Lesson 315 - Junior
Memory Verse
IKỌ IBUOT: “Angel Jehovah ana akan mmọ eke ebakde enye okuk, onyuñ anyaña mmọ” (Psalm 34:7).Notes
Ekọñ Abasi
Idut Israel ke ini kiet efen ema etọñọ ntak ekpono ata Abasi; mme owo kpa ye edidem Israel ema ekpañ utọñ enọ Elisha, anditiñ ntiñ-nnim ikọ eke Abasi.
Elisha ke idem esie ekedi akwa edidiọñ ọnọ mmọ, asaña ke otu mmọ onyuñ anam se ifọnde: ọkọk mbon udọñọ, añwam mbon ukut, onyuñ anam akpa-mkpa eset.
Ini ama odu emi edidem Syria, Benhadad, okodomode nditọñọ ntak ñkan Israel. Ke ndusuk ini Abasi ama ayak mbon Syria ebiat isọñ Israel ke ini nditọ Israel ekekponode ndem; edi ke emi sia mmọ etọñọde ntak ekpañ utọñ enọ anditiñ ntiñ-nnim ikọ eke Abasi, Enye okodu ke mbeñidem ndiñwana ekọñ nnọ mmọ.
Edidem Syria ama odomo ndidibe mmum mbon-ekọñ Israel, edi baba owo Israel kiet ikasañake ikpere itie udibe mbon Syria. Mmọ ema edibe ke nsio-nsio itie udibe, edi nditọ Israel ema efep mme itie udibe emi. Ben-hadad ama ekere ete ke enyene nte owo mbia odude ke nna esie, emi esinamde nditọ Israel efiọk ñkpọ ndik emi ebetde mmọ.
Owo kiet ekesitiñ ekikere Ben-hadad ye ñkari esie ọnọ edidem Israel, edi ikedighe owo mbia emi otode Syria. Abasi ekesiyarade ñkpọ emi ọnọ Elisha ndien Elisha emen etiñ ọnọ edidem. Kiet ke otu nditọ ufọk Benhadad ama etiñ ọnọ enye ete, “Elisha prophet emi odude ke Israel asian edidem Israel ikọ emi afo etiñde ke ubet nna fo.” Abasi ekeme ndiyarade mme ndibe ñkpọ emi nnyin ikerede ite baba owo kiet ifiọkke. Jesus ama ọdọhọ ete, “Ñkpọ iduhe eke efukde fuk emi midiyarakere, ñkpọ inyuñ iduhe eke edipde dip emi owo midifiọkke” (Matthew 10:26).
Ben-hadad eyebọ ukpep-ñkpọ oto edika ndiñwana ekọñ emi, ete ke edi Abasi akañwana ekọñ ọnọ Israel. Edieke Abasi adade ye nnyin anie owo ekeme ndibiọñọ nnyin.
Udim Ekọñ ndimum Anditiñ Ntiñ-nnim Ikọ
Mbon Syria ke akpa ifet ekedomo ndiwot anditiñ ntiñ-nnim ikọ eke Abasi emi ekesiyarade mme ndibe uduak mmọ. Mme owo ke mme emana esidomo ndibiat ukpep-ñkpọ Ọbọñ Jesus Christ, enyuñ ewot ikpọ mme ada-usuñ esie. Ke ọkpọsọñ ukọbọ mmọ edomo ndinyik mme owo ekañ mbuọtidem mmọ. Edi Eti-mbuk ọdọdiọñ ọsọñ ke odudu. Etie nte mmọ emi etimde ekọbọ, esọñọ emum akpanikọ Abasi ekama. Ndien ediwak mmọ oro esọñọde enim ke akpanikọ eketiene mme andikwọrọ edinen ido emi mme owo esinde enyuñ esakde nsahi.
Mmọ oro ekedade Ikọ Abasi eka ke idut mme okpono-ndem ke akpa ema eduọk uwem mmọ nte mmọ ekedomode ndikwọrọ Christ, ndien emi edi akpanikọ ke se etiñde ete, “Iyip mmọ oro ekewotde ke ntak Ikọ Abasi edi mkpasip Ufọk Abasi.” Ke ebiet oro ndusuk ekekpade, mmọ efen ema edaha eda ndikwọrọ nnyuñ nnam akpanikọ Ñwed Abasi ọsọñọ ada.
Ben-hadad ọkọdọñ ofuri udim ekọñ eka ke Dothan ekeyom Elisha, oro edi, ofuri udim ekọñ ndiwọrọ mbine owo kiet ke akpanikọ eketie nte eñwan emi ubọk midige ukem. Edi Abasi ama ọñwọñọ ete: “Owo mbufo kiet eyebine tọsin: koro edi Jehovah Abasi mbufo añwana ekọñ ọnọ mbufo, kpa nte enye ọkọdọhọde mbufo” (Joshua 23:10). Ekọñ emi ekenyene Abasi ndien Enye eyenọ owo kiet erikan.
