peter, Utom Mme Apostle 12:5; Luke 18:1; Ñwed Mbon Rome 1:9; I Ñwed Thessalonica 5:17; 2 Ñwed Timothy 1:3

2 Angel ama edemere Peter ke idap ye ñkpọkọbi ke ubọk ke ufọt mbon ukpeme, Utom Mme Apostle 12:6, 7

3 Ñkpọkobi ema ekpọhọre Peter ke ubọk, ndien edọhọ enye etiene angel, Utom Mme Apostle 12:8

III Edifiak Nnyọñ Peter ke Ufọk Emi Ekebọñde Akam.

1 Ke efak obio, Peter ama ọfiọk ete ke angel ama afak imọ, Utom Mme Apostle 12:9-11

2 Ke ama ekedisim ebiet emi mme owo ekebọñde akam enye ọkọñ ke usuñ, Utom Mme Apostle 12:12, 13; 10:30

3 Rhoda ama owut mbuọtidem emi okponde akan mmọ eken, Utom Mme Apostle 12:14-17; Luke 18:17

IV Idiọk Mkpa Herod

1 Ema ewot mbon-ekọñ oto ke Peter ndiwọrọ ke utibe usuñ, Utom Mme Apostle 12:18, 19

2 Herod ama etiñ mkpọsọñ ikọ ọnọ Mbon Cesarea. Utom Mme Apostle 12:20-22

3 Ndọñ ama ata edidem, koro enye mikọnọhọ Abasi ubọñ, Utom Mme Apostle 12:23; Job 24:20

Notes

SE EKPEPDE EBAÑA

Mme Anam Utom Enyin Owo

Herod emi okowotde James, akpa ke otu mme Mbet ndikpa ke ntak ikọ Abasi, ekedi eyen-eyen Herod emi ọkọnọde uyo ete ewot kpukpru nsek nditọ ke Bethlehem man oto do ekpowot Jesus. “Ndien enye owot James eyen-eka John ke ofut. Edi ke ini enye okutde ete enem mme Jew esit, enye amana aka iso omum Peter.” Nso oruk eyen hell idi emi, emi ebierede ndiwot ikọt Abasi man enem mme owo esit! Herod Antipas okowot John oduọk owo mmọñ man enem adiaha Herodias esit. Pilate akayak Jesus ọnọ otu owo ete ewot ke cross man enem mme ikpọ oku ye mme andikara mbio obio esit, Felix ọkọkpọñ mkpọkọbi ke ubọk Paul man enem mme Jew esit, ndien Festus okoyom ndinem mme Jew esit akan ndinọ nen-nen ubiere-ikpe.

Mmọ emi eñwanade ndinem mme owo esit kpukpru ini eyayat Abasi esit. Ido mme Mbet ekedi, “Nnyin inyene ndikop uyo Abasi ñkan uyo owo” (Utom Mme Apostle 5:29). Owo emi anamde utom ke idak owo efen enyene nditi item Abasi emi ọdọhọde ekop uyo, “ekunam utom enyin owo, nte mbon mbukpek, edi enam ye esit kiet ke uteñe Ọbọñ. Sededi eke mbufo enamde, enam ke ofuri esit, nte ñkpọ eke enamde enọ Ọbọñ, minamke inọ owo; sia mbufo efiọkde ete iyebọ Ọbọñ udeme nte utip mbufo. Mbufo enam utom enọ Christ Ọbọñ” (Ñwed Mbon Golossae 3:22-24)

Ọbọñ enem esit ye mmọ emi enamde utom usen mmọ ọfọn, ekpedi andikpe utom odu do miduhe. Ke ediwak idaha esidi udọñ anam utom ndidomo ofuri ukeme esie ke ini ekpemede enye. Kpukpru ini Ọbọñ ke ekpekpeme, se ededi eke anade enam, eyen Abasi enyene ndinam enye nte anam ọnọ Ọbọñ minamke inọ owo. Okposuk edi owo edibọde utip oto owo, edieke enye anamde “nte ifin Christ: eda erinyime esit enam utom, nte ñkpọ eke mbufo minake inọ owo, edi enamde enọ Ọbọñ.” Enye enyene eñwọñọ Abasi ete “eti ñkpọ ekededi eke owo anamde, kpa oro ke enye editọñọ ntak ọbọ ke ubọk Ọbọñ” (Ephesus 6:6-8).

Ndusuk ini ke utom Ọbọñ mme owo esin idem ndinam utom emi mme owo ekutde, edi esin ndinam mme utom emi owo mikwe. Jesus ọkọdọhọ ete ke nnyin idinyeneke utip ito Ete nnyin emi odude ke Heaven ke se inamde man mme owo ekut. Anam utom ke ndop-uyo emi minamke utom enyin owo eyebọ utip akan enye emi anamde man mme owo ekut.

