Lesson 326 - Senior

Memory Verse

IKỌ IBUOT: “Anie edidianare nnyin ke ima Christ? Nte ukut edidianare, mme ndutuhọ, mme isin-enyin, mme akañ, mme ubuene ye unana, mme ñkpọ-ndik, mme ofut?” (Ñwed Mbon Rome 8:35).

Cross References

I Paul Ye Barnabas, Mme asaña utom Abasi iba ke mbuọtidem

1 Ke Iconium, ke ebiet utuak ibuot mme Jew, Paul ye Barnabas ekwọrọ ikọ Abasi uko-uko enọ ediwak owo, Utom Mme Apostle 14:1; 13:5; 18:19; John 6:59; 18:20; Ñwed Mbon Rome 1:16; 2:9, 10

2 Paul ye Barnabas edu anyan ini ke Iconium, Abasi onyime utom mmọ do, Utom Mme Apostle 14:3; 4:13, 31; 19:8; Mark 16:17

3 Ukọbọ emi ọkọtọñọde ke akpa, ama anam mmọ esaña esim Lystra ke akpatre, Utom Mme Apostle 14;2, 4-6; Matthew 10:5-33; I Ñwed Corinth 4:10-13; 2 Ñwed Corinth 4:8-10

4 Mmọ ema ekwọrọ ikọ Abasi ke Lystra enyuñ ekut utibe-ñkpọ emi akadade itie, Utom Mme Apostle 14:7-10; 3: 6-8

5 Paul ye Barnabas, mbon Abasi akpanikọ, ema esin ndibọ ukpono emi mme owo ekenọde mmọ edi ewut mmọ ndikpono Abasi, Utom Mme Apostle 14:11-18; 12:21-23; 28:6; Matthew 4:10

6 Mme Jew emi minimke ke akpanikọ, eyọhọ ye ibak mmọ, enam etọñọ Paul ke itiat, Utom Mme Apostle 14:19, 20; 2 Ñwed Corinth 11:24-27; 2 Ñwed Timothy 3:10-12

7 Ema enyaña uwem Paul ndien enye ye Barnabas eka ke Derbe ndikwọrọ ikọ Abasi do, Utom Mme Apostle 14:20, 21; 5:18, 19; 12:7; 16:26; I Samuel 17:37; Daniel 3:27, 6:22

8 Ke isañ ndinyọñ ñka ke Antioch, mme asaña-utom Abasi ema ekut unen ke ndinọ item, ndinyuñ nnam esọñọ eda, ke nsin ifik, ye ke ndida usuñ ke otu mbufa nditọ ete, Utom Mme Apostle 14;21-28; I Ñwed Timothy 4:1-5

Notes

SE EKPEPDE EBAÑA

Isañ Utom Abasi

“Mme etin ntiñ-nnim ikọ ye mme andikpep edu ke ufọk Abasi ke Antioch, Barnabas... ye Saul... Edisana Spirit ọdọhọ mmọ ete, Edianare Barnabas ye Saul enọ Mi, man mmọ enam utom oro ñkokotde mmọ nnọ. Ekem ke mmọ ema eketre udia enyuñ ebọñ akam, enyuñ edori mmọ ubọk, eyak mmọ eka” (Utom Mme Apostle 13:1-3). Ntre ke Paul Apostle ọkọtọñọ akpa isañ ke kpukpru mme utom Abasi emi enye akasañade. Ukpep-ñkpọ emi ọyọhọ ye ndusuk mme ñkpọ-ntibe ke akpa isañ ukwọrọ-ikọ, oro edi, mme ñkpọ-ntibe emi Paul ekewetde abaña ke ini iso. Enem eti-eti ndikot se ewetde ebaña utit akpa isañ emi. Ewet ete ke mmọ “ewat eka ke Antioch, ke ebiet emi ekeyakde mmọ esin ke ubọk mfọn Abasi, ete mmọ enam utom emi mmọ ekenamde ema ke emi.”