Okop-Ndik Eyen-Ufọk
Ke ata usen-ubọk usen kiet, eyen ufọk-Elisha ama ọwọrọ ke ufọk mmọ, ndien ndik ama anam enye eti-eti ndikut nte ofuri mbon-ekọñ Syria ekande obio ekuk. Mme enañ-mbakara ye ukpat-ñkpọ mme asua ema eyọhọ kpukpru ebiet. Akwa udim ekọñ emi ekedi ndimum Elisha. Okop ndik eyen-ufọk ama ọfiọri ete “Aha, ete mi, nnyin idinam didie.”
Nte Elisha ama okop ndik? Nte enye ama efehe ndik ke se owo ekemede ndinam enye? Elisha ama otim enyene mbuọtidem ke Abasi emi enye akanamde ñkpọ Esie. Nte Abasi esie ikemke ke kpukpru idaha? Abasi emi enye okokponode ekedi Abasi mme obot ye mme una isọñ.
Elisha ama ọfiọk ete ke, “Angel Jehovah ana akan mmọ eke ebakde enye okuk, onyuñ anyaña mmọ” (Psalm 34:7). Enye ama ọfiọk ete ke Abasi ama okut udim ekọñ mbon Syria nte edide Dothan, koro “Enyin Jehovah esañade ke ofuri ererimbot, ete isọñọ imum mmọ eke ofuri esit mmọ odude ye enye ikama” (2 Chronicles 16:9). Elisha ama odu uwem ndinem Abasi esit, ndien ke emi enye odude ke mfina, enye ama enyene mbuọtidem ete ke Abasi eyekpeme imọ. Ke akpanikọ, Elisha ama otim ekpere Abasi ke usuñ nte enye ekekemede ndikut mme ukpat-ñkpọ angel oro ekande enye ekuk, ke enyin spirit. Enye ama ọbọñ akam ete Abasi atat enyin eyen-ufọk esie man enye ñkọ ekeme ndikut. Kere utọ mkpaidem emi akanamde akparawa emi, ke ini Abasi owutde enye nte mme obot ekeyọhọde ye mme enañ-mbakara ye mme ukpat-ñkpọ ikañ ye mme ukpat-ñkpọ angel nte edade ndiñwana nnọ owo Abasi.
David ama esiwak nditiñ mbaña Abasi nte añwanade ekọñ ọnọ enye. Ntak emi enye ekpetimerede esit esie ke ini ekọñ ekedide eke Abasi? Ini kiet enye ama ọdọhọ ete. “Nam mmọ eke eyomde ukpọñ mi ekut but ye esuene.... Yak mmọ etie nte mbio ke iso ofum: yak angel Jehovah onyuñ onuk mmọ eka” (Psalm 35:4, 5).
Kere nte ikpọbọhọde ntimere-esit ye mfina edieke ikpesiyakde Abasi ọyọ mme mfina nnyin. Edi, ana nte inyime Abasi anam ke usuñ Esie. Enye ọdiọñọ akan nnyin, se inanade ye se ifọnde ye nnyin. Ndien inemesit esikpon didie ke nnyin inyimede Abasi anam ke usuñ Esie! Nte nnyin inyimede, ntre ke inyene erikan.
Utọ Ukpat-ñkpọ Iba
Kere baña utọ ukpat-ñkpọ iba oro. Eke mbon Syria ekedi se owo ekemede ndikut. Ekeda mkpọsọñ ñkpọ nte ukwak ye eto ebọp mmọ. Mme enañ-mbakara mbon Syria ema ekop odudu enyuñ eye ndise. Emi edi mme ñkpọ emi enamde owo ekere ete imenyene odudu. Mme enañ-mbakara ye ukpat-ñkpọ Abasi owo ikemeke ndikut. Edi ke otu mbiba emi ewe ọkọsọñ odudu akan? Ke ewe ke afo oyom ndibuọt idem, ukpat-ñkpọ owo emi ekemede ndikut me ukpat-ñkpọ Abasi emi owo mikemeke ndikut?
Ediwak owo mfin, ekop ndik ndibuọt idem ye Abasi koro mmọ mikemeke ndikut Enye. “Koro se owo okutde ke enyin edibede efep, edi se owo mikwe ke enyin eyebigi ke nsinsi-nsinsi” (2 Ñwed Corinth 4:18). Mme ufọk eke nnyin iduñde, mme efak isañade, udia idiade ye mme ikpọhidem eke spirit nnyin oduñde, kpukpru eyebe efep. Emi edi se nnyin ikutde edi mmọ idibigike.