Ukọbọ

Ekedi ke ini Easter, mme ke ini Usọrọ Passover ke Herod okoyom ndinyan ubọk ntuk mbio ufọk Abasi. Emi akada itie ke isua duop ama ekebe, ke akpa ukọbọ emi ekewotde Stephen, ndien ikọt Abasi, ke esiode mme Mbet efep, ema esuana. Idaha emi mme asua ekenyanare ubọk ebine mme adaha ufọk Abasi, mme Mbet duopeba. Ndien ke otu ita emi Christ akamade, ema ewot James ndien Peter okodu ke ufọk ñkpọkọbi ebet ini emi ediwotde enye. Nditọ Abasi enyene ndibiom isin-enyin. “Ke akpanikọ kpukpru owo eke eyomde ndidu eti uwem ke Christ Jesus enyene ndibiom isin-enyin” (2 Ñwed Timothy 3:12). Paul, ke etiñde abaña mme isin-enyin emi okosimde enye, ọdọhọ ete, “adaña isin-enyin eke okobiomode mi do; edi Ọbọñ akanyaña mi ke kpukpru oro” 2 Ñwed Timothy 3:11).

Ubọhọ

“Enyin Jehovah ese mbon eti ido, utọñ esie onyuñ ọbiọñọ ọnọ eseme mmọ” (Psalm 34:15). Nditọ Abasi ema ebọñ akam kpukpru ini ke ini Peter okodude ke ufọk-ñkpọkọbi ye ñkpọkọbi iba ke ubọk ke ufọt mbon ekọñ iba. Ufen emi ama okpon utim ikaba akan nte emi esikọbide owo ñkpọkọbi kiet edian ke owo ekọñ kiet. Mbon-ekọñ efurekiet ema ekpeme owo ñkpọkọbi emi ndikut nte enye ifeheke nte usen emi ediwotde Peter ekperede. Edi Abasi ama okop akam ndinen owo onyuñ ọdọñ angel Esie akanyaña Peter. Ikafañ ke Abasi esida mme isuñ utom Heaven ọkpuhọre uduak mme idiọk owo!

Mme Angel

Ini kiet ko, ke ini Peter okodude ke ufọk-ñkpọkọbi ye mme Mbet eken, angel Ọbọñ ama eberede mme usuñ ufọk-ñkpọkọbi onyuñ osioño mmọ ke adaña emi andikpeme mifiọkke ete ke mmọ ema enyọñọ. Ekedi ñkpọ mkpa-idem ọnọ mbon ukpeme ke ini mme etubom ekedide edikut mmọ nte ekpemede ikpikpu ufọk-ñkpọkọbi. Angel Ọbọñ ama akpat itiat efep ke udi ke ini Jesus ekesetde ke mkpa. “Ndien oto ndik esie mbon-ukpeme enyek, enyuñ ekabare etie nte mme akpa mkpa” (Matthew 28:4). Abasi ọkọdọñ angel Esie man akanyaña Daniel osio ke inua mme ekpe. Ke nkañ mme angel. Paul obup ete. “Nte mmọ kpukpru idighe mme spirit emi esañade utom, emi esiode edọñ mmọ ete, enam ñkpọ enọ mmọ emi edidade erinyaña enyene?” (Mme Hebrew 1:14).

Mbuọtidem Nnyin ke Abasi

Ndusuk ini Abasi esiyak idomo osim nnyin edi iyakke edomo ebe ukeme nnyin. Enye ama onyime etop Daniel esin ke obube mme ekpe, edi ama ọkọbi mme ekpe inua. Eketop nditọ Hebrew ita esin ke akwa ikañ emi akasakde, edi ikañ ikenyene odudu ke idem mmọ. Peter okodu ke ufọk-ñkpọkọbi tutu ekpere ini emi ekeduakde ndiwot enye, edi Abasi ama ọdọñ angel Esie man edinyaña enye. Oto ke mme uwut ñkpọ emi Abasi ekpep nditọ Esie ndibuọt idem ye Enye. Ekeme nditie nte ke asua eyekan nnyin, edi edieke isọñọde ida iyenyene erikan.

Unana Edinim Ke Akpanikọ

Edi ọkpọsọñ ñkpọ ọnọ ediwak nnyin nditim mfiọk nte Abasi etiñde enyin ye mmọ eke enyenede Enye. Ke ini angel atuakde Peter ke nkañ onyuñ ada enye ọwọrọ ke ufọk ñkpọkọbi. Peter ekekere ete ke edi ndap. Ke ini Rhoda eketiñde ọnọ mbet ete ke Peter odu ke inua otop mmọ ekedọhọ ete “Edi angel esie ke edi.” Mmọ ema eboho ọtọ kiet ndibọñ akam ke abaña ubọhọ Peter, edi ke ini Peter ama ọkọbọhọ, idem ama akpa mmọ. Esidi utibe-ñkpọ ndikut usuñ emi Abasi esidade ọbọrọ akam onyuñ anam mme utibe-ñkpọ. Ke ikutde nte Abasi anamde utom oto ke ata ekpri mbuọtidem ikọt Esie, nso iditibe edieke nnyin inyenede ọyọhọ mbuọtidem inyuñ inimde mme eñwọñọ Abasi ke akpanikọ?