Emi edi mme owo Abasi iba emi mikekopke ndik, ekenyuñ enyenede uko mkpọsọn usuñ isañ ini oro, eka ke mme isen idut, eda ikọ Obio Ubọñ Abasi esọk mme owo. Emi ekedi owo iba emi Edisana Spirit okosiode onim ọnọ utom Abasi, idighe ke mmọ nditọñọ utom oro ikpọñ, edi ikọkpọñke ikot Abasi, okposuk edi nte mmọ ekebọde ọkpọsọñ ufen ye esuene. Ikokureke ke emi “ekeyakde mmọ esin ke ubọk mfọn Abasi ete mmọ enam utom” ikpọñ-ikpọñ, edi mmọ ema enam utom oro esim akpatre. Ọfọn nnyin nditiene uwut-ñkpọ mmọ. Ọfọn nte nnyin ise nte mmọ ekekamade idem mmọ ke akwa utom emi. Ọfọn nte nnyin ise nte utom Abasi akakade iso, man nnyin ikeme ndida mme uwut-ñkpọ ke utom emi enamde enọ nnyin mfin.

“Enyene Jew Ke Akpa Ifet”

Ke akpa ifet, nnyin inyene ndifiọk nte ke Abasi enyene saña-saña uduak abaña utom Esie. Enye iwutke nnyin adaña ebiet emi oyomde nnyin isaña isim, ndien ayak usuñ mme ukeme ndisaña ñkesim adaña ebiet oro ọnọ nnyin ke idem nnyin, ofuri-ofuri. Ke ini Enye ọdọñde utom, Enye asiak usuñ. Ndien ke ini Enye ọdọñde utom Enye ñko owut usuñ. Ediwak usuñ iduhe ndisaña ke ini itienede uduak Esie. Usuñ kiet odu emi edide edinen usuñ. Edieke nnyin itrede ndisaña ke usuñ Abasi, nnyin inyene ndinim ke akpanikọ ite Enye ke mfọn Esie eyeda usuñ eke ọfọnde onyuñ afiak ada nnyin esin ke usuñ Esie, edieke nnyin inyenede udọñ eke okponde akan ke esit nnyin ndinam uduak Esie ndinyuñ nsaña ke usuñ Esie.

Abasi enyene ime, ọnọ nnyin ye unana ukeme nnyin nditim mfiọk mfọn-mma uduak Esie emi abañade nnyin. Ndien edieke nnyin ikpude, Enye eyenam ye nnyin nte nditọ. Edi edieke nnyin ikoide-koi imek ndikpọñ usuñ Esie nnyuñ mmek usuñ nnyin, mme uduak, mme ekikere nnyin, nnyin iyekut ke idem nnyin ke ini iso nte nnyin inanade uñwam Esie ofuri-ofuri.

Mme añwam-idem asañutom Abasi iba emi ke eritọñọ mme ufọk Abasi eketiene uduak ye usuñ Abasi ofuri-ofuri, (Kot I Ñwed Corinth 8:1-15). Abasi ama anam uduak Esie añwaña ke Eti-mbuk ekpetiene mme Jew ke akpa ifet. Ke oro ebede Enye ama owut mmọ ete ke ana nte eda esọk Mmọ-oko (Gentile) ñko. Ndusuk mme Jew ema enyene ata eti ifet ndinyime Messiah mmọ ndinyuñ ntiene Enye, ndusuk owo ema enam ntre. Edi ata ekese owo ikanamke, utu ke oro, ekere ke usuñ kiet me eken, nte ekpewotde Enye.

Uduak Abasi ekedi nte mme Jew ekpebemde iso enyene mme ufọn erinyaña Esie man mmọ ekpekeme ndimen ñkwọrọ nnọ ererimbot. Ndien ke ini Abasi ọkọdọñde mme akpa asaña-utom Esie ndisuan etop Eti-mbuk ema enam uduak emi, koro owo iba emi ekedi mme Jew; ndien ke ini mmọ ekekade, ekebem iso etiene mme Jew emi ekeduñde ke ntọtuñọ mme obio emi mikekopke kaña ñkpọ ibaña etop Eti-mbuk. Ekedi nnen-nnen nte Eti-mbuk okposim mmọ nte emi okosimde mmọ emi ekedade enyin mmọ ekut mme utibe-ñkpọ ye utom Christ. Ke usuñ emi, kpukpru mme Jew ema enyene ufañ ndikabare esit nnyuñ nnam uduak Abasi ke abaña mmọ.

