Lesson 314 - Junior

Memory Verse

IKỌ IBUOT: “Mmọdo ti itie emi ọkọduọde ọkpọñ, nyuñ kabare esit, nyuñ nam se akanamde ke akpa” (Eriyarare 2:5).

Notes

Ufọk Ñwed Mme Anditiñ Ntiñ-nnim ikọ

Anditiñ ntiñ-nnim ikọ Elisha ama ayak ofuri ini esie ke ndinam utom Abasi. Enam nnyin ifiọk ite kiet ke utom emi Elisha akanamde ekedi; ndidi etubom ufọk-ñwed mme anditiñ ntiñ-nnim ikọ. Mkparawa iren emi ekeyomde ndifiọk Abasi ye ido ukpono emi Abasi ọkọnọde Nditọ Israel ekesima ndika ufọk-ñwed emi.

Elisha ekedi owo emi ekemde ke idaha utom emi, koro enye ama enyene odudu Abasi ke uwem esie. Enye ama ekeme ndikpep mkparawa iren nte ekpedude uwem enọ Abasi ye nte ekpesiande mme owo ebaña edinen usuñ ukpono Abasi. Elisha ama anam utom Abasi ke usuñ emi Abasi okokopde onyuñ ọbọrọde mme akam esie.

Usen Ediwọrọ

Usen kiet mkparawa mme anditiñ ntiñ-nnim ikọ ema ebiere ete ke mmimọ iyewọrọ ika ke ebiet emi atarade onyuñ okponde ekem mmọ. Elisha ọdọhọ mmọ ete eka; edi mmọ ikoyomke ndikpọñ enye. Elisha ama ọbọñ akam ọnọ mmọ ke ini mmọ ekedude ke afanikọñ. Ke editim ntiñ enye ekedi ñkpọ edidemere ọnọ mmọ oto ke uwem esie, ye odudu Abasi emi okodude ye enye; enye ama esinọ mmọ udia ke ini mmọ minyeneke se ediade. Mmọ ekeyom enye odu ye mmimọ man esinọ uñwam ke ñkpọ Spirit ye eke obukidem.

Elisha ama onyime ndika, ndien edisim usen emi kpukpru owo ke ufọk-ñwed etañde mme inyene mmọ man edaha eka ke mben Inyañ Jordan. Ufọk ikoduhe inọ mmọ ndiwọrọ ñkoduñ, ke ntre akana nte kpukpru owo eka ekenam utom ndikpi eto man eda ebọp ufọk-ñwed ye ebiet iduñ.

Ibuot Ekuri Emi Okosopde

Akparawa kiet emi okokopde odudu ama ọtọñọ ndikpi eto, ndien ibuot ekuri oro ọkpọhọre oduk ke esit inyañ Jordan, ekeme ndidi enye ama ọfiọk ete ke ọwọk. Ekuri oro ikpọkọwọrọke edieke ekpeketoride enye ọsọñ, edi sia mikesinke enye ke itie esie akana nte ọkpọhọre. Nso ke enye ekpekekeme ndinam ye ito ekuri ikpọñ? Se ikediọkde ikan ekedi sia enye ọkọbuọtdebuọt. Mbọm! Enye okodu ke ata afanikọñ, edi enye ama ọfiọk ebiet emi edikade ikoyom uñwam.

Akparawa emi okokop didie ndọñesit sia Elisha ama akasaña ye mmọ! Enye ama aka ebine anditiñ ntiñ-nnim ikọ nditiñ ukut esie nnọ enye. Enye ama onyime ete ke ima iduọk ibuot ekuri ke imọ iyom uñwam.

Ekpeketie didie edieke mme anditiñ ntiñ-nnim ikọ mikpekebeñeke ite yak Elisha asaña ye mmimọ aka. Ekeme ndidi mkparawa mme anditiñ ntiñ-nnim ikọ emi ikpekenyeneke mbuọtidem eke ekemde ndibọ uñwam nto Abasi. Nte afo emesikere nte edinanade uñwam edieke okoidekoi ọwọrọ ọkpọñ otu nditọ Abasi onyuñ ọduọde oduk ke udọñọ, me afanikọñ ekededi, ndien baba owo ikpereke ndinọ fi uñwam ke akam?

Edisin Ndika Ufọk Abasi

Ndusuk owo esinam utom ke esit akpanikọ enọ Abasi ke ufọk Esie ke ekpri ini, enyuñ ebọ mme edidiọñ. Edi ke esisit ini mmọ ekabare ema mme nti ñkpọ emi Abasi ọnọde mmọ, enyuñ eda mmọ ntre. Mmọ enyuñ efre ete ke kpukpru nti ñkpọ oto Abasi, ndien ke akpana nte iwut esit ekọm ke ndika iso nnam utom nnọ Abasi. Mmọ ekeme ndikpọñ otu nditọ Abasi ñka se midighe akpan ñkpọ, nte eti utom emi edinọde mmọ ediwak okuk.

Nso iditibe ndien ke ini mmọ eduọde eduk ke afanikọñ. Baba owo kiet idinyuñ ikpereke ndiñwam mmọ ke akam. Ndusuk afanikọñ emi edisimde mmọ eyekpa mmọ ñkpọ akan udori emi mmọ ekeyomde ke obufa itie utom. Sia mmọ minyeneke baba owo Abasi kiet emi ekpenyenede inem ebuana oro nte nditọ Abasi, nnyuñ nneme mbaña ñkpọ Ọbọñ, ima Abasi ekeme ndisop ke uwem mmọ.