Jesus ọkọdọhọ ete: “Ke akpanikọ ke ndọhọ mbufo, edieke mbufo enyenede mbuọtidem, minyuñ iyikke, idige se enamde ye eto fig emi ikpọñ ke mbufo edinam, edi edieke mbufo edọhọde kpa obot emi ete, Wuhọre, kọduọ, sine ke akwa inyañ, eyewọrọ osu. Ndien kpukpru ñkpọ ekededi eke mbufo edibeñede ke akam, edinyuñ ebuọtde idem, mbufo eyenyene” (Matthew 21:21, 22). Ke ini efen Jesus ama ọdọhọ owo kiet ete, “Edieke ekemede! kpukpru ñkpọ ekeme ndiwọrọ nnọ enye emi ọbuọtde idem” (Mark 9:23). Esit nnyin akpakam etie nte eke owo emi okofioride ye mmọñ eyet ete, “Mmọbuọt idem; ñwam unana mbuọtidem mi” (Mark 9:24). Eyak nnyin itie nte mme Mbet emi ekedọhọde Ọbọñ ete “Nam mbuọtidem nnyin okpon akan” (Luke 17:5).

Iseri

Nte enye etiede ke ebekpo esie ye edisine ñkpọ ubọñ ke idem, Herod ama emenere idem oto ke se enye eketiñde. Enye ekekere ete ke imọ imokpon ikan nte imọ itiede ke ini enye okokopde ikọ itoro otu owo, “Uyo Abasi, idighe uyo owo.” Ekedi angel Ọbọñ akatuak Peter ke ñkan onyuñ osio enye ke ufọk ñkpọkọbi; edi ke ini angel ọtọde Herod ndọñ ama ata enye owot. “Edi anana-ibuot owo eyekabare enyene ibuot, ke ini eyen ass ikọt edikabarede edi owo’ (Job 11:12). Owo edi nso emi ekpemenere idem ke ini enye mikemeke ndinyene baba ñkpọ kiet ibọhọke Abasi ọnọ enye, mme ọnọde enye ukeme ndinyene? Abasi ama ọdọhọ ete, “Iseri, ye Iseñ... Ami nnyuñ nsua” (Mme Ñke 8:13). “iseri esit fo ememenere fi ke enyọñ; afo oduñ ke ndudu ikpọ itiat: ebiet iduñ esie omokoñ; enye ọdọhọ ke esit esie, ete, Anie edisuhọre mi onim ke isọñ? Jehovah ọdọhọ, ete Afo ama onim efọk fo edikoñ nte ntrukpom, onyuñ onim enye ke otu ntantafiọñ, nyesio fi do nsuhọre nnim” (Obadiah 3, 4).

Iseri ekebin Nebuchadnezzar osio ke otu owo, man okoduñ ke otu mme unam ikọt. Iseri akanam Saul ọduọk itie ubọñ esie onyuñ owot idem esie. Iseri okosio Haman ke okure edidem ekeyiri ke eto owot. Iseri okonuk owut-idem Lucifer osio ke Heaven esin ke Hell. Ndien edi iseri okosio Herod ke ebekpo esie man akpa idiọk mkpa. “Mbak owo baba kiet edibuere mbure ke iso Abasi” (I Ñwed Corinth 1:29). Abasi akpakam añwam nnyin ndisuhọre idem ke iso Esie! “Nnyin idi ifin eke minamke utom ibe adaña” (Luke 17:10).

Questions

MME MBUME

1. 1 Yom mmọ emi edide iman Herod ke Ñwed Abasi?

2. 2 Nso idi ntak emi Herod ọkọkọbide Peter?

3. 3 Mbon ekọñ ifañ ekekpeme Peter?

4. 4 Didie ke eketim ekpeme Peter?

5. 5 Angel ekebighi adaña didie ye Peter?

6. 6 Nso utibe ñkpọ akada itie ke ini Peter ọkọbọhọde?

7. 7 Mmọñ ke Peter ekebem iso aka ke enye ama ọkọbọhọ?

8. 8 Mmọñ ke ekefiak ekut enye, ke abaña se etiñde edian enye?

9. 9 Nso iwut unana edinim ke akpanikọ ke otu mmọ emi ekebọñde akam?

10. 10 Nso edi ntak emi angel ọkọtọde Herod?