Mme ibat itiat emi ekesimde ke akpa isañ utom Abasi emi ndusuk, ikọsuhọkede ikan itiat 1,500. Edi okposuk edi nte mmọ ekekutde ukut, mmọ ema eñwana edomo ukeme tutu ekut ete ke ema enam utom emi Abasi ọkọdọñde mmọ ndinam. Mme oruk ñkpri ubom emi mmọ ekekamade ke ini oro, ekedian ata akpan mfina ọnọ mmọ ndisaña mbe ke inyañ. Ndusuk owo iba emi ekenyene ndisaña ke ikpat ke akamba ubak isañ usuñ mmọ. Edi mmọ ikenyeneke mfaña oto ke unana, mme ke ntak ukọbọ. Mmọ ema eka iso ke utom Abasi tutu esim eti utit utom emi mmọ ekenyenede ndinam.

Edu Utom Mmọ

Ediwak mme itie enem ndikop onyuñ edi item man nnyin ikeme ndida uwut-ñkpọ ke ukpep-ñkpọ emi. Ke akpa ifet, ewet ete mmọ “enyuñ ekwọrọ-ikọ, ke ido eke esinde ata ediwak... enim ke akpanikọ.” Ke otu mme akpatre ikọ emi Christ eketiñde ọnọ mbet Esie, Enye ọkọdọhọ ete, “Mbufo eyebọ odudu, ke Edisana Spirit ama edi edidoro mbufo ke idem: mbufo eyenyuñ edi mme ntiense Mi.” Kiet ke otu mme ñkpọ emi anam utom Abasi anade nte enyene edi odudu oro.

Eda odudu Edisana Spirit ekọ mme ukpọñ enọ Abasi. Man ikeme ndidi ọyọhọ ntiense nnọ Abasi, ana nte nnyin inyene Edisana Spirit ke idem nnyin. Ntiense iba emi ema enyene odudu oro. Ke mmọ ekwọrọde ikọ, eda ediwak owo enọ Abasi. Mmọ ekenam ke mbufiọk. Ekeda ikike emi Abasi ọkọnọde mmọ. Enyuñ eda ofuri odudu mbukpek mmọ ukeme ye mme enọ emi Abasi ọkọnọde mmọ, ekwọrọ ikọ. Mmọ ekeda kpukpru mme ñkpọ emi ke ufiop-ufiop spirit ye ima nte apostle: ndien, ke ndidian do, mmọ ema enyene odudu Abasi ke uwem mmọ. Ndien edi odudu oro ekedemere mme esit owo.

Ukem odudu oro, enyene nnyin ñko. Nnyin inyene ndiyom enye, isin esit iyom enye, ndien inyuñ ibat enye ke ñkpọ emi ọfọnde akan kpukpru ñkpọ efen. Edide mme enọ, ukeme, ifiọk mme odudu emi nnyin inyenede, nnyin inyene ndifiọk nte se ikponde ikan inọ nnyin owo kiet-kiet ye kpukpru nnyin edi ndinyene edisana uyere-aran ke uwem nnyin, etop eke inọde, ye utom nnyin. Abasi onyime ete ke nnyin ikwọrọde mme owo eyenim ke akpanikọ.

Mme asaña-utom Abasi ema etie ke Iconium ebighi, ekwọrọ ikọ Abasi uko-uko ke Ọbọñ. Ọbọñ ama onyime mme edu-utom mmọ, onyuñ ayak mme idiọñọ emi ekeñwọñọde nditiene mme utom mmọ.

Asaña-utom Abasi edi andikwọrọ Eti-mbuk. Andikwọrọ Eti-mbuk edi asaña-utom Abasi. Edikwọrọ Eti-mbuk ada ukpọñ esin ke obio ubọñ Abasi nte edikọ ukpọñ nnọ obio ubọñ Abasi ke akpa ifet. Ukpọñ emi enimde enọ obio ubọñ Abasi edi ukpọñ emi ekọde enọ obio ubọñ Abasi. Mme owo Abasi emi ekenyene nditie do tutu uduak Abasi ayarade ọnọ mmọ ndika iso ke utom, mme tutu usuñ ndika iso nnam etre. Mmọ ema ebe eka mme ebiet efen ndien ke akpatre mmọ efiak enyọñ edi nditọñọ ntak nnọ item, nnyuñ ntiñ nsọñọ nnyuñ nsua nnọ, nnyuñ nsọñọ nditọ ete idem. Ndien ke ini akanade nte mmọ eka iso-iso, mmọ eyom ufọn enọ ufọk Abasi ke ini iso, ke ndidori mmọ emi Abasi ekemekde ubọk nte mme ada usuñ ke otu mme andinim ke akpanikọ; man utom emi mmọ enamde okudi ikpikpu.