Ndien kere baña idorenyin emi nnyin inyenede ke abaña nsinsi uwem. Ema enyaña ukpọñ nnyin ke usuñ emi nnyin mikekemeke ndikut ke enyin, edi nnyin imotim ifiọk ke ini emi enye akadade itie. Nnyin ikekabare idi mbufa owo ke Christ, ndien nnyin ifiọk ite ke nsinsi uwem ọtọñọ ke nnyin. Nsinsi uwem ọwọrọ ete ke nnyin iyedu ke nsinsi, adaña ini nte Abasi odude. Enye iditreke. Nte oro idige akpan ñkpọ ikan mme ñkpọ emi enyin nnyin ekutde emi edibede ifep usọp-usọp? “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi” (I John 2:17).
Ediwat Ke Obubit Enyọñ
Ke ini ndik anamde nnyin, ndien ikere me iyekeme ndikan asua ukpọñ nnyin, yak nnyin iti, “O Jeshurun baba kiet eke ebietde Abasi iduhe; enye odoro ke enyọñ anyaña fi, onyuñ ada ubọñ esie odoro ke ikpa-enyọñ” (Deuteronomy 33:26). Nnyin idi nditọ emi idude ke idak ukpeme Esie. Enye oyom nnyin iwat ye Enye. Isaiah ọkọdọhọ ete, “Jehovah ke odoro ke obubit enyọñ” (Isaiah 19:1). Okposuk edi se etiñde emi emende ndise owut, edi Abasi oyom nnyin ikut nte ñkpọ uwem emi mitimke idi akpañ-ñkpọ. Edieke isañade, inyuñ inyenede nneme ye Abasi, inyuñ itopde mbiomo nnyin idori enye, nnyin idiyakke mbiomo uwem emi onuk nnyin ọduọk. “Nturukpom emi efede ọdọk enyọñ ifinake idem ibaña nte enye edisañade ebe inyañ.”
Uwem eke eyakde esin ke uduak Abasi edi uwem eke enemde. David ama ọbọñ akam,. “Afo eyewut mi usuñ uwem: uyuhọ idaresit ke iso fo; ñkpọ inemesit ke ubọk nnasia fo ke nsinsi-nsinsi” (Psalm 16:11).
Ndima Mme Asua Fo
Ke ini emi mbon-ekọñ Syria ekedide ndisobo ye Elisha, enye okodu ke mbeñidem ebet mmọ. Enye ikedaha ofut iñwana ye mmọ; ikokotke mme Ukpat-ñkpọ Abasi edisobo mbon Syria. Elisha ikedighe anditiñ ntiñ-nnim ikọ ekpe-ikpe. Enye ama owut mfọnido kpa ye mme asua esie. Etiñ ebaña enye nte mbiet Christ. Jesus ke ini okodude ke isọñ ama ọdọhọ ete ke ikedighe kaña ini ikpe, ntre Enye ama oduri Idem Esie ọwọñọde ọkpọñ mmọ oro ekebiọñọde Enye. Enye ama ekpep mme anditiene Enye, “Ema mme asua mbufo, enyuñ ebọñ akam eyom ufọn mmọ eke enamde mbufo isin-enyin” (Matthew 5:44).
Elisha ọbọñ akam ete Abasi okim mbon-ekọñ Syria enyin; ndien enye ada mmọ usuñ ekesim akamba itie emi ekedide Samaria, ndien ebeñe Abasi afiak atat mmọ enyin. Enye ada do ke iso mmọ, kpa owo emi mmọ ekeyomde. Edi idahemi mmọ ekesine ofuri-ofuri ke ubọk esie, mbon Israel enyuñ ekanare mmọ ekuk. Edidem Israel ama oyom ndisobo mmọ ke ọtọ oro, edi Elisha ọsọsọp ọbọrọ, “Kuwot: wot mmọ eke afo omumde ke ofut fo ye utiga fo. Da uyo ye mmọñ nim ke iso mmọ, man mmọ eta enyuñ eñwọñ; ndien yak mmọ enyọñ etiene ete mmọ”. Nso oruk ima ke enye okowut mme asua esie! Emi onyuñ ọsuhọ nte mbet ofuri ererimbot ke ini ntarenyin emi nte ke inaha etuhọre mmọ emi emumde nte mbuot-ekọñ; edi Elisha ama anam se ibede oro, ama anam mbon-ekọñ Syria efiak enyọñ ufọk mmọ.
Mbon Syria ema enem esit ke mfọnido emi mmọ ekebọde, mmọ ema etre inyuñ isọpke itọñọ ntak ika ekọñ ye Israel.
Questions
MME MBUME1 Mme anie ekeka ekọñ ye Isreal?
2 Didie ke mmọ ekenam ekikere ndiñwana?
3 Nso idi ntak emi ekikere mmọ okokpude?
4 Anie akañwana ọnọ Israel?
5 Anie ke ekedọñ ete okomum Elisha?
6 Nso idi ntak emi Elisha mikokopke ndik?
7 Nso ñkpọ uñwam ke Abasi ọñwọñọ ọnọ nnyin ke ini afanikọñ?
8 Nnyin inyene ndinam didie ye mme asua nnyin?