Ñwed Abasi etiñ ọnọ nnyin ete yak ikunyuñ isin ndisop idem ọtọ kiet, nte edu ndusuk owo edide (Mme Hebrew 10:25). Nnyin inyene odudu ye uko ito ke edisop idem ọtọ kiet ye nditọ Abasi, ye ke eribọñ akam nnyuñ mkponọ Abasi ọtọ kiet.

Uñwam Ke Afanikọñ

Ke ini enyene-mbọm eyen ufọk ñwed emi ọkọduọkde ibuot ekuri ama eketiñ ọnọ Elisha se ikotibede. Elisha okodu ke mbeñe-idem ndiñwam usọp-usọp. Enye okobup, “Ọkọduọ ke ebiet ewe?” Ke enye ama okowut ebiet oro, enye ekpi eto, ọduọk ke mmọñ ke ebiet emi ibuot ekuri oro ọkọduọde oduk, ndien ukwak oro ọfiọrọ.

Ukwak oro ikekemeke ndifiọrọ ibọhọke oto ke odudu Abasi, edi Abasi emekeme ndinam sededi eke owo mikemeke ndinam nnọ nditọ Esie emi ebuọtde idem ye Enye. Kpukpru utom obot esine ke idak Ukara Abasi eyenyuñ enim mme ewuhọ Esie.

Ikọ Abasi inamke nnyin ifiọk ite ke Elisha ama ọbọñ akam ke ini emi, edi imọfiọk ite ke Elisha ama etie ebighi ye Elijah tutu emen enye edọk ke Heaven, man enye ekeme ndibọ udeme odudu Elijah iba. Enye ama ọbọ se enye okoyomde, odudu emi okotode Abasi. Enye ama enyene ntọtuñọ ebuana ye Abasi kpukpru ini. Enye akanam mme utibe-ñkpọ oto ke odudu emi.

Mbọm Abasi

Ñkpọ-ntibe emi akayarade owut mbọm Abasi ye mmọ emi edisemede ekot Abasi ke ini afanikọñ. Ekeme ndidi owo oro ama ama Abasi ini kiet ko, edi ke emi enye ama afiak edem. Ndusuk enye ke aka iso ke ido edisaña utom Abasi, ukem nte owo ekpi eto oro akpakade iso ndifuñ ito ekuri. Edi imọfiọk ite ediyibi eto ke ibio eto ikemeke ndikpi eto nduọk ke isọñ. Utom Abasi emi nnyin inamde idinyuñ ikwe unen ibọhọke nnyin inyene Spirit Abasi ke uwem nnyin. Jesus ama ọdọhọ ete: “Koro esiode mi efep, mbufo ikemeke ndinam baba ñkpọ kiet” (John 15:5). Nnyin iyom Abasi anam utom ebe ke nnyin ke ini nnyin inamde ñkpọ inọ Enye.

Edi idorenyin ke osuk odu ọnọ owo emi ama ọkọduọk spirit Abasi. Ke akpa enye enyene ndinyime ete ke ima iduọk, akan enye ndiñwana ndifuk me ndifaña idem. Ndien edieke enye ediyomde mbọm Abasi ye erifen, enye eyefiak enyene ima Abasi ke uwem esie. Owo emi ekekpide eto ama ọsọsọp onyime ete ke ima iduọk ibuot ekuri, ndien enye ke esit akpanikọ ọfuhọ abaña se ikotibede, ete Aha! Koro ñkọbuọtde buọt.

Ñkpọ ekededi eke nnyin ibọde ito Abasi edi ebuọt. Kpukpru mme edidiọñ emi Enye ọnọde nnyin ikama inọ Enye. Nnyin inyuñ idi mme akama ukpọhọre emi imumde mbubehe Abasi ikama ke ererimbot emi. Ikpenem esit adaña didie ke mme ñkpọ eke Abasi añwañade ọnọ nnyin, ikponyuñ itiñ enyin adaña didie ke usuñ nte ikamade mmọ. Ndien edieke ñkpọ-ntibe adade itie nnyin iduọk enye, ana nte isọp idem isin ifik ibeñe Abasi man efen ọnọ nnyin, onyuñ afiak ọnọ nnyin mfọn Esie ini kiet efen.

Questions

MME MBUME

1. 1 Nso idaha ke Elisha ekenyene ke ufọk-ñwed mme anditiñ ntiñ-nnim ikọ?

2. 2 Nso ke nditọ ufọk-ñwed oro ekeyom ndinam?

3. 3 Ebiet ewe ke Elisha akaka?

4. 4 Nso ikotibe ke ini nditọ ufọk-ñwed ekebọpde ufọk?

5. 5 Nso ke akparawa anditiñ ntiñ-nnim ikọ kiet akanam ke ini enye okodude ke afanikọñ?

6. 6 Didie ke Elisha akañwam enye?

7. 7 Nso idi utom emi nnyin inyenede ndinam nnọ Ọbọñ ke ererimbot emi?

8. 8 Nso ke nnyin ikpoyom man ikeme ndinam utom nnọ Ọbọñ?

9. 9 Ikeme didie ndisọñọ nnyuñ ññwam kiet eken ke mbuọtidem?

10. 10 Nso ke owo mfiak-edem ekeme ndinam ini kiet efen man ọbọ mfọn Abasi?