Edi akpan ñkpọ nte Paul eketiñde ọnọ Timothy ndinam utom ọkwọrọ-ikọ, ndien oro edi kiet ke otu mme item emi nnyin ikerede ite ke edi saña-saña utom ọbọk-erọñ. Enyene ndikut, ndien, ete kpukpru nnyin inyene ndinam ofuri ukeme nnyin ndikọ mme ukpọñ nnọ Ọbọñ, ndien ke inamde ntre, inyuñ idomo ofuri ukeme ndiñwan mmọ esaña esim ọyọhọ idaha ke ido Abasi.

Ñkpọ efen emi ọfọnde nnyin nditim nse edi edu uwem mme asaña-utom Abasi iba emi ke abaña mmọ emi enọde mmọ saña-saña ukpono.

Mbon Lystra ema ekut utibe-ñkpọ emi ekenamde enyuñ enam mmọ eti nte oro ekedide akpanikọ, koro owo emi ekedide mbuñọ toto ke emana ọkọfrọde onyuñ asañade isañ ke iso mmọ. Mbak idem emi akananam midaha inam ñkpọ, mme ndikọri, mme ndifiọk usuñ nte esañade isañ, ema ekabare esọñ ndo-ndo oro ke ubọk Abasi. Esibiat ediwak urua ekpep nte esañade isañ, edieke owo mikasañake isañ ke ini uyen. Edi ke ndo-ndo oro owo oro ọtọñọde, idighe ndisaña ikpọñ edi ye ndifrọ. Edi akpanikọ ke abaña utibe-ñkpọ emi ema enam enye ebe ifiọk ye odudu owo. Edi mme owo eketọñọ ndituak ibuot nnọ mme owo Abasi emi utu ke ndituak ibuot nnọ Abasi ke Idem Esie.

Iduhe nnen-nnen owo Abasi emi okponyimede ndibọ ukpono ye ubọñ emi enyenede Abasi nda ke idem esie. Ata nditọ Abasi akanam iyomke ukpono mme ndibọ itoro ke ndinam utom Abasi. Nditọ Abasi esuhọre idem. Edi Abasi ọnọ odudu, ifiọk, nsọñ-idem ye odudu emi mmọ enyenede. Ke ntre, edi Enye enyene ndibọ itoro ke utibe edinam, mme ke se ekemede ndinam. Ediwak erinam odu ke ikọ Abasi emi adade mme owo osim usọp-usọp ubiere-ikpe, emi ekedomode ndibọ ukpono ye itoro emi enyenede Abasi ikpọñ-ikpọñ nda ke idem mmọ.

Ke ata esisit ifiọk, ekeme ndidọhọ ñko nte ke ini nnyin itrede ndifiọk unana ukeme ke idem nnyin, ye nte nnyin inyenede ndibere ke odudu, ifiọk ye ukeme Abasi, ye odudu Spirit ke kpukpru ñkpọ emi nnyin inamde inọ Enye, nnyin ikemeke ndinam se ededi emi nnyin iyomde ndinam koro nnyin itrede ndinọ Abasi ubọñ emi enyenede Enye. Edieke nnyin idarade ke utom ubọk nnyin, inyuñ itre ndifiọk ite edi Abasi ọnọ ukeme onyuñ anam ọfọn ama ke kpukpru usuñ, ata ekpri emi nnyin inamde anam Spirit Abasi ọfuhọ. Nso ediyet-aran ke Edisana Spirit, me nso enọ ke nnyin ikere ndibọ me ndimum nkama, edieke nnyin itrede ndikpono Abasi ke eribọ ukpono emi enyenede Abasi nnọ idem nnyin, ekpekpri nte ekpekpri? Ikọ Abasi otim anam añwaña ke se ibañade usuñ emi, ndien onyuñ ibiat akan koro adade eyighe ọsọk ata erinyaña emi osiode nnyin ke idiọk-ñkpọ edieke nnyin iyomde inyuñ ibọde ukpono owo. Nnyin ikot ntem ke ñwed Abasi. “Mbufo edikeme didie ndinim ke akpanikọ, kpa mbufo emi ebọde ubọñ ke ubọk kiet eken, ndien miyomke ubọñ eke otode ke Abasi kierakiet” (John 5:44). Andiwet Psalm ewet ete: “Edi owo ibighike ke ukpono: enye ebiet mme unam, emi esobode” (Psalm 49:12). Ke ini Satan okodomode Jesus ọdọhọde eyen Abasi atuak ibuot ọnọ imọ, Jesus ọbọrọ enye ete” Tuak ibuot nọ Jehovah Abasi fo, nyuñ nam ñkpọ nnọ Enye ikpọñ-ikpọñ” (Matthew 4:10).

Ọfọn nnyin ndikere mbaña ido mbio Lystra mi. Ema etiñ etop Eti-mbuk enọ mmọ. Mmọ ekekpono se Abasi okobotde ekan nte ekpekponode Andibot mmọ, edi mme owo Abasi etre mmọ ndika iso ke utọ ukpono oro. Edi efiọk ete esit mme owo emi ikọwọrọke ofuri-ofuri itiene edituak ibuot ke akpanikọ: koro ke ini mme Jew emi mikenimke ke akpanikọ etode Iconium ye Antioch edi, ekedi mmem-mmem ndikpek mbio Obio Lystra ewọñọre ekpọñ se mmọ ekekutde. Mmọ emi ekesuk ekutde utibe-ñkpọ Abasi ke idem ini oro, idahemi ewọñọre ke ndiñwana ye Abasi oro ye mme asaña-utom Esie. Ema etọñọ Paul ke itiat ese ete enye akpa.

Erikan Emi Otode Ke Se Ibietde Nte Okpu

Se ndise emi ke iso nnyin: nte otu owo emi enimde ke akpanikọ eyọhọde ye idaresit ke abaña odudu emi akanamde owo mbuñọ adaha ada ye nsọñidem edade ekanade ekuk owo iba emi ekebuọtde idem ke Abasi. Owo Abasi emi ama ebin mbon ndise, emi ebeñede idem ndidara nnyuñ nnọ itoro ke ñkpọ eke ekemde ye udọñ obukidem mmọ ikpọñ-ikpọñ efep usọp-usọp. Mbon efen emi ekebietde oruk mbon oro ekedi ata ndiọi owo emi ke ido esuene mmọ esinde Abasi, enyuñ eyirede ndinam mme isuñ-utom emi ekekwọrọde mbuk eriset Christ idiọk. Ema etiñ esisit ikọ. Ema efre ebaña utibe-ñkpọ. Ema eyik odudu Abasi. Ema etop mme itiat etọ owo Abasi ke idem emi mikenyeneke se anamde ndinyaña idem esie. Ikọt Abasi emi ema eketọñọ ndisuana ema eda kpukpru ukeme mmọ ewara ekenade ekuk ada-usuñ mmọ emi ọkọduọde ana ke isọñ.

Kere baña Barnabas, nsaña Paul. Enye emi ekedide owo Levi toto ke emana, ama okut akwa ikot ye utom Eti-mbuk mfọn emi, ama anyam se enye ekenyenede ke Cyprus onyuñ emen okuk oro ọsọk mme Mbet, imenke isọk mbọñ itie-ukpono, ọtọñọ ndisaña utom nte mbet Jesus ye nsin ifik emi okodorode ererimbot udori. Edi enye akada Paul asaña ekpere nditọ ete ke Jerusalem ke ini mmọ oro ekebakde-bak enye (Paul) ke ntak edikọbọ emi enye ọkọkọbọde ufọk Abasi. Barnabas ekpenyene ifet ndikere ete imọ imodot itoro ye ukpono eke ekponde oto nte imọ ima ikebem iso inam utom ye mme mbet edieke enye ekpedide owo obukidem. Edi esit ye uwem esie ema esaña ebe oruk utom obukidem oro koro ana iñwañ-iñwañ ete Barnabas ama onyime nditiene nda-usuñ Paul. Enye ama okut nte odudu Abasi odoride eti owo emi, Paul. Edi ke emi se nte ada-usuñ oro anade ke isọñ onyuñ anuahade iyip ke ọwọrọ ke idem emi ọyọhọde ye unan, onyuñ anade nte okpo.

Edi, ke ndo-ndo oro idiọñọ uwem odu enye ke idem! Ke enyeñe idem! ndien adaha ada! Owo Abasi emi ọtọnọ ntak adaha ada ke ukot esie, nti ikọt Abasi emi efiọkde ufọn emi otode edimek asaña-utom Krọs ema etọñọ ndinam utom ima nnọ enye. Paul ama ọtọñọ ndisaña! Emi ekedi utibe-ñkpọ efen! Enye ama ọtọñọ ndisuan etop odudu Eti-mbuk Jesus Christ ini kiet efen.

Okposuk mikọyọhọke kaña mbahare iba ke akpa isañ utom Abasi Paul, edi utom obio ubọñ ama enyene ñkọri eti-eti, emi ama onyuñ edemere iyaresit mme anditiene Satan, edi okosuk ọsọsuhọ ediwak ebiet efen ndisim. Paul ye Barnabas ikatuakke ida itre ndika iso ke utom Ete mmọ. Mmọ ikefeheke ndik owo, emi esin Abasi ama okpono utom emi mmọ ekenamde enọ Enye.

Ke ema ekekure isañ mmọ, mmọ ema eka ekebuana ye nditọ ete ke Antioch. Do mmọ ema ebuk kpukpru se Abasi akanamde, nte ediwak ekebọde erinyaña enyuñ esimde mme idaha eridiọñ ke ñkpọ Spirit, nte ediwak ekebọde ukọk-udọñọ, ye nte usua ekedemerede ubiọñọ man utom Abasi etre. Mmọ ema ekeme ñko ndibuk mbaña odudu Abasi ndinyaña nnyuñ nnọ erikan.

Okposuk edi oro Paul ye Barnabas mikenyeneke eyikhe ite Abasi eme onyime utom mmọ, ye ido nte mmọ ekenamde utom mmọ, mme asaña-utom Abasi iba emi ema efiọk ubiọñ-utom emi mmọ ekenyenede enọ mmọ emi Abasi akadade usuñ ndisio mmọ ndọñ, nnyuñ nyet mmọ aran nnọ utom Abasi. Mmọ ikosioho idem mmọ ida saña-saña, edi ema eka akamba itie oro, Antioch ke isañ mmọ okurede. “Mmọ enyuñ etie do ye mbet anyan ini,” ebọ odudu ke Spirit ye ke ikpọhidem ke anyan ye ọkpọsọñ isañ mmọ ekokurede, enyuñ esọñọ nditọ ete emi ekekopde ikọ mmọ idem, enyuñ edọñ mmọ esit.

Questions

MME MBUME

1. 1 Yom usuñ akpa isañ utom Abasi Paul ke isañ.

2. 2 Mme asaña utom Abasi ekeka etiene mme anie, ekenyuñ esobo ke mmọñ ke akpa isañ mmọ?

3. 3 Tiñ se ifiọkde ibaña Barnabas, obio esie, nso idaha ke enye akada ke ukpono Abasi emi enye ọkọbọde oto ubon esie, nso ata akpan ñkpọ ke enye akanam ye inyene esie ke Cyprus, ido esie akayarade didie ọnọ Paul ke akpa ye ke isañ emi?

4. 4 Ke nso usuñ ke Paul ye Barnabas ekenim uyo Jesus ke ini ukọbọ eketienede mmọ?

5. 5 Nso utibe-ñkpọ ke ekenam ke Lystra? Tiñ se oro akanamde ke idem mbio obio oro, ndien tiñ ke mme ikọ idem fo, se Paul ọkọbọrọde?

6. 6 Nso ikotibe inọ Paul ke Lystra? Mme anie eketọñọ ñkpọ-ntibe oro?

7. 7 Nso ke etiñ ebaña erifen ke mme idiọk-ñkpọ nnyin edieke nnyin iyomde ukpono eke owo, edi itrede ndiyom ukpono nto Abasi?

8. 8 Siak mme utom ada-usuñ emi Paul ye Barnabas ekenamde nte mme asaña-utom Abasi.

9. 9 Ndidomo ke uwut-ñkpọ emi, nso edi akpan utom isuñ-utom Abasi?

10. 10 Nso eti ñkpọ ke etiñ ebaña Paul ye Barnabas ke edinyọñ ndi ke Antioch?